𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌸𑍍𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌸𑍍𑌯𑌾𑌸𑍍𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌹𑌨𑍁𑌮𑌾𑌨𑍍𑌹𑌰𑌿𑌪𑍁𑌂𑌗𑌵𑌃 ।
𑌦𑍁𑌃𑌖𑌾𑌦𑍍𑌦𑍁𑌃𑌖𑌾𑌭𑌿𑌭𑍂𑌤𑌾𑌯𑌾 𑌸𑍍𑌸𑌾𑌂𑌤𑍍𑌵𑌮𑍁𑌤𑍍𑌤𑌰𑌮𑌬𑍍𑌰𑌵𑍀𑌤𑍍 ॥ 1 ॥
𑌅𑌹𑌂 𑌰𑌾𑌮𑌸𑍍𑌯 𑌸𑌂𑌦𑍇𑌶𑌾𑌦𑍍𑌦𑍇𑌵𑌿 𑌦𑍂𑌤𑌸𑍍𑌤𑌵𑌾𑌗𑌤𑌃 ।
𑌵𑍈𑌦𑍇𑌹𑌿 𑌕𑍁𑌶𑌲𑍀 𑌰𑌾𑌮𑌸𑍍𑌤𑍍𑌵𑌾𑌂 𑌚 𑌕𑍌𑌶𑌲𑌮𑌬𑍍𑌰𑌵𑍀𑌤𑍍 ॥ 2 ॥
𑌯𑍋 𑌬𑍍𑌰𑌹𑍍𑌮𑌮𑌸𑍍𑌤𑍍𑌰𑌂 𑌵𑍇𑌦𑌾𑌂𑌶𑍍𑌚 𑌵𑍇𑌦 𑌵𑍇𑌦𑌵𑌿𑌦𑌾𑌂𑌵𑌰𑌃 ।
𑌸 𑌤𑍍𑌵𑌾𑌂 𑌦𑌾𑌶𑌰𑌥𑍀 𑌰𑌾𑌮𑍋 𑌦𑍇𑌵𑌿 𑌕𑍌𑌶𑌲𑌮𑌬𑍍𑌰𑌵𑍀𑌤𑍍 ॥ 3 ॥
𑌲𑌕𑍍𑌷𑍍𑌮𑌣𑌶𑍍𑌚 𑌮𑌹𑌾𑌤𑍇𑌜𑌾 𑌭𑌰𑍍𑌤𑍁𑌸𑍍𑌤𑍇𑌽𑌨𑍁𑌚𑌰𑌃 𑌪𑍍𑌰𑌿𑌯𑌃 ।
𑌕𑍃𑌤𑌵𑌾𑌨𑍍𑌶𑍋𑌕𑌸𑌂𑌤𑌪𑍍𑌤𑌶𑍍𑌶𑌿𑌰𑌸𑌾 𑌤𑍇𑌽𑌭𑌿𑌵𑌾𑌦𑌨𑌮𑍍 ॥ 4 ॥
𑌸𑌾 𑌤𑌯𑍋𑌃 𑌕𑍁𑌶𑌲𑌂 𑌦𑍇𑌵𑍀 𑌨𑌿𑌶𑌮𑍍𑌯 𑌨𑌰𑌸𑌿𑌂𑌹𑌯𑍋𑌃 ।
𑌪𑍍𑌰𑍀𑌤𑌿𑌸𑌂𑌹𑍃𑌷𑍍𑌟𑌸𑌰𑍍𑌵𑌾𑌂𑌗𑍀 𑌹𑌨𑍁𑌮𑌂𑌤𑌮𑌥𑌾𑌬𑍍𑌰𑌵𑍀𑌤𑍍 ॥ 5 ॥
𑌕𑌲𑍍𑌯𑌾𑌣𑍀 𑌬𑌤 𑌗𑌾𑌥𑍇𑌯𑌂 𑌲𑍌𑌕𑌿𑌕𑍀 𑌪𑍍𑌰𑌤𑌿𑌭𑌾𑌤𑌿 𑌮𑌾 ।
𑌏𑌤𑌿 𑌜𑍀𑌵𑌂𑌤𑌮𑌾𑌨𑌂𑌦𑍋 𑌨𑌰𑌂 𑌵𑌰𑍍𑌷𑌶𑌤𑌾𑌦𑌪𑌿 ॥ 6 ॥
𑌤𑌯𑌾 𑌸𑌮𑌾𑌗𑌤𑍇 𑌤𑌸𑍍𑌮𑌿𑌨𑍍𑌪𑍍𑌰𑍀𑌤𑌿𑌰𑍁𑌤𑍍𑌪𑌾𑌦𑌿𑌤𑌾𑌽𑌦𑍍𑌭𑍁𑌤𑌾 ।
𑌪𑌰𑌸𑍍𑌪𑌰𑍇𑌣 𑌚𑌾𑌲𑌾𑌪𑌂 𑌵𑌿𑌶𑍍𑌵𑌸𑍍𑌤𑍌 𑌤𑍌 𑌪𑍍𑌰𑌚𑌕𑍍𑌰𑌤𑍁𑌃 ॥ ॥
𑌤𑌸𑍍𑌯𑌾𑌸𑍍𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌹𑌨𑍁𑌮𑌾𑌨𑍍𑌹𑌰𑌿𑌯𑍂𑌥𑌪𑌃 ।
𑌸𑍀𑌤𑌾𑌯𑌾𑌶𑍍𑌶𑍋𑌕𑌦𑍀𑌨𑌾𑌯𑌾𑌸𑍍𑌸𑌮𑍀𑌪𑌮𑍁𑌪𑌚𑌕𑍍𑌰𑌮𑍇 ॥ ॥
𑌯𑌥𑌾 𑌯𑌥𑌾 𑌸𑌮𑍀𑌪𑌂 𑌸 𑌹𑌨𑍁𑌮𑌾𑌨𑍁𑌪𑌸𑌰𑍍𑌪𑌤𑌿 ।
𑌤𑌥𑌾 𑌤𑌥𑌾 𑌰𑌾𑌵𑌣𑌂 𑌸𑌾 𑌤𑌂 𑌸𑍀𑌤𑌾 𑌪𑌰𑌿𑌶𑌂𑌕𑌤𑍇 ॥ ॥
𑌅𑌹𑍋 𑌧𑌿𑌗𑍍𑌦𑍁𑌷𑍍𑌕𑍃𑌤𑌮𑌿𑌦𑌂 𑌕𑌥𑌿𑌤𑌂 𑌹𑌿 𑌯𑌦𑌸𑍍𑌯 𑌮𑍇 ।
𑌰𑍂𑌪𑌾𑌂𑌤𑌰𑌮𑍁𑌪𑌾𑌗𑌮𑍍𑌯 𑌸 𑌏𑌵𑌾𑌯𑌂 𑌹𑌿 𑌰𑌾𑌵𑌣𑌃 ॥ 10 ॥
𑌤𑌾𑌮𑌶𑍋𑌕𑌸𑍍𑌯 𑌶𑌾𑌖𑌾𑌂 𑌸𑌾 𑌵𑌿𑌮𑍁𑌕𑍍𑌤𑍍𑌵𑌾 𑌶𑍋𑌕𑌕𑌰𑍍𑌶𑌿𑌤𑌾 ।
𑌤𑌸𑍍𑌯𑌾𑌮𑍇𑌵𑌾𑌨𑌵𑌦𑍍𑌯𑌾𑌂𑌗𑍀 𑌧𑌰𑌣𑍍𑌯𑌾𑌂 𑌸𑌮𑍁𑌪𑌾𑌵𑌿𑌶𑌤𑍍 ॥ 11 ॥
𑌹𑌨𑍁𑌮𑌾𑌨𑌪𑌿 𑌦𑍁𑌃𑌖𑌾𑌰𑍍𑌤𑌾𑌂 𑌤𑌾𑌂 𑌦𑍃𑌷𑍍𑌟𑍍𑌵𑌾 𑌭𑌯𑌮𑍋𑌹𑌿𑌤𑌾𑌮𑍍 ।
𑌅𑌵𑌂𑌦𑌤 𑌮𑌹𑌾𑌬𑌾𑌹𑍁𑌸𑍍𑌤𑌤𑌸𑍍𑌤𑌾𑌂 𑌜𑌨𑌕𑌾𑌤𑍍𑌮𑌜𑌾𑌮𑍍 ॥ 12 ॥
𑌸𑌾 𑌚𑍈𑌨𑌂 𑌭𑌯𑌵𑌿𑌤𑍍𑌰𑌸𑍍𑌤𑌾 𑌭𑍂𑌯𑍋 𑌨𑍈𑌵𑌾𑌭𑍍𑌯𑍁𑌦𑍈𑌕𑍍𑌷𑌤 ।
𑌤𑌂 𑌦𑍃𑌷𑍍𑌟𑍍𑌵𑌾 𑌵𑌂𑌦𑌮𑌾𑌨𑌂 𑌤𑍁 𑌸𑍀𑌤𑌾 𑌶𑌶𑌿𑌨𑌿𑌭𑌾𑌨𑌨𑌾 ॥ 13 ॥
𑌅𑌬𑍍𑌰𑌵𑍀𑌦𑍍𑌧𑍀𑌰𑍍𑌘𑌮𑍁𑌚𑍍𑌛𑌵𑌸𑍍𑌯 𑌵𑌾𑌨𑌰𑌂 𑌮𑌧𑍁𑌰𑌸𑍍𑌵𑌰𑌾 ।
𑌮𑌾𑌯𑌾𑌂 𑌪𑍍𑌰𑌵𑌿𑌷𑍍𑌟𑍋 𑌮𑌾𑌯𑌾𑌵𑍀 𑌯𑌦𑌿 𑌤𑍍𑌵𑌂 𑌰𑌾𑌵𑌣𑌸𑍍𑌸𑍍𑌵𑌯𑌮𑍍 ॥ 14 ॥
𑌉𑌤𑍍𑌪𑌾𑌦𑌯𑌸𑌿 𑌮𑍇 𑌭𑍂𑌯𑌸𑍍𑌸𑌂𑌤𑌾𑌪𑌂 𑌤𑌨𑍍𑌨 𑌶𑍋𑌭𑌨𑌮𑍍 ।
𑌸𑍍𑌵𑌂 𑌪𑌰𑌿𑌤𑍍𑌯𑌜𑍍𑌯 𑌰𑍂𑌪𑌂 𑌯𑌃 𑌪𑌰𑌿𑌵𑍍𑌰𑌾𑌜𑌕𑌰𑍂𑌪𑌧𑍍𑌰𑍁𑌤𑍍 ।
𑌜𑌨𑌸𑍍𑌥𑌾𑌨𑍇 𑌮𑌯𑌾 𑌦𑍃𑌷𑍍𑌟𑌸𑍍𑌤𑍍𑌵𑌂 𑌸 𑌏𑌵𑌾𑌸𑌿 𑌰𑌾𑌵𑌣𑌃 ॥ 15 ॥
𑌉𑌪𑌵𑌾𑌸𑌕𑍃𑌶𑌾𑌂 𑌦𑍀𑌨𑌾𑌂 𑌕𑌾𑌮𑌰𑍂𑌪 𑌨𑌿𑌶𑌾𑌚𑌰 ।
𑌸𑌂𑌤𑌾𑌪𑌯𑌸𑌿 𑌮𑌾𑌂 𑌭𑍂𑌯𑌸𑍍𑌸𑌂𑌤𑌪𑍍𑌤𑌾𑌂 𑌤𑌨𑍍𑌨 𑌶𑍋𑌭𑌨𑌮𑍍 ॥ 16 ॥
𑌅𑌥𑌵𑌾 𑌨𑍈𑌤𑌦𑍇𑌵𑌂 𑌹𑌿 𑌯𑌨𑍍𑌮𑌯𑌾 𑌪𑌰𑌿𑌶𑌂𑌕𑌿𑌤𑌮𑍍 ॥ 1 ॥
𑌮𑌨𑌸𑍋 𑌹𑌿 𑌮𑌮 𑌪𑍍𑌰𑍀𑌤𑌿𑌰𑍁𑌤𑍍𑌪𑌨𑍍𑌨𑌾 𑌤𑌵 𑌦𑌰𑍍𑌶𑌨𑌾𑌤𑍍 ।
𑌯𑌦𑌿 𑌰𑌾𑌮𑌸𑍍𑌯 𑌦𑍂𑌤𑌸𑍍𑌤𑍍𑌵𑌮𑌾𑌗𑌤𑍋 𑌭𑌦𑍍𑌰𑌮𑌸𑍍𑌤𑍁 𑌤𑍇 ॥ 1 ॥
𑌪𑍃𑌚𑍍𑌛𑌾𑌮𑌿 𑌤𑍍𑌵𑌾𑌂 𑌹𑌰𑌿𑌶𑍍𑌰𑍇𑌷𑍍𑌠 𑌪𑍍𑌰𑌿𑌯𑌾 𑌰𑌾𑌮𑌕𑌥𑌾 𑌹𑌿 𑌮𑍇 ।
𑌗𑍁𑌣𑌾𑌨𑍍𑌰𑌾𑌮𑌸𑍍𑌯 𑌕𑌥𑌯 𑌪𑍍𑌰𑌿𑌯𑌸𑍍𑌯 𑌮𑌮 𑌵𑌾𑌨𑌰 ॥ 1 ॥
𑌚𑌿𑌤𑍍𑌤𑌂 𑌹𑌰𑌸𑌿 𑌮𑍇 𑌸𑍌𑌮𑍍𑌯 𑌨𑌦𑍀𑌕𑍂𑌲𑌂 𑌯𑌥𑌾 𑌰𑌯𑌃 ।
𑌅𑌹𑍋 𑌸𑍍𑌵𑌪𑍍𑌨𑌸𑍍𑌯 𑌸𑍁𑌖𑌤𑌾 𑌯𑌾𑌹𑌮𑍇𑌵𑌂 𑌚𑌿𑌰𑌾𑌹𑍃𑌤𑌾 ॥ 20 ॥
𑌪𑍍𑌰𑍇𑌷𑌿𑌤𑌂 𑌨𑌾𑌮 𑌪𑌶𑍍𑌯𑌾𑌮𑌿 𑌰𑌾𑌘𑌵𑍇𑌣 𑌵𑌨𑍌𑌕𑌸𑌮𑍍 ।
𑌸𑍍𑌵𑌪𑍍𑌨𑍇𑌽𑌪𑌿 𑌯𑌦𑍍𑌯𑌹𑌂 𑌵𑍀𑌰𑌂 𑌰𑌾𑌘𑌵𑌂 𑌸𑌹𑌲𑌕𑍍𑌷𑍍𑌮𑌣𑌮𑍍 ॥ 21 ॥
𑌪𑌶𑍍𑌯𑍇𑌯𑌂 𑌨𑌾𑌵𑌸𑍀𑌦𑍇𑌯𑌂 𑌸𑍍𑌵𑌪𑍍𑌨𑍋𑌽𑌪𑌿 𑌮𑌮 𑌮𑌤𑍍𑌸𑌰𑍀 ।
𑌨𑌾𑌹𑌂 𑌸𑍍𑌵𑌪𑍍𑌨𑌮𑌿𑌮𑌂 𑌮𑌨𑍍𑌯𑍇 𑌸𑍍𑌵𑌪𑍍𑌨𑍇 𑌦𑍃𑌷𑍍𑌟𑍍𑌵𑌾 𑌹𑌿 𑌵𑌾𑌨𑌰𑌮𑍍 ॥ 22 ॥
𑌨 𑌶𑌕𑍍𑌯𑍋𑌽𑌭𑍍𑌯𑍁𑌦𑌯𑌃 𑌪𑍍𑌰𑌾𑌪𑍍𑌤𑍁𑌂 𑌪𑍍𑌰𑌾𑌪𑍍𑌤𑌶𑍍𑌚𑌾𑌭𑍍𑌯𑍁𑌦𑌯𑍋 𑌮𑌮 ।
𑌕𑌿𑌨𑍍𑌨𑍁 𑌸𑍍𑌯𑌾𑌚𑌿𑌤𑍍𑌤𑌮𑍋𑌹𑍋𑌽𑌯𑌂 𑌭𑌵𑍇𑌦𑍍𑌵𑌾𑌤𑌗𑌤𑌿𑌸𑍍𑌤𑍍𑌵𑌿𑌯𑌮𑍍 ॥ 23 ॥
𑌉𑌨𑍍𑌮𑌾𑌦𑌜𑍋 𑌵𑌿𑌕𑌾𑌰𑍋 𑌵𑌾 𑌸𑍍𑌯𑌾𑌦𑌿𑌯𑌂 𑌮𑍃𑌗𑌤𑍃𑌷𑍍𑌣𑌿𑌕𑌾 ।
𑌅𑌥𑌵𑌾 𑌨𑌾𑌯𑌮𑍁𑌨𑍍𑌮𑌾𑌦𑍋 𑌮𑍋𑌹𑍋𑌽𑌪𑍍𑌯𑍁𑌨𑍍𑌮𑌾𑌦𑌲𑌕𑍍𑌷𑌣𑌃 ॥ 24 ॥
𑌸𑌂𑌬𑍁𑌧𑍍𑌯𑍇 𑌚𑌾𑌹𑌮𑌾𑌤𑍍𑌮𑌾𑌨𑌮𑌿𑌯𑌂 𑌚𑌾𑌪𑌿 𑌵𑌨𑍌𑌕𑌸𑌮𑍍 ।
𑌇𑌤𑍍𑌯𑍇𑌵𑌂 𑌬𑌹𑍁𑌧𑌾 𑌸𑍀𑌤𑌾 𑌸𑌂𑌪𑍍𑌰𑌧𑌾𑌰𑍍𑌯 𑌬𑌲𑌾𑌬𑌲𑌮𑍍 ॥ 25 ॥
𑌰𑌕𑍍𑌷𑌸𑌾𑌂 𑌕𑌾𑌮𑌰𑍂𑌪𑌤𑍍𑌵𑌾𑌨𑍍𑌮𑍇𑌨𑍇 𑌤𑌂 𑌰𑌾𑌕𑍍𑌷𑌸𑌾𑌧𑌿𑌪𑌮𑍍 ।
𑌏𑌤𑌾𑌂 𑌬𑍁𑌦𑍍𑌧𑌿𑌂 𑌤𑌦𑌾 𑌕𑍃𑌤𑍍𑌵𑌾 𑌸𑍀𑌤𑌾 𑌸𑌾 𑌤𑌨𑍁𑌮𑌧𑍍𑌯𑌮𑌾 ॥ 26 ॥
𑌨 𑌪𑍍𑌰𑌤𑌿𑌵𑍍𑌯𑌾𑌜𑌹𑌾𑌰𑌾𑌥 𑌵𑌾𑌨𑌰𑌂 𑌜𑌨𑌕𑌾𑌤𑍍𑌮𑌜𑌾 ।
𑌸𑍀𑌤𑌾𑌯𑌾𑌶𑍍𑌚𑌿𑌂𑌤𑌿𑌤𑌂 𑌬𑍁𑌦𑍍𑌧𑍍𑌵𑌾 𑌹𑌨𑍁𑌮𑌾𑌨𑍍𑌮𑌾𑌰𑍁𑌤𑌾𑌤𑍍𑌮𑌜𑌃 ॥ 2 ॥
𑌶𑍍𑌰𑍋𑌤𑍍𑌰𑌾𑌨𑍁𑌕𑍂𑌲𑍈𑌰𑍍𑌵𑌚𑌨𑍈𑌸𑍍𑌤𑌦𑌾 𑌤𑌾𑌂 𑌸𑌂𑌪𑍍𑌰𑌹𑌰𑍍𑌷𑌯𑌤𑍍 ।
𑌆𑌦𑌿𑌤𑍍𑌯 𑌇𑌵 𑌤𑍇𑌜𑌸𑍍𑌵𑍀 𑌲𑍋𑌕𑌕𑌾𑌂𑌤𑌶𑍍𑌶𑌶𑍀 𑌯𑌥𑌾 ॥ 2 ॥
𑌰𑌾𑌜𑌾 𑌸𑌰𑍍𑌵𑌸𑍍𑌯 𑌲𑍋𑌕𑌸𑍍𑌯 𑌦𑍇𑌵𑍋 𑌵𑍈𑌶𑍍𑌰𑌵𑌣𑍋 𑌯𑌥𑌾 ।
𑌵𑌿𑌕𑍍𑌰𑌮𑍇𑌣𑍋𑌪𑌪𑌨𑍍𑌨𑌶𑍍𑌚 𑌯𑌥𑌾 𑌵𑌿𑌷𑍍𑌣𑍁𑌰𑍍𑌮𑌹𑌾𑌯𑌶𑌾𑌃 ॥ 2 ॥
𑌸𑌤𑍍𑌯𑌵𑌾𑌦𑍀 𑌮𑌧𑍁𑌰𑌵𑌾𑌗𑍍𑌦𑍇𑌵𑍋 𑌵𑌾𑌚𑌸𑍍𑌪𑌤𑌿𑌰𑍍𑌯𑌥𑌾 ।
𑌰𑍂𑌪𑌵𑌾𑌨𑍍𑌸𑍁𑌭𑌗 𑌶𑍍𑌰𑍀𑌮𑌾𑌨𑍍 𑌕𑌂𑌦𑌰𑍍𑌪 𑌇𑌵 𑌮𑍂𑌰𑍍𑌤𑌿𑌮𑌾𑌨𑍍 ॥ 30 ॥
𑌸𑍍𑌥𑌾𑌨𑌕𑍍𑌰𑍋𑌧𑌃 𑌪𑍍𑌰𑌹𑌰𑍍𑌤𑌾 𑌚 𑌶𑍍𑌰𑍇𑌷𑍍𑌠𑍋 𑌲𑍋𑌕𑍇 𑌮𑌹𑌾𑌰𑌥𑌃 ।
𑌬𑌾𑌹𑍁𑌚𑍍𑌛𑌾𑌯𑌾𑌮𑌵𑌷𑍍𑌟𑌬𑍍𑌧𑍋 𑌯𑌸𑍍𑌯 𑌲𑍋𑌕𑍋 𑌮𑌹𑌾𑌤𑍍𑌮𑌨𑌃 ॥ 31 ॥
𑌅𑌪𑌕𑍃𑌷𑍍𑌯𑌾𑌶𑍍𑌰𑌮𑌪𑌦𑌾𑌨𑍍𑌮𑍃𑌗𑌰𑍂𑌪𑍇𑌣 𑌰𑌾𑌘𑌵𑌮𑍍 ।
𑌶𑍂𑌨𑍍𑌯𑍇 𑌯𑍇𑌨𑌾𑌪𑌨𑍀𑌤𑌾𑌸𑌿 𑌤𑌸𑍍𑌯 𑌦𑍍𑌰𑌕𑍍𑌷𑍍𑌯𑌸𑌿 𑌯𑌤𑍍𑌫𑌲𑌮𑍍 ॥ 32 ॥
𑌨 𑌚𑌿𑌰𑌾𑌦𑍍𑌰𑌾𑌵𑌣𑌂 𑌸𑌂𑌖𑍍𑌯𑍇 𑌯𑍋 𑌵𑌧𑌿𑌷𑍍𑌯𑌤𑌿 𑌵𑍀𑌰𑍍𑌯𑌵𑌾𑌨𑍍 ।
𑌰𑍋𑌷𑌪𑍍𑌰𑌮𑍁𑌕𑍍𑌤𑍈𑌰𑌿𑌷𑍁𑌭𑌿𑌰𑍍𑌜𑍍𑌵𑌲𑌦𑍍𑌭𑌿𑌰𑌿𑌵 𑌪𑌾𑌵𑌕𑍈𑌃 ॥ 33 ॥
𑌤𑍇𑌨𑌾𑌹𑌂 𑌪𑍍𑌰𑍇𑌷𑌿𑌤𑍋 𑌦𑍂𑌤 𑌸𑍍𑌤𑍍𑌵𑌤𑍍𑌸𑌕𑌾𑌶𑌮𑌿𑌹𑌾𑌗𑌤𑌃 ।
𑌤𑍍𑌵𑌦𑍍𑌵𑌿𑌯𑍋𑌗𑍇𑌨 𑌦𑍁𑌃𑌖𑌾𑌰𑍍𑌤 𑌸𑍍𑌸 𑌤𑍍𑌵𑌾𑌂 𑌕𑍌𑌶𑌲𑌮𑌬𑍍𑌰𑌵𑍀𑌤𑍍 ॥ 34 ॥
𑌲𑌕𑍍𑌷𑍍𑌮𑌣𑌶𑍍𑌚 𑌮𑌹𑌾𑌤𑍇𑌜𑌾𑌸𑍍𑌸𑍁𑌮𑌿𑌤𑍍𑌰𑌾𑌨𑌂𑌦𑌵𑌰𑍍𑌧𑌨𑌃 ।
𑌅𑌭𑌿𑌵𑌾𑌦𑍍𑌯 𑌮𑌹𑌾𑌬𑌾𑌹𑍁𑌸𑍍𑌸 𑌤𑍍𑌵𑌾𑌂 𑌕𑍌𑌶𑌲𑌮𑌬𑍍𑌰𑌵𑍀𑌤𑍍 ॥ 35 ॥
𑌰𑌾𑌮𑌸𑍍𑌯 𑌚 𑌸𑌖𑌾 𑌦𑍇𑌵𑌿 𑌸𑍁𑌗𑍍𑌰𑍀𑌵𑍋 𑌨𑌾𑌮 𑌵𑌾𑌨𑌰𑌃 ।
𑌰𑌾𑌜𑌾 𑌵𑌾𑌨𑌰𑌮𑍁𑌖𑍍𑌯𑌾𑌨𑌾𑌂 𑌸 𑌤𑍍𑌵𑌾𑌂 𑌕𑍌𑌶𑌲𑌮𑌬𑍍𑌰𑌵𑍀𑌤𑍍 ॥ 36 ॥
𑌨𑌿𑌤𑍍𑌯𑌂 𑌸𑍍𑌮𑌰𑌤𑌿 𑌰𑌾𑌮𑌸𑍍𑌤𑍍𑌵𑌾𑌂 𑌸𑌸𑍁𑌗𑍍𑌰𑍀𑌵 𑌸𑍍𑌸𑌲𑌕𑍍𑌷𑍍𑌮𑌣𑌃 ।
𑌦𑌿𑌷𑍍𑌟𑍍𑌯𑌾 𑌜𑍀𑌵𑌸𑌿 𑌵𑍈𑌦𑍇𑌹𑌿 𑌰𑌾𑌕𑍍𑌷𑌸𑍀𑌵𑌶𑌮𑌾𑌗𑌤𑌾 ॥ 3 ॥
𑌨𑌚𑌿𑌰𑌾𑌦𑍍𑌦𑍍𑌰𑌕𑍍𑌷𑍍𑌯𑌸𑍇 𑌰𑌾𑌮𑌂 𑌲𑌕𑍍𑌷𑍍𑌮𑌣𑌂 𑌚 𑌮𑌹𑌾𑌬𑌲𑌮𑍍 ।
𑌮𑌧𑍍𑌯𑍇 𑌵𑌾𑌨𑌰𑌕𑍋𑌟𑍀𑌨𑌾𑌂 𑌸𑍁𑌗𑍍𑌰𑍀𑌵𑌂 𑌚𑌾𑌮𑌿𑌤𑍌𑌜𑌸𑌮𑍍 ॥ 3 ॥
𑌅𑌹𑌂 𑌸𑍁𑌗𑍍𑌰𑍀𑌵𑌸𑌚𑌿𑌵𑍋 𑌹𑌨𑍁𑌮𑌾𑌨𑍍𑌨𑌾𑌮 𑌵𑌾𑌨𑌰𑌃 ।
𑌪𑍍𑌰𑌵𑌿𑌷𑍍𑌟𑍋 𑌨𑌗𑌰𑍀𑌂 𑌲𑌂𑌕𑌾𑌂 𑌲𑌂𑌘𑌯𑌿𑌤𑍍𑌵𑌾 𑌮𑌹𑍋𑌦𑌧𑌿𑌮𑍍 ॥ 3 ॥
𑌕𑍃𑌤𑍍𑌵𑌾 𑌮𑍂𑌰𑍍𑌧𑍍𑌨𑌿 𑌪𑌦𑌨𑍍𑌯𑌾𑌸𑌂 𑌰𑌾𑌵𑌣𑌸𑍍𑌯 𑌦𑍁𑌰𑌾𑌤𑍍𑌮𑌨𑌃 ।
𑌤𑍍𑌵𑌾𑌂 𑌦𑍍𑌰𑌷𑍍𑌟𑍁𑌮𑍁𑌪𑌯𑌾𑌤𑍋𑌽𑌹𑌂 𑌸𑌮𑌾𑌶𑍍𑌰𑌿𑌤𑍍𑌯 𑌪𑌰𑌾𑌕𑍍𑌰𑌮𑌮𑍍 ॥ 40 ॥
𑌨𑌾𑌹𑌮𑌸𑍍𑌮𑌿 𑌤𑌥𑌾 𑌦𑍇𑌵𑌿 𑌯𑌥𑌾 𑌮𑌾𑌮𑌵𑌗𑌚𑍍𑌛𑌸𑌿 ।
𑌵𑌿𑌶𑌂𑌕𑌾 𑌤𑍍𑌯𑌜𑍍𑌯𑌤𑌾𑌮𑍇𑌷𑌾 𑌶𑍍𑌰𑌦𑍍𑌧𑌤𑍍𑌸𑍍𑌵 𑌵𑌦𑌤𑍋 𑌮𑌮 ॥ 41 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌚𑌤𑍁𑌸𑍍𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
