𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌅𑌥𑌾𑌂𑌗𑌦𑌸𑍍𑌤𑌦𑌾 𑌸𑌰𑍍𑌵𑌾𑌨𑍍𑌵𑌾𑌨𑌰𑌾𑌨𑌿𑌦𑌮𑌬𑍍𑌰𑌵𑍀𑌤𑍍 ।
𑌪𑌰𑌿𑌶𑍍𑌰𑌾𑌂𑌤𑍋 𑌮𑌹𑌾𑌪𑍍𑌰𑌾𑌜𑍍𑌞𑌸𑍍𑌸𑌮𑌾𑌶𑍍𑌵𑌾𑌸𑍍𑌯 𑌶𑌨𑍈𑌰𑍍𑌵𑌚𑌃 ॥ 1 ॥
𑌵𑌨𑌾𑌨𑌿 𑌗𑌿𑌰𑌯𑍋 𑌨𑌦𑍍𑌯𑍋 𑌦𑍁𑌰𑍍𑌗𑌾𑌣𑌿 𑌗𑌹𑌨𑌾𑌨𑌿 𑌚 ।
𑌦𑌰𑍍𑌯𑍋 𑌗𑌿𑌰𑌿𑌗𑍁𑌹𑌾𑌶𑍍𑌚𑍈𑌵 𑌵𑌿𑌚𑌿𑌤𑌾𑌨𑌿 𑌸𑌮𑌂𑌤𑌤𑌃 ॥ 2 ॥
𑌤𑌤𑍍𑌰 𑌤𑌤𑍍𑌰 𑌸𑌹𑌾𑌸𑍍𑌮𑌾𑌭𑌿𑌰𑍍𑌜𑌾𑌨𑌕𑍀 𑌨 𑌚 𑌦𑍃𑌶𑍍𑌯𑌤𑍇 ।
𑌤𑌦𑍍𑌵𑌾 𑌰𑌕𑍍𑌷𑍋 𑌹𑍃𑌤𑌾 𑌯𑍇𑌨 𑌸𑍀𑌤𑌾 𑌸𑍁𑌰𑌸𑍁𑌤𑍋𑌪𑌮𑌾 ॥ 3 ॥
𑌕𑌾𑌲𑌶𑍍𑌚 𑌨𑍋 𑌮𑌹𑌾𑌨𑍍𑌯𑌾𑌤𑌸𑍍𑌸𑍁𑌗𑍍𑌰𑍀𑌵𑌶𑍍𑌚𑍋𑌗𑍍𑌰𑌶𑌾𑌸𑌨𑌃 ।
𑌤𑌸𑍍𑌮𑌾𑌦𑍍𑌭𑌵𑌂𑌤𑌸𑍍𑌸𑌹𑌿𑌤𑌾 𑌵𑌿𑌚𑌿𑌨𑍍𑌵𑌂𑌤𑍁 𑌸𑌮𑌂𑌤𑌤𑌃 ॥ 4 ॥
𑌵𑌿𑌹𑌾𑌯 𑌤𑌂𑌦𑍍𑌰𑍀𑌂 𑌶𑍋𑌕𑌂 𑌚 𑌨𑌿𑌦𑍍𑌰𑌾𑌂 𑌚𑍈𑌵 𑌸𑌮𑍁𑌤𑍍𑌥𑌿𑌤𑌾𑌮𑍍 ।
𑌵𑌿𑌚𑌿𑌨𑍁𑌧𑍍𑌵𑌂 𑌯𑌥𑌾 𑌸𑍀𑌤𑌾𑌂 𑌪𑌶𑍍𑌯𑌾𑌮𑍋 𑌜𑌨𑌕𑌾𑌤𑍍𑌮𑌜𑌾𑌮𑍍 ॥ 5 ॥
𑌅𑌨𑌿𑌰𑍍𑌵𑍇𑌦𑌂 𑌚 𑌦𑌾𑌕𑍍𑌷𑍍𑌯𑌂 𑌚 𑌮𑌨𑌸𑌶𑍍𑌚𑌾𑌪𑌰𑌾𑌜𑌯𑌃 ।
𑌕𑌾𑌰𑍍𑌯𑌸𑌿𑌦𑍍𑌧𑌿𑌕𑌰𑌾𑌣𑍍𑌯𑌾𑌹𑍁𑌸𑍍𑌤𑌸𑍍𑌮𑌾𑌦𑍇𑌤𑌦𑍍𑌬𑍍𑌰𑌵𑍀𑌮𑍍𑌯𑌹𑌮𑍍 ॥ 6 ॥
𑌅𑌦𑍍𑌯𑌾𑌪𑌿 𑌤𑌦𑍍𑌵𑌨𑌂 𑌦𑍁𑌰𑍍𑌗𑌂 𑌵𑌿𑌚𑌿𑌨𑍍𑌵𑌂𑌤𑍁 𑌵𑌨𑍌𑌕𑌸𑌃 ।
𑌖𑍇𑌦𑌂 𑌤𑍍𑌯𑌕𑍍𑌤𑍍𑌵𑌾 𑌪𑍁𑌨𑌸𑍍𑌸𑌰𑍍𑌵𑍈𑌰𑍍𑌵𑌨𑌮𑍇𑌤𑌦𑍍𑌵𑌿𑌚𑍀𑌯𑌤𑌾𑌮𑍍 ॥ ॥
𑌅𑌵𑌶𑍍𑌯𑌂 𑌕𑍍𑌰𑌿𑌯𑌮𑌾𑌣𑌸𑍍𑌯 𑌦𑍃𑌶𑍍𑌯𑌤𑍇 𑌕𑌰𑍍𑌮𑌣𑌃 𑌫𑌲𑌮𑍍 ।
𑌅𑌲𑌂 𑌨𑌿𑌰𑍍𑌵𑍇𑌦𑌮𑌾𑌗𑌮𑍍𑌯 𑌨 𑌹𑌿 𑌨𑍋 𑌮𑍀𑌲𑌨𑌂 𑌕𑍍𑌷𑌮𑌮𑍍 ॥ ॥
𑌸𑍁𑌗𑍍𑌰𑍀𑌵𑌃 𑌕𑍋𑌪𑌨𑍋 𑌰𑌾𑌜𑌾 𑌤𑍀𑌕𑍍𑌷𑍍𑌣𑌦𑌂𑌡𑌶𑍍𑌚 𑌵𑌾𑌨𑌰𑌃 ।
𑌭𑍇𑌤𑌵𑍍𑌯𑌂 𑌤𑌸𑍍𑌯 𑌸𑌤𑌤𑌂 𑌰𑌾𑌮𑌸𑍍𑌯 𑌚 𑌮𑌹𑌾𑌤𑍍𑌮𑌨𑌃 ॥ ॥
𑌹𑌿𑌤𑌾𑌰𑍍𑌥𑌮𑍇𑌤𑌦𑍁𑌕𑍍𑌤𑌂 𑌵𑌃 𑌕𑍍𑌰𑌿𑌯𑌤𑌾𑌂 𑌯𑌦𑌿 𑌰𑍋𑌚𑌤𑍇 ।
𑌉𑌚𑍍𑌯𑌤𑌾𑌂 𑌵𑌾 𑌕𑍍𑌷𑌮𑌂 𑌯𑌨𑍍𑌨𑌸𑍍𑌸𑌰𑍍𑌵𑍇𑌷𑌾𑌮𑍇𑌵 𑌵𑌾𑌨𑌰𑌾𑌃 ॥ 10 ॥
𑌅𑌂𑌗𑌦𑌸𑍍𑌯 𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌵𑌚𑌨𑌂 𑌗𑌂𑌧𑌮𑌾𑌦𑌨𑌃 ।
𑌉𑌵𑌾𑌚𑌾𑌵𑍍𑌯𑌕𑍍𑌤𑌯𑌾 𑌵𑌾𑌚𑌾 𑌪𑌿𑌪𑌾𑌸𑌾𑌶𑍍𑌰𑌮𑌖𑌿𑌨𑍍𑌨𑌯𑌾 ॥ 11 ॥
𑌸𑌦𑍃𑌶𑌂 𑌖𑌲𑍁 𑌵𑍋 𑌵𑌾𑌕𑍍𑌯𑌮𑌂𑌗𑌦𑍋 𑌯𑌦𑍁𑌵𑌾𑌚 𑌹 ।
𑌹𑌿𑌤𑌂 𑌚𑍈𑌵𑌾𑌨𑍁𑌕𑍂𑌲𑌂 𑌚 𑌕𑍍𑌰𑌿𑌯𑌤𑌾𑌮𑌸𑍍𑌯 𑌭𑌾𑌷𑌿𑌤𑌮𑍍 ॥ 12 ॥
𑌪𑍁𑌨𑌰𑍍𑌮𑌾𑌰𑍍𑌗𑌾𑌮𑌹𑍈 𑌶𑍈𑌲𑌾𑌨𑍍𑌕𑌂𑌦𑌰𑌾𑌂𑌶𑍍𑌚 𑌦𑌰𑍀𑌸𑍍𑌤𑌥𑌾 ।
𑌕𑌾𑌨𑌨𑌾𑌨𑌿 𑌚 𑌶𑍂𑌨𑍍𑌯𑌾𑌨𑌿 𑌗𑌿𑌰𑌿𑌪𑍍𑌰𑌸𑍍𑌰𑌵𑌣𑌾𑌨𑌿 𑌚 ॥ 13 ॥
𑌯𑌥𑍋𑌦𑍍𑌦𑌿𑌷𑍍𑌟𑌾𑌨𑌿 𑌸𑌰𑍍𑌵𑌾𑌣𑌿 𑌸𑍁𑌗𑍍𑌰𑍀𑌵𑍇𑌣 𑌮𑌹𑌾𑌤𑍍𑌮𑌨𑌾 ।
𑌵𑌿𑌚𑌿𑌨𑍍𑌵𑌂𑌤𑍁 𑌵𑌨𑌂 𑌸𑌰𑍍𑌵𑍇 𑌗𑌿𑌰𑌿𑌦𑍁𑌰𑍍𑌗𑌾𑌣𑌿 𑌸𑌰𑍍𑌵𑌶𑌃 ॥ 14 ॥
𑌤𑌤𑌸𑍍𑌸𑌮𑍁𑌤𑍍𑌥𑌾𑌯 𑌪𑍁𑌨𑌰𑍍𑌵𑌾𑌨𑌰𑌾𑌸𑍍𑌤𑍇 𑌮𑌹𑌾𑌬𑌲𑌾𑌃 ।
𑌵𑌿𑌂𑌧𑍍𑌯𑌕𑌾𑌨𑌨𑌸𑌂𑌕𑍀𑌰𑍍𑌣𑌾𑌂 𑌵𑌿𑌚𑍇𑌰𑍁𑌰𑍍𑌦𑌕𑍍𑌷𑌿𑌣𑌾𑌂 𑌦𑌿𑌶𑌮𑍍 ॥ 15 ॥
𑌤𑍇 𑌶𑌾𑌰𑌦𑌾𑌭𑍍𑌰𑌪𑍍𑌰𑌤𑌿𑌮𑌂 𑌶𑍍𑌰𑍀𑌮𑌦𑍍𑌰𑌜𑌤𑌪𑌰𑍍𑌵𑌤𑌮𑍍 ।
𑌶𑍃𑌂𑌗𑌵𑌂𑌤𑌂 𑌦𑌰𑍀𑌮𑌂𑌤𑌮𑌧𑌿𑌰𑍁𑌹𑍍𑌯 𑌚 𑌵𑌾𑌨𑌰𑌾𑌃 ॥ 16 ॥
𑌤𑌤𑍍𑌰 𑌲𑍋𑌧𑍍𑌰𑌵𑌨𑌂 𑌰𑌮𑍍𑌯𑌂 𑌸𑌪𑍍𑌤𑌪𑌰𑍍𑌣𑌵𑌨𑌾𑌨𑌿 𑌚 ।
𑌵𑍍𑌯𑌚𑌿𑌨𑍍𑌵𑌂𑌸𑍍𑌤𑍇 𑌹𑌰𑌿𑌵𑌰𑌾𑌸𑍍𑌸𑍀𑌤𑌾 𑌦𑌰𑍍𑌶𑌨𑌕𑌾𑌂𑌕𑍍𑌷𑌿𑌣𑌃 ॥ 1 ॥
𑌤𑌸𑍍𑌯𑌾𑌗𑍍𑌰𑌮𑌧𑌿𑌰𑍂𑌢𑌾𑌸𑍍𑌤𑍇 𑌶𑍍𑌰𑌾𑌂𑌤𑌾 𑌵𑌿𑌪𑍁𑌲𑌵𑌿𑌕𑍍𑌰𑌮𑌾𑌃 ।
𑌨 𑌪𑌶𑍍𑌯𑌂𑌤𑌿 𑌸𑍍𑌮 𑌵𑍈𑌦𑍇𑌹𑍀𑌂 𑌰𑌾𑌮𑌸𑍍𑌯 𑌮𑌹𑌿𑌷𑍀𑌂 𑌪𑍍𑌰𑌿𑌯𑌾𑌮𑍍 ॥ 1 ॥
𑌤𑍇 𑌤𑍁 𑌦𑍃𑌷𑍍𑌟𑌿𑌗𑌤𑌂 𑌕𑍃𑌤𑍍𑌵𑌾 𑌤𑌂 𑌶𑍈𑌲𑌂 𑌬𑌹𑍁𑌕𑌂𑌦𑌰𑌮𑍍 ।
𑌅𑌵𑌾𑌰𑍋𑌹𑌂𑌤 𑌹𑌰𑌯𑍋 𑌵𑍀𑌕𑍍𑌷𑌮𑌾𑌣𑌾𑌸𑍍𑌸𑌮𑌂𑌤𑌤𑌃 ॥ 1 ॥
𑌅𑌵𑌰𑍁𑌹𑍍𑌯 𑌤𑌤𑍋 𑌭𑍂𑌮𑌿𑌂 𑌶𑍍𑌰𑌾𑌂𑌤𑌾 𑌵𑌿𑌗𑌤𑌚𑍇𑌤𑌸𑌃 ।
𑌸𑍍𑌥𑌿𑌤𑍍𑌵𑌾 𑌮𑍁𑌹𑍂𑌰𑍍𑌤𑌂 𑌤𑌤𑍍𑌰𑌾𑌥 𑌵𑍃𑌕𑍍𑌷𑌮𑍂𑌲𑌮𑍁𑌪𑌾𑌶𑍍𑌰𑌿𑌤𑌾𑌃 ॥ 20 ॥
𑌤𑍇 𑌮𑍁𑌹𑍂𑌰𑍍𑌤𑌂 𑌸𑌮𑌾𑌶𑍍𑌵𑌸𑍍𑌤𑌾𑌃 𑌕𑌿𑌂𑌚𑌿𑌦𑍍𑌭𑌗𑍍𑌨𑌪𑌰𑌿𑌶𑍍𑌰𑌮𑌾𑌃 ।
𑌪𑍁𑌨𑌰𑍇𑌵𑍋𑌦𑍍𑌯𑌤𑌾𑌃 𑌕𑍃𑌤𑍍𑌸𑍍𑌨𑌾𑌂 𑌮𑌾𑌰𑍍𑌗𑌿𑌤𑍁𑌂 𑌦𑌕𑍍𑌷𑌿𑌣𑌾𑌂 𑌦𑌿𑌶𑌮𑍍 ॥ 21 ॥
𑌹𑌨𑍁𑌮𑌤𑍍𑌪𑍍𑌰𑌮𑍁𑌖𑌾𑌸𑍍𑌤𑍇 𑌤𑍁 𑌪𑍍𑌰𑌸𑍍𑌥𑌿𑌤𑌾𑌃 𑌪𑍍𑌲𑌵𑌗𑌰𑍍𑌷𑌭𑌾𑌃 ।
𑌵𑌿𑌂𑌧𑍍𑌯𑌮𑍇𑌵𑌾𑌦𑌿𑌤𑌸𑍍𑌤𑌾𑌵𑌦𑍍𑌵𑌿𑌚𑍇𑌰𑍁𑌸𑍍𑌤𑍇 𑌸𑌮𑌂𑌤𑌤𑌃 ॥ 22 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌏𑌕𑍋𑌨𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
