𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌾𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌨𑌿𑌹𑌤𑌂 𑌦𑍂𑌷𑌣𑌂 𑌦𑍃𑌷𑍍𑌟𑍍𑌵𑌾 𑌰𑌣𑍇 𑌤𑍍𑌰𑌿𑌶𑌿𑌰𑌸𑌾 𑌸𑌹 ।
𑌖𑌰𑌸𑍍𑌯𑌾𑌪𑍍𑌯𑌭𑌵𑌤𑍍𑌤𑍍𑌰𑌾𑌸𑍋 𑌦𑍃𑌷𑍍𑌟𑍍𑌵𑌾 𑌰𑌾𑌮𑌸𑍍𑌯 𑌵𑌿𑌕𑍍𑌰𑌮𑌮𑍍 ॥ 1 ॥
𑌸 𑌦𑍃𑌷𑍍𑌟𑍍𑌵𑌾 𑌰𑌾𑌕𑍍𑌷𑌸𑌂 𑌸𑍈𑌨𑍍𑌯𑌮𑌵𑌿𑌸𑌹𑍍𑌯𑌂 𑌮𑌹𑌾𑌬𑌲𑌃 ।
𑌹𑌤𑌮𑍇𑌕𑍇𑌨 𑌰𑌾𑌮𑍇𑌣 𑌤𑍍𑌰𑌿𑌶𑌿𑌰𑍋𑌦𑍂𑌷𑌣𑌾𑌵𑌪𑌿 ॥ 2 ॥
𑌤𑌦𑍍𑌬𑌲𑌂 𑌹𑌤𑌭𑍂𑌯𑌿𑌷𑍍𑌠𑌂 𑌵𑌿𑌮𑌨𑌾𑌃 𑌪𑍍𑌰𑍇𑌕𑍍𑌷𑍍𑌯 𑌰𑌾𑌕𑍍𑌷𑌸𑌃 ।
𑌆𑌸𑌸𑌾𑌦 𑌖𑌰𑍋 𑌰𑌾𑌮𑌂 𑌨𑌮𑍁𑌚𑌿𑌰𑍍𑌵𑌾𑌸𑌵𑌂 𑌯𑌥𑌾 ॥ 3 ॥
𑌵𑌿𑌕𑍃𑌷𑍍𑌯 𑌬𑌲𑌵𑌚𑍍𑌚𑌾𑌪𑌂 𑌨𑌾𑌰𑌾𑌚𑌾𑌨𑍍𑌰𑌕𑍍𑌤𑌭𑍋𑌜𑌨𑌾𑌨𑍍 ।
𑌖𑌰𑌶𑍍𑌚𑌿𑌕𑍍𑌷𑍇𑌪 𑌰𑌾𑌮𑌾𑌯 𑌕𑍍𑌰𑍁𑌦𑍍𑌧𑌾𑌨𑌾𑌶𑍀𑌵𑌿𑌷𑌾𑌨𑌿𑌵 ॥ 4 ॥
𑌜𑍍𑌯𑌾𑌂 𑌵𑌿𑌧𑍂𑌨𑍍𑌵𑌂𑌸𑍁𑌬𑌹𑍁𑌶𑌶𑍍𑌶𑌿𑌕𑍍𑌷𑌯𑌾𑌸𑍍𑌤𑍍𑌰𑌾𑌣𑌿 𑌦𑌰𑍍𑌶𑌯𑌨𑍍 ।
𑌚𑌚𑌾𑌰 𑌸𑌮𑌰𑍇 𑌮𑌾𑌰𑍍𑌗𑌾𑌂𑌛𑌰𑍈 𑌰𑌥𑌗𑌤𑌃 𑌖𑌰𑌃 ॥ 5 ॥
𑌸 𑌸𑌰𑍍𑌵𑌾𑌶𑍍𑌚 𑌦𑌿𑌶𑍋 𑌬𑌾𑌣𑍈𑌃 𑌪𑍍𑌰𑌦𑌿𑌶𑌶𑍍𑌚 𑌮𑌹𑌾𑌰𑌥𑌃 ।
𑌪𑍂𑌰𑌯𑌾𑌮𑌾𑌸 𑌤𑌂 𑌦𑍃𑌷𑍍𑌟𑍍𑌵𑌾 𑌰𑌾𑌮𑍋𑌽𑌪𑌿 𑌸𑍁𑌮𑌹𑌦𑍍𑌧𑌨𑍁𑌃 ॥ 6 ॥
𑌸 𑌸𑌾𑌯𑌕𑍈𑌰𑍍𑌦𑍁𑌰𑍍𑌵𑌿𑌸𑌹𑍈𑌸𑍍𑌸𑌸𑍍𑌫𑍁𑌲𑌿𑌂𑌗𑍈𑌰𑌿𑌵𑌾𑌗𑍍𑌨𑌿𑌭𑌿𑌃 ।
𑌨𑌭𑌶𑍍𑌚𑌕𑌾𑌰𑌾𑌵𑌿𑌵𑌰𑌂 𑌪𑌰𑍍𑌜𑌨𑍍𑌯 𑌇𑌵 𑌵𑍃𑌷𑍍𑌟𑌿𑌭𑌿𑌃 ॥ ॥
𑌤𑌦𑍍𑌬𑌭𑍂𑌵 𑌶𑌿𑌤𑍈𑌰𑍍𑌬𑌾𑌣𑍈𑌃 𑌖𑌰𑌰𑌾𑌮𑌵𑌿𑌸𑌰𑍍𑌜𑌿𑌤𑍈𑌃 ।
𑌪𑌰𑍍𑌯𑌾𑌕𑌾𑌶𑌮𑌨𑌾𑌕𑌾𑌶𑌂 𑌸𑌰𑍍𑌵𑌤𑌶𑍍𑌶𑌰𑌸𑌂𑌕𑍁𑌲𑌮𑍍 ॥ ॥
𑌶𑌰𑌜𑌾𑌲𑌾𑌵𑍃𑌤𑌸𑍍𑌸𑍂𑌰𑍍𑌯𑍋 𑌨 𑌤𑌦𑌾 𑌸𑍍𑌮 𑌪𑍍𑌰𑌕𑌾𑌶𑌤𑍇 ।
𑌅𑌨𑍍𑌯𑍋𑌨𑍍𑌯𑌵𑌧𑌸𑌂𑌰𑌂𑌭𑌾𑌦𑍁𑌭𑌯𑍋𑌸𑍍𑌸𑌂𑌪𑍍𑌰𑌯𑍁𑌧𑍍𑌯𑌤𑍋𑌃 ॥ ॥
𑌤𑌤𑍋 𑌨𑌾𑌲𑍀𑌕𑌨𑌾𑌰𑌾𑌚𑍈𑌸𑍍𑌤𑍀𑌕𑍍𑌷𑍍𑌣𑌾𑌗𑍍𑌰𑍈𑌶𑍍𑌚 𑌵𑌿𑌕𑌰𑍍𑌣𑌿𑌭𑌿𑌃 ।
𑌆𑌜𑌘𑌾𑌨 𑌖𑌰𑍋 𑌰𑌾𑌮𑌂 𑌤𑍋𑌤𑍍𑌰𑍈𑌰𑌿𑌵 𑌮𑌹𑌾𑌦𑍍𑌵𑌿𑌪𑌮𑍍 ॥ 10 ॥
𑌤𑌂 𑌰𑌥𑌸𑍍𑌥𑌂 𑌧𑌨𑍁𑌷𑍍𑌪𑌾𑌣𑌿𑌂 𑌰𑌾𑌕𑍍𑌷𑌸𑌂 𑌪𑌰𑍍𑌯𑌵𑌸𑍍𑌥𑌿𑌤𑌮𑍍 ।
𑌦𑌦𑍃𑌶𑍁𑌸𑍍𑌸𑌰𑍍𑌵𑌭𑍂𑌤𑌾𑌨𑌿 𑌪𑌾𑌶𑌹𑌸𑍍𑌤𑌮𑌿𑌵𑌾𑌂𑌤𑌕𑌮𑍍 ॥ 11 ॥
𑌹𑌂𑌤𑌾𑌰𑌂 𑌸𑌰𑍍𑌵𑌸𑍈𑌨𑍍𑌯𑌸𑍍𑌯 𑌪𑍌𑌰𑍁𑌷𑍇 𑌪𑌰𑍍𑌯𑌵𑌸𑍍𑌥𑌿𑌤𑌮𑍍 ।
𑌪𑌰𑌿𑌶𑍍𑌰𑌾𑌂𑌤𑌂 𑌮𑌹𑌾𑌸𑌤𑍍𑌵𑌂 𑌮𑍇𑌨𑍇 𑌰𑌾𑌮𑌂 𑌖𑌰𑌸𑍍𑌤𑌦𑌾 ॥ 12 ॥
𑌤𑌂 𑌸𑌿𑌂𑌹𑌮𑌿𑌵 𑌵𑌿𑌕𑍍𑌰𑌾𑌂𑌤𑌂 𑌸𑌿𑌂𑌹𑌵𑌿𑌕𑍍𑌰𑌾𑌂𑌤𑌗𑌾𑌮𑌿𑌨𑌮𑍍 ।
𑌦𑍃𑌷𑍍𑌟𑍍𑌵𑌾 𑌨𑍋𑌦𑍍𑌵𑌿𑌜𑌤𑍇 𑌰𑌾𑌮𑌃 𑌸𑌿𑌂𑌹𑌃 𑌕𑍍𑌷𑍁𑌦𑍍𑌰𑌮𑍃𑌗𑌂 𑌯𑌥𑌾 ॥ 13 ॥
𑌤𑌤𑌃 𑌸𑍂𑌰𑍍𑌯𑌨𑌿𑌕𑌾𑌶𑍇𑌨 𑌰𑌥𑍇𑌨 𑌮𑌹𑌤𑌾 𑌖𑌰𑌃 ।
𑌆𑌸𑌸𑌾𑌦 𑌰𑌣𑍇 𑌰𑌾𑌮𑌂 𑌪𑌤𑌂𑌗 𑌇𑌵 𑌪𑌾𑌵𑌕𑌮𑍍 ॥ 14 ॥
𑌤𑌤𑍋𑌽𑌸𑍍𑌯 𑌸𑌶𑌰𑌂 𑌚𑌾𑌪𑌂 𑌮𑍁𑌷𑍍𑌟𑌿𑌦𑍇𑌶𑍇 𑌮𑌹𑌾𑌤𑍍𑌮𑌨𑌃 ।
𑌖𑌰𑌶𑍍𑌚𑌿𑌚𑍍𑌛𑍇𑌦 𑌰𑌾𑌮𑌸𑍍𑌯 𑌦𑌰𑍍𑌶𑌯𑌨𑍍𑌪𑌾𑌣𑌿𑌲𑌾𑌘𑌵𑌮𑍍 ॥ 15 ॥
𑌸 𑌪𑍁𑌨𑌸𑍍𑌤𑍍𑌵𑌪𑌰𑌾𑌨𑍍𑌸𑌪𑍍𑌤 𑌶𑌰𑌾𑌨𑌾𑌦𑌾𑌯 𑌵𑌰𑍍𑌮𑌣𑌿 ।
𑌨𑌿𑌜𑌘𑌾𑌨 𑌖𑌰𑌃 𑌕𑍍𑌰𑍁𑌦𑍍𑌧𑌶𑍍𑌶𑌕𑍍𑌰𑌾𑌶𑌨𑌿𑌸𑌮𑌪𑍍𑌰𑌭𑌾𑌨𑍍 ॥ 16 ॥
𑌤𑌤𑌸𑍍𑌤𑌤𑍍𑌪𑍍𑌰𑌹𑌤𑌂 𑌬𑌾𑌣𑍈𑌃 𑌖𑌰𑌮𑍁𑌕𑍍𑌤𑍈𑌸𑍍𑌸𑍁𑌪𑌰𑍍𑌵𑌭𑌿𑌃 ।
𑌪𑌪𑌾𑌤 𑌕𑌵𑌚𑌂 𑌭𑍂𑌮𑍌 𑌰𑌾𑌮𑌸𑍍𑌯𑌾𑌦𑌿𑌤𑍍𑌯𑌵𑌰𑍍𑌚𑌸𑌃 ॥ 1 ॥
𑌤𑌤𑌶𑍍𑌶𑌰𑌸𑌹𑌸𑍍𑌰𑍇𑌣 𑌰𑌾𑌮𑌮𑌪𑍍𑌰𑌤𑌿𑌮𑍌𑌜𑌸𑌮𑍍 ।
𑌅𑌰𑍍𑌦𑌯𑌿𑌤𑍍𑌵𑌾 𑌮𑌹𑌾𑌨𑌾𑌦𑌂 𑌨𑌨𑌾𑌦 𑌸𑌮𑌰𑍇 𑌖𑌰𑌃 ॥ 1 ॥
𑌸 𑌶𑌰𑍈𑌰𑌰𑍍𑌦𑌿𑌤𑌃 𑌕𑍍𑌰𑍁𑌦𑍍𑌧𑌸𑍍𑌸𑌰𑍍𑌵𑌗𑌾𑌤𑍍𑌰𑍇𑌷𑍁 𑌰𑌾𑌘𑌵𑌃 ।
𑌰𑌰𑌾𑌜 𑌸𑌮𑌰𑍇 𑌰𑌾𑌮𑍋 𑌵𑌿𑌧𑍂𑌮𑍋𑌽𑌗𑍍𑌨𑌿𑌰𑌿𑌵 𑌜𑍍𑌵𑌲𑌨𑍍 ॥ 1 ॥
𑌤𑌤𑍋 𑌗𑌂𑌭𑍀𑌰𑌨𑌿𑌰𑍍𑌹𑍍𑌰𑌾𑌦𑌂 𑌰𑌾𑌮𑌶𑍍𑌶𑌤𑍍𑌰𑍁𑌨𑌿𑌬𑌰𑍍𑌹𑌣𑌃 ।
𑌚𑌕𑌾𑌰𑌾𑌂𑌤𑌾𑌯 𑌸 𑌰𑌿𑌪𑍋𑌸𑍍𑌸𑌜𑍍𑌯𑌮𑌨𑍍𑌯𑌨𑍍𑌮𑌹𑌦𑍍𑌧𑌨𑍁𑌃 ॥ 20 ॥
𑌸𑍁𑌮𑌹𑌦𑍍𑌵𑍈𑌷𑍍𑌣𑌵𑌂 𑌯𑌤𑍍𑌤𑌦𑌤𑌿𑌸𑍃𑌷𑍍𑌟𑌂 𑌮𑌹𑌰𑍍𑌷𑌿𑌣𑌾 ।
𑌵𑌰𑌂 𑌤𑌦𑍍𑌧𑌨𑍁𑌰𑍁𑌦𑍍𑌯𑌮𑍍𑌯 𑌖𑌰𑌂 𑌸𑌮𑌭𑌿𑌧𑌾𑌵𑌤 ॥ 21 ॥
𑌤𑌤𑌃 𑌕𑌨𑌕𑌪𑍁𑌂𑌖𑍈𑌸𑍍𑌤𑍁 𑌶𑌰𑍈𑌸𑍍𑌸𑌨𑍍𑌨𑌤𑌪𑌰𑍍𑌵𑌭𑌿𑌃 ।
𑌬𑌿𑌭𑍇𑌦 𑌰𑌾𑌮𑌸𑍍𑌸𑌂𑌕𑍍𑌰𑍁𑌦𑍍𑌧𑌃 𑌖𑌰𑌸𑍍𑌯 𑌸𑌮𑌰𑍇 𑌧𑍍𑌵𑌜𑌮𑍍 ॥ 22 ॥
𑌸 𑌦𑌰𑍍𑌶𑌨𑍀𑌯𑍋 𑌬𑌹𑍁𑌧𑌾 𑌵𑌿𑌕𑍀𑌰𑍍𑌣𑌃 𑌕𑌾𑌂𑌚𑌨𑌧𑍍𑌵𑌜𑌃 ।
𑌜𑌗𑌾𑌮 𑌧𑌰𑌣𑍀𑌂 𑌸𑍂𑌰𑍍𑌯𑍋 𑌦𑍇𑌵𑌤𑌾𑌨𑌾𑌮𑌿𑌵𑌾𑌜𑍍𑌞𑌯𑌾 ॥ 23 ॥
𑌤𑌂 𑌚𑌤𑍁𑌰𑍍𑌭𑌿𑌃 𑌖𑌰𑌃 𑌕𑍍𑌰𑍁𑌦𑍍𑌧𑍋 𑌰𑌾𑌮𑌂 𑌗𑌾𑌤𑍍𑌰𑍇𑌷𑍁 𑌮𑌾𑌰𑍍𑌗𑌣𑍈𑌃 ।
𑌵𑌿𑌵𑍍𑌯𑌾𑌧 𑌯𑍁𑌧𑌿 𑌮𑌰𑍍𑌮𑌜𑍍𑌞𑍋 𑌮𑌾𑌤𑌂𑌗𑌮𑌿𑌵 𑌤𑍋𑌮𑌰𑍈𑌃 ॥ 24 ॥
𑌸 𑌰𑌾𑌮𑍋 𑌬𑌹𑍁𑌭𑌿𑌰𑍍𑌬𑌾𑌣𑍈𑌃 𑌖𑌰𑌕𑌾𑌰𑍍𑌮𑍁𑌕𑌨𑌿𑌸𑍍𑌸𑍃𑌤𑍈𑌃 ।
𑌵𑌿𑌦𑍍𑌧𑍋 𑌰𑍁𑌧𑌿𑌰𑌸𑌿𑌕𑍍𑌤𑌾𑌂𑌗𑍋 𑌬𑌭𑍂𑌵 𑌰𑍁𑌷𑌿𑌤𑍋 𑌭𑍃𑌶𑌮𑍍 ॥ 25 ॥
𑌸 𑌧𑌨𑍁𑌰𑍍𑌧𑌨𑍍𑌵𑌿𑌨𑌾𑌂 𑌶𑍍𑌰𑍇𑌷𑍍𑌠𑌃 𑌪𑍍𑌰𑌗𑍃𑌹𑍍𑌯 𑌪𑌰𑌮𑌾𑌹𑌵𑍇 ।
𑌮𑍁𑌮𑍋𑌚 𑌪𑌰𑌮𑍇𑌷𑍍𑌵𑌾𑌸𑌷𑍍𑌷𑌟𑍍𑌛𑌰𑌾𑌨𑌭𑌿𑌲𑌕𑍍𑌷𑌿𑌤𑌾𑌨𑍍 ॥ 26 ॥
𑌶𑌿𑌰𑌸𑍍𑌯𑍇𑌕𑍇𑌨 𑌬𑌾𑌣𑍇𑌨 𑌦𑍍𑌵𑌾𑌭𑍍𑌯𑌾𑌂 𑌬𑌹𑍍𑌵𑍋𑌰𑌥𑌾𑌰𑍍𑌦𑌯𑌤𑍍 ।
𑌤𑍍𑌰𑌿𑌭𑌿𑌶𑍍𑌚𑌂𑌦𑍍𑌰𑌾𑌰𑍍𑌧𑌵𑌕𑍍𑌤𑍍𑌰𑍈𑌶𑍍𑌚 𑌵𑌕𑍍𑌷𑌸𑍍𑌯𑌭𑌿𑌜𑌘𑌾𑌨 𑌹 ॥ 2 ॥
𑌤𑌤𑌃 𑌪𑌶𑍍𑌚𑌾𑌨𑍍𑌮𑌹𑌾𑌤𑍇𑌜𑌾 𑌨𑌾𑌰𑌾𑌚𑌾𑌨𑍍𑌭𑌾𑌸𑍍𑌕𑌰𑍋𑌪𑌮𑌾𑌨𑍍 ।
𑌜𑌿𑌘𑌾𑌂𑌸𑍂 𑌰𑌾𑌕𑍍𑌷𑌸𑌂𑌕𑍃𑌦𑍍𑌧𑌸𑍍𑌤𑍍𑌰𑌯𑍋𑌦𑌶 𑌸𑌮𑌾𑌦𑌦𑍇 ॥ 2 ॥
𑌤𑌤𑍋𑌽𑌸𑍍𑌯 𑌯𑍁𑌗𑌮𑍇𑌕𑍇𑌨 𑌚𑌤𑍁𑌰𑍍𑌭𑌿𑌶𑍍𑌚𑌤𑍁𑌰𑍋 𑌹𑌯𑌾𑌨𑍍 ।
𑌷𑌷𑍍𑌠𑍇𑌨 𑌤𑍁 𑌶𑌿𑌰𑌸𑍍𑌸𑌂𑌖𑍍𑌯𑍇 𑌖𑌰𑌸𑍍𑌯 𑌰𑌥𑌸𑌾𑌰𑌥𑍇𑌃 ॥ 2 ॥
𑌤𑍍𑌰𑌿𑌭𑌿𑌸𑍍𑌤𑍍𑌰𑌿𑌵𑍇𑌣𑍁𑌂 𑌬𑌲𑌵𑌾𑌂𑌦𑍍𑌵𑌾𑌭𑍍𑌯𑌾𑌮𑌕𑍍𑌷𑌂 𑌮𑌹𑌾𑌬𑌲𑌃 ।
𑌦𑍍𑌵𑌾𑌦𑌶𑍇𑌨 𑌤𑍁 𑌬𑌾𑌣𑍇𑌨 𑌖𑌰𑌸𑍍𑌯 𑌸𑌶𑌰𑌂 𑌧𑌨𑍁𑌃 ॥ 30 ॥
𑌛𑌿𑌤𑍍𑌵𑌾 𑌵𑌜𑍍𑌰𑌨𑌿𑌕𑌾𑌶𑍇𑌨 𑌰𑌾𑌘𑌵𑌃 𑌪𑍍𑌰𑌹𑌸𑌨𑍍𑌨𑌿𑌵 ।
𑌤𑍍𑌰𑌯𑍋𑌦𑌶𑍇𑌨𑍇𑌂𑌦𑍍𑌰𑌸𑌮𑍋 𑌬𑌿𑌭𑍇𑌦 𑌸𑌮𑌰𑍇 𑌖𑌰𑌮𑍍 ॥ 31 ॥
𑌪𑍍𑌰𑌭𑌗𑍍𑌨𑌧𑌨𑍍𑌵𑌾 𑌵𑌿𑌰𑌥𑍋 𑌹𑌤𑌾𑌶𑍍𑌵𑍋 𑌹𑌤𑌸𑌾𑌰𑌥𑌿𑌃 ।
𑌗𑌦𑌾𑌪𑌾𑌣𑌿𑌰𑌵𑌪𑍍𑌲𑍁𑌤𑍍𑌯 𑌤𑌸𑍍𑌥𑍌 𑌭𑍂𑌮𑍌 𑌖𑌰𑌸𑍍𑌤𑌦𑌾 ॥ 32 ॥
𑌤𑌤𑍍𑌕𑌰𑍍𑌮 𑌰𑌾𑌮𑌸𑍍𑌯 𑌮𑌹𑌾𑌰𑌥𑌸𑍍𑌯 𑌸𑌮𑍇𑌤𑍍𑌯 𑌦𑍇𑌵𑌾𑌶𑍍𑌚 𑌮𑌹𑌰𑍍𑌷𑌯𑌶𑍍𑌚 ।
𑌅𑌪𑍂𑌜𑌯𑌨𑍍𑌪𑍍𑌰𑌾𑌂𑌜𑌲𑌯𑌃 𑌪𑍍𑌰𑌹𑍃𑌷𑍍𑌟𑌾𑌃 𑌤𑌦𑌾 𑌵𑌿𑌮𑌾𑌨𑌾𑌗𑍍𑌰𑌗𑌤𑌾𑌸𑍍𑌸𑌮𑍇𑌤𑌾𑌃 ॥ 33 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌅𑌷𑍍𑌟𑌾𑌵𑌿𑌂𑌶𑌸𑍍𑌸𑌰𑍍𑌗𑌃 ॥
