𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌪𑍃𑌷𑍍𑌟𑍍𑌵𑌾 𑌤𑍁 𑌕𑍁𑌶𑌲𑌂 𑌤𑌤𑍍𑌰 𑌪𑌰𑌸𑍍𑌪𑌰𑌸𑌮𑌾𑌗𑌮𑍇 ।
𑌕𑌥𑌾𑌂𑌤𑍇 𑌸𑍁𑌮𑌤𑌿𑌰𑍍𑌵𑌾𑌕𑍍𑌯𑌂 𑌵𑍍𑌯𑌾𑌜𑌹𑌾𑌰 𑌮𑌹𑌾𑌮𑍁𑌨𑌿𑌮𑍍 ॥ 1 ॥
𑌇𑌮𑍌 𑌕𑍁𑌮𑌾𑌰𑍌 𑌭𑌦𑍍𑌰𑌂 𑌤𑍇 𑌦𑍇𑌵𑌤𑍁𑌲𑍍𑌯𑌪𑌰𑌾𑌕𑍍𑌰𑌮𑍌 ।
𑌗𑌜𑌸𑌿𑌂𑌹𑌗𑌤𑍀 𑌵𑍀𑌰𑍌 𑌶𑌾𑌰𑍍𑌦𑍂𑌲𑌵𑍃𑌷𑌭𑍋𑌪𑌮𑍌 ॥ 2 ॥
𑌪𑌦𑍍𑌮𑌪𑌤𑍍𑌰𑌵𑌿𑌶𑌾𑌲𑌾𑌕𑍍𑌷𑍌 𑌖𑌡𑍍𑌗𑌤𑍂𑌣𑍀 𑌧𑌨𑍁𑌰𑍍𑌧𑌰𑍌 ।
𑌅𑌶𑍍𑌵𑌿𑌨𑌾𑌵𑌿𑌵 𑌰𑍂𑌪𑍇𑌣 𑌸𑌮𑍁𑌪𑌸𑍍𑌥𑌿𑌤𑌯𑍌𑌵𑌨𑍌 ॥ 3 ॥
𑌯𑌦𑍃𑌚𑍍𑌛𑌯𑍈𑌵 𑌗𑌾𑌂 𑌪𑍍𑌰𑌾𑌪𑍍𑌤𑍌 𑌦𑍇𑌵𑌲𑍋𑌕𑌾𑌦𑌿𑌵𑌾𑌮𑌰𑍌 ।
𑌕𑌥𑌂 𑌪𑌦𑍍𑌭𑍍𑌯𑌾𑌮𑌿𑌹 𑌪𑍍𑌰𑌾𑌪𑍍𑌤𑍌 𑌕𑌿𑌮𑌰𑍍𑌥𑌂 𑌕𑌸𑍍𑌯 𑌵𑌾 𑌮𑍁𑌨𑍇 ॥ 4 ॥
𑌭𑍂𑌷𑌯𑌂𑌤𑌾𑌵𑌿𑌮𑌂 𑌦𑍇𑌶𑌂 𑌚𑌂𑌦𑍍𑌰𑌸𑍂𑌰𑍍𑌯𑌾𑌵𑌿𑌵𑌾𑌂𑌬𑌰𑌮𑍍 ।
𑌪𑌰𑌸𑍍𑌪𑌰𑌸𑍍𑌯 𑌸𑌦𑍃𑌶𑍌 𑌪𑍍𑌰𑌮𑌾𑌣𑍇𑌂𑌗𑌿𑌤𑌚𑍇𑌷𑍍𑌟𑌿𑌤𑍈𑌃 ॥ 5 ॥
𑌕𑌿𑌮𑌰𑍍𑌥𑌂 𑌚 𑌮𑍁𑌨𑌿𑌶𑍍𑌰𑍇𑌷𑍍𑌠 𑌸𑌂𑌪𑍍𑌰𑌾𑌪𑍍𑌤𑍌 𑌦𑍁𑌰𑍍𑌗𑌮𑍇 𑌪𑌥𑌿 ।
𑌵𑌰𑌾𑌯𑍁𑌧𑌧𑌰𑍌 𑌵𑍀𑌰𑍌 𑌶𑍍𑌰𑍋𑌤𑍁𑌮𑌿𑌚𑍍𑌛𑌾𑌮𑌿 𑌤𑌤𑍍𑌤𑍍𑌵𑌤𑌃 ॥ 6 ॥
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌯𑌥𑌾𑌵𑍃𑌤𑍍𑌤𑌂 𑌨𑍍𑌯𑌵𑍇𑌦𑌯𑌤𑍍 ।
𑌸𑌿𑌦𑍍𑌧𑌾𑌶𑍍𑌰𑌮𑌨𑌿𑌵𑌾𑌸𑌂 𑌚 𑌰𑌾𑌕𑍍𑌷𑌸𑌾𑌨𑌾𑌂 𑌵𑌧𑌂 𑌤𑌥𑌾 ॥ ॥
𑌵𑌿𑌶𑍍𑌵𑌾𑌮𑌿𑌤𑍍𑌰𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌰𑌾𑌜𑌾 𑌪𑌰𑌮𑌹𑌰𑍍𑌷𑌿𑌤𑌃 ।
𑌅𑌤𑌿𑌥𑍀 𑌪𑌰𑌮𑍌 𑌪𑍍𑌰𑌾𑌪𑍍𑌤𑍌 𑌪𑍁𑌤𑍍𑌰𑍌 𑌦𑌶𑌰𑌥𑌸𑍍𑌯 𑌤𑍌 ॥ ॥
𑌪𑍂𑌜𑌯𑌾𑌮𑌾𑌸 𑌵𑌿𑌧𑌿𑌵𑌤𑍍𑌸𑌤𑍍𑌕𑌾𑌰𑌾𑌰𑍍𑌹𑍌 𑌮𑌹𑌾𑌬𑌲𑍌 ।
𑌤𑌤𑌃 𑌪𑌰𑌮𑌸𑌤𑍍𑌕𑌾𑌰𑌂 𑌸𑍁𑌮𑌤𑍇𑌃 𑌪𑍍𑌰𑌾𑌪𑍍𑌯 𑌰𑌾𑌘𑌵𑍌 ॥ ॥
𑌉𑌷𑍍𑌯 𑌤𑌤𑍍𑌰 𑌨𑌿𑌶𑌾𑌮𑍇𑌕𑌾𑌂 𑌜𑌗𑍍𑌮𑌤𑍁𑌰𑍍𑌮𑌿𑌥𑌿𑌲𑌾𑌂 𑌤𑌤𑌃 ।
𑌤𑌾𑌨𑍍 𑌦𑍃𑌷𑍍𑌟𑍍𑌵𑌾 𑌮𑍁𑌨𑌯𑌸𑍍𑌸𑌰𑍍𑌵𑍇 𑌜𑌨𑌕𑌸𑍍𑌯 𑌪𑍁𑌰𑍀𑌂 𑌶𑍁𑌭𑌾𑌮𑍍 ॥ 10 ॥
𑌸𑌾𑌧𑍁 𑌸𑌾𑌧𑍍𑌵𑌿𑌤𑌿 𑌶𑌂𑌸𑌂𑌤𑍋 𑌮𑌿𑌥𑌿𑌲𑌾𑌂 𑌸𑌮𑌪𑍂𑌜𑌯𑌨𑍍 ।
𑌮𑌿𑌥𑌿𑌲𑍋𑌪𑌵𑌨𑍇 𑌶𑍂𑌨𑍍𑌯𑌮𑌾𑌶𑍍𑌰𑌮𑌂 𑌦𑍃𑌶𑍍𑌯 𑌰𑌾𑌘𑌵𑌃 ॥ 11 ॥
𑌪𑍁𑌰𑌾𑌣𑌂 𑌨𑌿𑌰𑍍𑌜𑌨𑌂 𑌰𑌮𑍍𑌯𑌂 𑌪𑌪𑍍𑌰𑌚𑍍𑌛 𑌮𑍁𑌨𑌿𑌪𑍁𑌂𑌗𑌵𑌮𑍍 ।
𑌶𑍍𑌰𑍀𑌮𑌦𑌾𑌶𑍍𑌰𑌮𑌸𑌂𑌕𑌾𑌶𑌂 𑌕𑌿𑌨𑍍𑌨𑍍𑌵𑌿𑌦𑌂 𑌮𑍁𑌨𑌿𑌵𑌰𑍍𑌜𑌿𑌤𑌮𑍍 ॥ 12 ॥
𑌜𑍍𑌞𑌾𑌤𑍁𑌮𑌿𑌚𑍍𑌛𑌾𑌮𑌿 𑌭𑌗𑌵𑌨𑍍 𑌕𑌸𑍍𑌯𑌾𑌯𑌂 𑌪𑍂𑌰𑍍𑌵𑌮𑌾𑌶𑍍𑌰𑌮𑌃 ।
𑌤𑌚𑍍𑌛𑍍𑌰𑍁𑌤𑍍𑌵𑌾 𑌰𑌾𑌘𑌵𑍇𑌣𑍋𑌕𑍍𑌤𑌂 𑌵𑌾𑌕𑍍𑌯𑌂 𑌵𑌾𑌕𑍍𑌯𑌵𑌿𑌶𑌾𑌰𑌦𑌃 ॥ 13 ॥
𑌪𑍍𑌰𑌤𑍍𑌯𑍁𑌵𑌾𑌚 𑌮𑌹𑌾𑌤𑍇𑌜𑌾 𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌮𑍁𑌨𑌿𑌃 ।
𑌹𑌂𑌤 𑌤𑍇 𑌕𑌥𑌯𑌿𑌷𑍍𑌯𑌾𑌮𑌿 𑌶𑍍𑌰𑍁𑌣𑍁 𑌤𑌤𑍍𑌤𑍍𑌵𑍇𑌨 𑌰𑌾𑌘𑌵 ॥ 14 ॥
𑌯𑌸𑍍𑌯𑍇𑌦𑌮𑌾𑌶𑍍𑌰𑌮𑌪𑌦𑌂 𑌶𑌪𑍍𑌤𑌂 𑌕𑍋𑌪𑌾𑌨𑍍𑌮𑌹𑌾𑌤𑍍𑌮𑌨𑌾 ।
𑌗𑍌𑌤𑌮𑌸𑍍𑌯 𑌨𑌰𑌶𑍍𑌰𑍇𑌷𑍍𑌠 𑌪𑍂𑌰𑍍𑌵𑌮𑌾𑌸𑍀𑌨𑍍𑌮𑌹𑌾𑌤𑍍𑌮𑌨𑌃 ॥ 15 ॥
𑌆𑌶𑍍𑌰𑌮𑍋 𑌦𑌿𑌵𑍍𑌯𑌸𑌂𑌕𑌾𑌶𑌸𑍍𑌸𑍁𑌰𑍈𑌰𑌪𑌿 𑌸𑍁𑌪𑍂𑌜𑌿𑌤𑌃 ।
𑌸 𑌚𑍇𑌹 𑌤𑌪 𑌆𑌤𑌿𑌷𑍍𑌠𑌦𑌹𑌲𑍍𑌯𑌾𑌸𑌹𑌿𑌤𑌃 𑌪𑍁𑌰𑌾 ॥ 16 ॥
𑌵𑌰𑍍𑌷𑌪𑍂𑌗𑌾𑌨𑌨𑍇𑌕𑌾𑌂𑌶𑍍𑌚 𑌰𑌾𑌜𑌪𑍁𑌤𑍍𑌰 𑌮𑌹𑌾𑌯𑌶𑌃 ।
𑌤𑌸𑍍𑌯𑌾𑌂𑌤𑌰𑌂 𑌵𑌿𑌦𑌿𑌤𑍍𑌵𑌾 𑌤𑍁 𑌸𑌹𑌸𑍍𑌰𑌾𑌕𑍍𑌷𑌶𑍍𑌶𑌚𑍀𑌪𑌤𑌿𑌃 ॥ 1 ॥
𑌮𑍁𑌨𑌿𑌵𑍇𑌷𑌧𑌰𑍋𑌽𑌹𑌲𑍍𑌯𑌾𑌮𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ।
𑌋𑌤𑍁𑌕𑌾𑌲𑌂 𑌪𑍍𑌰𑌤𑍀𑌕𑍍𑌷𑌂𑌤𑍇 𑌨𑌾𑌰𑍍𑌥𑌿𑌨𑌸𑍍𑌸𑍁𑌸𑌮𑌾𑌹𑌿𑌤𑍇 ॥ 1 ॥
𑌸𑌂𑌗𑌮𑌂 𑌤𑍍𑌵𑌹𑌮𑌿𑌚𑍍𑌛𑌾𑌮𑌿 𑌤𑍍𑌵𑌯𑌾 𑌸𑌹 𑌸𑍁𑌮𑌧𑍍𑌯𑌮𑍇 ।
𑌮𑍁𑌨𑌿𑌵𑍇𑌷𑌂 𑌸𑌹𑌸𑍍𑌰𑌾𑌕𑍍𑌷𑌂 𑌵𑌿𑌜𑍍𑌞𑌾𑌯 𑌰𑌘𑍁𑌨𑌂𑌦𑌨 ॥ 1 ॥
𑌮𑌤𑌿𑌂 𑌚𑌕𑌾𑌰 𑌦𑍁𑌰𑍍𑌮𑍇𑌧𑌾 𑌦𑍇𑌵𑌰𑌾𑌜𑌕𑍁𑌤𑍂𑌹𑌲𑌾𑌤𑍍 ।
𑌅𑌥𑌾𑌬𑍍𑌰𑌵𑍀𑌤𑍍 𑌨𑌰𑌶𑍍𑌰𑍇𑌷𑍍𑌠 𑌕𑍃𑌤𑌾𑌰𑍍𑌥𑍇𑌨𑌾𑌂𑌤𑌰𑌾𑌤𑍍𑌮𑌨𑌾 ॥ 20 ॥
𑌕𑍃𑌤𑌾𑌰𑍍𑌥𑌾𑌽𑌸𑍍𑌮𑌿 𑌸𑍁𑌰𑌶𑍍𑌰𑍇𑌷𑍍𑌠 𑌗𑌚𑍍𑌛 𑌶𑍀𑌘𑍍𑌰𑌮𑌿𑌤𑌃 𑌪𑍍𑌰𑌭𑍋 ।
𑌆𑌤𑍍𑌮𑌾𑌨𑌂 𑌮𑌾𑌂 𑌚 𑌦𑍇𑌵𑍇𑌶 𑌸𑌰𑍍𑌵𑌦𑌾 𑌰𑌕𑍍𑌷 𑌗𑍌𑌤𑌮𑌾𑌤𑍍 ॥ 21 ॥
𑌇𑌂𑌦𑍍𑌰𑌸𑍍𑌤𑍁 𑌪𑍍𑌰𑌹𑌸𑌨𑍍 𑌵𑌾𑌕𑍍𑌯𑌮𑌹𑌲𑍍𑌯𑌾𑌮𑌿𑌦𑌮𑌬𑍍𑌰𑌵𑍀𑌤𑍍 ।
𑌸𑍁𑌶𑍍𑌰𑍋𑌣𑌿 𑌪𑌰𑌿𑌤𑍁𑌷𑍍𑌟𑍋𑌽𑌸𑍍𑌮𑌿 𑌗𑌮𑌿𑌷𑍍𑌯𑌾𑌮𑌿 𑌯𑌥𑌾𑌽𑌗𑌤𑌮𑍍 ॥ 22 ॥
𑌏𑌵𑌂 𑌸𑌂𑌗𑌮𑍍𑌯 𑌤𑍁 𑌤𑌯𑌾 𑌨𑌿𑌶𑍍𑌚𑌕𑍍𑌰𑌾𑌮𑍋𑌟𑌜𑌾𑌤𑍍𑌤𑌤𑌃 ।
𑌸 𑌸𑌂𑌭𑍍𑌰𑌮𑌾𑌤𑍍𑌤𑍍𑌵𑌰𑌨𑍍 𑌰𑌾𑌮 𑌶𑌂𑌕𑌿𑌤𑍋 𑌗𑍌𑌤𑌮𑌂 𑌪𑍍𑌰𑌤𑌿 ॥ 23 ॥
𑌗𑍌𑌤𑌮𑌂 𑌤𑌂 𑌦𑌦𑌰𑍍𑌶𑌾𑌥 𑌪𑍍𑌰𑌵𑌿𑌶𑌂𑌤𑌂 𑌮𑌹𑌾𑌮𑍁𑌨𑌿𑌮𑍍 ।
𑌦𑍇𑌵𑌦𑌾𑌨𑌵𑌦𑍁𑌰𑍍𑌧𑌰𑍍𑌷𑌂 𑌤𑌪𑍋𑌬𑌲𑌸𑌮𑌨𑍍𑌵𑌿𑌤𑌮𑍍 ॥ 24 ॥
𑌤𑍀𑌰𑍍𑌥𑍇𑌂𑌦𑌕𑌪𑌰𑌿𑌕𑍍𑌲𑌿𑌨𑍍𑌨𑌂 𑌦𑍀𑌪𑍍𑌯𑌮𑌾𑌨𑌮𑌿𑌵𑌾𑌨𑌲𑌮𑍍 ।
𑌗𑍃𑌹𑍀𑌤𑌸𑌮𑌿𑌧𑌂 𑌤𑌤𑍍𑌰 𑌸𑌕𑍁𑌶𑌂 𑌮𑍁𑌨𑌿𑌪𑍁𑌂𑌗𑌵𑌮𑍍 ॥ 25 ॥
𑌦𑍃𑌷𑍍𑌟𑍍𑌵𑌾 𑌸𑍁𑌰𑌪𑌤𑌿𑌸𑍍𑌤𑍍𑌰𑌸𑍍𑌤𑍋 𑌵𑌿𑌵𑌰𑍍𑌣𑌵𑌦𑌨𑍋𑌽𑌭𑌵𑌤𑍍 ।
𑌅𑌥 𑌦𑍃𑌷𑍍𑌟𑍍𑌵𑌾 𑌸𑌹𑌸𑍍𑌰𑌾𑌕𑍍𑌷𑌂 𑌮𑍁𑌨𑌿𑌵𑍇𑌷𑌧𑌰𑌂 𑌮𑍁𑌨𑌿𑌃 ॥ 26 ॥
𑌦𑍁𑌰𑍍𑌵𑍃𑌤𑍍𑌤𑌂 𑌵𑍃𑌤𑍍𑌤𑌸𑌂𑌪𑌨𑍍𑌨𑍋 𑌰𑍋𑌷𑌾𑌦𑍍𑌵𑌚𑌨𑌮𑌬𑍍𑌰𑌵𑍀𑌤𑍍 ।
𑌮𑌮 𑌰𑍂𑌪𑌂 𑌸𑌮𑌾𑌸𑍍𑌥𑌾𑌯 𑌕𑍃𑌤𑌵𑌾𑌨𑌸𑌿 𑌦𑍁𑌰𑍍𑌮𑌤𑍇 ॥ 2 ॥
𑌅𑌕𑌰𑍍𑌤𑌵𑍍𑌯𑌮𑌿𑌦𑌂 𑌤𑌸𑍍𑌮𑌾𑌦𑍍𑌵𑌿𑌫𑌲𑌸𑍍𑌤𑍍𑌵𑌂 𑌭𑌵𑌿𑌷𑍍𑌯𑌸𑌿 ।
𑌗𑍌𑌤𑌮𑍇𑌨𑍈𑌵𑌮𑍁𑌕𑍍𑌤𑌸𑍍𑌯 𑌸𑌰𑍋𑌷𑍇𑌣 𑌮𑌹𑌾𑌤𑍍𑌮𑌨𑌾 ॥ 2 ॥
𑌪𑍇𑌤𑌤𑍁𑌰𑍍𑌵𑍃𑌷𑌣𑍈 𑌭𑍂𑌮𑍌 𑌸𑌹𑌸𑍍𑌰𑌾𑌕𑍍𑌷𑌸𑍍𑌯 𑌤𑌤𑍍𑌕𑍍𑌷𑌣𑌾𑌤𑍍 ।
𑌤𑌥𑌾 𑌶𑌪𑍍𑌤𑍍𑌵𑌾 𑌸 𑌵𑍈 𑌶𑌕𑍍𑌰𑌮𑌹𑌲𑍍𑌯𑌾𑌮𑌪𑌿 𑌶𑌪𑍍𑌤𑌵𑌾𑌨𑍍 ॥ 2 ॥
𑌇𑌹 𑌵𑌰𑍍𑌷𑌸𑌹𑌸𑍍𑌰𑌾𑌣𑌿 𑌬𑌹𑍂𑌨𑌿 𑌤𑍍𑌵𑌂 𑌨𑌿𑌵𑌤𑍍𑌸𑍍𑌯𑌸𑌿 ।
𑌵𑌾𑌯𑍁𑌭𑌕𑍍𑌷𑌾 𑌨𑌿𑌰𑌾𑌹𑌾𑌰𑌾 𑌤𑌪𑍍𑌯𑌂𑌤𑍀 𑌭𑌸𑍍𑌮𑌶𑌾𑌯𑌿𑌨𑍀 ॥ 30 ॥
𑌅𑌦𑍃𑌶𑍍𑌯𑌾 𑌸𑌰𑍍𑌵𑌭𑍂𑌤𑌾𑌨𑌾𑌂 𑌆𑌶𑍍𑌰𑌮𑍇𑌽𑌸𑍍𑌮𑌿𑌨𑍍𑌨𑌿𑌵𑌤𑍍𑌸𑍍𑌯𑌸𑌿 ।
𑌯𑌦𑌾 𑌚𑍈𑌤𑌦𑍍𑌵𑌨𑌂 𑌘𑍋𑌰𑌂 𑌰𑌾𑌮𑍋 𑌦𑌶𑌰𑌥𑌾𑌤𑍍𑌮𑌜𑌃 ॥ 31 ॥
𑌆𑌗𑌮𑌿𑌷𑍍𑌯𑌤𑌿 𑌦𑍁𑌰𑍍𑌧𑌰𑍍𑌷𑌸𑍍𑌤𑌦𑌾 𑌪𑍂𑌤𑌾 𑌭𑌵𑌿𑌷𑍍𑌯𑌸𑌿 ।
𑌤𑌸𑍍𑌯𑌾𑌤𑌿𑌥𑍍𑌯𑍇𑌨 𑌦𑍁𑌰𑍍𑌵𑍁𑌤𑍍𑌤𑍇 𑌲𑍋𑌭𑌮𑍋𑌹𑌵𑌿𑌵𑌰𑍍𑌜𑌿𑌤𑌾 ॥ 32 ॥
𑌮𑌤𑍍𑌸𑌕𑌾𑌶𑍇 𑌮𑍁𑌦𑌾 𑌯𑍁𑌕𑍍𑌤𑌾 𑌸𑍍𑌵𑌂 𑌵𑌪𑍁𑌰𑍍𑌧𑌾𑌰𑌯𑌿𑌷𑍍𑌯𑌸𑌿 ।
𑌏𑌵𑌮𑍁𑌕𑍍𑌤𑍍𑌵𑌾 𑌮𑌹𑌾𑌤𑍇𑌜𑌾 𑌗𑍌𑌤𑌮𑍋 𑌦𑍁𑌷𑍍𑌟𑌚𑌾𑌰𑌿𑌣𑍀𑌮𑍍 ॥ 33 ॥
𑌇𑌮𑌮𑌾𑌶𑍍𑌰𑌮𑌮𑍁𑌤𑍍𑌸𑍃𑌜𑍍𑌯 𑌸𑌿𑌦𑍍𑌧𑌚𑌾𑌰𑌣𑌸𑍇𑌵𑌿𑌤𑍇 ।
𑌹𑌿𑌮𑌵𑌚𑍍𑌛𑌿𑌖𑌰𑍇 𑌪𑍁𑌣𑍍𑌯𑍇 𑌤𑌪𑌸𑍍𑌤𑍇𑌪𑍇 𑌮𑌹𑌾𑌤𑌪𑌾𑌃 ॥ 34 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌅𑌷𑍍𑌟𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
