VR 4.51 Kishkindha Kanda - Sarga 51 - Grantha

Collection of Spiritual and Devotional Literature in Various Indian Languages

View this in:

4.51 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡 - 𑌏𑌕𑌪𑌂𑌚𑌾𑌶 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌏𑌕𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।

𑌇𑌤𑍍𑌯𑍁𑌕𑍍𑌤𑍍𑌵𑌾 𑌹𑌨𑍁𑌮𑌾𑌂𑌸𑍍𑌤𑌤𑍍𑌰 𑌪𑍁𑌨𑌃 𑌕𑍃𑌷𑍍𑌣𑌾𑌜𑌿𑌨𑌾𑌂𑌬𑌰𑌾𑌮𑍍 ।
𑌅𑌬𑍍𑌰𑌵𑍀𑌤𑍍𑌤𑌾𑌂 𑌮𑌹𑌾𑌭𑌾𑌗𑌾𑌂 𑌤𑌾𑌪𑌸𑍀𑌂 𑌧𑌰𑍍𑌮𑌚𑌾𑌰𑌿𑌣𑍀𑌮𑍍 ॥ 1 ॥

𑌇𑌦𑌂 𑌪𑍍𑌰𑌵𑌿𑌷𑍍𑌟𑌾𑌸𑍍𑌸𑌹𑌸𑌾 𑌬𑌿𑌲𑌂 𑌤𑌿𑌮𑌿𑌰𑌸𑌂𑌵𑍃𑌤𑌮𑍍 ।
𑌕𑍍𑌷𑍁𑌤𑍍𑌪𑌿𑌪𑌾𑌸𑌾𑌪𑌰𑌿𑌶𑍍𑌰𑌾𑌂𑌤𑌾𑌃 𑌪𑌰𑌿𑌖𑌿𑌨𑍍𑌨𑌾𑌶𑍍𑌚 𑌸𑌰𑍍𑌵𑌶𑌃 ॥ 2 ॥

𑌮𑌹𑌦𑍍𑌧𑌰𑌣𑍍𑌯𑌾 𑌵𑌿𑌵𑌰𑌂 𑌪𑍍𑌰𑌵𑌿𑌷𑍍𑌟𑌾𑌃 𑌸𑍍𑌮 𑌪𑌿𑌪𑌾𑌸𑌿𑌤𑌾𑌃 ।
𑌇𑌮𑌾𑌂 𑌸𑍍𑌤𑍍𑌵𑍇𑌵𑌂𑌵𑌿𑌧𑌾𑌨𑍍𑌭𑌾𑌵𑌾𑌨𑍍𑌵𑌿𑌵𑌿𑌧𑌾𑌨𑌦𑍍𑌭𑍁𑌤𑍋𑌪𑌮𑌾𑌨𑍍 ॥ 3 ॥

𑌦𑍃𑌷𑍍𑌟𑍍𑌵𑌾 𑌵𑌯𑌂 𑌪𑍍𑌰𑌵𑍍𑌯𑌥𑌿𑌤𑌾𑌸𑍍𑌸𑌂𑌭𑍍𑌰𑌾𑌂𑌤𑌾 𑌨𑌷𑍍𑌟𑌚𑍇𑌤𑌸𑌃 ।
𑌕𑌸𑍍𑌯𑍈𑌤𑍇 𑌕𑌾𑌂𑌚𑌨𑌾 𑌵𑍃𑌕𑍍𑌷𑌾𑌸𑍍𑌤𑌰𑍁𑌣𑌾𑌦𑌿𑌤𑍍𑌯𑌸𑌨𑍍𑌨𑌿𑌭𑌾𑌃 ॥ 4 ॥

𑌶𑍁𑌚𑍀𑌨𑍍𑌯𑌭𑍍𑌯𑌵𑌹𑌾𑌰𑍍𑌯𑌾𑌣𑌿 𑌮𑍂𑌲𑌾𑌨𑌿 𑌚 𑌫𑌲𑌾𑌨𑌿 𑌚 ।
𑌕𑌾𑌂𑌚𑌨𑌾𑌨𑌿 𑌵𑌿𑌮𑌾𑌨𑌾𑌨𑌿 𑌰𑌾𑌜𑌤𑌾𑌨𑌿 𑌗𑍃𑌹𑌾𑌣𑌿 𑌚 ॥ 5 ॥

𑌤𑌪𑌨𑍀𑌯𑌗𑌵𑌾𑌕𑍍𑌷𑌾𑌣𑌿 𑌮𑌣𑌿𑌜𑌾𑌲𑌾𑌵𑍃𑌤𑌾𑌨𑌿 𑌚 ।
𑌪𑍁𑌷𑍍𑌪𑌿𑌤𑌾𑌃 𑌫𑌲𑌵𑌂𑌤𑌶𑍍𑌚 𑌪𑍁𑌣𑍍𑌯𑌾𑌸𑍍𑌸𑍁𑌰𑌭𑌿𑌗𑌂𑌧𑌿𑌨𑌃 ॥ 6 ॥

𑌇𑌮𑍇 𑌜𑌾𑌂𑌬𑍂𑌨𑌦𑌮𑌯𑌾𑌃 𑌪𑌾𑌦𑌪𑌾𑌃 𑌕𑌸𑍍𑌯 𑌤𑍇𑌜𑌸𑌾 ।
𑌕𑌾𑌂𑌚𑌨𑌾𑌨𑌿 𑌚 𑌪𑌦𑍍𑌮𑌾𑌨𑌿 𑌜𑌾𑌤𑌾𑌨𑌿 𑌵𑌿𑌮𑌲𑍇 𑌜𑌲𑍇 ॥ 𑍭 ॥

𑌕𑌥𑌂 𑌮𑌤𑍍𑌸𑍍𑌯𑌾𑌶𑍍𑌚 𑌸𑍌𑌵𑌰𑍍𑌣𑌾 𑌦𑍃𑌶𑍍𑌯𑌂𑌤𑍇 𑌸𑌹 𑌕𑌚𑍍𑌛𑌪𑍈𑌃 ।
𑌆𑌤𑍍𑌮𑌾𑌨𑌮𑌨𑍁𑌭𑌾𑌵𑌂 𑌚 𑌕𑌸𑍍𑌯 𑌚𑍈𑌤𑌤𑍍𑌤𑌪𑍋𑌬𑌲𑌮𑍍 ॥ 𑍮 ॥

𑌅𑌜𑌾𑌨𑌤𑌾𑌂 𑌨 𑌸𑍍𑌸𑌰𑍍𑌵𑍇𑌷𑌾𑌂 𑌸𑌰𑍍𑌵𑌮𑌾𑌖𑍍𑌯𑌾𑌤𑍁𑌮𑌰𑍍𑌹𑌸𑌿 ।
𑌏𑌵𑌮𑍁𑌕𑍍𑌤𑌾 𑌹𑌨𑍁𑌮𑌤𑌾 𑌤𑌾𑌪𑌸𑍀 𑌧𑌰𑍍𑌮𑌚𑌾𑌰𑌿𑌣𑍀 ॥ 𑍯 ॥

𑌪𑍍𑌰𑌤𑍍𑌯𑍁𑌵𑌾𑌚 𑌹𑌨𑍂𑌮𑌂𑌤𑌂 𑌸𑌰𑍍𑌵𑌭𑍂𑌤𑌹𑌿𑌤𑍇 𑌰𑌤𑌾 ।
𑌮𑌯𑍋 𑌨𑌾𑌮 𑌮𑌹𑌾𑌤𑍇𑌜𑌾 𑌮𑌾𑌯𑌾𑌵𑍀 𑌵𑌾𑌨𑌰𑌰𑍍𑌷𑌭𑌃 ॥ 10 ॥

𑌤𑍇𑌨𑍇𑌦𑌂 𑌨𑌿𑌰𑍍𑌮𑌿𑌤𑌂 𑌸𑌰𑍍𑌵𑌂 𑌮𑌾𑌯𑌯𑌾 𑌕𑌾𑌂𑌚𑌨𑌂 𑌵𑌨𑌮𑍍 ।
𑌪𑍁𑌰𑌾 𑌦𑌾𑌨𑌵𑌮𑍁𑌖𑍍𑌯𑌾𑌨𑌾𑌂 𑌵𑌿𑌶𑍍𑌵𑌕𑌰𑍍𑌮𑌾 𑌬𑌭𑍂𑌵 𑌹 ॥ 11 ॥

𑌯𑍇𑌨𑍇𑌦𑌂 𑌕𑌾𑌂𑌚𑌨𑌂 𑌦𑌿𑌵𑍍𑌯𑌂 𑌨𑌿𑌰𑍍𑌮𑌿𑌤𑌂 𑌭𑌵𑌨𑍋𑌤𑍍𑌤𑌮𑌮𑍍 ।
𑌸 𑌤𑍁 𑌵𑌰𑍍𑌷𑌸𑌹𑌸𑍍𑌰𑌾𑌣𑌿 𑌤𑌪𑌸𑍍𑌤𑌪𑍍𑌤𑍍𑌵𑌾 𑌮𑌹𑌾𑌵𑌨𑍇 ॥ 12 ॥

𑌪𑌿𑌤𑌾𑌮𑌹𑌾𑌦𑍍𑌵𑌰𑌂 𑌲𑍇𑌭𑍇 𑌸𑌰𑍍𑌵𑌮𑍌𑌶𑌨𑌸𑌂 𑌧𑌨𑌮𑍍 ।
𑌵𑌨𑌂 𑌵𑌿𑌧𑌾𑌯 𑌬𑌲𑌵𑌾𑌨𑍍𑌸𑌰𑍍𑌵𑌕𑌾𑌮𑍇𑌶𑍍𑌵𑌰𑌸𑍍𑌤𑌦𑌾 ॥ 13 ॥

𑌉𑌵𑌾𑌸 𑌸𑍁𑌖𑌿𑌤𑌃 𑌕𑌾𑌲𑌂 𑌕𑌂𑌚𑌿𑌦𑌸𑍍𑌮𑌿𑌨𑍍𑌮𑌹𑌾𑌵𑌨𑍇 ।
𑌤𑌮𑌪𑍍𑌸𑌰𑌸𑌿 𑌹𑍇𑌮𑌾𑌯𑌾𑌂 𑌸𑌕𑍍𑌤𑌂 𑌦𑌾𑌨𑌵𑌪𑍁𑌂𑌗𑌵𑌮𑍍 ॥ 14 ॥

𑌵𑌿𑌕𑍍𑌰𑌮𑍍𑌯𑍈𑌵𑌾𑌶𑌨𑌿𑌂 𑌗𑍃𑌹𑍍𑌯 𑌜𑌘𑌾𑌨𑍇𑌤𑍍𑌰𑌃 𑌪𑍁𑌰𑌂𑌦𑌰𑌃 ।
𑌇𑌦𑌂 𑌚 𑌬𑍍𑌰𑌹𑍍𑌮𑌣𑌾 𑌦𑌤𑍍𑌤𑌂 𑌹𑍇𑌮𑌾𑌯𑍈 𑌵𑌨𑌮𑍁𑌤𑍍𑌤𑌮𑌮𑍍 ॥ 15 ॥

𑌶𑌾𑌶𑍍𑌵𑌤𑌾𑌃 𑌕𑌾𑌮𑌭𑍋𑌗𑌶𑍍𑌚 𑌗𑍃𑌹𑌂 𑌚𑍇𑌦𑌂 𑌹𑌿𑌰𑌣𑍍𑌮𑌯𑌮𑍍 ।
𑌦𑍁𑌹𑌿𑌤𑌾 𑌮𑍇𑌰𑍁𑌸𑌾𑌵𑌰𑍍𑌣𑍇𑌰𑌹𑌂 𑌤𑌸𑍍𑌯𑌾𑌸𑍍𑌸𑍍𑌵𑌯𑌂𑌪𑍍𑌰𑌭𑌾 ॥ 16 ॥

𑌇𑌦𑌂 𑌰𑌕𑍍𑌷𑌾𑌮𑌿 𑌭𑌵𑌨𑌂 𑌹𑍇𑌮𑌾𑌯𑌾 𑌵𑌾𑌨𑌰𑍋𑌤𑍍𑌤𑌮 ।
𑌮𑌮 𑌪𑍍𑌰𑌿𑌯𑌸𑌖𑍀 𑌹𑍇𑌮𑌾 𑌨𑍃𑌤𑍍𑌤𑌗𑍀𑌤𑌵𑌿𑌶𑌾𑌰𑌦𑌾 ॥ 1𑍭 ॥

𑌤𑌯𑌾 𑌦𑌤𑍍𑌤𑌵𑌰𑌾 𑌚𑌾𑌸𑍍𑌮𑌿 𑌰𑌕𑍍𑌷𑌾𑌮𑌿 𑌭𑌵𑌨𑍋𑌤𑍍𑌤𑌮𑌮𑍍 ।
𑌕𑌿𑌂 𑌕𑌾𑌰𑍍𑌯𑌂 𑌕𑌸𑍍𑌯 𑌵𑌾 𑌹𑍇𑌤𑍋𑌃 𑌕𑌾𑌂𑌤𑌾𑌰𑌾𑌣𑌿 𑌪𑍍𑌰𑌪𑌶𑍍𑌯𑌥 ॥ 1𑍮 ॥

𑌕𑌥𑌂 𑌚𑍇𑌦𑌂 𑌵𑌨𑌂 𑌦𑍁𑌰𑍍𑌗𑌂 𑌯𑍁𑌷𑍍𑌮𑌾𑌭𑌿𑌰𑍁𑌪𑌲𑌕𑍍𑌷𑌿𑌤𑌮𑍍 ।
𑌇𑌮𑌾𑌨𑍍𑌯𑌭𑍍𑌯𑌵𑌹𑌾𑌰𑍍𑌯𑌾𑌣𑌿 𑌮𑍂𑌲𑌾𑌨𑌿 𑌚 𑌫𑌲𑌾𑌨𑌿 𑌚 ॥ 1𑍯 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌏𑌕𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥

Browse Related Categories: