Meaning, Multimedia
View this in:
| English | Devanagari | Telugu | Tamil | Kannada | Malayalam | Gujarati | Odia | Bengali  |
| Marathi | Assamese | Punjabi | Hindi | Samskritam | Konkani | Nepali | Sinhala | Grantha  |

5.53 𑌸𑍁𑌂𑌦𑌰𑌕𑌾𑌂𑌡 - 𑌤𑍍𑌰𑌿𑌪𑌂𑌚𑌾𑌶 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌿𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।

𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌦𑌶𑌗𑍍𑌰𑍀𑌵𑍋 𑌮𑌹𑌾𑌤𑍍𑌮𑌨𑌃 ।
𑌦𑍇𑌶𑌕𑌾𑌲𑌹𑌿𑌤𑌂 𑌵𑌾𑌕𑍍𑌯𑌂 𑌭𑍍𑌰𑌾𑌤𑍁𑌰𑍁𑌤𑍍𑌤𑌰𑌮𑌬𑍍𑌰𑌵𑍀𑌤𑍍 ॥ 1 ॥

𑌸𑌮𑍍𑌯𑌗𑍁𑌕𑍍𑌤𑌂 𑌹𑌿 𑌭𑌵𑌤𑌾 𑌦𑍂𑌤𑌵𑌧𑍍𑌯𑌾 𑌵𑌿𑌗𑌰𑍍𑌹𑌿𑌤𑌾 ।
𑌅𑌵𑌶𑍍𑌯𑌂 𑌤𑍁 𑌵𑌧𑌾𑌦𑌨𑍍𑌯𑌃 𑌕𑍍𑌰𑌿𑌯𑌤𑌾𑌮𑌸𑍍𑌯 𑌨𑌿𑌗𑍍𑌰𑌹𑌃 ॥ 2 ॥

𑌕𑌪𑍀𑌨𑌾𑌂 𑌕𑌿𑌲 𑌲𑌾𑌂𑌗𑍂𑌲𑌮𑌿𑌷𑍍𑌟𑌂 𑌭𑌵𑌤𑌿 𑌭𑍂𑌷𑌣𑌮𑍍 ।
𑌤𑌦𑌸𑍍𑌯 𑌦𑍀𑌪𑍍𑌯𑌤𑌾𑌂 𑌶𑍀𑌘𑍍𑌰𑌂 𑌤𑍇𑌨 𑌦𑌗𑍍𑌧𑍇𑌨 𑌗𑌚𑍍𑌛𑌤𑍁 ॥ 3 ॥

𑌤𑌤𑌃 𑌪𑌶𑍍𑌯𑌂𑌤𑍍𑌵𑌿𑌮𑌂 𑌦𑍀𑌨𑌮𑌂𑌗𑌵𑍈𑌰𑍂𑌪𑍍𑌯𑌕𑌰𑍍𑌶𑌿𑌤𑌮𑍍 ।
𑌸𑌮𑌿𑌤𑍍𑌰𑌜𑍍𑌞𑌾𑌤𑌯𑌸𑍍𑌸𑌰𑍍𑌵𑍇 𑌬𑌾𑌂𑌧𑌵𑌾𑌃 𑌸𑌸𑍁𑌹𑍃𑌜𑍍𑌜𑌨𑌾𑌃 ॥ 4 ॥

𑌆𑌜𑍍𑌞𑌾𑌪𑌯𑌦𑍍𑌰𑌾𑌕𑍍𑌷𑌸𑍇𑌂𑌦𑍍𑌰𑌃 𑌪𑍁𑌰𑌂 𑌸𑌰𑍍𑌵𑌂 𑌸𑌚𑌤𑍍𑌵𑌰𑌮𑍍 ।
𑌲𑌾𑌂𑌗𑍂𑌲𑍇𑌨 𑌪𑍍𑌰𑌦𑍀𑌪𑍍𑌤𑍇𑌨 𑌰𑌕𑍍𑌷𑍋𑌭𑌿𑌃 𑌪𑌰𑌿𑌣𑍀𑌯𑌤𑌾𑌮𑍍 ॥ 5 ॥

𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌰𑌾𑌕𑍍𑌷𑌸𑌾𑌃 𑌕𑍋𑌪𑌕𑌰𑍍𑌶𑌿𑌤𑌾𑌃 ।
𑌵𑍇𑌷𑍍𑌟𑌯𑌂𑌤𑌿 𑌸𑍍𑌮 𑌲𑌾𑌂𑌗𑍂𑌲𑌂 𑌜𑍀𑌰𑍍𑌣𑍈𑌃 𑌕𑌾𑌰𑍍𑌪𑌾𑌸𑌕𑍈𑌃 𑌪𑌟𑍈𑌃 ॥ 6 ॥

𑌸𑌂𑌵𑍇𑌷𑍍𑌟𑍍𑌯𑌮𑌾𑌨𑍇 𑌲𑌾𑌂𑌗𑍂𑌲𑍇 𑌵𑍍𑌯𑌵𑌰𑍍𑌧𑌤 𑌮𑌹𑌾𑌕𑌪𑌿𑌃 ।
𑌶𑍁𑌷𑍍𑌕𑌮𑌿𑌂𑌧𑌨𑌮𑌾𑌸𑌾𑌦𑍍𑌯 𑌵𑌨𑍇𑌷𑍍𑌵𑌿𑌵 𑌹𑍁𑌤𑌾𑌶𑌨𑌃 ॥ 𑍭 ॥

𑌤𑍈𑌲𑍇𑌨 𑌪𑌰𑌿𑌷𑌿𑌚𑍍𑌯𑌾𑌥 𑌤𑍇𑌽𑌗𑍍𑌨𑌿𑌂 𑌤𑌤𑍍𑌰𑌾𑌭𑍍𑌯𑌪𑌾𑌤𑌯𑌨𑍍 ।
𑌲𑌾𑌂𑌗𑍂𑌲𑍇𑌨 𑌪𑍍𑌰𑌦𑍀𑌪𑍍𑌤𑍇𑌨 𑌰𑌾𑌕𑍍𑌷𑌸𑌾𑌂𑌸𑍍𑌤𑌾𑌨𑌪𑌾𑌤𑌯𑌤𑍍 ॥ 𑍮 ॥

𑌰𑍋𑌷𑌾𑌮𑌰𑍍𑌷𑌪𑌰𑍀𑌤𑌾𑌤𑍍𑌮𑌾 𑌬𑌾𑌲𑌸𑍂𑌰𑍍𑌯𑌸𑌮𑌾𑌨𑌨𑌃 ।
𑌲𑌾𑌂𑌗𑍂𑌲𑌂 𑌸𑌂𑌪𑍍𑌰𑌦𑍀𑌪𑍍𑌤𑌂 𑌤𑍁 𑌦𑍍𑌰𑌷𑍍𑌟𑍁𑌂 𑌤𑌸𑍍𑌯 𑌹𑌨𑍂𑌮𑌤𑌃 ॥ 𑍯 ॥

𑌸𑌹𑌸𑍍𑌤𑍍𑌰𑍀𑌬𑌾𑌲𑌵𑍃𑌦𑍍𑌧𑌾𑌶𑍍𑌚 𑌜𑌗𑍍𑌮𑍁𑌃 𑌪𑍍𑌰𑍀𑌤𑌾 𑌨𑌿𑌶𑌾𑌚𑌰𑌾𑌃 ।
𑌸 𑌭𑍂𑌯𑌃 𑌸𑌂𑌗𑌤𑍈𑌃 𑌕𑍍𑌰𑍂𑌰𑍈𑌰𑍍𑌰𑌾𑌕𑍍𑌷𑌸𑍈𑌰𑍍𑌹𑌰𑌿𑌸𑌤𑍍𑌤𑌮𑌃 ॥ 10 ॥

𑌨𑌿𑌬𑌦𑍍𑌧𑌃 𑌕𑍃𑌤𑌵𑌾𑌨𑍍𑌵𑍀𑌰𑌸𑍍𑌤𑌤𑍍𑌕𑌾𑌲𑌸𑌦𑍃𑌶𑍀𑌂 𑌮𑌤𑌿𑌮𑍍 ।
𑌕𑌾𑌮𑌂 𑌖𑌲𑍁 𑌨 𑌮𑍇 𑌶𑌕𑍍𑌤𑌾 𑌨𑌿𑌬𑌦𑍍𑌧𑌸𑍍𑌯𑌾𑌪𑌿 𑌰𑌾𑌕𑍍𑌷𑌸𑌾𑌃 ॥ 11 ॥

𑌛𑌿𑌤𑍍𑌤𑍍𑌵𑌾 𑌪𑌾𑌶𑌾𑌨𑍍 𑌸𑌮𑍁𑌤𑍍𑌪𑌤𑍍𑌯 𑌹𑌨𑍍𑌯𑌾𑌮𑌹𑌮𑌿𑌮𑌾𑌨𑍍𑌪𑍁𑌨𑌃 ।
𑌯𑌦𑌿 𑌭𑌰𑍍𑌤𑍁𑌰𑍍𑌹𑌿𑌤𑌾𑌰𑍍𑌥𑌾𑌯 𑌚𑌰𑌂𑌤𑌂 𑌭𑌰𑍍𑌤𑍃𑌶𑌾𑌸𑌨𑌾𑌤𑍍 ॥ 12 ॥

𑌬𑌧𑍍𑌨𑌂𑌤𑍍𑌯𑍇𑌤𑍇 𑌦𑍁𑌰𑌾𑌤𑍍𑌮𑌨𑍋 𑌨 𑌤𑍁 𑌮𑍇 𑌨𑌿𑌷𑍍𑌕𑍃𑌤𑌿𑌃 𑌕𑍃𑌤𑌾 ।
𑌸𑌰𑍍𑌵𑍇𑌷𑌾𑌮𑍇𑌵 𑌪𑌰𑍍𑌯𑌾𑌪𑍍𑌤𑍋 𑌰𑌾𑌕𑍍𑌷𑌸𑌾𑌨𑌾𑌮𑌹𑌂 𑌯𑍁𑌧𑌿 ॥ 13 ॥

𑌕𑌿𑌂𑌤𑍁 𑌰𑌾𑌮𑌸𑍍𑌯 𑌪𑍍𑌰𑍀𑌤𑍍𑌯𑌰𑍍𑌥𑌂 𑌵𑌿𑌷𑌹𑌿𑌷𑍍𑌯𑍇𑌽𑌹𑌮𑍀𑌦𑍃𑌶𑌮𑍍 ।
𑌲𑌂𑌕𑌾 𑌚𑌾𑌰𑌯𑌿𑌤𑌵𑍍𑌯𑌾 𑌵𑍈 𑌪𑍁𑌨𑌰𑍇𑌵 𑌭𑌵𑍇𑌦𑌿𑌤𑌿 ॥ 14 ॥

𑌰𑌾𑌤𑍍𑌰𑍌 𑌨 𑌹𑌿 𑌸𑍁𑌦𑍃𑌷𑍍𑌟𑌾 𑌮𑍇 𑌦𑍁𑌰𑍍𑌗𑌕𑌰𑍍𑌮𑌵𑌿𑌧𑌾𑌨𑌤𑌃 ।
𑌅𑌵𑌶𑍍𑌯𑌮𑍇𑌵 𑌦𑍍𑌰𑌷𑍍𑌟𑌵𑍍𑌯𑌾 𑌮𑌯𑌾 𑌲𑌂𑌕𑌾 𑌨𑌿𑌶𑌾𑌕𑍍𑌷𑌯𑍇 ॥ 15 ॥

𑌕𑌾𑌮𑌂 𑌬𑌦𑍍𑌧𑌸𑍍𑌯 𑌮𑍇 𑌭𑍂𑌯𑌃 𑌪𑍁𑌚𑍍𑌛𑌸𑍍𑌯𑍋𑌦𑍍𑌦𑍀𑌪𑌨𑍇𑌨 𑌚 ।
𑌪𑍀𑌡𑌾𑌂 𑌕𑍁𑌰𑍍𑌵𑌂𑌤𑍁 𑌰𑌕𑍍𑌷𑌾𑌂𑌸𑌿 𑌨 𑌮𑍇𑌽𑌸𑍍𑌤𑌿 𑌮𑌨𑌸𑌶𑍍𑌶𑍍𑌰𑌮𑌃 ॥ 16 ॥

𑌤𑌤𑌸𑍍𑌤𑍇 𑌸𑌂𑌵𑍃𑌤𑌾𑌕𑌾𑌰𑌂 𑌸𑌤𑍍𑌤𑍍𑌵𑌵𑌂𑌤𑌂 𑌮𑌹𑌾𑌕𑌪𑌿𑌮𑍍 ।
𑌪𑌰𑌿𑌗𑍃𑌹𑍍𑌯 𑌯𑌯𑍁𑌰𑍍𑌹𑍃𑌷𑍍𑌟𑌾 𑌰𑌾𑌕𑍍𑌷𑌸𑌾𑌃 𑌕𑌪𑌿𑌕𑍁𑌂𑌜𑌰𑌮𑍍 ॥ 1𑍭 ॥

𑌶𑌂𑌖𑌭𑍇𑌰𑍀𑌨𑌿𑌨𑌾𑌦𑍈𑌸𑍍𑌤𑌂 𑌘𑍋𑌷𑌯𑌂𑌤𑌃 𑌸𑍍𑌵𑌕𑌰𑍍𑌮𑌭𑌿𑌃 ।
𑌰𑌾𑌕𑍍𑌷𑌸𑌾𑌃 𑌕𑍍𑌰𑍂𑌰𑌕𑌰𑍍𑌮𑌾𑌣𑌶𑍍𑌚𑌾𑌰𑌯𑌂𑌤𑌿 𑌸𑍍𑌮 𑌤𑌾𑌂 𑌪𑍁𑌰𑍀𑌮𑍍 ॥ 1𑍮 ॥

𑌅𑌨𑍍𑌵𑍀𑌯𑌮𑌾𑌨𑍋 𑌰𑌕𑍍𑌷𑍋𑌭𑌿𑌰𑍍𑌯𑌯𑍌 𑌸𑍁𑌖𑌮𑌰𑌿𑌂𑌦𑌮𑌃 ।
𑌹𑌨𑍁𑌮𑌾𑌂𑌶𑍍𑌚𑌾𑌰𑌯𑌾𑌮𑌾𑌸 𑌰𑌾𑌕𑍍𑌷𑌸𑌾𑌨𑌾𑌂 𑌮𑌹𑌾𑌪𑍁𑌰𑍀𑌮𑍍 ॥ 1𑍯 ॥

𑌅𑌥𑌾𑌪𑌶𑍍𑌯𑌦𑍍𑌵𑌿𑌮𑌾𑌨𑌾𑌨𑌿 𑌵𑌿𑌚𑌿𑌤𑍍𑌰𑌾𑌣𑌿 𑌮𑌹𑌾𑌕𑌪𑌿𑌃 ।
𑌸𑌂𑌵𑍃𑌤𑌾𑌨𑍍 𑌭𑍂𑌮𑌿𑌭𑌾𑌗𑌾𑌂𑌶𑍍𑌚 𑌸𑍁𑌵𑌿𑌭𑌕𑍍𑌤𑌾𑌂𑌶𑍍𑌚 𑌚𑌤𑍍𑌵𑌰𑌾𑌨𑍍 ॥ 20 ॥

𑌵𑍀𑌥𑍀𑌶𑍍𑌚 𑌗𑍃𑌹𑌸𑌂𑌬𑌾𑌧𑌾𑌃 𑌕𑌪𑌿𑌶𑍍𑌶𑍃𑌂𑌗𑌾𑌟𑌕𑌾𑌨𑌿 𑌚 ।
𑌤𑌥𑌾 𑌰𑌥𑍍𑌯𑍋𑌪𑌰𑌥𑍍𑌯𑌾𑌶𑍍𑌚 𑌤𑌥𑍈𑌵 𑌗𑍃𑌹𑌕𑌾𑌂𑌤𑌰𑌾𑌨𑍍 ॥ 21 ॥

𑌗𑍃𑌹𑌾𑌂𑌶𑍍𑌚 𑌮𑍇𑌘𑌸𑌂𑌕𑌾𑌶𑌾𑌨𑍍 𑌦𑌦𑌰𑍍𑌶 𑌪𑌵𑌨𑌾𑌤𑍍𑌮𑌜𑌃 ।
𑌚𑌤𑍍𑌵𑌰𑍇𑌷𑍁 𑌚𑌤𑍁𑌷𑍍𑌕𑍇𑌷𑍁 𑌰𑌾𑌜𑌮𑌾𑌰𑍍𑌗𑍇 𑌤𑌥𑍈𑌵 𑌚 ॥ 22 ॥

𑌘𑍋𑌷𑌯𑌂𑌤𑌿 𑌕𑌪𑌿𑌂 𑌸𑌰𑍍𑌵𑍇 𑌚𑌾𑌰𑍀𑌕 𑌇𑌤𑌿 𑌰𑌾𑌕𑍍𑌷𑌸𑌾𑌃 ।
𑌸𑍍𑌤𑍍𑌰𑍀𑌬𑌾𑌲𑌵𑍃𑌦𑍍𑌧𑌾𑌃 𑌨𑌿𑌰𑍍𑌜𑌗𑍍𑌮𑍁𑌸𑍍𑌤𑌤𑍍𑌰 𑌤𑌤𑍍𑌰 𑌕𑍁𑌤𑍂𑌹𑌲𑌾𑌤𑍍 ॥ 23 ॥

𑌤𑌂 𑌪𑍍𑌰𑌦𑍀𑌪𑌿𑌤𑌲𑌾𑌂𑌗𑍂𑌲𑌂 𑌹𑌨𑍁𑌮𑌂𑌤𑌂 𑌦𑌿𑌦𑍃𑌕𑍍𑌷𑌵𑌃 ।
𑌦𑍀𑌪𑍍𑌯𑌮𑌾𑌨𑍇 𑌤𑌤𑌸𑍍𑌤𑌤𑍍𑌰 𑌲𑌾𑌂𑌗𑍂𑌲𑌾𑌗𑍍𑌰𑍇 𑌹𑌨𑍂𑌮𑌤𑌃 ॥ 24 ॥

𑌰𑌾𑌕𑍍𑌷𑌸𑍍𑌯𑌸𑍍𑌤𑌾 𑌵𑌿𑌰𑍂𑌪𑌾𑌕𑍍𑌷𑍍𑌯 𑌶𑍍𑌶𑌂𑌸𑍁𑌰𑍍𑌦𑍇𑌵𑍍𑌯𑌾𑌸𑍍𑌤𑌦𑌪𑍍𑌰𑌿𑌯𑌮𑍍 ।
𑌯𑌸𑍍𑌤𑍍𑌵𑌯𑌾 𑌕𑍃𑌤𑌸𑌂𑌵𑌾𑌦 𑌸𑍍𑌸𑍀𑌤𑍇 𑌤𑌾𑌮𑍍𑌰𑌮𑍁𑌖𑌃 𑌕𑌪𑌿𑌃 ॥ 25 ॥

𑌲𑌾𑌂𑌗𑍂𑌲𑍇𑌨 𑌪𑍍𑌰𑌦𑍀𑌪𑍍𑌤𑍇𑌨 𑌸 𑌏𑌷 𑌪𑌰𑌿𑌣𑍀𑌯𑌤𑍇 ।
𑌶𑍍𑌰𑍁𑌤𑍍𑌵𑌾 𑌤𑌦𑍍𑌵𑌚𑌨𑌂 𑌕𑍍𑌰𑍂𑌰𑌮𑌾𑌤𑍍𑌮𑌾𑌪𑌹𑌰𑌣𑍋𑌪𑌮𑌮𑍍 ॥ 26 ॥

𑌵𑍈𑌦𑍇𑌹𑍀 𑌶𑍋𑌕𑌸𑌂𑌤𑌪𑍍𑌤𑌾 𑌹𑍁𑌤𑌾𑌶𑌨𑌮𑍁𑌪𑌾𑌗𑌮𑌤𑍍 ।
𑌮𑌂𑌗𑌲𑌾𑌭𑌿𑌮𑍁𑌖𑍀 𑌤𑌸𑍍𑌯 𑌸𑌾 𑌤𑌦𑌾𑌽𑌸𑍀𑌨𑍍𑌮𑌹𑌾𑌕𑌪𑍇𑌃 ॥ 2𑍭 ॥

𑌉𑌪𑌤𑌸𑍍𑌥𑍇 𑌵𑌿𑌶𑌾𑌲𑌾𑌕𑍍𑌷𑍀 𑌪𑍍𑌰𑌯𑌤𑌾 𑌹𑌵𑍍𑌯𑌵𑌾𑌹𑌨𑌮𑍍 ।
𑌯𑌦𑍍𑌯𑌸𑍍𑌤𑌿 𑌪𑌤𑌿𑌶𑍁𑌶𑍍𑌰𑍂𑌷𑌾 𑌯𑌦𑍍𑌯𑌸𑍍𑌤𑌿 𑌚𑌰𑌿𑌤𑌂 𑌤𑌪𑌃 ।
𑌯𑌦𑌿 𑌚𑌾𑌸𑍍𑌤𑍍𑌯𑍇𑌕𑌪𑌤𑍍𑌨𑍀𑌤𑍍𑌵𑌂 𑌶𑍀𑌤𑍋 𑌭𑌵 𑌹𑌨𑍂𑌮𑌤𑌃 ॥ 2𑍮 ॥

𑌯𑌦𑌿 𑌕𑌿𑌂𑌚𑌿𑌦𑌨𑍁𑌕𑍍𑌰𑍋𑌶𑌸𑍍𑌤𑌸𑍍𑌯 𑌮𑌯𑍍𑌯𑌸𑍍𑌤𑌿 𑌧𑍀𑌮𑌤𑌃 ॥ 2𑍯 ॥

𑌯𑌦𑌿 𑌵𑌾 𑌭𑌾𑌗𑍍𑌯𑌶𑍇𑌷𑍋 𑌮𑍇 𑌶𑍀𑌤𑍋 𑌭𑌵 𑌹𑌨𑍂𑌮𑌤𑌃 ।
𑌯𑌦𑌿 𑌮𑌾𑌂 𑌵𑍃𑌤𑍍𑌤𑌸𑌂𑌪𑌨𑍍𑌨𑌾𑌂 𑌤𑌤𑍍𑌸𑌮𑌾𑌗𑌮𑌲𑌾𑌲𑌸𑌾𑌮𑍍 ॥ 30 ॥

𑌸 𑌵𑌿𑌜𑌾𑌨𑌾𑌤𑌿 𑌧𑌰𑍍𑌮𑌾𑌤𑍍𑌮𑌾 𑌶𑍀𑌤𑍋 𑌭𑌵 𑌹𑌨𑍂𑌮𑌤𑌃 ।
𑌯𑌦𑌿 𑌮𑌾𑌂 𑌤𑌾𑌰𑌯𑍇𑌦𑌾𑌰𑍍𑌯𑌸𑍍𑌸𑍁𑌗𑍍𑌰𑍀𑌵𑌃 𑌸𑌤𑍍𑌯𑌸𑌂𑌗𑌰𑌃 ॥ 31 ॥

𑌅𑌸𑍍𑌮𑌾𑌦𑍍𑌧𑍁𑌃𑌖𑌾𑌂𑌬𑍁𑌸𑌂𑌰𑍋𑌧𑌾𑌚𑍍𑌛𑍀𑌤𑍋 𑌭𑌵 𑌹𑌨𑍂𑌮𑌤𑌃 ।
𑌤𑌤𑌸𑍍𑌤𑍀𑌕𑍍𑌷𑍍𑌣𑌾𑌰𑍍𑌚𑌿𑌰𑌵𑍍𑌯𑌗𑍍𑌰𑌃 𑌪𑍍𑌰𑌦𑌕𑍍𑌷𑌿𑌣𑌶𑌿𑌖𑍋𑌽𑌨𑌲𑌃 ॥ 32 ॥

𑌜𑌜𑍍𑌵𑌾𑌲 𑌮𑍃𑌗𑌶𑌾𑌬𑌾𑌕𑍍𑌷𑍍𑌯𑌾 𑌶𑍍𑌶𑌂𑌸𑌨𑍍𑌨𑌿𑌵 𑌶𑌿𑌵𑌂 𑌕𑌪𑍇𑌃 ।
𑌹𑌨𑍁𑌮𑌜𑍍𑌜𑌨𑌕𑌶𑍍𑌚𑌾𑌪𑌿 𑌪𑍁𑌚𑍍𑌛𑌾𑌨𑌲𑌯𑍁𑌤𑍋𑌽𑌨𑌿𑌲𑌃 ॥ 33 ॥

𑌵𑌵𑍌 𑌸𑍍𑌵𑌾𑌸𑍍𑌥𑍍𑌯𑌕𑌰𑍋 𑌦𑍇𑌵𑍍𑌯𑌾𑌃 𑌪𑍍𑌰𑌾𑌲𑍇𑌯𑌾𑌨𑌿𑌲𑌶𑍀𑌤𑌲𑌃 ।
𑌦𑌹𑍍𑌯𑌮𑌾𑌨𑍇 𑌚 𑌲𑌾𑌂𑌗𑍂𑌲𑍇 𑌚𑌿𑌂𑌤𑌯𑌾𑌮𑌾𑌸 𑌵𑌾𑌨𑌰𑌃 ॥ 34 ॥

𑌪𑍍𑌰𑌦𑍀𑌪𑍍𑌤𑍋𑌽𑌗𑍍𑌨𑌿𑌰𑌯𑌂 𑌕𑌸𑍍𑌮𑌾𑌨𑍍𑌨 𑌮𑌾𑌂 𑌦𑌹𑌤𑌿 𑌸𑌰𑍍𑌵𑌤𑌃 ।
𑌦𑍃𑌶𑍍𑌯𑌤𑍇 𑌚 𑌮𑌹𑌾𑌜𑍍𑌵𑌾𑌲𑌃 𑌕𑌰𑍋𑌤𑌿 𑌨 𑌚 𑌮𑍇 𑌰𑍁𑌜𑌮𑍍 ॥ 35 ॥

𑌶𑌿𑌶𑌿𑌰𑌸𑍍𑌯𑍇𑌵 𑌸𑌂𑌘𑌾𑌤𑍋 𑌲𑌾𑌂𑌗𑍂𑌲𑌾𑌗𑍍𑌰𑍇 𑌪𑍍𑌰𑌤𑌿𑌷𑍍𑌠𑌿𑌤𑌃 ।
𑌅𑌥𑌵𑌾 𑌤𑌦𑌿𑌦𑌂 𑌵𑍍𑌯𑌕𑍍𑌤𑌂 𑌯𑌦𑍍𑌦𑍃𑌷𑍍𑌟𑌂 𑌪𑍍𑌲𑌵𑌤𑌾 𑌮𑌯𑌾 ॥ 36 ॥

𑌰𑌾𑌮𑌪𑍍𑌰𑌭𑌾𑌵𑌾𑌦𑌾𑌶𑍍𑌚𑌰𑍍𑌯𑌂 𑌪𑌰𑍍𑌵𑌤 𑌸𑍍𑌸𑌰𑌿𑌤𑌾𑌂 𑌪𑌤𑍌 ।
𑌯𑌦𑌿 𑌤𑌾𑌵𑌤𑍍𑌸𑌮𑍁𑌦𑍍𑌰𑌸𑍍𑌯 𑌮𑍈𑌨𑌾𑌕𑌸𑍍𑌯 𑌚 𑌧𑍀𑌮𑌤𑌃 ॥ 3𑍭 ॥

𑌰𑌾𑌮𑌾𑌰𑍍𑌥𑌂 𑌸𑌂𑌭𑍍𑌰𑌮𑌸𑍍𑌤𑌾𑌦𑍃𑌕𑍍𑌕𑌿𑌮𑌗𑍍𑌨𑌿𑌰𑍍𑌨 𑌕𑌰𑌿𑌷𑍍𑌯𑌤𑌿 ।
𑌸𑍀𑌤𑌾𑌯𑌾𑌶𑍍𑌚𑌾𑌨𑍃𑌶𑌂𑌸𑍍𑌯𑍇𑌨 𑌤𑍇𑌜𑌸𑌾 𑌰𑌾𑌘𑌵𑌸𑍍𑌯 𑌚 ॥ 3𑍮 ॥

𑌪𑌿𑌤𑍁𑌶𑍍𑌚 𑌮𑌮 𑌸𑌖𑍍𑌯𑍇𑌨 𑌨 𑌮𑌾𑌂 𑌦𑌹𑌤𑌿 𑌪𑌾𑌵𑌕𑌃 ।
𑌭𑍂𑌯𑌸𑍍𑌸 𑌚𑌿𑌂𑌤𑌯𑌾𑌮𑌾𑌸 𑌮𑍁𑌹𑍂𑌰𑍍𑌤𑌂 𑌕𑌪𑌿𑌕𑍁𑌂𑌜𑌰𑌃 ॥ 3𑍯 ॥

𑌉𑌤𑍍𑌪𑌪𑌾𑌤𑌾𑌥 𑌵𑍇𑌗𑍇𑌨 𑌨𑌨𑌾𑌦 𑌚 𑌮𑌹𑌾𑌕𑌪𑌿𑌃 ।
𑌪𑍁𑌰𑌦𑍍𑌵𑌾𑌰𑌂 𑌤𑌤𑌶𑍍𑌶𑍍𑌰𑍀𑌮𑌾𑌨𑍍 𑌶𑍈𑌲𑌶𑍃𑌂𑌗𑌮𑌿𑌵𑍋𑌨𑍍𑌨𑌤𑌮𑍍 ॥ 40 ॥

𑌵𑌿𑌭𑌕𑍍𑌤𑌰𑌕𑍍𑌷𑌸𑍍𑌸𑌂𑌬𑌾𑌧𑌮𑌾𑌸𑌸𑌾𑌦𑌾𑌨𑌿𑌲𑌾𑌤𑍍𑌮𑌜𑌃 ।
𑌸 𑌭𑍂𑌤𑍍𑌵𑌾 𑌶𑍈𑌲𑌸𑌂𑌕𑌾𑌶𑌃 𑌕𑍍𑌷𑌣𑍇𑌨 𑌪𑍁𑌨𑌰𑌾𑌤𑍍𑌮𑌵𑌾𑌨𑍍 ॥ 41 ॥

𑌹𑍍𑌰𑌸𑍍𑌵𑌤𑌾𑌂 𑌪𑌰𑌮𑌾𑌂 𑌪𑍍𑌰𑌾𑌪𑍍𑌤𑍋 𑌬𑌂𑌧𑌨𑌾𑌨𑍍𑌯𑌵𑌶𑌾𑌤𑌯𑌤𑍍 ।
𑌵𑌿𑌮𑍁𑌕𑍍𑌤𑌶𑍍𑌚𑌾𑌭𑌵𑌛𑍍𑌰𑌚𑍀𑌮𑌾𑌨𑍍 𑌪𑍁𑌨𑌃 𑌪𑌰𑍍𑌵𑌤𑌸𑌨𑍍𑌨𑌿𑌭𑌃 ॥ 42 ॥

𑌵𑍀𑌕𑍍𑌷𑌮𑌾𑌣𑌶𑍍𑌚 𑌦𑌦𑍃𑌶𑍇 𑌪𑌰𑌿𑌘𑌂 𑌤𑍋𑌰𑌣𑌾𑌶𑍍𑌰𑌿𑌤𑌮𑍍 ।
𑌸 𑌤𑌂 𑌗𑍃𑌹𑍍𑌯 𑌮𑌹𑌾𑌬𑌾𑌹𑍁𑌃 𑌕𑌾𑌲𑌾𑌯𑌸𑌪𑌰𑌿𑌷𑍍𑌕𑍃𑌤𑌮𑍍 ॥ 43 ॥

𑌰𑌕𑍍𑌷𑌿𑌣𑌸𑍍𑌤𑌾𑌨𑍍 𑌪𑍁𑌨𑌸𑍍𑌸𑌰𑍍𑌵𑌾𑌨𑍍𑌸𑍂𑌦𑌯𑌾𑌮𑌾𑌸 𑌮𑌾𑌰𑍁𑌤𑌿𑌃 ।
𑌸 𑌤𑌾𑌨𑍍𑌨𑌿𑌹𑌤𑍍𑌤𑍍𑌵𑌾 𑌰𑌣𑌚𑌂𑌡𑌵𑌿𑌕𑍍𑌰𑌮 𑌸𑍍𑌸𑌮𑍀𑌕𑍍𑌷𑌮𑌾𑌣𑌃 𑌪𑍁𑌨𑌰𑍇𑌵 𑌲𑌂𑌕𑌾𑌮𑍍 ।
𑌪𑍍𑌰𑌦𑍀𑌪𑍍𑌤𑌲𑌾𑌂𑌗𑍂𑌲𑌕𑍃𑌤𑌾𑌰𑍍𑌚𑌿𑌮𑌾𑌲𑍀 𑌪𑍍𑌰𑌕𑌾𑌶𑌤𑌾𑌦𑌿𑌤𑍍𑌯 𑌇𑌵𑌾𑌰𑍍𑌚𑌿𑌮𑌾𑌲𑍀 ॥ 44 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌤𑍍𑌰𑌿𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥


Browse Related Categories: