𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌾𑌦𑌶𑌸𑍍𑌸𑌰𑍍𑌗𑌃 ।
𑌤𑌤𑌶𑍍𑌶𑍃𑌤𑍍𑌵𑌾 𑌮𑌹𑌾𑌰𑌾𑌜𑌃 𑌕𑍈𑌕𑍇𑌯𑍍𑌯𑌾 𑌦𑌾𑌰𑍁𑌣𑌂 𑌵𑌚𑌃 ।
𑌚𑌿𑌂𑌤𑌾𑌮𑌭𑌿𑌸𑌮𑌾𑌪𑍇𑌦𑍇 𑌮𑍁𑌹𑍂𑌰𑍍𑌤𑌂 𑌪𑍍𑌰𑌤𑌤𑌾𑌪 𑌚 ॥ 1 ॥
𑌕𑌿𑌨𑍍𑌨𑍁 𑌮𑍇 𑌯𑌦𑌿 𑌵𑌾 𑌸𑍍𑌵𑌪𑍍𑌨𑌶𑍍𑌚𑌿𑌤𑍍𑌤𑌮𑍋𑌹𑍋𑌽𑌪𑌿 𑌵𑌾 𑌮𑌮 ।
𑌅𑌨𑍁𑌭𑍂𑌤𑍋𑌪𑌸𑌰𑍍𑌗𑍋 𑌵𑌾 𑌮𑌨𑌸𑍋 𑌵𑌾𑌪𑍍𑌯𑍁𑌪𑌦𑍍𑌰𑌵𑌃 ॥ 2 ॥
𑌇𑌤𑌿 𑌸𑌂𑌚𑌿𑌂𑌤𑍍𑌯 𑌤𑌦𑍍𑌰𑌾𑌜𑌾 𑌨𑌾𑌧𑍍𑌯𑌗𑌚𑍍𑌛𑌤𑍍𑌤𑌦𑌾𑌸𑍁𑌖𑌮𑍍 ।
𑌪𑍍𑌰𑌤𑌿𑌲𑌭𑍍𑌯 𑌚𑌿𑌰𑌾𑌤𑍍𑌸𑌂𑌜𑍍𑌞𑌾𑌂 𑌕𑍈𑌕𑍇𑌯𑍀𑌵𑌾𑌕𑍍𑌯𑌤𑌾𑌡𑌿𑌤𑌃 ॥ 3 ॥
𑌵𑍍𑌯𑌥𑌿𑌤𑍋 𑌵𑌿𑌕𑍍𑌲𑌬𑌶𑍍𑌚𑍈𑌵 𑌵𑍍𑌯𑌾𑌘𑍍𑌰𑍀𑌂 𑌦𑍃𑌷𑍍𑌟𑍍𑌵𑌾 𑌯𑌥𑌾 𑌮𑍃𑌗𑌃 ।
𑌅𑌸𑌂𑌵𑍃𑌤𑌾𑌯𑌾𑌮𑌾𑌸𑍀𑌨𑍋 𑌜𑌗𑌤𑍍𑌯𑌾𑌂 𑌦𑍀𑌰𑍍𑌘𑌮𑍁𑌚𑍍𑌛𑌵𑌸𑌨𑍍 ॥ 4 ॥
𑌮𑌂𑌡𑌲𑍇 𑌪𑌨𑍍𑌨𑌗𑍋 𑌰𑍁𑌦𑍍𑌧𑍋 𑌮𑌂𑌤𑍍𑌰𑍈𑌰𑌿𑌵 𑌮𑌹𑌾𑌵𑌿𑌷𑌃 ।
𑌅𑌹𑍋 𑌧𑌿𑌗𑌿𑌤𑌿 𑌸𑌾𑌮𑌰𑍍𑌷𑍋 𑌵𑌾𑌚𑌮𑍁𑌕𑍍𑌤𑍍𑌵𑌾 𑌨𑌰𑌾𑌧𑌿𑌪𑌃 ॥ 5 ॥
𑌮𑍋𑌹𑌮𑌾𑌪𑍇𑌦𑌿𑌵𑌾𑌨𑍍𑌭𑍂𑌯 𑌶𑍍𑌶𑍋𑌕𑍋𑌪𑌹𑌤𑌚𑍇𑌤𑌨𑌃 ।
𑌚𑌿𑌰𑍇𑌣 𑌤𑍁 𑌨𑍃𑌪 𑌸𑍍𑌸𑌂𑌜𑍍𑌞𑌾𑌂 𑌪𑍍𑌰𑌤𑌿𑌲𑌭𑍍𑌯 𑌸𑍁𑌦𑍁𑌃𑌖𑌿𑌤𑌃 ॥ 6 ॥
𑌕𑍈𑌕𑍇𑌯𑍀𑌮𑌬𑍍𑌰𑌵𑍀𑌤𑍍𑌕𑍍𑌰𑍁𑌦𑍍𑌧𑌃𑌪𑍍𑌰𑌦𑌹𑌨𑍍𑌨𑌿𑌵 𑌚𑌕𑍍𑌷𑍁𑌷𑌾 ।
𑌨𑍃𑌶𑌂𑌸𑍇 𑌦𑍁𑌷𑍍𑌟𑌚𑌾𑌰𑌿𑌤𑍍𑌰𑍇 𑌕𑍁𑌲𑌸𑍍𑌯𑌾𑌸𑍍𑌯 𑌵𑌿𑌨𑌾𑌶𑌿𑌨𑌿 ॥ ॥
𑌕𑌿𑌂 𑌕𑍃𑌤𑌂 𑌤𑌵 𑌰𑌾𑌮𑍇𑌣 𑌪𑌾𑌪𑌂 𑌪𑌾𑌪𑍇 𑌮𑌯𑌾𑌪𑌿 𑌵𑌾 ।
𑌯𑌦𑌾 𑌤𑍇 𑌜𑌨𑌨𑍀𑌤𑍁𑌲𑍍𑌯𑌾𑌂 𑌵𑍃𑌤𑍍𑌤𑌿𑌂 𑌵𑌹𑌤𑌿 𑌰𑌾𑌘𑌵𑌃 ॥ ॥
𑌤𑌸𑍍𑌯𑍈𑌵 𑌤𑍍𑌵𑌮𑌨𑌰𑍍𑌥𑌾𑌯 𑌕𑌿𑌂𑌨𑌿𑌮𑌿𑌤𑍍𑌤𑌮𑌿𑌹𑍋𑌦𑍍𑌯𑌤𑌾 ।
𑌤𑍍𑌵𑌂 𑌮𑌯𑌾𑌽𑌽𑌤𑍍𑌮𑌵𑌿𑌨𑌾𑌶𑌾𑌰𑍍𑌥𑌂 𑌭𑌵𑌨𑌂 𑌸𑍍𑌵𑌂 𑌪𑍍𑌰𑌵𑍇𑌶𑌿𑌤𑌾 ॥ ॥
𑌅𑌵𑌿𑌜𑍍𑌞𑌾𑌨𑌾𑌨𑍍𑌨𑍃𑌪𑌸𑍁𑌤𑌾 𑌵𑍍𑌯𑌾𑌲𑍀 𑌤𑍀𑌕𑍍𑌷𑍍𑌣𑌵𑌿𑌷𑌾 𑌯𑌥𑌾 ।
𑌜𑍀𑌵𑌲𑍋𑌕𑍋 𑌯𑌦𑌾 𑌸𑌰𑍍𑌵𑍋 𑌰𑌾𑌮𑌸𑍍𑌯𑌾𑌹 𑌗𑍁𑌣𑌸𑍍𑌤𑌵𑌮𑍍 ॥ 10 ॥
𑌅𑌪𑌰𑌾𑌧𑌂 𑌕𑌿𑌮𑍁𑌦𑍍𑌦𑌿𑌶𑍍𑌯 𑌤𑍍𑌯𑌕𑍍𑌷𑍍𑌯𑌾𑌮𑍀𑌷𑍍𑌟𑌮𑌹𑌂 𑌸𑍁𑌤𑌮𑍍 ।
𑌕𑍌𑌸𑌲𑍍𑌯𑌾𑌂 𑌵𑌾 𑌸𑍁𑌮𑌿𑌤𑍍𑌰𑌾𑌂 𑌵𑌾 𑌤𑍍𑌯𑌜𑍇𑌯𑌮𑌪𑌿 𑌵𑌾 𑌶𑍍𑌰𑌿𑌯𑌮𑍍 ॥ 11 ॥
𑌜𑍀𑌵𑌿𑌤𑌂 𑌵𑌾𑌽𑌤𑍍𑌮𑌨𑍋 𑌰𑌾𑌮𑌂 𑌨 𑌤𑍍𑌵𑍇𑌵 𑌪𑌿𑌤𑍃𑌵𑌤𑍍𑌸𑌲𑌮𑍍 ।
𑌪𑌰𑌾 𑌭𑌵𑌤𑌿 𑌮𑍇 𑌪𑍍𑌰𑍀𑌤𑌿𑌰𑍍𑌦𑍃𑌷𑍍𑌟𑍍𑌵𑌾 𑌤𑌨𑌯𑌮𑌗𑍍𑌰𑌜𑌮𑍍 ॥ 12 ॥
𑌅𑌪𑌶𑍍𑌯𑌤𑌸𑍍𑌤𑍁 𑌮𑍇 𑌰𑌾𑌮𑌂 𑌨𑌷𑍍𑌟𑌾 𑌭𑌵𑌤𑌿 𑌚𑍇𑌤𑌨𑌾 ।
𑌤𑌿𑌷𑍍𑌠𑍇𑌲𑍍𑌲𑍋𑌕𑍋 𑌵𑌿𑌨𑌾 𑌸𑍂𑌰𑍍𑌯𑌂 𑌶𑌸𑍍𑌯𑌂 𑌵𑌾 𑌸𑌲𑌿𑌲𑌂 𑌵𑌿𑌨𑌾 ॥ 13 ॥
𑌨 𑌤𑍁 𑌰𑌾𑌮𑌂 𑌵𑌿𑌨𑌾 𑌦𑍇𑌹𑍇 𑌤𑌿𑌷𑍍𑌠𑍇𑌤𑍍𑌤𑍁 𑌮𑌮 𑌜𑍀𑌵𑌿𑌤𑌮𑍍 ।
𑌤𑌦𑌲𑌂 𑌤𑍍𑌯𑌜𑍍𑌯𑌤𑌾𑌮𑍇𑌷 𑌨𑌿𑌶𑍍𑌚𑌯𑌃 𑌪𑌾𑌪𑌨𑌿𑌶𑍍𑌚𑌯𑍇 ॥ 14 ॥
𑌅𑌪𑌿 𑌤𑍇 𑌚𑌰𑌣𑍈 𑌮𑍂𑌰𑍍𑌧𑍍𑌨𑌾 𑌸𑍍𑌪𑍃𑌶𑌾𑌮𑍍𑌯𑍇𑌷 𑌪𑍍𑌰𑌸𑍀𑌦 𑌮𑍇 ।
𑌕𑌿𑌮𑌿𑌦𑌂 𑌚𑌿𑌂𑌤𑌿𑌤𑌂 𑌪𑌾𑌪𑍇 𑌤𑍍𑌵𑌯𑌾 𑌪𑌰𑌮𑌦𑌾𑌰𑍁𑌣𑌮𑍍 ॥ 15 ॥
𑌅𑌥 𑌜𑌿𑌜𑍍𑌞𑌾𑌸𑌸𑍇 𑌮𑌾𑌂 𑌤𑍍𑌵𑌂 𑌭𑌰𑌤𑌸𑍍𑌯 𑌪𑍍𑌰𑌿𑌯𑌾𑌪𑍍𑌰𑌿𑌯𑍇 ।
𑌅𑌸𑍍𑌤𑍁 𑌯𑌤𑍍𑌤𑌤𑍍𑌤𑍍𑌵𑌯𑌾 𑌪𑍂𑌰𑍍𑌵𑌂 𑌵𑍍𑌯𑌾𑌹𑍃𑌤𑌂 𑌰𑌾𑌘𑌵𑌂 𑌪𑍍𑌰𑌤𑌿 ॥ 16 ॥
𑌸 𑌮𑍇 𑌜𑍍𑌯𑍇𑌷𑍍𑌠𑌸𑍍𑌸𑍁𑌤 𑌶𑍍𑌰𑍀𑌮𑌾𑌂𑌧𑌰𑍍𑌮𑌜𑍍𑌯𑍇𑌷𑍍𑌠 𑌇𑌤𑍀𑌵 𑌮𑍇 ।
𑌤𑌤𑍍𑌤𑍍𑌵𑌯𑌾 𑌪𑍍𑌰𑌿𑌯𑌵𑌾𑌦𑌿𑌨𑍍𑌯𑌾 𑌸𑍇𑌵𑌾𑌰𑍍𑌥𑌂 𑌕𑌥𑌿𑌤𑌂 𑌭𑌵𑍇𑌤𑍍 ॥ 1 ॥
𑌤𑌚𑍍𑌛𑍍𑌰𑍁𑌤𑍍𑌵𑌾 𑌶𑍋𑌕𑌸𑌂𑌤𑌪𑍍𑌤𑌾 𑌸𑌂𑌤𑌾𑌪𑌯𑌸𑌿 𑌮𑌾𑌂 𑌭𑍃𑌶𑌮𑍍 ।
𑌆𑌵𑌿𑌷𑍍𑌟𑌾𑌽𑌸𑌿 𑌗𑍃𑌹𑌂 𑌶𑍂𑌨𑍍𑌯𑌂 𑌸𑌾 𑌤𑍍𑌵𑌂 𑌪𑌰𑌵𑌶𑌂 𑌗𑌤𑌾 ॥ 1 ॥
𑌇𑌕𑍍𑌷𑍍𑌵𑌾𑌕𑍂𑌣𑌾𑌂 𑌕𑍁𑌲𑍇 𑌦𑍇𑌵𑌿 𑌸𑌂𑌪𑍍𑌰𑌾𑌪𑍍𑌤𑌸𑍍𑌸𑍁𑌮𑌹𑌾𑌨𑌯𑌮𑍍 ।
𑌅𑌨𑌯𑍋 𑌨𑌯𑌸𑌂𑌪𑌨𑍍𑌨𑍇 𑌯𑌤𑍍𑌰 𑌤𑍇 𑌵𑌿𑌕𑍃𑌤𑌾 𑌮𑌤𑌿𑌃 ॥ 1 ॥
𑌨𑌹𑌿 𑌕𑌿𑌂𑌚𑌿𑌦𑌯𑍁𑌕𑍍𑌤𑌂 𑌵𑌾 𑌵𑌿𑌪𑍍𑌰𑌿𑌯𑌂 𑌵𑌾 𑌪𑍁𑌰𑌾 𑌮𑌮 ।
𑌅𑌕𑌰𑍋𑌸𑍍𑌤𑍍𑌵𑌂 𑌵𑌿𑌶𑌾𑌲𑌾𑌕𑍍𑌷𑌿 𑌤𑍇𑌨 𑌨 𑌶𑍍𑌰𑌦𑍍𑌦𑌧𑌾𑌮𑍍𑌯𑌹𑌮𑍍 ॥ 20 ॥
𑌨𑌨𑍁 𑌤𑍇 𑌰𑌾𑌘𑌵𑌸𑍍𑌤𑍁𑌲𑍍𑌯𑍋 𑌭𑌰𑌤𑍇𑌨 𑌮𑌹𑌾𑌤𑍍𑌮𑌨𑌾 ।
𑌬𑌹𑍁𑌶𑍋 𑌹𑌿 𑌸𑍁𑌬𑌾𑌲𑍇 𑌤𑍍𑌵𑌂 𑌕𑌥𑌾𑌃 𑌕𑌥𑌯𑌸𑍇 𑌮𑌮 ॥ 21 ॥
𑌤𑌸𑍍𑌯 𑌧𑌰𑍍𑌮𑌾𑌤𑍍𑌮𑌨𑍋 𑌦𑍇𑌵𑌿 𑌵𑌨𑌵𑌾𑌸𑌂 𑌯𑌶𑌸𑍍𑌵𑌿𑌨𑌃 ।
𑌕𑌥𑌂 𑌰𑍋𑌚𑌯𑌸𑍇 𑌭𑍀𑌰𑍁 𑌨𑌵 𑌵𑌰𑍍𑌷𑌾𑌣𑌿 𑌪𑌂𑌚 𑌚 ॥ 22 ॥
𑌅𑌤𑍍𑌯𑌂𑌤𑌸𑍁𑌕𑍁𑌮𑌾𑌰𑌸𑍍𑌯 𑌤𑌸𑍍𑌯 𑌧𑌰𑍍𑌮𑍇 𑌧𑍃𑌤𑌾𑌤𑍍𑌮𑌨𑌃 ।
𑌕𑌥𑌂 𑌰𑍋𑌚𑌯𑌸𑍇 𑌵𑌾𑌸𑌮𑌰𑌣𑍍𑌯𑍇 𑌭𑍃𑌶𑌦𑌾𑌰𑍁𑌣𑍇 ॥ 23 ॥
𑌰𑍋𑌚𑌯𑌸𑍍𑌯𑌭𑌿𑌰𑌾𑌮𑌸𑍍𑌯 𑌰𑌾𑌮𑌸𑍍𑌯 𑌶𑍁𑌭𑌲𑍋𑌚𑌨𑍇 ।
𑌤𑌵 𑌶𑍁𑌶𑍍𑌰𑍂𑌷𑌮𑌾𑌣𑌸𑍍𑌯 𑌕𑌿𑌮𑌰𑍍𑌥𑌂 𑌵𑌿𑌪𑍍𑌰𑌵𑌾𑌸𑌨𑌮𑍍 ॥ 24 ॥
𑌰𑌾𑌮𑍋 𑌹𑌿 𑌭𑌰𑌤𑌾𑌦𑍍𑌭𑍂𑌯𑌸𑍍𑌤𑌵 𑌶𑍁𑌶𑍍𑌰𑍂𑌷𑌤𑍇 𑌸𑌦𑌾 ।
𑌵𑌿𑌶𑍇𑌷𑌂 𑌤𑍍𑌵𑌯𑌿 𑌤𑌸𑍍𑌮𑌾𑌤𑍍𑌤𑍁 𑌭𑌰𑌤𑌸𑍍𑌯 𑌨 𑌲𑌕𑍍𑌷𑌯𑍇 ॥ 25 ॥
𑌶𑍁𑌶𑍍𑌰𑍂𑌷𑌾𑌂 𑌗𑍌𑌰𑌵𑌂 𑌚𑍈𑌵 𑌪𑍍𑌰𑌮𑌾𑌣𑌂 𑌵𑌚𑌨𑌕𑍍𑌰𑌿𑌯𑌾𑌮𑍍 ।
𑌕𑌸𑍍𑌤𑍇 𑌭𑍂𑌯𑌸𑍍𑌤𑌰𑌂 𑌕𑍁𑌰𑍍𑌯𑌾𑌦𑌨𑍍𑌯𑌤𑍍𑌰 𑌮𑌨𑍁𑌜𑌰𑍍𑌷𑌭𑌾𑌤𑍍 ॥ 26 ॥
𑌬𑌹𑍂𑌨𑌾𑌂 𑌸𑍍𑌤𑍍𑌰𑍀𑌸𑌹𑌸𑍍𑌰𑌾𑌣𑌾𑌂 𑌬𑌹𑍂𑌨𑌾𑌂 𑌚𑍋𑌪𑌜𑍀𑌵𑌿𑌨𑌾𑌮𑍍 ।
𑌪𑌰𑌿𑌵𑌾𑌦𑍋𑌽𑌪𑌵𑌾𑌦𑍋 𑌵𑌾 𑌰𑌾𑌘𑌵𑍇 𑌨𑍋𑌪𑌪𑌦𑍍𑌯𑌤𑍇 ॥ 2 ॥
𑌸𑌾𑌂𑌤𑍍𑌵𑌯𑌨𑍍𑌸𑌰𑍍𑌵𑌭𑍂𑌤𑌾𑌨𑌿 𑌰𑌾𑌮 𑌶𑍍𑌶𑍁𑌦𑍍𑌧𑍇𑌨 𑌚𑍇𑌤𑌸𑌾 ।
𑌗𑍃𑌹𑍍𑌣𑌾𑌤𑌿 𑌮𑌨𑍁𑌜𑌵𑍍𑌯𑌾𑌘𑍍𑌰 𑌪𑍍𑌰𑌿𑌯𑍈𑌰𑍍𑌵𑌿𑌷𑌯𑌵𑌾𑌸𑌿𑌨𑌃 ॥ 2 ॥
𑌸𑌤𑍍𑌯𑍇𑌨 𑌲𑍋𑌕𑌾𑌨𑍍 𑌜𑌯𑌤𑌿 𑌦𑍀𑌨𑌾𑌨𑍍 𑌦𑌾𑌨𑍇𑌨 𑌰𑌾𑌘𑌵𑌃 ।
𑌗𑍁𑌰𑍂𑌂𑌛𑍁𑌶𑍍𑌰𑍂𑌷𑌯𑌾 𑌵𑍀𑌰𑍋 𑌧𑌨𑍁𑌷𑌾 𑌯𑍁𑌧𑌿 𑌶𑌾𑌤𑍍𑌰𑌵𑌾𑌨𑍍 ॥ 2 ॥
𑌸𑌤𑍍𑌯𑌂 𑌦𑌾𑌨𑌂 𑌤𑌪𑌸𑍍𑌤𑍍𑌯𑌾𑌗𑍋 𑌮𑌿𑌤𑍍𑌰𑌤𑌾 𑌶𑍌𑌚𑌮𑌾𑌰𑍍𑌜𑌵𑌮𑍍 ।
𑌵𑌿𑌦𑍍𑌯𑌾 𑌚 𑌗𑍁𑌰𑍁𑌶𑍁𑌶𑍍𑌰𑍂𑌷𑌾 𑌧𑍍𑌰𑍁𑌵𑌾𑌣𑍍𑌯𑍇𑌤𑌾𑌨𑌿 𑌰𑌾𑌘𑌵𑍇 ॥ 30 ॥
𑌤𑌸𑍍𑌮𑌿𑌨𑍍𑌨𑌾𑌰𑍍𑌜𑌵𑌸𑌂𑌪𑌨𑍍𑌨𑍇 𑌦𑍇𑌵𑌿 𑌦𑍇𑌵𑍋𑌪𑌮𑍇 𑌕𑌥𑌮𑍍 ।
𑌪𑌾𑌪𑌮𑌾𑌶𑌂𑌸𑌸𑍇 𑌰𑌾𑌮𑍇 𑌮𑌹𑌰𑍍𑌷𑌿𑌸𑌮𑌤𑍇𑌜𑌸𑌿 ॥ 31 ॥
𑌨 𑌸𑍍𑌮𑌰𑌾𑌮𑍍𑌯𑌪𑍍𑌰𑌿𑌯𑌂 𑌵𑌾𑌕𑍍𑌯𑌂 𑌲𑍋𑌕𑌸𑍍𑌯 𑌪𑍍𑌰𑌿𑌯𑌵𑌾𑌦𑌿𑌨𑌃 ।
𑌸 𑌕𑌥𑌂 𑌤𑍍𑌵𑌤𑍍𑌕𑍃𑌤𑍇 𑌰𑌾𑌮𑌂 𑌵𑌕𑍍𑌷𑍍𑌯𑌾𑌮𑌿 𑌪𑍍𑌰𑌿𑌯𑌮𑌪𑍍𑌰𑌿𑌯𑌮𑍍 ॥ 32 ॥
𑌕𑍍𑌷𑌮𑌾 𑌯𑌸𑍍𑌮𑌿𑌂𑌦𑌮𑌸𑍍𑌤𑍍𑌯𑌾𑌗 𑌸𑌤𑍍𑌯𑌂 𑌧𑌰𑍍𑌮𑌃 𑌕𑍃𑌤𑌜𑍍𑌞𑌤𑌾 ।
𑌅𑌪𑍍𑌯𑌹𑌿𑌂𑌸𑌾 𑌚 𑌭𑍂𑌤𑌾𑌨𑌾𑌂 𑌤𑌮𑍃𑌤𑍇 𑌕𑌾 𑌗𑌤𑌿𑌰𑍍𑌮𑌮 ॥ 33 ॥
𑌮𑌮 𑌵𑍃𑌦𑍍𑌧𑌸𑍍𑌯 𑌕𑍈𑌕𑍇𑌯𑌿 𑌗𑌤𑌾𑌂𑌤𑌸𑍍𑌯 𑌤𑌪𑌸𑍍𑌵𑌿𑌨𑌃 ।
𑌦𑍀𑌨𑌂 𑌲𑌾𑌲𑌪𑍍𑌯𑌮𑌾𑌨𑌸𑍍𑌯 𑌕𑌾𑌰𑍁𑌣𑍍𑌯𑌂 𑌕𑌰𑍍𑌤𑍁𑌮𑌰𑍍𑌹𑌸𑌿 ॥ 34 ॥
𑌪𑍃𑌥𑌿𑌵𑍍𑌯𑌾𑌂 𑌸𑌾𑌗𑌰𑌾𑌂𑌤𑌾𑌯𑌾𑌂 𑌯𑌤𑍍𑌕𑌿𑌂𑌚𑌿𑌦𑌧𑌿𑌗𑌮𑍍𑌯𑌤𑍇 ।
𑌤𑌤𑍍𑌸𑌰𑍍𑌵𑌂 𑌤𑌵 𑌦𑌾𑌸𑍍𑌯𑌾𑌮𑌿 𑌮𑌾 𑌚 𑌤𑍍𑌵𑌾𑌂 𑌮𑌨𑍍𑌯𑍁𑌰𑌾𑌵𑌿𑌶𑍇𑌤𑍍 ॥ 35 ॥
𑌅𑌂𑌜𑌲𑌿𑌂 𑌕𑌰𑍋𑌮𑌿 𑌕𑍈𑌕𑍇𑌯𑌿 𑌪𑌾𑌦𑍌 𑌚𑌾𑌪𑌿 𑌸𑍍𑌪𑍃𑌶𑌾𑌮𑌿 𑌤𑍇 ।
𑌶𑌰𑌣𑌂 𑌭𑌵 𑌰𑌾𑌮𑌸𑍍𑌯 𑌮𑌾𑌽𑌧𑌰𑍍𑌮𑍋 𑌮𑌾𑌮𑌿𑌹 𑌸𑍍𑌪𑍃𑌶𑍇𑌤𑍍 ॥ 36 ॥
𑌇𑌤𑌿 𑌦𑍁𑌃𑌖𑌾𑌭𑌿𑌸𑌂𑌤𑌪𑍍𑌤𑌂 𑌵𑌿𑌲𑌪𑌂𑌤𑌮𑌚𑍇𑌤𑌨𑌮𑍍 ।
𑌘𑍂𑌰𑍍𑌣𑌮𑌾𑌨𑌂 𑌮𑌹𑌾𑌰𑌾𑌜𑌂 𑌶𑍋𑌕𑍇𑌨 𑌸𑌮𑌭𑌿𑌪𑍍𑌲𑍁𑌤𑌮𑍍 ॥ 3 ॥
𑌪𑌾𑌰𑌂 𑌶𑍋𑌕𑌾𑌰𑍍𑌣𑌵𑌸𑍍𑌯𑌾𑌶𑍁 𑌪𑍍𑌰𑌾𑌰𑍍𑌥𑌯𑌂𑌤𑌂 𑌪𑍁𑌨𑌃 𑌪𑍁𑌨𑌃 ।
𑌪𑍍𑌰𑌤𑍍𑌯𑍁𑌵𑌾𑌚𑌾𑌥 𑌕𑍈𑌕𑍇𑌯𑍀 𑌰𑍌𑌦𑍍𑌰𑌾 𑌰𑍌𑌦𑍍𑌰𑌤𑌰𑌂 𑌵𑌚𑌃 ॥ 3 ॥
𑌯𑌦𑌿 𑌦𑌤𑍍𑌤𑍍𑌵𑌾 𑌵𑌰𑍌 𑌰𑌾𑌜𑌨𑍍𑌪𑍁𑌨𑌃 𑌪𑍍𑌰𑌤𑍍𑌯𑌨𑍁𑌤𑌪𑍍𑌯𑌸𑍇 ।
𑌧𑌾𑌰𑍍𑌮𑌿𑌕𑌤𑍍𑌵𑌂 𑌕𑌥𑌂 𑌵𑍀𑌰 𑌪𑍃𑌥𑌿𑌵𑍍𑌯𑌾𑌂 𑌕𑌥𑌯𑌿𑌷𑍍𑌯𑌸𑌿 ॥ 3 ॥
𑌯𑌦𑌾 𑌸𑌮𑍇𑌤𑌾 𑌬𑌹𑌵𑌸𑍍𑌤𑍍𑌵𑌯𑌾 𑌰𑌾𑌜𑌰𑍍𑌷𑌯 𑌸𑍍𑌸𑌹 ।
𑌕𑌥𑌯𑌿𑌷𑍍𑌯𑌂𑌤𑌿 𑌧𑌰𑍍𑌮𑌜𑍍𑌞 𑌤𑌤𑍍𑌰 𑌕𑌿𑌂 𑌪𑍍𑌰𑌤𑌿𑌵𑌕𑍍𑌷𑍍𑌯𑌸𑌿 ॥ 40 ॥
𑌯𑌸𑍍𑌯𑌾𑌃 𑌪𑍍𑌰𑌸𑌾𑌦𑍇 𑌜𑍀𑌵𑌾𑌮𑌿 𑌯𑌾 𑌚 𑌮𑌾𑌮𑌭𑍍𑌯𑌪𑌾𑌲𑌯𑌤𑍍 ।
𑌤𑌸𑍍𑌯𑌾𑌃 𑌕𑍃𑌤𑌂 𑌮𑌯𑌾 𑌮𑌿𑌥𑍍𑌯𑌾 𑌕𑍈𑌕𑍇𑌯𑍍𑌯𑌾 𑌇𑌤𑌿 𑌵𑌕𑍍𑌷𑌯𑌸𑌿 ॥ 41 ॥
𑌕𑌿𑌲𑍍𑌬𑌿𑌷𑌤𑍍𑌵𑌂 𑌨𑌰𑍇𑌂𑌦𑍍𑌰𑌾𑌣𑌾𑌂 𑌕𑌰𑌿𑌷𑍍𑌯𑌸𑌿 𑌨𑌰𑌾𑌧𑌿𑌪 ।
𑌯𑍋 𑌦𑌤𑍍𑌵𑌾 𑌵𑌰𑌮𑌦𑍍𑌯𑍈𑌵 𑌪𑍁𑌨𑌰𑌨𑍍𑌯𑌾𑌨𑌿 𑌭𑌾𑌷𑌸𑍇 ॥ 42 ॥
𑌶𑍈𑌬𑍍𑌯𑌶𑍍𑌶𑍍𑌯𑍇𑌨𑌕𑌪𑍋𑌤𑍀𑌯𑍇 𑌸𑍍𑌵𑌮𑌾𑌂𑌸𑌂 𑌪𑌕𑍍𑌷𑌿𑌣𑍇 𑌦𑌦𑍌 ।
𑌅𑌲𑌰𑍍𑌕𑌶𑍍𑌚𑌕𑍍𑌷𑍁𑌷𑍀 𑌦𑌤𑍍𑌵𑌾 𑌜𑌗𑌾𑌮 𑌗𑌤𑌿𑌮𑍁𑌤𑍍𑌤𑌮𑌾𑌮𑍍 ॥ 43 ॥
𑌸𑌾𑌗𑌰𑌸𑍍𑌸𑌮𑌯𑌂 𑌕𑍃𑌤𑍍𑌵𑌾 𑌨 𑌵𑍇𑌲𑌾𑌮𑌤𑌿𑌵𑌰𑍍𑌤𑌤𑍇 ।
𑌸𑌮𑌯𑌂 𑌮𑌾𑌽𑌨𑍃𑌤𑌂 𑌕𑌾𑌰𑍍𑌷𑍀𑌃 𑌪𑍂𑌰𑍍𑌵𑌵𑍃𑌤𑍍𑌤𑌮𑌨𑍁𑌸𑍍𑌮𑌰𑌨𑍍 ॥ 44 ॥
𑌸 𑌤𑍍𑌵𑌂 𑌧𑌰𑍍𑌮𑌂 𑌪𑌰𑌿𑌤𑍍𑌯𑌜𑍍𑌯 𑌰𑌾𑌮𑌂 𑌰𑌾𑌜𑍍𑌯𑍇𑌽𑌭𑌿𑌷𑌿𑌚𑍍𑌯 𑌚 ।
𑌸𑌹 𑌕𑍌𑌸𑌲𑍍𑌯𑌯𑌾 𑌨𑌿𑌤𑍍𑌯𑌂 𑌰𑌂𑌤𑍁𑌮𑌿𑌚𑍍𑌛𑌸𑌿 𑌦𑍁𑌰𑍍𑌮𑌤𑍇 ॥ 45 ॥
𑌭𑌵𑌤𑍍𑌵𑌧𑌰𑍍𑌮𑍋 𑌧𑌰𑍍𑌮𑍋 𑌵𑌾 𑌸𑌤𑍍𑌯𑌂 𑌵𑌾 𑌯𑌦𑌿 𑌵𑌾𑌽𑌨𑍃𑌤𑌮𑍍 ।
𑌯𑌤𑍍𑌤𑍍𑌵𑌯𑌾 𑌸𑌂𑌶𑍍𑌰𑍁𑌤𑌂 𑌮𑌹𑍍𑌯𑌂 𑌤𑌸𑍍𑌯 𑌨𑌾𑌸𑍍𑌤𑌿 𑌵𑍍𑌯𑌤𑌿𑌕𑍍𑌰𑌮𑌃 ॥ 46 ॥
𑌅𑌹𑌂 𑌹𑌿 𑌵𑌿𑌷𑌮𑌦𑍍𑌯𑍈𑌵 𑌪𑍀𑌤𑍍𑌵𑌾 𑌬𑌹𑍁 𑌤𑌵𑌾𑌗𑍍𑌰𑌤𑌃 ।
𑌪𑌶𑍍𑌯𑌤𑌸𑍍𑌤𑍇 𑌮𑌰𑌿𑌷𑍍𑌯𑌾𑌮𑌿 𑌰𑌾𑌮𑍋 𑌯𑌦𑍍𑌯𑌭𑌿𑌷𑌿𑌚𑍍𑌯𑌤𑍇 ॥ 4 ॥
𑌏𑌕𑌾𑌹𑌮𑌪𑌿 𑌪𑌶𑍍𑌯𑍇𑌯𑌂 𑌯𑌦𑍍𑌯𑌹𑌂 𑌰𑌾𑌮𑌮𑌾𑌤𑌰𑌮𑍍 ।
𑌅𑌂𑌜𑌲𑌿𑌂 𑌪𑍍𑌰𑌤𑌿𑌗𑍃𑌹𑍍𑌣𑌂𑌤𑍀𑌂 𑌶𑍍𑌰𑍇𑌯𑍋 𑌨𑌨𑍁 𑌮𑍃𑌤𑌿𑌰𑍍𑌮𑌮 ॥ 4 ॥
𑌭𑌰𑌤𑍇𑌨𑌾𑌤𑍍𑌮𑌨𑌾 𑌚𑌾𑌹𑌂 𑌶𑌪𑍇 𑌤𑍇 𑌮𑌨𑍁𑌜𑌾𑌧𑌿𑌪 ।
𑌯𑌥𑌾 𑌨𑌾𑌨𑍍𑌯𑍇𑌨 𑌤𑍁𑌷𑍍𑌯𑍇𑌯𑌮𑍃𑌤𑍇 𑌰𑌾𑌮𑌵𑌿𑌵𑌾𑌸𑌨𑌾𑌤𑍍 ॥ 4 ॥
𑌏𑌤𑌾𑌵𑌦𑍁𑌕𑍍𑌤𑍍𑌵𑌾 𑌵𑌚𑌨𑌂 𑌕𑍈𑌕𑍇𑌯𑍀 𑌵𑌿𑌰𑌰𑌾𑌮 𑌹 ।
𑌵𑌿𑌲𑌪𑌂𑌤𑌂 𑌚 𑌰𑌾𑌜𑌾𑌨𑌂 𑌨 𑌪𑍍𑌰𑌤𑌿𑌵𑍍𑌯𑌾𑌜𑌹𑌾𑌰 𑌸𑌾 ॥ 50 ॥
𑌶𑍍𑌰𑍁𑌤𑍍𑌵𑌾 𑌤𑍁 𑌰𑌾𑌜𑌾 𑌕𑍈𑌕𑍇𑌯𑍍𑌯𑌾 𑌵𑍃𑌤𑌂 𑌪𑌰𑌮𑌶𑍋𑌭𑌨𑌮𑍍 ।
𑌰𑌾𑌮𑌸𑍍𑌯 𑌚 𑌵𑌨𑍇 𑌵𑌾𑌸𑌮𑍈𑌶𑍍𑌵𑌰𑍍𑌯𑌂 𑌭𑌰𑌤𑌸𑍍𑌯 𑌚 ॥ 51 ॥
𑌨𑌾𑌭𑍍𑌯𑌭𑌾𑌷𑌤 𑌕𑍈𑌕𑍇𑌯𑍀𑌂 𑌮𑍁𑌹𑍂𑌰𑍍𑌤𑌂 𑌵𑍍𑌯𑌾𑌕𑍁𑌲𑍇𑌂𑌦𑍍𑌰𑌿𑌯𑌃 ।
𑌪𑍍𑌰𑍈𑌕𑍍𑌷𑌤𑌾𑌨𑌿𑌮𑌿𑌷𑍋 𑌦𑍇𑌵𑍀𑌂 𑌪𑍍𑌰𑌿𑌯𑌾𑌮𑌪𑍍𑌰𑌿𑌯𑌵𑌾𑌦𑌿𑌨𑍀𑌮𑍍 ॥ 52 ॥
𑌤𑌾𑌂 𑌹𑌿 𑌵𑌜𑍍𑌰𑌸𑌮𑌾𑌂 𑌵𑌾𑌚𑌮𑌾𑌕𑌰𑍍𑌣𑍍𑌯 𑌹𑍃𑌦𑌯𑌾𑌪𑍍𑌰𑌿𑌯𑌾𑌮𑍍 ।
𑌦𑍁𑌃𑌖𑌶𑍋𑌕𑌮𑌯𑍀𑌂 𑌘𑍋𑌰𑌾𑌂 𑌰𑌾𑌜𑌾 𑌨 𑌸𑍁𑌖𑌿𑌤𑍋𑌽𑌭𑌵𑌤𑍍 ॥ 53 ॥
𑌸 𑌦𑍇𑌵𑍍𑌯𑌾 𑌵𑍍𑌯𑌵𑌸𑌾𑌯𑌂 𑌚 𑌘𑍋𑌰𑌂 𑌚 𑌶𑌪𑌥𑌂 𑌕𑍃𑌤𑌮𑍍 ।
𑌧𑍍𑌯𑌾𑌤𑍍𑌵𑌾 𑌰𑌾𑌮𑍇𑌤𑌿 𑌨𑌿𑌶𑍍𑌶𑍍𑌵𑌸𑍍𑌯 𑌛𑌿𑌨𑍍𑌨 𑌸𑍍𑌤𑌰𑍁𑌰𑌿𑌵𑌾𑌪𑌤𑌤𑍍 ॥ 54 ॥
𑌨𑌷𑍍𑌟𑌚𑌿𑌤𑍍𑌤𑍋 𑌯𑌥𑍋𑌨𑍍𑌮𑌤𑍍𑌤𑍋 𑌵𑌿𑌪𑌰𑍀𑌤𑍋 𑌯𑌥𑌾𑌽𑌤𑍁𑌰𑌃 ।
𑌹𑍃𑌤𑌤𑍇𑌜𑌾 𑌯𑌥𑌾 𑌸𑌰𑍍𑌪𑍋 𑌬𑌭𑍂𑌵 𑌜𑌗𑌤𑍀𑌪𑌤𑌿𑌃 ॥ 55 ॥
𑌦𑍀𑌨𑌯𑌾 𑌤𑍁 𑌗𑌿𑌰𑌾 𑌰𑌾𑌜𑌾 𑌇𑌤𑌿 𑌹𑍋𑌵𑌾𑌚 𑌕𑍈𑌕𑌯𑍀𑌮𑍍 ।
𑌅𑌨𑌰𑍍𑌥𑌮𑌿𑌮𑌮𑌰𑍍𑌥𑌾𑌭𑌂 𑌕𑍇𑌨 𑌤𑍍𑌵𑌮𑍁𑌪𑌦𑌰𑍍𑌶𑌿𑌤𑌾 ॥ 56 ॥
𑌭𑍂𑌤𑍋𑌪𑌹𑌤𑌚𑌿𑌤𑍍𑌤𑍇𑌵 𑌬𑍍𑌰𑍁𑌵𑌂𑌤𑍀 𑌮𑌾𑌂 𑌨 𑌲𑌜𑍍𑌜𑌸𑍇 ।
𑌶𑍀𑌲𑌵𑍍𑌯𑌸𑌨𑌮𑍇𑌤𑌤𑍍𑌤𑍇 𑌨𑌾𑌭𑌿𑌜𑌾𑌨𑌾𑌮𑍍𑌯𑌹𑌂 𑌪𑍁𑌰𑌾 ॥ 5 ॥
𑌬𑌾𑌲𑌾𑌯𑌾𑌸𑍍𑌤𑌤𑍍𑌤𑍍𑌵𑌿𑌤𑌿𑌦𑌾𑌨𑍀𑌂 𑌤𑍇 𑌲𑌕𑍍𑌷𑌯𑍇 𑌵𑌿𑌪𑌰𑍀𑌤𑌵𑌤𑍍 ।
𑌕𑍁𑌤𑍋 𑌵𑌾 𑌤𑍇 𑌭𑌯𑌂 𑌜𑌾𑌤𑌂 𑌯𑌾 𑌤𑍍𑌵𑌮𑍇𑌵𑌂𑌵𑌿𑌧𑌂 𑌵𑌰𑌮𑍍 ॥ 5 ॥
𑌰𑌾𑌷𑍍𑌟𑍍𑌰𑍇 𑌭𑌰𑌤𑌮𑌾𑌸𑍀𑌨𑌂 𑌵𑍃𑌣𑍀𑌷𑍇 𑌰𑌾𑌘𑌵𑌂 𑌵𑌨𑍇 ।
𑌵𑌿𑌰𑌮𑍈𑌤𑍇𑌨 𑌭𑌾𑌵𑍇𑌨 𑌤𑍍𑌵𑌮𑍇𑌤𑍇𑌨𑌾𑌨𑍃𑌤𑍇𑌨 𑌵𑌾 ॥ 5 ॥
𑌯𑌦𑌿 𑌭𑌰𑍍𑌤𑍁𑌃 𑌪𑍍𑌰𑌿𑌯𑌂 𑌕𑌾𑌰𑍍𑌯𑌂 𑌲𑍋𑌕𑌸𑍍𑌯 𑌭𑌰𑌤𑌸𑍍𑌯 𑌚 ।
𑌨𑍃𑌶𑌂𑌸𑍇 𑌪𑌾𑌪𑌸𑌂𑌕𑌲𑍍𑌪𑍇 𑌕𑍍𑌷𑍁𑌦𑍍𑌰𑍇 𑌦𑍁𑌷𑍍𑌕𑍃𑌤𑌕𑌾𑌰𑌿𑌣𑌿 ॥ 60 ॥
𑌕𑌿𑌨𑍍𑌨𑍁 𑌦𑍁𑌖𑌮𑌲𑍀𑌕𑌂 𑌵𑌾 𑌮𑌯𑌿 𑌰𑌾𑌮𑍇 𑌚 𑌪𑌶𑍍𑌯𑌸𑌿 ।
𑌨 𑌕𑌥𑌂𑌚𑌿𑌦𑍃𑌤𑍇 𑌰𑌾𑌮𑌾𑌦𑍍𑌭𑌰𑌤𑍋 𑌰𑌾𑌜𑍍𑌯𑌮𑌾𑌵𑌸𑍇𑌤𑍍 ॥ 61 ॥
𑌰𑌾𑌮𑌾𑌦𑌪𑌿 𑌹𑌿 𑌤𑌂 𑌮𑌨𑍍𑌯𑍇 𑌧𑌰𑍍𑌮𑌤𑍋 𑌬𑌲𑌵𑌤𑍍𑌤𑌰𑌮𑍍 ।
𑌕𑌥𑌂 𑌦𑍍𑌰𑌕𑍍𑌷𑍍𑌯𑌾𑌮𑌿 𑌰𑌾𑌮𑌸𑍍𑌯 𑌵𑌨𑌂 𑌗𑌚𑍍𑌛𑍇𑌤𑌿 𑌭𑌾𑌷𑌿𑌤𑍇 ॥ 62 ॥
𑌮𑍁𑌖𑌵𑌰𑍍𑌣𑌂 𑌵𑌿𑌵𑌰𑍍𑌣𑌂 𑌤𑍁 𑌤𑌂 𑌯𑌥𑍈𑌵𑍇𑌂𑌦𑍁𑌮𑍁𑌪𑌪𑍍𑌲𑍁𑌤𑌮𑍍 ।
𑌤𑌾𑌂 𑌹𑌿 𑌮𑍇 𑌸𑍁𑌕𑍃𑌤𑌾𑌂 𑌬𑍁𑌦𑍍𑌧𑌿𑌂 𑌸𑍁𑌹𑍃𑌦𑍍𑌭𑌿𑌸𑍍𑌸𑌹 𑌨𑌿𑌶𑍍𑌚𑌿𑌤𑌾𑌮𑍍 ॥ 63 ॥
𑌕𑌥𑌂 𑌦𑍍𑌰𑌕𑍍𑌷𑍍𑌯𑌾𑌮𑍍𑌯𑌪𑌾𑌵𑍃𑌤𑍍𑌤𑌾𑌂 𑌪𑌰𑍈𑌰𑌿𑌵 𑌹𑌤𑌾𑌂 𑌚𑌮𑍂𑌮𑍍 ।
𑌕𑌿𑌂 𑌮𑌾𑌂 𑌵𑌕𑍍𑌷𑍍𑌯𑌂𑌤𑌿 𑌰𑌾𑌜𑌾𑌨𑍋 𑌨𑌾𑌨𑌾𑌦𑌿𑌗𑍍𑌭𑍍𑌯 𑌸𑍍𑌸𑌮𑌾𑌗𑌤𑌾𑌃 ॥ 64 ॥
𑌬𑌾𑌲𑍋 𑌬𑌤𑌾𑌽𑌯𑌮𑍈𑌕𑍍𑌷𑍍𑌵𑌾𑌕𑌶𑍍𑌚𑌿𑌰𑌂 𑌰𑌾𑌜𑍍𑌯𑌮𑌕𑌾𑌰𑌯𑌤𑍍 ।
𑌯𑌦𑌾 𑌤𑍁 𑌬𑌹𑌵𑍋 𑌵𑍃𑌦𑍍𑌧𑌾 𑌗𑍁𑌣𑌵𑌂𑌤𑍋 𑌬𑌹𑍁𑌶𑍍𑌰𑍁𑌤𑌾𑌃 ॥ 65 ॥
𑌪𑌰𑌿𑌪𑍍𑌰𑌕𑍍𑌷𑍍𑌯𑌂𑌤𑌿 𑌕𑌾𑌕𑍁𑌤𑍍𑌸𑍍𑌥𑌂 𑌵𑌕𑍍𑌷𑍍𑌯𑌾𑌮𑌿 𑌕𑌿𑌮𑌹𑌂 𑌤𑌦𑌾 ।
𑌕𑍈𑌕𑍇𑌯𑍍𑌯𑌾 𑌕𑍍𑌲𑌿𑌶𑍍𑌯𑌮𑌾𑌨𑍇𑌨 𑌰𑌾𑌮𑌃 𑌪𑍍𑌰𑌵𑍍𑌰𑌾𑌜𑌿𑌤𑍋 𑌮𑌯𑌾 ॥ 66 ॥
𑌯𑌦𑌿 𑌸𑌤𑍍𑌯𑌂 𑌬𑍍𑌰𑌵𑍀𑌮𑍍𑌯𑍇𑌤𑌤𑍍𑌤𑌦𑌸𑌤𑍍𑌯𑌂 𑌭𑌵𑌿𑌷𑍍𑌯𑌤𑌿 ।
𑌕𑌿𑌂 𑌮𑌾𑌂 𑌵𑌕𑍍𑌷𑍍𑌯𑌤𑌿 𑌕𑍌𑌶𑌲𑍍𑌯𑌾 𑌰𑌾𑌘𑌵𑍇 𑌵𑌨𑌮𑌾𑌸𑍍𑌥𑌿𑌤𑍇 ॥ 6 ॥
𑌕𑌿𑌂 𑌚𑍈𑌨𑌾𑌂 𑌪𑍍𑌰𑌤𑌿𑌵𑌕𑍍𑌷𑍍𑌯𑌾𑌮𑌿 𑌕𑍃𑌤𑍍𑌵𑌾 𑌵𑌿𑌪𑍍𑌰𑌿𑌯𑌮𑍀𑌦𑍃𑌶𑌮𑍍 ।
𑌯𑌦𑌾 𑌯𑌦𑌾 𑌹𑌿 𑌕𑍌𑌶𑌲𑍍𑌯𑌾 𑌦𑌾𑌸𑍀𑌵𑌚𑍍𑌚 𑌸𑌖𑍀𑌵 𑌚 ॥ 6 ॥
𑌭𑌾𑌰𑍍𑌯𑌾𑌵𑌦𑍍𑌭𑌗𑌿𑌨𑍀𑌵𑌚𑍍𑌚 𑌮𑌾𑌤𑍃𑌵𑌚𑍍𑌚𑍋𑌪𑌤𑌿𑌷𑍍𑌠𑌤𑌿 ।
𑌸𑌤𑌤𑌂 𑌪𑍍𑌰𑌿𑌯𑌕𑌾𑌮𑌾 𑌮𑍇 𑌪𑍍𑌰𑌿𑌯𑌪𑍁𑌤𑍍𑌰𑌾 𑌪𑍍𑌰𑌿𑌯𑌂𑌵𑌦𑌾 ॥ 6 ॥
𑌨 𑌮𑌯𑌾 𑌸𑌤𑍍𑌕𑍃𑌤𑌾 𑌦𑍇𑌵𑍀 𑌸𑌤𑍍𑌕𑌾𑌰𑌾𑌰𑍍𑌹𑌾 𑌕𑍃𑌤𑍇 𑌤𑌵 ।
𑌇𑌦𑌾𑌨𑍀𑌂 𑌤𑌤𑍍𑌤𑌪𑌤𑌿 𑌮𑌾𑌂 𑌯𑌨𑍍𑌮𑌯𑌾 𑌸𑍁𑌕𑍃𑌤𑌂 𑌤𑍍𑌵𑌯𑌿 ॥ 0 ॥
𑌅𑌪𑌥𑍍𑌯𑌵𑍍𑌯𑌂𑌜𑌨𑍋𑌪𑍇𑌤𑌂 𑌭𑍁𑌕𑍍𑌤𑌮𑌨𑍍𑌨𑌮𑌿𑌵𑌾𑌤𑍁𑌰𑌮𑍍 ।
𑌵𑌿𑌪𑍍𑌰𑌕𑌾𑌰𑌂 𑌚 𑌰𑌾𑌮𑌸𑍍𑌯 𑌸𑌂𑌪𑍍𑌰𑌯𑌾𑌣𑌂 𑌵𑌨𑌸𑍍𑌯 𑌚 ॥ 1 ॥
𑌸𑍁𑌮𑌿𑌤𑍍𑌰𑌾 𑌪𑍍𑌰𑍇𑌕𑍍𑌷𑍍𑌯 𑌵𑍈 𑌭𑍀𑌤𑌾 𑌕𑌥𑌂 𑌮𑍇 𑌵𑌿𑌶𑍍𑌵𑌸𑌿𑌷𑍍𑌯𑌤𑌿 ।
𑌕𑍃𑌪𑌣𑌂 𑌬𑌤 𑌵𑍈𑌦𑍇𑌹𑍀 𑌶𑍍𑌰𑍋𑌷𑍍𑌯𑌤𑌿 𑌦𑍍𑌵𑌯𑌮𑌪𑍍𑌰𑌿𑌯𑌮𑍍 ॥ 2 ॥
𑌮𑌾𑌂 𑌚 𑌪𑌂𑌚𑌤𑍍𑌵𑌮𑌾𑌪𑌨𑍍𑌨𑌂 𑌰𑌾𑌮𑌂 𑌚 𑌵𑌨𑌮𑌾𑌶𑍍𑌰𑌿𑌤𑌮𑍍 ।
𑌵𑍈𑌦𑍇𑌹𑍀 𑌬𑌤 𑌮𑍇 𑌪𑍍𑌰𑌾𑌣𑌾𑌨𑍍𑌶𑍋𑌚𑌂𑌤𑍀 𑌕𑍍𑌷𑌪𑌯𑌿𑌷𑍍𑌯𑌤𑌿 ॥ 3 ॥
𑌹𑍀𑌨𑌾 𑌹𑌿𑌮𑌵𑌤𑌃 𑌪𑌾𑌰𑍍𑌶𑍍𑌵𑍇 𑌕𑌿𑌨𑍍𑌨𑌰𑍇𑌣𑍇𑌵 𑌕𑌿𑌨𑍍𑌨𑌰𑍀 ।
𑌨 𑌹𑌿 𑌰𑌾𑌮𑌮𑌹𑌂 𑌦𑍃𑌷𑍍𑌟𑍍𑌵𑌾 𑌪𑍍𑌰𑌵𑌸𑌂𑌤𑌂 𑌮𑌹𑌾𑌵𑌨𑍇 ॥ 4 ॥
𑌚𑌿𑌰𑌂 𑌜𑍀𑌵𑌿𑌤𑍁𑌮𑌾𑌶𑌂𑌸𑍇 𑌰𑍁𑌦𑌂𑌤𑍀𑌂 𑌚𑌾𑌪𑌿 𑌮𑍈𑌥𑌿𑌲𑍀𑌮𑍍 ।
𑌸𑌾 𑌨𑍂𑌨𑌂 𑌵𑌿𑌧𑌵𑌾 𑌰𑌾𑌜𑍍𑌯𑌂 𑌸𑌪𑍁𑌤𑍍𑌰𑌾 𑌕𑌾𑌰𑌯𑌿𑌷𑍍𑌯𑌸𑌿 ॥ 5 ॥
𑌨 𑌹𑌿 𑌪𑍍𑌰𑌵𑍍𑌰𑌾𑌜𑌿𑌤𑍇 𑌰𑌾𑌮𑍇 𑌦𑍇𑌵𑌿 𑌜𑍀𑌵𑌿𑌤𑍁𑌮𑍁𑌤𑍍𑌸𑌹𑍇 ।
𑌸𑌤𑍀𑌂 𑌤𑍍𑌵𑌾𑌮𑌹𑌮𑌤𑍍𑌯𑌂𑌤𑌂 𑌵𑍍𑌯𑌵𑌸𑍍𑌯𑌾𑌮𑍍𑌯𑌸𑌤𑍀𑌂 𑌸𑌤𑍀𑌮𑍍 ।
𑌰𑍂𑌪𑌿𑌣𑍀𑌂 𑌵𑌿𑌷𑌸𑌂𑌯𑍁𑌕𑍍𑌤𑌾𑌂 𑌪𑍀𑌤𑍍𑌵𑍇𑌵 𑌮𑌦𑌿𑌰𑌾𑌂 𑌨𑌰𑌃 ॥ 6 ॥
𑌅𑌨𑍃𑌤𑍈𑌰𑍍𑌬𑌹𑍁 𑌮𑌾𑌂 𑌸𑌾𑌂𑌤𑍍𑌵𑍈 𑌸𑍍𑌸𑌾𑌂𑌤𑍍𑌵𑌯𑌂𑌤𑍀 𑌸𑍍𑌮 𑌭𑌾𑌷𑌸𑍇 ।
𑌗𑍀𑌤𑌶𑌬𑍍𑌦𑍇𑌨 𑌸𑌂𑌰𑍁𑌧𑍍𑌯 𑌲𑍁𑌬𑍍𑌧𑍋 𑌮𑍃𑌗𑌮𑌿𑌵𑌾𑌵𑌧𑍀𑌃 ॥ ॥
𑌅𑌨𑌾𑌰𑍍𑌯 𑌇𑌤𑌿 𑌮𑌾𑌮𑌾𑌰𑍍𑌯𑌾𑌃 𑌪𑍁𑌤𑍍𑌰𑌵𑌿𑌕𑍍𑌰𑌾𑌯𑌕𑌂 𑌧𑍍𑌰𑍁𑌵𑌮𑍍 ।
𑌧𑌿𑌕𑍍𑌕𑌰𑌿𑌷𑍍𑌯𑌂𑌤𑌿 𑌰𑌥𑍍𑌯𑌾𑌸𑍁 𑌸𑍁𑌰𑌾𑌪𑌂 𑌬𑍍𑌰𑌾𑌹𑍍𑌮𑌣𑌂 𑌯𑌥𑌾 ॥ ॥
𑌅𑌹𑍋 𑌦𑍁𑌃𑌖𑌮𑌹𑍋 𑌕𑍃𑌚𑍍𑌛𑍍𑌰𑌂 𑌯𑌤𑍍𑌰 𑌵𑌾𑌚𑌃 𑌕𑍍𑌷𑌮𑍇 𑌤𑌵 ।
𑌦𑍁𑌃𑌖𑌮𑍇𑌵𑌂𑌵𑌿𑌧𑌂 𑌪𑍍𑌰𑌾𑌪𑍍𑌤𑌂 𑌪𑍁𑌰𑌾𑌕𑍃𑌤𑌮𑌿𑌵𑌾𑌶𑍁𑌭𑌮𑍍 ॥ ॥
𑌚𑌿𑌰𑌂 𑌖𑌲𑍁 𑌮𑌯𑌾 𑌪𑌾𑌪𑍇 𑌤𑍍𑌵𑌂 𑌪𑌾𑌪𑍇𑌨𑌾𑌭𑌿𑌰𑌕𑍍𑌷𑌿𑌤𑌾 ।
𑌅𑌜𑍍𑌞𑌾𑌨𑌾𑌦𑍁𑌪𑌸𑌂𑌪𑌨𑍍𑌨𑌾 𑌰𑌜𑍍𑌜𑍁𑌰𑍁𑌦𑍍𑌬𑌂𑌧𑌿𑌨𑍀 𑌯𑌥𑌾 ॥ 0 ॥
𑌰𑌮𑌮𑌾𑌣𑌸𑍍𑌤𑍍𑌵𑌯𑌾 𑌸𑌾𑌰𑍍𑌧𑌂 𑌮𑍃𑌤𑍍𑌯𑍁𑌂 𑌤𑍍𑌵𑌾𑌂 𑌨𑌾𑌭𑌿𑌲𑌕𑍍𑌷𑌯𑍇 ।
𑌬𑌾𑌲𑍋 𑌰𑌹𑌸𑌿 𑌹𑌸𑍍𑌤𑍇𑌨 𑌕𑍃𑌷𑍍𑌣𑌸𑌰𑍍𑌪𑌮𑌿𑌵𑌾𑌸𑍍𑌪𑍃𑌶𑌮𑍍 ॥ 1 ॥
𑌮𑌯𑌾 𑌹𑍍𑌯𑌪𑌿𑌤𑍃𑌕𑌃 𑌪𑍁𑌤𑍍𑌰 𑌸𑍍𑌸𑌮𑌹𑌾𑌤𑍍𑌮𑌾 𑌦𑍁𑌰𑌾𑌤𑍍𑌮𑌨𑌾 ।
𑌤𑌂 𑌤𑍁 𑌮𑌾𑌂 𑌜𑍀𑌵𑌲𑍋𑌕𑍋𑌽𑌯𑌂 𑌨𑍂𑌨𑌮𑌾𑌕𑍍𑌰𑍋𑌷𑍍𑌟𑍁𑌮𑌰𑍍𑌹𑌤𑌿 ॥ 2 ॥
𑌬𑌾𑌲𑌿𑌶𑍋 𑌬𑌤 𑌕𑌾𑌮𑌾𑌤𑍍𑌮𑌾 𑌰𑌾𑌜𑌾 𑌦𑌶𑌰𑌥𑍋 𑌭𑍃𑌶𑌮𑍍 ।
𑌯𑌃 𑌸𑍍𑌤𑍍𑌰𑍀𑌕𑍃𑌤𑍇 𑌪𑍍𑌰𑌿𑌯𑌂 𑌪𑍁𑌤𑍍𑌰𑌂 𑌵𑌨𑌂 𑌪𑍍𑌰𑌸𑍍𑌥𑌾𑌪𑌯𑌿𑌷𑍍𑌯𑌤𑌿 ॥ 3 ॥
𑌵𑍍𑌰𑌤𑍈𑌶𑍍𑌚 𑌬𑍍𑌰𑌹𑍍𑌮𑌚𑌰𑍍𑌯𑍈𑌶𑍍𑌚 𑌗𑍁𑌰𑍁𑌭𑌿𑌶𑍍𑌚𑍋𑌪𑌕𑌰𑍍𑌶𑌿𑌤𑌃 ।
𑌭𑍋𑌗𑌕𑌾𑌲𑍇 𑌮𑌹𑌤𑍍𑌕𑍃𑌚𑍍𑌛𑍍𑌰𑌂 𑌪𑍁𑌨𑌰𑍇𑌵 𑌪𑍍𑌰𑌪𑌤𑍍𑌸𑍍𑌯𑌤𑍇 ॥ 4 ॥
𑌨𑌾𑌲𑌂 𑌦𑍍𑌵𑌿𑌤𑍀𑌯𑌂 𑌵𑌚𑌨𑌂 𑌪𑍁𑌤𑍍𑌰𑍋 𑌮𑌾𑌂 𑌪𑍍𑌰𑌤𑌿𑌭𑌾𑌷𑌿𑌤𑍁𑌮𑍍 ।
𑌸 𑌵𑌨𑌂 𑌪𑍍𑌰𑌵𑍍𑌰𑌜𑍇𑌤𑍍𑌯𑍁𑌕𑍍𑌤𑍋 𑌬𑌾𑌢𑌮𑌿𑌤𑍍𑌯𑍇𑌵 𑌵𑌕𑍍𑌷𑍍𑌯𑌤𑌿 ॥ 5 ॥
𑌯𑌦𑌿 𑌮𑍇 𑌰𑌾𑌘𑌵𑌃 𑌕𑍁𑌰𑍍𑌯𑌾𑌦𑍍𑌵𑌨𑌂 𑌗𑌚𑍍𑌛𑍇𑌤𑌿 𑌚𑍋𑌦𑌿𑌤𑌃 ।
𑌪𑍍𑌰𑌤𑌿𑌕𑍂𑌲𑌂 𑌪𑍍𑌰𑌿𑌯𑌂 𑌮𑍇 𑌸𑍍𑌯𑌾𑌨𑍍𑌨 𑌤𑍁 𑌵𑌤𑍍𑌸𑌃 𑌕𑌰𑌿𑌷𑍍𑌯𑌤𑌿 ॥ 6 ॥
𑌶𑍁𑌦𑍍𑌧𑌭𑌾𑌵𑍋 𑌹𑌿 𑌭𑌾𑌵𑌂 𑌮𑍇 𑌨 𑌤𑍁 𑌜𑍍𑌞𑌾𑌸𑍍𑌯𑌤𑌿 𑌰𑌾𑌘𑌵𑌃 ॥ ॥
𑌸 𑌵𑌨𑌂 𑌪𑍍𑌰𑌬𑍍𑌰𑌜𑍇 𑌤𑍍𑌯𑍁𑌕𑍍𑌤𑍋 𑌬𑌾𑌢 𑌮𑌿𑌤𑍍𑌯𑍇𑌵 𑌵𑌕𑍍𑌷𑌯𑌤𑌿 ।
𑌰𑌾𑌘𑌵𑍇 𑌹𑌿 𑌵𑌨𑌂 𑌪𑍍𑌰𑌾𑌪𑍍𑌤𑍇 𑌸𑌰𑍍𑌵𑌲𑍋𑌕𑌸𑍍𑌯 𑌧𑌿𑌕𑍍𑌕𑍃𑌤𑌮𑍍 ॥ ॥
𑌮𑍃𑌤𑍍𑌯𑍁𑌰𑌕𑍍𑌷𑌮𑌣𑍀𑌯𑌂 𑌮𑌾𑌂 𑌨𑌯𑌿𑌷𑍍𑌯𑌤𑌿 𑌯𑌮𑌕𑍍𑌷𑌯𑌮𑍍 ।
𑌮𑍃𑌤𑍇 𑌮𑌯𑌿 𑌗𑌤𑍇 𑌰𑌾𑌮𑍇 𑌵𑌨𑌂 𑌮𑌨𑍁𑌜𑌪𑍁𑌂𑌗𑌵𑍇 ॥ ॥
𑌇𑌷𑍍𑌟𑍇 𑌮𑌮 𑌜𑌨𑍇 𑌶𑍇𑌷𑍇 𑌕𑌿𑌂 𑌪𑌾𑌪𑌂 𑌪𑍍𑌰𑌤𑌿𑌪𑌤𑍍𑌸𑍍𑌯𑌸𑍇 ।
𑌕𑍌𑌶𑌲𑍍𑌯𑌾 𑌮𑌾𑌂 𑌚 𑌰𑌾𑌮𑌂 𑌚 𑌪𑍁𑌤𑍍𑌰𑍌 𑌚 𑌯𑌦𑌿 𑌹𑌾𑌸𑍍𑌯𑌤𑌿 ॥ 0 ॥
𑌦𑍁𑌃𑌖𑌾𑌨𑍍𑌯𑌸𑌹𑌤𑍀 𑌦𑍇𑌵𑍀 𑌮𑌾𑌮𑍇𑌵𑌾𑌨𑍁𑌮𑌰𑌿𑌷𑍍𑌯𑌤𑌿 ।
𑌕𑍌𑌸𑌲𑍍𑌯𑌾𑌂 𑌚 𑌸𑍁𑌮𑌿𑌤𑍍𑌰𑌾𑌂 𑌚 𑌮𑌾𑌂 𑌚 𑌪𑍁𑌤𑍍𑌰𑍈𑌸𑍍𑌤𑍍𑌰𑌿𑌭𑌿𑌸𑍍𑌸𑌹 ॥ 1 ॥
𑌪𑍍𑌰𑌕𑍍𑌷𑌿𑌪𑍍𑌯 𑌨𑌰𑌕𑍇 𑌸𑌾 𑌤𑍍𑌵𑌂 𑌕𑍈𑌕𑍇𑌯𑌿 𑌸𑍁𑌖𑌿𑌤𑌾 𑌭𑌵 ।
𑌮𑌯𑌾 𑌰𑌾𑌮𑍇𑌣 𑌚 𑌤𑍍𑌯𑌕𑍍𑌤𑌂 𑌶𑌾𑌶𑍍𑌵𑌤𑌂 𑌸𑌤𑍍𑌕𑍃𑌤𑌂 𑌗𑍁𑌣𑍈𑌃 ॥ 2 ॥
𑌇𑌕𑍍𑌷𑍍𑌵𑌾𑌕𑍁𑌕𑍁𑌲𑌮𑌕𑍍𑌷𑍋𑌭𑍍𑌯𑌮𑌾𑌕𑍁𑌲𑌂 𑌪𑌾𑌲𑌯𑌿𑌷𑍍𑌯𑌸𑌿 ।
𑌪𑍍𑌰𑌿𑌯𑌂 𑌚𑍇𑌦𑍍𑌭𑌰𑌤𑌸𑍍𑌯𑍈𑌤𑌦𑍍𑌰𑌾𑌮𑌪𑍍𑌰𑌵𑍍𑌰𑌾𑌜𑌨𑌂 𑌭𑌵𑍇𑌤𑍍 ॥ 3 ॥
𑌮𑌾 𑌸𑍍𑌮 𑌮𑍇 𑌭𑌰𑌤𑌃 𑌕𑌾𑌰𑍍𑌷𑍀𑌤𑍍𑌪𑍍𑌰𑍇𑌤𑌕𑍃𑌤𑍍𑌯𑌂 𑌗𑌤𑌾𑌯𑍁𑌷𑌃 ।
𑌹𑌂𑌤𑌾𑌨𑌾𑌰𑍍𑌯𑍇 𑌮𑌮𑌾𑌮𑌿𑌤𑍍𑌰𑍇 𑌸𑌕𑌾𑌮𑌾 𑌭𑌵 𑌕𑍈𑌕𑌯𑌿 ॥ 4 ॥
𑌮𑍃𑌤𑍇 𑌮𑌯𑌿 𑌗𑌤𑍇 𑌰𑌾𑌮𑍇 𑌵𑌨𑌂 𑌪𑍁𑌰𑍁𑌷𑌪𑍁𑌂𑌗𑌵𑍇 ।
𑌸𑍇𑌦𑌾𑌨𑍀𑌂 𑌵𑌿𑌧𑌵𑌾 𑌰𑌾𑌜𑍍𑌯𑌂 𑌸𑌪𑍁𑌤𑍍𑌰𑌾 𑌕𑌾𑌰𑌯𑌿𑌷𑍍𑌯𑌸𑌿 ॥ 5 ॥
𑌤𑍍𑌵𑌂 𑌰𑌾𑌜𑌪𑍁𑌤𑍍𑌰𑍀𑌵𑌾𑌦𑍇𑌨 𑌨𑍍𑌯𑌵𑌸𑍋 𑌮𑌮 𑌵𑍇𑌶𑍍𑌮𑌨𑌿 ।
𑌅𑌕𑍀𑌰𑍍𑌤𑌿𑌶𑍍𑌚𑌾𑌤𑍁𑌲𑌾 𑌲𑍋𑌕𑍇 𑌧𑍍𑌰𑍁𑌵𑌃 𑌪𑌰𑌿𑌭𑌵𑌶𑍍𑌚 𑌮𑍇 ॥ 6 ॥
𑌸𑌰𑍍𑌵𑌭𑍂𑌤𑍇𑌷𑍁 𑌚𑌾𑌵𑌜𑍍𑌞𑌾 𑌯𑌥𑌾 𑌪𑌾𑌪𑌕𑍃𑌤𑌸𑍍𑌤𑌥𑌾 ।
𑌕𑌥𑌂 𑌰𑌥𑍈𑌰𑍍𑌵𑌿𑌭𑍁𑌰𑍍𑌯𑌾𑌤𑍍𑌵𑌾 𑌗𑌜𑌾𑌶𑍍𑌵𑍈𑌶𑍍𑌚 𑌮𑍁𑌹𑍁𑌰𑍍𑌮𑍁𑌹𑍁𑌃 ॥ ॥
𑌪𑌦𑍍𑌭𑍍𑌯𑌾𑌂 𑌰𑌾𑌮𑍋 𑌮𑌹𑌾𑌰𑌣𑍍𑌯𑍇 𑌵𑌤𑍍𑌸𑍋 𑌮𑍇 𑌵𑌿𑌚𑌰𑌿𑌷𑍍𑌯𑌤𑌿 ।
𑌯𑌸𑍍𑌯 𑌤𑍍𑌵𑌾𑌹𑌾𑌰𑌸𑌮𑌯𑍇 𑌸𑍂𑌦𑌾𑌃 𑌕𑍁𑌂𑌡𑌲𑌧𑌾𑌰𑌿𑌣𑌃 ॥ ॥
𑌅𑌹𑌂𑌪𑍂𑌰𑍍𑌵𑌾𑌃 𑌪𑌚𑌂𑌤𑌿 𑌸𑍍𑌮 𑌪𑍍𑌰𑌶𑌸𑍍𑌤𑌂 𑌪𑌾𑌨𑌭𑍋𑌜𑌨𑌮𑍍 ।
𑌸 𑌕𑌥𑌨𑍍𑌨𑍁 𑌕𑌷𑌾𑌯𑌾𑌣𑌿 𑌤𑌿𑌕𑍍𑌤𑌾𑌨𑌿 𑌕𑌟𑍁𑌕𑌾𑌨𑌿 𑌚 ॥ ॥
𑌭𑌕𑍍𑌷𑌯𑌨𑍍𑌵𑌨𑍍𑌯𑌮𑌾𑌹𑌾𑌰𑌂 𑌸𑍁𑌤𑍋 𑌮𑍇 𑌵𑌰𑍍𑌤𑌯𑌿𑌷𑍍𑌯𑌤𑌿 ।
𑌮𑌹𑌾𑌰𑍍𑌹𑌵𑌸𑍍𑌤𑍍𑌰𑌸𑌂𑌵𑍀𑌤𑍋 𑌭𑍂𑌤𑍍𑌵𑌾 𑌚𑌿𑌰𑌸𑍁𑌖𑍋𑌷𑌿𑌤𑌃 ॥ 100 ॥
𑌕𑌾𑌷𑌾𑌯𑌪𑌰𑌿𑌧𑌾𑌨𑌸𑍍𑌤𑍁 𑌕𑌥𑌂 𑌭𑍂𑌮𑍌𑌨𑌿𑌵𑌤𑍍𑌸𑍍𑌯𑌤𑌿 ।
𑌕𑌸𑍍𑌯𑍈𑌤𑌦𑍍𑌧𑌾𑌰𑍁𑌣𑌂 𑌵𑌾𑌕𑍍𑌯𑌮𑍇𑌵𑌂𑌵𑌿𑌧𑌮𑌚𑌿𑌂𑌤𑌿𑌤𑌮𑍍 ॥ 101 ॥
𑌰𑌾𑌮𑌸𑍍𑌯𑌾𑌰𑌣𑍍𑌯𑌗𑌮𑌨𑌂 𑌭𑌰𑌤𑌸𑍍𑌯𑌾𑌭𑌿𑌷𑍇𑌚𑌨𑌮𑍍 ।
𑌧𑌿𑌗𑌸𑍍𑌤𑍁 𑌯𑍋𑌷𑌿𑌤𑍋 𑌨𑌾𑌮 𑌶𑌠𑌾 𑌸𑍍𑌸𑍍𑌵𑌾𑌰𑍍𑌥𑌪𑌰𑌾𑌸𑍍𑌸𑌦𑌾 ।
𑌨 𑌬𑍍𑌰𑌵𑍀𑌮𑌿 𑌸𑍍𑌤𑍍𑌰𑌿𑌯 𑌸𑍍𑌸𑌰𑍍𑌵𑌾 𑌭𑌰𑌤𑌸𑍍𑌯𑍈𑌵 𑌮𑌾𑌤𑌰𑌮𑍍 ॥ 102 ॥
𑌅𑌨𑌰𑍍𑌥𑌭𑌾𑌵𑍇𑌽𑌰𑍍𑌥𑌪𑌰𑍇 𑌨𑍃𑌶𑌂𑌸𑍇 𑌮𑌮𑌾𑌨𑍁𑌤𑌾𑌪𑌾𑌯 𑌨𑌿𑌵𑌿𑌷𑍍𑌟𑌭𑌾𑌵𑍇 ।
𑌕𑌿𑌮𑌪𑍍𑌰𑌿𑌯𑌂 𑌪𑌶𑍍𑌯𑌸𑌿 𑌮𑌨𑍍𑌨𑌿𑌮𑌿𑌤𑍍𑌤𑌂 𑌹𑌿𑌤𑌾𑌨𑍁𑌕𑌾𑌰𑌿𑌣𑍍𑌯𑌥𑌵𑌾𑌽𑌪𑌿 𑌰𑌾𑌮𑍇 ॥ 103 ॥
𑌪𑌰𑌿𑌤𑍍𑌯𑌜𑍇𑌯𑍁𑌃 𑌪𑌿𑌤𑌰𑍋 𑌹𑌿 𑌪𑍁𑌤𑍍𑌰𑌾𑌨𑍍𑌭𑌾𑌰𑍍𑌯𑌾𑌃 𑌪𑌤𑍀𑌂𑌶𑍍𑌚𑌾𑌪𑌿 𑌕𑍃𑌤𑌾𑌨𑍁𑌰𑌾𑌗𑌾𑌃 ।
𑌕𑍃𑌤𑍍𑌸𑍍𑌨𑌂 𑌹𑌿 𑌸𑌰𑍍𑌵𑌂 𑌕𑍁𑌪𑌿𑌤𑌂 𑌜𑌗𑌤𑍍𑌸𑍍𑌯𑌾𑌦𑍍𑌦𑍃𑌷𑍍𑌟𑍍𑌵𑍈𑌵 𑌰𑌾𑌮𑌂 𑌵𑍍𑌯𑌸𑌨𑍇 𑌨𑌿𑌮𑌗𑍍𑌨𑌮𑍍 ॥ 104 ॥
𑌅𑌹𑌂 𑌪𑍁𑌨𑌰𑍍𑌦𑍇𑌵𑌕𑍁𑌮𑌾𑌰𑌰𑍂𑌪𑌮𑌲𑌂𑌕𑍃𑌤𑌂 𑌤𑌂 𑌸𑍁𑌤𑌮𑌾𑌵𑍍𑌰𑌜𑌂𑌤𑌮𑍍 ।
𑌨𑌂𑌦𑌾𑌮𑌿 𑌪𑌶𑍍𑌯𑌨𑍍𑌨𑌪𑌿 𑌦𑌰𑍍𑌶𑌨𑍇𑌨 𑌭𑌵𑌾𑌮𑌿 𑌦𑍃𑌷𑍍𑌟𑍍𑌵𑍈𑌵 𑌚 𑌪𑍁𑌨𑌰𑍍𑌯𑍁𑌵𑍇𑌵 ॥ 105 ॥
𑌵𑌿𑌨𑌾𑌽𑌪𑌿 𑌸𑍂𑌰𑍍𑌯𑍇𑌣 𑌭𑌵𑍇𑌤𑍍𑌪𑍍𑌰𑌵𑍃𑌤𑍍𑌤𑌿𑌰𑌵𑌰𑍍𑌷𑌤𑌾 𑌵𑌜𑍍𑌰𑌧𑌰𑍇𑌣 𑌵𑌾𑌽𑌪𑌿 ।
𑌰𑌾𑌮𑌂 𑌤𑍁 𑌗𑌚𑍍𑌛𑌂𑌤𑌮𑌿𑌤 𑌸𑍍𑌸𑌮𑍀𑌕𑍍𑌷𑍍𑌯 𑌜𑍀𑌵𑍇𑌨𑍍𑌨 𑌕𑌶𑍍𑌚𑌿𑌤𑍍𑌤𑍍𑌵𑌿𑌤𑌿 𑌚𑍇𑌤𑌨𑌾 𑌮𑍇 ॥ 106 ॥
𑌵𑌿𑌨𑌾𑌶𑌕𑌾𑌮𑌾𑌮𑌹𑌿𑌤𑌾𑌮𑌮𑌿𑌤𑍍𑌰𑌾𑌮𑌾𑌵𑌾𑌸𑌯𑌂 𑌮𑍃𑌤𑍍𑌯𑍁𑌮𑌿𑌵𑌾𑌤𑍍𑌮𑌨𑌸𑍍𑌤𑍍𑌵𑌾𑌮𑍍 ।
𑌚𑌿𑌰𑌂 𑌬𑌤𑌾𑌂𑌕𑍇𑌨 𑌧𑍃𑌤𑌾𑌸𑌿 𑌸𑌰𑍍𑌪𑍀 𑌮𑌹𑌾𑌵𑌿𑌷𑌾 𑌤𑍇𑌨 𑌹𑌤𑍋𑌽𑌸𑍍𑌮𑌿 𑌮𑍋𑌹𑌾𑌤𑍍 ॥ 10 ॥
𑌮𑌯𑌾 𑌚 𑌰𑌾𑌮𑍇𑌣 𑌚 𑌲𑌕𑍍𑌷𑍍𑌮𑌣𑍇𑌨 𑌪𑍍𑌰𑌶𑌾𑌸𑍍𑌤𑍁 𑌹𑍀𑌨𑍋 𑌭𑌰𑌤𑌸𑍍𑌤𑍍𑌵𑌯𑌾 𑌸𑌹 ।
𑌪𑍁𑌰𑌂 𑌚 𑌰𑌾𑌷𑍍𑌟𑍍𑌰𑌂 𑌚 𑌨𑌿𑌹𑌤𑍍𑌯 𑌬𑌾𑌂𑌧𑌵𑌾𑌨𑍍 𑌮𑌮𑌾𑌹𑌿𑌤𑌾𑌨𑌾𑌂 𑌚 𑌭𑌵𑌾𑌭𑌿𑌹𑌰𑍍𑌷𑌿𑌣𑍀 ॥ 10 ॥
𑌨𑍃𑌶𑌂𑌸𑌵𑍃𑌤𑍍𑌤𑍇 𑌵𑍍𑌯𑌸𑌨𑌪𑍍𑌰𑌹𑌾𑌰𑌿𑌣𑌿 𑌪𑍍𑌰𑌸𑌹𑍍𑌯 𑌵𑌾𑌕𑍍𑌯𑌂 𑌯𑌦𑌿𑌹𑌾𑌦𑍍𑌯 𑌭𑌾𑌷𑌸𑍇 ।
𑌨 𑌨𑌾𑌮 𑌤𑍇 𑌕𑍇𑌨 𑌮𑍁𑌖𑌾𑌤𑍍𑌪𑌤𑌂𑌤𑍍𑌯𑌧𑍋 𑌵𑌿𑌶𑍀𑌰𑍍𑌯𑌮𑌾𑌣𑌾 𑌦𑌶𑌨𑌾 𑌸𑍍𑌸𑌹𑌸𑍍𑌰𑌧𑌾 ॥ 10 ॥
𑌨 𑌕𑌿𑌂𑌚𑌿𑌦𑌾𑌹𑌾𑌹𑌿𑌤𑌮𑌪𑍍𑌰𑌿𑌯𑌂 𑌵𑌚𑍋 𑌨 𑌵𑍇𑌤𑍍𑌤𑌿 𑌰𑌾𑌮𑌃 𑌪𑌰𑍁𑌷𑌾𑌣𑌿 𑌭𑌾𑌷𑌿𑌤𑍁𑌮𑍍 ।
𑌕𑌥𑌨𑍍𑌨𑍁 𑌰𑌾𑌮𑍇 𑌹𑍍𑌯𑌭𑌿𑌰𑌾𑌮𑌵𑌾𑌦𑌿𑌨𑌿 𑌬𑍍𑌰𑌵𑍀𑌷𑌿 𑌦𑍋𑌷𑌾𑌨𑍍𑌗𑍁𑌣𑌨𑌿𑌤𑍍𑌯𑌸𑌮𑍍𑌮𑌤𑍇 ॥ 110 ॥
𑌪𑍍𑌰𑌤𑌾𑌮𑍍𑌯 𑌵𑌾 𑌪𑍍𑌰𑌜𑍍𑌵𑌲 𑌵𑌾 𑌪𑍍𑌰𑌣𑌶𑍍𑌯 𑌵𑌾 𑌸𑌹𑌸𑍍𑌰𑌶𑍋 𑌵𑌾 𑌸𑍍𑌫𑍁𑌟𑌿𑌤𑌾 𑌮𑌹𑍀𑌂 𑌵𑍍𑌰𑌜 ।
𑌨 𑌤𑍇 𑌕𑌰𑌿𑌷𑍍𑌯𑌾𑌮𑌿 𑌵𑌚 𑌸𑍍𑌸𑍁𑌦𑌾𑌰𑍁𑌣𑌂 𑌮𑌮𑌾𑌹𑌿𑌤𑌂 𑌕𑍇𑌕𑌯𑌰𑌾𑌜𑌪𑌾𑌂𑌸𑌨𑌿 ॥ 111 ॥
𑌕𑍍𑌷𑍁𑌰𑍋𑌪𑌮𑌾𑌂 𑌨𑌿𑌤𑍍𑌯𑌮𑌸𑌤𑍍𑌪𑍍𑌰𑌿𑌯𑌂𑌵𑌦𑌾𑌂 𑌪𑍍𑌰𑌦𑍁𑌷𑍍𑌟𑌭𑌾𑌵𑌾𑌂 𑌸𑍍𑌵𑌕𑍁𑌲𑍋𑌪𑌘𑌾𑌤𑌿𑌨𑍀𑌮𑍍 ।
𑌨 𑌜𑍀𑌵𑌿𑌤𑍁𑌂 𑌤𑍍𑌵𑌾𑌂 𑌵𑌿𑌷𑌹𑍇𑌽𑌮𑌨𑍋𑌰𑌮𑌾𑌂 𑌦𑌿𑌧𑌕𑍍𑌷𑌮𑌾𑌣𑌾𑌂 𑌹𑍃𑌦𑌯𑌂 𑌸𑌬𑌂𑌧𑌨𑌮𑍍 ।
2.12,112 ।
𑌨 𑌜𑍀𑌵𑌿𑌤𑌂 𑌮𑍇𑌽𑌸𑍍𑌤𑌿 𑌪𑍁𑌨𑌃𑌕𑍁𑌤 𑌸𑍍𑌸𑍁𑌖𑌂 𑌵𑌿𑌨𑌾𑌽𑌽𑌤𑍍𑌮𑌜𑍇𑌨𑌾𑌽𑌤𑍍𑌮𑌵𑌤𑌃 𑌕𑍁𑌤𑍋 𑌰𑌤𑌿𑌃 ।
𑌮𑌮𑌾𑌹𑌿𑌤𑌂 𑌦𑍇𑌵𑌿 𑌨 𑌕𑌰𑍍𑌤𑍁𑌮𑌰𑍍𑌹𑌸𑌿 𑌸𑍍𑌪𑍃𑌶𑌾𑌮𑌿 𑌪𑌾𑌦𑌾𑌵𑌪𑌿 𑌤𑍇 𑌪𑍍𑌰𑌸𑍀𑌦 𑌮𑍇 ॥ 112 ॥
𑌸 𑌭𑍂𑌮𑌿𑌪𑌾𑌲𑍋 𑌵𑌿𑌲𑌪𑌨𑍍𑌨𑌨𑌾𑌥𑌵𑌤𑍍𑌸𑍍𑌤𑍍𑌰𑌿𑌯𑌾 𑌗𑍃𑌹𑍀𑌤𑍋 𑌹𑍃𑌦𑌯𑍇𑌽𑌤𑌿𑌮𑌾𑌤𑍍𑌰𑌯𑌾 ।
𑌪𑌪𑌾𑌤 𑌦𑍇𑌵𑍍𑌯𑌾𑌶𑍍𑌚𑌰𑌣𑍌 𑌪𑍍𑌰𑌸𑌾𑌰𑌿𑌤𑌾𑌵𑍁𑌭𑌾𑌵𑌸𑌮𑍍𑌸𑍍𑌪𑍃𑌶𑍍𑌯 𑌯𑌥𑌾𑌽𑌤𑍁𑌰𑌸𑍍𑌤𑌥𑌾 ॥ 113 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌦𑍍𑌵𑌾𑌦𑌶𑌸𑍍𑌸𑌰𑍍𑌗𑌃 ॥
