𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌤𑌸𑍍𑌤𑍁 𑌰𑌕𑍍𑌷𑍋𑌧𑌿𑌪𑌤𑌿𑌰𑍍𑌮𑌹𑌾𑌤𑍍𑌮𑌾 𑌹𑌨𑍂𑌮𑌤𑌾𑌕𑍍𑌷𑍇 𑌨𑌿𑌹𑌤𑍇 𑌕𑍁𑌮𑌾𑌰𑍇 ।
𑌮𑌨𑌸𑍍𑌸𑌮𑌾𑌧𑌾𑌯 𑌸𑌦𑍇𑌵𑌕𑌲𑍍𑌪𑌂 𑌸𑌮𑌾𑌦𑌿𑌦𑍇𑌶𑍇𑌂𑌦𑍍𑌰𑌜𑌿𑌤𑌂 𑌸𑌰𑍋𑌷𑌃 ॥ 1 ॥
𑌤𑍍𑌵𑌮𑌸𑍍𑌤𑍍𑌰𑌵𑌿𑌚𑍍𑌛𑌸𑍍𑌤𑍍𑌰𑌵𑌿𑌦𑌾𑌂 𑌵𑌰𑌿𑌷𑍍𑌠𑌸𑍍𑌸𑍁𑌰𑌾𑌸𑍁𑌰𑌾𑌣𑌾𑌮𑌪𑌿 𑌶𑍋𑌕𑌦𑌾𑌤𑌾 ।
𑌸𑍁𑌰𑍇𑌷𑍁 𑌸𑍇𑌂𑌦𑍍𑌰𑍇𑌷𑍁 𑌚 𑌦𑍃𑌷𑍍𑌟𑌕𑌰𑍍𑌮𑌾 𑌪𑌿𑌤𑌾𑌮𑌹𑌾𑌰𑌾𑌧𑌨𑌸𑌂𑌚𑌿𑌤𑌾𑌸𑍍𑌤𑍍𑌰𑌃 ॥ 2 ॥
𑌤𑌵𑌾𑌸𑍍𑌤𑍍𑌰𑌬𑌲𑌮𑌾𑌸𑌾𑌦𑍍𑌯 𑌸𑌸𑍁𑌰𑌾𑌃 𑌸𑌮𑌰𑍁𑌦𑍍𑌗𑌣𑌾𑌃 ।
𑌨 𑌶𑍇𑌕𑍁𑌸𑍍𑌸𑌮𑌰𑍇 𑌸𑍍𑌥𑌾𑌤𑍁𑌂 𑌸𑍁𑌰𑍇𑌶𑍍𑌵𑌰𑌸𑌮𑌾𑌶𑍍𑌰𑌿𑌤𑌾𑌃 ॥ 3 ॥
𑌨 𑌕𑌶𑍍𑌚𑌿𑌤𑍍𑌤𑍍𑌰𑌿𑌷𑍁 𑌲𑍋𑌕𑍇𑌷𑍁 𑌸𑌂𑌯𑍁𑌗𑍇𑌨 𑌗𑌤𑌶𑍍𑌰𑌮𑌃 ।
𑌭𑍁𑌜𑌵𑍀𑌰𑍍𑌯𑌾𑌭𑌿𑌗𑍁𑌪𑍍𑌤𑌶𑍍𑌚 𑌤𑌪𑌸𑌾 𑌚𑌾𑌭𑌿𑌰𑌕𑍍𑌷𑌿𑌤𑌃 ॥ 4 ॥
𑌦𑍇𑌶𑌕𑌾𑌲𑌵𑌿𑌭𑌾𑌗𑌜𑍍𑌞𑌸𑍍𑌤𑍍𑌵𑌮𑍇𑌵 𑌮𑌤𑌿𑌸𑌤𑍍𑌤𑌮𑌃 ।
𑌨 𑌤𑍇𑌽𑌸𑍍𑌤𑍍𑌯𑌶𑌕𑍍𑌯𑌂 𑌸𑌮𑌰𑍇𑌷𑍁 𑌕𑌰𑍍𑌮𑌣𑌾 𑌨 𑌤𑍇𑌽𑌸𑍍𑌤𑍍𑌯𑌕𑌾𑌰𑍍𑌯𑌂 𑌮𑌤𑌿𑌪𑍂𑌰𑍍𑌵𑌮𑌂𑌤𑍍𑌰𑌣𑍇 ।
𑌨 𑌸𑍋𑌽𑌸𑍍𑌤𑌿 𑌕𑌶𑍍𑌚𑌿𑌤𑍍𑌤𑍍𑌰𑌿𑌷𑍁 𑌸𑌂𑌗𑍍𑌰𑌹𑍇𑌷𑍁 𑌵𑍈 𑌨 𑌵𑍇𑌦 𑌯𑌸𑍍𑌤𑍇𑌽𑌸𑍍𑌤𑍍𑌰𑌬𑌲𑌂 𑌬𑌲𑌂 𑌚 𑌤𑍇 ॥ 5 ॥
𑌮𑌮𑌾𑌨𑍁𑌰𑍂𑌪𑌂 𑌤𑌪𑌸𑍋 𑌬𑌲𑌂 𑌚 𑌤𑍇 𑌪𑌰𑌾𑌕𑍍𑌰𑌮𑌶𑍍𑌚𑌾𑌸𑍍𑌤𑍍𑌰𑌬𑌲𑌂 𑌚 𑌸𑌂𑌯𑍁𑌗𑍇 ।
𑌨 𑌤𑍍𑌵𑌾𑌂 𑌸𑌮𑌾𑌸𑌾𑌦𑍍𑌯 𑌰𑌣𑌾𑌵𑌮𑌰𑍍𑌦𑍇 𑌮𑌨𑌶𑍍𑌶𑍍𑌰𑌮𑌂 𑌗𑌚𑍍𑌛𑌤𑌿 𑌨𑌿𑌶𑍍𑌚𑌿𑌤𑌾𑌰𑍍𑌥𑌮𑍍 ॥ 6 ॥
𑌨𑌿𑌹𑌤𑌾𑌃 𑌕𑌿𑌂𑌕𑌰𑌾𑌸𑍍𑌸𑌰𑍍𑌵𑍇 𑌜𑌂𑌬𑍁𑌮𑌾𑌲𑍀 𑌚 𑌰𑌾𑌕𑍍𑌷𑌸𑌃 ।
𑌅𑌮𑌾𑌤𑍍𑌯𑌪𑍁𑌤𑍍𑌰𑌾 𑌵𑍀𑌰𑌾𑌶𑍍𑌚 𑌪𑌂𑌚 𑌸𑍇𑌨𑌾𑌗𑍍𑌰𑌯𑌾𑌯𑌿𑌨𑌃 ॥ ॥
𑌬𑌲𑌾𑌨𑌿 𑌸𑍁𑌸𑌮𑍃𑌦𑍍𑌧𑌾𑌨𑌿 𑌸𑌾𑌶𑍍𑌵𑌨𑌾𑌗𑌰𑌥𑌾𑌨𑌿 𑌚 ।
𑌸𑌹𑍋𑌦𑌰𑌸𑍍𑌤𑍇 𑌦𑌯𑌿𑌤𑌃 𑌕𑍁𑌮𑌾𑌰𑍋𑌽𑌕𑍍𑌷𑌶𑍍𑌚 𑌸𑍂𑌦𑌿𑌤𑌃 ॥ ॥
𑌨 𑌹𑌿 𑌤𑍇𑌷𑍍𑌵𑍇𑌵 𑌮𑍇 𑌸𑌾𑌰𑍋 𑌯𑌸𑍍𑌤𑍍𑌵𑌯𑍍𑌯𑌰𑌿𑌨𑌿𑌷𑍂𑌦𑌨 ।
𑌇𑌦𑌂 𑌹𑌿 𑌦𑍃𑌷𑍍𑌟𑍍𑌵𑌾 𑌮𑌤𑌿𑌮𑌨𑍍𑌮𑌹𑌦𑍍𑌬𑌲𑌂 𑌕𑌪𑍇𑌃 𑌪𑍍𑌰𑌭𑌾𑌵𑌂 𑌚 𑌪𑌰𑌾𑌕𑍍𑌰𑌮𑌂 𑌚 ।
𑌤𑍍𑌵𑌮𑌾𑌤𑍍𑌮𑌨𑌶𑍍𑌚𑌾𑌪𑌿 𑌸𑌮𑍀𑌕𑍍𑌷𑍍𑌯 𑌸𑌾𑌰𑌂 𑌕𑍁𑌰𑍁𑌷𑍍𑌵 𑌵𑍇𑌗𑌂 𑌸𑍍𑌵𑌬𑌲𑌾𑌨𑍁𑌰𑍂𑌪𑌮𑍍 ॥ ॥
𑌬𑌲𑌾𑌵𑌮𑌰𑍍𑌥𑌸𑍍𑌤𑌯𑌿 𑌸𑌨𑍍𑌨𑌿𑌕𑍃𑌷𑍍𑌟𑍇 𑌯𑌥𑌾 𑌗𑌤𑍇 𑌶𑌾𑌮𑍍𑌯𑌤𑌿 𑌶𑌾𑌂𑌤𑌶𑌤𑍍𑌰𑍌 ।
𑌤𑌥𑌾 𑌸𑌮𑍀𑌕𑍍𑌷𑍍𑌯𑌾𑌤𑍍𑌮𑌬𑌲𑌂 𑌪𑌰𑌂 𑌚 𑌸𑌮𑌾𑌰𑌭𑌸𑍍𑌵𑌾𑌸𑍍𑌤𑍍𑌰𑌵𑌿𑌦𑌾𑌂 𑌵𑌰𑌿𑌷𑍍𑌠 ॥ 10 ॥
𑌨 𑌵𑍀𑌰𑌸𑍇𑌨𑌾 𑌗𑌣𑌶𑍋𑌚𑍍𑌯𑌵𑌂𑌤𑌿 𑌨 𑌵𑌜𑍍𑌰𑌮𑌾𑌦𑌾𑌯 𑌵𑌿𑌶𑌾𑌲𑌸𑌾𑌰𑌮𑍍 ।
𑌨 𑌮𑌾𑌰𑍁𑌤𑌸𑍍𑌯𑌾𑌸𑍍𑌯 𑌗𑌤𑍇𑌃 𑌪𑍍𑌰𑌮𑌾𑌣𑌂 𑌨 𑌚𑌾𑌗𑍍𑌨𑌿𑌕𑌲𑍍𑌪𑌃 𑌕𑌰𑌣𑍇𑌨 𑌹𑌂𑌤𑍁𑌮𑍍 ॥ 11 ॥
𑌤𑌮𑍇𑌵𑌮𑌰𑍍𑌥𑌂 𑌪𑍍𑌰𑌸𑌮𑍀𑌕𑍍𑌷𑍍𑌯 𑌸𑌮𑍍𑌯𑌕𑍍 𑌸𑍍𑌵𑌕𑌰𑍍𑌮𑌸𑌾𑌮𑍍𑌯𑌾𑌦𑍍𑌧𑌿 𑌸𑌮𑌾𑌹𑌿𑌤𑌾𑌤𑍍𑌮𑌾 ।
𑌸𑍍𑌮𑌰𑌂𑌶𑍍𑌚 𑌦𑌿𑌵𑍍𑌯𑌂 𑌧𑌨𑍁𑌷𑍋𑌽𑌸𑍍𑌤𑍍𑌰𑌵𑍀𑌰𑍍𑌯𑌂 𑌵𑍍𑌰𑌜𑌾𑌕𑍍𑌷𑌤𑌂 𑌕𑌰𑍍𑌮 𑌸𑌮𑌾𑌰𑌭𑌸𑍍𑌵 ॥ 12 ॥
𑌨 𑌖𑌲𑍍𑌵𑌿𑌯𑌂 𑌮𑌤𑌿𑌶𑍍𑌶𑍍𑌰𑍇𑌷𑍍𑌠𑌾 𑌯𑌤𑍍𑌤𑍍𑌵𑌾𑌂 𑌸𑌂𑌪𑍍𑌰𑍇𑌷𑌯𑌾𑌮𑍍𑌯𑌹𑌮𑍍 ।
𑌇𑌯𑌂 𑌚 𑌰𑌾𑌜𑌧𑌰𑍍𑌮𑌾𑌣𑌾𑌂 𑌕𑍍𑌷𑌤𑍍𑌰𑌿𑌯𑌸𑍍𑌯 𑌮𑌤𑌿𑌰𑍍𑌮𑌤𑌾 ॥ 13 ॥
𑌨𑌾𑌨𑌾𑌶𑌸𑍍𑌤𑍍𑌰𑍇𑌷𑍁 𑌸𑌂𑌗𑍍𑌰𑌾𑌮𑍇 𑌵𑍈𑌶𑌾𑌰𑌦𑍍𑌯𑌮𑌰𑌿𑌂𑌦𑌮 ।
𑌅𑌵𑌶𑍍𑌯𑌮𑍇𑌵 𑌬𑍋𑌦𑍍𑌧𑌵𑍍𑌯𑌂 𑌕𑌾𑌮𑍍𑌯𑌶𑍍𑌚 𑌵𑌿𑌜𑌯𑍋 𑌰𑌣𑍇 ॥ 14 ॥
𑌤𑌤𑌃 𑌪𑌿𑌤𑍁𑌸𑍍𑌤𑌦𑍍𑌵𑌚𑌨𑌂 𑌨𑌿𑌶𑌮𑍍𑌯 𑌪𑍍𑌰𑌦𑌕𑍍𑌷𑌿𑌣𑌂 𑌦𑌕𑍍𑌷𑌸𑍁𑌤𑌪𑍍𑌰𑌭𑌾𑌵𑌃 ।
𑌚𑌕𑌾𑌰 𑌭𑌰𑍍𑌤𑌾𑌰𑌮𑌦𑍀𑌨𑌸𑌤𑍍𑌤𑍍𑌵𑍋 𑌰𑌣𑌾𑌯 𑌵𑍀𑌰𑌃 𑌪𑍍𑌰𑌤𑌿𑌪𑌨𑍍𑌨𑌬𑍁𑌦𑍍𑌧𑌿𑌃 ॥ 15 ॥
𑌤𑌤𑌸𑍍𑌤𑍈 𑌸𑍍𑌸𑍍𑌵𑌗𑌣𑍈𑌰𑌿𑌷𑍍𑌟𑍈𑌰𑌿𑌂𑌦𑍍𑌰𑌜𑌿𑌤𑍍 𑌪𑍍𑌰𑌤𑌿𑌪𑍂𑌜𑌿𑌤𑌃 ।
𑌯𑍁𑌦𑍍𑌧𑍋𑌦𑍍𑌧𑌤𑌃 𑌕𑍃𑌤𑍋𑌤𑍍𑌸𑌾𑌹𑌸𑍍𑌸𑌂𑌗𑍍𑌰𑌾𑌮𑌂 𑌪𑍍𑌰𑌤𑍍𑌯𑌪𑌦𑍍𑌯𑌤 ॥ 16 ॥
𑌶𑍍𑌰𑍀𑌮𑌾𑌨𑍍𑌪𑌦𑍍𑌮𑌪𑌲𑌾𑌶𑌾𑌕𑍍𑌷𑍋 𑌰𑌾𑌕𑍍𑌷𑌸𑌾𑌧𑌿𑌪𑌤𑍇𑌸𑍍𑌸𑍁𑌤𑌃 ।
𑌨𑌿𑌰𑍍𑌜𑌗𑌾𑌮 𑌮𑌹𑌾𑌤𑍇𑌜𑌾𑌸𑍍𑌸𑌮𑍁𑌦𑍍𑌰 𑌇𑌵 𑌪𑌰𑍍𑌵𑌸𑍁 ॥ 1 ॥
𑌸 𑌪𑌕𑍍𑌷𑌿𑌰𑌾𑌜𑍋𑌪𑌮𑌤𑍁𑌲𑍍𑌯𑌵𑍇𑌗𑍈 ।
𑌰𑍍𑌵𑍍𑌯𑌾𑌳𑍈𑌶𑍍𑌚𑌤𑍁𑌰𑍍𑌭𑌿𑌃 𑌸𑌿𑌤𑌤𑍀𑌕𑍍𑌷𑍍𑌣𑌦𑌮𑍍𑌷𑍍𑌟𑍍𑌰𑍈𑌃 ।
𑌰𑌥𑌂 𑌸𑌮𑌾𑌯𑍁𑌕𑍍𑌤𑌮𑌸𑌮𑍍𑌗𑌵𑍇𑌗𑌮𑍍 ।
𑌸𑌮𑌾𑌰𑍁𑌰𑍋𑌹𑍇𑌂𑌦𑍍𑌰𑌜𑌿𑌦𑌿𑌂𑌦𑍍𑌰𑌕𑌲𑍍𑌪𑌃 ॥ 1 ॥
𑌸 𑌰𑌥𑍀 𑌧𑌨𑍍𑌵𑌿𑌨𑌾𑌂 𑌶𑍍𑌰𑍇𑌷𑍍𑌠𑌃 𑌶𑌸𑍍𑌤𑍍𑌰𑌜𑍍𑌞𑍋𑌸𑍍𑌤𑍍𑌰𑌵𑌿𑌦𑌾𑌂 𑌵𑌰𑌃 ।
𑌰𑌥𑍇𑌨𑌾𑌭𑌿𑌯𑌯𑍌 𑌕𑍍𑌷𑌿𑌪𑍍𑌰𑌂 𑌹𑌨𑍁𑌮𑌾𑌨𑍍𑌯𑌤𑍍𑌰 𑌸𑍋𑌽𑌭𑌵𑌤𑍍 ॥ 1 ॥
𑌸 𑌤𑌸𑍍𑌯 𑌰𑌥𑌨𑌿𑌰𑍍𑌘𑍋𑌷𑌂 𑌜𑍍𑌯𑌾𑌸𑍍𑌵𑌨𑌂 𑌕𑌾𑌰𑍍𑌮𑍁𑌕𑌸𑍍𑌯 𑌚 ।
𑌨𑌿𑌶𑌮𑍍𑌯 𑌹𑌰𑌿𑌵𑍀𑌰𑍋𑌽𑌸𑍌 𑌸𑌂𑌪𑍍𑌰𑌹𑍃𑌷𑍍𑌟𑌤𑌰𑍋𑌽𑌭𑌵𑌤𑍍 ॥ 20 ॥
𑌸𑍁𑌮𑌹𑌚𑍍𑌚𑌾𑌪𑌮𑌾𑌦𑌾𑌯 𑌶𑌿𑌤𑌶𑌲𑍍𑌯𑌾𑌂𑌶𑍍𑌚 𑌸𑌾𑌯𑌕𑌾𑌨𑍍 ।
𑌹𑌨𑍁𑌮𑌂𑌤𑌮𑌭𑌿𑌪𑍍𑌰𑍇𑌤𑍍𑌯 𑌜𑌗𑌾𑌮 𑌰𑌣𑌪𑌂𑌡𑌿𑌤𑌃 ॥ 21 ॥
𑌤𑌸𑍍𑌮𑌿𑌂𑌸𑍍𑌤𑌤𑌃 𑌸𑌂𑌯𑌤𑌿 𑌜𑌾𑌤𑌹𑌰𑍍𑌷𑍇 𑌰𑌣𑌾𑌯 𑌨𑌿𑌰𑍍𑌗𑌚𑍍𑌛𑌤𑌿 𑌚𑌾𑌪𑌪𑌾𑌣𑍌 ।
𑌦𑌿𑌶𑌶𑍍𑌚 𑌸𑌰𑍍𑌵𑌾𑌃 𑌕𑌲𑍁𑌷𑌾 𑌬𑌭𑍂𑌵𑍁 𑌰𑍍𑌮𑍃𑌗𑌾𑌶𑍍𑌚 𑌰𑍌𑌦𑍍𑌰𑌾 𑌬𑌹𑍁𑌧𑌾 𑌵𑌿𑌨𑍇𑌦𑍁𑌃 ॥ 22 ॥
𑌸𑌮𑌾𑌗𑌤𑌾𑌸𑍍𑌤𑌤𑍍𑌰 𑌤𑍁 𑌨𑌾𑌗𑌯𑌕𑍍𑌷𑌾 𑌮𑌹𑌰𑍍𑌷𑌯𑌶𑍍𑌚𑌕𑍍𑌰𑌚𑌰𑌾𑌶𑍍𑌚 𑌸𑌿𑌦𑍍𑌧𑌾𑌃 ।
𑌨𑌭𑌸𑍍𑌸𑌮𑌾𑌵𑍃𑌤𑍍𑌯 𑌚 𑌪𑌕𑍍𑌷𑌿𑌸𑌂𑌘𑌾 𑌵𑌿𑌨𑍇𑌦𑍁𑌰𑍁𑌚𑍍𑌚𑍈𑌃 𑌪𑌰𑌮𑌪𑍍𑌰𑌹𑍃𑌷𑍍𑌟𑌾𑌃 ॥ 23 ॥
𑌆𑌯𑌾𑌂𑌤𑌂 𑌸𑌰𑌥𑌂 𑌦𑍃𑌷𑍍𑌟𑍍𑌵𑌾 𑌤𑍂𑌰𑍍𑌣𑌮𑌿𑌂𑌦𑍍𑌰𑌜𑌿𑌤𑌂 𑌕𑌪𑌿𑌃 ।
𑌵𑌿𑌨𑌨𑌾𑌦 𑌮𑌹𑌾𑌨𑌾𑌦𑌂 𑌵𑍍𑌯𑌵𑌰𑍍𑌧𑌤 𑌚 𑌵𑍇𑌗𑌵𑌾𑌨𑍍 ॥ 24 ॥
𑌇𑌂𑌦𑍍𑌰𑌜𑌿𑌤𑍍𑌤𑍁 𑌰𑌥𑌂 𑌦𑌿𑌵𑍍𑌯𑌮𑌾𑌸𑍍𑌥𑌿𑌤𑌶𑍍𑌚𑌿𑌤𑍍𑌰𑌕𑌾𑌰𑍍𑌮𑍁𑌕𑌃 ।
𑌧𑌨𑍁𑌰𑍍𑌵𑌿𑌷𑍍𑌫𑌾𑌰𑌯𑌾𑌮𑌾𑌸 𑌤𑌟𑌿𑌦𑍂𑌰𑍍𑌜𑌿𑌤𑌨𑍍𑌨𑌿𑌸𑍍𑌸𑍍𑌵𑌨𑌮𑍍 ॥ 25 ॥
𑌤𑌤𑌸𑍍𑌸𑌮𑍇𑌤𑌾𑌵𑌤𑌿𑌤𑍀𑌕𑍍𑌷𑍍𑌣𑌵𑍇𑌗𑍌 𑌮𑌹𑌾𑌬𑌲𑍌 𑌤𑍌 𑌰𑌣𑌨𑌿𑌰𑍍𑌵𑌿𑌶𑌂𑌕𑍌 ।
𑌕𑌪𑌿𑌶𑍍𑌚 𑌰𑌕𑍍𑌷𑍋𑌧𑌿𑌪𑌤𑍇𑌸𑍍𑌤𑌨𑍂𑌜𑌃 𑌸𑍁𑌰𑌾𑌸𑍁𑌰𑍇𑌂𑌦𑍍𑌰𑌾𑌵𑌿𑌵 𑌬𑌦𑍍𑌧𑌵𑍈𑌰𑍌 ॥ 26 ॥
𑌸 𑌤𑌸𑍍𑌯 𑌵𑍀𑌰𑌸𑍍𑌯 𑌮𑌹𑌾𑌰𑌥𑌸𑍍𑌯 𑌧𑌨𑍁𑌷𑍍𑌮𑌤𑌃 𑌸𑌂𑌯𑌤𑌿 𑌸𑌮𑍍𑌮𑌤𑌸𑍍𑌯 ।
𑌶𑌰𑌪𑍍𑌰𑌵𑍇𑌗𑌂 𑌵𑍍𑌯𑌹𑌨𑌤𑍍𑌪𑍍𑌰𑌵𑍃𑌦𑍍𑌧 𑌶𑍍𑌚𑌚𑌾𑌰 𑌮𑌾𑌰𑍍𑌗𑍇 𑌪𑌿𑌤𑍁𑌰𑌪𑍍𑌰𑌮𑍇𑌯𑌃 ॥ 2 ॥
𑌤𑌤𑌶𑍍𑌶𑌰𑌾𑌨𑌾𑌯𑌤𑌤𑍀𑌕𑍍𑌷𑍍𑌣𑌶𑌲𑍍𑌯𑌾𑌨𑍍 𑌸𑍁𑌪𑌤𑍍𑌰𑌿𑌣𑌃 𑌕𑌾𑌂𑌚𑌨𑌚𑌿𑌤𑍍𑌰𑌪𑍁𑌂𑌖𑌾𑌨𑍍 ।
𑌮𑍁𑌮𑍋𑌚 𑌵𑍀𑌰𑌃 𑌪𑌰𑌵𑍀𑌰𑌹𑌂𑌤𑌾 𑌸𑍁𑌸𑌨𑍍𑌨𑌤𑌾𑌨𑍍 𑌵𑌜𑍍𑌰𑌨𑌿𑌪𑌾𑌤𑌵𑍇𑌗𑌾𑌨𑍍 ॥ 2 ॥
𑌤𑌤𑌸𑍍𑌤𑍁 𑌤𑌤𑍍𑌸𑍍𑌯𑌂𑌦𑌨𑌨𑌿𑌸𑍍𑌸𑍍𑌵𑌨𑌂 𑌚 𑌮𑍃𑌦𑌂𑌗𑌭𑍇𑌰𑍀𑌪𑌟𑌹𑌸𑍍𑌵𑌨𑌂 𑌚 ।
𑌵𑌿𑌕𑍃𑌷𑍍𑌯𑌮𑌾𑌣𑌸𑍍𑌯 𑌚 𑌕𑌾𑌰𑍍𑌮𑍁𑌕𑌸𑍍𑌯 𑌨𑌿𑌶𑌮𑍍𑌯 𑌘𑍋𑌷𑌂 𑌪𑍁𑌨𑌰𑍁𑌤𑍍𑌪𑌪𑌾𑌤 ॥ 2 ॥
𑌶𑌰𑌾𑌣𑌾𑌮𑌂𑌤𑌰𑍇𑌷𑍍𑌵𑌾𑌶𑍁 𑌵𑍍𑌯𑌵𑌰𑍍𑌤𑌤 𑌮𑌹𑌾𑌕𑌪𑌿𑌃 ।
𑌹𑌰𑌿𑌸𑍍𑌤𑌸𑍍𑌯𑌾𑌭𑌿𑌲𑌕𑍍𑌷𑍍𑌯𑌸𑍍𑌯 𑌮𑍋𑌘𑌯𑌨𑍍𑌲𑌕𑍍𑌷𑍍𑌯𑌸𑌂𑌗𑍍𑌰𑌹𑌮𑍍 ॥ 30 ॥
𑌶𑌰𑌾𑌣𑌾𑌮𑌗𑍍𑌰𑌤𑌸𑍍𑌤𑌸𑍍𑌯 𑌪𑍁𑌨𑌃 𑌸𑌮𑌭𑌿𑌵𑌰𑍍𑌤𑌤 ।
𑌪𑍍𑌰𑌸𑌾𑌰𑍍𑌯 𑌹𑌸𑍍𑌤𑍌 𑌹𑌨𑍁𑌮𑌾𑌨𑍁𑌤𑍍𑌪𑌪𑌾𑌤𑌾𑌨𑌿𑌲𑌾𑌤𑍍𑌮𑌜𑌃 ॥ 31 ॥
𑌤𑌾𑌵𑍁𑌭𑍌 𑌵𑍇𑌗𑌸𑌂𑌪𑌨𑍍𑌨𑍌 𑌰𑌣𑌕𑌰𑍍𑌮𑌵𑌿𑌶𑌾𑌰𑌦𑍌 ।
𑌸𑌰𑍍𑌵𑌭𑍂𑌤𑌮𑌨𑍋𑌗𑍍𑌰𑌾𑌹𑌿 𑌚𑌕𑍍𑌰𑌤𑍁𑌰𑍍𑌯𑍁𑌦𑍍𑌧𑌮𑍁𑌤𑍍𑌤𑌮𑌮𑍍 ॥ 32 ॥
𑌹𑌨𑍁𑌮𑌤𑍋 𑌵𑍇𑌦 𑌨 𑌰𑌾𑌕𑍍𑌷𑌸𑍋𑌽𑌂𑌤𑌰𑌂 𑌨 𑌮𑌾𑌰𑍁𑌤𑌿𑌸𑍍𑌤𑌸𑍍𑌯 𑌮𑌹𑌾𑌤𑍍𑌮𑌨𑍋𑌽𑌂𑌤𑌰𑌮𑍍 ।
𑌪𑌰𑌸𑍍𑌪𑌰𑌂 𑌨𑌿𑌰𑍍𑌵𑌿𑌷𑌹𑍌 𑌬𑌭𑍂𑌵𑌤𑍁𑌃 𑌸𑌮𑍇𑌤𑍍𑌯 𑌤𑍌 𑌦𑍇𑌵𑌸𑌮𑌾𑌨𑌵𑌿𑌕𑍍𑌰𑌮𑍌 ॥ 33 ॥
𑌤𑌤𑌸𑍍𑌤𑍁 𑌲𑌕𑍍𑌷𑍍𑌯𑍇 𑌸 𑌵𑌿𑌹𑌨𑍍𑌯𑌮𑌾𑌨𑍇 𑌶𑌰𑍇𑌷𑍍𑌵𑌮𑍋𑌘𑍇𑌷𑍁 𑌚 𑌸𑌂𑌪𑌤𑌤𑍍𑌸𑍁 ।
𑌜𑌗𑌾𑌮 𑌚𑌿𑌂𑌤𑌾𑌂 𑌮𑌹𑌤𑍀𑌂 𑌮𑌹𑌾𑌤𑍍𑌮𑌾 𑌸𑌮𑌾𑌧𑌿𑌸𑌂𑌯𑍋𑌗𑌸𑌮𑌾𑌹𑌿𑌤𑌾𑌤𑍍𑌮𑌾 ॥ 34 ॥
𑌤𑌤𑍋 𑌮𑌤𑌿𑌂 𑌰𑌾𑌕𑍍𑌷𑌸𑌰𑌾𑌜𑌸𑍂𑌨𑍁 𑌶𑍍𑌚𑌕𑌾𑌰 𑌤𑌸𑍍𑌮𑌿𑌨𑍍 𑌹𑌰𑌿𑌵𑍀𑌰𑌮𑍁𑌖𑍍𑌯𑍇 ।
𑌅𑌵𑌧𑍍𑌯𑌤𑌾𑌂 𑌤𑌸𑍍𑌯 𑌕𑌪𑍇𑌸𑍍𑌸𑌮𑍀𑌕𑍍𑌷𑍍𑌯 𑌕𑌥𑌂 𑌨𑌿𑌗𑌚𑍍𑌛𑍇𑌦𑌿𑌤𑌿 𑌨𑌿𑌗𑍍𑌰𑌹𑌾𑌰𑍍𑌥𑌮𑍍 ॥ 35 ॥
𑌤𑌤𑌃 𑌪𑍈𑌤𑌾𑌮𑌹𑌂 𑌵𑍀𑌰𑌃 𑌸𑍋𑌽𑌸𑍍𑌤𑍍𑌰𑌮𑌸𑍍𑌤𑍍𑌰𑌵𑌿𑌦𑌾𑌂 𑌵𑌰𑌃 ।
𑌸𑌂𑌦𑌧𑍇 𑌸𑍁𑌮𑌹𑌤𑍍𑌤𑍇𑌜𑌾𑌃 𑌤𑌂 𑌹𑌰𑌿𑌪𑍍𑌰𑌵𑌰𑌂 𑌪𑍍𑌰𑌤𑌿 ॥ 36 ॥
𑌅𑌵𑌧𑍍𑌯𑍋𑌽𑌯𑌮𑌿𑌤𑌿 𑌜𑍍𑌞𑌾𑌤𑍍𑌵𑌾 𑌤𑌮𑌸𑍍𑌤𑍍𑌰𑍇𑌣𑌾𑌸𑍍𑌤𑍍𑌰𑌤𑌤𑍍𑌤𑍍𑌵𑌵𑌿𑌤𑍍 ।
𑌨𑌿𑌜𑌗𑍍𑌰𑌾𑌹 𑌮𑌹𑌾𑌬𑌾𑌹𑍁𑌰𑍍𑌮𑌾𑌰𑍁𑌤𑌾𑌤𑍍𑌮𑌜𑌮𑌿𑌂𑌦𑍍𑌰𑌜𑌿𑌤𑍍 ॥ 3 ॥
𑌤𑍇𑌨 𑌬𑌦𑍍𑌧𑌸𑍍𑌤𑌤𑍋𑌽𑌸𑍍𑌤𑍍𑌰𑍇𑌣 𑌰𑌾𑌕𑍍𑌷𑌸𑍇𑌨 𑌸 𑌵𑌾𑌨𑌰𑌃 ।
𑌅𑌭𑌵𑌨𑍍𑌨𑌿𑌰𑍍𑌵𑌿𑌚𑍇𑌷𑍍𑌟𑌶𑍍𑌚 𑌪𑌪𑌾𑌤 𑌸 𑌮𑌹𑍀𑌤𑌲𑍇 ॥ 3 ॥
𑌤𑌤𑍋𑌽𑌥 𑌬𑍁𑌦𑍍𑌧𑍍𑌵𑌾 𑌸 𑌤𑌦𑌸𑍍𑌤𑍍𑌰𑌬𑌂𑌧𑌂 𑌪𑍍𑌰𑌭𑍋𑌃 𑌪𑍍𑌰𑌭𑌾𑌵𑌾𑌦𑍍𑌵𑌿𑌗𑌤𑌾𑌤𑍍𑌮𑌵𑍇𑌗𑌃 ।
𑌪𑌿𑌤𑌾𑌮𑌹𑌾𑌨𑍁𑌗𑍍𑌰𑌹𑌮𑌾𑌤𑍍𑌮𑌨𑌶𑍍𑌚 𑌵𑌿𑌚𑌿𑌂𑌤𑌯𑌾𑌮𑌾𑌸 𑌹𑌰𑌿𑌪𑍍𑌰𑌵𑍀𑌰𑌃 ॥ 3 ॥
𑌤𑌤 𑌸𑍍𑌸𑍍𑌵𑌾𑌯𑌂𑌬𑍁𑌵𑍈𑌰𑍍𑌮𑌂𑌤𑍍𑌰𑍈𑌰𑍍𑌬𑍍𑌰𑌹𑍍𑌮𑌾𑌸𑍍𑌤𑍍𑌰𑌮𑌭𑌿𑌮𑌂𑌤𑍍𑌰𑌿𑌤𑌮𑍍 ।
𑌹𑌨𑍁𑌮𑌾𑌂𑌶𑍍𑌚𑌿𑌂𑌤𑌯𑌾𑌮𑌾𑌸 𑌵𑌰𑌦𑌾𑌨𑌂 𑌪𑌿𑌤𑌾𑌮𑌹𑌾𑌤𑍍 ॥ 40 ॥
𑌨 𑌮𑍇𑌽𑌸𑍍𑌤𑍍𑌰𑌬𑌂𑌧𑌸𑍍𑌯 𑌚 𑌶𑌕𑍍𑌤𑌿𑌰𑌸𑍍𑌤𑌿 𑌵𑌿𑌮𑍋𑌕𑍍𑌷𑌣𑍇 𑌲𑍋𑌕𑌗𑍁𑌰𑍋𑌃 𑌪𑍍𑌰𑌭𑌾𑌵𑌾𑌤𑍍 ।
𑌇𑌤𑍍𑌯𑍇𑌵 𑌮𑌤𑍍𑌵𑌾 𑌵𑌿𑌹𑌿𑌤𑍋𑌽𑌸𑍍𑌤𑍍𑌰𑌬𑌂𑌧𑍋 𑌮𑌯𑌾𑌤𑍍𑌮𑌯𑍋𑌨𑍇𑌰𑌨𑍁𑌵𑌰𑍍𑌤𑌿𑌤𑌵𑍍𑌯𑌃 ॥ 41 ॥
𑌸 𑌵𑍀𑌰𑍍𑌯𑌮𑌸𑍍𑌤𑍍𑌰𑌸𑍍𑌯 𑌕𑌪𑌿𑌰𑍍𑌵𑌿𑌚𑌾𑌰𑍍𑌯 𑌪𑌿𑌤𑌾𑌮𑌹𑌾𑌨𑍁𑌗𑍍𑌰𑌹𑌮𑌾𑌤𑍍𑌮𑌨𑌶𑍍𑌚 ।
𑌵𑌿𑌮𑍋𑌕𑍍𑌷𑌶𑌕𑍍𑌤𑌿𑌂 𑌪𑌰𑌿𑌚𑌿𑌂𑌤𑌯𑌿𑌤𑍍𑌵𑌾 𑌪𑌿𑌤𑌾𑌮𑌹𑌾𑌜𑍍𑌞𑌾𑌮𑌨𑍁𑌵𑌰𑍍𑌤𑌤𑍇 𑌸𑍍𑌮 ॥ 42 ॥
𑌅𑌸𑍍𑌤𑍍𑌰𑍇𑌣𑌾𑌪𑌿 𑌹𑌿 𑌬𑌦𑍍𑌧𑌸𑍍𑌯 𑌭𑌯𑌂 𑌮𑌮 𑌨 𑌜𑌾𑌯𑌤𑍇 ।
𑌪𑌿𑌤𑌾𑌮𑌹𑌮𑌹𑍇𑌂𑌦𑍍𑌰𑌾𑌭𑍍𑌯𑌾𑌂 𑌰𑌕𑍍𑌷𑌿𑌤𑌸𑍍𑌯𑌾𑌨𑌿𑌲𑍇𑌨 𑌚 ॥ 43 ॥
𑌗𑍍𑌰𑌹𑌣𑍇 𑌚𑌾𑌪𑌿 𑌰𑌕𑍍𑌷𑍋𑌭𑌿𑌰𑍍𑌮𑌹𑌨𑍍𑌮𑍇 𑌗𑍁𑌣𑌦𑌰𑍍𑌶𑌨𑌮𑍍 ।
𑌰𑌾𑌕𑍍𑌷𑌸𑍇𑌂𑌦𑍍𑌰𑍇𑌣 𑌸𑌂𑌵𑌾𑌦𑌸𑍍𑌤𑌸𑍍𑌮𑌾𑌦𑍍𑌗𑍃𑌹𑍍𑌣𑌂𑌤𑍁 𑌮𑌾𑌂 𑌪𑌰𑍇 ॥ 44 ॥
𑌸 𑌨𑌿𑌶𑍍𑌚𑌿𑌤𑌾𑌰𑍍𑌥𑌃 𑌪𑌰𑌵𑍀𑌰𑌹𑌂𑌤𑌾 𑌸𑌮𑍀𑌕𑍍𑌷𑍍𑌯𑌕𑌾𑌰𑍀 𑌵𑌿𑌨𑌿𑌵𑍃𑌤𑍍𑌤𑌚𑍇𑌷𑍍𑌟𑌃 ।
𑌪𑌰𑍈𑌃 𑌪𑍍𑌰𑌸𑌹𑍍𑌯𑌾𑌭𑌿𑌗𑌤𑍈𑌰𑍍𑌨𑌿𑌗𑍃𑌹𑍍𑌯 𑌨𑌨𑌾𑌦 𑌤𑍈𑌸𑍍𑌤𑍍𑌰𑍈𑌃 𑌪𑌰𑌿𑌭𑌰𑍍𑌤𑍍𑌸𑍍𑌯𑌮𑌾𑌨𑌃 ॥ 45 ॥
𑌤𑌤𑌸𑍍𑌤𑌂 𑌰𑌾𑌕𑍍𑌷𑌸𑌾 𑌦𑍃𑌷𑍍𑌟𑍍𑌵𑌾 𑌨𑌿𑌰𑍍𑌵𑌿𑌚𑍇𑌷𑍍𑌟𑌮𑌰𑌿𑌂𑌦𑌮𑌮𑍍 ।
𑌬𑌬𑌂𑌧𑍁𑌶𑍍𑌶𑌣𑌵𑌲𑍍𑌕𑍈𑌶𑍍𑌚 𑌦𑍍𑌰𑍁𑌮𑌚𑍀𑌰𑍈𑌶𑍍𑌚 𑌸𑌂𑌹𑌤𑍈𑌃 ॥ 46 ॥
𑌸 𑌰𑍋𑌚𑌯𑌾𑌮𑌾𑌸 𑌪𑌰𑍈𑌶𑍍𑌚 𑌬𑌂𑌧𑌨𑌂 𑌪𑍍𑌰𑌸𑌹𑍍𑌯 𑌵𑍀𑌰𑍈𑌰𑌭𑌿𑌨𑌿𑌗𑍍𑌰𑌹𑌂 𑌚 ।
𑌕𑍌𑌤𑍂𑌹𑌲𑌾𑌨𑍍𑌮𑌾𑌂 𑌯𑌦𑌿 𑌰𑌾𑌕𑍍𑌷𑌸𑍇𑌂𑌦𑍍𑌰𑍋 𑌦𑍍𑌰𑌷𑍍𑌟𑍁𑌂 𑌵𑍍𑌯𑌵𑌸𑍍𑌯𑍇𑌦𑌿𑌤𑌿 𑌨𑌿𑌶𑍍𑌚𑌿𑌤𑌾𑌰𑍍𑌥𑌃 ॥ 4 ॥
𑌸 𑌬𑌦𑍍𑌧𑌸𑍍𑌤𑍇𑌨 𑌵𑌲𑍍𑌕𑍇𑌨 𑌵𑌿𑌮𑍁𑌕𑍍𑌤𑍋𑌽𑌸𑍍𑌤𑍍𑌰𑍇𑌣 𑌵𑍀𑌰𑍍𑌯𑌵𑌾𑌨𑍍 ।
𑌅𑌸𑍍𑌤𑍍𑌰𑌬𑌂𑌧𑌃 𑌸 𑌚𑌾𑌨𑍍𑌯𑌂 𑌹𑌿 𑌨 𑌬𑌂𑌧𑌮𑌨𑍁𑌵𑌰𑍍𑌤𑌤𑍇 ॥ 4 ॥
𑌅𑌥𑍇𑌂𑌦𑍍𑌰𑌜𑌿𑌤𑍍𑌤𑍁 𑌦𑍍𑌰𑍁𑌮𑌚𑍀𑌰𑌬𑌦𑍍𑌧𑌂 𑌵𑌿𑌚𑌾𑌰𑍍𑌯 𑌵𑍀𑌰𑌃 𑌕𑌪𑌿𑌸𑌤𑍍𑌤𑌮𑌂 𑌤𑌮𑍍 ।
𑌵𑌿𑌮𑍁𑌕𑍍𑌤𑌮𑌸𑍍𑌤𑍍𑌰𑍇𑌣 𑌜𑌗𑌾𑌮 𑌚𑌿𑌂𑌤𑌾𑌂 𑌨𑌾𑌨𑍍𑌯𑍇𑌨 𑌬𑌦𑍍𑌧𑍋 𑌹𑍍𑌯𑌨𑍁𑌵𑌰𑍍𑌤𑌤𑍇𑌽𑌸𑍍𑌤𑍍𑌰𑌮𑍍 ॥ 4 ॥
𑌅𑌹𑍋 𑌮𑌹𑌤𑍍𑌕𑌰𑍍𑌮 𑌕𑍃𑌤𑌂 𑌨𑌿𑌰𑌰𑍍𑌥𑌕𑌮𑍍𑌕𑌂 𑌨 𑌰𑌾𑌕𑍍𑌷𑌸𑍈𑌰𑍍𑌮𑌂𑌤𑍍𑌰𑌗𑌤𑌿𑌰𑍍𑌵𑌿𑌮𑍃𑌷𑍍𑌟𑌾 ।
𑌪𑍁𑌨𑌶𑍍𑌚 𑌮𑌂𑌤𑍍𑌰𑍇 𑌵𑌿𑌹𑌤𑍇𑌽𑌸𑍍𑌤𑍍𑌰𑌮𑌨𑍍𑌯𑌤𑍍𑌪𑍍𑌰𑌵𑌰𑍍𑌤𑌤𑍇 𑌸𑌂𑌶𑌯𑌿𑌤𑌾 𑌸𑍍𑌸𑍍𑌮𑌸𑌰𑍍𑌵𑍇 ॥ 50 ॥
𑌅𑌸𑍍𑌤𑍍𑌰𑍇𑌣 𑌹𑌨𑍁𑌮𑌾𑌨𑍍𑌮𑍁𑌕𑍍𑌤𑍋 𑌨𑌾𑌤𑍍𑌮𑌾𑌨𑌮𑌵𑌬𑍁𑌧𑍍𑌯𑌤 ।
𑌕𑍃𑌷𑍍𑌯𑌮𑌾𑌣𑌸𑍍𑌤𑍁 𑌰𑌕𑍍𑌷𑍋𑌭𑌿 𑌸𑍍𑌤𑍌𑌶𑍍𑌚 𑌬𑌂𑌧𑍈𑌰𑍍𑌨𑌿𑌪𑍀𑌡𑌿𑌤𑌃 ॥ 51 ॥
𑌹𑌨𑍍𑌯𑌮𑌾𑌨𑌸𑍍𑌤𑌤𑌃 𑌕𑍍𑌰𑍂𑌰𑍈 𑌰𑌾𑌕𑍍𑌷𑌸𑍈𑌃 𑌕𑌾𑌷𑍍𑌠𑌮𑍁𑌷𑍍𑌟𑌿𑌭𑌿𑌃 ।
𑌸𑌮𑍀𑌪𑌂 𑌰𑌾𑌕𑍍𑌷𑌸𑍇𑌂𑌦𑍍𑌰𑌸𑍍𑌯 𑌪𑍍𑌰𑌾𑌕𑍃𑌷𑍍𑌯𑌤 𑌸 𑌵𑌾𑌨𑌰𑌃 ॥ 52 ॥
𑌅𑌥𑍇𑌂𑌦𑍍𑌰𑌜𑌿𑌤𑍍𑌤𑌂 𑌪𑍍𑌰𑌸𑌮𑍀𑌕𑍍𑌷𑍍𑌯 𑌮𑍁𑌕𑍍𑌤𑌮𑌸𑍍𑌤𑍍𑌰𑍇𑌣 𑌬𑌦𑍍𑌧𑌂 𑌦𑍍𑌰𑍁𑌮𑌚𑍀𑌰𑌸𑍂𑌤𑍍𑌰𑍈𑌃 ।
𑌨𑍍𑌯𑌦𑌰𑍍𑌶𑌯𑌤𑍍𑌤𑌤𑍍𑌰 𑌮𑌹𑌾𑌬𑌲𑌂 𑌤𑌂 𑌹𑌰𑌿𑌪𑍍𑌰𑌵𑍀𑌰𑌂 𑌸𑌗𑌣𑌾𑌯 𑌰𑌾𑌜𑍍𑌞𑍇 ॥ 53 ॥
𑌤𑌂 𑌮𑌤𑍍𑌤𑌮𑌿𑌵 𑌮𑌾𑌤𑌂𑌗𑌂 𑌬𑌦𑍍𑌧𑌂 𑌕𑌪𑌿𑌵𑌰𑍋𑌤𑍍𑌤𑌮𑌮𑍍 ।
𑌰𑌾𑌕𑍍𑌷𑌸𑌾 𑌰𑌾𑌕𑍍𑌷𑌸𑍇𑌂𑌦𑍍𑌰𑌾𑌯 𑌰𑌾𑌵𑌣𑌾𑌯 𑌨𑍍𑌯𑌵𑍇𑌦𑌯𑌨𑍍 ॥ 54 ॥
𑌕𑍋𑌽𑌯𑌂 𑌕𑌸𑍍𑌯 𑌕𑍁𑌤𑍋𑌵𑌾𑌤𑍍𑌰 𑌕𑌿𑌂 𑌕𑌾𑌰𑍍𑌯𑌂 𑌕𑍋 𑌵𑍍𑌯𑌪𑌾𑌶𑍍𑌰𑌯𑌃 ।
𑌇𑌤𑌿 𑌰𑌾𑌕𑍍𑌷𑌸𑌵𑍀𑌰𑌾𑌣𑌾𑌂 𑌤𑌤𑍍𑌰 𑌸𑌂𑌜𑌜𑍍𑌞𑌿𑌰𑍇 𑌕𑌥𑌾𑌃 ॥ 55 ॥
𑌹𑌨𑍍𑌯𑌤𑌾𑌂 𑌦𑌹𑍍𑌯𑌤𑌾𑌂 𑌵𑌾𑌪𑌿 𑌭𑌕𑍍𑌷𑍍𑌯𑌤𑌾𑌮𑌿𑌤𑌿 𑌚𑌾𑌪𑌰𑍇 ।
𑌰𑌾𑌕𑍍𑌷𑌸𑌾𑌸𑍍𑌤𑌤𑍍𑌰 𑌸𑌂𑌕𑍍𑌰𑍁𑌦𑍍𑌧𑌾𑌃 𑌪𑌰𑌸𑍍𑌪𑌰𑌮𑌥𑌾𑌬𑍍𑌰𑍁𑌵𑌨𑍍 ॥ 56 ॥
𑌅𑌤𑍀𑌤𑍍𑌯 𑌮𑌾𑌰𑍍𑌗𑌂 𑌸𑌹𑌸𑌾 𑌮𑌹𑌾𑌤𑍍𑌮𑌾 𑌸 𑌤𑌤𑍍𑌰 𑌰𑌕𑍍𑌷𑍋𑌧𑌿𑌪𑌪𑌾𑌦𑌮𑍂𑌲𑍇 ।
𑌦𑌦𑌰𑍍𑌶 𑌰𑌾𑌜𑍍𑌞𑌃 𑌪𑌰𑌿𑌚𑌾𑌰𑌵𑍃𑌦𑍍𑌧𑌾𑌨𑍍 𑌗𑍃𑌹𑌂 𑌮𑌹𑌾𑌰𑌤𑍍𑌨𑌵𑌿𑌭𑍂𑌷𑌿𑌤𑌂 𑌚 ॥ 5 ॥
𑌸 𑌦𑌦𑌰𑍍𑌶 𑌮𑌹𑌾𑌤𑍇𑌜𑌾 𑌰𑌾𑌵𑌣𑌃 𑌕𑌪𑌿𑌸𑌤𑍍𑌤𑌮𑌮𑍍 ।
𑌰𑌕𑍍𑌷𑍋𑌭𑌿𑌰𑍍𑌵𑌿𑌕𑍃𑌤𑌾𑌕𑌾𑌰𑍈𑌃 𑌕𑍃𑌷𑍍𑌯𑌮𑌾𑌣𑌮𑌿𑌤𑌸𑍍𑌤𑌤𑌃 ॥ 5 ॥
𑌰𑌾𑌕𑍍𑌷𑌸𑌾𑌧𑌿𑌪𑌤𑌿𑌂 𑌚𑌾𑌪𑌿 𑌦𑌦𑌰𑍍𑌶 𑌕𑌪𑌿𑌸𑌤𑍍𑌤𑌮𑌃 ।
𑌤𑍇𑌜𑍋𑌬𑌲𑌸𑌮𑌾𑌯𑍁𑌕𑍍𑌤𑌂 𑌤𑌪𑌂𑌤𑌮𑌿𑌵 𑌭𑌾𑌸𑍍𑌕𑌰𑌮𑍍 ॥ 5 ॥
𑌸𑌰𑍋𑌷𑌸𑌮𑍍𑌵𑌰𑍍𑌤𑌿𑌤𑌤𑌾𑌮𑍍𑌰𑌦𑍃𑌷𑍍𑌟𑌿𑌰𑍍𑌦𑌶𑌾𑌨𑌨𑌸𑍍𑌤𑌂 𑌕𑌪𑌿𑌮𑌨𑍍𑌵𑌵𑍇𑌕𑍍𑌷𑍍𑌯 ।
𑌅𑌥𑍋𑌪𑌵𑌿𑌷𑍍𑌟𑌾𑌨𑍍 𑌕𑍁𑌲𑌶𑍀𑌲𑌵𑍃𑌦𑍍𑌧𑌾𑌨𑍍 𑌸𑌮𑌾𑌦𑌿𑌶𑌤𑍍𑌤𑌂 𑌪𑍍𑌰𑌤𑌿 𑌮𑌂𑌤𑍍𑌰𑌿𑌮𑍁𑌖𑍍𑌯𑌾𑌨𑍍 ॥ 60 ॥
𑌯𑌥𑌾𑌕𑍍𑌰𑌮𑌂 𑌤𑍈𑌸𑍍𑌸 𑌕𑌪𑌿𑌰𑍍𑌵𑌿𑌪𑍃𑌷𑍍𑌟𑌃 𑌕𑌾𑌰𑍍𑌯𑌾𑌰𑍍𑌥𑌮𑌰𑍍𑌧𑌸𑍍𑌯 𑌚 𑌮𑍂𑌲𑌮𑌾𑌦𑍌 ।
𑌨𑌿𑌵𑍇𑌦𑌯𑌾𑌮𑌾𑌸 𑌹𑌰𑍀𑌶𑍍𑌵𑌰𑌸𑍍𑌯 𑌦𑍂𑌤𑌃 𑌸𑌕𑌾𑌶𑌾𑌦𑌹𑌮𑌾𑌗𑌤𑍋𑌽𑌸𑍍𑌮𑌿 ॥ 61 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌅𑌷𑍍𑌟𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
