𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌶𑍍𑌰𑍁𑌤𑍍𑌵𑌾 𑌤𑍁 𑌵𑌚𑌨𑌂 𑌤𑌸𑍍𑌯 𑌵𑌾𑌯𑍁𑌸𑍂𑌨𑍋𑌰𑍍𑌮𑌹𑌾𑌤𑍍𑌮𑌨𑌃 ।
𑌉𑌵𑌾𑌚𑌾𑌤𑍍𑌮𑌹𑌿𑌤𑌂 𑌵𑌾𑌕𑍍𑌯𑌂 𑌸𑍀𑌤𑌾 𑌸𑍁𑌰𑌸𑍁𑌤𑍋𑌪𑌮𑌾 ॥ 1 ॥
𑌤𑍍𑌵𑌾𑌂 𑌦𑍃𑌷𑍍𑌟𑍍𑌵𑌾 𑌪𑍍𑌰𑌿𑌯𑌵𑌕𑍍𑌤𑌾𑌰𑌂 𑌸𑌂𑌪𑍍𑌰𑌹𑍃𑌷𑍍𑌯𑌾𑌮𑌿 𑌵𑌾𑌨𑌰𑌃 ।
𑌅𑌰𑍍𑌧𑌸𑌂𑌜𑌾𑌤𑌸𑌸𑍍𑌯𑍇𑌵 𑌵𑍃𑌷𑍍𑌟𑌿𑌂 𑌪𑍍𑌰𑌾𑌪𑍍𑌯 𑌵𑌸𑍁𑌂𑌧𑌰𑌾 ॥ 2 ॥
𑌯𑌥𑌾 𑌤𑌂 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑌂 𑌗𑌾𑌤𑍍𑌰𑍈𑌶𑍍𑌶𑍋𑌕𑌾𑌭𑌿𑌕𑌰𑍍𑌶𑌿𑌤𑍈𑌃 ।
𑌸𑌂𑌸𑍍𑌪𑍃𑌶𑍇𑌯𑌂 𑌸𑌕𑌾𑌮𑌾𑌹𑌂 𑌤𑌥𑌾 𑌕𑍁𑌰𑍁 𑌦𑌯𑌾𑌂 𑌮𑌯𑌿 ॥ 3 ॥
𑌅𑌭𑌿𑌜𑍍𑌞𑌾𑌨𑌂 𑌚 𑌰𑌾𑌮𑌸𑍍𑌯 𑌦𑌦𑍍𑌯𑌾 𑌹𑌰𑌿𑌗𑌣𑍋𑌤𑍍𑌤𑌮 ।
𑌕𑍍𑌷𑌿𑌪𑍍𑌤𑌾𑌮𑌿𑌷𑍀𑌕𑌾𑌂 𑌕𑌾𑌕𑌸𑍍𑌯 𑌕𑍋𑌪𑌾𑌦𑍇𑌕𑌾𑌕𑍍𑌷𑌿𑌶𑌾𑌤𑌨𑍀𑌮𑍍 ॥ 4 ॥
𑌮𑌨𑌶𑍍𑌶𑌿𑌲𑌾𑌯𑌾𑌸𑍍𑌤𑌿𑌲𑌕𑍋 𑌗𑌂𑌡𑌪𑌾𑌰𑍍𑌶𑍍𑌵𑍇 𑌨𑌿𑌵𑍇𑌶𑌿𑌤𑌃 ।
𑌤𑍍𑌵𑌯𑌾 𑌪𑍍𑌰𑌣𑌷𑍍𑌟𑍇 𑌤𑌿𑌲𑌕𑍇 𑌤𑌂 𑌕𑌿𑌲 𑌸𑍍𑌮𑌰𑍍𑌤𑍁𑌮𑌰𑍍𑌹𑌸𑌿 ॥ 5 ॥
𑌸 𑌵𑍀𑌰𑍍𑌯𑌵𑌾𑌨𑍍𑌕𑌥𑌂 𑌸𑍀𑌤𑌾𑌂 𑌹𑍃𑌤𑌾𑌂 𑌸𑌮𑌨𑍁𑌮𑌨𑍍𑌯𑌸𑍇 ।
𑌵𑌸𑌂𑌤𑍀𑌂 𑌰𑌕𑍍𑌷𑌸𑌾𑌂 𑌮𑌧𑍍𑌯𑍇 𑌮𑌹𑍇𑌂𑌦𑍍𑌰𑌵𑌰𑍁𑌣𑍋𑌪𑌮𑌃 ॥ 6 ॥
𑌏𑌷 𑌚𑍂𑌡𑌾𑌮𑌣𑌿𑌰𑍍𑌦𑌿𑌵𑍍𑌯𑍋 𑌮𑌯𑌾 𑌸𑍁𑌪𑌰𑌿𑌰𑌕𑍍𑌷𑌿𑌤𑌃 ।
𑌏𑌤𑌂 𑌦𑍃𑌷𑍍𑌟𑍍𑌵𑌾 𑌪𑍍𑌰𑌹𑍃𑌷𑍍𑌯𑌾𑌮𑌿 𑌵𑍍𑌯𑌸𑌨𑍇 𑌤𑍍𑌵𑌾𑌮𑌿𑌵𑌾𑌨𑌘 ॥ ॥
𑌏𑌷 𑌨𑌿𑌰𑍍𑌯𑌾𑌤𑌿𑌤𑌶𑍍𑌶𑍍𑌰𑍀𑌮𑌾𑌨𑍍𑌮𑌯𑌾 𑌤𑍇 𑌵𑌾𑌰𑌿𑌸𑌂𑌭𑌵𑌃 ।
𑌅𑌤𑌃 𑌪𑌰𑌂 𑌨 𑌶𑌕𑍍𑌷𑍍𑌯𑌾𑌮𑌿 𑌜𑍀𑌵𑌿𑌤𑍁𑌂 𑌶𑍋𑌕𑌲𑌾𑌲𑌸𑌾 ॥ ॥
𑌅𑌸𑌹𑍍𑌯𑌾𑌨𑌿 𑌚 𑌦𑍁𑌃𑌖𑌾𑌨𑌿 𑌵𑌾𑌚𑌶𑍍𑌚 𑌹𑍃𑌦𑌯𑌚𑍍𑌛𑌿𑌦𑌃 ।
𑌰𑌾𑌕𑍍𑌷𑌸𑍀𑌨𑌾𑌂 𑌸𑍁𑌘𑍋𑌰𑌾𑌣𑌾𑌂 𑌤𑍍𑌵𑌤𑍍𑌕𑍃𑌤𑍇 𑌮𑌰𑍍𑌷𑌯𑌾𑌮𑍍𑌯𑌹𑌮𑍍 ॥ ॥
𑌧𑌾𑌰𑌯𑌿𑌷𑍍𑌯𑌾𑌮𑌿 𑌮𑌾𑌸𑌂 𑌤𑍁 𑌜𑍀𑌵𑌿𑌤𑌂 𑌶𑌤𑍍𑌰𑍁𑌸𑍂𑌦𑌨 ।
𑌊𑌰𑍍𑌧𑍍𑌵𑌂 𑌮𑌾𑌸𑌾𑌨𑍍𑌨 𑌜𑍀𑌵𑌿𑌷𑍍𑌯𑍇 𑌤𑍍𑌵𑌯𑌾 𑌹𑍀𑌨𑌾 𑌨𑍃𑌪𑌾𑌤𑍍𑌮𑌜 ॥ 10 ॥
𑌘𑍋𑌰𑍋 𑌰𑌾𑌕𑍍𑌷𑌸𑌰𑌾𑌜𑍋𑌽𑌯𑌂 𑌦𑍃𑌷𑍍𑌟𑌿𑌶𑍍𑌚 𑌨 𑌸𑍁𑌖𑌾 𑌮𑌯𑌿 ।
𑌤𑍍𑌵𑌾𑌂 𑌚 𑌶𑍍𑌰𑍁𑌤𑍍𑌵𑌾 𑌵𑌿𑌪𑌦𑍍𑌯𑌂𑌤𑌂 𑌨 𑌜𑍀𑌵𑍇𑌯𑌮𑌹𑌂 𑌕𑍍𑌷𑌣𑌮𑍍 ॥ 11 ॥
𑌵𑍈𑌦𑍇𑌹𑍍𑌯𑌾 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌕𑌰𑍁𑌣𑌂 𑌸𑌾𑌶𑍍𑌰𑍁 𑌭𑌾𑌷𑌿𑌤𑌮𑍍 ।
𑌅𑌥𑌾𑌬𑍍𑌰𑌵𑍀𑌨𑍍𑌮𑌹𑌾𑌤𑍇𑌜𑌾 𑌹𑌨𑍁𑌮𑌾𑌨𑍍𑌮𑌾𑌰𑍁𑌤𑌾𑌤𑍍𑌮𑌜𑌃 ॥ 12 ॥
𑌤𑍍𑌵𑌚𑍍𑌛𑍋𑌕𑌵𑌿𑌮𑍁𑌖𑍋 𑌰𑌾𑌮𑍋 𑌦𑍇𑌵𑌿 𑌸𑌤𑍍𑌯𑍇𑌨 𑌤𑍇 𑌶𑌪𑍇 ।
𑌰𑌾𑌮𑍇 𑌦𑍁𑌃𑌖𑌾𑌭𑌿𑌭𑍂𑌤𑍇 𑌤𑍁 𑌲𑌕𑍍𑌷𑍍𑌮𑌣𑌃 𑌪𑌰𑌿𑌤𑌪𑍍𑌯𑌤𑍇 ॥ 13 ॥
𑌕𑌥𑌂𑌚𑌿𑌦𑍍𑌭𑌵𑌤𑍀 𑌦𑍃𑌷𑍍𑌟𑌾 𑌨 𑌕𑌾𑌲𑌃 𑌪𑌰𑌿𑌶𑍋𑌚𑌿𑌤𑍁𑌮𑍍 ।
𑌇𑌮𑌂 𑌮𑍁𑌹𑍂𑌰𑍍𑌤𑌂 𑌦𑍁𑌃𑌖𑌾𑌨𑌾𑌮𑌂𑌤𑌂 𑌦𑍍𑌰𑌕𑍍𑌷𑍍𑌯𑌸𑌿 𑌭𑌾𑌮𑌿𑌨𑌿 ॥ 14 ॥
𑌤𑌾𑌵𑍁𑌭𑍌 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑍌 𑌰𑌾𑌜𑌪𑍁𑌤𑍍𑌰𑌾𑌵𑌰𑌿𑌂𑌦𑌮𑍌 ।
𑌤𑍍𑌵𑌦𑍍𑌦𑌰𑍍𑌶𑌨𑌕𑍃𑌤𑍋𑌤𑍍𑌸𑌾𑌹𑍌 𑌲𑌂𑌕𑌾𑌂 𑌭𑌸𑍍𑌮𑍀𑌕𑌰𑌿𑌷𑍍𑌯𑌤𑌃 ॥ 15 ॥
𑌹𑌤𑍍𑌤𑍍𑌵𑌾 𑌚 𑌸𑌮𑌰𑍇 𑌕𑍍𑌰𑍂𑌰𑌂 𑌰𑌾𑌵𑌣𑌂 𑌸𑌹𑌬𑌾𑌂𑌧𑌵𑌮𑍍 ।
𑌰𑌾𑌘𑌵𑍌 𑌤𑍍𑌵𑌾𑌂 𑌵𑌿𑌶𑌾𑌲𑌾𑌕𑍍𑌷𑌿 𑌸𑍍𑌵𑌾𑌂 𑌪𑍁𑌰𑍀𑌂 𑌪𑍍𑌰𑌾𑌪𑌯𑌿𑌷𑍍𑌯𑌤𑌃 ॥ 16 ॥
𑌯𑌤𑍍𑌤𑍁 𑌰𑌾𑌮𑍋 𑌵𑌿𑌜𑌾𑌨𑍀𑌯𑌾𑌦𑌭𑌿𑌜𑍍𑌞𑌾𑌨𑌮𑌨𑌿𑌂𑌦𑌿𑌤𑍇 ।
𑌪𑍍𑌰𑍀𑌤𑌿𑌸𑌂𑌜𑌨𑌨𑌂 𑌤𑌸𑍍𑌯 𑌭𑍂𑌯𑌸𑍍𑌤𑍍𑌵𑌂 𑌦𑌾𑌤𑍁𑌮𑌰𑍍𑌹𑌸𑌿 ॥ 1 ॥
𑌸𑌾𑌬𑍍𑌰𑌵𑍀𑌦𑍍𑌦𑌤𑍍𑌤𑌮𑍇𑌵𑍇𑌤𑌿 𑌮𑌯𑌾𑌭𑌿𑌜𑍍𑌞𑌾𑌨𑌮𑍁𑌤𑍍𑌤𑌮𑌮𑍍 ।
𑌏𑌤𑌦𑍇𑌵 𑌹𑌿 𑌰𑌾𑌮𑌸𑍍𑌯 𑌦𑍃𑌷𑍍𑌟𑍍𑌵𑌾 𑌮𑌤𑍍𑌕𑍇𑌶𑌭𑍂𑌷𑌣𑌮𑍍 ॥ 1 ॥
𑌶𑍍𑌰𑌦𑍍𑌧𑍇𑌯𑌂 𑌹𑌨𑍁𑌮𑌨𑍍𑌵𑌾𑌕𑍍𑌯𑌂 𑌤𑌵 𑌵𑍀𑌰 𑌭𑌵𑌿𑌷𑍍𑌯𑌤𑌿 ।
𑌸 𑌤𑌂 𑌮𑌣𑌿𑌵𑌰𑌂 𑌗𑍃𑌹𑍍𑌯 𑌶𑍍𑌰𑍀𑌮𑌾𑌨𑍍𑌪𑍍𑌲𑌵𑌗𑌸𑌤𑍍𑌤𑌮𑌃 ॥ 1 ॥
𑌪𑍍𑌰𑌣𑌮𑍍𑌯 𑌶𑌿𑌰𑌸𑌾 𑌦𑍇𑌵𑍀𑌂 𑌗𑌮𑌨𑌾𑌯𑍋𑌪𑌚𑌕𑍍𑌰𑌮𑍇 ।
𑌤𑌮𑍁𑌤𑍍𑌪𑌾𑌤𑌕𑍃𑌤𑍋𑌤𑍍𑌸𑌾𑌹𑌮𑌵𑍇𑌕𑍍𑌷𑍍𑌯 𑌹𑌰𑌿𑌪𑍁𑌂𑌗𑌵𑌮𑍍 ॥ 20 ॥
𑌵𑌰𑍍𑌧𑌮𑌾𑌨𑌂 𑌮𑌹𑌾𑌵𑍇𑌗𑌮𑍁𑌵𑌾𑌚 𑌜𑌨𑌕𑌾𑌤𑍍𑌮𑌜𑌾 ।
𑌅𑌶𑍍𑌰𑍁𑌪𑍂𑌰𑍍𑌣𑌮𑍁𑌖𑍀 𑌦𑍀𑌨𑌾 𑌬𑌾𑌷𑍍𑌪𑌗𑌦𑍍𑌗𑌦𑌯𑌾 𑌗𑌿𑌰𑌾 ॥ 21 ॥
𑌹𑌨𑍁𑌮𑌨𑍍𑌸𑌿𑌂𑌹𑌸𑌂𑌕𑌾𑌶𑍌 𑌭𑍍𑌰𑌾𑌤𑌰𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ।
𑌸𑍁𑌗𑍍𑌰𑍀𑌵𑌂 𑌚 𑌸𑌹𑌾𑌮𑌾𑌤𑍍𑌯𑌂 𑌸𑌰𑍍𑌵𑌾𑌨𑍍 𑌬𑍍𑌰𑍂𑌯𑌾𑌹𑍍𑌯𑌨𑌾𑌮𑌯𑌮𑍍 ॥ 22 ॥
𑌯𑌥𑌾 𑌚 𑌸 𑌮𑌹𑌾𑌬𑌾𑌹𑍁𑌰𑍍𑌮𑌾𑌂 𑌤𑌾𑌰𑌯𑌤𑌿 𑌰𑌾𑌘𑌵𑌃 ।
𑌅𑌸𑍍𑌮𑌾𑌦𑍍𑌦𑍁𑌃𑌖𑌾𑌂𑌬𑍁𑌸𑌮𑍍𑌰𑍋𑌧𑌾𑌤𑍍𑌤𑍍𑌵𑌂 𑌸𑌮𑌾𑌧𑌾𑌤𑍁𑌮𑌰𑍍𑌹𑌸𑌿 ॥ 23 ॥
𑌇𑌮𑌂 𑌚 𑌤𑍀𑌵𑍍𑌰𑌂 𑌮𑌮 𑌶𑍋𑌕𑌵𑍇𑌗𑌂 𑌰𑌕𑍍𑌷𑍋𑌭𑌿𑌰𑍇𑌭𑌿𑌃 𑌪𑌰𑌿𑌭𑌰𑍍𑌤𑍍𑌸𑌨𑌂 𑌚 ।
𑌬𑍍𑌰𑍂𑌯𑌾𑌸𑍍𑌤𑍁 𑌰𑌾𑌮𑌸𑍍𑌯 𑌗𑌤𑌸𑍍𑌸𑌮𑍀𑌪𑌂 𑌶𑌿𑌵𑌶𑍍𑌚 𑌤𑍇𑌽𑌧𑍍𑌵𑌾𑌽𑌸𑍍𑌤𑍁 𑌹𑌰𑌿𑌪𑍍𑌰𑌵𑍀𑌰 ॥ 24 ॥
𑌸 𑌰𑌾𑌜𑌪𑍁𑌤𑍍𑌰𑍍𑌯𑍍𑌰𑌾𑌪𑍍𑌰𑌤𑌿𑌵𑍇𑌦𑌿𑌤𑌾𑌰𑍍𑌥𑌃 𑌕𑌪𑌿𑌃 𑌕𑍃𑌤𑌾𑌰𑍍𑌥𑌃 𑌪𑌰𑌿𑌹𑍃𑌷𑍍𑌟𑌚𑍇𑌤𑌾𑌃 ।
𑌅𑌲𑍍𑌪𑌾𑌵𑌶𑍇𑌷𑌂 𑌪𑍍𑌰𑌸𑌮𑍀𑌕𑍍𑌷𑍍𑌯 𑌕𑌾𑌰𑍍𑌯𑌂 𑌦𑌿𑌶𑌂 𑌹𑍍𑌯𑍁𑌦𑍀𑌚𑍀𑌂 𑌮𑌨𑌸𑌾 𑌜𑌗𑌾𑌮 ॥ 25 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
