𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌏𑌕𑌾𑌦𑌶𑌸𑍍𑌸𑌰𑍍𑌗𑌃 ।
𑌭𑍂𑌯 𑌏𑌵 𑌹𑌿 𑌰𑌾𑌜𑍇𑌂𑌦𑍍𑌰 𑌶𑍃𑌣𑍁 𑌮𑍇 𑌵𑌚𑌨𑌂 𑌹𑌿𑌤𑌮𑍍 ।
𑌯𑌥𑌾 𑌸 𑌦𑍇𑌵𑌪𑍍𑌰𑌵𑌰𑌃 𑌕𑌥𑌾𑌯𑌾𑌮𑍇𑌵𑌮𑌬𑍍𑌰𑌵𑍀𑌤𑍍 ॥ 1 ॥
𑌇𑌕𑍍𑌷𑍍𑌵𑌾𑌕𑍂𑌣𑌾𑌂 𑌕𑍁𑌲𑍇 𑌜𑌾𑌤𑍋 𑌭𑌵𑌿𑌷𑍍𑌯𑌤𑌿 𑌸𑍁𑌧𑌾𑌰𑍍𑌮𑌿𑌕𑌃 ।
𑌰𑌾𑌜𑌾 𑌦𑌶𑌰𑌥𑍋 𑌨𑌾𑌮𑍍𑌨𑌾 𑌶𑍍𑌰𑍀𑌮𑌾𑌨𑍍𑌸𑌤𑍍𑌯𑌪𑍍𑌰𑌤𑌿𑌶𑍍𑌰𑌵𑌃 ॥ 2 ॥
𑌅𑌂𑌗𑌰𑌾𑌜𑍇𑌨 𑌸𑌖𑍍𑌯𑌂 𑌚 𑌤𑌸𑍍𑌯 𑌰𑌾𑌜𑍍𑌞𑍋 𑌭𑌵𑌿𑌷𑍍𑌯𑌤𑌿 ।
𑌕𑌨𑍍𑌯𑌾 𑌚𑌾𑌸𑍍𑌯 𑌮𑌹𑌾𑌭𑌾𑌗𑌾 𑌶𑌾𑌂𑌤𑌾 𑌨𑌾𑌮 𑌭𑌵𑌿𑌷𑍍𑌯𑌤𑌿 ॥ 3 ॥
𑌪𑍁𑌤𑍍𑌰𑌸𑍍𑌤𑍁 𑌸𑍋𑌽𑌂𑌗𑌰𑌾𑌜𑌸𑍍𑌯 𑌰𑍋𑌮𑌪𑌾𑌦 𑌇𑌤𑌿 𑌶𑍍𑌰𑍁𑌤𑌃 ।
𑌤𑌂 𑌸 𑌰𑌾𑌜𑌾 𑌦𑌶𑌰𑌥𑍋 𑌗𑌮𑌿𑌷𑍍𑌯𑌤𑌿 𑌮𑌹𑌾𑌯𑌶𑌾𑌃 ॥ 4 ॥
𑌅𑌨𑌪𑌤𑍍𑌯𑍋𑌽𑌸𑍍𑌮𑌿 𑌧𑌰𑍍𑌮𑌾𑌤𑍍𑌮𑌨𑍍 𑌶𑌾𑌂𑌤𑌾𑌭𑌰𑍍𑌤𑌾 𑌮𑌮 𑌕𑍍𑌰𑌤𑍁𑌮𑍍 ।
𑌆𑌹𑌰𑍇𑌤 𑌤𑍍𑌵𑌯𑌾𑌜𑍍𑌞𑌪𑍍𑌤𑌸𑍍𑌸𑌂𑌤𑌾𑌨𑌾𑌰𑍍𑌥𑌂 𑌕𑍁𑌲𑌸𑍍𑌯 𑌚 ॥ 5 ॥
𑌶𑍍𑌰𑍁𑌤𑍍𑌵𑌾 𑌰𑌾𑌜𑍍𑌞𑍋𑌽𑌥 𑌤𑌦𑍍𑌵𑌾𑌕𑍍𑌯𑌂 𑌮𑌨𑌸𑌾 𑌸 𑌵𑌿𑌚𑌿𑌂𑌤𑍍𑌯 𑌚 ।
𑌪𑍍𑌰𑌦𑌾𑌸𑍍𑌯𑌤𑍇 𑌪𑍁𑌤𑍍𑌰𑌵𑌂𑌤𑌂 𑌶𑌾𑌂𑌤𑌾𑌭𑌰𑍍𑌤𑌾𑌰𑌮𑌾𑌤𑍍𑌮𑌵𑌾𑌨𑍍 ॥ 6 ॥
𑌪𑍍𑌰𑌤𑌿𑌗𑍃𑌹𑍍𑌯 𑌚 𑌤𑌂 𑌵𑌿𑌪𑍍𑌰𑌂 𑌸 𑌰𑌾𑌜𑌾 𑌵𑌿𑌗𑌤𑌜𑍍𑌵𑌰𑌃 ।
𑌆𑌹𑌰𑌿𑌷𑍍𑌯𑌤𑌿 𑌤𑌂 𑌯𑌜𑍍𑌞𑌂 𑌪𑍍𑌰𑌹𑍃𑌷𑍍𑌟𑍇𑌨𑌾𑌂𑌤𑌰𑌾𑌤𑍍𑌮𑌨𑌾 ॥ ॥
𑌤𑌂 𑌚 𑌰𑌾𑌜𑌾 𑌦𑌶𑌰𑌥𑍋 𑌯𑌷𑍍𑌟𑍁𑌕𑌾𑌮𑌃 𑌕𑍃𑌤𑌾𑌂𑌜𑌲𑌿𑌃 ।
𑌋𑌶𑍍𑌯𑌶𑍃𑌂𑌗𑌂 𑌦𑍍𑌵𑌿𑌜𑌶𑍍𑌰𑍇𑌷𑍍𑌠𑌂 𑌵𑌰𑌯𑌿𑌷𑍍𑌯𑌤𑌿 𑌧𑌰𑍍𑌮𑌵𑌿𑌤𑍍 ॥ ॥
𑌯𑌜𑍍𑌞𑌾𑌰𑍍𑌥𑌂 𑌪𑍍𑌰𑌸𑌵𑌾𑌰𑍍𑌥𑌂 𑌚 𑌸𑍍𑌵𑌰𑍍𑌗𑌾𑌰𑍍𑌥𑌂 𑌚 𑌨𑌰𑍇𑌶𑍍𑌵𑌰𑌃 ।
𑌲𑌭𑌤𑍇 𑌚 𑌸 𑌤𑌂 𑌕𑌾𑌮𑌂 𑌦𑍍𑌵𑌿𑌜𑌮𑍁𑌖𑍍𑌯𑌾𑌦𑍍𑌵𑌿𑌶𑌾𑌂𑌪𑌤𑌿𑌃 ॥ ॥
𑌪𑍁𑌤𑍍𑌰𑌾𑌶𑍍𑌚𑌾𑌸𑍍𑌯 𑌭𑌵𑌿𑌷𑍍𑌯𑌂𑌤𑌿 𑌚𑌤𑍍𑌵𑌾𑌰𑍋𑌽𑌮𑌿𑌤𑌵𑌿𑌕𑍍𑌰𑌮𑌾𑌃 ।
𑌵𑌂𑌶𑌪𑍍𑌰𑌤𑌿𑌷𑍍𑌠𑌾𑌨𑌕𑌰𑌾𑌸𑍍𑌸𑌰𑍍𑌵𑌲𑍋𑌕𑍇𑌷𑍁 𑌵𑌿𑌶𑍍𑌰𑍁𑌤𑌾𑌃 ॥ 10 ॥
𑌏𑌵𑌂 𑌸 𑌦𑍇𑌵𑌪𑍍𑌰𑌵𑌰𑌃 𑌪𑍂𑌰𑍍𑌵𑌂 𑌕𑌥𑌿𑌤𑌵𑌾𑌨𑍍𑌕𑌥𑌾𑌮𑍍 ।
𑌸𑌨𑌤𑍍𑌕𑍁𑌮𑌾𑌰𑍋 𑌭𑌗𑌵𑌾𑌨𑍍𑌪𑍁𑌰𑌾 𑌦𑍇𑌵𑌯𑍁𑌗𑍇 𑌪𑍍𑌰𑌭𑍁𑌃 ॥ 11 ॥
𑌸 𑌤𑍍𑌵𑌂 𑌪𑍁𑌰𑍁𑌷𑌶𑌾𑌰𑍍𑌦𑍂𑌲 𑌤𑌮𑌾𑌨𑌯 𑌸𑍁𑌸𑌤𑍍𑌕𑍃𑌤𑌮𑍍 ।
𑌸𑍍𑌵𑌯𑌮𑍇𑌵 𑌮𑌹𑌾𑌰𑌾𑌜 𑌗𑌤𑍍𑌵𑌾 𑌸𑌬𑌲𑌵𑌾𑌹𑌨𑌃 ॥ 12 ॥
𑌅𑌨𑍁𑌮𑌾𑌨𑍍𑌯 𑌵𑌸𑌿𑌷𑍍𑌠𑌂 𑌚 𑌸𑍂𑌤𑌵𑌾𑌕𑍍𑌯𑌂 𑌨𑌿𑌶𑌮𑍍𑌯 𑌚 ।
𑌸𑌾𑌂𑌤𑌃𑌪𑍁𑌰𑌸𑍍𑌸𑌹𑌾𑌮𑌾𑌤𑍍𑌯𑌃 𑌪𑍍𑌰𑌯𑌯𑍌 𑌯𑌤𑍍𑌰 𑌸 𑌦𑍍𑌵𑌿𑌜𑌃 ॥ 13 ॥
𑌵𑌨𑌾𑌨𑌿 𑌸𑌰𑌿𑌤𑌶𑍍𑌚𑍈𑌵 𑌵𑍍𑌯𑌤𑌿𑌕𑍍𑌰𑌮𑍍𑌯 𑌶𑌨𑍈𑌶𑍍𑌶𑌨𑍈𑌃 ।
𑌅𑌭𑌿𑌚𑌕𑍍𑌰𑌾𑌮 𑌤𑌂 𑌦𑍇𑌶𑌂 𑌯𑌤𑍍𑌰 𑌵𑍈 𑌮𑍁𑌨𑌿𑌪𑍁𑌂𑌗𑌵𑌃 ॥ 14 ॥
𑌆𑌸𑌾𑌦𑍍𑌯 𑌤𑌂 𑌦𑍍𑌵𑌿𑌜𑌶𑍍𑌰𑍇𑌷𑍍𑌠𑌂 𑌰𑍋𑌮𑌪𑌾𑌦𑌸𑌮𑍀𑌪𑌗𑌮𑍍 ।
𑌋𑌷𑌿𑌪𑍁𑌤𑍍𑌰𑌂 𑌦𑌦𑌰𑍍𑌶𑌾𑌦𑍌 𑌦𑍀𑌪𑍍𑌯𑌮𑌾𑌨𑌮𑌿𑌵𑌾𑌨𑌲𑌮𑍍 ॥ 15 ॥
𑌤𑌤𑍋 𑌰𑌾𑌜𑌾 𑌯𑌥𑌾𑌨𑍍𑌯𑌾𑌯𑌂 𑌪𑍂𑌜𑌾𑌂 𑌚𑌕𑍍𑌰𑍇 𑌵𑌿𑌶𑍇𑌷𑌤𑌃 ।
𑌸𑌖𑌿𑌤𑍍𑌵𑌾𑌤𑍍𑌤𑌸𑍍𑌯 𑌵𑍈 𑌰𑌾𑌜𑍍𑌞𑌃 𑌪𑍍𑌰𑌹𑍃𑌷𑍍𑌟𑍇𑌨𑌾𑌂𑌤𑌰𑌾𑌤𑍍𑌮𑌨𑌾 ॥ 16 ॥
𑌰𑍋𑌮𑌪𑌾𑌦𑍇𑌨 𑌚𑌾𑌖𑍍𑌯𑌾𑌤𑌮𑍃𑌷𑌿𑌪𑍁𑌤𑍍𑌰𑌾𑌯 𑌧𑍀𑌮𑌤𑍇 ।
𑌸𑌖𑍍𑌯𑌂 𑌸𑌂𑌬𑌂𑌧𑌕𑌂 𑌚𑍈𑌵 𑌤𑌦𑌾 𑌤𑌂 𑌪𑍍𑌰𑌤𑍍𑌯𑌪𑍂𑌜𑌯𑌤𑍍 ॥ 1 ॥
𑌏𑌵𑌂 𑌸𑍁𑌸𑌤𑍍𑌕𑍃𑌤𑌸𑍍𑌤𑍇𑌨 𑌸𑌹𑍋𑌷𑌿𑌤𑍍𑌵𑌾 𑌨𑌰𑌰𑍍𑌷𑌭𑌃 ।
𑌸𑌪𑍍𑌤𑌾𑌷𑍍𑌟𑌦𑌿𑌵𑌸𑌾𑌨𑍍𑌰𑌾𑌜𑌾 𑌰𑌾𑌜𑌾𑌨𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 1 ॥
𑌶𑌾𑌂𑌤𑌾 𑌤𑌵 𑌸𑍁𑌤𑌾 𑌰𑌾𑌜𑌨𑍍 𑌸𑌹 𑌭𑌰𑍍𑌤𑍍𑌰𑌾 𑌵𑌿𑌶𑌾𑌂𑌪𑌤𑍇 ।
𑌮𑌦𑍀𑌯𑌨𑌗𑌰𑌂 𑌯𑌾𑌤𑍁 𑌕𑌾𑌰𑍍𑌯𑌂 𑌹𑌿 𑌮𑌹𑌦𑍁𑌦𑍍𑌯𑌤𑌮𑍍 ॥ 1 ॥
𑌤𑌥𑍇𑌤𑌿 𑌰𑌾𑌜𑌾 𑌸𑌂𑌶𑍍𑌰𑍁𑌤𑍍𑌯 𑌗𑌮𑌨𑌂 𑌤𑌸𑍍𑌯 𑌧𑍀𑌮𑌤𑌃 ।
𑌉𑌵𑌾𑌚 𑌵𑌚𑌨𑌂 𑌵𑌿𑌪𑍍𑌰𑌂 𑌗𑌚𑍍𑌛 𑌤𑍍𑌵𑌂 𑌸𑌹 𑌭𑌾𑌰𑍍𑌯𑌯𑌾 ॥ 20 ॥
𑌋𑌷𑌿𑌪𑍁𑌤𑍍𑌰𑌃 𑌪𑍍𑌰𑌤𑌿𑌶𑍍𑌰𑍁𑌤𑍍𑌯 𑌤𑌥𑍇𑌤𑍍𑌯𑌾𑌹 𑌨𑍃𑌪𑌂 𑌤𑌦𑌾 ।
𑌸 𑌨𑍃𑌪𑍇𑌣𑌾𑌭𑍍𑌯𑌨𑍁𑌜𑍍𑌞𑌾𑌤𑌃 𑌪𑍍𑌰𑌯𑌯𑍌 𑌸𑌹 𑌭𑌾𑌰𑍍𑌯𑌯𑌾 ॥ 21 ॥
𑌤𑌾𑌵𑌨𑍍𑌯𑍋𑌨𑍍𑌯𑌾𑌂𑌜𑌲𑌿𑌂 𑌕𑍃𑌤𑍍𑌵𑌾 𑌸𑍍𑌨𑍇𑌹𑌾𑌤𑍍𑌸𑌂𑌶𑍍𑌲𑌿𑌷𑍍𑌯 𑌚𑍋𑌰𑌸𑌾 ।
𑌨𑌨𑌂𑌦𑌤𑍁𑌰𑍍𑌦𑌶𑌰𑌥𑍋 𑌰𑍋𑌮𑌪𑌾𑌦𑌶𑍍𑌚 𑌵𑍀𑌰𑍍𑌯𑌵𑌾𑌨𑍍 ॥ 22 ॥
𑌤𑌤𑌸𑍍𑌸𑍁𑌹𑍃𑌦𑌮𑌾𑌪𑍃𑌚𑍍𑌛𑍍𑌯 𑌪𑍍𑌰𑌸𑍍𑌥𑌿𑌤𑍋 𑌰𑌘𑍁𑌨𑌂𑌦𑌨𑌃 ।
𑌪𑍌𑌰𑍇𑌭𑍍𑌯𑌃 𑌪𑍍𑌰𑍇𑌷𑌯𑌾𑌮𑌾𑌸 𑌦𑍂𑌤𑌾𑌨𑍍𑌵𑍈 𑌶𑍀𑌘𑍍𑌰𑌗𑌾𑌮𑌿𑌨𑌃 ॥ 23 ॥
𑌕𑍍𑌰𑌿𑌯𑌤𑌾𑌂 𑌨𑌗𑌰𑌂 𑌸𑌰𑍍𑌵𑌂 𑌕𑍍𑌷𑌿𑌪𑍍𑌰𑌮𑍇𑌵 𑌸𑍍𑌵𑌲𑌂𑌕𑍃𑌤𑌮𑍍 ।
𑌧𑍂𑌪𑌿𑌤𑌂 𑌸𑌿𑌕𑍍𑌤𑌸𑌮𑍍𑌮𑍃𑌷𑍍𑌟𑌂 𑌪𑌤𑌾𑌕𑌾𑌭𑌿𑌰𑌲𑌂𑌕𑍃𑌤𑌮𑍍 ॥ 24 ॥
𑌤𑌤𑌃 𑌪𑍍𑌰𑌹𑍃𑌷𑍍𑌟𑌾𑌃 𑌪𑍌𑌰𑌾𑌸𑍍𑌤𑍇 𑌶𑍍𑌰𑍁𑌤𑍍𑌵𑌾 𑌰𑌾𑌜𑌾𑌨𑌮𑌾𑌗𑌤𑌮𑍍 ।
𑌤𑌥𑌾 𑌪𑍍𑌰𑌚𑌕𑍍𑌰𑍁𑌸𑍍𑌤𑌤𑍍𑌸𑌰𑍍𑌵𑌂 𑌰𑌾𑌜𑍍𑌞𑌾 𑌯𑌤𑍍𑌪𑍍𑌰𑍇𑌷𑌿𑌤𑌂 𑌤𑌦𑌾 ॥ 25 ॥
𑌤𑌤𑌸𑍍𑌸𑍍𑌵𑌲𑌂𑌕𑍃𑌤𑌂 𑌰𑌾𑌜𑌾 𑌨𑌗𑌰𑌂 𑌪𑍍𑌰𑌵𑌿𑌵𑍇𑌶 𑌹 ।
𑌶𑌂𑌖𑌦𑍁𑌂𑌦𑍁𑌭𑌿𑌨𑌿𑌰𑍍𑌘𑍋𑌷𑍈𑌃 𑌪𑍁𑌰𑌸𑍍𑌕𑍃𑌤𑍍𑌯 𑌦𑍍𑌵𑌿𑌜𑌰𑍍𑌷𑌭𑌮𑍍 ॥ 26 ॥
𑌤𑌤𑌃 𑌪𑍍𑌰𑌮𑍁𑌦𑌿𑌤𑌾𑌸𑍍𑌸𑌰𑍍𑌵𑍇 𑌦𑍃𑌷𑍍𑌟𑍍𑌵𑌾 𑌤𑌂 𑌨𑌾𑌗𑌰𑌾 𑌦𑍍𑌵𑌿𑌜𑌮𑍍 ।
𑌪𑍍𑌰𑌵𑍇𑌶𑍍𑌯𑌮𑌾𑌨𑌂 𑌸𑌤𑍍𑌕𑍃𑌤𑍍𑌯 𑌨𑌰𑍇𑌂𑌦𑍍𑌰𑍇𑌣𑍇𑌂𑌦𑍍𑌰𑌕𑌰𑍍𑌮𑌣𑌾 ॥ 2 ॥
𑌅𑌂𑌤𑌃𑌪𑍁𑌰𑌂 𑌪𑍍𑌰𑌵𑍇𑌶𑍍𑌯𑍈𑌨𑌂 𑌪𑍂𑌜𑌾𑌂 𑌕𑍃𑌤𑍍𑌵𑌾 𑌚 𑌶𑌾𑌸𑍍𑌤𑍍𑌰𑌤𑌃 ।
𑌕𑍃𑌤𑌕𑍃𑌤𑍍𑌯𑌂 𑌤𑌦𑌾𑌤𑍍𑌮𑌾𑌨𑌂 𑌮𑍇𑌨𑍇 𑌤𑌸𑍍𑌯𑍋𑌪𑌵𑌾𑌹𑌨𑌾𑌤𑍍 ॥ 2 ॥
𑌅𑌂𑌤𑌃𑌪𑍁𑌰𑌸𑍍𑌤𑍍𑌰𑌿𑌯𑌸𑍍𑌸𑌰𑍍𑌵𑌾𑌶𑍍𑌶𑌾𑌂𑌤𑌾𑌂 𑌦𑍃𑌷𑍍𑌟𑍍𑌵𑌾 𑌤𑌥𑌾𑌗𑌤𑌾𑌮𑍍 ।
𑌸𑌹 𑌭𑌰𑍍𑌤𑍍𑌰𑌾 𑌵𑌿𑌶𑌾𑌲𑌾𑌕𑍍𑌷𑍀𑌂 𑌪𑍍𑌰𑍀𑌤𑍍𑌯𑌾𑌨𑌂𑌦𑌮𑍁𑌪𑌾𑌗𑌮𑌨𑍍 ॥ 2 ॥
𑌪𑍂𑌜𑍍𑌯𑌮𑌾𑌨𑌾 𑌚 𑌤𑌾𑌭𑌿𑌸𑍍𑌸𑌾 𑌰𑌾𑌜𑍍𑌞𑌾 𑌚𑍈𑌵 𑌵𑌿𑌶𑍇𑌷𑌤𑌃 ।
𑌉𑌵𑌾𑌸 𑌤𑌤𑍍𑌰 𑌸𑍁𑌖𑌿𑌤𑌾 𑌕𑌂𑌚𑌿𑌤𑍍𑌕𑌾𑌲𑌂 𑌸𑌹𑌰𑍍𑌤𑍍𑌵𑌿𑌜𑌾 ॥ 30 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌏𑌕𑌾𑌦𑌶𑌸𑍍𑌸𑌰𑍍𑌗𑌃 ॥
