𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌤𑌤𑌸𑍍𑌸 𑌕𑌰𑍍𑌮𑌣𑌾 𑌤𑌸𑍍𑌯 𑌵𑌿𑌸𑍍𑌮𑌿𑌤𑍋 𑌭𑍀𑌮𑌵𑌿𑌕𑍍𑌰𑌮𑌃 ।
𑌹𑌨𑍁𑌮𑌾𑌨𑍍𑌰𑍋𑌷𑌤𑌾𑌮𑍍𑌰𑌾𑌕𑍍𑌷𑍋 𑌰𑌕𑍍𑌷𑍋𑌧𑌿𑌪𑌮𑌵𑍈𑌕𑍍𑌷𑌤 ॥ 1 ॥
𑌭𑍍𑌰𑌾𑌜𑌮𑌾𑌨𑌂 𑌮𑌹𑌾𑌰𑍍𑌹𑍇𑌣 𑌕𑌾𑌂𑌚𑌨𑍇𑌨 𑌵𑌿𑌰𑌾𑌜𑌤𑌾 ।
𑌮𑍁𑌕𑍍𑌤𑌾𑌜𑌾𑌲𑌾𑌵𑍃𑌤𑍇𑌨𑌾𑌥 𑌮𑌕𑍁𑌟𑍇𑌨 𑌮𑌹𑌾𑌦𑍍𑌯𑍁𑌤𑌿𑌮𑍍 ॥ 2 ॥
𑌵𑌜𑍍𑌰𑌸𑌂𑌯𑍋𑌗𑌸𑌂𑌯𑍁𑌕𑍍𑌤𑍈𑌰𑍍𑌮𑌹𑌾𑌰𑍍𑌹𑌮𑌣𑌿𑌵𑌿𑌗𑍍𑌰𑌹𑍈𑌃 ।
𑌹𑍈𑌮𑍈𑌰𑌾𑌭𑌰𑌣𑍈𑌶𑍍𑌚𑌿𑌤𑍍𑌰𑍈𑌰𑍍𑌮𑌨𑌸𑍇𑌵 𑌪𑍍𑌰𑌕𑌲𑍍𑌪𑌿𑌤𑍈𑌃 ॥ 3 ॥
𑌮𑌹𑌾𑌰𑍍𑌹𑌕𑍍𑌷𑍌𑌮𑌸𑌂𑌵𑍀𑌤𑌂 𑌰𑌕𑍍𑌤𑌚𑌂𑌦𑌨𑌰𑍂𑌷𑌿𑌤𑌮𑍍 ।
𑌸𑍍𑌵𑌾𑌨𑍁𑌲𑌿𑌪𑍍𑌤𑌂 𑌵𑌿𑌚𑌿𑌤𑍍𑌰𑌾𑌭𑌿𑌰𑍍𑌵𑌿𑌵𑌿𑌧𑌾𑌭𑌿𑌶𑍍𑌚 𑌭𑌕𑍍𑌤𑌿𑌭𑌿𑌃 ॥ 4 ॥
𑌵𑌿𑌚𑌿𑌤𑍍𑌰𑍈𑌰𑍍𑌦𑌰𑍍𑌶𑌨𑍀𑌯𑍈𑌶𑍍𑌚 𑌰𑌕𑍍𑌤𑌾𑌕𑍍𑌷𑍈𑌰𑍍𑌭𑍀𑌮𑌦𑌰𑍍𑌶𑌨𑍈𑌃 ।
𑌦𑍀𑌪𑍍𑌤𑌤𑍀𑌕𑍍𑌷𑍍𑌣𑌮𑌹𑌾𑌦𑌂𑌷𑍍𑌟𑍍𑌰𑍈𑌃 𑌪𑍍𑌰𑌲𑌂𑌬𑌦𑌶𑌨𑌚𑍍𑌛𑌦𑍈𑌃 ॥ 5 ॥
𑌶𑌿𑌰𑍋𑌭𑌿𑌰𑍍𑌦𑌶𑌭𑌿𑌰𑍍𑌵𑍀𑌰𑌂 𑌭𑍍𑌰𑌾𑌜𑌮𑌾𑌨𑌂 𑌮𑌹𑍌𑌜𑌸𑌮𑍍 ।
𑌨𑌾𑌨𑌾𑌵𑍍𑌯𑌾𑌲𑌸𑌮𑌾𑌕𑍀𑌰𑍍𑌣𑍈𑌶𑍍𑌶𑌿𑌖𑌰𑍈𑌰𑌿𑌵 𑌮𑌂𑌦𑌰𑌮𑍍 ॥ 6 ॥
𑌨𑍀𑌲𑌾𑌂𑌜𑌨𑌚𑌯𑌪𑍍𑌰𑌖𑍍𑌯𑌂 𑌹𑌾𑌰𑍇𑌣𑍋𑌰𑌸𑌿 𑌰𑌾𑌜𑌤𑌾 ।
𑌪𑍂𑌰𑍍𑌣𑌚𑌂𑌦𑍍𑌰𑌾𑌭𑌵𑌕𑍍𑌤𑍍𑌰𑍇𑌣 𑌸𑌬𑌲𑌾𑌕𑌮𑌿𑌵𑌾𑌂𑌬𑍁𑌦𑌮𑍍 ॥ ॥
𑌬𑌾𑌹𑍁𑌭𑌿𑌰𑍍𑌬𑌦𑍍𑌧𑌕𑍇𑌯𑍂𑌰𑍈𑌶𑍍𑌚𑌂𑌦𑌨𑍋𑌤𑍍𑌤𑌮𑌰𑍂𑌷𑌿𑌤𑍈𑌃 ।
𑌭𑍍𑌰𑌾𑌜𑌮𑌾𑌨𑌾𑌂𑌗𑌦𑍈𑌃 𑌪𑍀𑌨𑍈𑌃 𑌪𑌂𑌚𑌶𑍀𑌰𑍍𑌷𑍈𑌰𑌿𑌵𑍋𑌰𑌗𑍈𑌃 ॥ ॥
𑌮𑌹𑌤𑌿𑌸𑍍𑌫𑌾𑌟𑌿𑌕𑍇 𑌚𑌿𑌤𑍍𑌰𑍇 𑌰𑌤𑍍𑌨𑌸𑌂𑌯𑍋𑌗𑌸𑌂𑌸𑍍𑌕𑍃𑌤𑍇 ।
𑌉𑌤𑍍𑌤𑌮𑌾𑌸𑍍𑌤𑌰𑌣𑌾𑌸𑍍𑌤𑍀𑌰𑍍𑌣𑍇 𑌸𑍂𑌪𑌵𑌿𑌷𑍍𑌟𑌂 𑌵𑌰𑌾𑌸𑌨𑍇 ॥ ॥
𑌅𑌲𑌂𑌕𑍃𑌤𑌾𑌭𑌿𑌰𑌤𑍍𑌯𑌰𑍍𑌥𑌂 𑌪𑍍𑌰𑌮𑌦𑌾𑌭𑌿𑌃 𑌸𑌮𑌂𑌤𑌤𑌃 ।
𑌵𑌾𑌲𑌵𑍍𑌯𑌜𑌨𑌹𑌸𑍍𑌤𑌾𑌭𑌿𑌰𑌾𑌰𑌾𑌤𑍍𑌸𑌮𑍁𑌪𑌸𑍇𑌵𑌿𑌤𑌮𑍍 ॥ 10 ॥
𑌦𑍁𑌰𑍍𑌧𑌰𑍇𑌣 𑌪𑍍𑌰𑌹𑌸𑍍𑌤𑍇𑌨 𑌮𑌹𑌾𑌪𑌾𑌰𑍍𑌶𑍍𑌵𑍇𑌨 𑌰𑌕𑍍𑌷𑌸𑌾 ।
𑌮𑌂𑌤𑍍𑌰𑌿𑌭𑌿𑌰𑍍𑌮𑌂𑌤𑍍𑌰𑌤𑌤𑍍𑌤𑍍𑌵𑌜𑍍𑌞𑍈𑌰𑍍𑌨𑌿𑌕𑍁𑌂𑌭𑍇𑌨 𑌚 𑌮𑌂𑌤𑍍𑌰𑌿𑌣𑌾 ॥ 11 ॥
𑌸𑍁𑌖𑍋𑌪𑌵𑌿𑌷𑍍𑌟𑌂 𑌰𑌕𑍍𑌷𑍋𑌭𑌿𑌶𑍍𑌚𑌤𑍁𑌰𑍍𑌭𑌿𑌰𑍍𑌬𑌲𑌦𑌰𑍍𑌪𑌿𑌤𑍈𑌃 ।
𑌕𑍃𑌤𑍍𑌸𑍍𑌨𑌂 𑌪𑌰𑌿𑌵𑍃𑌤𑌂 𑌲𑍋𑌕𑌂 𑌚𑌤𑍁𑌰𑍍𑌭𑌿𑌰𑌿𑌵 𑌸𑌾𑌗𑌰𑍈𑌃 ॥ 12 ॥
𑌮𑌂𑌤𑍍𑌰𑌿𑌭𑌿𑌰𑍍𑌮𑌂𑌤𑍍𑌰𑌤𑌤𑍍𑌤𑍍𑌵𑌜𑍍𑌞𑍈𑌰𑌨𑍍𑌯𑍈𑌶𑍍𑌚 𑌶𑍁𑌭𑌬𑍁𑌦𑍍𑌧𑌿𑌭𑌿𑌃 ।
𑌅𑌨𑍍𑌵𑌾𑌸𑍍𑌯𑌮𑌾𑌨𑌂 𑌰𑌕𑍍𑌷𑍋𑌭𑌿𑌃 𑌸𑍁𑌰𑍈𑌰𑌿𑌵 𑌸𑍁𑌰𑍇𑌶𑍍𑌵𑌰𑌮𑍍 ॥ 13 ॥
𑌅𑌪𑌶𑍍𑌯𑌦𑍍𑌰𑌾𑌕𑍍𑌷𑌸𑌪𑌤𑌿𑌂 𑌹𑌨𑍁𑌮𑌾𑌨𑌤𑌿𑌤𑍇𑌜𑌸𑌮𑍍 ।
𑌵𑌿𑌷𑍍𑌠𑌿𑌤𑌂 𑌮𑍇𑌰𑍁𑌶𑌿𑌖𑌰𑍇 𑌸𑌤𑍋𑌯𑌮𑌿𑌵 𑌤𑍋𑌯𑌦𑌮𑍍 ॥ 14 ॥
𑌸 𑌤𑍈𑌸𑍍𑌸𑌂𑌪𑍀𑌡𑍍𑌯𑌮𑌾𑌨𑍋𑌽𑌪𑌿 𑌰𑌕𑍍𑌷𑍋𑌭𑌿𑌰𑍍𑌭𑍀𑌮𑌵𑌿𑌕𑍍𑌰𑌮𑍈𑌃 ।
𑌵𑌿𑌸𑍍𑌮𑌯𑌂 𑌪𑌰𑌮𑌂 𑌗𑌤𑍍𑌵𑌾 𑌰𑌕𑍍𑌷𑍋𑌧𑌿𑌪𑌮𑌵𑍈𑌕𑍍𑌷𑌤 ॥ 15 ॥
𑌭𑍍𑌰𑌾𑌜𑌮𑌾𑌨𑌂 𑌤𑌤𑍋 𑌦𑍃𑌷𑍍𑌟𑍍𑌵𑌾 𑌹𑌨𑍁𑌮𑌾𑌨𑍍𑌰𑌾𑌕𑍍𑌷𑌸𑍇𑌶𑍍𑌵𑌰𑌮𑍍 ।
𑌮𑌨𑌸𑌾 𑌚𑌿𑌂𑌤𑌯𑌾𑌮𑌾𑌸 𑌤𑍇𑌜𑌸𑌾 𑌤𑌸𑍍𑌯 𑌮𑍋𑌹𑌿𑌤𑌃 ॥ 16 ॥
𑌅𑌹𑍋 𑌰𑍂𑌪𑌮𑌹𑍋 𑌧𑍈𑌰𑍍𑌯𑌮𑌹𑍋 𑌸𑌤𑍍𑌤𑍍𑌵𑌮𑌹𑍋 𑌦𑍍𑌯𑍁𑌤𑌿𑌃 ।
𑌅𑌹𑍋 𑌰𑌾𑌕𑍍𑌷𑌸𑌰𑌾𑌜𑌸𑍍𑌯 𑌸𑌰𑍍𑌵𑌲𑌕𑍍𑌷𑌣𑌯𑍁𑌕𑍍𑌤𑌤𑌾 ॥ 1 ॥
𑌯𑌦𑍍𑌯𑌧𑌰𑍍𑌮𑍋 𑌨 𑌬𑌲𑌵𑌾𑌨𑍍 𑌸𑍍𑌯𑌾𑌦𑌯𑌂 𑌰𑌾𑌕𑍍𑌷𑌸𑍇𑌶𑍍𑌵𑌰𑌃 ।
𑌸𑍍𑌯𑌾𑌦𑌯𑌂 𑌸𑍁𑌰𑌲𑍋𑌕𑌸𑍍𑌯 𑌸𑌶𑌕𑍍𑌰𑌸𑍍𑌯𑌾𑌪𑌿 𑌰𑌕𑍍𑌷𑌿𑌤𑌾 ॥ 1 ॥
𑌅𑌸𑍍𑌯 𑌕𑍍𑌰𑍂𑌰𑍈𑌰𑍍𑌨𑍃𑌶𑌂𑌸𑍈𑌶𑍍𑌚 𑌕𑌰𑍍𑌮𑌭𑌿𑌰𑍍𑌲𑍋𑌕𑌕𑍁𑌤𑍍𑌸𑌿𑌤𑍈𑌃 ।
𑌸𑌰𑍍𑌵𑍇 𑌬𑌿𑌭𑍍𑌯𑌤𑌿 𑌖𑌲𑍍𑌵𑌸𑍍𑌮𑌾𑌲𑍍𑌲𑍋𑌕𑌾𑌸𑍍𑌸𑌾𑌮𑌰𑌦𑌾𑌨𑌵𑌾𑌃 ॥ 1 ॥
𑌅𑌯𑌂 𑌹𑍍𑌯𑍁𑌤𑍍𑌸𑌹𑌤𑍇 𑌕𑍍𑌰𑍁𑌦𑍍𑌧𑌃 𑌕𑌰𑍍𑌤𑍁𑌮𑍇𑌕𑌾𑌰𑍍𑌣𑌵𑌂 𑌜𑌗𑌤𑍍 ।
𑌇𑌤𑌿 𑌚𑌿𑌂𑌤𑌾𑌂 𑌬𑌹𑍁𑌵𑌿𑌧𑌾𑌮𑌕𑌰𑍋𑌨𑍍𑌮𑌤𑌿𑌮𑌾𑌨𑍍 𑌹𑌰𑌿𑌃 ॥ 20 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌏𑌕𑍋𑌨𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
