𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌾𑌦𑌶𑌾𑌧𑌿𑌕𑌶𑌤𑌤𑌮𑌸𑍍𑌸𑌰𑍍𑌗𑌃 ।
𑌸𑌾𑌤𑍍𑌵𑍇𑌵𑌮𑍁𑌕𑍍𑌤𑌾 𑌵𑍈𑌦𑍇𑌹𑍀 𑌅𑌨𑌸𑍂𑌯𑌾𑌽𑌨𑌸𑍂𑌯𑌯𑌾 ।
𑌪𑍍𑌰𑌤𑌿𑌪𑍂𑌜𑍍𑌯 𑌵𑌚𑍋 𑌮𑌂𑌦𑌂 𑌪𑍍𑌰𑌵𑌕𑍍𑌤𑍁𑌮𑍁𑌪𑌚𑌕𑍍𑌰𑌮𑍇 ॥ 1 ॥
𑌨𑍈𑌤𑌦𑌾𑌶𑍍𑌚𑌰𑍍𑌯𑌮𑌾𑌰𑍍𑌯𑌾𑌯𑌾 𑌯𑌨𑍍𑌮𑌾𑌂 𑌤𑍍𑌵𑌮𑌭𑌿𑌭𑌾𑌷𑌸𑍇 ।
𑌵𑌿𑌦𑌿𑌤𑌂𑌤𑍁 𑌮𑌮𑌾𑌪𑍍𑌯𑍇𑌤𑌦𑍍𑌯𑌥𑌾 𑌨𑌾𑌰𑍍𑌯𑌾𑌃 𑌪𑌤𑌿𑌰𑍍𑌗𑍁𑌰𑍁𑌃 ॥ 2 ॥
𑌯𑌦𑍍𑌯𑌪𑍍𑌯𑍇𑌷 𑌭𑌵𑍇𑌦𑍍𑌭𑌰𑍍𑌤𑌾 𑌮𑌮𑌾𑌽𑌰𑍍𑌯𑍇 𑌵𑍃𑌤𑍍𑌤𑌵𑌰𑍍𑌜𑌿𑌤𑌃 ।
𑌅𑌦𑍍𑌵𑍈𑌧𑌮𑍁𑌪𑌚𑌰𑍍𑌤𑌵𑍍𑌯𑌸𑍍𑌤𑌥𑌾𑌪𑍍𑌯𑍇𑌷 𑌮𑌯𑌾 𑌭𑌵𑍇𑌤𑍍 ॥ 3 ॥
𑌕𑌿𑌂 𑌪𑍁𑌨𑌰𑍍𑌯𑍋 𑌗𑍁𑌣𑌶𑍍𑌲𑌾𑌘𑍍𑌯 𑌸𑍍𑌸𑌾𑌨𑍁𑌕𑍍𑌰𑍋𑌶𑍋 𑌜𑌿𑌤𑍇𑌂𑌦𑍍𑌰𑌿𑌯𑌃 ।
𑌸𑍍𑌥𑌿𑌰𑌾𑌨𑍁𑌰𑌾𑌗𑍋 𑌧𑌰𑍍𑌮𑌾𑌤𑍍𑌮𑌾 𑌮𑌾𑌤𑍃𑌵𑌤𑍍𑌪𑌿𑌤𑍃𑌵𑌤𑍍𑌪𑍍𑌰𑌿𑌯𑌃 ॥ 4 ॥
𑌯𑌾𑌂 𑌵𑍃𑌤𑍍𑌤𑌿𑌂 𑌵𑌰𑍍𑌤𑌤𑍇 𑌰𑌾𑌮𑌃 𑌕𑍌𑌸𑌲𑍍𑌯𑌾𑌯𑌾𑌂 𑌮𑌹𑌾𑌬𑌲𑌃 ।
𑌤𑌾𑌮𑍇𑌵 𑌨𑍃𑌪𑌨𑌾𑌰𑍀𑌣𑌾𑌮𑌨𑍍𑌯𑌾𑌸𑌾𑌮𑌪𑌿 𑌵𑌰𑍍𑌤𑌤𑍇 ॥ 5 ॥
𑌸𑌕𑍃𑌦𑍍𑌦𑍃𑌷𑍍𑌟𑌾𑌸𑍍𑌵𑌪𑌿 𑌸𑍍𑌤𑍍𑌰𑌿𑌷𑍁 𑌨𑍃𑌪𑍇𑌣 𑌨𑍃𑌪𑌵𑌤𑍍𑌸𑌲𑌃 ।
𑌮𑌾𑌤𑍃𑌵𑌦𑍍𑌵𑌰𑍍𑌤𑌤𑍇 𑌵𑍀𑌰𑍋 𑌮𑌾𑌨𑌮𑍁𑌤𑍍𑌸𑍃𑌜𑍍𑌯 𑌧𑌰𑍍𑌮𑌵𑌿𑌤𑍍 ॥ 6 ॥
𑌆𑌗𑌚𑍍𑌛𑌂𑌤𑍍𑌯𑌾𑌶𑍍𑌚 𑌵𑌿𑌜𑌨𑌂 𑌵𑌨𑌮𑍇𑌵𑌂 𑌭𑌯𑌾𑌵𑌹𑌮𑍍 ।
𑌸𑌮𑌾𑌹𑌿𑌤𑌂 𑌮𑍇 𑌶𑍍𑌵𑌶𑍍𑌰𑍍𑌵𑌾 𑌚 𑌹𑍃𑌦𑌯𑍇 𑌤𑌦𑍍𑌧𑍃𑌤𑌂 𑌮𑌹𑌤𑍍 ॥ ॥
𑌪𑌾𑌣𑌿𑌪𑍍𑌰𑌦𑌾𑌨𑌕𑌾𑌲𑍇 𑌚 𑌯𑌤𑍍𑌪𑍁𑌰𑌾𑌤𑍍𑌵𑌗𑍍𑌨𑌿 𑌸𑌨𑍍𑌨𑌿𑌧𑍌 ।
𑌅𑌨𑍁𑌶𑌿𑌷𑍍𑌟𑌾 𑌜𑌨𑌨𑍍𑌯𑌾𑌽𑌸𑍍𑌮𑌿 𑌵𑌾𑌕𑍍𑌯𑌂 𑌤𑌦𑌪𑌿 𑌮𑍇 𑌧𑍃𑌤𑌮𑍍 ॥ ॥
𑌨𑌵𑍀𑌕𑍃𑌤𑌂 𑌤𑍁 𑌤𑌤𑍍𑌸𑌰𑍍𑌵𑌂 𑌵𑌾𑌕𑍍𑌯𑍈𑌸𑍍𑌤𑍇 𑌧𑌰𑍍𑌮𑌚𑌾𑌰𑌿𑌣𑌿 ।
𑌪𑌤𑌿𑌶𑍁𑌶𑍍𑌰𑍂𑌷𑌣𑌾𑌨𑍍𑌨𑌾𑌰𑍍𑌯𑌾𑌸𑍍𑌤𑌪𑍋 𑌨𑌾𑌨𑍍𑌯𑌦𑍍𑌵𑌿𑌧𑍀𑌯𑌤𑍇 ॥ ॥
𑌸𑌾𑌵𑌿𑌤𑍍𑌰𑍀 𑌪𑌤𑌿𑌶𑍁𑌶𑍍𑌰𑍂𑌷𑌾𑌂 𑌕𑍃𑌤𑍍𑌵𑌾 𑌸𑍍𑌵𑌰𑍍𑌗𑍇 𑌮𑌹𑍀𑌯𑌤𑍇 ।
𑌤𑌥𑌾𑌵𑍃𑌤𑍍𑌤𑌿𑌶𑍍𑌚 𑌯𑌾𑌤𑌾 𑌤𑍍𑌵𑌂 𑌪𑌤𑌿𑌶𑍁𑌶𑍍𑌰𑍂𑌷𑌯𑌾 𑌦𑌿𑌵𑌮𑍍 ॥ 10 ॥
𑌵𑌰𑌿𑌷𑍍𑌠𑌾 𑌸𑌰𑍍𑌵𑌨𑌾𑌰𑍀𑌣𑌾𑌮𑍇𑌷𑌾 𑌚 𑌦𑌿𑌵𑌿 𑌦𑍇𑌵𑌤𑌾 ।
𑌰𑍋𑌹𑌿𑌣𑍀 𑌨 𑌵𑌿𑌨𑌾𑌚𑌂𑌦𑍍𑌰𑌂 𑌮𑍁𑌹𑍂𑌰𑍍𑌤𑌮𑌪𑌿 𑌦𑍃𑌶𑍍𑌯𑌤𑍇 ॥ 11 ॥
𑌏𑌵𑌂𑌵𑌿𑌧𑌾𑌶𑍍𑌚 𑌪𑍍𑌰𑌵𑌰𑌾𑌃 𑌸𑍍𑌤𑍍𑌰𑌿𑌯𑍋 𑌭𑌰𑍍𑌤𑍃𑌦𑍃𑌢𑌵𑍍𑌰𑌤𑌾𑌃 ।
𑌦𑍇𑌵𑌲𑍋𑌕𑍇 𑌮𑌹𑍀𑌯𑌂𑌤𑍇 𑌪𑍁𑌣𑍍𑌯𑍇𑌨 𑌸𑍍𑌵𑍇𑌨 𑌕𑌰𑍍𑌮𑌣𑌾 ॥ 12 ॥
𑌤𑌤𑍋𑌽𑌨𑌸𑍂𑌯𑌾 𑌸𑌂𑌹𑍃𑌷𑍍𑌟𑌾 𑌶𑍍𑌰𑍁𑌤𑍍𑌵𑍋𑌕𑍍𑌤𑌂 𑌸𑍀𑌤𑌯𑌾 𑌵𑌚𑌃 ।
𑌶𑌿𑌰𑌸𑍍𑌯𑌾𑌘𑍍𑌰𑌾𑌯 𑌚𑍋𑌵𑌾𑌚 𑌮𑍈𑌥𑌿𑌲𑍀𑌂 𑌹𑌰𑍍𑌷𑌯𑌂𑌤𑍍𑌯𑍁𑌤 ॥ 13 ॥
𑌨𑌿𑌯𑌮𑍈𑌰𑍍𑌵𑌿𑌵𑌿𑌧𑍈𑌰𑌾𑌪𑍍𑌤𑌂 𑌤𑌪𑍋 𑌹𑌿 𑌮𑌹𑌦𑌸𑍍𑌤𑌿 𑌮𑍇 ।
𑌤𑌤𑍍𑌸𑌂𑌶𑍍𑌰𑌿𑌤𑍍𑌯 𑌬𑌲𑌂 𑌸𑍀𑌤𑍇 𑌛𑌂𑌦𑌯𑍇 𑌤𑍍𑌵𑌾𑌂 𑌶𑍁𑌚𑌿𑌵𑍍𑌰𑌤𑍇 ॥ 14 ॥
𑌉𑌪𑌪𑌨𑍍𑌨𑌂 𑌮𑌨𑍋𑌜𑍍𑌞𑌂 𑌚 𑌵𑌚𑌨𑌂 𑌤𑌵 𑌮𑍈𑌥𑌿𑌲𑌿 ।
𑌪𑍍𑌰𑍀𑌤𑌾 𑌚𑌾𑌸𑍍𑌮𑍍𑌯𑍁𑌚𑌿𑌤𑌂 𑌕𑌿𑌂 𑌤𑍇 𑌕𑌰𑌵𑌾𑌣𑌿 𑌬𑍍𑌰𑌵𑍀𑌹𑌿 𑌮𑍇 ॥ 15 ॥
𑌤𑌸𑍍𑌯𑌾𑌸𑍍𑌤𑌦𑍍 𑌵𑌚𑌨𑌂 𑌶𑍍𑌰𑍂𑌤𑍍𑌵𑌾 𑌵𑌿𑌸𑍍𑌮𑌿𑌤𑌾 𑌮𑌂𑌦𑌵𑌿𑌸𑍍𑌮𑌯𑌾 ।
𑌕𑍃𑌤𑌮𑌿𑌤𑍍𑌯𑌬𑍍𑌰𑌵𑍀𑌤𑍍 𑌸𑍀𑌤𑌾 𑌤𑌪𑍋𑌬𑌲𑌸𑌮𑌨𑍍𑌵𑌿𑌤𑌾𑌮𑍍 ॥ 16 ॥
𑌸𑌾 𑌤𑍍𑌵𑍇𑌵𑌮𑍁𑌕𑍍𑌤𑌾 𑌧𑌰𑍍𑌮𑌜𑍍𑌞𑌾 𑌤𑌯𑌾 𑌪𑍍𑌰𑍀𑌤𑌤𑌰𑌾𑌽𑌭𑌵𑌤𑍍 ।
𑌸𑌫𑌲𑌂 𑌚 𑌪𑍍𑌰𑌹𑌰𑍍𑌷𑌂 𑌤𑍇 𑌹𑌂𑌤 𑌸𑍀𑌤𑍇 𑌕𑌰𑍋𑌮𑍍𑌯𑌹𑌮𑍍 ॥ 1 ॥
𑌇𑌦𑌂 𑌦𑌿𑌵𑍍𑌯𑌂 𑌵𑌰𑌂 𑌮𑌾𑌲𑍍𑌯𑌂 𑌵𑌸𑍍𑌤𑍍𑌰𑌮𑌾𑌭𑌰𑌣𑌾𑌨𑌿 𑌚 ।
𑌅𑌂𑌗𑌰𑌾𑌗𑌂 𑌚 𑌵𑍈𑌦𑍇𑌹𑌿 𑌮𑌹𑌾𑌰𑍍𑌹𑌂 𑌚𑌾𑌨𑍁𑌲𑍇𑌪𑌨𑌮𑍍 ॥ 1 ॥
𑌮𑌯𑌾 𑌦𑌤𑍍𑌤𑌮𑌿𑌦𑌂 𑌸𑍀𑌤𑍇 𑌤𑌵 𑌗𑌾𑌤𑍍𑌰𑌾𑌣𑌿 𑌶𑍋𑌭𑌯𑍇𑌤𑍍 ।
𑌅𑌨𑍁𑌰𑍂𑌪𑌮𑌸𑌂𑌕𑍍𑌲𑌿𑌷𑍍𑌟𑌂 𑌨𑌿𑌤𑍍𑌯𑌮𑍇𑌵 𑌭𑌵𑌿𑌷𑍍𑌯𑌤𑌿 ॥ 1 ॥
𑌅𑌂𑌗𑌰𑌾𑌗𑍇𑌣 𑌦𑌿𑌵𑍍𑌯𑍇𑌨 𑌲𑌿𑌪𑍍𑌤𑌾𑌂𑌗𑍀 𑌜𑌨𑌕𑌾𑌤𑍍𑌮𑌜𑍇 ।
𑌶𑍋𑌭𑌯𑌿𑌷𑍍𑌯𑌸𑌿 𑌭𑌰𑍍𑌤𑌾𑌰𑌂 𑌯𑌥𑌾 𑌶𑍍𑌰𑍀𑌰𑍍𑌵𑌿𑌷𑍍𑌣𑍁𑌮𑌵𑍍𑌯𑌯𑌮𑍍 ॥ 20 ॥
𑌸𑌾 𑌵𑌸𑍍𑌤𑍍𑌰𑌮𑌂𑌗𑌰𑌾𑌗𑌂 𑌚 𑌭𑍂𑌷𑌣𑌾𑌨𑌿 𑌸𑍍𑌰𑌜𑌸𑍍𑌤𑌥𑌾 ।
𑌮𑍈𑌥𑌿𑌲𑍀 𑌪𑍍𑌰𑌤𑌿𑌜𑌗𑍍𑌰𑌾𑌹 𑌪𑍍𑌰𑍀𑌤𑌿𑌦𑌾𑌨𑌮𑌨𑍁𑌤𑍍𑌤𑌮𑌮𑍍 ॥ 21 ॥
𑌪𑍍𑌰𑌤𑌿𑌗𑍃𑌹𑍍𑌯 𑌚 𑌤𑌤𑍍𑌸𑍀𑌤𑌾 𑌪𑍍𑌰𑍀𑌤𑌿𑌦𑌾𑌨𑌂 𑌯𑌶𑌸𑍍𑌵𑌿𑌨𑍀 ।
𑌶𑍍𑌲𑌿𑌷𑍍𑌟𑌾𑌂𑌜𑌲𑌿𑌪𑍁𑌟𑌾 𑌤𑌤𑍍𑌰 𑌸𑌮𑍁𑌪𑌾𑌸𑍍𑌤 𑌤𑌪𑍋𑌧𑌨𑌾𑌮𑍍 ॥ 22 ॥
𑌤𑌥𑌾 𑌸𑍀𑌤𑌾𑌮𑍁𑌪𑌾𑌸𑍀𑌨𑌾𑌮𑌨𑌸𑍂𑌯𑌾 𑌦𑍃𑌢𑌵𑍍𑌰𑌤𑌾 ।
𑌵𑌚𑌨𑌂 𑌪𑍍𑌰𑌷𑍍𑌟𑍁𑌮𑌾𑌰𑍇𑌭𑍇 𑌕𑌾𑌂𑌚𑌿𑌤𑍍𑌪𑍍𑌰𑌿𑌯𑌕𑌥𑌾𑌮𑌨𑍁 ॥ 23 ॥
𑌸𑍍𑌵𑌯𑌂 𑌵𑌰𑍇 𑌕𑌿𑌲 𑌪𑍍𑌰𑌾𑌪𑍍𑌤𑌾 𑌤𑍍𑌵𑌮𑌨𑍇𑌨 𑌯𑌶𑌸𑍍𑌵𑌿𑌨𑌾 ।
𑌰𑌾𑌘𑌵𑍇𑌣𑍇𑌤𑌿 𑌮𑍇 𑌸𑌿𑌤𑍇 𑌕𑌥𑌾 𑌶𑍍𑌰𑍁𑌤𑌿𑌮𑍁𑌪𑌾𑌗𑌤𑌾 ॥ 24 ॥
𑌤𑌾𑌂 𑌕𑌥𑌾𑌂 𑌶𑍍𑌰𑍋𑌤𑍁𑌮𑌿𑌚𑍍𑌛𑌾𑌮𑌿 𑌵𑌿𑌸𑍍𑌤𑌰𑍇𑌣 𑌚 𑌮𑍈𑌥𑌿𑌲𑌿 ।
𑌯𑌥𑌾𑌽𑌨𑍁𑌭𑍂𑌤𑌂 𑌕𑌾𑌰𑍍𑌤𑍍𑌸𑍍𑌨𑍍𑌯𑍇𑌨 𑌤𑌨𑍍𑌮𑍇 𑌤𑍍𑌵𑌂 𑌵𑌕𑍍𑌤𑍁𑌮𑌰𑍍𑌹𑌸𑌿 ॥ 25 ॥
𑌏𑌵𑌮𑍁𑌕𑍍𑌤𑌾 𑌤𑍁 𑌸𑌾 𑌸𑍀𑌤𑌾 𑌤𑌾𑌂 𑌤𑌤𑍋 𑌧𑌰𑍍𑌮𑌚𑌾𑌰𑌿𑌣𑍀𑌮𑍍 ।
𑌶𑍍𑌰𑍂𑌯𑌤𑌾𑌮𑌿𑌤𑌿 𑌚𑍋𑌕𑍍𑌤𑍍𑌵𑌾 𑌵𑍈 𑌕𑌥𑌯𑌾𑌮𑌾𑌸 𑌤𑌾𑌂 𑌕𑌥𑌾𑌮𑍍 ॥ 26 ॥
𑌮𑌿𑌥𑌿𑌲𑌾𑌧𑌿𑌪𑌤𑌿𑌰𑍍𑌵𑍀𑌰𑍋 𑌜𑌨𑌕𑍋 𑌨𑌾𑌮 𑌧𑌰𑍍𑌮𑌵𑌿𑌤𑍍 ।
𑌕𑍍𑌷𑌤𑍍𑌰𑌧𑌰𑍍𑌮𑍇 𑌹𑍍𑌯𑌭𑌿𑌰𑌤𑍋 𑌨𑍍𑌯𑌾𑌯𑌤𑌶𑍍𑌶𑌾𑌸𑍍𑌤𑌿 𑌮𑍇𑌦𑌿𑌨𑍀𑌮𑍍 ॥ 2 ॥
𑌤𑌸𑍍𑌯 𑌲𑌾𑌂𑌗𑌲𑌹𑌸𑍍𑌤𑌨𑍍𑌯 𑌕𑌰𑍍𑌷𑌤𑌃 𑌕𑍍𑌷𑍇𑌤𑍍𑌰𑌮𑌂𑌡𑌲𑌮𑍍 ।
𑌅𑌹𑌂 𑌕𑌿𑌲𑍋𑌤𑍍𑌥𑌿𑌤𑌾 𑌭𑌿𑌤𑍍𑌵𑌾 𑌜𑌗𑌤𑍀𑌂 𑌨𑍃𑌪𑌤𑍇𑌸𑍍𑌸𑍁𑌤𑌾 ॥ 2 ॥
𑌸 𑌮𑌾𑌂 𑌦𑍃𑌷𑍍𑌟𑍍𑌵𑌾 𑌨𑌰𑌪𑌤𑌿𑌰𑍍𑌮𑍁𑌷𑍍𑌟𑌿𑌵𑌿𑌕𑍍𑌷𑍇𑌪𑌤𑌤𑍍𑌪𑌰𑌃 ।
𑌪𑌾𑌂𑌸𑍁𑌕𑍁𑌂𑌠𑌿𑌤𑌸𑌰𑍍𑌵𑌾𑌂𑌗𑍀𑌂 𑌜𑌨𑌕𑍋 𑌵𑌿𑌸𑍍𑌮𑌿𑌤𑍋𑌽𑌭𑌵𑌤𑍍 ॥ 2 ॥
𑌅𑌨𑌪𑌤𑍍𑌯𑍇𑌨 𑌚 𑌸𑍍𑌨𑍇𑌹𑌾𑌦𑌂𑌕𑌮𑌾𑌰𑍋𑌪𑍍𑌯 𑌚 𑌸𑍍𑌵𑌯𑌮𑍍 ।
𑌮𑌮𑍇𑌯𑌂 𑌤𑌨𑌯𑍇𑌤𑍍𑌯𑍁𑌕𑍍𑌤𑍍𑌵𑌾 𑌸𑍍𑌨𑍇𑌹𑍋 𑌮𑌯𑌿 𑌨𑌿𑌪𑌾𑌤𑌿𑌤𑌃 ॥ 30 ॥
𑌅𑌂𑌤𑌰𑌿𑌕𑍍𑌷𑍇 𑌚 𑌵𑌾𑌗𑍁𑌕𑍍𑌤𑌾𑌽𑌪𑍍𑌰𑌤𑌿𑌮𑌾𑌽𑌮𑌾𑌨𑍁𑌷𑍀 𑌕𑌿𑌲 ।
𑌏𑌵𑌮𑍇𑌤𑌨𑍍𑌨𑌰𑌪𑌤𑍇 𑌧𑌰𑍍𑌮𑍇𑌣 𑌤𑌨𑌯𑌾 𑌤𑌵 ॥ 31 ॥
𑌤𑌤𑌃 𑌪𑍍𑌰𑌹𑍃𑌷𑍍𑌟𑍋 𑌧𑌰𑍍𑌮𑌾𑌤𑍍𑌮𑌾 𑌪𑌿𑌤𑌾 𑌮𑍇 𑌮𑌿𑌥𑌿𑌲𑌾𑌧𑌿𑌪𑌃 ।
𑌅𑌵𑌾𑌪𑍍𑌤𑍋 𑌵𑌿𑌪𑍁𑌲𑌾𑌂 𑌬𑍁𑌦𑍍𑌧𑌿𑌂 𑌮𑌾𑌮𑌵𑌾𑌪𑍍𑌯 𑌨𑌰𑌾𑌧𑌿𑌪𑌃 ॥ 32 ॥
𑌦𑌤𑍍𑌤𑌾 𑌚𑌾𑌸𑍍𑌮𑍀𑌷𑍍𑌟𑌵𑌦𑍍𑌦𑍇𑌵𑍍𑌯𑍈 𑌜𑍍𑌯𑍇𑌷𑍍𑌠𑌾𑌯𑍈 𑌪𑍁𑌣𑍍𑌯𑌕𑌰𑍍𑌮𑌣𑌾 ।
𑌤𑌯𑌾 𑌸𑌂𑌭𑌾𑌵𑌿𑌤𑌾 𑌚𑌾𑌸𑍍𑌮𑌿 𑌸𑍍𑌨𑌿𑌗𑍍𑌧𑌯𑌾 𑌮𑌾𑌤𑍃𑌸𑍌𑌹𑍃𑌦𑌾𑌤𑍍 ॥ 33 ॥
𑌪𑌤𑌿𑌸𑌂𑌯𑍋𑌗𑌸𑍁𑌲𑌭𑌂 𑌵𑌯𑍋 𑌦𑍃𑌷𑍍𑌟𑍍𑌵𑌾 𑌤𑍁 𑌮𑍇 𑌪𑌿𑌤𑌾 ।
𑌚𑌿𑌂𑌤𑌾𑌮𑌭𑍍𑌯𑌗𑌮𑌦𑍍𑌧𑍀𑌨𑍋 𑌵𑌿𑌤𑍍𑌤𑌨𑌾𑌶𑌾𑌦𑌿𑌵𑌾𑌧𑌨𑌃 ॥ 34 ॥
𑌸𑌦𑍃𑌶𑌾𑌚𑍍𑌚𑌾𑌪𑌕𑍃𑌷𑍍𑌟𑌾𑌚𑍍𑌚 𑌲𑍋𑌕𑍇 𑌕𑌨𑍍𑌯𑌾𑌪𑌿𑌤𑌾 𑌜𑌨𑌾𑌤𑍍 ।
𑌪𑍍𑌰𑌧𑌰𑍍𑌷𑌣𑌾𑌮𑌵𑌾𑌪𑍍𑌨𑍋𑌤𑌿 𑌶𑌕𑍍𑌰𑍇𑌣𑌾𑌪𑌿 𑌸𑌮𑍋 𑌭𑍁𑌵𑌿 ॥ 35 ॥
𑌤𑌾𑌂 𑌧𑌰𑍍𑌷𑌣𑌾𑌮𑌦𑍂𑌰𑌸𑍍𑌥𑌾𑌂 𑌦𑍃𑌷𑍍𑌟𑍍𑌵𑌾 𑌚𑌾𑌤𑍍𑌮𑌨𑌿 𑌪𑌾𑌰𑍍𑌥𑌿𑌵𑌃 ।
𑌚𑌿𑌂𑌤𑌾𑌰𑍍𑌣𑌵𑌗𑌤𑌃 𑌪𑌾𑌰𑌂 𑌨𑌾𑌸𑌸𑌾𑌦𑌾𑌪𑍍𑌲𑌵𑍋 𑌯𑌥𑌾 ॥ 36 ॥
𑌅𑌯𑍋𑌨𑌿𑌜𑌾𑌂 𑌹𑌿 𑌮𑌾𑌂 𑌜𑍍𑌞𑌾𑌤𑍍𑌵𑌾 𑌨𑌾𑌧𑍍𑌯𑌗𑌚𑍍𑌛𑌦𑍍𑌵𑌿𑌚𑌿𑌂𑌤𑌯𑌨𑍍 ।
𑌸𑌦𑍃𑌶𑌂 𑌚𑌾𑌨𑍁𑌰𑍂𑌪𑌂 𑌚 𑌮𑌹𑍀𑌪𑌾𑌲𑌃 𑌪𑌤𑌿𑌂 𑌮𑌮 ॥ 3 ॥
𑌤𑌸𑍍𑌯 𑌬𑍁𑌦𑍍𑌧𑌿𑌰𑌿𑌯𑌂 𑌜𑌾𑌤𑌾 𑌚𑌿𑌂𑌤𑌯𑌾𑌨𑌸𑍍𑌯 𑌸𑌂𑌤𑌤𑌮𑍍 ।
𑌸𑍍𑌵𑌯𑌂𑌵𑌰𑌂 𑌤𑌨𑍂𑌜𑌾𑌯𑌾𑌃 𑌕𑌰𑌿𑌷𑍍𑌯𑌾𑌮𑍀𑌤𑌿 𑌧𑍀𑌮𑌤𑌃 ॥ 3 ॥
𑌮𑌹𑌾𑌯𑌜𑍍𑌞𑍇 𑌤𑌦𑌾 𑌤𑌸𑍍𑌯 𑌵𑌰𑍁𑌣𑍇𑌨 𑌮𑌹𑌾𑌤𑍍𑌮𑌨𑌾 ।
𑌦𑌤𑍍𑌤𑌂 𑌧𑌨𑍁𑌰𑍍𑌵𑌰𑌂 𑌪𑍍𑌰𑍀𑌤𑍍𑌯𑌾 𑌤𑍂𑌣𑍀 𑌚𑌾𑌕𑍍𑌷𑌯𑌸𑌾𑌯𑌕𑍌 ॥ 3 ॥
𑌅𑌸𑌂𑌚𑌾𑌲𑍍𑌯𑌂 𑌮𑌨𑍁𑌷𑍍𑌯𑍈𑌶𑍍𑌚 𑌯𑌤𑍍𑌨𑍇𑌨𑌾𑌪𑌿 𑌚 𑌗𑍌𑌰𑌵𑌾𑌤𑍍 ।
𑌤𑌨𑍍𑌨 𑌶𑌕𑍍𑌤𑌾 𑌨𑌮𑌯𑌿𑌤𑍁𑌂 𑌸𑍍𑌵𑌪𑍍𑌨𑍇𑌷𑍍𑌵𑌪𑌿 𑌨𑌰𑌾𑌧𑌿𑌪𑌾𑌃 ॥ 40 ॥
𑌤𑌦𑍍𑌧𑌨𑍁𑌃 𑌪𑍍𑌰𑌾𑌪𑍍𑌯 𑌮𑍇 𑌪𑌿𑌤𑍍𑌰𑌾 𑌵𑍍𑌯𑌾𑌹𑍃𑌤𑌂 𑌸𑌤𑍍𑌯𑌵𑌾𑌦𑌿𑌨𑌾 ।
𑌸𑌮𑌵𑌾𑌯𑍇 𑌨𑌰𑍇𑌂𑌦𑍍𑌰𑌾𑌣𑌾𑌂 𑌪𑍂𑌰𑍍𑌵𑌮𑌾𑌮𑌂𑌤𑍍𑌰𑍍𑌯 𑌪𑌾𑌰𑍍𑌥𑌿𑌵𑌾𑌨𑍍 ॥ 41 ॥
𑌇𑌦𑌂 𑌚 𑌧𑌨𑍁𑌰𑍁𑌦𑍍𑌯𑌮𑍍𑌯 𑌸𑌜𑍍𑌯𑌂 𑌯𑌃 𑌕𑍁𑌰𑍁𑌤𑍇 𑌨𑌰𑌃 ।
𑌤𑌸𑍍𑌯 𑌮𑍇 𑌦𑍁𑌹𑌿𑌤𑌾 𑌭𑌾𑌰𑍍𑌯𑌾 𑌭𑌵𑌿𑌷𑍍𑌯𑌤𑌿 𑌨 𑌸𑌂𑌶𑌯𑌃 ॥ 42 ॥
𑌤𑌚𑍍𑌚 𑌦𑍃𑌷𑍍𑌟𑍍𑌵𑌾 𑌧𑌨𑍁𑌶𑍍𑌶𑍍𑌰𑍇𑌷𑍍𑌠𑌂 𑌗𑍌𑌰𑌵𑌾𑌦𑍍𑌗𑌿𑌰𑌿𑌸𑌨𑍍𑌨𑌿𑌭𑌮𑍍 ।
𑌅𑌭𑌿𑌵𑌾𑌦𑍍𑌯 𑌨𑍃𑌪𑌾 𑌜𑌗𑍍𑌮𑍁𑌰𑌶𑌕𑍍𑌤𑌾𑌸𑍍𑌤𑌸𑍍𑌯 𑌤𑍋𑌲𑌨𑍇 ॥ 43 ॥
𑌸𑍁𑌦𑍀𑌰𑍍𑌘𑌸𑍍𑌯 𑌤𑍁 𑌕𑌾𑌲𑌸𑍍𑌯 𑌰𑌾𑌘𑌵𑍋𑌽𑌯𑌂 𑌮𑌹𑌾𑌦𑍍𑌯𑍁𑌤𑌿𑌃 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑍇𑌣 𑌸𑌹𑌿𑌤𑍋 𑌯𑌜𑍍𑌞𑌂 𑌦𑍍𑌰𑌷𑍍𑌟𑍁𑌂 𑌸𑌮𑌾𑌗𑌤𑌃 ॥ 44 ॥
𑌲𑌕𑍍𑌷𑍍𑌮𑌣𑍇𑌨 𑌸𑌹 𑌭𑍍𑌰𑌾𑌤𑍍𑌰𑌾 𑌰𑌾𑌮 𑌸𑍍𑌸𑌤𑍍𑌯𑌪𑌰𑌾𑌕𑍍𑌰𑌮𑌃 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑌸𑍍𑌤𑍁 𑌧𑌰𑍍𑌮𑌾𑌤𑍍𑌮𑌾 𑌮𑌮 𑌪𑌿𑌤𑍍𑌰𑌾 𑌸𑍁𑌪𑍂𑌜𑌿𑌤𑌃 ॥ 45 ॥
𑌪𑍍𑌰𑍋𑌵𑌾𑌚 𑌪𑌿𑌤𑌰𑌂 𑌤𑌤𑍍𑌰 𑌭𑍍𑌰𑌾𑌤𑌰𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ।
𑌸𑍁𑌤𑍌 𑌦𑌶𑌰𑌥𑌸𑍍𑌯𑍇𑌮𑍌 𑌧𑌨𑍁𑌰𑍍𑌦𑌰𑍍𑌶𑌕𑌾𑌂𑌕𑍍𑌷𑌿𑌣𑍌 ।
𑌧𑌨𑍁𑌰𑍍𑌦𑌰𑍍𑌶𑌯 𑌰𑌾𑌮𑌾𑌯 𑌰𑌾𑌜𑌪𑍁𑌤𑍍𑌰𑌾𑌯 𑌦𑍈𑌵𑌿𑌕𑌮𑍍 ॥ 46 ॥
𑌇𑌤𑍍𑌯𑍁𑌕𑍍𑌤𑌸𑍍𑌤𑍇𑌨 𑌵𑌿𑌪𑍍𑌰𑍇𑌣 𑌤𑌦𑍍𑌧𑌨𑍁𑌸𑍍𑌸𑌮𑍁𑌪𑌾𑌨𑌯𑌤𑍍 ॥ 4 ॥
𑌨𑌿𑌮𑍇𑌷𑌾𑌂𑌤𑌰𑌮𑌾𑌤𑍍𑌰𑍇𑌣 𑌤𑌦𑌾𑌽𑌨𑌮𑍍𑌯 𑌮𑌹𑌾𑌬𑌲𑌃 ।
𑌜𑍍𑌯𑌾𑌂 𑌸𑌮𑌾𑌰𑍋𑌪𑍍𑌯 𑌝𑌡𑌿𑌤𑌿 𑌪𑍂𑌰𑌯𑌾𑌮𑌾𑌸 𑌵𑍀𑌰𑍍𑌯𑌵𑌾𑌨𑍍 ॥ 4 ॥
𑌤𑍇𑌨 𑌪𑍂𑌰𑌯𑌤𑌾 𑌵𑍇𑌗𑌾𑌨𑍍𑌮𑌧𑍍𑌯𑍇 𑌭𑌗𑍍𑌨𑌂 𑌦𑍍𑌵𑌿𑌧𑌾 𑌧𑌨𑍁𑌃 ।
𑌤𑌸𑍍𑌯 𑌶𑌬𑍍𑌦𑍋 𑌭𑌵𑌦𑍍𑌭𑍀𑌮𑌃 𑌪𑌤𑌿𑌤𑌸𑍍𑌯𑌾𑌶𑌨𑍇𑌰𑌿𑌵 ॥ 4 ॥
𑌤𑌤𑍋𑌽𑌹𑌂 𑌤𑌤𑍍𑌰 𑌰𑌾𑌮𑌾𑌯 𑌪𑌿𑌤𑍍𑌰𑌾 𑌸𑌤𑍍𑌯𑌾𑌭𑌿𑌸𑌂𑌧𑌿𑌨𑌾 ।
𑌨𑌿𑌶𑍍𑌚𑌿𑌤𑌾 𑌦𑌾𑌤𑍁𑌮𑍁𑌦𑍍𑌯𑌮𑍍𑌯 𑌜𑌲𑌭𑌾𑌜𑌨𑌮𑍁𑌤𑍍𑌤𑌮𑌮𑍍 ॥ 50 ॥
𑌦𑍀𑌯𑌮𑌾𑌨𑌾𑌂 𑌨 𑌤𑍁 𑌤𑌦𑌾 𑌪𑍍𑌰𑌤𑌿𑌜𑌗𑍍𑌰𑌾𑌹 𑌰𑌾𑌘𑌵𑌃 ।
𑌅𑌵𑌿𑌜𑍍𑌞𑌾𑌯 𑌪𑌿𑌤𑍁𑌶𑍍𑌛𑌂𑌦𑌮𑌯𑍋𑌧𑍍𑌯𑌾𑌽𑌧𑌿𑌪𑌤𑍇𑌃 𑌪𑍍𑌰𑌭𑍋𑌃 ॥ 51 ॥
𑌤𑌤 𑌶𑍍𑌶𑍍𑌵𑌶𑍁𑌰𑌮𑌾𑌮𑌂𑌤𑍍𑌰𑍍𑌯 𑌵𑍃𑌦𑍍𑌧𑌂 𑌦𑌶𑌰𑌥𑌂 𑌨𑍃𑌪𑌮𑍍 ।
𑌮𑌮 𑌪𑌿𑌤𑍍𑌰𑌾 𑌤𑍍𑌵𑌹𑌂 𑌦𑌤𑍍𑌤𑌾 𑌰𑌾𑌮𑌾𑌯 𑌵𑌿𑌦𑌿𑌤𑌾𑌤𑍍𑌮𑌨𑍇 ॥ 52 ॥
𑌮𑌮 𑌚𑍈𑌵𑌾𑌨𑍁𑌜𑌾 𑌸𑌾𑌧𑍍𑌵𑍀 𑌊𑌰𑍍𑌮𑌿𑌲𑌾 𑌪𑍍𑌰𑌿𑌯𑌦𑌰𑍍𑌶𑌨𑌾 ।
𑌭𑌾𑌰𑍍𑌯𑌾𑌰𑍍𑌥𑍇 𑌲𑌕𑍍𑌷𑍍𑌮𑌣𑌸𑍍𑌯𑌾𑌪𑌿 𑌦𑌤𑍍𑌤𑌾 𑌪𑌿𑌤𑍍𑌰𑌾 𑌮𑌮 𑌸𑍍𑌵𑌯𑌮𑍍 ॥ 53 ॥
𑌏𑌵𑌂 𑌦𑌤𑍍𑌤𑌾𑌽𑌸𑍍𑌮𑌿 𑌰𑌾𑌮𑌾𑌯 𑌤𑌦𑌾 𑌤𑌸𑍍𑌮𑌿𑌨𑍍𑌸𑍍𑌵𑌯𑌂𑌵𑌰𑍇 ।
𑌅𑌨𑍁𑌰𑌕𑍍𑌤𑌾𑌽𑌸𑍍𑌮𑌿 𑌧𑌰𑍍𑌮𑍇𑌣 𑌪𑌤𑌿𑌂 𑌵𑍀𑌰𑍍𑌯𑌵𑌤𑌾𑌂 𑌵𑌰𑌮𑍍 ॥ 54 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌅𑌷𑍍𑌟𑌾𑌦𑌶𑌾𑌧𑌿𑌕𑌶𑌤𑌤𑌮𑌸𑍍𑌸𑌰𑍍𑌗𑌃 ॥
