𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌦𑌿𑌵𑌂 𑌤𑍁 𑌤𑌸𑍍𑌯𑌾𑌂 𑌯𑌾𑌤𑌾𑌯𑌾𑌂 𑌶𑌬𑌰𑍍𑌯𑌾𑌂 𑌸𑍍𑌵𑍇𑌨 𑌤𑍇𑌜𑌸𑌾 ।
𑌲𑌕𑍍𑌷𑍍𑌮𑌣𑍇𑌨 𑌸𑌹 𑌭𑍍𑌰𑌾𑌤𑍍𑌰𑌾 𑌚𑌿𑌂𑌤𑌯𑌾𑌮𑌾𑌸 𑌰𑌾𑌘𑌵𑌃 ॥ 1 ॥
𑌸 𑌚𑌿𑌂𑌤𑌯𑌿𑌤𑍍𑌵𑌾 𑌧𑌰𑍍𑌮𑌾𑌤𑍍𑌮𑌾 𑌪𑍍𑌰𑌭𑌾𑌵𑌂 𑌤𑌂 𑌮𑌹𑌾𑌤𑍍𑌮𑌨𑌾𑌮𑍍 ।
𑌹𑌿𑌤𑌕𑌾𑌰𑌿𑌣𑌮𑍇𑌕𑌾𑌗𑍍𑌰𑌂 𑌲𑌕𑍍𑌷𑍍𑌮𑌣𑌂 𑌰𑌾𑌘𑌵𑍋𑌽𑌬𑍍𑌰𑌵𑍀𑌤𑍍 ॥ 2 ॥
𑌦𑍃𑌷𑍍𑌟𑍋𑌽𑌯𑌮𑌾𑌶𑍍𑌰𑌮𑌸𑍍𑌸𑍌𑌮𑍍𑌯 𑌬𑌹𑍍𑌵𑌾𑌶𑍍𑌚𑌰𑍍𑌯𑍋 𑌮𑌹𑌾𑌤𑍍𑌮𑌨𑌾𑌮𑍍 ।
𑌵𑌿𑌶𑍍𑌵𑌸𑍍𑌤𑌮𑍃𑌗𑌶𑌾𑌰𑍍𑌦𑍂𑌲𑍋 𑌨𑌾𑌨𑌾𑌵𑌿𑌹𑌗𑌸𑍇𑌵𑌿𑌤𑌃 ॥ 3 ॥
𑌸𑌪𑍍𑌤𑌾𑌨𑌾𑌂 𑌚 𑌸𑌮𑍁𑌦𑍍𑌰𑌾𑌣𑌾𑌮𑍇𑌷𑍁 𑌤𑍀𑌰𑍍𑌥𑍇𑌷𑍁 𑌲𑌕𑍍𑌷𑍍𑌮𑌣 ।
𑌉𑌪𑌸𑍍𑌪𑍃𑌷𑍍𑌟𑌂 𑌚 𑌵𑌿𑌧𑌿𑌵𑌤𑍍𑌪𑌿𑌤𑌰𑌶𑍍𑌚𑌾𑌪𑌿 𑌤𑌰𑍍𑌪𑌿𑌤𑌾𑌃 ॥ 4 ॥
𑌪𑍍𑌰𑌣𑌷𑍍𑌟𑌮𑌶𑍁𑌭𑌂 𑌤𑌤𑍍𑌤𑌤𑍍𑌕𑌲𑍍𑌯𑌾𑌣𑌂 𑌸𑌮𑍁𑌪𑌸𑍍𑌥𑌿𑌤𑌮𑍍 ।
𑌤𑍇𑌨 𑌤𑌤𑍍𑌤𑍍𑌵𑍇𑌨 𑌹𑍃𑌷𑍍𑌟𑌂 𑌮𑍇 𑌮𑌨𑍋 𑌲𑌕𑍍𑌷𑍍𑌮𑌣 𑌸𑌂𑌪𑍍𑌰𑌤𑌿 ॥ 5 ॥
𑌹𑍃𑌦𑌯𑍇 𑌹𑌿 𑌨𑌰𑌵𑍍𑌯𑌾𑌘𑍍𑌰 𑌶𑍁𑌭𑌮𑌾𑌵𑌿𑌰𑍍𑌭𑌵𑌿𑌷𑍍𑌯𑌤𑌿 ।
𑌤𑌦𑌾𑌗𑌚𑍍𑌛 𑌗𑌮𑌿𑌷𑍍𑌯𑌾𑌮𑌿 𑌪𑌂𑌪𑌾𑌂 𑌤𑌾𑌂 𑌪𑍍𑌰𑌿𑌯𑌦𑌰𑍍𑌶𑌨𑌾𑌮𑍍 ॥ 6 ॥
𑌋𑌷𑍍𑌯𑌮𑍂𑌕𑍋 𑌗𑌿𑌰𑌿𑌰𑍍𑌯𑌤𑍍𑌰 𑌨𑌾𑌤𑌿𑌦𑍂𑌰𑍇 𑌪𑍍𑌰𑌕𑌾𑌶𑌤𑍇 ।
𑌯𑌸𑍍𑌮𑌿𑌨𑍍𑌵𑌸𑌤𑌿 𑌧𑌰𑍍𑌮𑌾𑌤𑍍𑌮𑌾 𑌸𑍁𑌗𑍍𑌰𑍀𑌵𑍋𑌂𑌽𑌶𑍁𑌮𑌤𑌸𑍍𑌸𑍁𑌤𑌃 ॥ ॥
𑌨𑌿𑌤𑍍𑌯𑌂 𑌵𑌾𑌲𑌿𑌭𑌯𑌾𑌤𑍍𑌤𑍍𑌰𑌸𑍍𑌤𑌶𑍍𑌚𑌤𑍁𑌰𑍍𑌭𑌿𑌸𑍍𑌸𑌹 𑌵𑌾𑌨𑌰𑍈𑌃 ।
𑌅𑌭𑌿𑌤𑍍𑌵𑌰𑍇 𑌚 𑌤𑌂 𑌦𑍍𑌰𑌷𑍍𑌟𑍁𑌂 𑌸𑍁𑌗𑍍𑌰𑍀𑌵𑌂 𑌵𑌾𑌨𑌰𑌰𑍍𑌷𑌭𑌮𑍍 ॥ ॥
𑌤𑌦𑌧𑍀𑌨𑌂 𑌹𑌿 𑌮𑍇 𑌸𑍌𑌮𑍍𑌯 𑌸𑍀𑌤𑌾𑌯𑌾𑌃 𑌪𑌰𑌿𑌮𑌾𑌰𑍍𑌗𑌣𑌮𑍍 ।
𑌏𑌵𑌂 𑌬𑍍𑌰𑍁𑌵𑌾𑌣𑌂 𑌤𑌂 𑌧𑍀𑌰𑌂 𑌰𑌾𑌮𑌂 𑌸𑍌𑌮𑌿𑌤𑍍𑌰𑌿𑌰𑌬𑍍𑌰𑌵𑍀𑌤𑍍 ॥ ॥
𑌗𑌚𑍍𑌛𑌾𑌵𑌸𑍍𑌤𑍍𑌵𑌰𑌿𑌤𑌂 𑌤𑌤𑍍𑌰 𑌮𑌮𑌾𑌪𑌿 𑌤𑍍𑌵𑌰𑌤𑍇 𑌮𑌨𑌃 ।
𑌆𑌶𑍍𑌰𑌮𑌾𑌤𑍍𑌤𑍁 𑌤𑌤 𑌸𑍍𑌤𑌸𑍍𑌮𑌾𑌨𑍍𑌨𑌿𑌷𑍍𑌕𑍍𑌰𑌮𑍍𑌯 𑌸 𑌵𑌿𑌶𑌾𑌂𑌪𑌤𑌿𑌃 ॥ 10 ॥
𑌆𑌜𑌗𑌾𑌮 𑌤𑌤𑌃 𑌪𑌂𑌪𑌾𑌂 𑌲𑌕𑍍𑌷𑍍𑌮𑌣𑍇𑌨 𑌸𑌹 𑌪𑍍𑌰𑌭𑍁𑌃 ।
𑌸 𑌦𑌦𑌰𑍍𑌶 𑌤𑌤𑌃 𑌪𑍁𑌣𑍍𑌯𑌾𑌮𑍁𑌦𑌾𑌰𑌜𑌨𑌸𑍇𑌵𑌿𑌤𑌾𑌮𑍍 ॥ 11 ॥
𑌨𑌾𑌨𑌾𑌦𑍍𑌰𑍁𑌮𑌲𑌤𑌾𑌕𑍀𑌰𑍍𑌣𑌾𑌂 𑌪𑌂𑌪𑌾𑌂 𑌪𑌾𑌨𑍀𑌯𑌵𑌾𑌹𑌿𑌨𑍀𑌮𑍍 ।
𑌪𑌦𑍍𑌮𑍈𑌸𑍍𑌸𑍌𑌗𑌂𑌧𑌿𑌕𑍈𑌸𑍍𑌤𑌾𑌮𑍍𑌰𑌾𑌂 𑌶𑍁𑌕𑍍𑌲𑌾𑌂 𑌕𑍁𑌮𑍁𑌦𑌮𑌂𑌡𑌲𑍈𑌃 ॥ 12 ॥
𑌨𑍀𑌲𑌾𑌂 𑌕𑍁𑌵𑌲𑌯𑍋𑌦𑍍𑌘𑌾𑌟𑍈𑌰𑍍𑌬𑌹𑍁𑌵𑌰𑍍𑌣𑌾𑌂 𑌕𑍁𑌥𑌾𑌮𑌿𑌵 ।
𑌸 𑌤𑌾𑌮𑌾𑌸𑌾𑌦𑍍𑌯 𑌵𑍈 𑌰𑌾𑌮𑍋 𑌦𑍂𑌰𑌾𑌦𑍁𑌦𑌕𑌵𑌾𑌹𑌿𑌨𑍀𑌮𑍍 ॥ 13 ॥
𑌮𑌤𑌂𑌗𑌸𑌰𑌸𑌂 𑌨𑌾𑌮 𑌹𑍍𑌰𑌦𑌂 𑌸𑌮𑌵𑌗𑌾𑌹𑌤 ।
𑌅𑌰𑌵𑌿𑌂𑌦𑍋𑌤𑍍𑌪𑌲𑌵𑌤𑍀𑌂 𑌪𑌦𑍍𑌮𑌸𑍌𑌗𑌂𑌧𑌿𑌕𑌾𑌯𑍁𑌤𑌾𑌮𑍍 ॥ 14 ॥
𑌪𑍁𑌷𑍍𑌪𑌿𑌤𑌾𑌮𑍍𑌰𑌵𑌣𑍋𑌪𑍇𑌤𑌾𑌂 𑌬𑌰𑍍𑌹𑌿𑌣𑍋𑌦𑍍𑌘𑍁𑌷𑍍𑌟𑌨𑌾𑌦𑌿𑌤𑌾𑌮𑍍 ।
𑌤𑌿𑌲𑌕𑍈𑌰𑍍𑌬𑍀𑌜𑌪𑍂𑌰𑍈𑌶𑍍𑌚 𑌧𑌵𑍈𑌶𑍍𑌶𑍁𑌕𑍍𑌲𑌦𑍍𑌰𑍁𑌮𑍈𑌸𑍍𑌤𑌥𑌾 ॥ 15 ॥
𑌪𑍁𑌷𑍍𑌪𑌿𑌤𑍈𑌃 𑌕𑌰𑌵𑍀𑌰𑍈𑌶𑍍𑌚 𑌪𑍁𑌨𑍍𑌨𑌾𑌗𑍈𑌶𑍍𑌚 𑌸𑍁𑌪𑍁𑌷𑍍𑌪𑌿𑌤𑍈𑌃 ।
𑌮𑌾𑌲𑌤𑍀𑌕𑍁𑌂𑌦𑌗𑍁𑌲𑍍𑌮𑍈𑌶𑍍𑌚 𑌭𑌾𑌂𑌡𑍀𑌰𑍈𑌰𑍍𑌨𑌿𑌚𑍁𑌲𑍈𑌸𑍍𑌤𑌥𑌾 ॥ 16 ॥
𑌅𑌶𑍋𑌕𑍈𑌸𑍍𑌸𑌪𑍍𑌤𑌪𑌰𑍍𑌣𑍈𑌶𑍍𑌚 𑌕𑍇𑌤𑌕𑍈𑌰𑌤𑌿𑌮𑍁𑌕𑍍𑌤𑌕𑍈𑌃 ।
𑌅𑌨𑍍𑌯𑍈𑌶𑍍𑌚 𑌵𑌿𑌵𑌿𑌧𑍈𑌰𑍍𑌵𑍃𑌕𑍍𑌷𑍈𑌃 𑌪𑍍𑌰𑌮𑌦𑌾𑌮𑌿𑌵 𑌭𑍂𑌷𑌿𑌤𑌾𑌮𑍍 ॥ 1 ॥
𑌸𑌮𑍀𑌕𑍍𑌷𑌮𑌾𑌣𑍌 𑌪𑍁𑌷𑌪𑌾𑌢𑍍𑌯𑌂 𑌸𑌰𑍍𑌵𑌤𑍋 𑌵𑌿𑌪𑍁𑌲𑌦𑍍𑌰𑍁𑌮𑌮𑍍 ।
𑌕𑍋𑌯𑌷𑍍𑌟𑌿𑌕𑍈𑌶𑍍𑌚𑌾𑌰𑍍𑌜𑍁𑌨𑌕𑍈𑌶𑍍𑌶𑌤𑌪𑌤𑍍𑌰𑍈𑌶𑍍𑌚 𑌕𑍀𑌰𑌕𑍈𑌃 ॥ 1 ॥
𑌏𑌤𑍈𑌶𑍍𑌚𑌾𑌨𑍍𑌯𑍈𑌶𑍍𑌚 𑌵𑌿𑌹𑌗𑍈𑌰𑍍𑌨𑌾𑌦𑌿𑌤𑌂 𑌤𑍁 𑌵𑌨𑌂 𑌮𑌹𑌤𑍍 ।
𑌤𑌤𑍋 𑌜𑌗𑍍𑌮𑌤𑍁𑌰𑌵𑍍𑌯𑌗𑍍𑌰𑍌 𑌰𑌾𑌘𑌵𑍌 𑌸𑍁𑌸𑌮𑌾𑌹𑌿𑌤𑍌 ॥ 1 ॥
𑌤𑌦𑍍𑌵𑌨𑌂 𑌚𑍈𑌵 𑌸𑌰𑌸𑌃 𑌪𑌶𑍍𑌯𑌂𑌤𑍈 𑌶𑌕𑍁𑌨𑍈𑌰𑍍𑌯𑍁𑌤𑌮𑍍 ।
𑌸 𑌦𑌦𑌰𑍍𑌶 𑌤𑌤𑌃 𑌪𑌂𑌪𑌾𑌂 𑌶𑍀𑌤𑌵𑌾𑌰𑌿𑌨𑌿𑌧𑌿𑌂 𑌶𑍁𑌭𑌾𑌮𑍍 ॥ 20 ॥
𑌤𑌿𑌲𑌕𑌾𑌶𑍋𑌕𑌪𑍁𑌨𑍍𑌨𑌾𑌗𑌵𑌕𑍁𑌲𑍋𑌦𑍍𑌦𑌾𑌲𑌕𑌾𑌶𑌿𑌨𑍀𑌮𑍍 ।
𑌸 𑌰𑌾𑌮𑍋 𑌵𑌿𑌵𑌿𑌧𑌾𑌨𑍍𑌵𑍃𑌕𑍍𑌷𑌾𑌨𑍍𑌸𑌰𑌾𑌂𑌸𑌿 𑌵𑌿𑌵𑌿𑌧𑌾𑌨𑌿 𑌚 ॥ 21 ॥
𑌪𑌶𑍍𑌯𑌨𑍍𑌕𑌾𑌮𑌾𑌭𑌿𑌸𑌂𑌤𑌪𑍍𑌤𑍋 𑌜𑌗𑌾𑌮 𑌪𑌰𑌮𑌂 𑌹𑍍𑌰𑌦𑌮𑍍 ।
𑌪𑍁𑌷𑍍𑌪𑌿𑌤𑍋𑌪𑌵𑌨𑍋𑌪𑍇𑌤𑌾𑌂 𑌸𑌾𑌲𑌚𑌂𑌪𑌕𑌶𑍋𑌭𑌿𑌤𑌾𑌮𑍍 ॥ 22 ॥
𑌷𑌟𑍍𑌪𑌦𑍌𑌘𑌸𑌮𑌾𑌵𑌿𑌷𑍍𑌟𑌾𑌂 𑌶𑍍𑌰𑍀𑌮𑌤𑍀𑌮𑌤𑍁𑌲𑌪𑍍𑌰𑌭𑌾𑌮𑍍 ।
𑌸𑍍𑌫𑌟𑌿𑌕𑍋𑌪𑌮𑌤𑍋𑌯𑌾𑌢𑍍𑌯𑌾𑌂 𑌶𑍍𑌲𑌕𑍍𑌷𑍍𑌣𑌵𑌾𑌲𑍁𑌕𑌸𑌂𑌤𑌤𑌾𑌮𑍍 ॥ 23 ॥
𑌸 𑌤𑌾𑌂 𑌦𑍃𑌷𑍍𑌟𑍍𑌵𑌾 𑌪𑍁𑌨𑌃 𑌪𑌂𑌪𑌾𑌂 𑌪𑌦𑍍𑌮𑌸𑍌𑌗𑌨𑍍𑌘𑌿𑌕𑍈𑌰𑍍𑌯𑍁𑌤𑌾𑌮𑍍 ।
𑌇𑌤𑍍𑌯𑍁𑌵𑌾𑌚 𑌤𑌦𑌾 𑌵𑌾𑌕𑍍𑌯𑌂 𑌲𑌕𑍍𑌷𑍍𑌮𑌣𑌂 𑌸𑌤𑍍𑌯𑌵𑌿𑌕𑍍𑌰𑌮𑌃 ॥ 24 ॥
𑌅𑌸𑍍𑌯𑌾𑌸𑍍𑌤𑍀𑌰𑍇 𑌤𑍁 𑌪𑍂𑌰𑍍𑌵𑍋𑌕𑍍𑌤𑌃 𑌪𑌰𑍍𑌵𑌤𑍋 𑌧𑌾𑌤𑍁𑌮𑌂𑌡𑌿𑌤𑌃 ।
𑌋𑌷𑍍𑌯𑌮𑍂𑌕 𑌇𑌤𑌿 𑌖𑍍𑌯𑌾𑌤𑌃 𑌪𑍁𑌣𑍍𑌯𑌃 𑌪𑍁𑌷𑍍𑌪𑌿𑌤𑌪𑌾𑌦𑌪𑌃 ॥ 25 ॥
𑌹𑌰𑍇𑌃 𑌋𑌕𑍍𑌷𑌰𑌜𑍋𑌨𑌾𑌮𑍍𑌨𑌃 𑌪𑍁𑌤𑍍𑌰𑌸𑍍𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌅𑌧𑍍𑌯𑌾𑌸𑍍𑌤𑍇 𑌤𑌂 𑌮𑌹𑌾𑌵𑍀𑌰𑍍𑌯𑌸𑍍𑌸𑍁𑌗𑍍𑌰𑍀𑌵 𑌇𑌤𑌿 𑌵𑌿𑌶𑍍𑌰𑍁𑌤𑌃 ॥ 26 ॥
𑌸𑍁𑌗𑍍𑌰𑍀𑌵𑌮𑌭𑌿𑌗𑌚𑍍𑌛 𑌤𑍍𑌵𑌂 𑌵𑌾𑌨𑌰𑍇𑌂𑌦𑍍𑌰𑌂 𑌨𑌰𑌰𑍍𑌷𑌭 ।
𑌇𑌤𑍍𑌯𑍁𑌵𑌾𑌚 𑌪𑍁𑌨𑌰𑍍𑌵𑌾𑌕𑍍𑌯𑌂 𑌲𑌕𑍍𑌷𑍍𑌮𑌣𑌂 𑌸𑌤𑍍𑌯𑌵𑌿𑌕𑍍𑌰𑌮𑌮𑍍 ॥ 2 ॥
𑌰𑌾𑌜𑍍𑌯𑌭𑍍𑌰𑌷𑍍𑌟𑍇𑌨 𑌦𑍀𑌨𑍇𑌨 𑌤𑌸𑍍𑌯𑌾𑌮𑌾𑌸𑌕𑍍𑌤𑌚𑍇𑌤𑌸𑌾 ।
𑌕𑌥𑌂 𑌮𑌯𑌾 𑌵𑌿𑌨𑌾 𑌶𑌕𑍍𑌯𑌂 𑌸𑍀𑌤𑌾𑌂 𑌲𑌕𑍍𑌷𑍍𑌮𑌣 𑌜𑍀𑌵𑌿𑌤𑍁𑌮𑍍 ॥ 2 ॥
𑌇𑌤𑍍𑌯𑍇𑌵𑌮𑍁𑌕𑍍𑌤𑍍𑌵𑌾 𑌮𑌦𑌨𑌾𑌭𑌿𑌪𑍀𑌡𑌿𑌤𑌃 𑌸 𑌲𑌕𑍍𑌷𑍍𑌮𑌣𑌂 𑌵𑌾𑌕𑍍𑌯𑌮𑌨𑌨𑍍𑌯𑌚𑍇𑌤𑌸𑌮𑍍 ।
𑌵𑌿𑌵𑍇𑌶 𑌪𑌂𑌪𑌾𑌂 𑌨𑌲𑌿𑌨𑍀𑌂 𑌮𑌨𑍋𑌰𑌮𑌾𑌂 𑌰𑌘𑍂𑌤𑍍𑌤𑌮𑌶𑍍𑌶𑍋𑌕𑌵𑌿𑌷𑌾𑌦𑌯𑌂𑌤𑍍𑌰𑌿𑌤𑌃 ॥ 2 ॥
𑌤𑌤𑍋 𑌮𑌹𑌦𑍍𑌵𑌰𑍍𑌤𑍍𑌮 𑌸𑍁𑌦𑍂𑌰𑌸𑌂𑌕𑍍𑌰𑌮𑌂 𑌕𑍍𑌰𑌮𑍇𑌣 𑌗𑌤𑍍𑌵𑌾 𑌪𑍍𑌰𑌵𑌿𑌲𑍋𑌕𑌯𑌨𑍍𑌵𑌨𑌮𑍍 ।
𑌦𑌦𑌰𑍍𑌶 𑌪𑌂𑌪𑌾𑌂 𑌶𑍁𑌭𑌦𑌰𑍍𑌶𑌕𑌾𑌨𑌨𑌾𑌮𑌨𑍇𑌕𑌨𑌾𑌨𑌾𑌵𑌿𑌧𑌪𑌕𑍍𑌷𑌿𑌜𑌾𑌲𑌕𑌾𑌮𑍍 ॥ 30 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌪𑌂𑌚𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ॥
