𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌮𑌸𑍍𑌸𑌰𑍍𑌗𑌃 ।
𑌪𑌰𑌿𑌤𑍁𑌷𑍍𑌟𑌸𑍍𑌤𑍁 𑌸𑍁𑌗𑍍𑌰𑍀𑌵𑌸𑍍𑌤𑍇𑌨 𑌵𑌾𑌕𑍍𑌯𑍇𑌨 𑌵𑌾𑌨𑌰𑌃 ।
𑌲𑌕𑍍𑌷𑍍𑌮𑌣𑌸𑍍𑌯𑌾𑌗𑍍𑌰𑌤𑍋 𑌰𑌾𑌮𑌮𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 1 ॥
𑌸𑌰𑍍𑌵𑌥𑌾𑌽𑌹𑌮𑌨𑍁𑌗𑍍𑌰𑌾𑌹𑍍𑌯𑍋 𑌦𑍇𑌵𑌤𑌾𑌨𑌾𑌂 𑌨 𑌸𑌂𑌶𑌯𑌃 ।
𑌉𑌪𑌪𑌨𑍍𑌨 𑌗𑍁𑌣𑍋𑌪𑍇𑌤𑌸𑍍𑌸𑌖𑌾 𑌯𑌸𑍍𑌯 𑌭𑌵𑌾𑌨𑍍𑌮𑌮 ॥ 2 ॥
𑌶𑌕𑍍𑌯𑌂 𑌖𑌲𑍁 𑌭𑌵𑍇𑌦𑍍𑌰𑌾𑌮 𑌸𑌹𑌾𑌯𑍇𑌨 𑌤𑍍𑌵𑌯𑌾𑌽𑌨𑌘 ।
𑌸𑍁𑌰𑌰𑌾𑌜𑍍𑌯𑌮𑌪𑌿 𑌪𑍍𑌰𑌾𑌪𑍍𑌤𑍁𑌂 𑌸𑍍𑌵𑌰𑌾𑌜𑍍𑌯𑌂 𑌕𑌿𑌂 𑌪𑌨𑌃 𑌪𑍍𑌰𑌭𑍋 ॥ 3 ॥
𑌸𑍋𑌽𑌹𑌂 𑌸𑌭𑌾𑌜𑍍𑌯𑍋 𑌬𑌂𑌧𑍂𑌨𑌾𑌂 𑌸𑍁𑌹𑍃𑌦𑌾𑌂 𑌚𑍈𑌵 𑌰𑌾𑌘𑌵 ।
𑌯𑌸𑍍𑌯𑌾𑌗𑍍𑌨𑌿𑌸𑌾𑌕𑍍𑌷𑌿𑌕𑌂 𑌮𑌿𑌤𑍍𑌰𑌂 𑌲𑌬𑍍𑌧𑌂 𑌰𑌾𑌘𑌵𑌵𑌂𑌶𑌜𑌮𑍍 ॥ 4 ॥
𑌅𑌹𑌮𑌪𑍍𑌯𑌨𑍁𑌰𑍂𑌪𑌸𑍍𑌤𑍇 𑌵𑌯𑌸𑍍𑌯𑍋 𑌜𑍍𑌞𑌾𑌸𑍍𑌯𑌸𑍇 𑌶𑌨𑍈𑌃 ।
𑌨 𑌤𑍁 𑌵𑌕𑍍𑌤𑍁𑌂 𑌸𑌮𑌰𑍍𑌥𑍋𑌽𑌹𑌂 𑌸𑍍𑌵𑌯𑌮𑌾𑌤𑍍𑌮𑌗𑌤𑌾𑌨𑍍𑌗𑍁𑌣𑌾𑌨𑍍 ॥ 5 ॥
𑌮𑌹𑌾𑌤𑍍𑌮𑌨𑌾𑌂 𑌤𑍁 𑌭𑍂𑌯𑌿𑌷𑍍𑌠𑌂 𑌤𑍍𑌵𑌦𑍍𑌵𑌿𑌧𑌾𑌨𑌾𑌂 𑌕𑍃𑌤𑌾𑌤𑍍𑌮𑌨𑌾𑌮𑍍 ।
𑌨𑌿𑌶𑍍𑌚𑌲𑌾 𑌭𑌵𑌤𑌿 𑌪𑍍𑌰𑍀𑌤𑌿𑌰𑍍𑌧𑍈𑌰𑍍𑌯𑌮𑌾𑌤𑍍𑌮𑌵𑌤𑌾𑌮𑌿𑌵 ॥ 6 ॥
𑌰𑌜𑌤𑌂 𑌵𑌾 𑌸𑍁𑌵𑌰𑍍𑌣𑌂 𑌵𑌾 𑌵𑌸𑍍𑌤𑍍𑌰𑌾𑌣𑍍𑌯𑌾𑌭𑌰𑌣𑌾𑌨𑌿 𑌚 ।
𑌅𑌵𑌿𑌭𑌕𑍍𑌤𑌾𑌨𑌿 𑌸𑌾𑌧𑍂𑌨𑌾𑌮𑌵𑌗𑌚𑍍𑌛𑌂𑌤𑌿 𑌸𑌾𑌧𑌵𑌃 ॥ ॥
𑌆𑌢𑍍𑌯𑍋 𑌵𑌾𑌪𑌿 𑌦𑌰𑌿𑌦𑍍𑌰𑍋 𑌵𑌾 𑌦𑍁𑌃𑌖𑌿𑌤𑌸𑍍𑌸𑍁𑌖𑌿𑌤𑍋𑌽𑌪𑌿 𑌵𑌾 ।
𑌨𑌿𑌰𑍍𑌦𑍋𑌷𑍋 𑌵𑌾 𑌸𑌦𑍋𑌷𑍋 𑌵𑌾 𑌵𑌯𑌸𑍍𑌯𑌃 𑌪𑌰𑌮𑌾 𑌗𑌤𑌿𑌃 ॥ ॥
𑌧𑌨𑌤𑍍𑌯𑌾𑌗𑌸𑍍𑌸𑍁𑌖𑌤𑍍𑌯𑌾𑌗𑍋 𑌦𑍇𑌹𑌤𑍍𑌯𑌾𑌗𑍋𑌽𑌪𑌿 𑌵𑌾 𑌪𑍁𑌨𑌃 ।
𑌵𑌯𑌸𑍍𑌯𑌾𑌰𑍍𑌥𑍇 𑌪𑍍𑌰𑌵𑌰𑍍𑌤𑌂𑌤𑍇 𑌸𑍍𑌨𑍇𑌹𑌂 𑌦𑍃𑌷𑍍𑌟𑌵𑌾 𑌤𑌥𑌾𑌵𑌿𑌧𑌮𑍍 ॥ ॥
𑌤𑌤𑍍𑌤𑌥𑍇𑌤𑍍𑌯𑌬𑍍𑌰𑌵𑍀𑌦𑍍𑌰𑌾𑌮𑌸𑍍𑌸𑍁𑌗𑍍𑌰𑍀𑌵𑌂 𑌪𑍍𑌰𑌿𑌯𑌵𑌾𑌦𑌿𑌨𑌮𑍍 ।
𑌲𑌕𑍍𑌷𑍍𑌮𑌣𑌸𑍍𑌯𑌾𑌗𑍍𑌰𑌤𑍋 𑌲𑌕𑍍𑌷𑍍𑌮𑍍𑌯𑌾 𑌵𑌾𑌸𑌵𑌸𑍍𑌯𑍇𑌵 𑌧𑍀𑌮𑌤𑌃 ॥ 10 ॥
𑌤𑌤𑍋 𑌰𑌾𑌮𑌂 𑌸𑍍𑌥𑌿𑌤𑌂 𑌦𑍃𑌷𑍍𑌟𑍍𑌵𑌾 𑌲𑌕𑍍𑌷𑍍𑌮𑌣𑌂 𑌚 𑌮𑌹𑌾𑌬𑌲𑌮𑍍 ।
𑌸𑍁𑌗𑍍𑌰𑍀𑌵𑌸𑍍𑌸𑌰𑍍𑌵𑌤𑌶𑍍𑌚𑌕𑍍𑌷𑍁𑌰𑍍𑌵𑌨𑍇 𑌲𑍋𑌲𑌮𑌪𑌾𑌤𑌯𑌤𑍍 ॥ 11 ॥
𑌸 𑌦𑌦𑌰𑍍𑌶 𑌤𑌤𑌸𑍍𑌸𑌾𑌲𑌮𑌵𑌿𑌦𑍂𑌰𑍇 𑌹𑌰𑍀𑌶𑍍𑌵𑌰𑌃 ।
𑌸𑍁𑌪𑍁𑌷𑍍𑌪𑌮𑍀𑌷𑌤𑍍𑌪𑌤𑍍𑌰𑌾𑌢𑍍𑌯𑌂 𑌭𑍍𑌰𑌮𑌰𑍈𑌰𑍁𑌪𑌶𑍋𑌭𑌿𑌤𑌮𑍍 ॥ 12 ॥
𑌤𑌸𑍍𑌯𑍈𑌕𑌾𑌂 𑌪𑌰𑍍𑌣𑌬𑌹𑍁𑌲𑌾𑌂 𑌭𑌂𑌕𑍍𑌤𑍍𑌵𑌾 𑌶𑌾𑌖𑌾𑌂 𑌸𑍁𑌪𑍁𑌷𑍍𑌪𑌿𑌤𑌾𑌮𑍍 ।
𑌸𑌾𑌲𑌸𑍍𑌯𑌾𑌸𑍍𑌤𑍀𑌰𑍍𑌯 𑌸𑍁𑌗𑍍𑌰𑍀𑌵𑍋 𑌨𑌿𑌷𑌸𑌾𑌦 𑌸𑌰𑌾𑌘𑌵𑌃 ॥ 13 ॥
𑌤𑌾𑌵𑌾𑌸𑍀𑌨𑍌 𑌤𑌤𑍋 𑌦𑍃𑌷𑍍𑌟𑍍𑌵𑌾 𑌹𑌨𑍂𑌮𑌾𑌨𑌪𑌿 𑌲𑌕𑍍𑌷𑍍𑌮𑌣𑌮𑍍 ।
𑌸𑌾𑌲𑌶𑌾𑌖𑌾𑌂 𑌸𑌮𑍁𑌤𑍍𑌪𑌾𑌟𑍍𑌯 𑌵𑌿𑌨𑍀𑌤𑌮𑍁𑌪𑌵𑍇𑌶𑌯𑌤𑍍 ॥ 14 ॥
𑌸𑍁𑌖𑍋𑌪𑌵𑌿𑌷𑍍𑌟𑌂 𑌰𑌾𑌮𑌂 𑌤𑍁 𑌪𑍍𑌰𑌸𑌨𑍍𑌨𑌮𑍁𑌦𑌧𑌿𑌂 𑌯𑌥𑌾 ।
𑌫𑌲𑌪𑍁𑌷𑍍𑌪𑌸𑌮𑌾𑌕𑍀𑌰𑍍𑌣𑍇 𑌤𑌸𑍍𑌮𑌿𑌨𑍍 𑌗𑌿𑌰𑌿𑌵𑌰𑍋𑌤𑍍𑌤𑌮𑍇 ॥ 15 ॥
𑌤𑌤𑌃 𑌪𑍍𑌰𑌹𑍃𑌷𑍍𑌟𑌸𑍍𑌸𑍁𑌗𑍍𑌰𑍀𑌵𑌶𑍍𑌲𑌕𑍍𑌷𑍍𑌣𑌂 𑌮𑌧𑍁𑌰𑌯𑌾 𑌗𑌿𑌰𑌾 ।
𑌉𑌵𑌾𑌚 𑌪𑍍𑌰𑌣𑌯𑌾𑌦𑍍𑌰𑌾𑌮𑌂 𑌹𑌰𑍍𑌷𑌵𑍍𑌯𑌾𑌕𑍁𑌲𑌿𑌤𑌾𑌕𑍍𑌷𑌰𑌮𑍍 ॥ 16 ॥
𑌅𑌹𑌂 𑌵𑌿𑌨𑌿𑌕𑍃𑌤𑍋 𑌭𑍍𑌰𑌾𑌤𑍍𑌰𑌾 𑌚𑌰𑌾𑌮𑍍𑌯𑍇𑌷 𑌭𑌯𑌾𑌰𑍍𑌦𑌿𑌤𑌃 ।
𑌋𑌷𑍍𑌯𑌮𑍂𑌕𑌂 𑌗𑌿𑌰𑌿𑌵𑌰𑌂 𑌹𑍃𑌤𑌭𑌾𑌰𑍍𑌯𑌸𑍍𑌸𑍁𑌦𑍁𑌃𑌖𑌿𑌤𑌃 ॥ 1 ॥
𑌸𑍋𑌽𑌹𑌂 𑌤𑍍𑌰𑌸𑍍𑌤𑍋 𑌭𑌯𑍇 𑌮𑌗𑍍𑌨𑍋 𑌵𑌸𑌾𑌮𑍍𑌯𑍁𑌦𑍍𑌭𑍍𑌰𑌾𑌂𑌤𑌚𑍇𑌤𑌨𑌃 ।
𑌵𑌾𑌲𑌿𑌨𑌾 𑌨𑌿𑌕𑍃𑌤𑍋 𑌭𑍍𑌰𑌾𑌤𑍍𑌰𑌾 𑌕𑍃𑌤𑌵𑍈𑌰𑌶𑍍𑌚 𑌰𑌾𑌘𑌵 ॥ 1 ॥
𑌵𑌾𑌲𑌿𑌨𑍋 𑌮𑍇 𑌭𑌯𑌾𑌰𑍍𑌤𑌸𑍍𑌯 𑌸𑌰𑍍𑌵𑌲𑍋𑌕𑌾𑌭𑌯𑌂𑌕𑌰 ।
𑌮𑌮𑌾𑌪𑌿 𑌤𑍍𑌵𑌮𑌨𑌾𑌥𑌸𑍍𑌯 𑌪𑍍𑌰𑌸𑌾𑌦𑌂 𑌕𑌰𑍍𑌤𑍁𑌮𑌰𑍍𑌹𑌸𑌿 ॥ 1 ॥
𑌏𑌵𑌮𑍁𑌕𑍍𑌤𑌸𑍍𑌤𑍁 𑌤𑍇𑌜𑌸𑍍𑌵𑍀 𑌧𑌰𑍍𑌮𑌜𑍍𑌞𑍋 𑌧𑌰𑍍𑌮𑌵𑌤𑍍𑌸𑌲𑌃 ।
𑌪𑍍𑌰𑌤𑍍𑌯𑍁𑌵𑌾𑌚 𑌸 𑌕𑌾𑌕𑍁𑌤𑍍𑌸𑍍𑌥𑌸𑍍𑌸𑍁𑌗𑍍𑌰𑍀𑌵𑌂 𑌪𑍍𑌰𑌹𑌸𑌨𑍍𑌨𑌿𑌵 ॥ 20 ॥
𑌉𑌪𑌕𑌾𑌰𑌫𑌲𑌂 𑌮𑌿𑌤𑍍𑌰𑌮𑌪𑌕𑌾𑌰𑍋𑌽𑌰𑌿𑌲𑌕𑍍𑌷𑌣𑌮𑍍 ।
𑌅𑌦𑍍𑌯𑍈𑌵 𑌤𑌂 𑌹𑌨𑌿𑌷𑍍𑌯𑌾𑌮𑌿 𑌤𑌵 𑌭𑌾𑌰𑍍𑌯𑌾𑌪𑌹𑌾𑌰𑌿𑌣𑌮𑍍 ॥ 21 ॥
𑌇𑌮𑍇 𑌹𑌿 𑌮𑍇 𑌮𑌹𑌾𑌵𑍇𑌗𑌾 𑌪𑌤𑍍𑌰𑌿𑌣𑌸𑍍𑌤𑌿𑌗𑍍𑌮𑌤𑍇𑌜𑌸𑌃 ।
𑌕𑌾𑌰𑍍𑌤𑌿𑌕𑍇𑌯𑌵𑌨𑍋𑌦𑍍𑌭𑍂𑌤𑌾𑌶𑍍𑌶𑌰𑌾 𑌹𑍇𑌮𑌵𑌿𑌭𑍂𑌷𑌿𑌤𑌾𑌃 ॥ 22 ॥
𑌕𑌂𑌕𑌪𑌤𑍍𑌰𑌪𑌰𑌿𑌚𑍍𑌛𑌨𑍍𑌨𑌾 𑌮𑌹𑍇𑌂𑌦𑍍𑌰𑌾𑌶𑌨𑌿𑌸𑌨𑍍𑌨𑌿𑌭𑌾𑌃 ।
𑌸𑍁𑌪𑌰𑍍𑌵𑌾𑌣𑌸𑍍𑌸𑍁𑌤𑍀𑌕𑍍𑌷𑍍𑌣𑌾𑌗𑍍𑌰𑌾𑌸𑍍𑌸𑌰𑍋𑌷𑌾 𑌭𑍁𑌜𑌗𑌾 𑌇𑌵 ॥ 23 ॥
𑌭𑍍𑌰𑌾𑌤𑍃𑌸𑌂𑌜𑍍𑌞𑌮𑌮𑌿𑌤𑍍𑌰𑌂 𑌤𑍇 𑌵𑌾𑌲𑌿𑌨𑌂 𑌕𑍃𑌤𑌕𑌿𑌲𑍍𑌬𑌿𑌷𑌮𑍍 ।
𑌶𑌰𑍈𑌰𑍍𑌵𑌿𑌨𑌿𑌹𑌤𑌂 𑌪𑌶𑍍𑌯 𑌵𑌿𑌕𑍀𑌰𑍍𑌣𑌮𑌿𑌵 𑌪𑌰𑍍𑌵𑌤𑌮𑍍 ॥ 24 ॥
𑌰𑌾𑌘𑌵𑌸𑍍𑌯 𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌸𑍁𑌗𑍍𑌰𑍀𑌵𑍋 𑌵𑌾𑌹𑌿𑌨𑍀𑌪𑌤𑌿𑌃 ।
𑌪𑍍𑌰𑌹𑌰𑍍𑌷𑌮𑌤𑍁𑌲𑌂 𑌲𑍇𑌭𑍇 𑌸𑌾𑌧𑍁 𑌸𑌾𑌧𑍍𑌵𑌿𑌤𑌿 𑌚𑌾𑌬𑍍𑌰𑌵𑍀𑌤𑍍 ॥ 25 ॥
𑌰𑌾𑌮 𑌶𑍋𑌕𑌾𑌭𑌿𑌭𑍂𑌤𑍋𑌽𑌹𑌂 𑌶𑍋𑌕𑌾𑌰𑍍𑌤𑌾𑌨𑌾𑌂 𑌭𑌵𑌾𑌨𑍍𑌗𑌤𑌿𑌃 ।
𑌵𑌯𑌸𑍍𑌯 𑌇𑌤𑌿 𑌕𑍃𑌤𑍍𑌵𑌾 𑌹𑌿 𑌤𑍍𑌵𑌯𑍍𑌯𑌹𑌂 𑌪𑌰𑌿𑌦𑍇𑌵𑌯𑍇 ॥ 26 ॥
𑌤𑍍𑌵𑌂 𑌹𑌿 𑌪𑌾𑌣𑌿𑌪𑍍𑌰𑌦𑌾𑌨𑍇𑌨 𑌵𑌯𑌸𑍍𑌯𑍋 𑌮𑍇𑌽𑌗𑍍𑌨𑌿𑌸𑌾𑌕𑍍𑌷𑌿𑌕𑌮𑍍 ।
𑌕𑍃𑌤𑌃 𑌪𑍍𑌰𑌾𑌣𑍈𑌰𑍍𑌬𑌹𑍁𑌮𑌤𑌸𑍍𑌸𑌤𑍍𑌯𑍇𑌨𑌾𑌪𑌿 𑌶𑌪𑌾𑌮𑌿 𑌤𑍇 ॥ 2 ॥
𑌵𑌯𑌸𑍍𑌯 𑌇𑌤𑌿 𑌕𑍃𑌤𑍍𑌵𑌾 𑌚 𑌵𑌿𑌸𑍍𑌰𑌬𑍍𑌧𑌃 𑌪𑍍𑌰𑌵𑌦𑌾𑌮𑍍𑌯𑌹𑌮𑍍 ।
𑌦𑍁𑌃𑌖𑌮𑌂𑌤𑌰𑍍𑌗𑌤𑌂 𑌯𑌨𑍍𑌮𑍇 𑌮𑌨𑍋 𑌹𑌰𑌤𑌿 𑌨𑌿𑌤𑍍𑌯𑌶𑌃 ॥ 2 ॥
𑌏𑌤𑌾𑌵𑌦𑍁𑌕𑍍𑌤𑍍𑌵𑌾 𑌵𑌚𑌨𑌂 𑌬𑌾𑌷𑍍𑌪𑌦𑍂𑌷𑌿𑌤𑌲𑍋𑌚𑌨𑌃 ।
𑌬𑌾𑌷𑍍𑌪𑍋𑌪𑌹𑌤𑌯𑌾 𑌵𑌾𑌚𑌾 𑌨𑍋𑌚𑍍𑌚𑍈𑌶𑍍𑌶𑌕𑍍𑌨𑍋𑌤𑌿 𑌭𑌾𑌷𑌿𑌤𑍁𑌮𑍍 ॥ 2 ॥
𑌬𑌾𑌷𑍍𑌪𑌵𑍇𑌗𑌂 𑌤𑍁 𑌸𑌹𑌸𑌾 𑌨𑌦𑍀𑌵𑍇𑌗𑌮𑌿𑌵𑌾𑌗𑌤𑌮𑍍 ।
𑌧𑌾𑌰𑌯𑌾𑌮𑌾𑌸 𑌧𑍈𑌰𑍍𑌯𑍇𑌣 𑌸𑍁𑌗𑍍𑌰𑍀𑌵𑍋 𑌰𑌾𑌮𑌸𑌨𑍍𑌨𑌿𑌧𑍌 ॥ 30 ॥
𑌸𑌨𑍍𑌨𑌿𑌗𑍃𑌹𑍍𑌯 𑌤𑍁 𑌤𑌂 𑌬𑌾𑌷𑍍𑌪𑌂 𑌪𑍍𑌰𑌮𑍃𑌜𑍍𑌯 𑌨𑌯𑌨𑍇 𑌶𑍁𑌭𑍇 ।
𑌵𑌿𑌨𑌿𑌶𑍍𑌶𑍍𑌵𑌸𑍍𑌯 𑌚 𑌤𑍇𑌜𑌸𑍍𑌵𑍀 𑌰𑌾𑌘𑌵𑌂 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 31 ॥
𑌪𑍁𑌰𑌾𑌽𑌹𑌂 𑌵𑌾𑌲𑌿𑌨𑌾 𑌰𑌾𑌮 𑌰𑌾𑌜𑍍𑌯𑌾𑌤𑍍𑌸𑍍𑌵𑌾𑌦𑌵𑌰𑍋𑌪𑌿𑌤𑌃 ।
𑌪𑌰𑍁𑌷𑌾𑌣𑌿 𑌚 𑌸𑌂𑌶𑍍𑌰𑌾𑌵𑍍𑌯 𑌨𑌿𑌰𑍍𑌧𑍂𑌤𑍋𑌽𑌸𑍍𑌮𑌿 𑌬𑌲𑍀𑌯𑌸𑌾 ॥ 32 ॥
𑌹𑍃𑌤𑌾 𑌭𑌾𑌰𑍍𑌯𑌾 𑌚 𑌮𑍇 𑌤𑍇𑌨 𑌪𑍍𑌰𑌾𑌣𑍇𑌭𑍍𑌯𑍋𑌽𑌪𑌿 𑌗𑌰𑍀𑌯𑌸𑍀 ।
𑌸𑍁𑌹𑍃𑌦𑌶𑍍𑌚 𑌮𑌦𑍀𑌯𑌾 𑌯𑍇 𑌸𑌂𑌯𑌤𑌾 𑌬𑌂𑌧𑌨𑍇𑌷𑍁 𑌤𑍇 ॥ 33 ॥
𑌯𑌤𑍍𑌨𑌵𑌾𑌂𑌶𑍍𑌚 𑌸𑍁𑌦𑍁𑌷𑍍𑌟𑌾𑌤𑍍𑌮𑌾 𑌮𑌦𑍍𑌵𑌿𑌨𑌾𑌶𑌾𑌯 𑌰𑌾𑌘𑌵 ।
𑌬𑌹𑍁𑌶𑌸𑍍𑌤𑌤𑍍𑌪𑍍𑌰𑌯𑍁𑌕𑍍𑌤𑌾𑌶𑍍𑌚 𑌵𑌾𑌨𑌰𑌾 𑌨𑌿𑌹𑌤𑌾 𑌮𑌯𑌾 ॥ 34 ॥
𑌶𑌂𑌕𑌯𑌾 𑌤𑍍𑌵𑍇𑌤𑌯𑌾 𑌚𑍇𑌹 𑌦𑍃𑌷𑍍𑌟𑍍𑌵𑌾 𑌤𑍍𑌵𑌾𑌮𑌪𑌿 𑌰𑌾𑌘𑌵 ।
𑌨𑍋𑌪𑌸𑌰𑍍𑌪𑌾𑌮𑍍𑌯𑌹𑌂 𑌭𑍀𑌤𑍋 𑌭𑌯𑍇 𑌸𑌰𑍍𑌵𑍇 𑌹𑌿 𑌬𑌿𑌭𑍍𑌯𑌤𑌿 ॥ 35 ॥
𑌕𑍇𑌵𑌲𑌂 𑌹𑌿 𑌸𑌹𑌾𑌯𑌾 𑌮𑍇 𑌹𑌨𑍁𑌮𑌤𑍍𑌪𑍍𑌰𑌮𑍁𑌖𑌾𑌸𑍍𑌤𑍍𑌵𑌿𑌮𑍇 ।
𑌅𑌤𑍋𑌽𑌹𑌂 𑌧𑌾𑌰𑌯𑌾𑌮𑍍𑌯𑌦𑍍𑌯 𑌪𑍍𑌰𑌾𑌣𑌾𑌨𑍍 𑌕𑍃𑌚𑍍𑌛𑍍𑌰𑌗𑌤𑍋𑌽𑌪𑌿 𑌸𑌨𑍍 ॥ 36 ॥
𑌏𑌤𑍇 𑌹𑌿 𑌕𑌪𑌯𑌸𑍍𑌸𑍍𑌨𑌿𑌗𑍍𑌧𑌾 𑌮𑌾𑌂 𑌰𑌕𑍍𑌷𑌂𑌤𑌿 𑌸𑌮𑌂𑌤𑌤𑌃 ।
𑌸𑌹 𑌗𑌚𑍍𑌛𑌂𑌤𑌿 𑌗𑌂𑌤𑌵𑍍𑌯𑍇 𑌨𑌿𑌤𑍍𑌯𑌂 𑌤𑌿𑌷𑍍𑌠𑌂𑌤𑌿 𑌚 𑌸𑍍𑌥𑌿𑌤𑍇 ॥ 3 ॥
𑌸𑌂𑌕𑍍𑌷𑍇𑌪𑌸𑍍𑌤𑍍𑌵𑍇𑌷 𑌮𑍇 𑌰𑌾𑌮 𑌕𑌿𑌮𑍁𑌕𑍍𑌤𑍍𑌵𑌾 𑌵𑌿𑌸𑍍𑌤𑌰𑌂 𑌹𑌿 𑌤𑍇 ।
𑌸 𑌮𑍇 𑌜𑍍𑌯𑍇𑌷𑍍𑌠𑍋 𑌰𑌿𑌪𑍁𑌰𑍍𑌭𑍍𑌰𑌾𑌤𑌾 𑌵𑌾𑌲𑍀 𑌵𑌿𑌶𑍍𑌰𑍁𑌤𑌪𑍌𑌰𑍁𑌷𑌃 ॥ 3 ॥
𑌤𑌦𑍍𑌵𑌿𑌨𑌾𑌶𑌾𑌦𑍍𑌧𑌿 𑌮𑍇 𑌦𑍁𑌃𑌖𑌂 𑌪𑍍𑌰𑌣𑌷𑍍𑌟𑌂 𑌸𑍍𑌯𑌾𑌦𑌨𑌂𑌤𑌰𑌮𑍍 ।
𑌸𑍁𑌖𑌂 𑌮𑍇 𑌜𑍀𑌵𑌿𑌤𑌂 𑌚𑍈𑌵 𑌤𑌦𑍍𑌵𑌿𑌨𑌾𑌶𑌨𑌿𑌬𑌂𑌧𑌨𑌮𑍍 ॥ 3 ॥
𑌏𑌷 𑌮𑍇 𑌰𑌾𑌮 𑌶𑍋𑌕𑌾𑌂𑌤𑌶𑍍𑌶𑍋𑌕𑌾𑌰𑍍𑌤𑍇𑌨 𑌨𑌿𑌵𑍇𑌦𑌿𑌤𑌃 ।
𑌦𑍁𑌃𑌖𑌿𑌤𑌸𑍍𑌸𑍁𑌖𑌿𑌤𑍋 𑌵𑌾𑌪𑌿 𑌸𑌖𑍍𑌯𑍁𑌰𑍍𑌨𑌿𑌤𑍍𑌯𑌂 𑌸𑌖𑌾 𑌗𑌤𑌿𑌃 ॥ 40 ॥
𑌶𑍍𑌰𑍁𑌤𑍍𑌵𑍈𑌤𑌦𑍍𑌵𑌚𑌨𑌂 𑌰𑌾𑌮𑌸𑍍𑌸𑍁𑌗𑍍𑌰𑍀𑌵𑌮𑌿𑌦𑌮𑌬𑍍𑌰𑌵𑍀𑌤𑍍 ।
𑌕𑌿𑌂 𑌨𑌿𑌮𑌿𑌤𑍍𑌤𑌮𑌭𑍂𑌦𑍍𑌵𑍈𑌰𑌂 𑌶𑍍𑌰𑍋𑌤𑍁𑌮𑌿𑌚𑍍𑌛𑌾𑌮𑌿 𑌤𑌤𑍍𑌤𑍍𑌵𑌤𑌃 ॥ 41 ॥
𑌸𑍁𑌖𑌂 𑌹𑌿 𑌕𑌾𑌰𑌣𑌂 𑌶𑍍𑌰𑍁𑌤𑍍𑌵𑌾 𑌵𑍈𑌰𑌸𑍍𑌯 𑌤𑌵 𑌵𑌾𑌨𑌰 ।
𑌅𑌨𑌂𑌤𑌰𑌂 𑌵𑌿𑌧𑌾𑌸𑍍𑌯𑌾𑌮𑌿 𑌸𑌂𑌪𑍍𑌰𑌧𑌾𑌰𑍍𑌯 𑌬𑌲𑌾𑌬𑌲𑌮𑍍 ॥ 42 ॥
𑌬𑌲𑌵𑌾𑌨𑍍 𑌹𑌿 𑌮𑌮𑌾𑌮𑌰𑍍𑌷𑌶𑍍𑌶𑍍𑌰𑍁𑌤𑍍𑌵𑌾 𑌤𑍍𑌵𑌾𑌮𑌵𑌮𑌾𑌨𑌿𑌤𑌮𑍍 ।
𑌵𑌰𑍍𑌤𑌤𑍇 𑌹𑍃𑌦𑌯𑍋𑌤𑍍𑌕𑌂𑌪𑍀 𑌪𑍍𑌰𑌾𑌵𑍃𑌡𑍍𑌵𑍇𑌗 𑌇𑌵𑌾𑌂𑌭𑌸𑌃 ॥ 43 ॥
𑌹𑍃𑌷𑍍𑌟𑌃 𑌕𑌥𑌯 𑌵𑌿𑌸𑍍𑌰𑌬𑍍𑌧𑍋 𑌯𑌾𑌵𑌦𑌾𑌰𑍋𑌪𑍍𑌯𑌤𑍇 𑌧𑌨𑍁𑌃 ।
𑌸𑍃𑌷𑍍𑌟𑌶𑍍𑌚 𑌹𑌿 𑌮𑌯𑌾 𑌬𑌾𑌣𑍋 𑌨𑌿𑌰𑌸𑍍𑌤𑌶𑍍𑌚 𑌰𑌿𑌪𑍁𑌸𑍍𑌤𑌵 ॥ 44 ॥
𑌏𑌵𑌮𑍁𑌕𑍍𑌤𑌸𑍍𑌤𑍁 𑌸𑍁𑌗𑍍𑌰𑍀𑌵𑌃 𑌕𑌾𑌕𑍁𑌤𑍍𑌸𑍍𑌥𑍇𑌨 𑌮𑌹𑌾𑌤𑍍𑌮𑌨𑌾 ।
𑌪𑍍𑌰𑌹𑌰𑍍𑌷𑌮𑌤𑍁𑌲𑌂 𑌲𑍇𑌭𑍇 𑌚𑌤𑍁𑌰𑍍𑌭𑌿𑌸𑍍𑌸𑌹 𑌵𑌾𑌨𑌰𑍈𑌃 ॥ 45 ॥
𑌤𑌤𑌃 𑌪𑍍𑌰𑌹𑍃𑌷𑍍𑌟𑌵𑌦𑌨𑌸𑍍𑌸𑍁𑌗𑍍𑌰𑍀𑌵𑍋 𑌲𑌕𑍍𑌷𑍍𑌮𑌣𑌾𑌗𑍍𑌰𑌜𑍇 ।
𑌵𑍈𑌰𑌸𑍍𑌯 𑌕𑌾𑌰𑌣𑌂 𑌤𑌤𑍍𑌤𑍍𑌵𑌮𑌾𑌖𑍍𑌯𑌾𑌤𑍁𑌮𑍁𑌪𑌚𑌕𑍍𑌰𑌮𑍇 ॥ 46 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌅𑌷𑍍𑌟𑌮𑌸𑍍𑌸𑌰𑍍𑌗𑌃 ॥
