𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌃𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌹𑍍𑌰𑌿𑌯𑌮𑌾𑌣𑌾 𑌤𑍁 𑌵𑍈𑌦𑍇𑌹𑍀 𑌕𑌂𑌚𑌿𑌨𑍍𑌨𑌾𑌥𑌮𑌪𑌶𑍍𑌯𑌤𑍀 ।
𑌦𑌦𑌰𑍍𑌶 𑌗𑌿𑌰𑌿𑌶𑍃𑌂𑌗𑌸𑍍𑌥𑌾𑌨𑍍𑌪𑌂𑌚 𑌵𑌾𑌨𑌰𑌪𑍁𑌂𑌗𑌵𑌾𑌨𑍍 ॥ 1 ॥
𑌤𑍇𑌷𑌾𑌂 𑌮𑌧𑍍𑌯𑍇 𑌵𑌿𑌶𑌾𑌲𑌾𑌕𑍍𑌷𑍀 𑌕𑍌𑌶𑍇𑌯𑌂 𑌕𑌨𑌕𑌪𑍍𑌰𑌭𑌮𑍍 ।
𑌉𑌤𑍍𑌤𑌰𑍀𑌯𑌂 𑌵𑌰𑌾𑌰𑍋𑌹𑌾 𑌶𑍁𑌭𑌾𑌨𑍍𑌯𑌾𑌭𑌰𑌣𑌾𑌨𑌿 𑌚 ॥ 2 ॥
𑌮𑍁𑌮𑍋𑌚 𑌯𑌦𑌿 𑌰𑌾𑌮𑌾𑌯 𑌶𑌂𑌸𑍇𑌯𑍁𑌰𑌿𑌤𑌿 𑌮𑍈𑌥𑌿𑌲𑍀 ।
𑌵𑌸𑍍𑌤𑍍𑌰𑌮𑍁𑌤𑍍𑌸𑍃𑌜𑍍𑌯 𑌤𑌨𑍍𑌮𑌧𑍍𑌯𑍇 𑌨𑌿𑌕𑍍𑌷𑌿𑌪𑍍𑌤𑌂 𑌸𑌹𑌭𑍂𑌷𑌣𑌮𑍍 ॥ 3 ॥
𑌸𑌂𑌭𑍍𑌰𑌮𑌾𑌤𑍍𑌤𑍁 𑌦𑌶𑌗𑍍𑌰𑍀𑌵𑌸𑍍𑌤𑌤𑍍𑌕𑌰𑍍𑌮 𑌨 𑌸 𑌬𑍁𑌦𑍍𑌧𑌵𑌾𑌨𑍍 ।
𑌪𑌿𑌂𑌗𑌾𑌕𑍍𑌷𑌾𑌸𑍍𑌤𑌾𑌂 𑌵𑌿𑌶𑌾𑌲𑌾𑌕𑍍𑌷𑍀𑌂 𑌨𑍇𑌤𑍍𑌰𑍈𑌰𑌨𑌿𑌮𑌿𑌷𑍈𑌰𑌿𑌵 ॥ 4 ॥
𑌵𑌿𑌕𑍍𑌰𑍋𑌶𑌂𑌤𑍀𑌂 𑌤𑌥𑌾 𑌸𑍀𑌤𑌾𑌂 𑌦𑌦𑍃𑌶𑍁𑌰𑍍𑌵𑌾𑌨𑌰𑌰𑍍𑌷𑌭𑌾𑌃 ।
𑌸 𑌚 𑌪𑌂𑌪𑌾𑌮𑌤𑌿𑌕𑍍𑌰𑌮𑍍𑌯 𑌲𑌂𑌕𑌾𑌮𑌭𑌿𑌮𑍁𑌖𑌃 𑌪𑍁𑌰𑍀𑌮𑍍 ॥ 5 ॥
𑌜𑌗𑌾𑌮 𑌰𑍁𑌦𑌤𑍀𑌂 𑌗𑍃𑌹𑍍𑌯 𑌵𑍈𑌦𑍇𑌹𑍀𑌂 𑌰𑌾𑌕𑍍𑌷𑌸𑍇𑌶𑍍𑌵𑌰𑌃 ।
𑌤𑌾𑌂 𑌜𑌹𑌾𑌰 𑌸𑍁𑌸𑌂𑌹𑍃𑌷𑍍𑌟𑍋 𑌰𑌾𑌵𑌣𑍋 𑌮𑍃𑌤𑍍𑌯𑍁𑌮𑌾𑌤𑍍𑌮𑌨𑌃 ॥ 6 ॥
𑌉𑌤𑍍𑌸𑌂𑌗𑍇𑌨𑍇𑌵 𑌭𑍁𑌜𑌗𑍀𑌂 𑌤𑍀𑌕𑍍𑌷𑍍𑌣𑌦𑌂𑌷𑍍𑌟𑍍𑌰𑌾𑌂 𑌮𑌹𑌾𑌵𑌿𑌷𑌾𑌮𑍍 ।
𑌵𑌨𑌾𑌨𑌿 𑌸𑌰𑌿𑌤𑌶𑍍𑌶𑍈𑌲𑌾𑌂𑌤𑍍𑌸𑌰𑌾𑌂𑌸𑌿 𑌚 𑌵𑌿𑌹𑌾𑌯𑌸𑌾 ॥ ॥
𑌸 𑌕𑍍𑌷𑌿𑌪𑍍𑌰𑌂 𑌸𑌮𑌤𑍀𑌯𑌾𑌯 𑌶𑌰𑌶𑍍𑌚𑌾𑌪𑌾𑌦𑌿𑌵 𑌚𑍍𑌯𑍁𑌤𑌃 ।
𑌤𑌿𑌮𑌿𑌨𑌕𑍍𑌰𑌨𑌿𑌕𑍇𑌤𑌂 𑌤𑍁 𑌵𑌰𑍁𑌣𑌾𑌲𑌯𑌮𑌕𑍍𑌷𑌯𑌮𑍍 ॥ ॥
𑌸𑌰𑌿𑌤𑌾𑌂 𑌶𑌰𑌣𑌂 𑌗𑌤𑍍𑌵𑌾 𑌸𑌮𑌤𑍀𑌯𑌾𑌯 𑌸𑌾𑌗𑌰𑌮𑍍 ।
𑌸𑌂𑌭𑍍𑌰𑌮𑌾𑌤𑍍𑌪𑌰𑌿𑌵𑍃𑌤𑍍𑌤𑍋𑌰𑍍𑌮𑍀 𑌰𑍁𑌦𑍍𑌧𑌮𑍀𑌨𑌮𑌹𑍋𑌰𑌗𑌃 ॥ ॥
𑌵𑍈𑌦𑍇𑌹𑍍𑌯𑌾𑌂 𑌹𑍍𑌰𑌿𑌯𑌮𑌾𑌣𑌾𑌯𑌾𑌂 𑌬𑌭𑍂𑌵 𑌵𑌰𑍁𑌣𑌾𑌲𑌯𑌃 ।
𑌅𑌂𑌤𑌰𑌿𑌕𑍍𑌷𑌗𑌤𑌾 𑌵𑌾𑌚𑌸𑍍𑌸𑌸𑍃𑌜𑍁𑌶𑍍𑌚𑌾𑌰𑌣𑌾𑌸𑍍𑌤𑌦𑌾 ॥ 10 ॥
𑌏𑌤𑌦𑌂𑌤𑍋 𑌦𑌶𑌗𑍍𑌰𑍀𑌵 𑌇𑌤𑌿 𑌸𑌿𑌦𑍍𑌧𑌾𑌸𑍍𑌤𑌦𑌾𑌬𑍍𑌰𑍁𑌵𑌨𑍍 ।
𑌸 𑌤𑍁 𑌸𑍀𑌤𑌾𑌂 𑌵𑌿𑌵𑍇𑌷𑍍𑌟𑌂𑌤𑍀𑌮𑌂𑌕𑍇𑌨𑌾𑌦𑌾𑌯 𑌰𑌾𑌵𑌣𑌃 ॥ 11 ॥
𑌪𑍍𑌰𑌵𑌿𑌵𑍇𑌶 𑌪𑍁𑌰𑍀𑌂 𑌲𑌂𑌕𑌾𑌂 𑌰𑍂𑌪𑌿𑌣𑍀𑌂 𑌮𑍃𑌤𑍍𑌯𑍁𑌮𑌾𑌤𑍍𑌮𑌨𑌃 ।
𑌸𑍋𑌽𑌭𑌿𑌗𑌮𑍍𑌯 𑌪𑍁𑌰𑍀𑌂 𑌲𑌂𑌕𑌾𑌂 𑌸𑍁𑌵𑌿𑌭𑌕𑍍𑌤𑌮𑌹𑌾𑌪𑌥𑌾𑌮𑍍 ॥ 12 ॥
𑌸𑌂𑌰𑍂𑌢𑌕𑌕𑍍𑌷𑍍𑌯𑌾𑌬𑌹𑍁𑌲𑌂 𑌸𑍍𑌵𑌮𑌂𑌤𑌃𑌪𑍁𑌰𑌮𑌾𑌵𑌿𑌶𑌤𑍍 ।
𑌤𑌤𑍍𑌰 𑌤𑌾𑌮𑌸𑌿𑌤𑌾𑌪𑌾𑌂𑌗𑌾𑌂 𑌶𑍋𑌕𑌮𑍋𑌹𑌪𑌰𑌾𑌯𑌣𑌾𑌮𑍍 ॥ 13 ॥
𑌨𑌿𑌦𑌧𑍇 𑌰𑌾𑌵𑌣𑌸𑍍𑌸𑍀𑌤𑌾𑌂 𑌮𑌯𑍋 𑌮𑌾𑌯𑌾𑌮𑌿𑌵𑌸𑍍𑌤𑍍𑌰𑌿𑌯𑌮𑍍 ।
𑌅𑌬𑍍𑌰𑌵𑍀𑌚𑍍𑌚 𑌦𑌶𑌗𑍍𑌰𑍀𑌵𑌃 𑌪𑌿𑌶𑌾𑌚𑍀𑌰𑍍𑌘𑍋𑌰𑌦𑌰𑍍𑌶𑌨𑌾𑌃 ॥ 14 ॥
𑌯𑌥𑌾 𑌨𑍇𑌮𑌾𑌂 𑌪𑍁𑌮𑌾𑌨𑍍 𑌸𑍍𑌤𑍍𑌰𑍀 𑌵𑌾 𑌸𑍀𑌤𑌾𑌂 𑌪𑌶𑍍𑌯𑌤𑍍𑌯𑌸𑌮𑍍𑌮𑌤𑌃 ।
𑌮𑍁𑌕𑍍𑌤𑌾𑌮𑌣𑌿𑌸𑍁𑌵𑌰𑍍𑌣𑌾𑌨𑌿 𑌵𑌸𑍍𑌤𑍍𑌰𑌾𑌣𑍍𑌯𑌾𑌭𑌰𑌣𑌾𑌨𑌿 𑌚 ॥ 15 ॥
𑌯𑌦𑍍𑌯𑌦𑌿𑌚𑍍𑌛𑍇𑌤𑍍𑌤𑌦𑍇𑌵𑌾𑌸𑍍𑌯𑌾 𑌦𑍇𑌯𑌂 𑌮𑌚𑍍𑌛𑌂𑌦𑌤𑍋 𑌯𑌥𑌾 ।
𑌯𑌾 𑌚 𑌵𑌕𑍍𑌷𑍍𑌯𑌤𑌿 𑌵𑍈𑌦𑍇𑌹𑍀𑌂 𑌵𑌚𑌨𑌂 𑌕𑌿𑌂𑌚𑌿𑌦𑌪𑍍𑌰𑌿𑌯𑌮𑍍 ॥ 16 ॥
𑌅𑌜𑍍𑌞𑌾𑌨𑌾𑌦𑍍𑌯𑌦𑌿 𑌵𑌾 𑌜𑍍𑌞𑌾𑌨𑌾𑌨𑍍𑌨 𑌤𑌸𑍍𑌯𑌾 𑌜𑍀𑌵𑌿𑌤𑌂 𑌪𑍍𑌰𑌿𑌯𑌮𑍍 ।
𑌤𑌥𑍋𑌕𑍍𑌤𑍍𑌵𑌾 𑌰𑌾𑌕𑍍𑌷𑌸𑍀𑌸𑍍𑌤𑌾𑌸𑍍𑌤𑍁 𑌰𑌾𑌕𑍍𑌷𑌸𑍇𑌂𑌦𑍍𑌰𑌃 𑌪𑍍𑌰𑌤𑌾𑌪𑌵𑌾𑌨𑍍 ॥ 1 ॥
𑌨𑌿𑌷𑍍𑌕𑍍𑌰𑌮𑍍𑌯𑌾𑌂𑌤𑌃 𑌪𑍁𑌰𑌾𑌤𑍍𑌤𑌸𑍍𑌮𑌾𑌤𑍍𑌕𑌿𑌂𑌕𑍃𑌤𑍍𑌯𑌮𑌿𑌤𑌿 𑌚𑌿𑌂𑌤𑌯𑌨𑍍 ।
𑌦𑌦𑌰𑍍𑌶𑌾𑌷𑍍𑌟𑍌 𑌮𑌹𑌾𑌵𑍀𑌰𑍍𑌯𑌾𑌨𑍍𑌰𑌾𑌕𑍍𑌷𑌸𑌾𑌨𑍍𑌪𑌿𑌶𑌿𑌤𑌾𑌶𑌨𑌾𑌨𑍍 ॥ 1 ॥
𑌸 𑌤𑌾𑌂𑌦𑍃𑌷𑍍𑌟𑍍𑌵𑌾 𑌮𑌹𑌾𑌵𑍀𑌰𑍍𑌯𑍋 𑌵𑌰𑌦𑌾𑌨𑍇𑌨 𑌮𑍋𑌹𑌿𑌤𑌃 ।
𑌉𑌵𑌾𑌚𑍈𑌤𑌾𑌨𑌿𑌦𑌂 𑌵𑌾𑌕𑍍𑌯𑌂 𑌪𑍍𑌰𑌶𑌸𑍍𑌯 𑌬𑌲𑌵𑍀𑌰𑍍𑌯𑌤𑌃 ॥ 1 ॥
𑌨𑌾𑌨𑌾𑌪𑍍𑌰𑌹𑌰𑌣𑌾𑌃 𑌕𑍍𑌷𑌿𑌪𑍍𑌰𑌮𑌿𑌤𑍋 𑌗𑌚𑍍𑌛𑌤 𑌸𑌤𑍍𑌵𑌰𑌾𑌃 ।
𑌜𑌨𑌸𑍍𑌥𑌾𑌨𑌂 𑌹𑌤𑌸𑍍𑌥𑌾𑌨𑌂 𑌭𑍂𑌤𑌪𑍂𑌰𑍍𑌵𑌂 𑌖𑌰𑌾𑌲𑌯𑌮𑍍 ॥ 20 ॥
𑌤𑌤𑍍𑌰𑍋𑌷𑍍𑌯𑌤𑌾𑌂 𑌜𑌨𑌸𑍍𑌥𑌾𑌨𑍇 𑌶𑍂𑌨𑍍𑌯𑍇 𑌨𑌿𑌹𑌤𑌰𑌾𑌕𑍍𑌷𑌸𑍇 ।
𑌪𑍌𑌰𑍁𑌷𑌂 𑌬𑌲𑌮𑌾𑌶𑍍𑌰𑌿𑌤𑍍𑌯 𑌤𑍍𑌰𑌾𑌸𑌮𑍁𑌤𑍍𑌸𑍃𑌜𑍍𑌯 𑌦𑍂𑌰𑌤𑌃 ॥ 21 ॥
𑌬𑌲𑌂 𑌹𑌿 𑌸𑍁𑌮𑌹𑌦𑍍𑌯𑌨𑍍𑌮𑍇 𑌜𑌨𑌸𑍍𑌥𑌾𑌨𑍇 𑌨𑌿𑌵𑍇𑌶𑌿𑌤𑌮𑍍 ।
𑌸𑌦𑍂𑌷𑌣𑌖𑌰𑌂 𑌯𑍁𑌦𑍍𑌧𑍇 𑌹𑌤𑌂 𑌰𑌾𑌮𑍇𑌣 𑌸𑌾𑌯𑌕𑍈𑌃 ॥ 22 ॥
𑌤𑌤 𑌕𑍍𑌰𑍋𑌧𑍋 𑌮𑌮𑌾𑌮𑌰𑍍𑌷𑌾𑌦𑍍𑌧𑍈𑌰𑍍𑌯𑌸𑍍𑌯𑍋𑌪𑌰𑌿 𑌵𑌰𑍍𑌤𑌤𑍇 ।
𑌵𑍈𑌰𑌂 𑌚 𑌸𑍁𑌮𑌹𑌜𑍍𑌜𑌾𑌤𑌂 𑌰𑌾𑌮𑌂 𑌪𑍍𑌰𑌤𑌿 𑌸𑍁𑌦𑌾𑌰𑍁𑌣𑌮𑍍 ॥ 23 ॥
𑌨𑌿𑌰𑍍𑌯𑌾𑌤𑌯𑌿𑌤𑍁𑌮𑌿𑌚𑍍𑌛𑌾𑌮𑌿 𑌤𑌚𑍍𑌚 𑌵𑍈𑌰𑌮𑌹𑌂 𑌰𑌿𑌪𑍋𑌃 ।
𑌨 𑌹𑌿 𑌲𑌪𑍍𑌸𑍍𑌯𑌾𑌮𑍍𑌯𑌹𑌂 𑌨𑌿𑌦𑍍𑌰𑌾𑌮𑌹𑌤𑍍𑌵𑌾 𑌸𑌂𑌯𑍁𑌗𑍇 𑌰𑌿𑌪𑍁𑌮𑍍 ॥ 24 ॥
𑌤𑌂 𑌤𑍍𑌵𑌿𑌦𑌾𑌨𑍀𑌮𑌹𑌂 𑌹𑌤𑍍𑌵𑌾 𑌖𑌰𑌦𑍂𑌷𑌣𑌘𑌾𑌤𑌿𑌨𑌮𑍍 ।
𑌰𑌾𑌮𑌂 𑌶𑌰𑍍𑌮𑍋𑌪𑌲𑌪𑍍𑌸𑍍𑌯𑌾𑌮𑌿 𑌧𑌨𑌂 𑌲𑌬𑍍𑌧𑍍𑌵𑍇𑌵 𑌨𑌿𑌰𑍍𑌧𑌨𑌃 ॥ 25 ॥
𑌜𑌨𑌸𑍍𑌥𑌾𑌨𑍇 𑌵𑌸𑌦𑍍𑌭𑌿𑌸𑍍𑌤𑍁 𑌭𑌵𑌦𑍍𑌭𑍀𑌰𑌾𑌮𑌮𑌾𑌶𑍍𑌰𑌿𑌤𑌾 ।
𑌪𑍍𑌰𑌵𑍃𑌤𑍍𑌤𑌿𑌰𑍁𑌪𑌨𑍇𑌤𑌵𑍍𑌯𑌾 𑌕𑌿𑌞𑍍𑌕𑌰𑍋𑌤𑍀𑌤𑌿 𑌤𑌤𑍍𑌤𑍍𑌵𑌤𑌃 ॥ 26 ॥
𑌅𑌪𑍍𑌰𑌮𑌾𑌦𑌾𑌚𑍍𑌚 𑌗𑌂𑌤𑌵𑍍𑌯𑌂 𑌸𑌰𑍍𑌵𑍈𑌰𑌪𑌿 𑌨𑌿𑌶𑌾𑌚𑌰𑍈𑌃 ।
𑌕𑌰𑍍𑌤𑌵𑍍𑌯𑌶𑍍𑌚 𑌸𑌦𑌾 𑌯𑌤𑍍𑌨𑍋 𑌰𑌾𑌘𑌵𑌸𑍍𑌯 𑌵𑌧𑌂 𑌪𑍍𑌰𑌤𑌿 ॥ 2 ॥
𑌯𑍁𑌷𑍍𑌮𑌾𑌕𑌂 𑌚 𑌬𑌲𑌜𑍍𑌞𑍋𑌽𑌹𑌂 𑌬𑌹𑍁𑌶𑍋 𑌰𑌣𑌮𑍂𑌰𑍍𑌧𑌨𑌿 ।
𑌅𑌤𑌶𑍍𑌚𑌾𑌸𑍍𑌮𑌿𑌨𑍍 𑌜𑌨𑌸𑍍𑌥𑌾𑌨𑍇 𑌮𑌯𑌾 𑌯𑍂𑌯𑌂 𑌨𑌿𑌯𑍋𑌜𑌿𑌤𑌾𑌃 ॥ 2 ॥
𑌤𑌤𑌃 𑌪𑍍𑌰𑌿𑌯𑌂 𑌵𑌾𑌕𑍍𑌯𑌮𑍁𑌪𑍇𑌤𑍍𑌯 𑌰𑌾𑌕𑍍𑌷𑌸𑌾 𑌮𑌹𑌾𑌰𑍍𑌥𑌮𑌷𑍍𑌟𑌾𑌵𑌭𑌿𑌵𑌾𑌦𑍍𑌯 𑌰𑌾𑌵𑌣𑌮𑍍 ।
𑌵𑌿𑌹𑌾𑌯 𑌲𑌂𑌕𑌾𑌂 𑌸𑌹𑌿𑌤𑌾𑌃 𑌪𑍍𑌰𑌤𑌸𑍍𑌥𑌿𑌰𑍇 𑌯𑌤𑍋 𑌜𑌨𑌸𑍍𑌥𑌾𑌨𑌮𑌲𑌕𑍍𑌷𑍍𑌯𑌦𑌰𑍍𑌶𑌨𑌾𑌃 ॥ 2 ॥
𑌤𑌤𑌸𑍍𑌤𑍁 𑌸𑍀𑌤𑌾𑌮𑍁𑌪𑌲𑌭𑍍𑌯 𑌰𑌾𑌵𑌣𑌃 𑌸𑍁𑌸𑌂𑌪𑍍𑌰𑌹𑍃𑌷𑍍𑌟𑌃 𑌪𑌰𑌿𑌗𑍃𑌹𑍍𑌯 𑌮𑍈𑌥𑌿𑌲𑍀𑌮𑍍 ।
𑌪𑍍𑌰𑌸𑌜𑍍𑌯 𑌰𑌾𑌮𑍇𑌣 𑌚 𑌵𑍈𑌰𑌮𑍁𑌤𑍍𑌤𑌮𑌂 𑌬𑌭𑍂𑌵 𑌮𑍋𑌹𑌾𑌨𑍍𑌮𑍁𑌦𑌿𑌤𑌸𑍍𑌸𑌰𑌾𑌕𑍍𑌷𑌸𑌃 ॥ 30 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌚𑌤𑍁𑌃𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
