𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌥𑌾𑌗𑌤𑌾𑌂 𑌤𑌾𑌂 𑌵𑍍𑌯𑌥𑌿𑌤𑌾𑌮𑌨𑌿𑌂𑌦𑌿𑌤𑌾𑌂 𑌵𑍍𑌯𑌪𑍇𑌤𑌹𑌰𑍍𑌷𑌾𑌂 𑌪𑌰𑌿𑌦𑍀𑌨𑌮𑌾𑌨𑌸𑌾𑌮𑍍 ।
𑌶𑍁𑌭𑌾𑌂 𑌨𑌿𑌮𑌿𑌤𑍍𑌤𑌾𑌨𑌿 𑌶𑍁𑌭𑌾𑌨𑌿 𑌭𑍇𑌜𑌿𑌰𑍇 𑌨𑌰𑌂 𑌶𑍍𑌰𑌿𑌯𑌾 𑌜𑍁𑌷𑍍𑌟𑌮𑌿𑌵𑍋𑌪𑌜𑍀𑌵𑌿𑌨𑌃 ॥ 1 ॥
𑌤𑌸𑍍𑌯𑌾𑌃 𑌶𑍁𑌭𑌂 𑌵𑌾𑌮𑌮𑌰𑌾𑌲𑌪𑌕𑍍𑌷𑍍𑌮 𑌰𑌾𑌜𑍀𑌵𑍃𑌤𑌂 𑌕𑍃𑌷𑍍𑌣𑌵𑌿𑌶𑌾𑌲𑌶𑍁𑌕𑍍𑌲𑌮𑍍 ।
𑌪𑍍𑌰𑌾𑌸𑍍𑌪𑌂𑌦𑌤𑍈𑌕𑌂 𑌨𑌯𑌨𑌂 𑌸𑍁𑌕𑍇𑌶𑍍𑌯𑌾 𑌮𑍀𑌨𑌾𑌹𑌤𑌂 𑌪𑌦𑍍𑌮𑌮𑌿𑌵𑌾𑌭𑌿𑌤𑌾𑌮𑍍𑌰𑌮𑍍 ॥ 2 ॥
𑌭𑍁𑌜𑌶𑍍𑌚 𑌚𑌾𑌰𑍍𑌵𑌂𑌚𑌿𑌤𑌪𑍀𑌨𑌵𑍃𑌤𑍍𑌤𑌃 𑌪𑌰𑌾𑌰𑍍𑌥𑍍𑌯𑌕𑌾𑌲𑌾𑌗𑌰𑍁𑌚𑌂𑌦𑌨𑌾𑌰𑍍𑌹𑌃 ।
𑌅𑌨𑍁𑌤𑍍𑌤𑌮𑍇𑌨𑌾𑌧𑍍𑌯𑍁𑌷𑌿𑌤𑌃 𑌪𑍍𑌰𑌿𑌯𑍇𑌣 𑌚𑌿𑌰𑍇𑌣 𑌵𑌾𑌮𑌃 𑌸𑌮𑌵𑍇𑌪𑌤𑌾𑌽𑌶𑍁 ॥ 3 ॥
𑌗𑌜𑍇𑌂𑌦𑍍𑌰𑌹𑌸𑍍𑌤𑌪𑍍𑌰𑌤𑌿𑌮𑌶𑍍𑌚 𑌪𑍀𑌨 𑌸𑍍𑌤𑌯𑍋𑌰𑍍𑌦𑍍𑌵𑌯𑍋𑌃 𑌸𑌮𑍍𑌹𑌤𑌯𑍋𑌃 𑌸𑍁𑌜𑌾𑌤𑌃 ।
𑌪𑍍𑌰𑌸𑍍𑌪𑌂𑌦𑌮𑌾𑌨𑌃 𑌪𑍁𑌨𑌰𑍂𑌰𑍁𑌰𑌸𑍍𑌯𑌾 𑌰𑌾𑌮𑌂 𑌪𑍁𑌰𑌸𑍍𑌤𑌾𑌤𑍍 𑌸𑍍𑌥𑌿𑌤𑌮𑌾𑌚𑌚𑌕𑍍𑌷𑍇 ॥ 4 ॥
𑌶𑍁𑌭𑌂 𑌪𑍁𑌨𑌰𑍍𑌹𑍇𑌮𑌸𑌮𑌾𑌨𑌵𑌰𑍍𑌣 𑌮𑍀𑌷𑌦𑍍𑌰𑌜𑍋𑌧𑍍𑌵𑌸𑍍𑌤𑌮𑌿𑌵𑌾𑌮𑌲𑌾𑌕𑍍𑌷𑍍𑌯𑌾𑌃 ।
𑌵𑌾𑌸 𑌸𑍍𑌸𑍍𑌥𑌿𑌤𑌾𑌯𑌾 𑌶𑍍𑌶𑌿𑌖𑌰𑌾𑌗𑍍𑌰𑌦𑌂𑌤𑍍𑌯𑌾𑌃 𑌕𑌿𑌂𑌚𑌿𑌤𑍍𑌪𑌰𑌿𑌸𑍍𑌰𑌂𑌸𑌤 𑌚𑌾𑌰𑍁𑌗𑌾𑌤𑍍𑌯𑍍𑌰𑌾𑌃 ॥ 5 ॥
𑌏𑌤𑍈𑌰𑍍𑌨𑌿𑌮𑌿𑌤𑍍𑌤𑍈𑌰𑌪𑌰𑍈𑌶𑍍𑌚 𑌸𑍁𑌭𑍍𑌰𑍂𑌃 𑌸𑌂𑌬𑍋𑌧𑌿𑌤𑌾 𑌪𑍍𑌰𑌾𑌗𑌪𑌿 𑌸𑌾𑌧𑍁 𑌸𑌿𑌦𑍍𑌧𑍈𑌃 ।
𑌵𑌾𑌤𑌾𑌤𑌪𑌕𑍍𑌲𑌾𑌂𑌤𑌮𑌿𑌵 𑌪𑍍𑌰𑌣𑌷𑍍𑌟𑌂 𑌵𑌰𑍍𑌷𑍇𑌣 𑌬𑍀𑌜𑌂 𑌪𑍍𑌰𑌤𑌿𑌸𑌂𑌜𑌹𑌰𑍍𑌷 ॥ 6 ॥
𑌤𑌸𑍍𑌯𑌾𑌃 𑌪𑍁𑌨𑌰𑍍𑌬𑌿𑌂𑌬𑌫𑌲𑌾𑌧𑌰𑍋𑌷𑍍𑌠𑌂 𑌸𑍍𑌵𑌕𑍍𑌷𑌿𑌭𑍍𑌰𑍁𑌕𑍇𑌶𑌾𑌂𑌤𑌮𑌰𑌾𑌲𑌪𑌕𑍍𑌷𑍍𑌮 ।
𑌵𑌕𑍍𑌤𑍍𑌰𑌂 𑌬𑌭𑌾𑌸𑍇 𑌸𑌿𑌤𑌶𑍁𑌕𑍍𑌲𑌦𑌂𑌷𑍍𑌟𑍍𑌰𑌂 𑌰𑌾𑌹𑍋𑌰𑍍𑌮𑍁𑌖𑌾𑌚𑍍𑌚𑌂𑌦𑍍𑌰 𑌇𑌵 𑌪𑍍𑌰𑌮𑍁𑌕𑍍𑌤𑌃 ॥ ॥
𑌸𑌾 𑌵𑍀𑌤𑌶𑍋𑌕𑌾 𑌵𑍍𑌯𑌪𑌨𑍀𑌤𑌤𑌂𑌦𑍍𑌰𑍀 𑌶𑌾𑌂𑌤𑌜𑍍𑌵𑌰𑌾 𑌹𑌰𑍍𑌷𑌵𑌿𑌬𑍁𑌦𑍍𑌧𑌸𑌤𑍍𑌤𑍍𑌵𑌾 ।
𑌅𑌶𑍋𑌭𑌤𑌾𑌰𑍍𑌯𑌾 𑌵𑌦𑌨𑍇𑌨 𑌶𑍁𑌕𑍍𑌲𑍇 𑌶𑍀𑌤𑌾𑌂𑌶𑍁𑌨𑌾 𑌰𑌾𑌤𑍍𑌰𑌿𑌰𑌿𑌵𑍋𑌦𑌿𑌤𑍇𑌨 ॥ ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌏𑌕𑍋𑌨𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
