𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌸𑌰𑍍𑌵𑌾𑌂𑌶𑍍𑌚𑌾𑌹𑍂𑌯 𑌸𑍁𑌗𑍍𑌰𑍀𑌵𑌃 𑌪𑍍𑌲𑌵𑌗𑌾𑌨𑍍 𑌪𑍍𑌲𑌵𑌗𑌰𑍍𑌷𑌭𑌃 ।
𑌸𑌮𑌸𑍍𑌤𑌾𑌨𑌬𑍍𑌰𑌵𑍀𑌦𑍍𑌭𑍂𑌯𑍋 𑌰𑌾𑌮𑌕𑌾𑌰𑍍𑌯𑌰𑍍𑌥𑌸𑌿𑌦𑍍𑌧𑌯𑍇 ॥ 1 ॥
𑌏𑌵𑌮𑍇𑌤𑌦𑍍𑌵𑌿𑌚𑍇𑌤𑌵𑍍𑌯𑌂 𑌯𑌨𑍍𑌮𑌯𑌾 𑌪𑌰𑌿𑌕𑍀𑌰𑍍𑌤𑌿𑌤𑌮𑍍 ।
𑌤𑌦𑍁𑌗𑍍𑌰𑌶𑌾𑌸𑌨𑌂 𑌭𑌰𑍍𑌤𑍁𑌰𑍍𑌵𑌿𑌜𑍍𑌞𑌾𑌯 𑌹𑌰𑌿𑌪𑍁𑌂𑌗𑌵𑌾𑌃 ॥ 2 ॥
𑌶𑌲𑌭𑌾 𑌇𑌵 𑌸𑌂𑌛𑌾𑌦𑍍𑌯 𑌮𑍇𑌦𑌿𑌨𑍀𑌂 𑌸𑌂𑌪𑍍𑌰𑌤𑌸𑍍𑌥𑌿𑌰𑍇 ।
𑌰𑌾𑌮𑌃 𑌪𑍍𑌰𑌸𑍍𑌰𑌵𑌣𑍇 𑌤𑌸𑍍𑌮𑌿𑌨𑍍𑌯𑌵𑌸𑌤𑍍𑌸𑌹𑌲𑌕𑍍𑌷𑍍𑌮𑌣𑌃 ॥ 3 ॥
𑌪𑍍𑌰𑌤𑍀𑌕𑍍𑌷𑌮𑌾𑌣𑌸𑍍𑌤𑌂 𑌮𑌾𑌸𑌂 𑌯𑌸𑍍𑌸𑍀𑌤𑌾𑌧𑌿𑌗𑌮𑍇 𑌕𑍃𑌤𑌃 ।
𑌉𑌤𑍍𑌤𑌰𑌾𑌂 𑌤𑍁 𑌦𑌿𑌶𑌂 𑌰𑌮𑍍𑌯𑌾𑌂 𑌗𑌿𑌰𑌿𑌰𑌾𑌜𑌸𑌮𑌾𑌵𑍃𑌤𑌾𑌮𑍍 ॥ 4 ॥
𑌪𑍍𑌰𑌤𑌸𑍍𑌥𑍇 𑌸𑌹𑌸𑌾 𑌵𑍀𑌰𑍋 𑌹𑌰𑌿𑌶𑍍𑌶𑌤𑌵𑌲𑌿𑌸𑍍𑌤𑌦𑌾 ।
𑌪𑍂𑌰𑍍𑌵𑌾𑌂 𑌦𑌿𑌶𑌂 𑌪𑍍𑌰𑌤𑌿𑌯𑌯𑍌 𑌵𑌿𑌨𑌤𑍋 𑌹𑌰𑌿𑌯𑍂𑌥𑌪𑌃 ॥ 5 ॥
𑌤𑌾𑌰𑌾𑌂𑌗𑌦𑌾𑌦𑌿𑌸𑌹𑌿𑌤𑌃 𑌪𑍍𑌲𑌵𑌂𑌗𑍋 𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌅𑌗𑌤𑍍𑌯𑌾𑌚𑌰𑌿𑌤𑌾𑌮𑌾𑌶𑌾𑌂 𑌦𑌕𑍍𑌷𑌿𑌣𑌾𑌂 𑌹𑌰𑌿𑌯𑍂𑌥𑌪𑌃 ॥ 6 ॥
𑌪𑌶𑍍𑌚𑌿𑌮𑌾𑌂 𑌤𑍁 𑌭𑍃𑌶𑌂 𑌘𑍋𑌰𑌾𑌂 𑌸𑍁𑌷𑍇𑌣𑌃 𑌪𑍍𑌲𑌵𑌗𑍇𑌶𑍍𑌵𑌰𑌃 ।
𑌪𑍍𑌰𑌤𑌸𑍍𑌥𑍇 𑌹𑌰𑌿𑌶𑌾𑌰𑍍𑌦𑍂𑌲𑍋 𑌦𑌿𑌶𑌂 𑌵𑌰𑍁𑌣𑌪𑌾𑌲𑌿𑌤𑌾𑌮𑍍 ॥ ॥
𑌤𑌤𑌸𑍍𑌸𑌰𑍍𑌵𑌾 𑌦𑌿𑌶𑍋 𑌰𑌾𑌜𑌾 𑌚𑍋𑌦𑌯𑌿𑌤𑍍𑌵𑌾 𑌯𑌥𑌾𑌤𑌥𑌮𑍍 ।
𑌕𑌪𑌿𑌸𑍇𑌨𑌾𑌪𑌤𑍀𑌨𑍍𑌮𑍁𑌖𑍍𑌯𑌾𑌨𑍍𑌮𑍁𑌮𑍋𑌦 𑌸𑍁𑌖𑌿𑌤𑌸𑍍𑌸𑍁𑌖𑌮𑍍 ॥ ॥
𑌏𑌵𑌂 𑌸𑌂𑌬𑍋𑌧𑌿𑌤𑌾𑌸𑍍𑌸𑌰𑍍𑌵𑍇 𑌰𑌾𑌜𑍍𑌞𑌾 𑌵𑌾𑌨𑌰𑌯𑍂𑌥𑌪𑌾𑌃 ।
𑌸𑍍𑌵𑌾𑌂 𑌸𑍍𑌵𑌾𑌂 𑌦𑌿𑌶𑌮𑌭𑌿𑌪𑍍𑌰𑌤𑍍𑌤𑍍𑌯 𑌤𑍍𑌵𑌰𑌿𑌤𑌾 𑌸𑌂𑌪𑍍𑌰𑌤𑌸𑍍𑌥𑌿𑌰𑍇 ॥ ॥
𑌨𑌦𑌂𑌤𑌶𑍍𑌚𑍋𑌨𑍍𑌨𑌦𑌂𑌤𑌶𑍍𑌚 𑌗𑌰𑍍𑌜𑌂𑌤𑌶𑍍𑌚 𑌪𑍍𑌲𑌵𑌂𑌗𑌮𑌾𑌃 ।
𑌕𑍍𑌷𑍍𑌵𑍇𑌲𑌂𑌤𑍋 𑌧𑌾𑌵𑌮𑌾𑌨𑌾𑌶𑍍𑌚 𑌵𑌿𑌨𑌦𑌂𑌤𑍋 𑌮𑌹𑌾𑌬𑌲𑌾𑌃 ॥ 10 ॥
𑌏𑌵𑌂 𑌸𑌂𑌬𑍋𑌦𑌿𑌤𑌾𑌸𑍍𑌸𑌰𑍍𑌵𑍇 𑌰𑌾𑌜𑍍𑌞𑌾 𑌵𑌾𑌨𑌰𑌯𑍂𑌥𑌪𑌾𑌃 ।
𑌆𑌨𑌯𑌿𑌷𑍍𑌯𑌾𑌮𑌹𑍇 𑌸𑍀𑌤𑌾𑌂 𑌹𑌨𑌿𑌷𑍍𑌯𑌾𑌮𑌶𑍍𑌚 𑌰𑌾𑌵𑌣𑌮𑍍 ॥ 11 ॥
𑌅𑌹𑌮𑍇𑌕𑍋 𑌹𑌨𑌿𑌷𑍍𑌯𑌾𑌮𑌿 𑌰𑌾𑌵𑌣𑌂 𑌪𑍍𑌰𑌾𑌪𑍍𑌤𑌮𑌾𑌹𑌵𑍇 ।
𑌤𑌤𑌶𑍍𑌚𑍋𑌨𑍍𑌮𑌥𑍍𑌯 𑌸𑌹𑌸𑌾 𑌹𑌰𑌿𑌷𑍍𑌯𑍇 𑌜𑌨𑌕𑌾𑌤𑍍𑌮𑌜𑌾𑌮𑍍 ॥ 12 ॥
𑌵𑍇𑌪𑌮𑌾𑌨𑌾𑌂 𑌶𑍍𑌰𑌮𑍇𑌣𑌾𑌦𑍍𑌯 𑌭𑌵𑌦𑍍𑌭𑌿𑌃 𑌸𑍍𑌥𑍀𑌯𑌤𑌾𑌮𑌿𑌤𑌿 ।
𑌏𑌕 𑌏𑌵𑌾𑌹𑌰𑌿𑌷𑍍𑌯𑌾𑌮𑌿 𑌪𑌾𑌤𑌾𑌲𑌾𑌦𑌪𑌿 𑌜𑌾𑌨𑌕𑍀𑌮𑍍 ॥ 13 ॥
𑌵𑌧𑌿𑌷𑍍𑌯𑌾𑌮𑍍𑌯𑌹𑌂 𑌵𑍃𑌕𑍍𑌷𑌾𑌨𑍍 𑌦𑌾𑌰𑌯𑌿𑌷𑍍𑌯𑌾𑌮𑍍𑌯𑌹𑌂 𑌗𑌿𑌰𑍀𑌨𑍍 ।
𑌧𑌰𑌣𑍀𑌂 𑌦𑌾𑌰𑌯𑌿𑌷𑍍𑌯𑌾𑌮𑌿 𑌕𑍍𑌷𑍋𑌭𑌯𑌿𑌷𑍍𑌯𑌾𑌮𑌿 𑌸𑌾𑌗𑌰𑌾𑌨𑍍 ॥ 14 ॥
𑌅𑌹𑌂 𑌯𑍋𑌜𑌨𑌸𑌂𑌖𑍍𑌯𑌾𑌯𑌾𑌃 𑌪𑍍𑌲𑌵𑌿𑌤𑌾 𑌨𑌾𑌤𑍍𑌰 𑌸𑌂𑌶𑌯𑌃 ।
𑌶𑌤𑌂 𑌯𑍋𑌜𑌨𑌸𑌂𑌖𑍍𑌯𑌾𑌯𑌾𑌶𑍍𑌶𑌤𑌂 𑌸𑌮𑌧𑌿𑌕𑌂 𑌹𑍍𑌯𑌹𑌮𑍍 ॥ 15 ॥
𑌭𑍂𑌤𑌲𑍇 𑌸𑌾𑌗𑌰𑍇 𑌵𑌾𑌽𑌪𑌿 𑌶𑍈𑌲𑍇𑌷𑍁 𑌚 𑌵𑌨𑍇𑌷𑍁 𑌚 ।
𑌪𑌾𑌤𑌾𑌲𑌸𑍍𑌯𑌾𑌪𑌿 𑌵𑌾 𑌮𑌧𑍍𑌯𑍇 𑌨 𑌮𑌮𑌾𑌚𑍍𑌛𑌿𑌦𑍍𑌯𑌤𑍇 𑌗𑌤𑌿𑌃 ॥ 16 ॥
𑌇𑌤𑍍𑌯𑍇𑌕𑍈𑌕𑌂 𑌤𑌦𑌾 𑌤𑌤𑍍𑌰 𑌵𑌾𑌨𑌰𑌾 𑌬𑌲𑌦𑌰𑍍𑌪𑌿𑌤𑌾𑌃 ।
𑌊𑌚𑍁𑌶𑍍𑌚 𑌵𑌚𑌨𑌂 𑌤𑌤𑍍𑌰 𑌹𑌰𑌿𑌰𑌾𑌜𑌸𑍍𑌯 𑌸𑌨𑍍𑌨𑌿𑌧𑍌 ॥ 1 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌪𑌂𑌚𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
