𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌿𑌤𑍀𑌯𑌸𑍍𑌸𑌰𑍍𑌗𑌃 ।
𑌤𑍌 𑌤𑍁 𑌦𑍃𑌷𑍍𑌟𑍍𑌵𑌾 𑌮𑌹𑌾𑌤𑍍𑌮𑌾𑌨𑍌 𑌭𑍍𑌰𑌾𑌤𑌰𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ।
𑌵𑌰𑌾𑌯𑍁𑌧𑌧𑌰𑍌 𑌵𑍀𑌰𑍌 𑌸𑍁𑌗𑍍𑌰𑍀𑌵𑌶𑍍𑌶𑌂𑌕𑌿𑌤𑍋𑌽𑌭𑌵𑌤𑍍 ॥ 1 ॥
𑌉𑌦𑍍𑌵𑌿𑌗𑍍𑌨𑌹𑍃𑌦𑌯𑌸𑍍𑌸𑌰𑍍𑌵𑌾 𑌦𑌿𑌶𑌸𑍍𑌸𑌮𑌵𑌲𑍋𑌕𑌯𑌨𑍍 ।
𑌨 𑌵𑍍𑌯𑌤𑌿𑌷𑍍𑌠𑌤 𑌕𑌸𑍍𑌮𑌿𑌂𑌶𑍍𑌚𑌿𑌦𑍍𑌦𑍇𑌶𑍇 𑌵𑌾𑌨𑌰𑌪𑍁𑌂𑌗𑌵𑌃 ॥ 2 ॥
𑌨𑍈𑌵 𑌚𑌕𑍍𑌰𑍇 𑌮𑌨𑌃 𑌸𑍍𑌥𑌾𑌤𑍁𑌂 𑌵𑍀𑌕𑍍𑌷𑌮𑌾𑌣𑍋 𑌮𑌹𑌾𑌬𑌲𑍌 ।
𑌕𑌪𑍇𑌃 𑌪𑌰𑌮𑌭𑍀𑌤𑌸𑍍𑌯 𑌚𑌿𑌤𑍍𑌤𑌂 𑌵𑍍𑌯𑌵𑌸𑌸𑌾𑌦 𑌹 ॥ 3 ॥
𑌚𑌿𑌂𑌤𑌯𑌿𑌤𑍍𑌵𑌾 𑌸 𑌧𑌰𑍍𑌮𑌾𑌤𑍍𑌮𑌾 𑌵𑌿𑌮𑍃𑌶𑍍𑌯 𑌗𑍁𑌰𑍁𑌲𑌾𑌘𑌵𑌮𑍍 ।
𑌸𑍁𑌗𑍍𑌰𑍀𑌵𑌃 𑌪𑌰𑌮𑍋𑌦𑍍𑌵𑌿𑌗𑍍𑌨𑌸𑍍𑌸𑌰𑍍𑌵𑍈𑌰𑌨𑍁𑌚𑌰𑍈𑌸𑍍𑌸𑌹 ॥ 4 ॥
𑌤𑌤𑌸𑍍𑌸 𑌸𑌚𑌿𑌵𑍇𑌭𑍍𑌯𑌸𑍍𑌤𑍁 𑌸𑍁𑌗𑍍𑌰𑍀𑌵𑌃 𑌪𑍍𑌲𑌵𑌗𑌾𑌧𑌿𑌪𑌃 ।
𑌶𑌶𑌂𑌸 𑌪𑌰𑌮𑍋𑌦𑍍𑌵𑌿𑌗𑍍𑌨𑌃 𑌪𑌶𑍍𑌯𑌂𑌸𑍍𑌤𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ॥ 5 ॥
𑌏𑌤𑍌 𑌵𑌨𑌮𑌿𑌦𑌂 𑌦𑍁𑌰𑍍𑌗𑌂 𑌵𑌾𑌲𑌿𑌪𑍍𑌰𑌣𑌿𑌹𑌿𑌤𑍌 𑌧𑍍𑌰𑍁𑌵𑌮𑍍 ।
𑌛𑌦𑍍𑌮𑌨𑌾 𑌚𑍀𑌰𑌵𑌸𑌨𑍌 𑌪𑍍𑌰𑌚𑌰𑌂𑌤𑌾𑌵𑌿𑌹𑌾𑌗𑌤𑍌 ॥ 6 ॥
𑌤𑌤𑌸𑍍𑌸𑍁𑌗𑍍𑌰𑍀𑌵𑌸𑌚𑌿𑌵𑌾 𑌦𑍃𑌷𑍍𑌟𑍍𑌵𑌾 𑌪𑌰𑌮𑌧𑌨𑍍𑌵𑌿𑌨𑍌 ।
𑌜𑌗𑍍𑌮𑍁𑌰𑍍𑌗𑌿𑌰𑌿𑌤𑌟𑌾𑌤𑍍𑌤𑌸𑍍𑌮𑌾𑌦𑌨𑍍𑌯𑌚𑍍𑌛𑌿𑌖𑌰𑌮𑍁𑌤𑍍𑌤𑌮𑌮𑍍 ॥ ॥
𑌤𑍇 𑌕𑍍𑌷𑌿𑌪𑍍𑌰𑌮𑌧𑌿𑌗𑌮𑍍𑌯𑌾𑌥 𑌯𑍂𑌥𑌪𑌾 𑌯𑍂𑌥𑌪𑌰𑍍𑌷𑌭𑌮𑍍 ।
𑌹𑌰𑌯𑍋 𑌵𑌾𑌨𑌰𑌶𑍍𑌰𑍇𑌷𑍍𑌠𑌂 𑌪𑌰𑌿𑌵𑌾𑌰𑍍𑌯𑍋𑌪𑌤𑌸𑍍𑌥𑌿𑌰𑍇 ॥ ॥
𑌏𑌕𑌮𑍇𑌕𑌾𑌯𑌨𑌗𑌤𑌾𑌃 𑌪𑍍𑌲𑌵𑌮𑌾𑌨𑌾 𑌗𑌿𑌰𑍇𑌰𑍍𑌗𑌿𑌰𑌿𑌮𑍍 ।
𑌪𑍍𑌰𑌕𑌂𑌪𑌯𑌂𑌤𑍋 𑌵𑍇𑌗𑍇𑌨 𑌗𑌿𑌰𑍀𑌣𑌾𑌂 𑌶𑌿𑌖𑌰𑌾𑌣𑍍𑌯𑌪𑌿 ॥ ॥
𑌤𑌤𑌶𑍍𑌶𑌾𑌖𑌾𑌮𑍃𑌗𑌾𑌸𑍍𑌸𑌰𑍍𑌵𑍇 𑌪𑍍𑌲𑌵𑌮𑌾𑌨𑌾 𑌮𑌹𑌾𑌬𑌲𑌾𑌃 ।
𑌬𑌭𑌂𑌜𑍁𑌶𑍍𑌚 𑌨𑌗𑌾𑌂𑌸𑍍𑌤𑌤𑍍𑌰 𑌪𑍁𑌷𑍍𑌪𑌿𑌤𑌾𑌂𑌦𑍁𑌰𑍍𑌗𑌸𑌂𑌶𑍍𑌰𑌿𑌤𑌾𑌨𑍍 ॥ 10 ॥
𑌆𑌪𑍍𑌲𑌵𑌂𑌤𑍋 𑌹𑌰𑌿𑌵𑌰𑌾𑌸𑍍𑌸𑌰𑍍𑌵𑌤𑌸𑍍𑌤𑌂 𑌮𑌹𑌾𑌗𑌿𑌰𑌿𑌮𑍍 ।
𑌮𑍃𑌗𑌮𑌾𑌰𑍍𑌜𑌾𑌰𑌶𑌾𑌰𑍍𑌦𑍂𑌲𑌾𑌂𑌸𑍍𑌤𑍍𑌰𑌾𑌸𑌯𑌂𑌤𑍋 𑌯𑌯𑍁𑌸𑍍𑌤𑌦𑌾 ॥ 11 ॥
𑌤𑌤𑌸𑍍𑌸𑍁𑌗𑍍𑌰𑍀𑌵𑌸𑌚𑌿𑌵𑌾𑌃 𑌪𑌰𑍍𑌵𑌤𑍇𑌂𑌦𑍍𑌰𑌂 𑌸𑌮𑌾𑌶𑍍𑌰𑌿𑌤𑌾𑌃 ।
𑌸𑌂𑌗𑌮𑍍𑌯 𑌕𑌪𑌿𑌮𑍁𑌖𑍍𑌯𑍇𑌨 𑌸𑌰𑍍𑌵𑍇 𑌪𑍍𑌰𑌾𑌂𑌜𑌲𑌯 𑌸𑍍𑌥𑌿𑌤𑌾𑌃 ॥ 12 ॥
𑌤𑌤𑌸𑍍𑌤𑌂 𑌭𑌯𑌸𑌂𑌵𑌿𑌗𑍍𑌨𑌂 𑌵𑌾𑌲𑌿𑌕𑌿𑌲𑍍𑌬𑌿𑌷𑌶𑌂𑌕𑌿𑌤𑌮𑍍 ।
𑌉𑌵𑌾𑌚 𑌹𑌨𑍁𑌮𑌾𑌨𑍍𑌵𑌾𑌕𑍍𑌯𑌂 𑌸𑍁𑌗𑍍𑌰𑍀𑌵𑌂 𑌵𑌾𑌕𑍍𑌯𑌕𑍋𑌵𑌿𑌦𑌃 ॥ 13 ॥
𑌸𑌂𑌭𑍍𑌰𑌮𑌸𑍍𑌤𑍍𑌯𑌜𑍍𑌯𑌤𑌾𑌮𑍇𑌷 𑌸𑌰𑍍𑌵𑍈𑌰𑍍𑌵𑌾𑌲𑌿𑌕𑍃𑌤𑍇 𑌮𑌹𑌾𑌨𑍍 ।
𑌮𑌲𑌯𑍋𑌽𑌯𑌂 𑌗𑌿𑌰𑌿𑌵𑌰𑍋 𑌭𑌯𑌂 𑌨𑍇𑌹𑌾𑌸𑍍𑌤𑌿 𑌵𑌾𑌲𑌿𑌨𑌃 ॥ 14 ॥
𑌯𑌸𑍍𑌮𑌾𑌦𑍁𑌦𑍍𑌵𑌿𑌗𑍍𑌨𑌚𑍇𑌤𑌾𑌸𑍍𑌤𑍍𑌵𑌂 𑌪𑍍𑌰𑌦𑍍𑌰𑍁𑌤𑍋 𑌹𑌰𑌿𑌪𑍁𑌂𑌗𑌵 ।
𑌤𑌂 𑌕𑍍𑌰𑍂𑌰𑌦𑌰𑍍𑌶𑌨𑌂 𑌕𑍍𑌰𑍂𑌰𑌂 𑌨𑍇𑌹 𑌪𑌶𑍍𑌯𑌾𑌮𑌿 𑌵𑌾𑌲𑌿𑌨𑌮𑍍 ॥ 15 ॥
𑌯𑌸𑍍𑌮𑌾𑌤𑍍𑌤𑌵 𑌭𑌯𑌂 𑌸𑍌𑌮𑍍𑌯 𑌪𑍂𑌰𑍍𑌵𑌜𑌾𑌤𑍍𑌪𑌾𑌪𑌕𑌰𑍍𑌮𑌣𑌃 ।
𑌸 𑌨𑍇𑌹 𑌵𑌾𑌲𑍀 𑌦𑍁𑌷𑍍𑌟𑌾𑌤𑍍𑌮𑌾 𑌨 𑌤𑍇 𑌪𑌶𑍍𑌯𑌾𑌮𑍍𑌯𑌹𑌂 𑌭𑌯𑌮𑍍 ॥ 16 ॥
𑌅𑌹𑍋 𑌶𑌾𑌖𑌾𑌮𑍃𑌗𑌤𑍍𑌵𑌂 𑌤𑍇 𑌵𑍍𑌯𑌕𑍍𑌤𑌮𑍇𑌵 𑌪𑍍𑌲𑌵𑌂𑌗𑌮 ।
𑌲𑌘𑍁𑌚𑌿𑌤𑍍𑌤𑌤𑌯𑌾𑌽𑌤𑍍𑌮𑌾𑌨𑌂 𑌨 𑌸𑍍𑌥𑌾𑌪𑌯𑌸𑌿 𑌯𑍋 𑌮𑌤𑍌 ॥ 1 ॥
𑌬𑍁𑌦𑍍𑌧𑌿𑌵𑌿𑌜𑍍𑌞𑌾𑌨𑌸𑌂𑌪𑌨𑍍𑌨 𑌇𑌂𑌗𑌿𑌤𑍈𑌸𑍍𑌸𑌰𑍍𑌵𑌮𑌾𑌚𑌰 ।
𑌨 𑌹𑍍𑌯𑌬𑍁𑌦𑍍𑌧𑌿𑌂 𑌗𑌤𑍋 𑌰𑌾𑌜𑌾 𑌸𑌰𑍍𑌵𑌭𑍂𑌤𑌾𑌨𑌿 𑌶𑌾𑌸𑍍𑌤𑌿 𑌹𑌿 ॥ 1 ॥
𑌸𑍁𑌗𑍍𑌰𑍀𑌵𑌸𑍍𑌤𑍁 𑌶𑍁𑌭𑌂 𑌵𑌾𑌕𑍍𑌯𑌂 𑌶𑍍𑌰𑍁𑌤𑍍𑌵𑌾 𑌸𑌰𑍍𑌵𑌂 𑌹𑌨𑍂𑌮𑌤𑌃 ।
𑌤𑌤𑌶𑍍𑌶𑍁𑌭𑌤𑌰𑌂 𑌵𑌾𑌕𑍍𑌯𑌂 𑌹𑌨𑍂𑌮𑌂𑌤𑌮𑍁𑌵𑌾𑌚 𑌹 ॥ 1 ॥
𑌦𑍀𑌰𑍍𑌘𑌬𑌾𑌹𑍂 𑌵𑌿𑌶𑌾𑌲𑌾𑌕𑍍𑌷𑍌 𑌶𑌰𑌚𑌾𑌪𑌾𑌸𑌿𑌧𑌾𑌰𑌿𑌣𑍌 ।
𑌕𑌸𑍍𑌯 𑌨 𑌸𑍍𑌯𑌾𑌦𑍍𑌭𑌯𑌂 𑌦𑍃𑌷𑍍𑌟𑍍𑌵𑌾 𑌹𑍍𑌯𑍇𑌤𑍌 𑌸𑍁𑌰𑌸𑍁𑌤𑍋𑌪𑌮𑍌 ॥ 20 ॥
𑌵𑌾𑌲𑌿𑌪𑍍𑌰𑌣𑌿𑌹𑌿𑌤𑌾𑌵𑍇𑌤𑍌 𑌶𑌂𑌕𑍇𑌽𑌹𑌂 𑌪𑍁𑌰𑍁𑌷𑍋𑌤𑍍𑌤𑌮𑍌 ।
𑌰𑌾𑌜𑌾𑌨𑍋 𑌬𑌹𑍁𑌮𑌿𑌤𑍍𑌰𑌾𑌶𑍍𑌚 𑌵𑌿𑌶𑍍𑌵𑌾𑌸𑍋 𑌨𑌾𑌤𑍍𑌰 𑌹𑌿 𑌕𑍍𑌷𑌮𑌃 ॥ 21 ॥
𑌅𑌰𑌯𑌶𑍍𑌚 𑌮𑌨𑍁𑌷𑍍𑌯𑍇𑌣 𑌵𑌿𑌜𑍍𑌞𑍇𑌯𑌾𑌶𑍍𑌛𑌦𑍍𑌮𑌚𑌾𑌰𑌿𑌣𑌃 ।
𑌵𑌿𑌶𑍍𑌵𑌸𑍍𑌤𑌾𑌨𑌾𑌮𑌵𑌿𑌶𑍍𑌵𑌸𑍍𑌤𑌾𑌰𑌂𑌧𑍍𑌰𑍇𑌷𑍁 𑌪𑍍𑌰𑌹𑌰𑌂𑌤𑌿 𑌹𑌿 ॥ 22 ॥
𑌕𑍃𑌤𑍍𑌯𑍇𑌷𑍁 𑌵𑌾𑌲𑍀 𑌮𑍇𑌧𑌾𑌵𑍀 𑌰𑌾𑌜𑌾𑌨𑍋 𑌬𑌹𑍁𑌦𑌰𑍍𑌶𑌿𑌨𑌃 ।
𑌭𑌵𑌂𑌤𑌿 𑌪𑌰𑌹𑌂𑌤𑌾𑌰𑌸𑍍𑌤𑍇 𑌜𑍍𑌞𑍇𑌯𑌾𑌃 𑌪𑍍𑌰𑌾𑌕𑍃𑌤𑍈𑌰𑍍𑌨𑌰𑍈𑌃 ॥ 23 ॥
𑌤𑍌 𑌤𑍍𑌵𑌯𑌾 𑌪𑍍𑌰𑌾𑌕𑍃𑌤𑍇𑌨𑍈𑌵 𑌗𑌤𑍍𑌵𑌾 𑌜𑍍𑌞𑍇𑌯𑍌 𑌪𑍍𑌲𑌵𑌂𑌗𑌮 ।
𑌇𑌂𑌗𑌿𑌤𑌾𑌨𑌾𑌂 𑌪𑍍𑌰𑌕𑌾𑌰𑍈𑌶𑍍𑌚 𑌰𑍂𑌪𑌵𑍍𑌯𑌾𑌭𑌾𑌷𑌣𑍇𑌨 𑌚 ॥ 24 ॥
𑌲𑌕𑍍𑌷𑌯𑌸𑍍𑌵 𑌤𑌯𑍋𑌰𑍍𑌭𑌾𑌵𑌂 𑌪𑍍𑌰𑌹𑍃𑌷𑍍𑌟𑌮𑌨𑌸𑍌 𑌯𑌦𑌿 ।
𑌵𑌿𑌶𑍍𑌵𑌾𑌸𑌯𑌨𑍍𑌪𑍍𑌰𑌶𑌂𑌸𑌾𑌭𑌿𑌰𑌿𑌂𑌗𑌿𑌤𑍈𑌶𑍍𑌚 𑌪𑍁𑌨𑌃 𑌪𑍁𑌨𑌃 ॥ 25 ॥
𑌮𑌮𑍈𑌵𑌾𑌭𑌿𑌮𑍁𑌖𑌂 𑌸𑍍𑌥𑌿𑌤𑍍𑌵𑌾 𑌪𑍃𑌚𑍍𑌛 𑌤𑍍𑌵𑌂 𑌹𑌰𑌿𑌪𑍁𑌂𑌗𑌵 ।
𑌪𑍍𑌰𑌯𑍋𑌜𑌨𑌂 𑌪𑍍𑌰𑌵𑍇𑌶𑌸𑍍𑌯 𑌵𑌨𑌸𑍍𑌯𑌾𑌸𑍍𑌯 𑌧𑌨𑍁𑌰𑍍𑌧𑌰𑍌 ॥ 26 ॥
𑌶𑍁𑌦𑍍𑌧𑌾𑌤𑍍𑌮𑌾𑌨𑍌 𑌯𑌦𑌿 𑌤𑍍𑌵𑍇𑌤𑍌 𑌜𑌾𑌨𑍀𑌹𑌿 𑌤𑍍𑌵𑌂 𑌪𑍍𑌲𑌵𑌂𑌗𑌮 ।
𑌵𑍍𑌯𑌾𑌭𑌾𑌷𑌿𑌤𑍈𑌰𑍍𑌵𑌾 𑌵𑌿𑌜𑍍𑌞𑍇𑌯𑌾 𑌸𑍍𑌯𑌾𑌦𑍍𑌦𑍁𑌷𑍍𑌟𑌾𑌽𑌦𑍁𑌷𑍍𑌟𑌤𑌾 𑌤𑌯𑍋𑌃 ॥ 2 ॥
𑌇𑌤𑍍𑌯𑍇𑌵𑌂 𑌕𑌪𑌿𑌰𑌾𑌜𑍇𑌨 𑌸𑌂𑌦𑌿𑌷𑍍𑌟𑍋 𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌚𑌕𑌾𑌰 𑌗𑌮𑌨𑍇 𑌬𑍁𑌦𑍍𑌧𑌿𑌂 𑌯𑌤𑍍𑌰 𑌤𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ॥ 2 ॥
𑌤𑌥𑍇𑌤𑌿 𑌸𑌂𑌪𑍂𑌜𑍍𑌯 𑌵𑌚𑌸𑍍𑌤𑍁 𑌤𑌸𑍍𑌯 𑌤𑌤𑍍𑌕𑌪𑍇𑌸𑍍𑌸𑍁𑌭𑍀𑌮𑌸𑍍𑌯 𑌦𑍁𑌰𑌾𑌸𑌦𑌸𑍍𑌯 𑌚 ।
𑌮𑌹𑌾𑌨𑍁𑌭𑌾𑌵𑍋 𑌹𑌨𑍁𑌮𑌾𑌨𑍍𑌯𑌯𑍌 𑌤𑌦𑌾 𑌸 𑌯𑌤𑍍𑌰 𑌰𑌾𑌮𑍋𑌽𑌤𑌿𑌬𑌲𑌶𑍍𑌚 𑌲𑌕𑍍𑌷𑍍𑌮𑌣𑌃 ॥ 2 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌦𑍍𑌵𑌿𑌤𑍀𑌯𑌸𑍍𑌸𑌰𑍍𑌗𑌃 ॥
