𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌸𑍍𑌮𑌿𑌂𑌸𑍍𑌤𑍁 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑍇 𑌨𑌿𑌷𑍍𑌕𑍍𑌰𑌾𑌮𑌤𑌿 𑌕𑍃𑌤𑌾𑌂𑌜𑌲𑍌 ।
𑌆𑌰𑍍𑌤𑌶𑌬𑍍𑌦𑍋 𑌮𑌹𑌾𑌨𑍍 𑌜𑌜𑍍𑌞𑍇 𑌸𑍍𑌤𑍍𑌰𑍀𑌣𑌾𑌮𑌂𑌤𑌃𑌪𑍁𑌰𑍇 𑌤𑌦𑌾 ॥ 1 ॥
𑌕𑍃𑌤𑍍𑌯𑍇𑌷𑍍𑌵𑌚𑍋𑌦𑌿𑌤𑌃 𑌪𑌿𑌤𑍍𑌰𑌾 𑌸𑌰𑍍𑌵𑌸𑍍𑌯𑌾𑌂𑌤𑌃𑌪𑍁𑌰𑌸𑍍𑌯 𑌚 ।
𑌗𑌤𑌿𑌰𑍍𑌯𑌶𑍍𑌶𑌰𑌣𑌂 𑌚𑌾𑌪𑌿 𑌸 𑌰𑌾𑌮𑍋𑌽𑌦𑍍𑌯 𑌪𑍍𑌰𑌵𑌤𑍍𑌸𑍍𑌯𑌤𑌿 ॥ 2 ॥
𑌕𑍌𑌶𑌲𑍍𑌯𑌾𑌯𑌾𑌂 𑌯𑌥𑌾 𑌯𑍁𑌕𑍍𑌤𑍋 𑌜𑌨𑌨𑍍𑌯𑌾𑌂 𑌵𑌰𑍍𑌤𑌤𑍇 𑌸𑌦𑌾 ।
𑌤𑌥𑍈𑌵 𑌵𑌰𑍍𑌤𑌤𑍇𑌽𑌸𑍍𑌮𑌾𑌸𑍁 𑌜𑌨𑍍𑌮𑌪𑍍𑌰𑌭𑍃𑌤𑌿 𑌰𑌾𑌘𑌵𑌃 ॥ 3 ॥
𑌨 𑌕𑍍𑌰𑍁𑌧𑍍𑌯𑌤𑍍𑌯𑌭𑌿𑌶𑌪𑍍𑌤𑍋𑌽𑌪𑌿 𑌕𑍍𑌰𑍋𑌧𑌨𑍀𑌯𑌾𑌨𑌿 𑌵𑌰𑍍𑌜𑌯𑌨𑍍 ।
𑌕𑍍𑌰𑍁𑌦𑍍𑌧𑌾𑌨𑍍𑌪𑍍𑌰𑌸𑌾𑌦𑌯𑌨𑍍𑌸𑌰𑍍𑌵𑌾𑌨𑍍 𑌸 𑌇𑌤𑍋𑌽𑌦𑍍𑌯 𑌪𑍍𑌰𑌵𑌤𑍍𑌸𑍍𑌯𑌤𑌿 ॥ 4 ॥
𑌅𑌬𑍁𑌦𑍍𑌧𑌿𑌰𑍍𑌬𑌤 𑌨𑍋 𑌰𑌾𑌜𑌾 𑌜𑍀𑌵𑌲𑍋𑌕𑌂 𑌚𑌰𑌤𑍍𑌯𑌯𑌮𑍍 ।
𑌯𑍋 𑌗𑌤𑌿𑌂 𑌸𑌰𑍍𑌵𑌭𑍂𑌤𑌾𑌨𑌾𑌂 𑌪𑌰𑌿𑌤𑍍𑌯𑌜𑌤𑌿 𑌰𑌾𑌘𑌵𑌮𑍍 ॥ 5 ॥
𑌇𑌤𑌿 𑌸𑌰𑍍𑌵𑌾 𑌮𑌹𑌿𑌷𑍍𑌯𑌸𑍍𑌤𑌾 𑌵𑌿𑌵𑌤𑍍𑌸𑌾 𑌇𑌵 𑌧𑍇𑌨𑌵𑌃 ।
𑌪𑌤𑌿𑌮𑌾𑌚𑍁𑌕𑍍𑌰𑍁𑌶𑍁𑌶𑍍𑌚𑍈𑌵 𑌸𑌸𑍍𑌵𑌰𑌂 𑌚𑌾𑌪𑌿 𑌚𑍁𑌕𑍍𑌰𑍁𑌶𑍁𑌃 ॥ 6 ॥
𑌸 𑌹𑌿 𑌚𑌾𑌂𑌤𑌃𑌪𑍁𑌰𑍇 𑌘𑍋𑌰𑌮𑌾𑌰𑍍𑌤𑌶𑌬𑍍𑌦𑌂 𑌮𑌹𑍀𑌪𑌤𑌿𑌃 ।
𑌪𑍁𑌤𑍍𑌰𑌶𑍋𑌕𑌾𑌭𑌿𑌸𑌂𑌤𑌪𑍍𑌤𑌃 𑌶𑍍𑌰𑍁𑌤𑍍𑌵𑌾 𑌵𑍍𑌯𑌾𑌲𑍀𑌯𑌤𑌾𑌽𑌸𑌨𑍇 ॥ ॥
𑌰𑌾𑌮𑌸𑍍𑌤𑍁 𑌭𑍃𑌶𑌮𑌾𑌯𑌸𑍍𑌤𑍋 𑌨𑌿𑌶𑍍𑌶𑍍𑌵𑌸𑌨𑍍𑌨𑌿𑌵 𑌕𑍁𑌂𑌜𑌰𑌃 ।
𑌜𑌗𑌾𑌮 𑌸𑌹𑌿𑌤𑍋 𑌭𑍍𑌰𑌾𑌤𑍍𑌰𑌾 𑌮𑌾𑌤𑍁𑌰𑌂𑌤𑌃𑌪𑍁𑌰𑌂 𑌵𑌶𑍀 ॥ ॥
𑌸𑍋𑌽𑌪𑌶𑍍𑌯𑌤𑍍𑌪𑍁𑌰𑍁𑌷𑌂 𑌤𑌤𑍍𑌰 𑌵𑍃𑌦𑍍𑌧𑌂 𑌪𑌰𑌮𑌪𑍂𑌜𑌿𑌤𑌮𑍍 ।
𑌉𑌪𑌵𑌿𑌷𑍍𑌟𑌂 𑌗𑍃𑌹𑌦𑍍𑌵𑌾𑌰𑌿 𑌤𑌿𑌷𑍍𑌠𑌤𑌶𑍍𑌚𑌾𑌪𑌰𑌾𑌨𑍍𑌬𑌹𑍂𑌨𑍍 ॥ ॥
𑌦𑍃𑌷𑍍𑌟𑍍𑌵𑍈𑌵 𑌤𑍁 𑌤𑌦𑌾 𑌰𑌾𑌮𑌂 𑌤𑍇 𑌸𑌰𑍍𑌵𑍇 𑌸𑌹𑌸𑍋𑌤𑍍𑌥𑌿𑌤𑌾𑌃 ।
𑌜𑌯𑍇𑌨 𑌜𑌯𑌤𑌾𑌂 𑌶𑍍𑌰𑍇𑌷𑍍𑌠𑌂 𑌵𑌰𑍍𑌧𑌯𑌂𑌤𑌿 𑌸𑍍𑌮 𑌰𑌾𑌘𑌵𑌮𑍍 ॥ 10 ॥
𑌪𑍍𑌰𑌵𑌿𑌶𑍍𑌯 𑌪𑍍𑌰𑌥𑌮𑌾𑌂 𑌕𑌕𑍍𑌷𑍍𑌯𑌾𑌂 𑌦𑍍𑌵𑌿𑌤𑍀𑌯𑌾𑌯𑌾𑌂 𑌦𑌦𑌰𑍍𑌶 𑌸𑌃 ।
𑌬𑍍𑌰𑌾𑌹𑍍𑌮𑌣𑌾𑌨𑍍𑌵𑍇𑌦𑌸𑌂𑌪𑌨𑍍𑌨𑌾𑌨𑍍𑌵𑍃𑌦𑍍𑌧𑌾𑌨𑍍𑌰𑌾𑌜𑍍𑌞𑌾𑌽𑌭𑌿𑌸𑌤𑍍𑌕𑍃𑌤𑌾𑌨𑍍 ॥ 11 ॥
𑌪𑍍𑌰𑌣𑌮𑍍𑌯 𑌰𑌾𑌮𑌸𑍍𑌤𑌾𑌨𑍍𑌵𑌿𑌪𑍍𑌰𑌾𑌂𑌸𑍍𑌤𑍃𑌤𑍀𑌯𑌾𑌯𑌾𑌂 𑌦𑌦𑌰𑍍𑌶 𑌸𑌃 ।
𑌸𑍍𑌤𑍍𑌰𑌿𑌯𑍋 𑌵𑍃𑌦𑍍𑌧𑌾𑌸𑍍𑌤𑌥𑌾 𑌬𑌾𑌲𑌾 𑌦𑍍𑌵𑌾𑌰𑌰𑌕𑍍𑌷𑌣𑌤𑌤𑍍𑌪𑌰𑌾𑌃 ॥ 12 ॥
𑌵𑌰𑍍𑌧𑌯𑌿𑌤𑍍𑌵𑌾 𑌪𑍍𑌰𑌹𑍃𑌷𑍍𑌟𑌾𑌸𑍍𑌤𑌾𑌃 𑌪𑍍𑌰𑌵𑌿𑌶𑍍𑌯 𑌚 𑌗𑍃𑌹𑌂 𑌸𑍍𑌤𑍍𑌰𑌿𑌯𑌃 ।
𑌨𑍍𑌯𑌵𑍇𑌦𑌯𑌂𑌤 𑌤𑍍𑌵𑌰𑌿𑌤𑌾 𑌰𑌾𑌮𑌮𑌾𑌤𑍁𑌃 𑌪𑍍𑌰𑌿𑌯𑌂 𑌤𑌦𑌾 ॥ 13 ॥
𑌕𑍌𑌶𑌲𑍍𑌯𑌾𑌪𑌿 𑌤𑌦𑌾 𑌦𑍇𑌵𑍀 𑌰𑌾𑌤𑍍𑌰𑌿𑌂 𑌸𑍍𑌥𑌿𑌤𑍍𑌵𑌾 𑌸𑌮𑌾𑌹𑌿𑌤𑌾 ।
𑌪𑍍𑌰𑌭𑌾𑌤𑍇 𑌤𑍍𑌵𑌕𑌰𑍋𑌤𑍍𑌪𑍂𑌜𑌾𑌂 𑌵𑌿𑌷𑍍𑌣𑍋𑌃 𑌪𑍁𑌤𑍍𑌰𑌹𑌿𑌤𑍈𑌷𑌿𑌣𑍀 ॥ 14 ॥
𑌸𑌾 𑌕𑍍𑌷𑍌𑌮𑌵𑌸𑌨𑌾 𑌹𑍃𑌷𑍍𑌟𑌾 𑌨𑌿𑌤𑍍𑌯𑌂 𑌵𑍍𑌰𑌤𑌪𑌰𑌾𑌯𑌣𑌾 ।
𑌅𑌗𑍍𑌨𑌿𑌂 𑌜𑍁𑌹𑍋𑌤𑌿 𑌸𑍍𑌮 𑌤𑌦𑌾 𑌮𑌂𑌤𑍍𑌰𑌵𑌤𑍍𑌕𑍃𑌤𑌮𑌂𑌗𑌲𑌾 ॥ 15 ॥
𑌪𑍍𑌰𑌵𑌿𑌶𑍍𑌯 𑌚 𑌤𑌦𑌾 𑌰𑌾𑌮𑍋 𑌮𑌾𑌤𑍁𑌰𑌂𑌤𑌃𑌪𑍁𑌰𑌂 𑌶𑍁𑌭𑌮𑍍 ।
𑌦𑌦𑌰𑍍𑌶 𑌮𑌾𑌤𑌰𑌂 𑌤𑌤𑍍𑌰 𑌹𑌾𑌵𑌯𑌂𑌤𑍀𑌂 𑌹𑍁𑌤𑌾𑌶𑌨𑌮𑍍 ॥ 16 ॥
𑌦𑍇𑌵𑌕𑌾𑌰𑍍𑌯𑌨𑌿𑌮𑌿𑌤𑍍𑌤𑌂 𑌚 𑌤𑌤𑍍𑌰𑌾𑌪𑌶𑍍𑌯𑌤𑍍𑌸𑌮𑍁𑌦𑍍𑌯𑌤𑌮𑍍 ।
𑌦𑌧𑍍𑌯𑌕𑍍𑌷𑌤𑌂 𑌘𑍃𑌤𑌂 𑌚𑍈𑌵 𑌮𑍋𑌦𑌕𑌾𑌨𑍍𑌹𑌵𑌿𑌷𑌸𑍍𑌤𑌥𑌾 ॥ 1 ॥
𑌲𑌾𑌜𑌾𑌨𑍍𑌮𑌾𑌲𑍍𑌯𑌾𑌨𑌿 𑌶𑍁𑌕𑍍𑌲𑌾𑌨𑌿 𑌪𑌾𑌯𑌸𑌂 𑌕𑍃𑌸𑌰𑌂 𑌤𑌥𑌾 ।
𑌸𑌮𑌿𑌧𑌃 𑌪𑍂𑌰𑍍𑌣𑌕𑍁𑌂𑌭𑌾𑌂𑌶𑍍𑌚 𑌦𑌦𑌰𑍍𑌶 𑌰𑌘𑍁𑌨𑌂𑌦𑌨𑌃 ॥ 1 ॥
𑌤𑌾𑌂 𑌶𑍁𑌕𑍍𑌲𑌕𑍍𑌷𑍌𑌮𑌸𑌂𑌵𑍀𑌤𑌾𑌂 𑌵𑍍𑌰𑌤𑌯𑍋𑌗𑍇𑌨 𑌕𑌰𑍍𑌶𑌿𑌤𑌾𑌮𑍍 ।
𑌤𑌰𑍍𑌪𑌯𑌂𑌤𑍀𑌂 𑌦𑌦𑌰𑍍𑌶𑌾𑌦𑍍𑌭𑌿𑌰𑍍𑌦𑍇𑌵𑌤𑌾𑌂 𑌦𑍇𑌵𑌵𑌰𑍍𑌣𑌿𑌨𑍀𑌮𑍍 ॥ 1 ॥
𑌸𑌾 𑌚𑌿𑌰𑌸𑍍𑌯𑌾𑌤𑍍𑌮𑌜𑌂 𑌦𑍃𑌷𑍍𑌟𑍍𑌵𑌾 𑌮𑌾𑌤𑍃𑌨𑌂𑌦𑌨𑌮𑌾𑌗𑌤𑌮𑍍 ।
𑌅𑌭𑌿𑌚𑌕𑍍𑌰𑌾𑌮 𑌸𑌂𑌹𑍃𑌷𑍍𑌟𑌾 𑌕𑌿𑌶𑍋𑌰𑌂 𑌬𑌡𑌬𑌾 𑌯𑌥𑌾 ॥ 20 ॥
𑌸 𑌮𑌾𑌤𑌰𑌮𑌭𑌿𑌕𑍍𑌰𑌾𑌂𑌤𑌾𑌮𑍁𑌪𑌸𑌂𑌗𑍃𑌹𑍍𑌯 𑌰𑌾𑌘𑌵𑌃 ।
𑌪𑌰𑌿𑌷𑍍𑌵𑌕𑍍𑌤𑌶𑍍𑌚 𑌬𑌾𑌹𑍁𑌭𑍍𑌯𑌾𑌮𑍁𑌪𑌾𑌘𑍍𑌰𑌾𑌤𑌶𑍍𑌚 𑌮𑍂𑌰𑍍𑌧𑌨𑌿 ॥ 21 ॥
𑌤𑌮𑍁𑌵𑌾𑌚 𑌦𑍁𑌰𑌾𑌧𑌰𑍍𑌷𑌂 𑌰𑌾𑌘𑌵𑌂 𑌸𑍁𑌤𑌮𑌾𑌤𑍍𑌮𑌨𑌃 ।
𑌕𑍌𑌶𑌲𑍍𑌯𑌾 𑌪𑍁𑌤𑍍𑌰𑌵𑌾𑌤𑍍𑌸𑌲𑍍𑌯𑌾𑌦𑌿𑌦𑌂 𑌪𑍍𑌰𑌿𑌯𑌹𑌿𑌤𑌂 𑌵𑌚𑌃 ॥ 22 ॥
𑌵𑍃𑌦𑍍𑌧𑌾𑌨𑌾𑌂 𑌧𑌰𑍍𑌮𑌶𑍀𑌲𑌾𑌨𑌾𑌂 𑌰𑌾𑌜𑌰𑍍𑌷𑍀𑌣𑌾𑌂 𑌮𑌹𑌾𑌤𑍍𑌮𑌨𑌾𑌮𑍍 ।
𑌪𑍍𑌰𑌾𑌪𑍍𑌨𑍁𑌹𑍍𑌯𑌾𑌯𑍁𑌶𑍍𑌚 𑌕𑍀𑌰𑍍𑌤𑌿𑌂 𑌚 𑌧𑌰𑍍𑌮𑌂 𑌚𑍋𑌪𑌹𑌿𑌤𑌂 𑌕𑍁𑌲𑍇 ॥ 23 ॥
𑌸𑌤𑍍𑌯𑌪𑍍𑌰𑌤𑌿𑌜𑍍𑌞𑌂 𑌪𑌿𑌤𑌰𑌂 𑌰𑌾𑌜𑌾𑌨𑌂 𑌪𑌶𑍍𑌯 𑌰𑌾𑌘𑌵 ।
𑌅𑌦𑍍𑌯𑍈𑌵 𑌹𑌿 𑌤𑍍𑌵𑌾𑌂 𑌧𑌰𑍍𑌮𑌾𑌤𑍍𑌮𑌾 𑌯𑍌𑌵𑌰𑌾𑌜𑍍𑌯𑍇𑌽𑌭𑌿𑌷𑍇𑌕𑍍𑌷𑍍𑌯𑌤𑌿 ॥ 24 ॥
𑌦𑌤𑍍𑌤𑌮𑌾𑌸𑌨𑌮𑌾𑌲𑌭𑍍𑌯 𑌭𑍋𑌜𑌨𑍇𑌨 𑌨𑌿𑌮𑌂𑌤𑍍𑌰𑌿𑌤𑌃 ।
𑌮𑌾𑌤𑌰𑌂 𑌰𑌾𑌘𑌵𑌃 𑌕𑌿𑌂𑌚𑌿𑌦𑍍𑌵𑍍𑌰𑍀𑌡𑌾𑌤𑍍𑌪𑍍𑌰𑌸𑌾𑌰𑍍𑌯𑌾𑌂𑌜𑌲𑌿𑌮𑌬𑍍𑌰𑌵𑍀𑌤𑍍 ॥ 25 ॥
𑌸 𑌸𑍍𑌵𑌭𑌾𑌵𑌵𑌿𑌨𑍀𑌤𑌶𑍍𑌚 𑌗𑍌𑌰𑌵𑌾𑌚𑍍𑌚 𑌤𑌦𑌾 𑌨𑌤𑌃 ।
𑌪𑍍𑌰𑌸𑍍𑌥𑌿𑌤𑍋 𑌦𑌂𑌡𑌕𑌾𑌰𑌣𑍍𑌯𑌮𑌾𑌪𑍍𑌰𑌷𑍍𑌟𑍁𑌮𑍁𑌪𑌚𑌕𑍍𑌰𑌮𑍇 ॥ 26 ॥
𑌦𑍇𑌵𑌿 𑌨𑍂𑌨𑌂 𑌨 𑌜𑌾𑌨𑍀𑌷𑍇 𑌮𑌹𑌦𑍍𑌭𑌯𑌮𑍁𑌪𑌸𑍍𑌥𑌿𑌤𑌮𑍍 ।
𑌇𑌦𑌂 𑌤𑌵 𑌚 𑌦𑍁𑌃𑌖𑌾𑌯 𑌵𑍈𑌦𑍇𑌹𑍍𑌯𑌾 𑌲𑌕𑍍𑌷𑍍𑌮𑌣𑌸𑍍𑌯 𑌚 ॥ 2 ॥
𑌗𑌮𑌿𑌷𑍍𑌯𑍇 𑌦𑌂𑌡𑌕𑌾𑌰𑌣𑍍𑌯𑌂 𑌕𑌿𑌮𑌨𑍇𑌨𑌾𑌸𑌨𑍇𑌨 𑌮𑍇 ।
𑌵𑌿𑌷𑍍𑌟𑌰𑌾𑌸𑌨𑌯𑍋𑌗𑍍𑌯𑍋 𑌹𑌿 𑌕𑌾𑌲𑍋𑌽𑌯𑌂 𑌮𑌾𑌮𑍁𑌪𑌸𑍍𑌥𑌿𑌤𑌃 ॥ 2 ॥
𑌚𑌤𑍁𑌰𑍍𑌦𑌶 𑌹𑌿 𑌵𑌰𑍍𑌷𑌾𑌣𑌿 𑌵𑌤𑍍𑌸𑍍𑌯𑌾𑌮𑌿 𑌵𑌿𑌜𑌨𑍇 𑌵𑌨𑍇 ।
𑌮𑌧𑍁𑌮𑍂𑌲𑌫𑌲𑍈𑌰𑍍𑌜𑍀𑌵𑌨𑍍𑌹𑌿𑌤𑍍𑌵𑌾 𑌮𑍁𑌨𑌿𑌵𑌦𑌾𑌮𑌿𑌷𑌮𑍍 ॥ 2 ॥
𑌭𑌰𑌤𑌾𑌯 𑌮𑌹𑌾𑌰𑌾𑌜𑍋 𑌯𑍌𑌵𑌰𑌾𑌜𑍍𑌯𑌂 𑌪𑍍𑌰𑌯𑌚𑍍𑌛𑌤𑌿 ।
𑌮𑌾𑌂 𑌪𑍁𑌨𑌰𑍍𑌦𑌂𑌡𑌕𑌾𑌰𑌣𑍍𑌯𑍇 𑌵𑌿𑌵𑌾𑌸𑌯𑌤𑌿 𑌤𑌾𑌪𑌸𑌮𑍍 ॥ 30 ॥
𑌸 𑌷𑌟𑍍𑌚𑌾𑌷𑍍𑌟𑍌 𑌚 𑌵𑌰𑍍𑌷𑌾𑌣𑌿 𑌵𑌤𑍍𑌸𑍍𑌯𑌾𑌮𑌿 𑌵𑌿𑌜𑌨𑍇 𑌵𑌨𑍇 ।
𑌆𑌸𑍇𑌵𑌮𑌾𑌨𑍋 𑌵𑌨𑍍𑌯𑌾𑌨𑌿 𑌫𑌲𑌮𑍂𑌲𑍈𑌶𑍍𑌚 𑌵𑌰𑍍𑌤𑌯𑌨𑍍 ॥ 31 ॥
𑌸𑌾 𑌨𑌿𑌕𑍃𑌤𑍍𑌤𑍇𑌵 𑌸𑌾𑌲𑌸𑍍𑌯 𑌯𑌷𑍍𑌟𑌿𑌃 𑌪𑌰𑌶𑍁𑌨𑌾 𑌵𑌨𑍇 ।
𑌪𑌪𑌾𑌤 𑌸𑌹𑌸𑌾 𑌦𑍇𑌵𑍀 𑌦𑍇𑌵𑌤𑍇𑌵 𑌦𑌿𑌵𑌶𑍍𑌚𑍍𑌯𑍁𑌤𑌾 ॥ 32 ॥
𑌤𑌾𑌮𑌦𑍁𑌃𑌖𑍋𑌚𑌿𑌤𑌾𑌂 𑌦𑍃𑌷𑍍𑌟𑍍𑌵𑌾 𑌪𑌤𑌿𑌤𑌾𑌂 𑌕𑌦𑌲𑍀𑌮𑌿𑌵 ।
𑌰𑌾𑌮𑌸𑍍𑌤𑍂𑌤𑍍𑌥𑌾𑌪𑌯𑌾𑌮𑌾𑌸 𑌮𑌾𑌤𑌰𑌂 𑌗𑌤𑌚𑍇𑌤𑌸𑌮𑍍 ॥ 33 ॥
𑌉𑌪𑌾𑌵𑍃𑌤𑍍𑌤𑍍𑌯𑍋𑌤𑍍𑌥𑌿𑌤𑌾𑌂 𑌦𑍀𑌨𑌾𑌂 𑌬𑌡𑌬𑌾𑌮𑌿𑌵 𑌵𑌾𑌹𑌿𑌤𑌾𑌮𑍍 ।
𑌪𑌾𑌂𑌸𑍁𑌕𑍁𑌂𑌠𑌿𑌤𑌸𑌰𑍍𑌵𑌾𑌂𑌗𑍀𑌂 𑌵𑌿𑌮𑌮𑌰𑍍𑌶 𑌚 𑌪𑌾𑌣𑌿𑌨𑌾 ॥ 34 ॥
𑌸𑌾 𑌰𑌾𑌘𑌵𑌮𑍁𑌪𑌾𑌸𑍀𑌨𑌮𑌸𑍁𑌖𑌾𑌰𑍍𑌤𑌾 𑌸𑍁𑌖𑍋𑌚𑌿𑌤𑌾 ।
𑌉𑌵𑌾𑌚 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑌮𑍁𑌪𑌶𑍃𑌣𑍍𑌵𑌤𑌿 𑌲𑌕𑍍𑌷𑍍𑌮𑌣𑍇 ॥ 35 ॥
𑌯𑌦𑌿 𑌪𑍁𑌤𑍍𑌰 𑌨 𑌜𑌾𑌯𑍇𑌥𑌾 𑌮𑌮 𑌶𑍋𑌕𑌾𑌯 𑌰𑌾𑌘𑌵 ।
𑌨 𑌸𑍍𑌮 𑌦𑍁𑌃𑌖𑌮𑌤𑍋 𑌭𑍂𑌯𑌃 𑌪𑌶𑍍𑌯𑍇𑌯𑌮𑌹𑌮𑌪𑍍𑌰𑌜𑌾𑌃 ॥ 36 ॥
𑌏𑌕 𑌏𑌵 𑌹𑌿 𑌵𑌂𑌧𑍍𑌯𑌾𑌯𑌾 𑌶𑍍𑌶𑍋𑌕𑍋 𑌭𑌵𑌤𑌿 𑌮𑌾𑌨𑌸𑌃 ।
𑌅𑌪𑍍𑌰𑌜𑌾𑌽𑌸𑍍𑌮𑍀𑌤𑌿 𑌸𑌂𑌤𑌾𑌪𑍋 𑌨 𑌹𑍍𑌯𑌨𑍍𑌯𑌃 𑌪𑍁𑌤𑍍𑌰 𑌵𑌿𑌦𑍍𑌯𑌤𑍇 ॥ 3 ॥
𑌨 𑌦𑍃𑌷𑍍𑌟𑌪𑍂𑌰𑍍𑌵𑌂 𑌕𑌲𑍍𑌯𑌾𑌣𑌂 𑌸𑍁𑌖𑌂 𑌵𑌾 𑌪𑌤𑌿𑌪𑍌𑌰𑍁𑌷𑍇 ।
𑌅𑌪𑌿 𑌪𑍁𑌤𑍍𑌰𑍇 𑌽𑌪𑌿 𑌪𑌶𑍍𑌯𑍇𑌯𑌮𑌿𑌤𑌿 𑌰𑌾𑌮𑌾𑌽𑌸𑍍𑌥𑌿𑌤𑌂 𑌮𑌯𑌾 ॥ 3 ॥
𑌸𑌾 𑌬𑌹𑍂𑌨𑍍𑌯𑌮𑌨𑍋𑌜𑍍𑌞𑌾𑌨𑌿 𑌵𑌾𑌕𑍍𑌯𑌾𑌨𑌿 𑌹𑍃𑌦𑌯𑌚𑍍𑌛𑌿𑌦𑌾𑌮𑍍 ।
𑌅𑌹𑌂 𑌶𑍍𑌰𑍋𑌷𑍍𑌯𑍇 𑌸𑌪𑌤𑍍𑌨𑍀𑌨𑌾𑌮𑌵𑌰𑌾𑌣𑌾𑌂 𑌵𑌰𑌾 𑌸𑌤𑍀 ॥ 3 ॥
𑌅𑌤𑍋 𑌦𑍁𑌃𑌖𑌤𑌰𑌂 𑌕𑌿𑌂 𑌨𑍁 𑌪𑍍𑌰𑌮𑌦𑌾𑌨𑌾𑌂 𑌭𑌵𑌿𑌷𑍍𑌯𑌤𑌿 ।
𑌮𑌮 𑌶𑍋𑌕𑍋 𑌵𑌿𑌲𑌾𑌪𑌶𑍍𑌚 𑌯𑌾𑌦𑍃𑌶𑍋𑌽𑌯𑌮𑌨𑌂𑌤𑌕𑌃 ॥ 40 ॥
𑌤𑍍𑌵𑌯𑌿 𑌸𑌨𑍍𑌨𑌿𑌹𑌿𑌤𑍇𑌽𑌪𑍍𑌯𑍇𑌵𑌮𑌹𑌮𑌾𑌸𑌂 𑌨𑌿𑌰𑌾𑌕𑍃𑌤𑌾 ।
𑌕𑌿𑌂 𑌪𑍁𑌨𑌃 𑌪𑍍𑌰𑍋𑌷𑌿𑌤𑍇 𑌤𑌾𑌤 𑌧𑍍𑌰𑍁𑌵𑌂 𑌮𑌰𑌣𑌮𑍇𑌵 𑌮𑍇 ॥ 41 ॥
𑌅𑌤𑍍𑌯𑌂𑌤𑌨𑌿𑌗𑍃𑌹𑍀𑌤𑌾𑌸𑍍𑌮𑌿 𑌭𑌰𑍍𑌤𑍁𑌰𑍍𑌨𑌿𑌤𑍍𑌯𑌮𑌤𑌂𑌤𑍍𑌰𑌿𑌤𑌾 ।
𑌪𑌰𑌿𑌵𑌾𑌰𑍇𑌣 𑌕𑍈𑌕𑍇𑌯𑍍𑌯𑌾 𑌸𑍍𑌸𑌮𑌾 𑌵𑌾𑌪𑍍𑌯𑌥𑌵𑌾𑌽𑌵𑌰𑌾 ॥ 42 ॥
𑌯𑍋𑌽𑌹𑌿 𑌮𑌾𑌂 𑌸𑍇𑌵𑌤𑍇 𑌕𑌶𑍍𑌚𑌿𑌦𑌥𑌵𑌾𑌪𑍍𑌯𑌨𑍁𑌵𑌰𑍍𑌤𑌤𑍇 ।
𑌕𑍈𑌕𑍇𑌯𑍍𑌯𑌾𑌃 𑌪𑍁𑌤𑍍𑌰𑌮𑌨𑍍𑌵𑍀𑌕𑍍𑌷𑍍𑌯 𑌸𑍍𑌵𑌶𑍍𑌚𑌿 𑌜𑌨𑍋 𑌨𑌾𑌭𑌿𑌭𑌾𑌷𑌤𑍇 ॥ 43 ॥
𑌨𑌿𑌤𑍍𑌯𑌕𑍍𑌰𑍋𑌧𑌤𑌯𑌾 𑌤𑌸𑍍𑌯𑌾𑌃 𑌕𑌥𑌂 𑌨𑍁 𑌖𑌰𑌵𑌾𑌦𑌿𑌤𑌤𑍍 ।
𑌕𑍈𑌕𑍇𑌯𑍍𑌯𑌾 𑌵𑌦𑌨𑌂 𑌦𑍍𑌰𑌷𑍍𑌟𑍁𑌂 𑌪𑍁𑌤𑍍𑌰 𑌶𑌕𑍍𑌷𑍍𑌯𑌾𑌮𑌿 𑌦𑍁𑌰𑍍𑌗𑌤𑌾 ॥ 44 ॥
𑌦𑌶 𑌸𑌪𑍍𑌤 𑌚 𑌵𑌰𑍍𑌷𑌾𑌣𑌿 𑌜𑌾𑌤𑌸𑍍𑌯 𑌤𑌵 𑌰𑌾𑌘𑌵 𑌅𑌤𑌿𑌤𑌾𑌨𑌿 𑌪𑍍𑌰𑌕𑌾𑌂𑌕𑍍𑌷𑌂𑌤𑍍𑌯𑌾 𑌮𑌯𑌾 𑌦𑍁𑌃𑌖𑌪𑌰𑌿𑌕𑍍𑌷𑌯𑌮𑍍 ॥ 45 ॥
𑌤𑌦𑌕𑍍𑌷𑌯𑌂 𑌮𑌹𑌦𑍍𑌦𑍁𑌃𑌖𑌂 𑌨𑍋𑌤𑍍𑌸𑌹𑍇 𑌸𑌹𑌿𑌤𑍁𑌂 𑌚𑌿𑌰𑌮𑍍 ।
𑌵𑌿𑌪𑍍𑌰𑌕𑌾𑌰𑌂 𑌸𑌪𑌤𑍍𑌨𑍀𑌨𑌾𑌮𑍇𑌵𑌂 𑌜𑍀𑌰𑍍𑌣𑌾𑌽𑌪𑌿 𑌰𑌾𑌘𑌵 ॥ 46 ॥
𑌅𑌪𑌶𑍍𑌯𑌂𑌤𑍀 𑌤𑌵 𑌮𑍁𑌖𑌂 𑌪𑌰𑌿𑌪𑍂𑌰𑍍𑌣𑌶𑌶𑌿𑌪𑍍𑌰𑌭𑌮𑍍 ।
𑌕𑍃𑌪𑌣𑌾 𑌵𑌰𑍍𑌤𑌯𑌿𑌷𑍍𑌯𑌾𑌮𑌿 𑌕𑌥𑌂 𑌕𑍃𑌪𑌣𑌜𑍀𑌵𑌿𑌕𑌾𑌮𑍍 ॥ 4 ॥
𑌉𑌪𑌵𑌾𑌸𑍈𑌶𑍍𑌚 𑌯𑍋𑌗𑍈𑌶𑍍𑌚 𑌬𑌹𑍁𑌭𑌿𑌶𑍍𑌚 𑌪𑌰𑌿𑌶𑍍𑌰𑌮𑍈𑌃 ।
𑌦𑍁𑌃𑌖𑌂 𑌸𑌂𑌵𑌰𑍍𑌧𑌿𑌤𑍋 𑌮𑍋𑌘𑌂 𑌤𑍍𑌵𑌂 𑌹𑌿 𑌦𑍁𑌰𑍍𑌗𑌤𑌯𑌾 𑌮𑌯𑌾 ॥ 4 ॥
𑌸𑍍𑌥𑌿𑌰𑌂 𑌤𑍁 𑌹𑍃𑌦𑌯𑌂 𑌮𑌨𑍍𑌯𑍇 𑌮𑌮𑍇𑌦𑌂 𑌯𑌨𑍍𑌨 𑌦𑍀𑌰𑍍𑌯𑌤𑍇 ।
𑌪𑍍𑌰𑌾𑌵𑍃𑌷𑍀𑌵 𑌮𑌹𑌾𑌨𑌦𑍍𑌯𑌾 𑌸𑍍𑌪𑍃𑌷𑍍𑌟𑌂 𑌕𑍂𑌲𑌂 𑌨𑌵𑌾𑌂𑌭𑌸𑌾 ॥ 4 ॥
𑌮𑌮𑍈𑌵 𑌨𑍂𑌨𑌂 𑌮𑌰𑌣𑌂 𑌨 𑌵𑌿𑌦𑍍𑌯𑌤𑍇 𑌨 𑌚𑌾𑌵𑌕𑌾𑌽𑌶𑍋𑌸𑍍𑌤𑌿 𑌯𑌮𑌕𑍍𑌷𑌯𑍇𑌽𑌮𑌮 ।
𑌯𑌦𑌂𑌤𑌕𑍋𑌽𑌦𑍍𑌯𑍈𑌵 𑌨 𑌮𑌾𑌂 𑌜𑌿𑌹𑍀𑌰𑍍𑌷𑌤𑌿 ।
𑌪𑍍𑌰𑌸𑌹𑍍𑌯 𑌸𑌿𑌂𑌹𑍋 𑌰𑍁𑌦𑌤𑍀𑌂 𑌮𑍃𑌗𑍀𑌮𑌿𑌵 ॥ 50 ॥
𑌸𑍍𑌥𑌿𑌰𑌂 𑌹𑌿 𑌨𑍂𑌨𑌂 𑌹𑍃𑌦𑌯𑌂 𑌮𑌮𑌾𑌯𑌸𑌂 𑌨 𑌭𑌿𑌦𑍍𑌯𑌤𑍇 𑌯𑌦𑍍𑌭𑍁𑌵𑌿 𑌨𑌾𑌵𑌦𑍀𑌰𑍍𑌯𑌤𑍇 ।
𑌅𑌨𑍇𑌨 𑌦𑍁𑌃𑌖𑍇𑌨 𑌚 𑌦𑍇𑌹𑌮𑌰𑍍𑌪𑌿𑌤𑌂 𑌧𑍍𑌰𑍁𑌵𑌂 𑌹𑍍𑌯𑌕𑌾𑌲𑍇 𑌮𑌰𑌣𑌂 𑌨 𑌵𑌿𑌦𑍍𑌯𑌤𑍇 ॥ 51 ॥
𑌇𑌦𑌂 𑌹𑌿 𑌦𑍁𑌃𑌖𑌂 𑌯𑌦𑌨𑌰𑍍𑌥𑌕𑌾𑌨𑌿 𑌮𑍇 𑌵𑍍𑌰𑌤𑌾𑌨𑌿 𑌦𑌾𑌨𑌾𑌨𑌿 𑌚 𑌸𑌂𑌯𑌮𑌾𑌶𑍍𑌚 𑌹𑌿 ।
𑌤𑌪𑌶𑍍𑌚 𑌤𑌪𑍍𑌤𑌂 𑌯𑌦𑌪𑌤𑍍𑌯𑌕𑌾𑌰𑌣𑌾 𑌤𑍍𑌸𑍁𑌨𑌿𑌷𑍍𑌫𑌲𑌂 𑌬𑍀𑌜𑌮𑌿𑌵𑍋𑌪𑍍𑌤𑌮𑍂𑌷𑌰𑍇 ॥ 52 ॥
𑌯𑌦𑌿 𑌹𑍍𑌯𑌕𑌾𑌲𑍇 𑌮𑌰𑌣𑌂 𑌸𑍍𑌵𑌯𑍇𑌚𑍍𑌛𑌯𑌾 𑌲𑌭𑍇𑌤 𑌕𑌶𑍍𑌚𑌿𑌦𑍍𑌗𑍁𑌰𑍁𑌦𑍁𑌃𑌖𑌕𑌰𑍍𑌶𑌿𑌤𑌃 ।
𑌗𑌤𑌾𑌹𑌮𑌦𑍍𑌯𑍈𑌵 𑌪𑌰𑍇𑌤𑌸𑌂𑌸𑌦𑌂 𑌵𑌿𑌨𑌾 𑌤𑍍𑌵𑌯𑌾 𑌧𑍇𑌨𑍁𑌰𑌿𑌵𑌾𑌤𑍍𑌮𑌜𑍇𑌨 𑌵𑍈 ॥ 53 ॥
𑌅𑌥𑌾𑌪𑌿 𑌕𑌿𑌂 𑌜𑍀𑌵𑌿𑌤𑌮𑌦𑍍𑌯 𑌮𑍇 𑌵𑍃𑌥𑌾 𑌤𑍍𑌵𑌯𑌾 𑌵𑌿𑌨𑌾 𑌚𑌂𑌦𑍍𑌰𑌨𑌿𑌭𑌾𑌨𑌨𑌪𑍍𑌰𑌭 ।
𑌅𑌨𑍁𑌵𑍍𑌰𑌜𑌿𑌷𑍍𑌯𑌾𑌮𑌿 𑌵𑌨𑌂 𑌤𑍍𑌵𑌯𑍈𑌵 𑌗𑍌 𑌸𑍍𑌸𑍁𑌦𑍁𑌰𑍍𑌬𑌲𑌾 𑌵𑌤𑍍𑌸𑌮𑌿𑌵𑌾𑌨𑍁𑌕𑌾𑌂𑌕𑍍𑌷𑌯𑌾 ॥ 54 ॥
𑌭𑍃𑌶𑌮𑌸𑍁𑌖𑌮𑌮𑌰𑍍𑌷𑌿𑌤𑌾 𑌤𑌦𑌾 𑌬𑌹𑍁 𑌵𑌿𑌲𑌲𑌾𑌪 𑌸𑌮𑍀𑌕𑍍𑌷𑍍𑌯 𑌰𑌾𑌘𑌵𑌮𑍍 ।
𑌵𑍍𑌯𑌸𑌨𑌮𑍁𑌪𑌨𑌿𑌶𑌮𑍍𑌯 𑌸𑌾 𑌮𑌹 𑌤𑍍𑌸𑍁𑌤𑌮𑌿𑌵 𑌬𑌦𑍍𑌧𑌮𑌵𑍇𑌕𑍍𑌷𑍍𑌯 𑌕𑌿𑌨𑍍𑌨𑌰𑍀 ॥ 55 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌵𑌿𑌂𑌶𑌸𑍍𑌸𑌰𑍍𑌗𑌃 ॥
