𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌸𑌪𑍍𑌤𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌤𑌤𑍍𑌤𑍁 𑌶𑍍𑌰𑍁𑌤𑍍𑌵𑌾 𑌤𑌥𑌾 𑌵𑌾𑌕𑍍𑌯𑌮𑌂𑌗𑌦𑌸𑍍𑌯 𑌮𑍁𑌖𑍋𑌦𑍍𑌗𑌤𑌮𑍍 ।
𑌅𑌬𑍍𑌰𑌵𑍀𑌦𑍍𑌵𑌚𑌨𑌂 𑌗𑍃𑌧𑍍𑌰𑌸𑍍𑌤𑍀𑌕𑍍𑌷𑍍𑌣𑌤𑍁𑌂𑌡𑍋 𑌮𑌹𑌾𑌸𑍍𑌵𑌨𑌃 ॥ 1 ॥
𑌕𑍋𑌽𑌯𑌂 𑌗𑌿𑌰𑌾 𑌘𑍋𑌷𑌯𑌤𑌿 𑌪𑍍𑌰𑌾𑌣𑍈𑌃 𑌪𑍍𑌰𑌿𑌯𑌤𑌮𑌸𑍍𑌯 𑌮𑍇 ।
𑌜𑌟𑌾𑌯𑍁𑌷𑍋 𑌵𑌧𑌂 𑌭𑍍𑌰𑌾𑌤𑍁𑌃 𑌕𑌂𑌪𑌯𑌨𑍍𑌨𑌿𑌵 𑌮𑍇 𑌮𑌨𑌃 ॥ 2 ॥
𑌕𑌥𑌮𑌾𑌸𑍀𑌜𑍍𑌜𑌨𑌸𑍍𑌥𑌾𑌨𑍇 𑌯𑍁𑌦𑍍𑌧𑌂 𑌰𑌾𑌕𑍍𑌷𑌸𑌗𑍃𑌧𑍍𑌰𑌯𑍋𑌃 ।
𑌨𑌾𑌮𑌧𑍇𑌯𑌮𑌿𑌦𑌂 𑌭𑍍𑌰𑌾𑌤𑍁𑌶𑍍𑌚𑌿𑌰𑌸𑍍𑌯𑌾𑌦𑍍𑌯 𑌮𑌯𑌾 𑌶𑍍𑌰𑍁𑌤𑌮𑍍 ॥ 3 ॥
𑌇𑌚𑍍𑌛𑍇𑌯𑌂 𑌗𑌿𑌰𑌿𑌦𑍁𑌰𑍍𑌗𑌾𑌚𑍍𑌚 𑌭𑌵𑌦𑍍𑌭𑌿𑌰𑌵𑌤𑌾𑌰𑌿𑌤𑍁𑌮𑍍 ।
𑌯𑌵𑍀𑌯𑌸𑍋 𑌗𑍁𑌣𑌜𑍍𑌞𑌸𑍍𑌯 𑌶𑍍𑌲𑌾𑌘𑌨𑍀𑌯𑌸𑍍𑌯 𑌵𑌿𑌕𑍍𑌰𑌮𑍈𑌃 ॥ 4 ॥
𑌅𑌤𑌿𑌦𑍀𑌰𑍍𑌘𑌸𑍍𑌯 𑌕𑌾𑌲𑌸𑍍𑌯 𑌪𑌰𑌿𑌤𑍁𑌷𑍍𑌟𑍋𑌽𑌸𑍍𑌮𑌿 𑌪𑌰𑌿𑌕𑍀𑌰𑍍𑌤𑌨𑌾𑌤𑍍 ।
𑌤𑌦𑌿𑌚𑍍𑌛𑍇𑌯𑌮𑌹𑌂 𑌶𑍍𑌰𑍋𑌤𑍁𑌂 𑌵𑌿𑌨𑌾𑌶𑌂 𑌵𑌾𑌨𑌰𑌰𑍍𑌷𑌭𑌾𑌃 ॥ 5 ॥
𑌭𑍍𑌰𑌾𑌤𑍁𑌰𑍍𑌜𑌟𑌾𑌯𑍁𑌷𑌸𑍍𑌤𑌸𑍍𑌯 𑌜𑌨𑌸𑍍𑌥𑌾𑌨𑌨𑌿𑌵𑌾𑌸𑌿𑌨𑌃 ।
𑌤𑌸𑍍𑌯𑍈𑌵 𑌚 𑌮𑌮 𑌭𑍍𑌰𑌾𑌤𑍁𑌸𑍍𑌸𑌖𑌾 𑌦𑌶𑌰𑌥𑌃 𑌕𑌥𑌮𑍍 ॥ 6 ॥
𑌯𑌸𑍍𑌯 𑌰𑌾𑌮𑌃 𑌪𑍍𑌰𑌿𑌯𑌃 𑌪𑍁𑌤𑍍𑌰𑍋 𑌜𑍍𑌯𑍇𑌷𑍍𑌠𑍋 𑌗𑍁𑌰𑍁𑌜𑌨𑌪𑍍𑌰𑌿𑌯𑌃 ।
𑌸𑍂𑌰𑍍𑌯𑌾𑌂𑌶𑍁𑌦𑌗𑍍𑌧𑌪𑌕𑍍𑌷𑌤𑍍𑌵𑌾𑌨𑍍𑌨 𑌶𑌕𑍍𑌨𑍋𑌮𑍍𑌯𑍁𑌪𑌸𑌰𑍍𑌪𑌿𑌤𑍁𑌮𑍍 ॥ ॥
𑌇𑌚𑍍𑌛𑍇𑌯𑌂 𑌪𑌰𑍍𑌵𑌤𑌾𑌦𑌸𑍍𑌮𑌾𑌦𑌵𑌤𑌰𑍍𑌤𑍁 𑌮𑌰𑌿𑌂𑌦𑌮𑌾𑌃 ।
𑌶𑍋𑌕𑌾𑌦𑍍𑌭𑍍𑌰𑌷𑍍𑌟𑌸𑍍𑌵𑌰𑌮𑌪𑌿 𑌶𑍍𑌰𑍁𑌤𑍍𑌵𑌾 𑌤𑍇 𑌹𑌰𑌿𑌯𑍂𑌥𑌪𑌾𑌃 ।
𑌶𑍍𑌰𑌦𑍍𑌦𑌧𑍁𑌰𑍍𑌨𑍈𑌵 𑌤𑌦𑍍𑌵𑌾𑌕𑍍𑌯𑌂 𑌕𑌰𑍍𑌮𑌣𑌾 𑌤𑌸𑍍𑌯 𑌶𑌂𑌕𑌿𑌤𑌾𑌃 ॥ ॥
𑌤𑍇 𑌪𑍍𑌰𑌾𑌯𑌮𑍁𑌪𑌵𑌿𑌷𑍍𑌟𑌾𑌸𑍍𑌤𑍁 𑌦𑍃𑌷𑍍𑌟𑍍𑌵𑌾 𑌗𑍃𑌧𑍍𑌰𑌂 𑌪𑍍𑌲𑌵𑌂𑌗𑌮𑌾𑌃 ।
𑌚𑌕𑍍𑌰𑍁𑌰𑍍𑌬𑍁𑌦𑍍𑌧𑌿𑌂 𑌤𑌦𑌾 𑌰𑍌𑌦𑍍𑌰𑌾𑌂 𑌸𑌰𑍍𑌵𑌾𑌨𑍍𑌨𑍋 𑌭𑌕𑍍𑌷𑌯𑌿𑌷𑍍𑌯𑌤𑌿 ॥ ॥
𑌸𑌰𑍍𑌵𑌥𑌾 𑌪𑍍𑌰𑌾𑌯𑌮𑌾𑌸𑍀𑌨𑌾𑌨𑍍𑌯𑌦𑌿 𑌨𑍋 𑌭𑌕𑍍𑌷𑌯𑌿𑌷𑍍𑌯𑌤𑌿 ।
𑌕𑍃𑌤𑌕𑍃𑌤𑍍𑌯𑌾 𑌭𑌵𑌿𑌷𑍍𑌯𑌾𑌮𑌃 𑌕𑍍𑌷𑌿𑌪𑍍𑌰𑌂 𑌸𑌿𑌦𑍍𑌧𑌿𑌮𑌿𑌤𑍋 𑌗𑌤𑌾𑌃 ॥ 10 ॥
𑌏𑌤𑌾𑌂 𑌬𑍁𑌦𑍍𑌧𑌿𑌂 𑌤𑌤𑌶𑍍𑌚𑌕𑍍𑌰𑍁𑌸𑍍𑌸𑌰𑍍𑌵𑍇 𑌤𑍇 𑌵𑌾𑌨𑌰𑌰𑍍𑌷𑌭𑌾𑌃 ।
𑌅𑌵𑌤𑌾𑌰𑍍𑌯 𑌗𑌿𑌰𑍇𑌶𑍍𑌶𑍃𑌂𑌗𑌾𑌦𑍍𑌗𑍃𑌧𑍍𑌰𑌮𑌾𑌹𑌾𑌂𑌗𑌦𑌸𑍍𑌤𑌦𑌾 ॥ 11 ॥
𑌬𑌭𑍂𑌵𑌰𑍍𑌕𑍍𑌷𑌰𑌜𑌾 𑌨𑌾𑌮 𑌵𑌾𑌨𑌰𑍇𑌂𑌦𑍍𑌰𑌃 𑌪𑍍𑌰𑌤𑌾𑌪𑌵𑌾𑌨𑍍 ।
𑌮𑌮𑌾𑌰𑍍𑌯𑌃 𑌪𑌾𑌰𑍍𑌥𑌿𑌵𑌃 𑌪𑌕𑍍𑌷𑌿𑌨𑍍 𑌧𑌾𑌰𑍍𑌮𑌿𑌕 𑌸𑍍𑌤𑌸𑍍𑌯 𑌚𑌾𑌤𑍍𑌮𑌜𑍌 ॥ 12 ॥
𑌸𑍁𑌗𑍍𑌰𑍀𑌵𑌶𑍍𑌚𑍈𑌵 𑌵𑌾𑌲𑍀 𑌚 𑌪𑍁𑌤𑍍𑌰𑌾𑌵𑍋𑌘𑌬𑌲𑌾𑌵𑍁𑌭𑍌 ।
𑌲𑍋𑌕𑍇𑌵𑌿𑌶𑍍𑌰𑍁𑌤𑌕𑌰𑍍𑌮𑌾𑌭𑍂𑌦𑍍𑌰𑌾𑌜𑌾 𑌵𑌾𑌲𑍀 𑌪𑌿𑌤𑌾 𑌮𑌮 ॥ 13 ॥
𑌰𑌾𑌜𑌾 𑌕𑍃𑌤𑍍𑌸𑍍𑌨𑌸𑍍𑌯 𑌜𑌗𑌤 𑌇𑌕𑍍𑌷𑍍𑌵𑌾𑌕𑍂𑌣𑌾𑌂 𑌮𑌹𑌾𑌰𑌥𑌃 ।
𑌰𑌾𑌮𑍋 𑌦𑌾𑌶𑌰𑌥𑌿𑌃 𑌶𑍍𑌰𑍀𑌮𑌾𑌨𑍍𑌪𑍍𑌰𑌵𑌿𑌷𑍍𑌟𑍋 𑌦𑌂𑌡𑌕𑌾𑌵𑌨𑌮𑍍 ॥ 14 ॥
𑌲𑌕𑍍𑌷𑍍𑌮𑌣𑍇𑌨 𑌸𑌹 𑌭𑍍𑌰𑌾𑌤𑍍𑌰𑌾 𑌵𑍈𑌦𑍇𑌹𑍍𑌯𑌾 𑌚𑌾𑌪𑌿 𑌭𑌾𑌰𑍍𑌯𑌯𑌾 ।
𑌪𑌿𑌤𑍁𑌰𑍍𑌨𑌿𑌦𑍇𑌶𑌨𑌿𑌰𑌤𑍋 𑌧𑌰𑍍𑌮𑍍𑌯𑌂 𑌪𑌂𑌥𑌾𑌨𑌮𑌾𑌶𑍍𑌰𑌿𑌤𑌃 ॥ 15 ॥
𑌤𑌸𑍍𑌯 𑌭𑌾𑌰𑍍𑌯𑌾 𑌜𑌨𑌸𑍍𑌥𑌾𑌨𑌾𑌦𑍍𑌰𑌾𑌵𑌣𑍇𑌨 𑌹𑍃𑌤𑌾 𑌬𑌲𑌾𑌤𑍍 ।
𑌰𑌾𑌮𑌸𑍍𑌯 𑌤𑍁 𑌪𑌿𑌤𑍁𑌰𑍍𑌮𑌿𑌤𑍍𑌰𑌂 𑌜𑌟𑌾𑌯𑍁𑌰𑍍𑌨𑌾𑌮 𑌗𑍃𑌧𑍍𑌰𑌰𑌾𑌟𑍍 ॥ 16 ॥
𑌦𑌦𑌰𑍍𑌶 𑌸𑍀𑌤𑌾𑌂 𑌵𑍈𑌦𑍇𑌹𑍀𑌂 𑌹𑍍𑌰𑌿𑌯𑌮𑌾𑌣𑌾𑌂 𑌵𑌿𑌹𑌾𑌯𑌸𑌾 ।
𑌰𑌾𑌵𑌣𑌂 𑌵𑌿𑌰𑌥𑌂 𑌕𑍃𑌤𑍍𑌵𑌾 𑌸𑍍𑌥𑌾𑌪𑌯𑌿𑌤𑍍𑌵𑌾 𑌚 𑌮𑍈𑌥𑌿𑌲𑍀𑌮𑍍 ।
𑌪𑌰𑌿𑌶𑍍𑌰𑌾𑌂𑌤𑌶𑍍𑌚 𑌵𑍃𑌦𑍍𑌧𑌶𑍍𑌚 𑌰𑌾𑌵𑌣𑍇𑌨 𑌹𑌤𑍋 𑌰𑌣𑍇 ॥ 1 ॥
𑌏𑌵𑌂 𑌗𑍃𑌧𑍍𑌰𑍋 𑌹𑌤𑌸𑍍𑌤𑍇𑌨 𑌰𑌾𑌵𑌣𑍇𑌨 𑌬𑌲𑍀𑌯𑌸𑌾 ।
𑌸𑌂𑌸𑍍𑌕𑍃𑌤𑌶𑍍𑌚𑌾𑌪𑌿 𑌰𑌾𑌮𑍇𑌣 𑌗𑌤𑌶𑍍𑌚 𑌗𑌤𑌿𑌮𑍁𑌤𑍍𑌤𑌮𑌾𑌮𑍍 ॥ 1 ॥
𑌤𑌤𑍋 𑌮𑌮 𑌪𑌿𑌤𑍃𑌵𑍍𑌯𑍇𑌣 𑌸𑍁𑌗𑍍𑌰𑍀𑌵𑍇𑌣 𑌮𑌹𑌾𑌤𑍍𑌮𑌨𑌾 ।
𑌚𑌕𑌾𑌰 𑌰𑌾𑌘𑌵𑌸𑍍𑌸𑌖𑍍𑌯𑌂 𑌸𑍋𑌽𑌵𑌧𑍀𑌤𑍍𑌪𑌿𑌤𑌰𑌂 𑌮𑌮 ॥ 1 ॥
𑌮𑌮 𑌪𑌿𑌤𑍍𑌰𑌾 𑌵𑌿𑌰𑍁𑌦𑍍𑌧𑍋 𑌹𑌿 𑌸𑍁𑌗𑍍𑌰𑍀𑌵𑌸𑍍𑌸𑌚𑌿𑌵𑍈𑌸𑍍𑌸𑌹 ।
𑌨𑌿𑌹𑌤𑍍𑌯 𑌵𑌾𑌲𑌿𑌨𑌂 𑌰𑌾𑌮𑌸𑍍𑌤𑌤𑌸𑍍𑌤𑌮𑌭𑌿𑌷𑍇𑌚𑌯𑌤𑍍 ॥ 20 ॥
𑌸 𑌰𑌾𑌜𑍍𑌯𑍇 𑌸𑍍𑌥𑌾𑌪𑌿𑌤𑌸𑍍𑌤𑍇𑌨 𑌸𑍁𑌗𑍍𑌰𑍀𑌵𑍋 𑌵𑌾𑌨𑌰𑌾𑌧𑌿𑌪𑌃 ।
𑌰𑌾𑌜𑌾 𑌵𑌾𑌨𑌰𑌮𑍁𑌖𑍍𑌯𑌾𑌨𑌾𑌂 𑌯𑍇𑌨 𑌪𑍍𑌰𑌸𑍍𑌥𑌾𑌪𑌿𑌤𑌾 𑌵𑌯𑌮𑍍 ॥ 21 ॥
𑌏𑌵𑌂 𑌰𑌾𑌮𑌪𑍍𑌰𑌯𑍁𑌕𑍍𑌤𑌾𑌸𑍍𑌤𑍁 𑌮𑌾𑌰𑍍𑌗𑌮𑌾𑌣𑌾𑌸𑍍𑌤𑌤𑌸𑍍𑌤𑌤𑌃 ।
𑌵𑍈𑌦𑍇𑌹𑍀𑌂 𑌨𑌾𑌧𑌿𑌗𑌚𑍍𑌛𑌾𑌮𑍋 𑌰𑌾𑌤𑍍𑌰𑍌 𑌸𑍂𑌰𑍍𑌯𑌪𑍍𑌰𑌭𑌾𑌮𑌿𑌵 ॥ 22 ॥
𑌤𑍇 𑌵𑌯𑌂 𑌦𑌂𑌡𑌕𑌾𑌰𑌣𑍍𑌯𑌂 𑌵𑌿𑌚𑌿𑌤𑍍𑌯 𑌸𑍁𑌸𑌮𑌾𑌹𑌿𑌤𑌾𑌃 ॥ 23 ॥
𑌅𑌜𑍍𑌞𑌾𑌨𑌾𑌤𑍍𑌤𑍁 𑌪𑍍𑌰𑌵𑌿𑌷𑍍𑌟𑌾𑌸𑍍𑌸𑍍𑌮 𑌧𑌰𑍍𑌮𑌿𑌣𑍍𑌯𑌾 𑌵𑌿𑌵𑍃𑌤𑌂 𑌬𑌿𑌲𑌮𑍍 ।
𑌮𑌯𑌸𑍍𑌯 𑌮𑌾𑌯𑌾𑌵𑌿𑌹𑌿𑌤𑌂 𑌤𑌦𑍍𑌬𑌿𑌲𑌂 𑌚 𑌵𑌿𑌚𑌿𑌨𑍍𑌵𑌤𑌾𑌮𑍍 ॥ 24 ॥
𑌵𑍍𑌯𑌤𑍀𑌤𑌸𑍍𑌤𑌤𑍍𑌰 𑌨𑍋 𑌮𑌾𑌸𑍋 𑌯𑍋 𑌰𑌾𑌜𑍍𑌞𑌾 𑌸𑌮𑌯𑌃 𑌕𑍃𑌤𑌃 ।
𑌤𑍇 𑌵𑌯𑌂 𑌕𑌪𑌿𑌰𑌾𑌜𑌸𑍍𑌯 𑌸𑌰𑍍𑌵𑍇 𑌵𑌚𑌨𑌕𑌾𑌰𑌿𑌣𑌃 ॥ 25 ॥
𑌕𑍃𑌤𑌾𑌂 𑌸𑌂𑌸𑍍𑌥𑌾𑌮𑌤𑌿𑌕𑍍𑌰𑌾𑌂𑌤𑌾 𑌭𑌯𑌾𑌤𑍍𑌪𑍍𑌰𑌾𑌯𑌮𑍁𑌪𑌾𑌸𑍍𑌮𑌹𑍇 ।
𑌕𑍍𑌰𑍁𑌦𑍍𑌧𑍇 𑌤𑌸𑍍𑌮𑌿𑌂𑌸𑍍𑌤𑍁 𑌕𑌾𑌕𑍁𑌤𑍍𑌸𑍍𑌥𑍇 𑌸𑍁𑌗𑍍𑌰𑍀𑌵𑍇 𑌚 𑌸𑌲𑌕𑍍𑌷𑍍𑌮𑌣𑍇 ॥ 26 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌸𑌪𑍍𑌤𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
