𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌾𑌂 𑌤𑌥𑌾 𑌪𑌤𑌿𑌤𑌾𑌂 𑌦𑍃𑌷𑍍𑌟𑍍𑌵𑌾 𑌵𑌿𑌰𑍂𑌪𑌾𑌂 𑌶𑍋𑌣𑌿𑌤𑍋𑌕𑍍𑌷𑌿𑌤𑌾𑌮𑍍 ।
𑌭𑌗𑌿𑌨𑍀𑌂 𑌕𑍍𑌰𑍋𑌧𑌸𑌂𑌤𑌪𑍍𑌤𑌃 𑌖𑌰𑌃 𑌪𑌪𑍍𑌰𑌚𑍍𑌛 𑌰𑌾𑌕𑍍𑌷𑌸𑌃 ॥ 1 ॥
𑌉𑌤𑍍𑌤𑌿𑌷𑍍𑌠 𑌤𑌾𑌵𑌦𑌾𑌖𑍍𑌯𑌾𑌹𑌿 𑌪𑍍𑌰𑌮𑍋𑌹𑌂 𑌜𑌹𑌿 𑌸𑌂𑌭𑍍𑌰𑌮𑌮𑍍 ।
𑌵𑍍𑌯𑌕𑍍𑌤𑌮𑌾𑌖𑍍𑌯𑌾𑌹𑌿 𑌕𑍇𑌨 𑌤𑍍𑌵𑌮𑍇𑌵𑌂 𑌰𑍂𑌪𑌾 𑌵𑌿𑌰𑍂𑌪𑌿𑌤𑌾 ॥ 2 ॥
𑌕𑌃 𑌕𑍃𑌷𑍍𑌣𑌸𑌰𑍍𑌪𑌮𑌾𑌸𑍀𑌨𑌮𑌾𑌶𑍀𑌵𑌿𑌷𑌮𑌨𑌾𑌗𑌸𑌮𑍍 ।
𑌤𑍁𑌦𑌤𑍍𑌯𑌭𑌿𑌸𑌮𑌾𑌪𑌨𑍍𑌨𑌮𑌂𑌗𑍁𑌲𑍍𑌯𑌗𑍍𑌰𑍇𑌣 𑌲𑍀𑌲𑌯𑌾 ॥ 3 ॥
𑌕𑌃 𑌕𑌾𑌲𑌪𑌾𑌶𑌂 𑌸𑌮𑌾𑌸𑌜𑍍𑌯 𑌕𑌂𑌠𑍇 𑌮𑍋𑌹𑌾𑌨𑍍𑌨 𑌬𑍁𑌧𑍍𑌯𑌤𑍇 ।
𑌯𑌸𑍍𑌤𑍍𑌵𑌾𑌮𑌦𑍍𑌯 𑌸𑌮𑌾𑌸𑌾𑌦𑍍𑌯 𑌪𑍀𑌤𑌵𑌾𑌨𑍍𑌵𑌿𑌷𑌮𑍁𑌤𑍍𑌤𑌮𑌮𑍍 ॥ 4 ॥
𑌬𑌲𑌵𑌿𑌕𑍍𑌰𑌮𑌸𑌂𑌪𑌨𑍍𑌨𑌾 𑌕𑌾𑌮𑌗𑌾 𑌕𑌾𑌮𑌰𑍂𑌪𑌿𑌣𑍀 ।
𑌇𑌮𑌾𑌮𑌵𑌸𑍍𑌥𑌾𑌂 𑌨𑍀𑌤𑌾 𑌤𑍍𑌵𑌂 𑌕𑍇𑌨𑌾𑌂𑌤𑌕𑌸𑌮𑌾𑌗𑌤𑌾 ॥ 5 ॥
𑌦𑍇𑌵𑌗𑌂𑌧𑌰𑍍𑌵𑌭𑍂𑌤𑌾𑌨𑌾𑌮𑍃𑌷𑍀𑌣𑌾𑌂 𑌚 𑌮𑌹𑌾𑌤𑍍𑌮𑌨𑌾𑌮𑍍 ।
𑌕𑍋𑌽𑌯𑌮𑍇𑌵𑌂 𑌵𑌿𑌰𑍂𑌪𑌾𑌂 𑌤𑍍𑌵𑌾𑌂 𑌮𑌹𑌾𑌵𑍀𑌰𑍍𑌯𑌶𑍍𑌚𑌕𑌾𑌰 𑌹 ॥ 6 ॥
𑌨 𑌹𑌿 𑌪𑌶𑍍𑌯𑌾𑌮𑍍𑌯𑌹𑌂 𑌲𑍋𑌕𑍇 𑌯𑌃 𑌕𑍁𑌰𑍍𑌯𑌾𑌨𑍍𑌮𑌮 𑌵𑌿𑌪𑍍𑌰𑌿𑌯𑌮𑍍 ।
𑌅𑌮𑌰𑍇𑌷𑍁 𑌸𑌹𑌸𑍍𑌰𑌾𑌕𑍍𑌷𑌂 𑌮𑌹𑍇𑌂𑌦𑍍𑌰𑌂 𑌪𑌾𑌕𑌶𑌾𑌸𑌨𑌮𑍍 ॥ ॥
𑌅𑌦𑍍𑌯𑌾𑌹𑌂 𑌮𑌾𑌰𑍍𑌗𑌣𑍈𑌃 𑌪𑍍𑌰𑌾𑌣𑌾𑌨𑌾𑌦𑌾𑌸𑍍𑌯𑍇 𑌜𑍀𑌵𑌿𑌤𑌾𑌂𑌤𑌕𑍈𑌃 ।
𑌸𑌲𑌿𑌲𑍇 𑌕𑍍𑌷𑍀𑌰𑌮𑌾𑌸𑌕𑍍𑌤𑌂 𑌨𑌿𑌷𑍍𑌪𑌿𑌬𑌨𑍍𑌨𑌿𑌵 𑌸𑌾𑌰𑌸𑌃 ॥ ॥
𑌨𑌿𑌹𑌤𑌸𑍍𑌯 𑌮𑌯𑌾 𑌸𑌂𑌖𑍍𑌯𑍇 𑌶𑌰𑌸𑌂𑌕𑍃𑌤𑍍𑌤𑌮𑌰𑍍𑌮𑌣𑌃 ।
𑌸𑌫𑍇𑌨𑌂 𑌰𑍁𑌧𑌿𑌰𑌂 𑌰𑌕𑍍𑌤𑌂 𑌮𑍇𑌦𑌿𑌨𑍀 𑌕𑌸𑍍𑌯 𑌪𑌾𑌸𑍍𑌯𑌤𑌿 ॥ ॥
𑌕𑌸𑍍𑌯 𑌪𑌤𑍍𑌰𑌰𑌥𑌾𑌃 𑌕𑌾𑌯𑌾𑌨𑍍𑌮𑌾𑌂𑌸𑌮𑍁𑌤𑍍𑌕𑍃𑌤𑍍𑌯 𑌸𑌂𑌗𑌤𑌾𑌃 ।
𑌪𑍍𑌰𑌹𑍃𑌷𑍍𑌟𑌾 𑌭𑌕𑍍𑌷𑌯𑌿𑌷𑍍𑌯𑌂𑌤𑌿 𑌨𑌿𑌹𑌤𑌸𑍍𑌯 𑌮𑌯𑌾 𑌰𑌣𑍇 ॥ 10 ॥
𑌤𑌂 𑌨 𑌦𑍇𑌵𑌾 𑌨 𑌗𑌂𑌧𑌰𑍍𑌵𑌾 𑌨 𑌪𑌿𑌶𑌾𑌚𑌾 𑌨 𑌰𑌾𑌕𑍍𑌷𑌸𑌾𑌃 ।
𑌮𑌯𑌾𑌪𑌕𑍃𑌷𑍍𑌟𑌂 𑌕𑍃𑌪𑌣𑌂 𑌶𑌕𑍍𑌤𑌾𑌸𑍍𑌤𑍍𑌰𑌾𑌤𑍁𑌂 𑌮𑌹𑌾𑌹𑌵𑍇 ॥ 11 ॥
𑌉𑌪𑌲𑌭𑍍𑌯 𑌶𑌨𑍈𑌸𑍍𑌸𑌂𑌜𑍍𑌞𑌾𑌂 𑌤𑌂 𑌮𑍇 𑌶𑌂𑌸𑌿𑌤𑍁𑌮𑌰𑍍𑌹𑌸𑌿 ।
𑌯𑍇𑌨 𑌤𑍍𑌵𑌂 𑌦𑍁𑌰𑍍𑌵𑌿𑌨𑍀𑌤𑍇𑌨 𑌵𑌨𑍇 𑌵𑌿𑌕𑍍𑌰𑌮𑍍𑌯 𑌨𑌿𑌰𑍍𑌜𑌿𑌤𑌾 ॥ 12 ॥
𑌇𑌤𑌿 𑌭𑍍𑌰𑌾𑌤𑍁𑌰𑍍𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌕𑍍𑌰𑍁𑌦𑍍𑌧𑌸𑍍𑌯 𑌚 𑌵𑌿𑌶𑍇𑌷𑌤𑌃 ।
𑌤𑌤𑌶𑍍𑌶𑍂𑌰𑍍𑌪𑌣𑌖𑌾 𑌵𑌾𑌕𑍍𑌯𑌂 𑌸𑌬𑌾𑌷𑍍𑌪𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 13 ॥
𑌤𑌰𑍁𑌣𑍌 𑌰𑍂𑌪𑌸𑌂𑌪𑌨𑍍𑌨𑍌 𑌸𑍁𑌕𑍁𑌮𑌾𑌰𑍌 𑌮𑌹𑌾𑌬𑌲𑍌 ।
𑌪𑍁𑌂𑌡𑌰𑍀𑌕𑌵𑌿𑌶𑌾𑌲𑌾𑌕𑍍𑌷𑍌 𑌚𑍀𑌰𑌕𑍃𑌷𑍍𑌣𑌾𑌜𑌿𑌨𑌾𑌂𑌬𑌰𑍌 ॥ 14 ॥
𑌫𑌲𑌮𑍂𑌲𑌾𑌶𑌨𑍌 𑌦𑌾𑌂𑌤𑍌 𑌤𑌾𑌪𑌸𑍌 𑌧𑌰𑍍𑌮𑌚𑌾𑌰𑌿𑌣𑍌 ।
𑌪𑍁𑌤𑍍𑌰𑍌 𑌦𑌶𑌰𑌥𑌸𑍍𑌯𑌾𑌸𑍍𑌤𑌾𑌂 𑌭𑍍𑌰𑌾𑌤𑌰𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ॥ 15 ॥
𑌗𑌂𑌧𑌰𑍍𑌵𑌰𑌾𑌜𑌪𑍍𑌰𑌤𑌿𑌮𑍌 𑌪𑌾𑌰𑍍𑌥𑌿𑌵𑌵𑍍𑌯𑌂𑌜𑌨𑌾𑌨𑍍𑌵𑌿𑌤𑍌 ।
𑌦𑍇𑌵𑍌 𑌵𑌾 𑌮𑌾𑌨𑍁𑌷𑍌 𑌵𑌾 𑌤𑍌 𑌨 𑌤𑌰𑍍𑌕𑌯𑌿𑌤𑍁𑌮𑍁𑌤𑍍𑌸𑌹𑍇 ॥ 16 ॥
𑌤𑌰𑍁𑌣𑍀 𑌰𑍂𑌪𑌸𑌂𑌪𑌨𑍍𑌨𑌾 𑌸𑌰𑍍𑌵𑌾𑌭𑌰𑌣𑌭𑍂𑌷𑌿𑌤𑌾 ।
𑌦𑍃𑌷𑍍𑌟𑌾 𑌤𑌤𑍍𑌰 𑌮𑌯𑌾 𑌨𑌾𑌰𑍀 𑌤𑌯𑍋𑌰𑍍𑌮𑌧𑍍𑌯𑍇 𑌸𑍁𑌮𑌧𑍍𑌯𑌮𑌾 ॥ 1 ॥
𑌤𑌾𑌭𑍍𑌯𑌾𑌮𑍁𑌭𑌾𑌭𑍍𑌯𑌾𑌂 𑌸𑌂𑌭𑍂𑌯 𑌪𑍍𑌰𑌮𑌦𑌾𑌮𑌧𑌿𑌕𑍃𑌤𑍍𑌯 𑌤𑌾𑌮𑍍 ।
𑌇𑌮𑌾𑌮𑌵𑌸𑍍𑌥𑌾𑌂 𑌨𑍀𑌤𑌾𑌹𑌂 𑌯𑌥𑌾𑌨𑌾𑌥𑌾𑌸𑌤𑍀 𑌤𑌥𑌾 ॥ 1 ॥
𑌤𑌸𑍍𑌯𑌾𑌶𑍍𑌚𑌾𑌨𑍃𑌜𑍁𑌵𑍃𑌤𑍍𑌤𑌾𑌯𑌾𑌸𑍍𑌤𑌯𑍋𑌶𑍍𑌚 𑌹𑌤𑌯𑍋𑌰𑌹𑌮𑍍 ।
𑌸𑌫𑍇𑌨𑌂 𑌪𑌾𑌤𑍁𑌮𑌿𑌚𑍍𑌛𑌾𑌮𑌿 𑌰𑍁𑌧𑌿𑌰𑌂 𑌰𑌣𑌮𑍂𑌰𑍍𑌧𑌨𑌿 ॥ 1 ॥
𑌏𑌷 𑌮𑍇 𑌪𑍍𑌰𑌥𑌮𑌃 𑌕𑌾𑌮𑌃 𑌕𑍃𑌤𑌸𑍍𑌤𑌾𑌤 𑌤𑍍𑌵𑌯𑌾 𑌭𑌵𑍇𑌤𑍍 ।
𑌤𑌸𑍍𑌯𑌾𑌸𑍍𑌤𑌯𑍋𑌶𑍍𑌚 𑌰𑍁𑌧𑌿𑌰𑌂 𑌪𑌿𑌬𑍇𑌯𑌮𑌹𑌮𑌾𑌹𑌵𑍇 ॥ 20 ॥
𑌇𑌤𑌿 𑌤𑌸𑍍𑌯𑌾𑌂 𑌬𑍍𑌰𑍁𑌵𑌾𑌣𑌾𑌯𑌾𑌂 𑌚𑌤𑍁𑌰𑍍𑌦𑌶 𑌮𑌹𑌾𑌬𑌲𑌾𑌨𑍍 ।
𑌵𑍍𑌯𑌾𑌦𑌿𑌦𑍇𑌶 𑌖𑌰𑌃 𑌕𑍍𑌰𑍁𑌦𑍍𑌧𑍋 𑌰𑌾𑌕𑍍𑌷𑌸𑌾𑌨𑌂𑌤𑌕𑍋𑌪𑌮𑌾𑌨𑍍 ॥ 21 ॥
𑌮𑌾𑌨𑍁𑌷𑍌 𑌶𑌸𑍍𑌤𑍍𑌰𑌸𑌂𑌪𑌨𑍍𑌨𑍌 𑌚𑍀𑌰𑌕𑍃𑌷𑍍𑌣𑌾𑌜𑌿𑌨𑌾𑌂𑌬𑌰𑍌 ।
𑌪𑍍𑌰𑌵𑌿𑌷𑍍𑌟𑍌 𑌦𑌂𑌡𑌕𑌾𑌰𑌣𑍍𑌯𑌂 𑌘𑍋𑌰𑌂 𑌪𑍍𑌰𑌮𑌦𑌯𑌾 𑌸𑌹 ॥ 22 ॥
𑌤𑍌 𑌹𑌤𑍍𑌵𑌾 𑌤𑌾𑌂 𑌚 𑌦𑍁𑌰𑍍𑌵𑍃𑌤𑍍𑌤𑌾𑌮𑌪𑌾𑌵𑌰𑍍𑌤𑌿𑌤𑍁𑌮𑌰𑍍𑌹𑌥 ।
𑌇𑌯𑌂 𑌚 𑌰𑍁𑌧𑌿𑌰𑌂 𑌤𑍇𑌷𑌾𑌂 𑌭𑌗𑌿𑌨𑍀 𑌮𑌮 𑌪𑌾𑌸𑍍𑌯𑌤𑌿 ॥ 23 ॥
𑌮𑌨𑍋𑌰𑌥𑍋𑌽𑌯𑌮𑌿𑌷𑍍𑌟𑍋𑌽𑌸𑍍𑌯𑌾 𑌭𑌗𑌿𑌨𑍍𑌯𑌾 𑌮𑌮 𑌰𑌾𑌕𑍍𑌷𑌸𑌾𑌃 ।
𑌶𑍀𑌘𑍍𑌰𑌂 𑌸𑌂𑌪𑌾𑌦𑍍𑌯𑌤𑌾𑌂 𑌤𑍌 𑌚 𑌪𑍍𑌰𑌮𑌥𑍍𑌯 𑌸𑍍𑌵𑍇𑌨 𑌤𑍇𑌜𑌸𑌾 ॥ 24 ॥
𑌇𑌤𑌿 𑌪𑍍𑌰𑌤𑌿𑌸𑌮𑌾𑌦𑌿𑌷𑍍𑌟𑌾 𑌰𑌾𑌕𑍍𑌷𑌸𑌾𑌸𑍍𑌤𑍇 𑌚𑌤𑍁𑌰𑍍𑌦𑌶 ।
𑌤𑌤𑍍𑌰 𑌜𑌗𑍍𑌮𑍁𑌸𑍍𑌤𑌯𑌾 𑌸𑌾𑌰𑍍𑌧𑌂 𑌘𑌨𑌾 𑌵𑌾𑌤𑍇𑌰𑌿𑌤𑌾 𑌯𑌥𑌾 ॥ 25 ॥
𑌤𑌤𑌸𑍍𑌤𑍁 𑌤𑍇 𑌤𑌂 𑌸𑌮𑍁𑌦𑌗𑍍𑌰𑌤𑍇𑌜𑌸𑌂 𑌤𑌥𑌾𑌪𑌿𑌽𑌤𑍀𑌕𑍍𑌷𑍍𑌣𑌪𑍍𑌰𑌦𑌰𑌾 𑌨𑌿𑌶𑌾𑌚𑌰𑌾𑌃 ।
𑌨 𑌶𑍇𑌕𑍁𑌰𑍇𑌨𑌂 𑌸𑌹𑌸𑌾 𑌪𑍍𑌰𑌮𑌰𑍍𑌦𑌿𑌤𑍁𑌂 𑌵𑌨𑌦𑍍𑌵𑌿𑌪𑌾 𑌦𑍀𑌪𑍍𑌤𑌮𑌿𑌵𑌾𑌗𑍍𑌨𑌿𑌮𑍁𑌤𑍍𑌥𑌿𑌤𑌮𑍍 ॥ 26 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌏𑌕𑍋𑌨𑌵𑌿𑌂𑌶𑌸𑍍𑌸𑌰𑍍𑌗𑌃 ॥
