𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌿𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।
𑌸 𑌰𑌾𑌜𑌪𑍁𑌤𑍍𑌰𑌃 𑌪𑍍𑌰𑌿𑌯𑌯𑌾 𑌵𑌿𑌹𑍀𑌨𑌃 𑌶𑍋𑌕𑍇𑌨 𑌮𑍋𑌹𑍇𑌨 𑌚 𑌪𑍀𑌡𑍍𑌯𑌮𑌾𑌨𑌃 ।
𑌵𑌿𑌷𑌾𑌦𑌯𑌨𑍍𑌭𑍍𑌰𑌾𑌤𑌰𑌮𑌾𑌰𑍍𑌤𑌰𑍂𑌪𑍋 𑌭𑍂𑌯𑍋 𑌵𑌿𑌷𑌾𑌦𑌂 𑌪𑍍𑌰𑌵𑌿𑌵𑍇𑌶 𑌤𑍀𑌵𑍍𑌰𑌮𑍍 ॥ 1 ॥
𑌸 𑌲𑌕𑍍𑌷𑍍𑌮𑌣𑌂 𑌶𑍋𑌕𑌵𑌶𑌾𑌭𑌿𑌪𑌨𑍍𑌨𑌂 𑌶𑍋𑌕𑍇 𑌨𑌿𑌮𑌗𑍍𑌨𑍋 𑌵𑌿𑌪𑍁𑌲𑍇 𑌤𑍁 𑌰𑌾𑌮𑌃 ।
𑌉𑌵𑌾𑌚 𑌵𑌾𑌕𑍍𑌯𑌂 𑌵𑍍𑌯𑌸𑌨𑌾𑌨𑍁𑌰𑍂𑌪𑌮𑍁𑌷𑍍𑌣𑌂 𑌵𑌿𑌨𑌿𑌶𑍍𑌶𑍍𑌵𑌸𑍍𑌯 𑌰𑍁𑌦𑌂𑌤𑍍𑌸𑌶𑍋𑌕𑌮𑍍 ॥ 2 ॥
𑌨 𑌮𑌦𑍍𑌵𑌿𑌧𑍋 𑌦𑍁𑌷𑍍𑌕𑍃𑌤𑌕𑌰𑍍𑌮𑌕𑌾𑌰𑍀 𑌮𑌨𑍍𑌯𑍇 𑌦𑍍𑌵𑌿𑌤𑍀𑌯𑍋𑌽𑌸𑍍𑌤𑌿 𑌵𑌸𑍁𑌂𑌧𑌰𑌾𑌯𑌾𑌮𑍍 ।
𑌶𑍋𑌕𑍇𑌨 𑌶𑍋𑌕𑍋 𑌹𑌿 𑌪𑌰𑌂𑌪𑌰𑌾𑌯𑌾 𑌮𑌾 𑌮𑍇𑌤𑌿 𑌭𑌿𑌂𑌦𑌨𑍍𑌹𑍃𑌦𑌯𑌂 𑌮𑌨𑌶𑍍𑌚 ॥ 3 ॥
𑌪𑍂𑌰𑍍𑌵𑌂 𑌮𑌯𑌾 𑌨𑍂𑌨𑌮𑌭𑍀𑌪𑍍𑌸𑌿𑌤𑌾𑌨𑌿 𑌪𑌾𑌪𑌾𑌨𑌿 𑌕𑌰𑍍𑌮𑌾𑌣𑍍𑌯𑌸𑌕𑍃𑌤𑍍𑌕𑍃𑌤𑌾𑌨𑌿 ।
𑌤𑌤𑍍𑌰𑌾𑌯𑌮𑌦𑍍𑌯𑌾𑌪𑌤𑌿𑌤𑍋 𑌵𑌿𑌪𑌾𑌕𑍋 𑌦𑍁𑌃𑌖𑍇𑌨 𑌦𑍁𑌃𑌖𑌂 𑌯𑌦𑌹𑌂 𑌵𑌿𑌶𑌾𑌮𑌿 ॥ 4 ॥
𑌰𑌾𑌜𑍍𑌯𑌪𑍍𑌰𑌣𑌾𑌶𑌸𑍍𑌸𑍍𑌵𑌜𑌨𑍈𑌰𑍍𑌵𑌿𑌯𑍋𑌗𑌃 𑌪𑌿𑌤𑍁𑌰𑍍𑌵𑌿𑌨𑌾𑌶𑍋 𑌜𑌨𑌨𑍀𑌵𑌿𑌯𑍋𑌗𑌃 ।
𑌸𑌰𑍍𑌵𑌾𑌣𑌿 𑌮𑍇 𑌲𑌕𑍍𑌷𑍍𑌮𑌣 𑌶𑍋𑌕𑌵𑍇𑌗𑌮𑌾𑌪𑍂𑌰𑌯𑌂𑌤𑌿 𑌪𑍍𑌰𑌵𑌿𑌚𑌿𑌂𑌤𑌿𑌤𑌾𑌨𑌿 ॥ 5 ॥
𑌸𑌰𑍍𑌵𑌂 𑌤𑍁 𑌦𑍁𑌃𑌖𑌂 𑌮𑌮 𑌲𑌕𑍍𑌷𑍍𑌮𑌣𑍇𑌦𑌂 𑌶𑌾𑌂𑌤𑌂 𑌶𑌰𑍀𑌰𑍇 𑌵𑌨𑌮𑍇𑌤𑍍𑌯 𑌶𑍂𑌨𑍍𑌯𑌮𑍍 ।
𑌸𑍀𑌤𑌾𑌵𑌿𑌯𑍋𑌗𑌾𑌤𑍍𑌪𑍁𑌨𑌰𑌪𑍍𑌯𑍁𑌦𑍀𑌰𑍍𑌣𑌂 𑌕𑌾𑌷𑍍𑌠𑍈𑌰𑌿𑌵𑌾𑌗𑍍𑌨𑌿𑌸𑍍𑌸𑌹𑌸𑌾 𑌪𑍍𑌰𑌦𑍀𑌪𑍍𑌤𑌃 ॥ 6 ॥
𑌸𑌾 𑌨𑍂𑌨𑌮𑌾𑌰𑍍𑌯𑌾 𑌮𑌮 𑌰𑌾𑌕𑍍𑌷𑌸𑍇𑌨 𑌬𑌲𑌾𑌦𑍍𑌦𑍃𑌤𑌾 𑌖𑌂 𑌸𑌮𑍁𑌪𑍇𑌤𑍍𑌯 𑌭𑍀𑌰𑍁𑌃 ।
𑌅𑌪𑌸𑍍𑌵𑌰𑌂 𑌸𑌸𑍍𑌵𑌰𑌵𑌿𑌪𑍍𑌰𑌲𑌾𑌪𑌾 𑌭𑌯𑍇𑌨 𑌵𑌿𑌕𑍍𑌰𑌂𑌦𑌿𑌤𑌵𑌤𑍍𑌯𑌭𑍀𑌕𑍍𑌷𑍍𑌣𑌮𑍍 ॥ ॥
𑌤𑍌 𑌲𑍋𑌹𑌿𑌤𑌸𑍍𑌯 𑌪𑍍𑌰𑌿𑌯𑌦𑌰𑍍𑌶𑌨𑌸𑍍𑌯 𑌸𑌦𑍋𑌚𑌿𑌤𑌾𑌵𑍁𑌤𑍍𑌤𑌮𑌚𑌂𑌦𑌨𑌸𑍍𑌯 ।
𑌵𑍃𑌤𑍍𑌤𑍌 𑌸𑍍𑌤𑌨𑍌 𑌶𑍋𑌣𑌿𑌤𑌪𑌂𑌕𑌦𑌿𑌗𑍍𑌧𑍌 𑌨𑍂𑌨𑌂 𑌪𑍍𑌰𑌿𑌯𑌾𑌯𑌾 𑌮𑌮 𑌨𑌾𑌭𑌿𑌭𑌾𑌤𑌃 ॥ ॥
𑌤𑌚𑍍𑌛𑌲𑌕𑍍𑌷𑍍𑌣𑌸𑍁𑌵𑍍𑌯𑌕𑍍𑌤𑌮𑍃𑌦𑍁𑌪𑍍𑌰𑌲𑌾𑌪𑌂 𑌤𑌸𑍍𑌯𑌾 𑌮𑍁𑌖𑌂 𑌕𑍁𑌂𑌚𑌿𑌤𑌕𑍇𑌶𑌭𑌾𑌰𑌮𑍍 ।
𑌰𑌕𑍍𑌷𑍋𑌵𑌶𑌂 𑌨𑍂𑌨𑌮𑍁𑌪𑌾𑌗𑌤𑌾𑌯𑌾 𑌨 𑌭𑍍𑌰𑌾𑌜𑌤𑍇 𑌰𑌾𑌹𑍁𑌮𑍁𑌖𑍇 𑌯𑌥𑍇𑌂𑌦𑍁𑌃 ॥ ॥
𑌤𑌾𑌂 𑌹𑌾𑌰𑌪𑌾𑌶𑌸𑍍𑌯 𑌸𑌦𑍋𑌚𑌿𑌤𑌾𑌯𑌾 𑌗𑍍𑌰𑍀𑌵𑌾𑌂 𑌪𑍍𑌰𑌿𑌯𑌾𑌯𑌾 𑌮𑌮 𑌸𑍁𑌵𑍍𑌰𑌤𑌾𑌯𑌾𑌃 ।
𑌰𑌕𑍍𑌷𑌾𑌂𑌸𑌿 𑌨𑍂𑌨𑌂 𑌪𑌰𑌿𑌪𑍀𑌤𑌵𑌂𑌤𑌿 𑌵𑌿𑌭𑌿𑌦𑍍𑌯 𑌶𑍂𑌨𑍍𑌯𑍇 𑌰𑍁𑌧𑌿𑌰𑌾𑌶𑌨𑌾𑌨𑌿 ॥ 10 ॥
𑌮𑌯𑌾 𑌵𑌿𑌹𑍀𑌨𑌾 𑌵𑌿𑌜𑌨𑍇 𑌵𑌨𑍇 𑌯𑌾 𑌰𑌕𑍍𑌷𑍋𑌭𑌿𑌰𑌾𑌹𑍃𑌤𑍍𑌯 𑌵𑌿𑌕𑍃𑌷𑍍𑌯𑌮𑌾𑌣𑌾 ।
𑌨𑍂𑌨𑌂 𑌨𑌿𑌨𑌾𑌦𑌂 𑌕𑍁𑌰𑌰𑍀𑌵 𑌦𑍀𑌨𑌾 𑌸𑌾 𑌮𑍁𑌕𑍍𑌤𑌵𑌤𑍍𑌯𑌾𑌯𑌤𑌕𑌾𑌂𑌤𑌨𑍇𑌤𑍍𑌰𑌾 ॥ 11 ॥
𑌅𑌸𑍍𑌮𑌿𑌨𑍍𑌮𑌯𑌾𑌸𑌾𑌰𑍍𑌧𑌮𑍁𑌦𑌾𑌰𑌶𑍀𑌲𑌾 𑌶𑌿𑌲𑌾𑌤𑌲𑍇 𑌪𑍂𑌰𑍍𑌵𑌮𑍁𑌪𑍋𑌪𑌵𑌿𑌷𑍍𑌟𑌾 ।
𑌕𑌾𑌂𑌤𑌸𑍍𑌮𑌿𑌤𑌾 𑌲𑌕𑍍𑌷𑍍𑌮𑌣 𑌜𑌾𑌤𑌹𑌾𑌸𑌾 𑌤𑍍𑌵𑌾𑌮𑌾𑌹 𑌸𑍀𑌤𑌾 𑌬𑌹𑍁𑌵𑌾𑌕𑍍𑌯𑌜𑌾𑌤𑌮𑍍 ॥ 12 ॥
𑌗𑍋𑌦𑌾𑌵𑌰𑍀𑌯𑌂 𑌸𑌰𑌿𑌤𑌾𑌂 𑌵𑌰𑌿𑌷𑍍𑌠𑌾 𑌪𑍍𑌰𑌿𑌯𑌾 𑌪𑍍𑌰𑌿𑌯𑌾𑌯𑌾 𑌮𑌮 𑌨𑌿𑌤𑍍𑌯𑌕𑌾𑌲𑌮𑍍 ।
𑌅𑌪𑍍𑌯𑌤𑍍𑌰 𑌗𑌚𑍍𑌛𑍇𑌦𑌿𑌤𑌿 𑌚𑌿𑌂𑌤𑌯𑌾𑌮𑌿 𑌨𑍈𑌕𑌾𑌕𑌿𑌨𑍀 𑌯𑌾𑌤𑌿 𑌹𑌿 𑌸𑌾 𑌕𑌦𑌾𑌚𑌿𑌤𑍍 ॥ 13 ॥
𑌪𑌦𑍍𑌮𑌾𑌨𑌨𑌾 𑌪𑌦𑍍𑌮𑌵𑌿𑌶𑌾𑌲𑌨𑍇𑌤𑍍𑌰𑌾 𑌪𑌦𑍍𑌮𑌾𑌨𑌿 𑌵𑌾𑌨𑍇𑌤𑍁𑌮𑌭𑌿𑌪𑍍𑌰𑌯𑌾𑌤𑌾 ।
𑌤𑌦𑌪𑍍𑌯𑌯𑍁𑌕𑍍𑌤𑌂 𑌨 𑌹𑌿 𑌸𑌾 𑌕𑌦𑌾𑌚𑌿𑌨𑍍𑌮𑌯𑌾 𑌵𑌿𑌨𑌾 𑌗𑌚𑍍𑌛𑌤𑌿 𑌪𑌂𑌕𑌜𑌾𑌨𑌿 ॥ 14 ॥
𑌕𑌾𑌮𑌂 𑌤𑍍𑌵𑌿𑌦𑌂 𑌪𑍁𑌷𑍍𑌪𑌿𑌤𑌵𑍃𑌕𑍍𑌷𑌷𑌂𑌡𑌂 𑌨𑌾𑌨𑌾𑌵𑌿𑌧𑍈𑌃 𑌪𑌕𑍍𑌷𑌿𑌗𑌣𑍈𑌰𑍁𑌪𑍇𑌤𑌮𑍍 ।
𑌵𑌨𑌂 𑌪𑍍𑌰𑌯𑌾𑌤𑌾 𑌨𑍁 𑌤𑌦𑌪𑍍𑌯𑌯𑍁𑌕𑍍𑌤 𑌮𑍇𑌕𑌾𑌕𑌿𑌨𑍀 𑌸𑌾𑌤𑌿𑌬𑌿𑌭𑍇𑌤𑌿 𑌭𑍀𑌰𑍁𑌃 ॥ 15 ॥
𑌆𑌦𑌿𑌤𑍍𑌯 𑌭𑍋 𑌲𑍋𑌕𑌕𑍃𑌤𑌾𑌕𑍃𑌤𑌜𑍍𑌞 𑌲𑍋𑌕𑌸𑍍𑌯 𑌸𑌤𑍍𑌯𑌾𑌨𑍃𑌤𑌕𑌰𑍍𑌮𑌸𑌾𑌕𑍍𑌷𑌿𑌨𑍍 ।
𑌮𑌮 𑌪𑍍𑌰𑌿𑌯𑌾 𑌸𑌾 𑌕𑍍𑌵 𑌗𑌤𑌾 𑌹𑍃𑌤𑌾 𑌵𑌾 𑌶𑌂𑌸𑌸𑍍𑌵 𑌮𑍇 𑌶𑍋𑌕𑌵𑌶𑌸𑍍𑌯 𑌨𑌿𑌤𑍍𑌯𑌮𑍍 ॥ 16 ॥
𑌲𑍋𑌕𑍇𑌷𑍁 𑌸𑌰𑍍𑌵𑍇𑌷𑍁 𑌚 𑌨𑌾𑌸𑍍𑌤𑌿 𑌕𑌿𑌂𑌚𑌿𑌦𑍍𑌯𑌤𑍍𑌤𑍇 𑌨 𑌨𑌿𑌤𑍍𑌯𑌂 𑌵𑌿𑌦𑌿𑌤𑌂 𑌭𑌵𑍇𑌤𑍍𑌤𑌤𑍍 ।
𑌶𑌂𑌸𑌸𑍍𑌵 𑌵𑌾𑌯𑍋 𑌕𑍁𑌲𑌶𑌾𑌲𑌿𑌨𑍀𑌂 𑌤𑌾𑌂 𑌹𑍃𑌤𑌾 𑌮𑍃𑌤𑌾 𑌵𑌾 𑌪𑌥𑌿 𑌵𑌰𑍍𑌤𑌤𑍇 𑌵𑌾 ॥ 1 ॥
𑌇𑌤𑍀𑌵 𑌤𑌂 𑌶𑍋𑌕𑌵𑌿𑌧𑍇𑌯𑌦𑍇𑌹𑌂 𑌰𑌾𑌮𑌂 𑌵𑌿𑌸𑌂𑌜𑍍𑌞𑌂 𑌵𑌿𑌲𑌪𑌂𑌤𑌮𑍇𑌵𑌮𑍍 ।
𑌉𑌵𑌾𑌚 𑌸𑍌𑌮𑌿𑌤𑍍𑌰𑌿𑌰𑌦𑍀𑌨𑌸𑌤𑍍𑌤𑍍𑌵𑍋 𑌨𑍍𑌯𑌾𑌯𑍇 𑌸𑍍𑌥𑌿𑌤𑌃 𑌕𑌾𑌲𑌯𑍁𑌤𑌂 𑌚 𑌵𑌾𑌕𑍍𑌯𑌮𑍍 ॥ 1 ॥
𑌶𑍋𑌕𑌂 𑌵𑌿𑌮𑍁𑌂𑌚𑌾𑌰𑍍𑌯 𑌧𑍃𑌤𑌿𑌂 𑌭𑌜𑌸𑍍𑌵 𑌸𑍋𑌤𑍍𑌸𑌾𑌹𑌤𑌾 𑌚𑌾𑌸𑍍𑌤𑍁 𑌵𑌿𑌮𑌾𑌰𑍍𑌗𑌣𑍇𑌽𑌸𑍍𑌯𑌾𑌃 ।
𑌉𑌤𑍍𑌸𑌾𑌹𑌵𑌂𑌤𑍋 𑌹𑌿 𑌨𑌰𑌾 𑌨 𑌲𑍋𑌕𑍇 𑌸𑍀𑌦𑌂𑌤𑌿 𑌕𑌰𑍍𑌮𑌸𑍍𑌵𑌤𑌿𑌦𑍁𑌷𑍍𑌕𑌰𑍇𑌷𑍁 ॥ 1 ॥
𑌇𑌤𑍀𑌵 𑌸𑍌𑌮𑌿𑌤𑍍𑌰𑌿𑌮𑍁𑌦𑌗𑍍𑌰𑌪𑍌𑌰𑍁𑌷𑌂 𑌬𑍍𑌰𑍁𑌵𑌂𑌤𑌮𑌾𑌰𑍍𑌤𑍋 𑌰𑌘𑍁𑌵𑌂𑌶𑌵𑌰𑍍𑌧𑌨𑌃 ।
𑌨 𑌚𑌿𑌂𑌤𑌯𑌾𑌮𑌾𑌸 𑌧𑍃𑌤𑌿𑌂 𑌵𑌿𑌮𑍁𑌕𑍍𑌤𑌵𑌾𑌨𑍍𑌪𑍁𑌨𑌶𑍍𑌚 𑌦𑍁𑌃𑌖𑌂 𑌮𑌹𑌦𑌭𑍍𑌯𑍁𑌪𑌾𑌗𑌮𑌤𑍍 ॥ 20 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌤𑍍𑌰𑌿𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥
