𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌏𑌕𑌾𑌦𑌶𑌸𑍍𑌸𑌰𑍍𑌗𑌃 ।
𑌤𑌂 𑌮𑌨𑍍𑌮𑌥𑌶𑌰𑍈𑌰𑍍𑌵𑌿𑌦𑍍𑌧𑌮𑌂 𑌕𑌾𑌮𑌵𑍇𑌗𑌵𑌶𑌾𑌨𑍁𑌗𑌮𑍍 ।
𑌉𑌵𑌾𑌚 𑌪𑍃𑌥𑌿𑌵𑍀𑌪𑌾𑌲𑌂 𑌕𑍈𑌕𑍇𑌯𑍀 𑌦𑌾𑌰𑍁𑌣𑌂 𑌵𑌚𑌃 ॥ 1 ॥
𑌨𑌾𑌸𑍍𑌮𑌿 𑌵𑌿𑌪𑍍𑌰𑌕𑍃𑌤𑌾𑌦𑍇𑌵 𑌕𑍇𑌨𑌚𑌿𑌨𑍍𑌨𑌾𑌵𑌮𑌾𑌨𑌿𑌤𑌾 ।
𑌅𑌭𑌿𑌪𑍍𑌰𑌾𑌯𑌸𑍍𑌤𑍁 𑌮𑍇 𑌕𑌶𑍍𑌚𑌿𑌤𑍍𑌤𑌮𑌿𑌚𑍍𑌛𑌾𑌮𑌿 𑌤𑍍𑌵𑌯𑌾 𑌕𑍃𑌤𑌮𑍍 ॥ 2 ॥
𑌪𑍍𑌰𑌤𑌿𑌜𑍍𑌞𑌾𑌂 𑌪𑍍𑌰𑌤𑌿𑌜𑌾𑌨𑍀𑌷𑍍𑌵 𑌯𑌦𑌿 𑌤𑍍𑌵𑌂 𑌕𑌰𑍍𑌤𑍁𑌮𑌿𑌚𑍍𑌛𑌸𑌿 ।
𑌅𑌥 𑌤𑌦𑍍𑌵𑍍𑌯𑌾𑌹𑌰𑌿𑌷𑍍𑌯𑌾𑌮𑌿 𑌯𑌦𑌭𑌿𑌪𑍍𑌰𑌾𑌰𑍍𑌥𑌿𑌤𑌂 𑌮𑌯𑌾 ॥ 3 ॥
𑌤𑌾𑌮𑍁𑌵𑌾𑌚 𑌮𑌹𑌾𑌤𑍇𑌜𑌾𑌃 𑌕𑍈𑌕𑍇𑌯𑍀𑌮𑍀𑌷𑌦𑍁𑌤𑍍𑌸𑍍𑌮𑌿𑌤𑌃 ।
𑌕𑌾𑌮𑍀 𑌹𑌸𑍍𑌤𑍇𑌨 𑌸𑌂𑌗𑍃𑌹𑍍𑌯 𑌮𑍂𑌰𑍍𑌧𑌜𑍇𑌷𑍁 𑌶𑍁𑌚𑌿𑌸𑍍𑌮𑌿𑌤𑌾𑌮𑍍 ॥ 4 ॥
𑌆𑌵𑌲𑌿𑌪𑍍𑌤𑍇 𑌨 𑌜𑌾𑌨𑌾𑌸𑌿 𑌤𑍍𑌵𑌤𑍍𑌤𑌃 𑌪𑍍𑌰𑌿𑌯𑌤𑌰𑍋 𑌮𑌮 ।
𑌮𑌨𑍁𑌜𑍋 𑌮𑌨𑍁𑌜𑌵𑍍𑌯𑌾𑌘𑍍𑌰𑌾𑌦𑍍𑌰𑌾𑌮𑌾𑌦𑌨𑍍𑌯𑍋 𑌨 𑌵𑌿𑌦𑍍𑌯𑌤𑍇 ॥ 5 ॥
𑌤𑍇𑌨𑌾𑌜𑌯𑍍𑌯𑍇𑌨 𑌮𑍁𑌖𑍍𑌯𑍇𑌨 𑌰𑌾𑌘𑌵𑍇𑌣 𑌮𑌹𑌾𑌤𑍍𑌮𑌨𑌾 ।
𑌶𑌪𑍇 𑌤𑍇 𑌜𑍀𑌵𑌨𑌾𑌰𑍍𑌹𑍇𑌣 𑌬𑍍𑌰𑍂𑌹𑌿 𑌯𑌨𑍍𑌮𑌨𑌸𑍇𑌚𑍍𑌛𑌾𑌸𑌿 ॥ 6 ॥
𑌯𑌂 𑌮𑍁𑌹𑍂𑌰𑍍𑌤𑌮𑌪𑌶𑍍𑌯𑌂𑌸𑍍𑌤𑍁 𑌨 𑌜𑍀𑌵𑍇𑌯𑌮𑌹𑌂 𑌧𑍍𑌰𑍁𑌵𑌮𑍍 ।
𑌤𑍇𑌨 𑌰𑌾𑌮𑍇𑌣 𑌕𑍈𑌕𑍇𑌯𑌿 𑌶𑌪𑍇 𑌤𑍇 𑌵𑌚𑌨𑌕𑍍𑌰𑌿𑌯𑌾𑌮𑍍 ॥ ॥
𑌆𑌤𑍍𑌮𑌨𑌾 𑌵𑌾𑌤𑍍𑌮𑌜𑍈𑌶𑍍𑌚𑌾𑌨𑍍𑌯𑍈𑌰𑍍𑌵𑍃𑌣𑍇𑌯𑌂 𑌮𑌨𑍁𑌜𑌰𑍍𑌷𑌭𑌮𑍍 ।
𑌤𑍇𑌨 𑌰𑌾𑌮𑍇𑌣 𑌕𑍈𑌕𑍇𑌯𑌿 𑌶𑌪𑍇 𑌤𑍇 𑌵𑌚𑌨𑌕𑍍𑌰𑌿𑌯𑌾𑌮𑍍 ॥ ॥
𑌭𑌦𑍍𑌰𑍇 𑌹𑍃𑌦𑌯𑌮𑌪𑍍𑌯𑍇𑌤𑌦𑌨𑍁𑌮𑍃𑌶𑍋𑌦𑍍𑌧𑌰𑌸𑍍𑌵 𑌮𑍇 ।
𑌏𑌤𑌤𑍍𑌸𑌮𑍀𑌕𑍍𑌷𑍍𑌯 𑌕𑍈𑌕𑍇𑌯𑌿 𑌬𑍍𑌰𑍂𑌹𑌿 𑌯𑌤𑍍𑌸𑌾𑌧𑍁 𑌮𑌨𑍍𑌯𑌸𑍇 ॥ ॥
𑌬𑌲𑌮𑌾𑌤𑍍𑌮𑌨𑌿 𑌜𑌾𑌨𑌂𑌤𑍀 𑌨 𑌮𑌾𑌂 𑌶𑌂𑌕𑌿𑌤𑍁𑌮𑌰𑍍𑌹𑌸𑌿 ।
𑌕𑌰𑌿𑌷𑍍𑌯𑌾𑌮𑌿 𑌤𑌵 𑌪𑍍𑌰𑍀𑌤𑌿𑌂 𑌸𑍁𑌕𑍃𑌤𑍇𑌨𑌾𑌪𑌿 𑌤𑍇 𑌶𑌪𑍇 ॥ 10 ॥
𑌸𑌾 𑌤𑌦𑌰𑍍𑌥𑌮𑌨𑌾 𑌦𑍇𑌵𑍀 𑌤𑌮𑌭𑌿𑌪𑍍𑌰𑌾𑌯𑌮𑌾𑌗𑌤𑌮𑍍 ।
𑌨𑌿𑌰𑍍𑌮𑌾𑌧𑍍𑌯𑌸𑍍𑌥𑍍𑌯𑌾𑌚𑍍𑌚 𑌹𑌰𑍍𑌷𑌾𑌚𑍍𑌚 𑌬𑌭𑌾𑌷𑍇 𑌦𑍁𑌰𑍍𑌵𑌚𑌂 𑌵𑌚𑌃 ॥ 11 ॥
𑌤𑍇𑌨 𑌵𑌾𑌕𑍍𑌯𑍇𑌨 𑌸𑌂𑌹𑍃𑌷𑍍𑌟𑌾 𑌤𑌮𑌭𑌿𑌪𑍍𑌰𑌾𑌯𑌮𑌾𑌗𑌤𑌮𑍍 ।
𑌵𑍍𑌯𑌾𑌜𑌹𑌾𑌰 𑌮𑌹𑌾𑌘𑍋𑌰𑌮𑌭𑍍𑌯𑌾𑌗𑌤𑌮𑌿𑌵𑌾𑌂𑌤𑌕𑌮𑍍 ॥ 12 ॥
𑌯𑌥𑌾 𑌕𑍍𑌰𑌮𑍇 𑌶𑌪𑌸𑌿 𑌵𑌰𑌂 𑌮𑌮 𑌦𑌦𑌾𑌸𑌿 𑌚 ।
𑌤𑌚𑍍𑌛𑍃𑌣𑍍𑌵𑌂𑌤𑍁 𑌤𑍍𑌰𑌯𑌸𑍍𑌤𑍍𑌰𑌿𑌂𑌶𑌦𑍍𑌦𑍇𑌵𑌾𑌸𑍍𑌸𑌾𑌗𑍍𑌨𑌿𑌪𑍁𑌰𑍋𑌗𑌮𑌾𑌃 ॥ 13 ॥
𑌚𑌂𑌦𑍍𑌰𑌾𑌦𑌿𑌤𑍍𑌯𑍌 𑌨𑌭𑌶𑍍𑌚𑍈𑌵 𑌗𑍍𑌰𑌹𑌾 𑌰𑌾𑌤𑍍𑌰𑍍𑌯𑌹𑌨𑍀 𑌦𑌿𑌶𑌃 ।
𑌜𑌗𑌚𑍍𑌚 𑌪𑍃𑌥𑌿𑌵𑍀 𑌚𑍇𑌯𑌂 𑌸𑌗𑌂𑌧𑌰𑍍𑌵𑌾 𑌸𑌰𑌾𑌕𑍍𑌷𑌸𑌾 ॥ 14 ॥
𑌨𑌿𑌶𑌾𑌚𑌰𑌾𑌣𑌿 𑌭𑍂𑌤𑌾𑌨𑌿 𑌗𑍃𑌹𑍇𑌷𑍁 𑌗𑍃𑌹𑌦𑍇𑌵𑌤𑌾 ।
𑌯𑌾𑌨𑌿 𑌚𑌾𑌨𑍍𑌯𑌾𑌨𑌿 𑌭𑍂𑌤𑌾𑌨𑌿 𑌜𑌾𑌨𑍀𑌯𑍁𑌰𑍍𑌭𑌾𑌷𑌿𑌤𑌂 𑌤𑌵 ॥ 15 ॥
𑌸𑌤𑍍𑌯𑌸𑌂𑌧𑍋 𑌮𑌹𑌾𑌤𑍇𑌜𑌾𑌃 𑌧𑌰𑍍𑌮𑌜𑍍𑌞𑌃 𑌸𑍁𑌸𑌮𑌾𑌹𑌿𑌤𑌃 ।
𑌵𑌰𑌂 𑌮𑌮 𑌦𑌦𑌾𑌤𑍍𑌯𑍇𑌷 𑌤𑌨𑍍𑌮𑍇 𑌶𑍍𑌰𑍃𑌣𑍍𑌵𑌂𑌤𑍁 𑌦𑍈𑌵𑌤𑌾𑌃 ॥ 16 ॥
𑌇𑌤𑌿 𑌦𑍇𑌵𑍀 𑌮𑌹𑍇𑌷𑍍𑌵𑌾𑌸𑌂 𑌪𑌰𑌿𑌗𑍃𑌹𑍍𑌯𑌾𑌭𑌿𑌶𑌸𑍍𑌯 𑌚 ।
𑌤𑌤𑌃 𑌪𑌰𑌮𑍁𑌵𑌾𑌚𑍇𑌦𑌂 𑌵𑌰𑌦𑌂 𑌕𑌾𑌮𑌮𑍋𑌹𑌿𑌤𑌮𑍍 ॥ 1 ॥
𑌸𑍍𑌮𑌰 𑌰𑌾𑌜𑌨𑍍 𑌪𑍁𑌰𑌾𑌵𑍃𑌤𑍍𑌤𑌂 𑌤𑌸𑍍𑌮𑌿𑌨𑍍 𑌦𑍈𑌵𑌾𑌸𑍁𑌰𑍇 𑌰𑌣𑍇 ।
𑌤𑌤𑍍𑌰 𑌚𑌾𑌚𑍍𑌯𑌾𑌵𑌯𑌚𑍍𑌛𑌤𑍍𑌰𑍁𑌸𑍍𑌤𑌵 𑌜𑍀𑌵𑌿𑌤𑌮𑌂𑌤𑌰𑌾 ॥ 1 ॥
𑌤𑌤𑍍𑌰 𑌚𑌾𑌪𑌿 𑌮𑌯𑌾 𑌦𑍇𑌵 𑌯𑌤𑍍𑌤𑍍𑌵𑌂 𑌸𑌮𑌭𑌿𑌰𑌕𑍍𑌷𑌿𑌤𑌃 ।
𑌜𑌾𑌗𑍍𑌰𑌤𑍍𑌯𑌾 𑌯𑌤𑌮𑌾𑌨𑌾𑌯𑌾𑌸𑍍𑌤𑌤𑍋 𑌮𑍇 𑌪𑍍𑌰𑌾𑌦𑌦𑌾 𑌵𑌰𑍌 ॥ 1 ॥
𑌤𑍌 𑌤𑍁 𑌦𑌤𑍍𑌤𑍌 𑌵𑌰𑍌 𑌦𑍇𑌵 𑌨𑌿𑌕𑍍𑌷𑍇𑌪𑍌 𑌮𑍃𑌗𑌯𑌾𑌮𑍍𑌯𑌹𑌮𑍍 ।
𑌤𑌥𑍈𑌵 𑌪𑍃𑌥𑌿𑌵𑍀𑌪𑌾𑌲 𑌸𑌕𑌾𑌶𑍇 𑌸𑌤𑍍𑌯𑌸𑌂𑌗𑌰 ॥ 20 ॥
𑌤𑌤𑍍 𑌪𑍍𑌰𑌤𑌿𑌶𑍍𑌰𑍁𑌤𑍍𑌯 𑌧𑌰𑍍𑌮𑍇𑌣 𑌨 𑌚𑍇𑌦𑍍𑌦𑌾𑌸𑍍𑌯𑌸𑌿 𑌮𑍇 𑌵𑌰𑌮𑍍 ।
𑌅𑌦𑍍𑌯𑍈𑌵 𑌹𑌿 𑌪𑍍𑌰𑌹𑌾𑌸𑍍𑌯𑌾𑌮𑌿 𑌜𑍀𑌵𑌿𑌤𑌂 𑌤𑍍𑌵𑌦𑍍𑌵𑌿𑌮𑌾𑌨𑌿𑌤𑌾 ॥ 21 ॥
𑌵𑌾𑌙𑍍𑌮𑌾𑌤𑍍𑌰𑍇𑌣 𑌤𑌦𑌾 𑌰𑌾𑌜𑌾 𑌕𑍈𑌕𑍇𑌯𑍍𑌯𑌾 𑌸𑍍𑌵𑌵𑌶𑍇 𑌕𑍃𑌤𑌃 ।
𑌪𑍍𑌰𑌚𑌸𑍍𑌕𑌂𑌦 𑌵𑌿𑌨𑌾𑌶𑌾𑌯 𑌪𑌾𑌶𑌂 𑌮𑍃𑌗 𑌇𑌵𑌾𑌤𑍍𑌮𑌨𑌃 ॥ 22 ॥
𑌤𑌤𑌃 𑌪𑌰𑌮𑍁𑌵𑌾𑌚𑍇𑌦𑌂 𑌵𑌰𑌦𑌂 𑌕𑌾𑌮𑌮𑍋𑌹𑌿𑌤𑌮𑍍 ।
𑌵𑌰𑍌 𑌯𑍌 𑌮𑍇 𑌤𑍍𑌵𑌯𑌾 𑌦𑍇𑌵 𑌤𑌦𑌾 𑌦𑌤𑍍𑌤𑍌 𑌮𑌹𑍀𑌪𑌤𑍇 ॥ 23 ॥
𑌤𑍌 𑌤𑌾𑌵𑌦𑌹𑌮𑌦𑍍𑌯𑍈𑌵 𑌵𑌕𑍍𑌷𑍍𑌯𑌾𑌮𑌿 𑌶𑍃𑌣𑍁 𑌮𑍇 𑌵𑌚𑌃 ।
𑌅𑌭𑌿𑌷𑍇𑌕𑌸𑌮𑌾𑌰𑌂𑌭𑍋 𑌰𑌾𑌘𑌵𑌸𑍍𑌯𑍋𑌪𑌕𑌲𑍍𑌪𑌿𑌤𑌃 ॥ 24 ॥
𑌅𑌨𑍇𑌨𑍈𑌵𑌾𑌭𑌿𑌷𑍇𑌕𑍇𑌣 𑌭𑌰𑌤𑍋 𑌮𑍇𑌽𑌭𑌿𑌷𑌿𑌚𑍍𑌯𑌤𑌾𑌮𑍍 ।
𑌯𑍋 𑌦𑍍𑌵𑌿𑌤𑍀𑌯𑍋 𑌵𑌰𑍋 𑌦𑍇𑌵 𑌦𑌤𑍍𑌤𑌃 𑌪𑍍𑌰𑍀𑌤𑍇𑌨 𑌮𑍇 𑌤𑍍𑌵𑌯𑌾 ॥ 25 ॥
𑌤𑌦𑌾 𑌦𑍈𑌵𑌾𑌸𑍁𑌰𑍇 𑌯𑍁𑌦𑍍𑌧𑍇 𑌤𑌸𑍍𑌯 𑌕𑌾𑌲𑍋𑌽𑌯𑌮𑌾𑌗𑌤 ।
𑌨𑌵 𑌪𑌂𑌚 𑌚 𑌵𑌰𑍍𑌷𑌾𑌣𑌿 𑌦𑌂𑌡𑌕𑌾𑌰𑌣𑍍𑌯𑌮𑌾𑌶𑍍𑌰𑌿𑌤𑌃 ॥ 26 ॥
𑌚𑍀𑌰𑌾𑌜𑌿𑌨𑌜𑌟𑌾𑌧𑌾𑌰𑍀 𑌰𑌾𑌮𑍋 𑌭𑌵𑌤𑍁 𑌤𑌾𑌪𑌸𑌃 ।
𑌭𑌰𑌤𑍋 𑌭𑌜𑌤𑌾𑌮𑌦𑍍𑌯 𑌯𑍌𑌵𑌰𑌾𑌜𑍍𑌯𑌮𑌕𑌂𑌟𑌕𑌮𑍍 ॥ 2 ॥
𑌏𑌷 𑌮𑍇 𑌪𑌰𑌮𑌃 𑌕𑌾𑌮𑍋 𑌦𑌤𑍍𑌤𑌮𑍇𑌵 𑌵𑌰𑌂 𑌵𑍃𑌣𑍇 ।
𑌅𑌦𑍍𑌯 𑌚𑍈𑌵 𑌹𑌿 𑌪𑌶𑍍𑌯𑍇𑌯𑌂 𑌪𑍍𑌰𑌯𑌾𑌂𑌤𑌂 𑌰𑌾𑌘𑌵𑌂 𑌵𑌨𑌮𑍍 ॥ 2 ॥
𑌸 𑌰𑌾𑌜𑌰𑌾𑌜𑌃 𑌭𑌵 𑌸𑌤𑍍𑌯𑌸𑌂𑌗𑌰𑌃 𑌕𑍁𑌲𑌂 𑌚 𑌶𑍀𑌲𑌂 𑌚 𑌹𑌿 𑌰𑌕𑍍𑌷 𑌜𑌨𑍍𑌮 𑌚 ।
𑌪𑌰𑌤𑍍𑌰𑌵𑌾𑌸𑍇 𑌹𑌿 𑌵𑌦𑌂𑌤𑍍𑌯𑌨𑍁𑌤𑍍𑌤𑌮𑌂 𑌤𑌪𑍋𑌧𑌨𑌾𑌸𑍍𑌸𑌤𑍍𑌯𑌵𑌚𑍋 𑌹𑌿𑌤𑌂 𑌨𑍃𑌣𑌾𑌮𑍍 ॥ 2 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌏𑌕𑌾𑌦𑌶𑌸𑍍𑌸𑌰𑍍𑌗𑌃 ॥
