𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌾𑌂 𑌕𑌥𑌾𑌂 𑌕𑍌𑌶𑌿𑌕𑍋 𑌰𑌾𑌮𑍇 𑌨𑌿𑌵𑍇𑌦𑍍𑌯 𑌕𑍁𑌶𑌿𑌕𑌾𑌤𑍍𑌮𑌜𑌃 ।
𑌪𑍁𑌨𑌰𑍇𑌵𑌾𑌪𑌰𑌂 𑌵𑌾𑌕𑍍𑌯𑌂 𑌕𑌾𑌕𑍁𑌤𑍍𑌸𑍍𑌥 𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 1 ॥
𑌅𑌯𑍋𑌧𑍍𑌯𑌾𑌧𑌿𑌪𑌤𑌿 𑌶𑍍𑌶𑍂𑌰𑌃 𑌪𑍂𑌰𑍍𑌵𑌮𑌾𑌸𑍀𑌨𑍍𑌨𑌰𑌾𑌧𑌿𑌪𑌃 ।
𑌸𑌗𑌰𑍋 𑌨𑌾𑌮 𑌧𑌰𑍍𑌮𑌾𑌤𑍍𑌮𑌾 𑌪𑍍𑌰𑌜𑌾𑌕𑌾𑌮𑌸𑍍𑌸 𑌚𑌾𑌪𑍍𑌰𑌜𑌃 ॥ 2 ॥
𑌵𑍈𑌦𑌰𑍍𑌭𑌦𑍁𑌹𑌿𑌤𑌾 𑌰𑌾𑌮 𑌕𑍇𑌶𑌿𑌨𑍀 𑌨𑌾𑌮 𑌨𑌾𑌮𑌤𑌃 ।
𑌜𑍍𑌯𑍇𑌷𑍍𑌠𑌾 𑌸𑌗𑌰𑌪𑌤𑍍𑌨𑍀 𑌸𑌾 𑌧𑌰𑍍𑌮𑌿𑌷𑍍𑌠𑌾 𑌸𑌤𑍍𑌯𑌵𑌾𑌦𑌿𑌨𑍀 ॥ 3 ॥
𑌅𑌰𑌿𑌷𑍍𑌟𑌨𑍇𑌮𑍇𑌰𑍍𑌦𑍁𑌹𑌿𑌤𑌾 𑌰𑍂𑌪𑍇𑌣𑌾𑌪𑍍𑌰𑌤𑌿𑌮𑌾 𑌭𑍁𑌵𑌿 ।
𑌦𑍍𑌵𑌿𑌤𑍀𑌯𑌾 𑌸𑌗𑌰𑌸𑍍𑌯𑌾𑌸𑍀𑌤𑍍𑌪𑌤𑍍𑌨𑍀 𑌸𑍁𑌮𑌤𑌿𑌸𑌂𑌜𑍍𑌞𑌿𑌤𑌾 ॥ 4 ॥
𑌤𑌾𑌭𑍍𑌯𑌾𑌂 𑌸𑌹 𑌮𑌹𑌾𑌰𑌾𑌜𑌃 𑌪𑌤𑍍𑌨𑍀𑌭𑍍𑌯𑌾𑌂 𑌤𑌪𑍍𑌤𑌵𑌾𑌂𑌸𑍍𑌤𑌪𑌃 ।
𑌹𑌿𑌮𑌵𑌂𑌤𑌂 𑌸𑌮𑌾𑌸𑌾𑌦𑍍𑌯 𑌭𑍃𑌗𑍁𑌪𑍍𑌰𑌸𑍍𑌰𑌵𑌣𑍇 𑌗𑌿𑌰𑍌 ॥ 5 ॥
𑌅𑌥 𑌵𑌰𑍍𑌷𑌶𑌤𑍇 𑌪𑍂𑌰𑍍𑌣𑍇 𑌤𑌪𑌸𑌾𑌽𑌰𑌾𑌧𑌿𑌤𑍋 𑌮𑍁𑌨𑌿𑌃 ।
𑌸𑌗𑌰𑌾𑌯 𑌵𑌰𑌂 𑌪𑍍𑌰𑌾𑌦𑌾𑌦𑍍𑌭𑍃𑌗𑍁𑌸𑍍𑌸𑌤𑍍𑌯𑌵𑌤𑌾𑌂 𑌵𑌰𑌃 ॥ 6 ॥
𑌅𑌪𑌤𑍍𑌯𑌲𑌾𑌭𑌸𑍍𑌸𑍁𑌮𑌹𑌾𑌨𑍍 𑌭𑌵𑌿𑌷𑍍𑌯𑌤𑌿 𑌤𑌵𑌾𑌨𑌘 ।
𑌕𑍀𑌰𑍍𑌤𑌿𑌂 𑌚𑌾𑌪𑍍𑌰𑌤𑌿𑌮𑌾𑌂 𑌲𑍋𑌕𑍇 𑌪𑍍𑌰𑌾𑌪𑍍𑌸𑍍𑌯𑌸𑍇 𑌪𑍁𑌰𑍁𑌷𑌰𑍍𑌷𑌭 ॥ ॥
𑌏𑌕𑌾 𑌜𑌨𑌯𑌿𑌤𑌾 𑌤𑌾𑌤 𑌪𑍁𑌤𑍍𑌰𑌂 𑌵𑌂𑌶𑌕𑌰𑌂 𑌤𑌵 ।
𑌷𑌷𑍍𑌠𑌿𑌂 𑌪𑍁𑌤𑍍𑌰𑌸𑌹𑌸𑍍𑌰𑌾𑌣𑌿 𑌅𑌪𑌰𑌾 𑌜𑌨𑌯𑌿𑌷𑍍𑌯𑌤𑌿 ॥ ॥
𑌭𑌾𑌷𑌮𑌾𑌣𑌂 𑌮𑌹𑌾𑌤𑍍𑌮𑌾𑌨𑌂 𑌰𑌾𑌜𑌪𑍁𑌤𑍍𑌰𑍍𑌯𑍌 𑌪𑍍𑌰𑌸𑌾𑌦𑍍𑌯 𑌤𑌮𑍍 ।
𑌊𑌚𑌤𑍁𑌃 𑌪𑌰𑌮𑌪𑍍𑌰𑍀𑌤𑍇 𑌕𑍃𑌤𑌾𑌂𑌜𑌲𑌿𑌪𑍁𑌟𑍇 𑌤𑌦𑌾 ॥ ॥
𑌏𑌕𑌃 𑌕𑌸𑍍𑌯𑌾𑌸𑍍𑌸𑍁𑌤𑍋 𑌬𑍍𑌰𑌹𑍍𑌮𑌨𑍍 𑌕𑌾 𑌬𑌹𑍂𑌨𑍍 𑌜𑌨𑌯𑌿𑌷𑍍𑌯𑌤𑌿 ।
𑌶𑍍𑌰𑍋𑌤𑍁𑌮𑌿𑌚𑍍𑌛𑌾𑌵𑌹𑍇 𑌬𑍍𑌰𑌹𑍍𑌮𑌨𑍍 𑌸𑌤𑍍𑌯𑌮𑌸𑍍𑌤𑍁 𑌵𑌚𑌸𑍍𑌤𑌵 ॥ 10 ॥
𑌤𑌯𑍋𑌸𑍍𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌭𑍃𑌗𑍁𑌃 𑌪𑌰𑌮𑌧𑌾𑌰𑍍𑌮𑌿𑌕𑌃 ।
𑌉𑌵𑌾𑌚 𑌪𑌰𑌮𑌾𑌂 𑌵𑌾𑌣𑍀𑌂 𑌸𑍍𑌵𑌚𑍍𑌛𑌂𑌦𑍋𑌽𑌤𑍍𑌰 𑌵𑌿𑌧𑍀𑌯𑌤𑌾𑌮𑍍 ॥ 11 ॥
𑌏𑌕𑍋 𑌵𑌂𑌶𑌕𑌰𑍋 𑌵𑌾𑌽𑌸𑍍𑌤𑍁 𑌬𑌹𑌵𑍋 𑌵𑌾 𑌮𑌹𑌾𑌬𑌲𑌾𑌃 ।
𑌕𑍀𑌰𑍍𑌤𑌿𑌮𑌂𑌤𑍋 𑌮𑌹𑍋𑌤𑍍𑌸𑌾𑌹𑌾𑌃 𑌕𑌾 𑌵𑌾 𑌕𑌂 𑌵𑌰𑌮𑌿𑌚𑍍𑌛𑌤𑌿 ॥ 12 ॥
𑌮𑍁𑌨𑍇𑌸𑍍𑌤𑍁 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌕𑍇𑌶𑌿𑌨𑍀 𑌰𑌘𑍁𑌨𑌂𑌦𑌨 ।
𑌪𑍁𑌤𑍍𑌰𑌂 𑌵𑌂𑌶𑌕𑌰𑌂 𑌰𑌾𑌮 𑌜𑌗𑍍𑌰𑌾𑌹 𑌨𑍃𑌪𑌸𑌨𑍍𑌨𑌿𑌧𑍌 ॥ 13 ॥
𑌷𑌷𑍍𑌠𑌿𑌂 𑌪𑍁𑌤𑍍𑌰𑌸𑌹𑌸𑍍𑌰𑌾𑌣𑌿 𑌸𑍁𑌪𑌰𑍍𑌣𑌭𑌗𑌿𑌨𑍀 𑌤𑌦𑌾 ।
𑌮𑌹𑍋𑌤𑍍𑌸𑌾𑌹𑌾𑌨𑍍 𑌕𑍀𑌰𑍍𑌤𑌿𑌮𑌤𑍋 𑌜𑌗𑍍𑌰𑌾𑌹 𑌸𑍁𑌮𑌤𑌿𑌃 𑌸𑍁𑌤𑌾𑌨𑍍 ॥ 14 ॥
𑌪𑍍𑌰𑌦𑌕𑍍𑌷𑌿𑌣𑌮𑍃𑌷𑌿𑌂 𑌕𑍃𑌤𑍍𑌵𑌾 𑌶𑌿𑌰𑌸𑌾𑌽𑌭𑌿𑌪𑍍𑌰𑌣𑌮𑍍𑌯 𑌚 ।
𑌜𑌗𑌾𑌮 𑌸𑍍𑌵𑌪𑍁𑌰𑌂 𑌰𑌾𑌜𑌾 𑌸𑌭𑌾𑌰𑍍𑌯𑍋 𑌰𑌘𑍁𑌨𑌂𑌦𑌨 ॥ 15 ॥
𑌅𑌥 𑌕𑌾𑌲𑍇 𑌗𑌤𑍇 𑌤𑌸𑍍𑌮𑌿𑌨𑍍 𑌜𑍍𑌯𑍇𑌷𑍍𑌠𑌾 𑌪𑍁𑌤𑍍𑌰𑌂 𑌵𑍍𑌯𑌜𑌾𑌯𑌤 ।
𑌅𑌸𑌮𑌂𑌜 𑌇𑌤𑌿 𑌖𑍍𑌯𑌾𑌤𑌂 𑌕𑍇𑌶𑌿𑌨𑍀 𑌸𑌗𑌰𑌾𑌤𑍍𑌮𑌜𑌮𑍍 ॥ 16 ॥
𑌸𑍁𑌮𑌤𑌿𑌸𑍍𑌤𑍁 𑌨𑌰𑌵𑍍𑌯𑌾𑌘𑍍𑌰 𑌗𑌰𑍍𑌭𑌤𑍁𑌂𑌬𑌂 𑌵𑍍𑌯𑌜𑌾𑌯𑌤 ।
𑌷𑌷𑍍𑌠𑌿𑌃 𑌪𑍁𑌤𑍍𑌰𑌸𑌹𑌸𑍍𑌰𑌾𑌣𑌿 𑌤𑍁𑌂𑌬𑌭𑍇𑌦𑌾𑌦𑍍𑌵𑌿𑌨𑌿𑌃𑌸𑍃𑌤𑌾𑌃 ॥ 1 ॥
𑌘𑍃𑌤𑌪𑍂𑌰𑍍𑌣𑍇𑌷𑍁 𑌕𑍁𑌂𑌭𑍇𑌷𑍁 𑌧𑌾𑌤𑍍𑌰𑍍𑌯𑌸𑍍𑌤𑌾𑌨𑍍 𑌸𑌮𑌵𑌰𑍍𑌧𑌯𑌨𑍍 ।
𑌕𑌾𑌲𑍇𑌨 𑌮𑌹𑌤𑌾 𑌸𑌰𑍍𑌵𑍇 𑌯𑍌𑌵𑌨𑌂 𑌪𑍍𑌰𑌤𑌿𑌪𑍇𑌦𑌿𑌰𑍇 ॥ 1 ॥
𑌅𑌥 𑌦𑍀𑌰𑍍𑌘𑍇𑌣 𑌕𑌾𑌲𑍇𑌨 𑌰𑍂𑌪𑌯𑍌𑌵𑌨𑌶𑌾𑌲𑌿𑌨𑌃 ।
𑌷𑌷𑍍𑌟𑌿𑌃 𑌪𑍁𑌤𑍍𑌰𑌸𑌹𑌸𑍍𑌰𑌾𑌣𑌿 𑌸𑌗𑌰𑌸𑍍𑌯𑌾𑌭𑌵𑌂𑌸𑍍𑌤𑌦𑌾 ॥ 1 ॥
𑌸 𑌚 𑌜𑍍𑌯𑍇𑌷𑍍𑌠𑍋 𑌨𑌰𑌶𑍍𑌰𑍇𑌷𑍍𑌠 𑌸𑌗𑌰𑌸𑍍𑌯𑌾𑌤𑍍𑌮𑌸𑌂𑌭𑌵𑌃 ।
𑌬𑌾𑌲𑌾𑌨𑍍 𑌗𑍃𑌹𑍀𑌤𑍍𑌵𑌾 𑌤𑍁 𑌜𑌲𑍇 𑌸𑌰𑌯𑍍𑌵𑌾 𑌰𑌘𑍁𑌨𑌂𑌦𑌨 ॥ 20 ॥
𑌪𑍍𑌰𑌕𑍍𑌷𑌿𑌪𑍍𑌯 𑌪𑍍𑌰𑌹𑌸𑌨𑍍𑌨𑌿𑌤𑍍𑌯𑌂 𑌮𑌜𑍍𑌜𑌤𑌸𑍍𑌤𑌾𑌨𑍍 𑌸𑌮𑍀𑌕𑍍𑌷𑍍𑌯 𑌵𑍈 ।
𑌏𑌵𑌂 𑌪𑌾𑌪𑌸𑌮𑌾𑌚𑌾𑌰𑌸𑍍𑌸𑌜𑍍𑌜𑌨𑌪𑍍𑌰𑌤𑌿𑌬𑌾𑌧𑌕𑌃 ॥ 21 ॥
𑌪𑍌𑌰𑌾𑌣𑌾𑌮𑌹𑌿𑌤𑍇 𑌯𑍁𑌕𑍍𑌤𑌃 𑌪𑍁𑌤𑍍𑌰𑍋 𑌨𑌿𑌰𑍍𑌵𑌾𑌸𑌿𑌤𑌃 𑌪𑍁𑌰𑌾𑌤𑍍 ।
𑌤𑌸𑍍𑌯 𑌪𑍁𑌤𑍍𑌰𑍋𑌂𑌽𑌶𑍁𑌮𑌾𑌨𑍍𑌨𑌾𑌮 𑌅𑌸𑌮𑌂𑌜𑌸𑍍𑌯 𑌵𑍀𑌰𑍍𑌯𑌵𑌾𑌨𑍍 ॥ 22 ॥
𑌸𑌮𑍍𑌮𑌤 𑌸𑍍𑌸𑌰𑍍𑌵𑌲𑍋𑌕𑌸𑍍𑌯 𑌸𑌰𑍍𑌵𑌸𑍍𑌯𑌾𑌪𑌿 𑌪𑍍𑌰𑌿𑌯𑌂𑌵𑌦𑌃 ।
𑌤𑌤𑌃 𑌕𑌾𑌲𑍇𑌨 𑌮𑌹𑌤𑌾 𑌮𑌤𑌿𑌸𑍍𑌸𑌮𑌭𑌿𑌜𑌾𑌯𑌤 ॥ 23 ॥
𑌸𑌗𑌰𑌸𑍍𑌯 𑌨𑌰𑌶𑍍𑌰𑍇𑌷𑍍𑌠 𑌯𑌜𑍇𑌯𑌮𑌿𑌤𑌿 𑌨𑌿𑌶𑍍𑌚𑌿𑌤𑌾 ।
𑌸 𑌕𑍃𑌤𑍍𑌵𑌾 𑌨𑌿𑌶𑍍𑌚𑌯𑌂 𑌰𑌾𑌮 𑌸𑍋𑌪𑌾𑌧𑍍𑌯𑌾𑌯𑌗𑌣𑌸𑍍𑌤𑌦𑌾 ॥ 24 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌅𑌷𑍍𑌟𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
