𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌷𑌡𑍍𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌪𑍍𑌰𑌸𑌕𑍍𑌤𑌾𑌶𑍍𑌰𑍁𑌮𑍁𑌖𑍀𑌤𑍍𑌯𑌵𑌂 𑌬𑍍𑌰𑍁𑌵𑌂𑌤𑍀 𑌜𑌨𑌕𑌾𑌤𑍍𑌮𑌜𑌾 ।
𑌆𑌧𑍋𑌗𑌤𑌮𑍁𑌖𑍀 𑌬𑌾𑌲𑌾 𑌵𑌿𑌲𑌪𑍍𑌤𑍁𑌮𑍁𑌪𑌚𑌕𑍍𑌰𑌮𑍇 ॥ 1 ॥
𑌉𑌨𑍍𑌮𑌤𑍍𑌤𑍇𑌵 𑌪𑍍𑌰𑌮𑌤𑍍𑌤𑍇𑌵 𑌭𑍍𑌰𑌾𑌂𑌤𑌚𑌿𑌤𑍍𑌤𑍇𑌵 𑌶𑍋𑌚𑌤𑍀 ।
𑌉𑌪𑌾𑌵𑍃𑌤𑍍𑌤𑌾 𑌕𑌿𑌶𑍋𑌰𑍀𑌵 𑌵𑌿𑌵𑍇𑌷𑍍𑌟𑌂𑌤𑍀 𑌮𑌹𑍀𑌤𑌲𑍇 ॥ 2 ॥
𑌰𑌾𑌘𑌵𑌸𑍍𑌯 𑌪𑍍𑌰𑌮𑌤𑍍𑌤𑌸𑍍𑌯 𑌰𑌕𑍍𑌷𑌸𑌾 𑌕𑌾𑌮𑌰𑍂𑌪𑌿𑌣𑌾 ।
𑌰𑌾𑌵𑌣𑍇𑌨 𑌪𑍍𑌰𑌮𑌥𑍍𑌯𑌾𑌹𑌮𑌾𑌨𑍀𑌤𑌾 𑌕𑍍𑌰𑍋𑌶𑌤𑍀 𑌬𑌲𑌾𑌤𑍍 ॥ 3 ॥
𑌰𑌾𑌕𑍍𑌷𑌸𑍀𑌵𑌶𑌮𑌾𑌪𑌨𑍍𑌨𑌾 𑌭𑌰𑍍𑌤𑍍𑌸𑍍𑌯𑌮𑌾𑌨𑌾 𑌸𑍁𑌦𑌾𑌰𑍁𑌣𑌮𑍍 ।
𑌚𑌿𑌂𑌤𑌯𑌂𑌤𑍀 𑌸𑍁𑌦𑍁𑌃𑌖𑌾𑌰𑍍𑌤𑌾 𑌨𑌾𑌹𑌂 𑌜𑍀𑌵𑌿𑌤𑍁𑌮𑍁𑌤𑍍𑌸𑍁𑌹𑍇 ॥ 4 ॥
𑌨 𑌹𑌿 𑌮𑍇 𑌜𑍀𑌵𑌿𑌤𑍇𑌨𑌾𑌰𑍍𑌥𑍋 𑌨𑍈𑌵𑌾𑌰𑍍𑌥𑍇𑌰𑍍𑌨 𑌚 𑌭𑍂𑌷𑌣𑍈𑌃 ।
𑌵𑌸𑌂𑌤𑍍𑌯𑌾 𑌰𑌾𑌕𑍍𑌷𑌸𑍀𑌮𑌧𑍍𑌯𑍇 𑌵𑌿𑌨𑌾 𑌰𑌾𑌮𑌂 𑌮𑌹𑌾𑌰𑌥𑌮𑍍 ॥ 5 ॥
𑌅𑌶𑍍𑌮𑌸𑌾𑌰𑌮𑌿𑌦𑌂 𑌨𑍂𑌨𑌮𑌥𑌵𑌾𑌪𑍍𑌯𑌜𑌰𑌾𑌮𑌰𑌮𑍍 ।
𑌹𑍃𑌦𑌯𑌂 𑌮𑌮 𑌯𑍇𑌨𑍇𑌦𑌂 𑌨 𑌦𑍁𑌃𑌖𑍇𑌨𑌾𑌵𑌶𑍀𑌰𑍍𑌯𑌤𑍇 ॥ 6 ॥
𑌧𑌿𑌙𑍍𑌮𑌾𑌮𑌨𑌾𑌰𑍍𑌯𑌾𑌮𑌸𑌤𑍀𑌂 𑌯𑌾𑌹𑌂 𑌤𑍇𑌨𑌾 𑌵𑌿𑌨𑌾 𑌕𑍃𑌤𑌾 ।
𑌮𑍁𑌹𑍂𑌰𑍍𑌤𑌮𑌪𑌿 𑌰𑌕𑍍𑌷𑌾𑌮𑌿 𑌜𑍀𑌵𑌿𑌤𑌂 𑌪𑌾𑌪𑌜𑍀𑌵𑌿𑌤𑌾 ॥ ॥
𑌕𑌾 𑌚 𑌮𑍇 𑌜𑍀𑌵𑌿𑌤𑍇 𑌶𑍍𑌰𑌦𑍍𑌧𑌾 𑌸𑍁𑌖𑍇 𑌵𑌾 𑌤𑌂 𑌪𑍍𑌰𑌿𑌯𑌂 𑌵𑌿𑌨𑌾 ।
𑌭𑌰𑍍𑌤𑌾𑌰𑌂 𑌸𑌾𑌗𑌰𑌾𑌂𑌤𑌾𑌯𑌾 𑌵𑌸𑍁𑌧𑌾𑌯𑌾𑌃 𑌪𑍍𑌰𑌿𑌯𑌂𑌵𑌦𑌮𑍍 ॥ ॥
𑌭𑌿𑌦𑍍𑌯𑌤𑌾𑌂 𑌭𑌕𑍍𑌷𑍍𑌯𑌤𑌾𑌂 𑌵𑌾𑌪𑌿 𑌶𑌰𑍀𑌰𑌂 𑌵𑌿𑌸𑍃𑌜𑌾𑌮𑍍𑌯𑌹𑌮𑍍 ।
𑌨 𑌚𑌾𑌪𑍍𑌯𑌹𑌂 𑌚𑌿𑌰𑌂 𑌦𑍁𑌃𑌖𑌂 𑌸𑌹𑍇𑌯𑌂 𑌪𑍍𑌰𑌿𑌯𑌵𑌰𑍍𑌜𑌿𑌤𑌾 ॥ ॥
𑌚𑌰𑌣𑍇𑌨𑌾𑌪𑌿 𑌸𑌵𑍍𑌯𑍇𑌨 𑌨 𑌸𑍍𑌪𑍃𑌶𑍇𑌯𑌂 𑌨𑌿𑌶𑌾𑌚𑌰𑌮𑍍 ।
𑌰𑌾𑌵𑌣𑌂 𑌕𑌿𑌂 𑌪𑍁𑌨𑌰𑌹𑌂 𑌕𑌾𑌮𑌮𑍇𑌯𑌂 𑌵𑌿𑌗𑌰𑍍𑌹𑌿𑌤𑌮𑍍 ॥ 10 ॥
𑌪𑍍𑌰𑌤𑍍𑌯𑌾𑌖𑍍𑌯𑌾𑌤𑌂 𑌨 𑌜𑌾𑌨𑌾𑌤𑌿 𑌨𑌾𑌤𑍍𑌮𑌾𑌨𑌂 𑌨𑌾𑌤𑍍𑌮𑌨𑌃 𑌕𑍁𑌲𑌮𑍍 ।
𑌯𑍋 𑌨𑍃𑌶𑌂𑌸𑌸𑍍𑌵𑌭𑌾𑌵𑍇𑌨 𑌮𑌾𑌂 𑌪𑍍𑌰𑌾𑌰𑍍𑌥𑌯𑌿𑌤𑍁𑌮𑌿𑌚𑍍𑌛𑌤𑌿 ॥ 11 ॥
𑌛𑌿𑌨𑍍𑌨𑌾 𑌭𑌿𑌨𑍍𑌨𑌾 𑌵𑌿𑌭𑌕𑍍𑌤𑌾 𑌵𑌾 𑌦𑍀𑌪𑍍𑌤𑍇𑌵𑌾𑌗𑍍𑌨𑍌 𑌪𑍍𑌰𑌦𑍀𑌪𑌿𑌤𑌾 ।
𑌰𑌾𑌵𑌣𑌂 𑌨𑍋𑌪𑌤𑌿𑌷𑍍𑌠𑍇𑌯𑌂 𑌕𑌿𑌂 𑌪𑍍𑌰𑌲𑌾𑌪𑍇𑌨 𑌵𑌶𑍍𑌚𑌿𑌰𑌮𑍍 ॥ 12 ॥
𑌖𑍍𑌯𑌾𑌤𑌃 𑌪𑍍𑌰𑌾𑌜𑍍𑌞𑌃 𑌕𑍃𑌤𑌜𑍍𑌞𑌶𑍍𑌚 𑌸𑌾𑌨𑍁𑌕𑍍𑌰𑍋𑌶𑌶𑍍𑌚 𑌰𑌾𑌘𑌵𑌃 ।
𑌸𑌦𑍍𑌵𑍃𑌤𑍍𑌤𑍋 𑌨𑌿𑌰𑌨𑍁𑌕𑍍𑌰𑍋𑌶𑌶𑍍𑌶𑌂𑌕𑍇 𑌮𑌦𑍍𑌭𑌾𑌗𑍍𑌯𑌸𑌂𑌕𑍍𑌷𑌯𑌾𑌤𑍍 ॥ 13 ॥
𑌰𑌾𑌕𑍍𑌷𑌸𑌾𑌨𑌾𑌂 𑌸𑌹𑌸𑍍𑌰𑌾𑌣𑌿 𑌜𑌨𑌸𑍍𑌥𑌾𑌨𑍇 𑌚𑌤𑍁𑌰𑍍𑌦𑌶 ।
𑌯𑍇𑌨𑍈𑌕𑍇𑌨 𑌨𑌿𑌰𑌸𑍍𑌤𑌾𑌨𑌿 𑌸 𑌮𑌾𑌂 𑌕𑌿𑌂 𑌨𑌾𑌭𑌿𑌪𑌦𑍍𑌯𑌤𑍇 ॥ 14 ॥
𑌨𑌿𑌰𑍁𑌦𑍍𑌧𑌾 𑌰𑌾𑌵𑌣𑍇𑌨𑌾𑌹𑌮𑌲𑍍𑌪𑌵𑍀𑌰𑍍𑌯𑍇𑌣 𑌰𑌕𑍍𑌷𑌸𑌾 ।
𑌸𑌮𑌰𑍍𑌥𑌃 𑌖𑌲𑍁 𑌮𑍇 𑌭𑌰𑍍𑌤𑌾 𑌰𑌾𑌵𑌣𑌂 𑌹𑌂𑌤𑍁𑌮𑌾𑌹𑌵𑍇 ॥ 15 ॥
𑌵𑌿𑌰𑌾𑌧𑍋 𑌦𑌂𑌡𑌕𑌾𑌰𑌣𑍍𑌯𑍇 𑌯𑍇𑌨 𑌰𑌾𑌕𑍍𑌷𑌸𑌪𑍁𑌂𑌗𑌵𑌃 ।
𑌰𑌣𑍇 𑌰𑌾𑌮𑍇𑌣 𑌨𑌿𑌹𑌤𑌸𑍍𑌸 𑌮𑌾𑌂 𑌕𑌿𑌂 𑌨𑌾𑌭𑌿𑌪𑌦𑍍𑌯𑌤𑍇 ॥ 16 ॥
𑌕𑌾𑌮𑌂 𑌮𑌧𑍍𑌯𑍇 𑌸𑌮𑍁𑌦𑍍𑌰𑌸𑍍𑌯 𑌲𑌂𑌕𑍇𑌯𑌂 𑌦𑍁𑌷𑍍𑌪𑍍𑌰𑌧𑌰𑍍𑌷𑌣𑌾 ।
𑌨 𑌤𑍁 𑌰𑌾𑌘𑌵𑌬𑌾𑌣𑌾𑌨𑌾𑌂 𑌗𑌤𑌿𑌰𑍋𑌧𑍋 𑌭𑌵𑌿𑌷𑍍𑌯𑌤𑌿 ॥ 1 ॥
𑌕𑌿𑌨𑍍𑌨𑍁 𑌤𑌤𑍍𑌕𑌾𑌰𑌣𑌂 𑌯𑍇𑌨 𑌰𑌾𑌮𑍋 𑌦𑍃𑌢𑌪𑌰𑌾𑌕𑍍𑌰𑌮𑌃 ।
𑌰𑌕𑍍𑌷𑌸𑌾𑌪𑌹𑍃𑌤𑌾𑌂 𑌭𑌾𑌰𑍍𑌯𑌾𑌮𑌿𑌷𑍍𑌟𑌾𑌂 𑌨𑌾𑌭𑍍𑌯𑌵𑌪𑌦𑍍𑌯𑌤𑍇 ॥ 1 ॥
𑌇𑌹𑌸𑍍𑌥𑌾𑌂 𑌮𑌾𑌂 𑌨 𑌜𑌾𑌨𑍀𑌤𑍇 𑌶𑌂𑌕𑍇 𑌲𑌕𑍍𑌷𑍍𑌮𑌣𑌪𑍂𑌰𑍍𑌵𑌜𑌃 ।
𑌜𑌾𑌨𑌨𑍍𑌨𑌪𑌿 𑌹𑌿 𑌤𑍇𑌜𑌸𑍍𑌵𑍀 𑌧𑌰𑍍𑌷𑌣𑌂 𑌮𑌰𑍍𑌷𑌯𑌿𑌷𑍍𑌯𑌤𑌿 ॥ 1 ॥
𑌹𑍃𑌤𑍇𑌤𑌿 𑌯𑍋𑌽𑌧𑌿𑌗𑌤𑍍𑌵𑌾 𑌮𑌾𑌂 𑌰𑌾𑌘𑌵𑌾𑌯 𑌨𑌿𑌵𑍇𑌦𑌯𑍇𑌤𑍍 ।
𑌗𑍃𑌧𑍍𑌰𑌰𑌾𑌜𑍋𑌽𑌪𑌿 𑌸 𑌰𑌣𑍇 𑌰𑌾𑌵𑌣𑍇𑌨 𑌨𑌿𑌪𑌾𑌤𑌿𑌤𑌃 ॥ 20 ॥
𑌕𑍃𑌤𑌂 𑌕𑌰𑍍𑌮 𑌮𑌹𑌤𑍍𑌤𑍇𑌨 𑌮𑌾𑌂 𑌤𑌥𑌾𑌽𑌭𑍍𑌯𑌵𑌪𑌦𑍍𑌯𑌤𑌾 ।
𑌤𑌿𑌷𑍍𑌠𑌤𑌾 𑌰𑌾𑌵𑌣𑌦𑍍𑌵𑌂𑌦𑍍𑌵𑍇 𑌵𑍃𑌦𑍍𑌧𑍇𑌨𑌾𑌪𑌿 𑌜𑌟𑌾𑌯𑍁𑌷𑌾 ॥ 21 ॥
𑌯𑌦𑌿 𑌮𑌾𑌮𑌿𑌹 𑌜𑌾𑌨𑍀𑌯𑌾𑌦𑍍𑌵𑌰𑍍𑌤𑌮𑌾𑌨𑌾𑌂 𑌸 𑌰𑌾𑌘𑌵𑌃 ।
𑌅𑌦𑍍𑌯 𑌬𑌾𑌣𑍈𑌰𑌭𑌿𑌕𑍍𑌰𑍁𑌦𑍍𑌧𑌃 𑌕𑍁𑌰𑍍𑌯𑌾𑌲𑍍𑌲𑍋𑌕𑌮𑌰𑌾𑌕𑍍𑌷𑌸𑌮𑍍 ॥ 22 ॥
𑌵𑌿𑌧𑌮𑍇𑌚𑍍𑌚 𑌪𑍁𑌰𑍀𑌂 𑌲𑌂𑌕𑌾𑌂 𑌶𑍋𑌷𑌯𑍇𑌚𑍍𑌚 𑌮𑌹𑍋𑌦𑌧𑌿𑌮𑍍 ।
𑌰𑌾𑌵𑌣𑌸𑍍𑌯 𑌚 𑌨𑍀𑌚𑌸𑍍𑌯 𑌕𑍀𑌰𑍍𑌤𑌿𑌂 𑌨𑌾𑌮 𑌚 𑌨𑌾𑌶𑌯𑍇𑌤𑍍 ॥ 23 ॥
𑌤𑌤𑍋 𑌨𑌿𑌹𑌤𑌨𑌾𑌥𑌾𑌨𑌾𑌂 𑌰𑌾𑌕𑍍𑌷𑌸𑍀𑌨𑌾𑌂 𑌗𑍃𑌹𑍇 𑌗𑍃𑌹𑍇 ।
𑌯𑌥𑌾𑌹𑌮𑍇𑌵𑌂 𑌰𑍁𑌦𑌤𑍀 𑌤𑌥𑌾 𑌭𑍂𑌯𑍋 𑌨 𑌸𑌂𑌶𑌯𑌃 ॥ 24 ॥
𑌅𑌨𑍍𑌵𑌿𑌷𑍍𑌯 𑌰𑌕𑍍𑌷𑌸𑌾𑌂 𑌲𑌂𑌕𑌾𑌂 𑌕𑍁𑌰𑍍𑌯𑌾𑌦𑍍𑌰𑌾𑌮𑌸𑍍𑌸𑌲𑌕𑍍𑌷𑍍𑌮𑌣𑌃 ।
𑌨 𑌹𑌿 𑌤𑌾𑌭𑍍𑌯𑌾𑌂 𑌰𑌿𑌪𑍁𑌰𑍍𑌦𑍃𑌷𑍍𑌟𑍋 𑌮𑍁𑌹𑍂𑌰𑍍𑌤𑌮𑌪𑌿 𑌜𑍀𑌵𑌤𑌿 ॥ 25 ॥
𑌚𑌿𑌤𑌾𑌧𑍂𑌮𑌾𑌕𑍁𑌲𑌪𑌥𑌾 𑌗𑍃𑌧𑍍𑌰𑌮𑌂𑌡𑌲𑌸𑌂𑌕𑍁𑌲𑌾 ।
𑌅𑌚𑌿𑌰𑍇𑌣 𑌤𑍁 𑌲𑌂𑌕𑍇𑌯𑌂 𑌶𑍍𑌮𑌶𑌾𑌨𑌸𑌦𑍃𑌶𑍀 𑌭𑌵𑍇𑌤𑍍 ॥ 26 ॥
𑌅𑌚𑌿𑌰𑍇𑌣𑍈𑌵 𑌕𑌾𑌲𑍇𑌨 𑌪𑍍𑌰𑌾𑌪𑍍𑌸𑍍𑌯𑌾𑌮𑍍𑌯𑍇𑌵 𑌮𑌨𑍋𑌰𑌥𑌮𑍍 ।
𑌦𑍁𑌷𑍍𑌪𑍍𑌰𑌸𑍍𑌥𑌾𑌨𑍋𑌽𑌯𑌾𑌮𑌾𑌖𑍍𑌯𑌾𑌤𑌿 𑌸𑌰𑍍𑌵𑍇𑌷𑌾𑌂 𑌵𑍋 𑌵𑌿𑌪𑌰𑍍𑌯𑌯𑌮𑍍 ॥ 2 ॥
𑌯𑌾𑌦𑍃𑌶𑌾𑌨𑍀𑌹 𑌦𑍃𑌶𑍍𑌯𑌂𑌤𑍇 𑌲𑌂𑌕𑌾𑌯𑌾𑌮𑌶𑍁𑌭𑌾𑌨𑌿 𑌵𑍈 ।
𑌅𑌚𑌿𑌰𑍇𑌣𑍈𑌵 𑌕𑌾𑌲𑍇𑌨 𑌭𑌵𑌿𑌷𑍍𑌯𑌤𑌿 𑌹𑌤𑌪𑍍𑌰𑌭𑌾 ॥ 2 ॥
𑌨𑍂𑌨𑌂 𑌲𑌂𑌕𑌾 𑌹𑌤𑍇 𑌪𑌾𑌪𑍇 𑌰𑌾𑌵𑌣𑍇 𑌰𑌾𑌕𑍍𑌷𑌸𑌾𑌧𑌮𑍇 ।
𑌶𑍋𑌷𑌂 𑌯𑌾𑌸𑍍𑌯𑌤𑌿 𑌦𑍁𑌰𑍍𑌧𑌰𑍍𑌷𑌾 𑌪𑍍𑌰𑌮𑌦𑌾 𑌵𑌿𑌧𑌵𑌾 𑌯𑌥𑌾 ॥ 2 ॥
𑌪𑍁𑌣𑍍𑌯𑍋𑌤𑍍𑌸𑌵𑌸𑌮𑍁𑌤𑍍𑌥𑌾 𑌚 𑌨𑌷𑍍𑌟𑌭𑌰𑍍𑌤𑍍𑌰𑍀 𑌸𑌰𑌾𑌕𑍍𑌷𑌸𑍀 ।
𑌭𑌵𑌿𑌷𑍍𑌯𑌤𑌿 𑌪𑍁𑌰𑍀 𑌲𑌂𑌕𑌾 𑌨𑌷𑍍𑌟𑌭𑌰𑍍𑌤𑍍𑌰𑍀 𑌯𑌥𑌾𑌂𑌗𑌨𑌾 ॥ 30 ॥
𑌨𑍂𑌨𑌂 𑌰𑌾𑌕𑍍𑌷𑌸𑌕𑌨𑍍𑌯𑌾𑌨𑌾𑌂 𑌰𑍁𑌦𑌂𑌤𑍀𑌨𑌾𑌂 𑌗𑍃𑌹𑍇 𑌗𑍃𑌹𑍇 ।
𑌶𑍍𑌰𑍋𑌷𑍍𑌯𑌾𑌮𑌿 𑌨𑌚𑌿𑌰𑌾𑌦𑍇𑌵 𑌦𑍁𑌃𑌖𑌾𑌰𑍍𑌤𑌾𑌨𑌾𑌮𑌿𑌹 𑌧𑍍𑌵𑌨𑌿𑌮𑍍 ॥ 31 ॥
𑌸𑌾𑌂𑌥𑌕𑌾𑌰𑌾 𑌹𑌤𑌦𑍍𑌯𑍋𑌤𑌾 𑌹𑌤𑌰𑌾𑌕𑍍𑌷𑌸𑌪𑍁𑌂𑌗𑌵𑌾 ।
𑌭𑌵𑌿𑌷𑍍𑌯𑌤𑌿 𑌪𑍁𑌰𑍀 𑌲𑌂𑌕𑌾 𑌨𑌿𑌰𑍍𑌦𑌗𑍍𑌧𑌾 𑌰𑌾𑌮𑌸𑌾𑌯𑌕𑍈𑌃 ॥ 32 ॥
𑌯𑌦𑌿 𑌨𑌾𑌮 𑌸 𑌶𑍂𑌰𑍋 𑌮𑌾𑌂 𑌰𑌾𑌮𑍋 𑌰𑌕𑍍𑌤𑌾𑌂𑌤𑌲𑍋𑌚𑌨𑌃 ।
𑌜𑌾𑌨𑍀𑌯𑌾𑌦𑍍𑌵𑌰𑍍𑌤𑌮𑌾𑌨𑌾𑌂 𑌹𑌿 𑌰𑌾𑌵𑌣𑌸𑍍𑌯 𑌨𑌿𑌵𑍇𑌶𑌨𑍇 ॥ 33 ॥
𑌅𑌨𑍇𑌨 𑌤𑍁 𑌨𑍃𑌶𑌂𑌸𑍇𑌨 𑌰𑌾𑌵𑌣𑍇𑌨𑌾𑌧𑌮𑍇𑌨 𑌮𑍇 ।
𑌸𑌮𑌯𑍋 𑌯𑌸𑍍𑌤𑍁 𑌨𑌿𑌰𑍍𑌦𑌿𑌷𑍍𑌟𑌸𑍍𑌤𑌸𑍍𑌯 𑌕𑌾𑌲𑍋𑌽𑌯𑌮𑌾𑌗𑌤𑌃 ॥ 34 ॥
𑌸 𑌚 𑌮𑍇 𑌵𑌿𑌹𑌿𑌤𑍋 𑌮𑍃𑌤𑍍𑌯𑍁𑌰𑌸𑍍𑌮𑌿𑌨𑍍 𑌦𑍁𑌷𑍍𑌟𑍇 𑌨 𑌵𑌰𑍍𑌤𑌤𑍇 ।
𑌅𑌕𑌾𑌰𑍍𑌯𑌂 𑌯𑍇 𑌨 𑌜𑌾𑌨𑌂𑌤𑌿 𑌨𑍈𑌰𑍃𑌤𑌾𑌃 𑌪𑌾𑌪𑌕𑌾𑌰𑌿𑌣𑌃 ॥ 35 ॥
𑌅𑌧𑌰𑍍𑌮𑌾𑌤𑍍𑌤𑍁 𑌮𑌹𑍋𑌤𑍍𑌪𑌾𑌤𑍋 𑌭𑌵𑌿𑌷𑍍𑌯𑌤𑌿 𑌹𑌿 𑌸𑌾𑌂𑌪𑍍𑌰𑌤𑌮𑍍 ।
𑌨𑍈𑌤𑍇 𑌧𑌰𑍍𑌮𑌂 𑌵𑌿𑌜𑌾𑌨𑌂𑌤𑌿 𑌰𑌾𑌕𑍍𑌷𑌸𑌾𑌃 𑌪𑌿𑌶𑌿𑌤𑌾𑌶𑌨𑌾𑌃 ॥ 36 ॥
𑌧𑍍𑌰𑍁𑌵𑌂 𑌮𑌾𑌂 𑌪𑍍𑌰𑌾𑌤𑌰𑌾𑌶𑌾𑌰𑍍𑌥𑍇 𑌰𑌾𑌕𑍍𑌷𑌸𑌃 𑌕𑌲𑍍𑌪𑌯𑌿𑌷𑍍𑌯𑌤𑌿 ।
𑌸𑌾𑌹𑌂 𑌕𑌥𑌂 𑌕𑌰𑌿𑌷𑍍𑌯𑌾𑌮𑌿 𑌤𑌂 𑌵𑌿𑌨𑌾 𑌪𑍍𑌰𑌿𑌯𑌦𑌰𑍍𑌶𑌨𑌮𑍍 ॥ 3 ॥
𑌕𑍍𑌷𑌿𑌪𑍍𑌰𑌂 𑌵𑍈𑌵𑌸𑍍𑌵𑌤𑌂 𑌦𑍇𑌵𑌂 𑌪𑌶𑍍𑌯𑍇𑌯𑌂 𑌪𑌤𑌿𑌨𑌾 𑌵𑌿𑌨𑌾 ।
𑌨𑌾𑌜𑌾𑌨𑌾𑌜𑍍𑌜𑍀𑌵𑌤𑍀𑌂 𑌰𑌾𑌮𑌸𑍍𑌸 𑌮𑌾𑌂 𑌲𑌕𑍍𑌷𑍍𑌮𑌣𑌪𑍂𑌰𑍍𑌵𑌜𑌃 ॥ 3 ॥
𑌜𑌾𑌨𑌂𑌤𑍌 𑌤𑍌 𑌨 𑌕𑍁𑌰𑍍𑌯𑌾𑌤𑌾𑌂 𑌨𑍋𑌰𑍍𑌯𑍍𑌵𑌾𑌂 𑌹𑌿 𑌮𑌮 𑌮𑌾𑌰𑍍𑌗𑌣𑌮𑍍 ।
𑌨𑍂𑌨𑌂 𑌮𑌮𑍈𑌵 𑌶𑍋𑌕𑍇𑌨 𑌸 𑌵𑍀𑌰𑍋 𑌲𑌕𑍍𑌷𑍍𑌮𑌣𑌾𑌗𑍍𑌰𑌜𑌃 ॥ 3 ॥
𑌦𑍇𑌵𑌲𑍋𑌕𑌮𑌿𑌤𑍋 𑌯𑌾𑌤𑌸𑍍𑌤𑍍𑌯𑌕𑍍𑌤𑍍𑌵𑌾 𑌦𑍇𑌹𑌂 𑌮𑌹𑍀𑌤𑌲𑍇 ।
𑌧𑌨𑍍𑌯𑌾 𑌦𑍇𑌵𑌾𑌸𑍍𑌸𑌗𑌂𑌧𑌰𑍍𑌵𑌾𑌃 𑌸𑌿𑌦𑍍𑌧𑌾𑌶𑍍𑌚 𑌪𑌰𑌮𑌰𑍍𑌷𑌯𑌃 ॥ 40 ॥
𑌮𑌮 𑌪𑌶𑍍𑌯𑌂𑌤𑌿 𑌯𑍇 𑌨𑌾𑌥𑌂 𑌰𑌾𑌮𑌂 𑌰𑌾𑌜𑍀𑌵𑌲𑍋𑌚𑌨𑌮𑍍 ।
𑌅𑌥𑌵𑌾 𑌨 𑌹𑌿 𑌤𑌸𑍍𑌯𑌾𑌰𑍍𑌥𑍋 𑌧𑌰𑍍𑌮𑌕𑌾𑌮𑌸𑍍𑌯 𑌧𑍀𑌮𑌤𑌃 ॥ 41 ॥
𑌮𑌯𑌾 𑌰𑌾𑌮𑌸𑍍𑌯 𑌰𑌾𑌜𑌰𑍍𑌷𑍇𑌰𑍍𑌭𑌾𑌰𑍍𑌯𑌯𑌾 𑌪𑌰𑌮𑌾𑌤𑍍𑌮𑌨𑌃 ।
𑌦𑍃𑌶𑍍𑌯𑌮𑌾𑌨𑍇 𑌭𑌵𑍇𑌤𑍍𑌪𑍍𑌰𑍀𑌤𑌿 𑌸𑍍𑌸𑍌𑌹𑍃𑌦𑌂 𑌨𑌾𑌸𑍍𑌤𑍍𑌯𑌪𑌶𑍍𑌯𑌤𑌃 ॥ 42 ॥
𑌨𑌾𑌶𑌯𑌂𑌤𑌿 𑌕𑍃𑌤𑌘𑍍𑌨𑌾𑌸𑍍𑌤𑍁 𑌨 𑌰𑌾𑌮𑍋 𑌨𑌾𑌶𑌯𑌿𑌷𑍍𑌯𑌤𑌿 ।
𑌕𑌿𑌂 𑌨𑍁 𑌮𑍇 𑌨 𑌗𑍁𑌣𑌾𑌃 𑌕𑍇𑌚𑌿𑌤𑍍𑌕𑌿𑌂 𑌵𑌾 𑌭𑌾𑌗𑍍𑌯𑌕𑍍𑌷𑌯𑍋 𑌮𑌮 ॥ 43 ॥
𑌯𑌾𑌹𑌂 𑌸𑍀𑌦𑌾𑌮𑌿 𑌰𑌾𑌮𑍇𑌣 𑌹𑍀𑌨𑌾 𑌮𑍁𑌖𑍍𑌯𑍇𑌨 𑌭𑌾𑌮𑌿𑌨𑍀 ।
𑌶𑍍𑌰𑍇𑌯𑍋 𑌮𑍇 𑌜𑍀𑌵𑌿𑌤𑌾𑌨𑍍𑌮𑌰𑍍𑌤𑍁𑌂 𑌵𑌿𑌹𑍀𑌨𑌾𑌯𑌾 𑌮𑌹𑌾𑌤𑍍𑌮𑌨𑌃 ॥ 44 ॥
𑌰𑌾𑌮𑌾𑌦𑌕𑍍𑌲𑌿𑌷𑍍𑌟𑌚𑌾𑌰𑌿𑌤𑍍𑌰𑌾𑌚𑍍𑌛𑍂𑌰𑌾𑌚𑍍𑌛𑌤𑍍𑌰𑍁𑌨𑌿𑌬𑌰𑍍𑌹𑌣𑌾𑌤𑍍 ।
𑌅𑌥𑌵𑌾 𑌨𑍍𑌯𑌸𑍍𑌤𑌶𑌤𑍍𑌰𑍌 𑌤𑍌 𑌵𑌨𑍇 𑌮𑍂𑌲𑌫𑌲𑌾𑌶𑌿𑌨𑍌 ॥ 45 ॥
𑌭𑍍𑌰𑌾𑌤𑌰𑍌 𑌹𑌿 𑌨𑌰𑌶𑍍𑌰𑍇𑌷𑍍𑌠𑍌 𑌸𑌂𑌵𑍃𑌤𑍍𑌤𑍌 𑌵𑌨𑌗𑍋𑌚𑌰𑍌 ।
𑌅𑌥𑌵𑌾 𑌰𑌾𑌕𑍍𑌷𑌸𑍇𑌂𑌦𑍍𑌰𑍇𑌣 𑌰𑌾𑌵𑌣𑍇𑌨 𑌦𑍁𑌰𑌾𑌤𑍍𑌮𑌨𑌾 ॥ 46 ॥
𑌛𑌦𑍍𑌮𑌨𑌾 𑌘𑌾𑌤𑌿𑌤𑍌 𑌶𑍂𑌰𑍌 𑌭𑍍𑌰𑌾𑌤𑌰𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ।
𑌸𑌾𑌽𑌹𑌮𑍇𑌵𑌂𑌗𑌤𑍇 𑌕𑌾𑌲𑍇 𑌮𑌰𑍍𑌤𑍁𑌮𑌿𑌚𑍍𑌛𑌾𑌮𑌿 𑌸𑌰𑍍𑌵𑌥𑌾 ॥ 4 ॥
𑌨 𑌚 𑌮𑍇 𑌵𑌿𑌹𑌿𑌤𑍋 𑌮𑍃𑌤𑍍𑌯𑍁𑌰𑌸𑍍𑌮𑌿𑌨𑍍 𑌦𑍁𑌃𑌖𑍇𑌽𑌪𑌿 𑌵𑌰𑍍𑌤𑌤𑍇 ।
𑌧𑌨𑍍𑌯𑌾𑌃 𑌖𑌲𑍁 𑌮𑌹𑌾𑌤𑍍𑌮𑌾𑌨𑍋 𑌮𑍁𑌨𑌯𑌸𑍍𑌤𑍍𑌯𑌕𑍍𑌤𑌕𑌿𑌲𑍍𑌬𑌿𑌷𑌾𑌃 ॥ 4 ॥
𑌜𑌿𑌤𑌾𑌤𑍍𑌮𑌨𑍋 𑌮𑌹𑌾𑌭𑌾𑌗𑌾 𑌯𑍇𑌷𑌾𑌂 𑌨 𑌸𑍍𑌤𑌃 𑌪𑍍𑌰𑌿𑌯𑌾𑌪𑍍𑌰𑌿𑌯𑍇 ।
𑌪𑍍𑌰𑌿𑌯𑌾𑌨𑍍𑌨 𑌸𑌂𑌭𑌵𑍇𑌦𑍍𑌦𑍁𑌃𑌖𑌮𑌪𑍍𑌰𑌿𑌯𑌾𑌦𑌧𑌿𑌕𑌂 𑌭𑌯𑌮𑍍 ॥ 4 ॥
𑌤𑌾𑌭𑍍𑌯𑌾𑌂 𑌹𑌿 𑌯𑍇 𑌵𑌿𑌯𑍁𑌜𑍍𑌯𑌂𑌤𑍇 𑌨𑌮𑌸𑍍𑌤𑍇𑌷𑌾𑌂 𑌮𑌹𑌾𑌤𑍍𑌮𑌨𑌾𑌮𑍍 ।
𑌸𑌾𑌹𑌂 𑌤𑍍𑌯𑌕𑍍𑌤𑌾 𑌪𑍍𑌰𑌿𑌯𑌾𑌰𑍍𑌹𑍇𑌣 𑌰𑌾𑌮𑍇𑌣 𑌵𑌿𑌦𑌿𑌤𑌾𑌤𑍍𑌮𑌨𑌾 ॥ 50 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌷𑌡𑍍𑌵𑌿𑌂𑌶𑌸𑍍𑌸𑌰𑍍𑌗𑌃 ॥
