𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌏𑌕𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌸𑍍𑌮𑌿𑌨𑍍𑌸𑍍𑌤𑍁 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑍇 𑌵𑌿𑌨𑌿𑌰𑍍𑌯𑌾𑌤𑌿 𑌕𑍃𑌤𑌾𑌂𑌜𑌲𑍌 ।
𑌆𑌰𑍍𑌤𑌶𑌬𑍍𑌦𑍋𑌽𑌹𑌿 𑌸𑌂𑌜𑌜𑍍𑌞𑍇 𑌸𑍍𑌤𑍍𑌰𑍀𑌣𑌾𑌮𑌂𑌤𑌃𑌪𑍁𑌰𑍇 𑌮𑌹𑌾𑌨𑍍 ॥ 1 ॥
𑌅𑌨𑌾𑌥𑌸𑍍𑌯 𑌜𑌨𑌸𑍍𑌯𑌾𑌸𑍍𑌯 𑌦𑍁𑌰𑍍𑌬𑌲𑌸𑍍𑌯 𑌤𑌪𑌸𑍍𑌵𑌿𑌨𑌃 ।
𑌯𑍋 𑌗𑌤𑌿𑌶𑍍𑌶𑌰𑌣𑌂 𑌚𑌾𑌸𑍀𑌤𑍍𑌸 𑌨𑌾𑌥𑌃 𑌕𑍍𑌵 𑌨𑍁 𑌗𑌚𑍍𑌛𑌤𑌿 ॥ 2 ॥
𑌨 𑌕𑍍𑌰𑍁𑌧𑍍𑌯𑌤𑍍𑌯𑌭𑌿𑌶𑌪𑍍𑌤𑍋𑌽𑌪𑌿 𑌕𑍍𑌰𑍋𑌧𑌨𑍀𑌯𑌾𑌨𑌿 𑌵𑌰𑍍𑌜𑌯𑌨𑍍 ।
𑌕𑍍𑌰𑍁𑌦𑍍𑌧𑌾𑌨𑍍𑌪𑍍𑌰𑌸𑌾𑌦𑌯𑌨𑍍𑌸𑌰𑍍𑌵𑌾𑌨𑍍 𑌸𑌮𑌦𑍁𑌃𑌖𑌃 𑌕𑍍𑌵 𑌗𑌜𑍍𑌛𑌤𑌿 ॥ 3 ॥
𑌕𑍌𑌶𑌲𑍍𑌯𑌾𑌯𑌾𑌂 𑌮𑌹𑌾𑌤𑍇𑌜𑌾 𑌯𑌥𑌾 𑌮𑌾𑌤𑌰𑌿 𑌵𑌰𑍍𑌤𑌤𑍇 ।
𑌤𑌥𑌾 𑌯𑍋 𑌵𑌰𑍍𑌤𑌤𑍇𑌽𑌸𑍍𑌮𑌾𑌸𑍁 𑌮𑌹𑌾𑌤𑍍𑌮𑌾 𑌕𑍍𑌵 𑌨𑍁 𑌗𑌚𑍍𑌛𑌤𑌿 ॥ 4 ॥
𑌕𑍈𑌕𑍇𑌯𑍍𑌯𑌾 𑌕𑍍𑌲𑌿𑌶𑍍𑌯𑌮𑌾𑌨𑍇𑌨 𑌰𑌾𑌜𑍍𑌞𑌾 𑌸𑌂𑌚𑍋𑌦𑌿𑌤𑍋 𑌵𑌨𑌮𑍍 ।
𑌪𑌰𑌿𑌤𑍍𑌰𑌾𑌤𑌾 𑌜𑌨𑌸𑍍𑌯𑌾𑌸𑍍𑌯 𑌜𑌗𑌤𑌃 𑌕𑍍𑌵 𑌨𑍁 𑌗𑌚𑍍𑌛𑌤𑌿 ॥ 5 ॥
𑌅𑌹𑍋 𑌨𑌿𑌶𑍍𑌚𑍇𑌤𑌨𑍋 𑌰𑌾𑌜𑌾 𑌜𑍀𑌵𑌲𑍋𑌕𑌸𑍍𑌯 𑌸𑌂𑌪𑍍𑌰𑌿𑌯𑌮𑍍 ।
𑌧𑌰𑍍𑌮𑍍𑌯𑌂 𑌸𑌤𑍍𑌯𑌵𑍍𑌰𑌤𑌂 𑌰𑌾𑌮𑌂 𑌵𑌨𑌵𑌾𑌸𑍇 𑌪𑍍𑌰𑌵𑌤𑍍𑌸𑍍𑌯𑌤𑌿 ॥ 6 ॥
𑌇𑌤𑌿 𑌸𑌰𑍍𑌵𑌾 𑌮𑌹𑌿𑌷𑍍𑌯𑌸𑍍𑌤𑌾 𑌵𑌿𑌵𑌤𑍍𑌸𑌾 𑌇𑌵 𑌧𑍇𑌨𑌵𑌃 ।
𑌰𑍁𑌰𑍁𑌦𑍁𑌶𑍍𑌚𑍈𑌵 𑌦𑍁𑌃𑌖𑌾𑌰𑍍𑌤𑌾𑌃 𑌸𑌸𑍍𑌵𑌰𑌂 𑌚 𑌵𑌿𑌚𑍁𑌕𑍍𑌰𑍁𑌶𑍁𑌃 ॥ ॥
𑌸 𑌤𑌮𑌂𑌤𑌃 𑌪𑍁𑌰𑍇 𑌘𑍋𑌰𑌮𑌾𑌰𑍍𑌤𑌶𑌬𑍍𑌦𑌂 𑌮𑌹𑍀𑌪𑌤𑌿𑌃 ।
𑌪𑍁𑌤𑍍𑌰𑌶𑍋𑌕𑌾𑌭𑌿𑌸𑌂𑌤𑌪𑍍𑌤𑌃 𑌶𑍍𑌰𑍁𑌤𑍍𑌵𑌾 𑌚𑌾𑌸𑍀𑌤𑍍𑌸𑍁𑌦𑍁𑌃𑌖𑌿𑌤𑌃 ॥ ॥
𑌨𑌾𑌗𑍍𑌨𑌿𑌹𑍋𑌤𑍍𑌰𑌾𑌣𑍍𑌯𑌹𑍂𑌯𑌂𑌤 𑌨𑌾𑌪𑌚𑌨𑍍 𑌗𑍃𑌹𑌮𑍇𑌧𑌿𑌨𑌃 𑌅𑌕𑍁𑌰𑍍𑌵𑌨𑍍𑌨 𑌪𑍍𑌰𑌜𑌾𑌃 𑌕𑌾𑌰𑍍𑌯𑌂 𑌸𑍂𑌰𑍍𑌯𑌶𑍍𑌚𑌾𑌂𑌤𑌰𑌧𑍀𑌯𑌤 ॥ ॥
𑌵𑍍𑌯𑌸𑍃𑌜𑌨𑍍 𑌕𑌬𑌲𑌾𑌨𑍍𑌨𑌾𑌗𑌾 𑌗𑌾𑌵𑍋 𑌵𑌤𑍍𑌸𑌾𑌨𑍍𑌨 𑌪𑌾𑌯𑌯𑌨𑍍 ।
𑌪𑍁𑌤𑍍𑌰𑌂 𑌪𑍍𑌰𑌥𑌮𑌜𑌂 𑌲𑌬𑍍𑌧𑍍𑌵𑌾 𑌜𑌨𑌨𑍀 𑌨𑌾𑌭𑍍𑌯𑌨𑌂𑌦𑌤 ॥ 10 ॥
𑌤𑍍𑌰𑌿𑌶𑌂𑌕𑍁𑌰𑍍𑌲𑍋𑌹𑌿𑌤𑌾𑌂𑌗𑌶𑍍𑌚 𑌬𑍃𑌹𑌸𑍍𑌪𑌤𑌿𑌬𑍁𑌧𑌾𑌵𑌪𑌿 ।
𑌦𑌾𑌰𑍁𑌣𑌾 𑌸𑍍𑌸𑍋𑌮𑌮𑌭𑍍𑌯𑍇𑌤𑍍𑌯 𑌗𑍍𑌰𑌹𑌾𑌸𑍍𑌸𑌰𑍍𑌵𑍇 𑌵𑍍𑌯𑌵𑌸𑍍𑌥𑌿𑌤𑌾𑌃 ॥ 11 ॥
𑌨𑌕𑍍𑌷𑌤𑍍𑌰𑌾𑌣𑌿 𑌗𑌤𑌾𑌰𑍍𑌚𑍀𑌂𑌷𑌿 𑌗𑍍𑌰𑌹𑌾𑌶𑍍𑌚 𑌗𑌤𑌤𑍇𑌜𑌸𑌃 ।
𑌵𑌿𑌶𑌾𑌖𑌾𑌸𑍍𑌤𑍁 𑌸𑌧𑍂𑌮𑌾𑌶𑍍𑌚 𑌨𑌭𑌸𑌿 𑌪𑍍𑌰𑌚𑌕𑌾𑌶𑌿𑌰𑍇 ॥ 12 ॥
𑌕𑌾𑌲𑌿𑌕𑌾𑌨𑌿𑌲𑌵𑍇𑌗𑍇𑌨 𑌮𑌹𑍋𑌦𑌧𑌿𑌰𑌿𑌵𑍋𑌤𑍍𑌥𑌿𑌤𑌃 ।
𑌰𑌾𑌮𑍇 𑌵𑌨𑌂 𑌪𑍍𑌰𑌵𑍍𑌰𑌜𑌿𑌤𑍇 𑌨𑌗𑌰𑌂 𑌪𑍍𑌰𑌚𑌚𑌾𑌲 𑌤𑌤𑍍 ॥ 13 ॥
𑌦𑌿𑌶𑌃 𑌪𑌰𑍍𑌯𑌾𑌕𑍁𑌲𑌾𑌸𑍍𑌸𑌰𑍍𑌵𑌾 𑌸𑍍𑌤𑌿𑌮𑌿𑌰𑍇𑌣𑍇𑌵 𑌸𑌂𑌵𑍃𑌤𑌾𑌃 ।
𑌨 𑌗𑍍𑌰𑌹𑍋 𑌨𑌾𑌪𑌿 𑌨𑌕𑍍𑌷𑌤𑍍𑌰𑌂 𑌪𑍍𑌰𑌚𑌕𑌾𑌶𑍇 𑌨𑌕𑌿𑌂𑌚𑌨 ॥ 14 ॥
𑌅𑌕𑌸𑍍𑌮𑌾𑌨𑍍𑌨𑌾𑌗𑌰𑌸𑍍𑌸𑌰𑍍𑌵𑍋 𑌜𑌨𑍋 𑌦𑍈𑌨𑍍𑌯𑌮𑍁𑌪𑌾𑌗𑌮𑌤𑍍 ।
𑌆𑌹𑌾𑌰𑍇 𑌵𑌾 𑌵𑌿𑌹𑌾𑌰𑍇 𑌵𑌾 𑌨 𑌕𑌶𑍍𑌚𑌿𑌦𑌕𑌰𑍋𑌨𑍍𑌮𑌨𑌃 ॥ 15 ॥
𑌶𑍋𑌕𑌪𑌰𑍍𑌯𑌾𑌯𑌸𑌂𑌤𑌪𑍍𑌤 𑌸𑍍𑌸𑌤𑌤𑌂 𑌦𑍀𑌰𑍍𑌘𑌮𑍁𑌚𑍍𑌛𑌵𑌸𑌨𑍍 ।
𑌅𑌯𑍋𑌧𑍍𑌯𑌾𑌯𑌾𑌂 𑌜𑌨𑌸𑍍𑌸𑌰𑍍𑌵 𑌶𑍍𑌶𑍁𑌶𑍋𑌚 𑌜𑌗𑌤𑍀𑌪𑌤𑌿𑌮𑍍 ॥ 16 ॥
𑌬𑌾𑌷𑍍𑌪𑌪𑌰𑍍𑌯𑌾𑌕𑍁𑌲𑌮𑍁𑌖𑍋 𑌰𑌾𑌜𑌮𑌾𑌰𑍍𑌗𑌗𑌤𑍋 𑌜𑌨𑌃 ।
𑌨 𑌹𑍃𑌷𑍍𑌟𑍋 𑌲𑌕𑍍𑌷𑍍𑌯𑌤𑍇 𑌕𑌶𑍍𑌚𑌿𑌤𑍍𑌸𑌰𑍍𑌵 𑌶𑍍𑌶𑍋𑌕𑌪𑌰𑌾𑌯𑌣𑌃 ॥ 1 ॥
𑌨 𑌵𑌾𑌤𑌿 𑌪𑌵𑌨 𑌶𑍍𑌶𑍀𑌤𑍋 𑌨 𑌶𑌶𑍀 𑌸𑍌𑌮𑍍𑌯𑌦𑌰𑍍𑌶𑌨𑌃 ।
𑌨 𑌸𑍂𑌰𑍍𑌯𑌸𑍍𑌤𑌪𑌤𑍇 𑌲𑍋𑌕𑌂 𑌸𑌰𑍍𑌵𑌂 𑌪𑌰𑍍𑌯𑌾𑌕𑍁𑌲𑌂 𑌜𑌗𑌤𑍍 ॥ 1 ॥
𑌅𑌨𑌰𑍍𑌥𑌿𑌨𑌸𑍍𑌸𑍁𑌤𑌾𑌃 𑌸𑍍𑌤𑍍𑌰𑍀𑌣𑌾𑌂 𑌭𑌰𑍍𑌤𑌾𑌰𑍋 𑌭𑍍𑌰𑌾𑌤𑌰𑌸𑍍𑌤𑌥𑌾 ।
𑌸𑌰𑍍𑌵𑍇 𑌸𑌰𑍍𑌵𑌂 𑌪𑌰𑌿𑌤𑍍𑌯𑌜𑍍𑌯 𑌰𑌾𑌮𑌮𑍇𑌵𑌾𑌨𑍍𑌵𑌚𑌿𑌂𑌤𑌯𑌨𑍍 ॥ 1 ॥
𑌯𑍇 𑌤𑍁 𑌰𑌾𑌮𑌸𑍍𑌯 𑌸𑍁𑌹𑍃𑌦 𑌸𑍍𑌸𑌰𑍍𑌵𑍇 𑌤𑍇 𑌮𑍂𑌢𑌚𑍇𑌤𑌸𑌃 ।
𑌶𑍋𑌕𑌭𑌾𑌰𑍇𑌣 𑌚𑌾𑌕𑍍𑌰𑌾𑌂𑌤𑌾 𑌶𑍍𑌶𑌯𑌨𑌂 𑌨 𑌜𑌹𑍁𑌸𑍍𑌤𑌦𑌾 ॥ 20 ॥
𑌤𑌤𑌸𑍍𑌤𑍍𑌵𑌯𑍋𑌧𑍍𑌯𑌾 𑌰𑌹𑌿𑌤𑌾 𑌮𑌹𑌾𑌤𑍍𑌮𑌨𑌾 𑌪𑍁𑌰𑌂𑌦𑌰𑍇𑌣𑍇𑌵 𑌮𑌹𑍀 𑌸𑌪𑌰𑍍𑌵𑌤𑌾 ।
𑌚𑌚𑌾𑌲 𑌘𑍋𑌰𑌂 𑌭𑌯𑌶𑍋𑌕𑌪𑍀𑌡𑌿𑌤𑌾 𑌸𑌨𑌾𑌗𑌯𑍋𑌧𑌾𑌶𑍍𑌵𑌗𑌣𑌾 𑌨𑌨𑌾𑌦 𑌚 ॥ 21 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌏𑌕𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
