𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌏𑌕𑌾𑌦𑌶𑌸𑍍𑌸𑌰𑍍𑌗𑌃 ।
𑌰𑌾𑌮𑌸𑍍𑌯 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌹𑌰𑍍𑌷𑌪𑍌𑌰𑍁𑌷𑌵𑌰𑍍𑌧𑌨𑌮𑍍 ।
𑌸𑍁𑌗𑍍𑌰𑍀𑌵𑌃 𑌪𑍂𑌜𑌯𑌾𑌂𑌚𑌕𑍍𑌰𑍇 𑌰𑌾𑌘𑌵𑌂 𑌪𑍍𑌰𑌶𑌶𑌂𑌸 𑌚 ॥ 1 ॥
𑌅𑌸𑌂𑌶𑌯𑌂 𑌪𑍍𑌰𑌜𑍍𑌵𑌲𑌿𑌤𑍈𑌸𑍍𑌤𑍀𑌕𑍍𑌷𑍍𑌣𑍈𑌰𑍍𑌮𑌰𑍍𑌮𑌾𑌤𑌿𑌗𑍈𑌶𑍍𑌶𑌰𑍈𑌃 ।
𑌤𑍍𑌵𑌂 𑌦𑌹𑍇𑌃 𑌕𑍁𑌪𑌿𑌤𑍋 𑌲𑍋𑌕𑌾𑌨𑍍𑌯𑍁𑌗𑌾𑌂𑌤 𑌇𑌵 𑌭𑌾𑌸𑍍𑌕𑌰𑌃 ॥ 2 ॥
𑌵𑌾𑌲𑌿𑌨𑌃 𑌪𑍌𑌰𑍁𑌷𑌂 𑌯𑌤𑍍𑌤𑌦𑍍𑌯𑌚𑍍𑌚 𑌵𑍀𑌰𑍍𑌯𑌂 𑌧𑍃𑌤𑌿𑌶𑍍𑌚 𑌯𑌾 ।
𑌤𑌨𑍍𑌮𑌮𑍈𑌕𑌮𑌨𑌾𑌶𑍍𑌶𑍍𑌰𑍁𑌤𑍍𑌵𑌾 𑌵𑌿𑌧𑌤𑍍𑌸𑍍𑌵 𑌯𑌦𑌨𑌂𑌤𑌰𑌮𑍍 ॥ 3 ॥
𑌸𑌮𑍁𑌦𑍍𑌰𑌾𑌤𑍍𑌪𑌶𑍍𑌚𑌿𑌮𑌾𑌤𑍍𑌪𑍂𑌰𑍍𑌵𑌂 𑌦𑌕𑍍𑌷𑌿𑌣𑌾𑌦𑌪𑌿 𑌚𑍋𑌤𑍍𑌤𑌰𑌮𑍍 ।
𑌕𑍍𑌰𑌾𑌮𑌤𑍍𑌯𑌨𑍁𑌦𑌿𑌤𑍇 𑌸𑍂𑌰𑍍𑌯𑍇 𑌵𑌾𑌲𑍀 𑌵𑍍𑌯𑌪𑌗𑌤𑌕𑍍𑌲𑌮𑌃 ॥ 4 ॥
𑌅𑌗𑍍𑌰𑌾𑌣𑍍𑌯𑌾𑌰𑍁𑌹𑍍𑌯 𑌶𑍈𑌲𑌾𑌨𑌾𑌂 𑌶𑌿𑌖𑌰𑌾𑌣𑌿 𑌮𑌹𑌾𑌂𑌤𑍍𑌯𑌪𑌿 ।
𑌊𑌰𑍍𑌧𑍍𑌵𑌮𑍁𑌤𑍍𑌕𑍍𑌷𑌿𑌪𑍍𑌯 𑌤𑌰𑌸𑌾 𑌪𑍍𑌰𑌤𑌿𑌗𑍃𑌹𑍍𑌣𑌾𑌤𑌿 𑌵𑍀𑌰𑍍𑌯𑌵𑌾𑌨𑍍 ॥ 5 ॥
𑌬𑌹𑌵𑌸𑍍𑌸𑌾𑌰𑌵𑌂𑌤𑌶𑍍𑌚 𑌵𑌨𑍇𑌷𑍁 𑌵𑌿𑌵𑌿𑌧𑌾 𑌦𑍍𑌰𑍁𑌮𑌾𑌃 ।
𑌵𑌾𑌲𑌿𑌨𑌾 𑌤𑌰𑌸𑌾 𑌭𑌗𑍍𑌨𑌾 𑌬𑌲𑌂 𑌪𑍍𑌰𑌥𑌯𑌤𑌾𑌽𑌤𑍍𑌮𑌨𑌃 ॥ 6 ॥
𑌮𑌹𑌿𑌷𑍋 𑌦𑍁𑌂𑌦𑍁𑌭𑌿𑌰𑍍𑌨𑌾𑌮 𑌕𑍈𑌲𑌾𑌸𑌶𑌿𑌖𑌰𑌪𑍍𑌰𑌭𑌃 ।
𑌬𑌲𑌂 𑌨𑌾𑌗𑌸𑌹𑌸𑍍𑌰𑌸𑍍𑌯 𑌧𑌾𑌰𑌯𑌾𑌮𑌾𑌸 𑌵𑍀𑌰𑍍𑌯𑌵𑌾𑌨𑍍 ॥ ॥
𑌵𑍀𑌰𑍍𑌯𑍋𑌤𑍍𑌸𑍇𑌕𑍇𑌨 𑌦𑍁𑌷𑍍𑌟𑌾𑌤𑍍𑌮𑌾 𑌵𑌰𑌦𑌾𑌨𑌾𑌚𑍍𑌚 𑌮𑍋𑌹𑌿𑌤𑌃 ।
𑌜𑌗𑌾𑌮 𑌸𑍁𑌮𑌹𑌾𑌕𑌾𑌯 𑌸𑍍𑌸𑌮𑍁𑌦𑍍𑌰𑌂 𑌸𑌰𑌿𑌤𑌾𑌂 𑌪𑌤𑌿𑌮𑍍 ॥ ॥
𑌊𑌰𑍍𑌮𑌿𑌮𑌂𑌤𑌮𑌭𑌿𑌕𑍍𑌰𑌮𑍍𑌯 𑌸𑌾𑌗𑌰𑌂 𑌰𑌤𑍍𑌨𑌸𑌂𑌚𑌯𑌮𑍍 ।
𑌮𑌹𑍍𑌯𑌂 𑌯𑍁𑌦𑍍𑌧𑌂 𑌪𑍍𑌰𑌯𑌚𑍍𑌛𑍇𑌤𑌿 𑌤𑌮𑍁𑌵𑌾𑌚 𑌮𑌹𑌾𑌰𑍍𑌣𑌵𑌮𑍍 ॥ ॥
𑌤𑌤𑌸𑍍𑌸𑌮𑍁𑌦𑍍𑌰𑍋 𑌧𑌰𑍍𑌮𑌾𑌤𑍍𑌮𑌾 𑌸𑌮𑍁𑌤𑍍𑌥𑌾𑌯 𑌮𑌹𑌾𑌬𑌲𑌃 ।
𑌅𑌬𑍍𑌰𑌵𑍀𑌦𑍍𑌵𑌚𑌨𑌂 𑌰𑌾𑌜𑌨𑍍𑌨𑌸𑍁𑌰𑌂 𑌕𑌾𑌲𑌚𑍋𑌦𑌿𑌤𑌮𑍍 ॥ 10 ॥
𑌸𑌮𑌰𑍍𑌥𑍋 𑌨𑌾𑌸𑍍𑌮𑌿 𑌤𑍇 𑌦𑌾𑌤𑍁𑌂 𑌯𑍁𑌦𑍍𑌧𑌂 𑌯𑍁𑌦𑍍𑌧𑌵𑌿𑌶𑌾𑌰𑌦 ।
𑌶𑍍𑌰𑍂𑌯𑌤𑌾𑌂 𑌚𑌾𑌭𑌿𑌧𑌾𑌸𑍍𑌯𑌾𑌮𑌿 𑌯𑌸𑍍𑌤𑍇 𑌯𑍁𑌦𑍍𑌧𑌂 𑌪𑍍𑌰𑌦𑌾𑌸𑍍𑌯𑌤𑌿 ॥ 11 ॥
𑌶𑍈𑌲𑌰𑌾𑌜𑍋 𑌮𑌹𑌾𑌰𑌣𑍍𑌯𑍇 𑌤𑌪𑌸𑍍𑌵𑌿𑌶𑌰𑌣𑌂 𑌪𑌰𑌮𑍍 ।
𑌶𑌂𑌕𑌰𑌶𑍍𑌵𑌶𑍁𑌰𑍋 𑌨𑌾𑌮𑍍𑌨𑌾 𑌹𑌿𑌮𑌵𑌾𑌨𑌿𑌤𑌿 𑌵𑌿𑌶𑍍𑌰𑍁𑌤𑌃 ॥ 12 ॥
𑌗𑍁𑌹𑌾𑌪𑍍𑌰𑌸𑍍𑌰𑌵𑌣𑍋𑌪𑍇𑌤𑍋 𑌬𑌹𑍁𑌕𑌂𑌦𑌰𑌨𑌿𑌰𑍍𑌦𑌰𑌃 ।
𑌸 𑌸𑌮𑌰𑍍𑌥𑌸𑍍𑌤𑌵 𑌪𑍍𑌰𑍀𑌤𑌿𑌮𑌤𑍁𑌲𑌾𑌂 𑌕𑌰𑍍𑌤𑍁𑌮𑌾𑌹𑌵𑍇 ॥ 13 ॥
𑌤𑌂 𑌭𑍀𑌤 𑌇𑌤𑌿 𑌵𑌿𑌜𑍍𑌞𑌾𑌯 𑌸𑌮𑍁𑌦𑍍𑌰𑌮𑌸𑍁𑌰𑍋𑌤𑍍𑌤𑌮𑌃 ।
𑌹𑌿𑌮𑌵𑌦𑍍𑌵𑌨𑌮𑌾𑌗𑌚𑍍𑌛𑌚𑍍𑌛𑌰𑌶𑍍𑌚𑌾𑌪𑌾𑌦𑌿𑌵 𑌚𑍍𑌯𑍁𑌤𑌃 ॥ 14 ॥
𑌤𑌤𑌸𑍍𑌤𑌸𑍍𑌯 𑌗𑌿𑌰𑍇𑌶𑍍𑌶𑍍𑌵𑍇𑌤𑌾 𑌗𑌜𑍇𑌂𑌦𑍍𑌰𑌵𑌿𑌪𑍍𑌰𑌲𑌾𑌶𑍍𑌶𑌿𑌲𑌾𑌃 ।
𑌚𑌿𑌕𑍍𑌷𑍇𑌪 𑌬𑌹𑍁𑌧𑌾 𑌭𑍂𑌮𑍌 𑌦𑍁𑌂𑌦𑍁𑌭𑌿𑌰𑍍𑌵𑌿𑌨𑌨𑌾𑌦 𑌚 ॥ 15 ॥
𑌤𑌤𑌶𑍍𑌶𑍍𑌵𑍇𑌤𑌾𑌂𑌬𑍁𑌦𑌾𑌕𑌾𑌰𑌃 𑌸𑍌𑌮𑍍𑌯𑌃 𑌪𑍍𑌰𑍀𑌤𑌿𑌕𑌰𑌾𑌕𑍃𑌤𑌿𑌃 ।
𑌹𑌿𑌮𑌵𑌾𑌨𑌬𑍍𑌰𑌵𑍀𑌦𑍍𑌵𑌾𑌕𑍍𑌯𑌂 𑌸𑍍𑌵𑍇 𑌏𑌵 𑌶𑌿𑌖𑌰𑍇 𑌸𑍍𑌥𑌿𑌤𑌃 ॥ 16 ॥
𑌕𑍍𑌲𑍇𑌷𑍍𑌟𑍁𑌮𑌰𑍍𑌹𑌸𑌿 𑌮𑌾𑌂 𑌨 𑌤𑍍𑌵𑌂 𑌦𑍁𑌂𑌦𑍁𑌭𑍇 𑌧𑌰𑍍𑌮𑌵𑌤𑍍𑌸𑌲 ।
𑌰𑌣𑌕𑌰𑍍𑌮𑌸𑍍𑌵𑌕𑍁𑌶𑌲𑌸𑍍𑌤𑌪𑌸𑍍𑌵𑌿𑌶𑌰𑌣𑌂 𑌹𑍍𑌯𑌹𑌮𑍍 ॥ 1 ॥
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌗𑌿𑌰𑌿𑌰𑌾𑌜𑌸𑍍𑌯 𑌧𑍀𑌮𑌤𑌃 ।
𑌉𑌵𑌾𑌚 𑌦𑍁𑌂𑌦𑍁𑌭𑌿𑌰𑍍𑌵𑌾𑌕𑍍𑌯𑌂 𑌕𑍍𑌰𑍋𑌧𑌾𑌤𑍍𑌸𑌂𑌰𑌕𑍍𑌤𑌲𑍋𑌚𑌨𑌃 ॥ 1 ॥
𑌯𑌦𑌿 𑌯𑍁𑌦𑍍𑌧𑍇𑌽𑌸𑌮𑌰𑍍𑌥𑌸𑍍𑌤𑍍𑌵𑌂 𑌮𑌦𑍍𑌭𑌯𑌾𑌦𑍍𑌵𑌾 𑌨𑌿𑌰𑍁𑌦𑍍𑌯𑌮𑌃 ।
𑌸𑌮𑌾𑌚𑌕𑍍𑌷𑍍𑌵 𑌪𑍍𑌰𑌦𑌦𑍍𑌯𑌾𑌨𑍍𑌮𑍇 𑌯𑍋𑌽𑌦𑍍𑌯 𑌯𑍁𑌦𑍍𑌧𑌂 𑌯𑍁𑌯𑍁𑌤𑍍𑌸𑌤𑌃 ॥ 1 ॥
𑌹𑌿𑌮𑌵𑌾𑌨𑌬𑍍𑌰𑌵𑍀𑌦𑍍𑌵𑌾𑌕𑍍𑌯𑌂 𑌶𑍍𑌰𑍁𑌤𑍍𑌵𑌾 𑌵𑌾𑌕𑍍𑌯𑌵𑌿𑌶𑌾𑌰𑌦𑌃 ।
𑌅𑌨𑍁𑌕𑍍𑌤𑌪𑍂𑌰𑍍𑌵𑌂 𑌧𑌰𑍍𑌮𑌾𑌤𑍍𑌮𑌾 𑌕𑍍𑌰𑍋𑌧𑌾𑌤𑍍𑌤𑌮𑌸𑍁𑌰𑍋𑌤𑍍𑌤𑌮𑌮𑍍 ॥ 20 ॥
𑌵𑌾𑌲𑍀 𑌨𑌾𑌮 𑌮𑌹𑌾𑌪𑍍𑌰𑌾𑌜𑍍𑌞𑌶𑍍𑌶𑌕𑍍𑌰𑌤𑍁𑌲𑍍𑌯 𑌪𑌰𑌾𑌕𑍍𑌰𑌮𑌃 ।
𑌅𑌧𑍍𑌯𑌾𑌸𑍍𑌤𑍇 𑌵𑌾𑌨𑌰𑌶𑍍𑌶𑍍𑌰𑍀𑌮𑌾𑌨𑍍 𑌕𑌿𑌷𑍍𑌕𑌿𑌂𑌧𑌾𑌮𑌤𑍁𑌲𑌪𑍍𑌰𑌭𑌾𑌮𑍍 ॥ 21 ॥
𑌸 𑌸𑌮𑌰𑍍𑌥𑍋 𑌮𑌹𑌾𑌪𑍍𑌰𑌾𑌜𑍍𑌞𑌸𑍍𑌤𑌵 𑌯𑍁𑌦𑍍𑌧𑌵𑌿𑌶𑌾𑌰𑌦𑌃 ।
𑌦𑍍𑌵𑌂𑌦𑍍𑌵𑌯𑍁𑌦𑍍𑌧𑌂 𑌮𑌹𑌦𑍍𑌦𑌾𑌤𑍁𑌂 𑌨𑌮𑍁𑌚𑍇𑌰𑌿𑌵 𑌵𑌾𑌸𑌵𑌃 ॥ 22 ॥
𑌤𑌂 𑌶𑍀𑌘𑍍𑌰𑌮𑌭𑌿𑌗𑌚𑍍𑌛 𑌤𑍍𑌵𑌂 𑌯𑌦𑌿 𑌯𑍁𑌦𑍍𑌧𑌮𑌿𑌹𑍇𑌚𑍍𑌛𑌸𑌿 ।
𑌸 𑌹𑌿 𑌦𑍁𑌰𑍍𑌧𑌰𑍍𑌷𑌣𑍋 𑌨𑌿𑌤𑍍𑌯𑌂 𑌶𑍂𑌰𑌸𑍍𑌸𑌮𑌰𑌕𑌰𑍍𑌮𑌣𑌿 ॥ 23 ॥
𑌶𑍍𑌰𑍁𑌤𑍍𑌵𑌾 𑌹𑌿𑌮𑌵𑌤𑍋 𑌵𑌾𑌕𑍍𑌯𑌂 𑌕𑍋𑌧𑌾𑌵𑌿𑌷𑍍𑌟𑌸𑍍𑌸 𑌦𑍁𑌂𑌦𑍁𑌭𑌿𑌃 ।
𑌜𑌗𑌾𑌮 𑌤𑌾𑌂 𑌪𑍁𑌰𑍀𑌂 𑌤𑌸𑍍𑌯 𑌕𑌿𑌷𑍍𑌕𑌿𑌂𑌧𑌾𑌂 𑌵𑌾𑌲𑌿𑌨𑌸𑍍𑌤𑌦𑌾 ॥ 24 ॥
𑌧𑌾𑌰𑌯𑌨𑍍𑌮𑌾𑌹𑌿𑌷𑌂 𑌰𑍂𑌪𑌂 𑌤𑍀𑌕𑍍𑌷𑍍𑌣𑌶𑍃𑌂𑌗𑍋 𑌭𑌯𑌾𑌵𑌹𑌃 ।
𑌪𑍍𑌰𑌾𑌵𑍃𑌷𑍀𑌵 𑌮𑌹𑌾𑌮𑍇𑌘𑌸𑍍𑌤𑍋𑌯𑌪𑍂𑌰𑍍𑌣𑍋 𑌨𑌭𑌸𑍍𑌸𑍍𑌥𑌲𑍇 ॥ 25 ॥
𑌤𑌤𑌸𑍍𑌤𑍁 𑌦𑍍𑌵𑌾𑌰𑌮𑌾𑌗𑌮𑍍𑌯 𑌕𑌿𑌷𑍍𑌕𑌿𑌂𑌧𑌾𑌯𑌾 𑌮𑌹𑌾𑌬𑌲𑌃 ।
𑌨𑌨𑌰𑍍𑌦 𑌕𑌂𑌪𑌯𑌨𑍍𑌭𑍂𑌮𑌿𑌂 𑌦𑍁𑌂𑌦𑍁𑌭𑌿𑌰𑍍𑌦𑍁𑌂𑌦𑍁𑌭𑌿𑌰𑍍𑌯𑌥𑌾 ॥ 26 ॥
𑌸𑌮𑍀𑌪𑌸𑍍𑌥𑌾𑌂𑌦𑍍𑌰𑍁𑌮𑌾𑌨𑍍𑌭𑌂𑌜𑌨𑍍𑌵𑌸𑍁𑌧𑌾𑌂 𑌦𑌾𑌰𑌯𑌨𑍍𑌖𑍁𑌰𑍈𑌃 ।
𑌵𑌿𑌷𑌾𑌣𑍇𑌨𑍋𑌲𑍍𑌲𑌿𑌖𑌨𑍍 𑌦𑌰𑍍𑌪𑌾𑌤𑍍𑌤𑌦𑍍𑌦𑍍𑌵𑌾𑌰𑌂 𑌦𑍍𑌵𑌿𑌰𑌦𑍋 𑌯𑌥𑌾 ॥ 2 ॥
𑌅𑌂𑌤𑌃𑌪𑍁𑌰𑌗𑌤𑍋 𑌵𑌾𑌲𑍀 𑌶𑍍𑌰𑍁𑌤𑍍𑌵𑌾 𑌶𑌬𑍍𑌦𑌮𑌮𑌰𑍍𑌷𑌣𑌃 ।
𑌨𑌿𑌷𑍍𑌪𑌪𑌾𑌤 𑌸𑌹 𑌸𑍍𑌤𑍍𑌰𑍀𑌭𑌿𑌸𑍍𑌤𑌾𑌰𑌾𑌭𑌿𑌰𑌿𑌵 𑌚𑌂𑌦𑍍𑌰𑌮𑌾𑌃 ॥ 2 ॥
𑌮𑌿𑌤𑌂 𑌵𑍍𑌯𑌕𑍍𑌤𑌾𑌕𑍍𑌷𑌰𑌪𑌦𑌂 𑌤𑌮𑍁𑌵𑌾𑌚𑌾𑌥 𑌦𑍁𑌂𑌦𑍁𑌭𑌿𑌮𑍍 ।
𑌹𑌰𑍀𑌣𑌾𑌮𑍀𑌶𑍍𑌵𑌰𑍋 𑌵𑌾𑌲𑍀 𑌸𑌰𑍍𑌵𑍇𑌷𑌾𑌂 𑌵𑌨𑌚𑌾𑌰𑌿𑌣𑌾𑌮𑍍 ॥ 2 ॥
𑌕𑌿𑌮𑌰𑍍𑌥𑌂 𑌨𑌗𑌰𑌦𑍍𑌵𑌾𑌰𑌮𑌿𑌦𑌂 𑌰𑍁𑌧𑍍𑌦𑍍𑌵𑌾 𑌵𑌿𑌨𑌰𑍍𑌦𑌸𑌿 ।
𑌦𑍁𑌂𑌦𑍁𑌭𑍇 𑌵𑌿𑌦𑌿𑌤𑍋 𑌮𑍇𑌽𑌸𑌿 𑌰𑌕𑍍𑌷𑌪𑍍𑌰𑌾𑌣𑌾𑌨𑍍𑌮𑌹𑌾𑌬𑌲 ॥ 30 ॥
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌵𑌾𑌨𑌰𑍇𑌂𑌦𑍍𑌰𑌸𑍍𑌯 𑌧𑍀𑌮𑌤𑌃 ।
𑌉𑌵𑌾𑌚 𑌦𑍁𑌂𑌦𑍁𑌭𑌿𑌰𑍍𑌵𑌾𑌕𑍍𑌯𑌂 𑌰𑍋𑌷𑌾𑌤𑍍𑌸𑌂𑌰𑌕𑍍𑌤𑌲𑍋𑌚𑌨𑌃 ॥ 31 ॥
𑌨 𑌤𑍍𑌵𑌂 𑌸𑍍𑌤𑍍𑌰𑍀𑌸𑌨𑍍𑌨𑌿𑌧𑍌 𑌵𑍀𑌰 𑌵𑌚𑌨𑌂 𑌵𑌕𑍍𑌤𑍁𑌮𑌰𑍍𑌹𑌸𑌿 ।
𑌮𑌮 𑌯𑍁𑌦𑍍𑌧𑌂 𑌪𑍍𑌰𑌯𑌚𑍍𑌛𑌾𑌦𑍍𑌯 𑌤𑌤𑍋 𑌜𑍍𑌞𑌾𑌸𑍍𑌯𑌾𑌮𑌿 𑌤𑍇 𑌬𑌲𑌮𑍍 ॥ 32 ॥
𑌅𑌥𑌵𑌾 𑌧𑌾𑌰𑌯𑌿𑌷𑍍𑌯𑌾𑌮𑌿 𑌕𑍍𑌰𑍋𑌧𑌮𑌦𑍍𑌯 𑌨𑌿𑌶𑌾𑌮𑌿𑌮𑌾𑌮𑍍 ।
𑌗𑍃𑌹𑍍𑌯𑌤𑌾𑌮𑍁𑌦𑌯𑌸𑍍𑌸𑍍𑌵𑍈𑌰𑌂 𑌕𑌾𑌮𑌭𑍋𑌗𑍇𑌷𑍁 𑌵𑌾𑌨𑌰 ॥ 33 ॥
𑌦𑍀𑌯𑌤𑌾𑌂 𑌸𑌂𑌪𑍍𑌰𑌦𑌾𑌨𑌂 𑌚 𑌪𑌰𑌿𑌷𑍍𑌵𑌜𑍍𑌯 𑌚 𑌵𑌾𑌨𑌰𑌾𑌨𑍍 ।
𑌸𑌰𑍍𑌵𑌶𑌾𑌖𑌾𑌮𑍃𑌗𑍇𑌂𑌦𑍍𑌰 𑌸𑍍𑌤𑍍𑌵𑌂 𑌸𑌂𑌸𑌾𑌦𑌯 𑌸𑍁𑌹𑍃𑌜𑍍𑌜𑌨𑌾𑌨𑍍 ॥ 34 ॥
𑌸𑍁𑌦𑍃𑌷𑍍𑌟𑌾𑌂 𑌕𑍁𑌰𑍁 𑌕𑌿𑌷𑍍𑌕𑌿𑌂𑌧𑌾𑌂 𑌕𑍁𑌰𑍁𑌷𑍍𑌵𑌾𑌤𑍍𑌮𑌸𑌮𑌂 𑌪𑍁𑌰𑍇 ।
𑌕𑍍𑌰𑍀𑌡𑌸𑍍𑌵 𑌚 𑌸𑌹 𑌸𑍍𑌤𑍍𑌰𑍀𑌭𑌿𑌰𑌹𑌂 𑌤𑍇 𑌦𑌰𑍍𑌪𑌨𑌾𑌶𑌨𑌃 ॥ 35 ॥
𑌯𑍋 𑌹𑌿 𑌮𑌤𑍍𑌤𑌂 𑌪𑍍𑌰𑌮𑌤𑍍𑌤𑌂 𑌵𑌾 𑌸𑍁𑌪𑍍𑌤𑌂 𑌵𑌾 𑌰𑌹𑌿𑌤𑌂 𑌭𑍃𑌶𑌮𑍍 ।
𑌹𑌨𑍍𑌯𑌾𑌤𑍍𑌸 𑌭𑍍𑌰𑍂𑌣𑌹𑌾 𑌲𑍋𑌕𑍇 𑌤𑍍𑌵𑌦𑍍𑌵𑌿𑌧𑌂 𑌮𑌦𑌮𑍋𑌹𑌿𑌤𑌮𑍍 ॥ 36 ॥
𑌸 𑌪𑍍𑌰𑌹𑌸𑍍𑌯𑌾𑌬𑍍𑌰𑌵𑍀𑌨𑍍𑌮𑌂𑌦𑌂 𑌕𑍍𑌰𑍋𑌧𑌾𑌤𑍍𑌤𑌮𑌸𑍁𑌰𑍋𑌤𑍍𑌤𑌮𑌮𑍍 ।
𑌵𑌿𑌸𑍃𑌜𑍍𑌯 𑌤𑌾𑌃 𑌸𑍍𑌤𑍍𑌰𑌿𑌯𑌸𑍍𑌸𑌰𑍍𑌵𑌾𑌸𑍍𑌤𑌾𑌰𑌾𑌪𑍍𑌰𑌭𑍃𑌤𑌿𑌕𑌾𑌸𑍍𑌤𑌦𑌾 ॥ 3 ॥
𑌮𑌤𑍍𑌤𑍋𑌽𑌯𑌮𑌿𑌤𑌿 𑌮𑌾 𑌮𑌂𑌸𑍍𑌥𑌾 𑌯𑌦𑍍𑌯𑌭𑍀𑌤𑍋𑌽𑌸𑌿 𑌸𑌂𑌯𑍁𑌗𑍇 ।
𑌮𑌦𑍋𑌽𑌯𑌂 𑌸𑌂𑌪𑍍𑌰𑌹𑌾𑌰𑍇𑌽𑌸𑍍𑌮𑌿𑌨𑍍𑌵𑍀𑌰𑌪𑌾𑌨𑌂 𑌸𑌮𑌰𑍍𑌥𑍍𑌯𑌤𑌾𑌮𑍍 ॥ 3 ॥
𑌤𑌮𑍇𑌵𑌮𑍁𑌕𑍍𑌤𑍍𑌵𑌾 𑌸𑌂𑌕𑍃𑌦𑍍𑌧𑍋 𑌮𑌾𑌲𑌾𑌮𑍁𑌤𑍍𑌕𑍍𑌷𑌿𑌪𑍍𑌯 𑌕𑌾𑌂𑌚𑌨𑍀𑌮𑍍 ।
𑌪𑌿𑌤𑍍𑌰𑌾 𑌦𑌤𑍍𑌤𑌾𑌂 𑌮𑌹𑍇𑌂𑌦𑍍𑌰𑍇𑌣 𑌯𑍁𑌦𑍍𑌧𑌾𑌯 𑌵𑍍𑌯𑌵𑌤𑌿𑌷𑍍𑌠𑌤 ॥ 3 ॥
𑌵𑌿𑌷𑌾𑌣𑌯𑍋𑌰𑍍𑌗𑍃𑌹𑍀𑌤𑍍𑌵𑌾 𑌤𑌂 𑌦𑍁𑌂𑌦𑍁𑌭𑌿𑌂 𑌗𑌿𑌰𑌿𑌸𑌨𑍍𑌨𑌿𑌭𑌮𑍍 ।
𑌆𑌵𑌿𑌧𑍍𑌯𑌤 𑌤𑌦𑌾 𑌵𑌾𑌲𑍀 𑌵𑌿𑌨𑌦𑌨𑍍𑌕𑌪𑌿𑌕𑍁𑌂𑌜𑌰𑌃 ॥ 40 ॥
𑌵𑌾𑌲𑍀 𑌵𑍍𑌯𑌾𑌪𑌾𑌤𑌯𑌾𑌂𑌚𑌕𑍍𑌰𑍇 𑌨𑌨𑌰𑍍𑌦 𑌚 𑌮𑌹𑌾𑌸𑍍𑌵𑌨𑌮𑍍 ।
𑌶𑍍𑌰𑍋𑌤𑍍𑌰𑌾𑌭𑍍𑌯𑌾𑌮𑌥 𑌰𑌕𑍍𑌤𑌂 𑌤𑍁 𑌤𑌸𑍍𑌯 𑌸𑍁𑌸𑍍𑌰𑌾𑌵 𑌪𑌾𑌤𑍍𑌯𑌤𑌃 ॥ 41 ॥
𑌤𑌯𑍋𑌸𑍍𑌤𑍁 𑌕𑍍𑌰𑍋𑌧𑌸𑌂𑌰𑌂𑌭𑌾𑌤𑍍𑌪𑌰𑌸𑍍𑌪𑌰𑌜𑌯𑍈𑌷𑌿𑌣𑍋𑌃 ।
𑌯𑍁𑌦𑍍𑌧𑌂 𑌸𑌮𑌭𑌵𑌦𑍍𑌘𑍋𑌰𑌂 𑌦𑍁𑌂𑌦𑍁𑌭𑍇𑌰𑍍𑌵𑌾𑌨𑌰𑌸𑍍𑌯𑌚 ॥ 42 ॥
𑌅𑌯𑍁𑌦𑍍𑌧𑍍𑌯𑌤 𑌤𑌦𑌾 𑌵𑌾𑌲𑍀 𑌶𑌕𑍍𑌰𑌤𑍁𑌲𑍍𑌯𑌪𑌰𑌾𑌕𑍍𑌰𑌮𑌃 ।
𑌮𑍁𑌷𑍍𑌟𑌿𑌭𑌿𑌰𑍍𑌜𑌾𑌨𑍁𑌭𑌿𑌶𑍍𑌚𑍈𑌵 𑌶𑌿𑌲𑌾𑌭𑌿𑌃 𑌪𑌾𑌦𑌪𑍈𑌸𑍍𑌤𑌥𑌾 ॥ 43 ॥
𑌪𑌰𑌸𑍍𑌪𑌰𑌂 𑌘𑍍𑌨𑌤𑍋 𑌸𑍍𑌤𑌤𑍍𑌰 𑌵𑌾𑌨𑌰𑌾𑌸𑍁𑌰𑌯𑍋𑌸𑍍𑌤𑌦𑌾 ।
𑌆𑌸𑍀𑌦𑌸𑍁𑌰𑍋 𑌯𑍁𑌦𑍍𑌧𑍇 𑌶𑌕𑍍𑌰𑌸𑍂𑌨𑍁𑌰𑍍𑌵𑍍𑌯𑌵𑌰𑍍𑌧𑌤 ॥ 44 ॥
𑌵𑍍𑌯𑌾𑌪𑌾𑌰𑌵𑍀𑌰𑍍𑌯𑌧𑍈𑌰𑍍𑌯𑍈𑌶𑍍𑌚 𑌪𑌰𑌿𑌕𑍍𑌷𑍀𑌣𑌂 𑌪𑌰𑌾𑌕𑍍𑌰𑌮𑍈𑌃 ।
𑌤𑌂 𑌤𑍁 𑌦𑍁𑌂𑌦𑍁𑌭𑌿𑌮𑍁𑌦𑍍𑌯𑌮𑍍𑌯 𑌧𑌰𑌣𑍍𑌯𑌾𑌮𑌭𑍍𑌯𑌪𑌾𑌤𑌯𑌤𑍍 ॥ 45 ॥
𑌯𑍁𑌦𑍍𑌧𑍇 𑌪𑍍𑌰𑌾𑌣𑌹𑌰𑍇 𑌤𑌸𑍍𑌮𑌿𑌨𑍍𑌨𑌿𑌷𑍍𑌪𑌿𑌷𑍍𑌟𑍋 𑌦𑍁𑌂𑌦𑍁𑌭𑌿𑌸𑍍𑌤𑌦𑌾 ।
𑌪𑌪𑌾𑌤 𑌚 𑌮𑌹𑌾𑌕𑌾𑌯𑌃 𑌕𑍍𑌷𑌿𑌤𑍌 𑌪𑌂𑌚𑌤𑍍𑌵𑌮𑌾𑌗𑌤𑌃 ॥ 46 ॥
𑌤𑌂 𑌤𑍋𑌲𑌯𑌿𑌤𑍍𑌵𑌾 𑌬𑌾𑌹𑍁𑌭𑍍𑌯𑌾𑌂 𑌗𑌤𑌸𑌤𑍍𑌤𑍍𑌵𑌮𑌚𑍇𑌤𑌨𑌮𑍍 ।
𑌚𑌿𑌕𑍍𑌷𑍇𑌪 𑌬𑌲𑌵𑌾𑌨𑍍𑌵𑌾𑌲𑍀 𑌵𑍇𑌗𑍇𑌨𑍈𑌕𑍇𑌨 𑌯𑍋𑌜𑌨𑌮𑍍 ॥ 4 ॥
𑌤𑌸𑍍𑌯 𑌵𑍇𑌗𑌪𑍍𑌰𑌵𑌿𑌦𑍍𑌧𑌸𑍍𑌯 𑌵𑌕𑍍𑌤𑍍𑌰𑌾𑌤𑍍𑌕𑍍𑌷𑌤𑌜𑌬𑌿𑌂𑌦𑌵𑌃 ।
𑌪𑍍𑌰𑌪𑍇𑌤𑍁𑌰𑍍𑌮𑌾𑌰𑍁𑌤𑍋𑌤𑍍𑌕𑍍𑌷𑌿𑌪𑍍𑌤𑌾 𑌮𑌤𑌂𑌗𑌪𑍍𑌯𑌾𑌶𑍍𑌰𑌮𑌂 𑌪𑍍𑌰𑌤𑌿 ॥ 4 ॥
𑌤𑌾𑌂𑌦𑍃𑌷𑍍𑌟𑍍𑌵𑌾 𑌪𑌤𑌿𑌤𑌾𑌂𑌸𑍍𑌤𑌸𑍍𑌯 𑌮𑍁𑌨𑌿𑌶𑍍𑌶𑍋𑌣𑌿𑌤𑌵𑌿𑌪𑍍𑌰𑍁𑌷𑌃 ।
𑌕𑍍𑌰𑍁𑌦𑍍𑌧𑌸𑍍𑌤𑌤𑍍𑌰 𑌮𑌹𑌾𑌭𑌾𑌗𑌶𑍍𑌚𑌿𑌂𑌤𑌯𑌾𑌮𑌾𑌸 𑌕𑍋𑌨𑍍𑌵𑌯𑌮𑍍 ॥ 4 ॥
𑌯𑍇𑌨 𑌅𑌹𑌂 𑌸𑌹𑌸𑌾 𑌸𑍍𑌪𑍃𑌷𑍍𑌟𑌃 𑌶𑍋𑌣𑌿𑌤𑍇𑌨 𑌦𑍁𑌰𑌾𑌤𑍍𑌮𑌨𑌾 ।
𑌕𑍋𑌽𑌯𑌂 𑌦𑍁𑌰𑌾𑌤𑍍𑌮𑌾 𑌦𑍁𑌰𑍍 𑌬𑍁𑌦𑍍𑌧𑌿𑌃 𑌅𑌕𑍃𑌤𑌾𑌤𑍍𑌮𑌾 𑌚 𑌬𑌾𑌲𑌿𑌶𑌃 ॥ 50 ॥
𑌇𑌤𑍍𑌯𑍁𑌕𑍍𑌤𑍍𑌵𑌾𑌽𑌥 𑌵𑌿𑌨𑌿𑌷𑍍𑌕𑍍𑌰𑌮𑍍𑌯 𑌦𑌦𑌰𑍍𑌶 𑌮𑍁𑌨𑌿𑌸𑌤𑍍𑌤𑌮𑌃 ।
𑌮𑌹𑌿𑌷𑌂 𑌪𑌰𑍍𑌵𑌤𑌾𑌕𑌾𑌰𑌂 𑌗𑌤𑌾𑌸𑍁𑌂 𑌪𑌤𑌿𑌤𑌂 𑌭𑍁𑌵𑌿 ॥ 51 ॥
𑌸 𑌤𑍁 𑌵𑌿𑌜𑍍𑌞𑌾𑌯 𑌤𑌪𑌸𑌾 𑌵𑌾𑌨𑌰𑍇𑌣 𑌕𑍃𑌤𑌂 𑌹𑌿 𑌤𑌤𑍍 ।
𑌉𑌤𑍍𑌸𑌸𑌰𑍍𑌜 𑌮𑌹𑌾𑌶𑌾𑌪𑌂 𑌕𑍍𑌷𑍇𑌪𑍍𑌤𑌾𑌰𑌂 𑌵𑌾𑌲𑌿𑌨𑌂 𑌪𑍍𑌰𑌤𑌿 ॥ 52 ॥
𑌇𑌹 𑌤𑍇𑌨𑌾𑌪𑍍𑌰𑌵𑍇𑌷𑍍𑌟𑌵𑍍𑌯𑌂 𑌪𑍍𑌰𑌵𑌿𑌷𑍍𑌟𑌸𑍍𑌯 𑌵𑌧𑍋 𑌭𑌵𑍇𑌤𑍍 ।
𑌵𑌨𑌂 𑌮𑌤𑍍𑌸𑌂𑌶𑍍𑌰𑌯𑌂 𑌯𑍇𑌨 𑌦𑍂𑌷𑌿𑌤𑌂 𑌰𑍁𑌧𑌿𑌰𑌸𑍍𑌰𑌵𑍈𑌃 ॥ 53 ॥
𑌸𑌂𑌭𑌗𑍍𑌨𑌾𑌃 𑌪𑌾𑌦𑌪𑌾𑌶𑍍𑌚𑍈𑌮𑍇𑌕𑍍𑌷𑌿𑌪𑌤𑍇𑌹𑌾𑌸𑍁𑌰𑍀𑌂 𑌤𑌨𑍁𑌮𑍍 ।
𑌸𑌮𑌂𑌤𑌾𑌦𑌾𑌦𑍍𑌯𑍋𑌜𑌨𑌂 𑌪𑍂𑌰𑍍𑌣𑌮𑌾𑌶𑍍𑌰𑌮𑌂 𑌮𑌾𑌮𑌕𑌂 𑌯𑌦𑌿 ॥ 54 ॥
𑌆𑌗𑌮𑌿𑌷𑍍𑌯𑌤𑌿 𑌦𑍁𑌰𑍍𑌬𑍁𑌦𑍍𑌧𑌿𑌰𑍍𑌵𑍍𑌯𑌕𑍍𑌤𑌂 𑌸 𑌨 𑌭𑌵𑌿𑌷𑍍𑌯𑌤𑌿 ।
𑌯𑍇 𑌚𑌾𑌪𑌿 𑌸𑌚𑌿𑌵𑌾𑌃 𑌸𑍍𑌤𑌸𑍍𑌯 𑌸𑌂𑌶𑍍𑌰𑌿𑌤𑌾 𑌮𑌾𑌮𑌕𑌂 𑌵𑌨𑌮𑍍 ॥ 55 ॥
𑌨 𑌚 𑌤𑍈𑌰𑌿𑌹 𑌵𑌸𑍍𑌤𑌵𑍍𑌯𑌂 𑌶𑍍𑌰𑍁𑌤𑍍𑌵𑌾 𑌯𑌾𑌂𑌤𑍁 𑌯𑌥𑌾𑌸𑍁𑌖𑌮𑍍 ।
𑌯𑌦𑌿 𑌤𑍇𑌽𑌪𑍀 𑌹 𑌤𑌿𑌷𑍍𑌠𑌂𑌤𑌿 𑌶𑌪𑌿𑌷𑍍𑌯𑍇 𑌤𑌾𑌨𑌪𑌿 𑌧𑍍𑌰𑍁𑌵𑌮𑍍 ॥ 56 ॥
𑌵𑌨𑍇𑌽𑌸𑍍𑌮𑌿𑌨𑍍𑌮𑌾𑌮𑌕𑍇 𑌨𑌿𑌤𑍍𑌯𑌂 𑌪𑍁𑌤𑍍𑌰𑌵𑌤𑍍𑌪𑌰𑌿𑌰𑌕𑍍𑌷𑌿𑌤𑍇 ।
𑌪𑌤𑍍𑌰𑌾𑌂𑌕𑍁𑌰𑌵𑌿𑌨𑌾𑌶𑌾𑌯 𑌫𑌲𑌮𑍂𑌲𑌾𑌭𑌵𑌾𑌯 𑌚 ॥ 5 ॥
𑌦𑌿𑌵𑌸𑌶𑍍𑌚𑌾𑌸𑍍𑌯 𑌮𑌰𑍍𑌯𑌾𑌦𑌾 𑌯𑌂 𑌦𑍍𑌰𑌷𑍍𑌟𑌾 𑌶𑍍𑌵𑍋𑌽𑌸𑍍𑌮𑌿 𑌵𑌾𑌨𑌰𑌮𑍍 ।
𑌬𑌹𑍁𑌵𑌰𑍍𑌷𑌸𑌹𑌸𑍍𑌰𑌾𑌣𑌿 𑌸 𑌵𑍈 𑌶𑍈𑌲𑍋 𑌭𑌵𑌿𑌷𑍍𑌯𑌤𑌿 ॥ 5 ॥
𑌤𑌤𑌸𑍍𑌤𑍇 𑌵𑌾𑌨𑌰𑌾𑌶𑍍𑌶𑍍𑌰𑍁𑌤𑍍𑌵𑌾 𑌗𑌿𑌰𑌂 𑌮𑍁𑌨𑌿𑌸𑌮𑍀𑌰𑌿𑌤𑌾𑌮𑍍 ।
𑌨𑌿𑌶𑍍𑌚𑌕𑍍𑌰𑌮𑍁𑌰𑍍𑌵𑌨𑌾𑌤𑍍𑌤𑌸𑍍𑌮𑌾𑌤𑍍𑌤𑌾𑌂𑌦𑍃𑌷𑍍𑌟𑍍𑌵𑌾 𑌵𑌾𑌲𑌿𑌰𑌬𑍍𑌰𑌵𑍀𑌤𑍍 ॥ 5 ॥
𑌕𑌿𑌂 𑌭𑌵𑌂𑌤𑌸𑍍𑌸𑌮𑌸𑍍𑌤𑌾𑌶𑍍𑌚 𑌮𑌤𑌂𑌗𑌵𑌨𑌵𑌾𑌸𑌿𑌨𑌃 ।
𑌮𑌤𑍍𑌸𑌮𑍀𑌪𑌮𑌨𑍁𑌪𑍍𑌰𑌾𑌪𑍍𑌤𑌾 𑌅𑌪𑌿 𑌸𑍍𑌵𑌸𑍍𑌤𑌿 𑌵𑌨𑍌𑌕𑌸𑌾𑌮𑍍 ॥ 60 ॥
𑌤𑌤𑌸𑍍𑌤𑍇 𑌕𑌾𑌰𑌣𑌂 𑌸𑌰𑍍𑌵𑌂 𑌤𑌦𑌾 𑌶𑌾𑌪𑌂 𑌚 𑌵𑌾𑌲𑌿𑌨𑌃 ।
𑌶𑌶𑌂𑌸𑍁𑌰𑍍𑌵𑌾𑌨𑌰𑌾𑌸𑍍𑌸𑌰𑍍𑌵𑍇 𑌵𑌾𑌲𑌿𑌨𑍇 𑌹𑍇𑌮𑌮𑌾𑌲𑌿𑌨𑍇 ॥ 61 ॥
𑌏𑌤𑌚𑍍𑌛𑍍𑌰𑍁𑌤𑍍𑌵𑌾 𑌤𑌦𑌾 𑌵𑌾𑌲𑍀 𑌵𑌚𑌨𑌂 𑌵𑌾𑌨𑌰𑍇𑌰𑌿𑌤𑌮𑍍 ।
𑌸 𑌮𑌹𑌰𑍍𑌷𑌿𑌂𑌤𑌦𑌾𑌽𑌸𑌾𑌦𑍍𑌯 𑌯𑌾𑌚𑌤𑍇 𑌸𑍍𑌮 𑌕𑍃𑌤𑌾𑌂𑌜𑌲𑌿𑌃 ॥ 62 ॥
𑌮𑌹𑌰𑍍𑌷𑌿𑌸𑍍𑌤𑌮𑌨𑌾𑌦𑍃𑌤𑍍𑌯 𑌪𑍍𑌰𑌵𑌿𑌵𑍇𑌶𑌾𑌶𑍍𑌰𑌮𑌂 𑌤𑌦𑌾 ।
𑌶𑌾𑌪𑌧𑌾𑌰𑌣𑌭𑍀𑌤𑌸𑍍𑌤𑍁 𑌵𑌾𑌲𑍀 𑌵𑌿𑌹𑍍𑌵𑌲𑌤𑌾𑌂 𑌗𑌤𑌃 ॥ 63 ॥
𑌤𑌤𑌶𑍍𑌶𑌾𑌪𑌭𑌯𑌾𑌦𑍍𑌭𑍀𑌤 𑌋𑌶𑍍𑌯𑌮𑍂𑌕𑌂 𑌮𑌹𑌾𑌗𑌿𑌰𑌿𑌮𑍍 ।
𑌪𑍍𑌰𑌵𑍇𑌷𑍍𑌟𑍁𑌂 𑌨𑍇𑌚𑍍𑌛𑌤𑌿 𑌹𑌰𑌿𑌰𑍍𑌦𑍍𑌰𑌷𑍍𑌟𑍁𑌂 𑌵𑌾𑌪𑌿 𑌨𑌰𑍇𑌶𑍍𑌵𑌰 ॥ 64 ॥
𑌤𑌸𑍍𑌯𑌾𑌪𑍍𑌰𑌵𑍇𑌶𑌂 𑌜𑍍𑌞𑌾𑌤𑍍𑌵𑌾𑌽𑌹𑌮𑌿𑌦𑌂 𑌰𑌾𑌮 𑌮𑌹𑌾𑌵𑌨𑌮𑍍 ।
𑌵𑌿𑌚𑌰𑌾𑌮𑌿 𑌸𑌹𑌾𑌮𑌾𑌤𑍍𑌯𑍋 𑌵𑌿𑌷𑌾𑌦𑍇𑌨 𑌵𑌿𑌵𑌰𑍍𑌜𑌿𑌤𑌃 ॥ 65 ॥
𑌏𑌷𑍋𑌽𑌸𑍍𑌥𑌿𑌨𑌿𑌚𑌯𑌸𑍍𑌤𑌸𑍍𑌯 𑌦𑍁𑌂𑌦𑍁𑌭𑍇𑌸𑍍𑌸𑌂𑌪𑍍𑌰𑌕𑌾𑌶𑌤𑍇 ।
𑌵𑍀𑌰𑍍𑌯𑍋𑌤𑍍𑌸𑍇𑌕𑌾𑌨𑍍𑌨𑌿𑌰𑌸𑍍𑌤𑌸𑍍𑌯 𑌗𑌿𑌰𑌿𑌕𑍂𑌟𑍋𑌪𑌮𑍋 𑌮𑌹𑌾𑌨𑍍 ॥ 66 ॥
𑌇𑌮𑍇 𑌚 𑌵𑌿𑌪𑍁𑌲𑌾𑌸𑍍𑌸𑌾𑌲𑌾𑌸𑍍𑌸𑌪𑍍𑌤 𑌶𑌾𑌖𑌾𑌵𑌲𑌂𑌬𑌿𑌨𑌃 ।
𑌯𑌤𑍍𑌰𑍈𑌕𑌂 𑌘𑌟𑌤𑍇 𑌵𑌾𑌲𑍀 𑌨𑌿𑌷𑍍𑌪𑌤𑍍𑌰𑌯𑌿𑌤𑍁𑌮𑍋𑌜𑌸𑌾 ॥ 6 ॥
𑌏𑌤𑌦𑌸𑍍𑌯𑌾𑌸𑌮𑌂 𑌵𑍀𑌰𑍍𑌯𑌂 𑌮𑌯𑌾 𑌰𑌾𑌮 𑌪𑍍𑌰𑌕𑍀𑌰𑍍𑌤𑌿𑌤𑌮𑍍 ।
𑌕𑌥𑌂 𑌤𑌂 𑌵𑌾𑌲𑌿𑌨𑌂 𑌹𑌂𑌤𑍁𑌂 𑌸𑌮𑌰𑍇 𑌶𑌕𑍍𑌷𑍍𑌯𑌸𑍇 𑌨𑍃𑌪 ॥ 6 ॥
𑌤𑌥𑌾 𑌬𑍍𑌰𑍁𑌵𑌾𑌣𑌂 𑌸𑍁𑌗𑍍𑌰𑍀𑌵𑌂 𑌪𑍍𑌰𑌹𑌸𑌨𑍍 𑌲𑌕𑍍𑌷𑍍𑌮𑌣𑍋𑌽𑌬𑍍𑌰𑌵𑍀𑌤𑍍 ।
𑌕𑌸𑍍𑌮𑌿𑌨𑍍𑌕𑌰𑍍𑌮𑌣𑌿 𑌨𑌿𑌰𑍍𑌵𑍃𑌤𑍍𑌤𑍇 𑌶𑍍𑌰𑌦𑍍𑌦𑌧𑍍𑌯𑌾 𑌵𑌾𑌲𑌿𑌨𑍋 𑌵𑌧𑌮𑍍 ॥ 6 ॥
𑌤𑌮𑍁𑌵𑌾𑌚𑌾𑌥 𑌸𑍁𑌗𑍍𑌰𑍀𑌵𑌸𑍍𑌸𑌪𑍍𑌤 𑌸𑌾𑌲𑌾𑌨𑌿𑌮𑌾𑌨𑍍𑌪𑍁𑌰𑌾 ।
𑌏𑌵𑌮𑍇𑌕𑍈𑌕𑌶𑍋 𑌵𑌾𑌲𑍀 𑌵𑌿𑌵𑍍𑌯𑌾𑌥𑌾𑌥 𑌸 𑌚𑌾𑌸𑌕𑍃𑌤𑍍 ॥ 0 ॥
𑌰𑌾𑌮𑍋𑌽𑌪𑌿𑌦𑌾𑌰𑌯𑍇𑌦𑍇𑌷𑌾𑌂 𑌬𑌾𑌣𑍇𑌨𑍈𑌕𑍇𑌨 𑌚 𑌦𑍍𑌰𑍁𑌮𑌮𑍍 ।
𑌵𑌾𑌲𑌿𑌨𑌂 𑌨𑌿𑌹𑌤𑌂 𑌮𑌨𑍍𑌯𑍇 𑌦𑍃𑌷𑍍𑌟𑍍𑌵𑌾 𑌰𑌾𑌮𑌸𑍍𑌯 𑌵𑌿𑌕𑍍𑌰𑌮𑌮𑍍 ॥ 1 ॥
𑌹𑌤𑌸𑍍𑌯 𑌮𑌹𑌿𑌷𑌸𑍍𑌯𑌾𑌸𑍍𑌥𑌿 𑌪𑌾𑌦𑍇𑌨𑍈𑌕𑍇𑌨 𑌲𑌕𑍍𑌷𑍍𑌮𑌣 ।
𑌉𑌦𑍍𑌯𑌮𑍍𑌯𑌾𑌥 𑌪𑍍𑌰𑌕𑍍𑌷𑌿𑌪𑍇𑌚𑍍𑌚𑍇𑌤𑍍𑌤𑌰𑌸𑌾 𑌦𑍍𑌵𑍇 𑌧𑌨𑍁𑌶𑍍𑌶𑌤𑍇 ॥ 2 ॥
𑌏𑌵𑌮𑍁𑌕𑍍𑌤𑍍𑌵𑌾 𑌤𑍁 𑌸𑍁𑌗𑍍𑌰𑍀𑌵𑍋 𑌰𑌾𑌮𑌂 𑌰𑌕𑍍𑌤𑌾𑌂𑌤𑌲𑍋𑌚𑌨𑌮𑍍 ।
𑌧𑍍𑌯𑌾𑌤𑍍𑌵𑌾 𑌮𑍁𑌹𑍂𑌰𑍍𑌤𑌂 𑌕𑌾𑌕𑍁𑌤𑍍𑌸𑍍𑌥𑌂 𑌪𑍁𑌨𑌰𑍇𑌵 𑌵𑌚𑍋𑌽𑌬𑍍𑌰𑌵𑍀𑌤𑍍 ॥ 3 ॥
𑌶𑍂𑌰𑌶𑍍𑌚 𑌶𑍂𑌰𑌘𑌾𑌤𑍀 𑌚 𑌪𑍍𑌰𑌖𑍍𑌯𑌾𑌤𑌬𑌲𑌪𑍌𑌰𑍁𑌷𑌃 ।
𑌬𑌲𑌵𑌾𑌨𑍍𑌵𑌾𑌨𑌰𑍋 𑌵𑌾𑌲𑍀 𑌸𑌂𑌯𑍁𑌗𑍇𑌷𑍍𑌵𑌪𑌰𑌾𑌜𑌿𑌤𑌃 ॥ 4 ॥
𑌦𑍃𑌶𑍍𑌯𑌂𑌤𑍇 𑌚𑌾𑌸𑍍𑌯 𑌕𑌰𑍍𑌮𑌾𑌣𑌿 𑌦𑍁𑌷𑍍𑌕𑌰𑌾𑌣𑌿 𑌸𑍁𑌰𑍈𑌰𑌪𑌿 ।
𑌯𑌾𑌨𑌿 𑌸𑌂𑌚𑌿𑌂𑌤𑍍𑌯 𑌭𑍀𑌤𑍋𑌽𑌹𑌮𑍃𑌶𑍍𑌯𑌮𑍂𑌕𑌂 𑌸𑌮𑌾𑌶𑍍𑌰𑌿𑌤𑌃 ॥ 5 ॥
𑌤𑌮𑌜𑌯𑍍𑌯𑌮𑌧𑍃𑌷𑍍𑌯𑌂 𑌚 𑌵𑌾𑌨𑌰𑍇𑌂𑌦𑍍𑌰𑌮𑌮𑌰𑍍𑌷𑌣𑌮𑍍 ।
𑌵𑌿𑌚𑌿𑌂𑌤𑌯𑌨𑍍𑌨 𑌮𑍁𑌂𑌚𑌾𑌮𑌿 𑌋𑌶𑍍𑌯𑌮𑍂𑌕𑌮𑌹𑌨𑍍𑌵𑌿𑌮𑌮𑍍 ॥ 6 ॥
𑌉𑌦𑍍𑌵𑌿𑌗𑍍𑌨𑌶𑍍𑌶𑌂𑌕𑌿𑌤𑌶𑍍𑌚𑌾𑌪𑌿 𑌵𑌿𑌚𑌰𑌾𑌮𑌿 𑌮𑌹𑌾𑌵𑌨𑍇 ।
𑌅𑌨𑍁𑌰𑌕𑍍𑌤𑍈𑌃 𑌸𑌹𑌾𑌮𑌾𑌤𑍍𑌯𑍈𑌰𑍍𑌹𑌨𑍁𑌮𑌤𑍍𑌪𑍍𑌰𑌮𑍁𑌖𑍈𑌰𑍍𑌵𑌰𑍈𑌃 ॥ ॥
𑌉𑌪𑌲𑌬𑍍𑌧𑌂 𑌚 𑌮𑍇 𑌶𑍍𑌲𑌾𑌘𑍍𑌯𑌂 𑌸𑌨𑍍𑌮𑌿𑌤𑍍𑌰𑌂 𑌮𑌿𑌤𑍍𑌰𑌵𑌤𑍍𑌸𑌲 ।
𑌤𑍍𑌵𑌾𑌮𑌹𑌂 𑌪𑍁𑌰𑍁𑌷𑌵𑍍𑌯𑌾𑌘𑍍𑌰 𑌹𑌿𑌮𑌵𑌂𑌤𑌮𑌿𑌵𑌾𑌶𑍍𑌰𑌿𑌤𑌃 ॥ ॥
𑌕𑌿𑌂 𑌤𑍁 𑌤𑌸𑍍𑌯 𑌬𑌲𑌜𑍍𑌞𑍋𑌽𑌹𑌂 𑌦𑍁𑌰𑍍𑌭𑍍𑌰𑌾𑌤𑍁𑌰𑍍𑌬𑌲𑌶𑌾𑌲𑌿𑌨𑌃 ।
𑌅𑌪𑍍𑌰𑌤𑍍𑌯𑌕𑍍𑌷𑌂 𑌤𑍁 𑌮𑍇 𑌵𑍀𑌰𑍍𑌯𑌂 𑌸𑌮𑌰𑍇 𑌤𑌵 𑌰𑌾𑌘𑌵 ॥ ॥
𑌨 𑌖𑌲𑍍𑌵𑌹𑌂 𑌤𑍍𑌵𑌾𑌂 𑌤𑍁𑌲𑌯𑍇 𑌨𑌾𑌵𑌮𑌨𑍍𑌯𑍇 𑌨 𑌭𑍀𑌷𑌯𑍇 ।
𑌕𑌰𑍍𑌮𑌭𑌿𑌸𑍍𑌤𑌸𑍍𑌯 𑌭𑍀𑌮𑍈𑌸𑍍𑌤𑍁 𑌕𑌾𑌤𑌰𑍍𑌯𑌂 𑌜𑌨𑌿𑌤𑌂 𑌮𑌮 ॥ 0 ॥
𑌕𑌾𑌮𑌂 𑌰𑌾𑌘𑌵 𑌤𑍇 𑌵𑌾𑌣𑍀 𑌪𑍍𑌰𑌮𑌾𑌣𑌂 𑌧𑍈𑌰𑍍𑌯𑌮𑌾𑌕𑍃𑌤𑌿𑌃 ।
𑌸𑍂𑌚𑌯𑌂𑌤𑌿 𑌪𑌰𑌂 𑌤𑍇𑌜𑍋 𑌭𑌸𑍍𑌮𑌚𑍍𑌛𑌨𑍍𑌨𑌮𑌿𑌵𑌾𑌨𑌲𑌮𑍍 ॥ 1 ॥
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌸𑍁𑌗𑍍𑌰𑍀𑌵𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌸𑍍𑌮𑌿𑌤𑌪𑍂𑌰𑍍𑌵𑌮𑌥𑍋 𑌰𑌾𑌮𑌃 𑌪𑍍𑌰𑌤𑍍𑌯𑍁𑌵𑌾𑌚 𑌹𑌰𑌿𑌂 𑌪𑍍𑌰𑌭𑍁𑌃 ॥ 2 ॥
𑌯𑌦𑌿 𑌨 𑌪𑍍𑌰𑌤𑍍𑌯𑌯𑍋𑌽𑌸𑍍𑌮𑌾𑌸𑍁 𑌵𑌿𑌕𑍍𑌰𑌮𑍇 𑌤𑌵 𑌵𑌾𑌨𑌰 ।
𑌪𑍍𑌰𑌤𑍍𑌯𑌯𑌂 𑌸𑌮𑌰𑍇 𑌶𑍍𑌲𑌾𑌘𑍍𑌯𑌮𑌹𑌮𑍁𑌤𑍍𑌪𑌾𑌦𑌯𑌾𑌮𑌿 𑌤𑍇 ॥ 3 ॥
𑌏𑌵𑌮𑍁𑌕𑍍𑌤𑍍𑌵𑌾 𑌤𑍁 𑌸𑍁𑌗𑍍𑌰𑍀𑌵𑌂 𑌸𑌾𑌂𑌤𑍍𑌵𑌂 𑌲𑌕𑍍𑌷𑍍𑌮𑌣𑌪𑍂𑌰𑍍𑌵𑌜𑌃 ।
𑌰𑌾𑌘𑌵𑍋 𑌦𑍁𑌂𑌦𑍁𑌭𑍇𑌃 𑌕𑌾𑌯𑌂 𑌪𑌾𑌦𑌾𑌂𑌗𑍁𑌷𑍍𑌠𑍇𑌨 𑌲𑍀𑌲𑌯𑌾 ॥ 4 ॥
𑌤𑍋𑌲𑌯𑌿𑌤𑍍𑌵𑌾 𑌮𑌹𑌾𑌬𑌾𑌹𑍁𑌶𑍍𑌚𑌿𑌕𑍍𑌷𑍇𑌪 𑌦𑌶𑌯𑍋𑌜𑌨𑌮𑍍 ।
𑌅𑌸𑍁𑌰𑌸𑍍𑌯 𑌤𑌨𑍁𑌂 𑌶𑍁𑌷𑍍𑌕𑌂 𑌪𑌾𑌦𑌾𑌂𑌗𑍁𑌷𑍍𑌠𑍇𑌨 𑌵𑍀𑌰𑍍𑌯𑌵𑌾𑌨𑍍 ॥ 5 ॥
𑌕𑍍𑌷𑌿𑌪𑍍𑌤𑌂 𑌦𑍃𑌷𑍍𑌟𑍍𑌵𑌾 𑌤𑌤𑌃 𑌕𑌾𑌯𑌂 𑌸𑍁𑌗𑍍𑌰𑍀𑌵𑌃 𑌪𑍁𑌨𑌰𑌬𑍍𑌰𑌵𑍀𑌤𑍍 ।
𑌲𑌕𑍍𑌷𑍍𑌮𑌣𑌸𑍍𑌯𑌾𑌗𑍍𑌰𑌤𑍋 𑌰𑌾𑌮𑌮𑌿𑌦𑌂 𑌵𑌚𑌨𑌮𑌰𑍍𑌥𑌵𑌤𑍍 ॥ 6 ॥
𑌆𑌰𑍍𑌦𑍍𑌰𑌸𑍍𑌸𑌮𑌾𑌂𑌸𑌃 𑌪𑍍𑌰𑌤𑍍𑌯𑌗𑍍𑌰𑌃 𑌕𑍍𑌷𑌿𑌪𑍍𑌤𑌃 𑌕𑌾𑌯𑌃 𑌪𑍁𑌰𑌾 𑌸𑌖𑍇 ॥ ॥
𑌲𑌘𑍁𑌸𑍍𑌸𑌂𑌪𑍍𑌰𑌤𑌿 𑌨𑌿𑌰𑍍𑌮𑌾𑌂𑌸 𑌸𑍍𑌤𑍃𑌣𑌭𑍂𑌤𑌶𑍍𑌚 𑌰𑌾𑌘𑌵 ।
𑌪𑌰𑌿𑌶𑍍𑌰𑌾𑌂𑌤𑍇𑌨 𑌮𑌤𑍍𑌤𑍇𑌨 𑌭𑍍𑌰𑌾𑌤𑍍𑌰𑌾 𑌮𑍇 𑌵𑌾𑌲𑌿𑌨𑌾 𑌤𑌦𑌾 ॥ ॥
𑌕𑍍𑌷𑌿𑌪𑍍𑌤𑌮𑍇𑌵𑌂 𑌪𑍍𑌰𑌹𑌰𑍍𑌷𑍇𑌣 𑌭𑌵𑌤𑌾 𑌰𑌘𑍁𑌨𑌂𑌦𑌨 ।
𑌨𑌾𑌤𑍍𑌰 𑌶𑌕𑍍𑌯𑌂 𑌬𑌲𑌂 𑌜𑍍𑌞𑌾𑌤𑍁𑌂 𑌤𑌵 𑌵𑌾 𑌤𑌸𑍍𑌯 𑌵𑌾𑌽𑌧𑌿𑌕𑌮𑍍 ।
𑌆𑌰𑍍𑌦𑍍𑌰𑌂 𑌶𑍁𑌷𑍍𑌕𑌮𑌿𑌤𑌿 𑌹𑍍𑌯𑍇𑌤𑌤𑍍𑌸𑍁𑌮𑌹𑌦𑍍𑌰𑌾𑌘𑌵𑌾𑌂𑌤𑌰𑌮𑍍 ॥ ॥
𑌸 𑌏𑌵 𑌸𑌂𑌶𑌯𑌸𑍍𑌤𑌾𑌤 𑌤𑌵 𑌤𑌸𑍍𑌯 𑌚 𑌯𑌦𑍍𑌬𑌲𑍇 ॥ 0 ॥
𑌸𑌾𑌲𑌮𑍇𑌕𑌂 𑌤𑍁 𑌨𑌿𑌰𑍍𑌭𑌿𑌦𑍍𑌯𑌾 𑌭𑌵𑍇𑌦𑍍𑌵𑍍𑌯𑌕𑍍𑌤𑌿𑌰𑍍𑌬𑌲𑌾𑌬𑌲𑍇 ।
𑌕𑍃𑌤𑍍𑌵𑍇𑌦𑌂 𑌕𑌾𑌰𑍍𑌮𑍁𑌕𑌂 𑌸𑌜𑍍𑌯𑌂 𑌹𑌸𑍍𑌤𑌿𑌹𑌸𑍍𑌤 𑌮𑌿𑌵𑌾𑌤𑌤𑌮𑍍 ॥ 1 ॥
𑌆𑌕𑌰𑍍𑌣𑌪𑍂𑌰𑍍𑌣𑌮𑌾𑌯𑌮𑍍𑌯 𑌵𑌿𑌸𑍃𑌜𑌸𑍍𑌵 𑌮𑌹𑌾𑌶𑌰𑌮𑍍 ।
𑌇𑌮𑌂 𑌹𑌿 𑌸𑌾𑌲𑌂 𑌸𑌹𑌿𑌤 𑌸𑍍𑌤𑍍𑌵𑌯𑌾 𑌶𑌰𑍋 𑌨 𑌸𑌂𑌶𑌯𑍋𑌽𑌤𑍍𑌰𑌾𑌸𑍍𑌤𑌿 𑌵𑌿𑌦𑌾𑌰𑌯𑌿𑌷𑍍𑌯𑌤𑌿 ।
𑌅𑌲𑌂 𑌵𑌿𑌮𑌰𑍍𑌶𑍇𑌨 𑌮𑌮 𑌪𑍍𑌰𑌿𑌯𑌂 𑌧𑍍𑌰𑍁𑌵𑌂 𑌕𑍁𑌰𑍁𑌷𑍍𑌵 𑌰𑌾𑌜𑌾𑌤𑍍𑌮𑌜 𑌶𑌾𑌪𑌿𑌤𑍋 𑌮𑌯𑌾 ॥ 2 ॥
𑌯𑌥𑌾 𑌹𑌿 𑌤𑍇𑌜𑌸𑍍𑌸𑍁 𑌵𑌰𑌸𑍍𑌸𑌦𑌾 𑌰𑌵𑌿 𑌰𑍍𑌯𑌥𑌾 𑌹𑌿 𑌶𑍈𑌲𑍋 𑌹𑌿𑌮𑌵𑌾𑌨𑍍𑌮𑌹𑌾𑌦𑍍𑌰𑌿𑌷𑍁 ।
𑌯𑌥𑌾 𑌚𑌤𑍁𑌷𑍍𑌪𑌾𑌤𑍍𑌸𑍁 𑌚 𑌕𑍇𑌸𑌰𑍀 𑌵𑌰 𑌸𑍍𑌤𑌥𑌾 𑌨𑌰𑌣𑌾𑌮𑌸𑌿 𑌵𑌿𑌕𑍍𑌰𑌮𑍇 𑌵𑌰𑌃 ॥ 3 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌏𑌕𑌾𑌦𑌶𑌸𑍍𑌸𑌰𑍍𑌗𑌃 ॥
