Meaning, Multimedia
View this in:
| English | Devanagari | Telugu | Tamil | Kannada | Malayalam | Gujarati | Odia | Bengali  |
| Marathi | Assamese | Punjabi | Hindi | Samskritam | Konkani | Nepali | Sinhala | Grantha  |

3.61 𑌅𑌰𑌣𑍍𑌯𑌕𑌾𑌂𑌡 - 𑌏𑌕𑌷𑌷𑍍𑌟𑌿𑌤𑌮 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌏𑌕𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।

𑌦𑍃𑌷𑍍𑌟𑍍𑌵𑌾𑌶𑍍𑌰𑌮𑌪𑌦𑌂 𑌶𑍂𑌨𑍍𑌯𑌂 𑌰𑌾𑌮𑍋 𑌦𑌶𑌰𑌥𑌾𑌤𑍍𑌮𑌜𑌃 ।
𑌰𑌹𑌿𑌤𑌾𑌂 𑌪𑌰𑍍𑌣𑌶𑌾𑌲𑌾𑌂 𑌚 𑌵𑌿𑌧𑍍𑌵𑌸𑍍𑌤𑌾𑌨𑍍𑌯𑌾𑌸𑌨𑌾𑌨𑌿 𑌚 ॥ 1 ॥

𑌅𑌦𑍃𑌷𑍍𑌟𑍍𑌵𑌾 𑌤𑌤𑍍𑌰 𑌵𑍈𑌦𑍇𑌹𑍀𑌂 𑌸𑌨𑍍𑌨𑌿𑌰𑍀𑌕𑍍𑌷𑍍𑌯 𑌚 𑌸𑌰𑍍𑌵𑌶𑌃 ।
𑌉𑌵𑌾𑌚 𑌰𑌾𑌮𑌃 𑌪𑍍𑌰𑌾𑌕𑍍𑌰𑍁𑌶𑍍𑌯 𑌪𑍍𑌰𑌗𑍃𑌹𑍍𑌯 𑌰𑍁𑌚𑌿𑌰𑍌 𑌭𑍁𑌜𑍌 ॥ 2 ॥

𑌕𑍍𑌵 𑌨𑍁 𑌲𑌕𑍍𑌷𑍍𑌮𑌣 𑌵𑍈𑌦𑍇𑌹𑍀 𑌕𑌂 𑌵𑌾 𑌦𑍇𑌶𑌮𑌿𑌤𑍋 𑌗𑌤𑌾 ।
𑌕𑍇𑌨𑌾𑌹𑍃𑌤𑌾 𑌵𑌾 𑌸𑍌𑌮𑌿𑌤𑍍𑌰𑍇 𑌭𑌕𑍍𑌷𑌿𑌤𑌾 𑌕𑍇𑌨 𑌵𑌾 𑌪𑍍𑌰𑌿𑌯𑌾 ॥ 3 ॥

𑌵𑍃𑌕𑍍𑌷𑍇𑌣𑌾𑌚𑍍𑌛𑌾𑌦𑍍𑌯 𑌯𑌦𑌿 𑌮𑌾𑌂 𑌸𑍀𑌤𑍇 𑌹𑌸𑌿𑌤𑍁𑌮𑌿𑌚𑍍𑌛𑌸𑌿 ।
𑌅𑌲𑌂 𑌤𑍇 𑌹𑌸𑌿𑌤𑍇𑌨𑌾𑌦𑍍𑌯 𑌮𑌾𑌂 𑌭𑌜𑌸𑍍𑌵 𑌸𑍁𑌦𑍁𑌃𑌖𑌿𑌤𑌮𑍍 ॥ 4 ॥

𑌯𑍈𑌸𑍍𑌸𑌹 𑌕𑍍𑌰𑍀𑌡𑌸𑍇 𑌸𑍀𑌤𑍇 𑌵𑌿𑌶𑍍𑌵𑌸𑍍𑌤𑍈𑌰𑍍𑌮𑍃𑌗𑌪𑍋𑌤𑌕𑍈𑌃 ।
𑌏𑌤𑍇 𑌹𑍀𑌨𑌾𑌸𑍍𑌤𑍍𑌵𑌯𑌾 𑌸𑍌𑌮𑍍𑌯𑍇 𑌧𑍍𑌯𑌾𑌯𑌂𑌤𑍍𑌯𑌸𑍍𑌰𑌾𑌵𑌿𑌲𑍇𑌕𑍍𑌷𑌣𑌾𑌃 ॥ 5 ॥

𑌸𑍀𑌤𑌯𑌾 𑌰𑌹𑌿𑌤𑍋𑌽𑌹𑌂 𑌵𑍈 𑌨 𑌹𑌿 𑌜𑍀𑌵𑌾𑌮𑌿 𑌲𑌕𑍍𑌷𑍍𑌮𑌣 ।
𑌮𑍃𑌤𑌂 𑌶𑍋𑌕𑍇𑌨 𑌮𑌹𑌤𑌾 𑌸𑍀𑌤𑌾𑌹𑌰𑌣𑌜𑍇𑌨 𑌮𑌾𑌮𑍍 ॥ 6 ॥

𑌪𑌰𑌲𑍋𑌕𑍇 𑌮𑌹𑌾𑌰𑌾𑌜𑍋 𑌨𑍂𑌨𑌂 𑌦𑍍𑌰𑌕𑍍𑌷𑍍𑌯𑌤𑌿 𑌮𑍇 𑌪𑌿𑌤𑌾 ।
𑌕𑌥𑌂 𑌪𑍍𑌰𑌤𑌿𑌜𑍍𑌞𑌾𑌂 𑌸𑌂𑌶𑍍𑌰𑍁𑌤𑍍𑌯 𑌮𑌯𑌾 𑌤𑍍𑌵𑌮𑌭𑌿𑌯𑍋𑌜𑌿𑌤𑌃 ॥ 𑍭 ॥

𑌅𑌪𑍂𑌰𑌯𑌿𑌤𑍍𑌵𑌾 𑌤𑌂 𑌕𑌾𑌲𑌂 𑌮𑌤𑍍𑌸𑌕𑌾𑌶𑌮𑌿𑌹𑌾𑌗𑌤𑌃 ।
𑌕𑌾𑌮𑌵𑍃𑌤𑍍𑌤𑌮𑌨𑌾𑌰𑍍𑌯𑌂 𑌮𑌾𑌂 𑌮𑍃𑌷𑌾𑌵𑌾𑌦𑌿𑌨𑌮𑍇𑌵 𑌚 ॥ 𑍮 ॥

𑌧𑌿𑌕𑍍𑌤𑍍𑌵𑌾𑌮𑌿𑌤𑌿 𑌪𑌰𑍇 𑌲𑍋𑌕𑍇 𑌵𑍍𑌯𑌕𑍍𑌤𑌂 𑌵𑌕𑍍𑌷𑍍𑌯𑌤𑌿 𑌮𑍇 𑌪𑌿𑌤𑌾 ।
𑌵𑌿𑌵𑌶𑌂 𑌶𑍋𑌕𑌸𑌂𑌤𑌪𑍍𑌤𑌂 𑌦𑍀𑌨𑌂 𑌭𑌗𑍍𑌨𑌮𑌨𑍋𑌰𑌥𑌮𑍍 ॥ 𑍯 ॥

𑌮𑌾𑌮𑌿𑌹𑍋𑌤𑍍𑌸𑍃𑌜𑍍𑌯 𑌕𑌰𑍁𑌣𑌂 𑌕𑍀𑌰𑍍𑌤𑌿𑌰𑍍𑌨𑌰𑌮𑌿𑌵𑌾𑌨𑍃𑌜𑍁𑌮𑍍 ।
𑌕𑍍𑌵 𑌗𑌚𑍍𑌛𑌸𑌿 𑌵𑌰𑌾𑌰𑍋𑌹𑍇 𑌮𑌾𑌂 𑌨𑍋𑌤𑍍𑌸𑍃𑌜 𑌸𑍁𑌮𑌧𑍍𑌯𑌮𑍇 ॥ 10 ॥

𑌤𑍍𑌵𑌯𑌾 𑌵𑌿𑌰𑌹𑌿𑌤𑌶𑍍𑌚𑌾𑌹𑌂 𑌮𑍋𑌕𑍍𑌷𑍍𑌯𑍇 𑌜𑍀𑌵𑌿𑌤𑌮𑌾𑌤𑍍𑌮𑌨𑌃 ।
𑌇𑌤𑍀𑌵 𑌵𑌿𑌲𑌪𑌨𑍍𑌰𑌾𑌮𑌸𑍍𑌸𑍀𑌤𑌾𑌦𑌰𑍍𑌶𑌨𑌲𑌾𑌲𑌸𑌃 ॥ 11 ॥

𑌨 𑌦𑌦𑌰𑍍𑌶 𑌸𑍁𑌦𑍁𑌃𑌖𑌾𑌰𑍍𑌤𑍋 𑌰𑌾𑌘𑌵𑍋 𑌜𑌨𑌕𑌾𑌤𑍍𑌮𑌜𑌾𑌮𑍍 ।
𑌅𑌨𑌾𑌸𑌾𑌦𑌯𑌮𑌾𑌨𑌂 𑌤𑌂 𑌸𑍀𑌤𑌾𑌂 𑌦𑌶𑌰𑌥𑌾𑌤𑍍𑌮𑌜𑌮𑍍 ॥ 12 ॥

𑌪𑌂𑌕𑌮𑌾𑌸𑌾𑌦𑍍𑌯 𑌵𑌿𑌪𑍁𑌲𑌂 𑌸𑍀𑌦𑌂𑌤𑌮𑌿𑌵 𑌕𑍁𑌂𑌜𑌰𑌮𑍍 ।
𑌲𑌕𑍍𑌷𑍍𑌮𑌣𑍋 𑌰𑌾𑌮𑌮𑌤𑍍𑌯𑌰𑍍𑌥𑌮𑍁𑌵𑌾𑌚 𑌹𑌿𑌤𑌕𑌾𑌮𑍍𑌯𑌯𑌾 ॥ 13 ॥

𑌮𑌾 𑌵𑌿𑌷𑌾𑌦𑌂 𑌮𑌹𑌾𑌬𑌾𑌹𑍋 𑌕𑍁𑌰𑍁 𑌯𑌤𑍍𑌨𑌂 𑌮𑌯𑌾 𑌸𑌹 ।
𑌇𑌦𑌂 𑌚 𑌹𑌿 𑌵𑌨𑌂 𑌶𑍂𑌰 𑌬𑌹𑍁𑌕𑌂𑌦𑌰𑌶𑍋𑌭𑌿𑌤𑌮𑍍 ॥ 14 ॥

𑌪𑍍𑌰𑌿𑌯𑌕𑌾𑌨𑌨𑌸𑌂𑌚𑌾𑌰𑌾 𑌵𑌨𑍋𑌨𑍍𑌮𑌤𑍍𑌤𑌾 𑌚 𑌮𑍈𑌥𑌿𑌲𑍀 ।
𑌸𑌾 𑌵𑌨𑌂 𑌵𑌾 𑌪𑍍𑌰𑌵𑌿𑌷𑍍𑌟𑌾 𑌸𑍍𑌯𑌾𑌨𑍍𑌨𑌲𑌿𑌨𑍀𑌂 𑌵𑌾 𑌸𑍁𑌪𑍁𑌷𑍍𑌪𑌿𑌤𑌾𑌮𑍍 ॥ 15 ॥

𑌸𑌰𑌿𑌤𑌂 𑌵𑌾𑌪𑌿 𑌸𑌂𑌪𑍍𑌰𑌾𑌪𑍍𑌤𑌾 𑌮𑍀𑌨𑌵𑌂𑌜𑍁𑌲𑌸𑍇𑌵𑌿𑌤𑌾𑌮𑍍 ।
𑌸𑍍𑌨𑌾𑌤𑍁𑌕𑌾𑌮𑌾 𑌨𑌿𑌲𑍀𑌨𑌾 𑌸𑍍𑌯𑌾𑌦𑍍𑌧𑌾𑌸𑌕𑌾𑌮𑌾 𑌵𑌨𑍇 𑌕𑍍𑌵𑌚𑌿𑌤𑍍 ॥ 16 ॥

𑌵𑌿𑌤𑍍𑌰𑌾𑌸𑌯𑌿𑌤𑍁𑌕𑌾𑌮𑌾 𑌵𑌾 𑌲𑍀𑌨𑌾 𑌸𑍍𑌯𑌾𑌤𑍍𑌕𑌾𑌨𑌨𑍇 𑌕𑍍𑌵𑌚𑌿𑌤𑍍 ।
𑌜𑌿𑌜𑍍𑌞𑌾𑌸𑌮𑌾𑌨𑌾 𑌵𑍈𑌦𑍇𑌹𑍀 𑌤𑍍𑌵𑌾𑌂 𑌮𑌾𑌂 𑌚 𑌪𑍁𑌰𑍁𑌷𑌰𑍍𑌷𑌭 ॥ 1𑍭 ॥

𑌤𑌸𑍍𑌯𑌾𑌹𑍍𑌯𑌨𑍍𑌵𑍇𑌷𑌣𑍇 𑌶𑍍𑌰𑍀𑌮𑌨𑍍 𑌕𑍍𑌷𑌿𑌪𑍍𑌰𑌮𑍇𑌵 𑌯𑌤𑌾𑌵𑌹𑍇 ।
𑌵𑌨𑌂 𑌸𑌰𑍍𑌵𑌂 𑌵𑌿𑌚𑌿𑌨𑍁𑌵𑍋 𑌯𑌤𑍍𑌰 𑌸𑌾 𑌜𑌨𑌕𑌾𑌤𑍍𑌮𑌜𑌾 ॥ 1𑍮 ॥

𑌮𑌨𑍍𑌯𑌸𑍇 𑌯𑌦𑌿 𑌕𑌾𑌕𑍁𑌤𑍍𑌸𑍍𑌥 𑌮𑌾 𑌸𑍍𑌮 𑌶𑍋𑌕𑍇 𑌮𑌨𑌃 𑌕𑍃𑌥𑌾𑌃 ।
𑌏𑌵𑌮𑍁𑌕𑍍𑌤𑌸𑍍𑌤𑍁 𑌸𑍌𑌹𑌾𑌰𑍍𑌦𑌾𑌲𑍍𑌲𑌕𑍍𑌷𑍍𑌮𑌣𑍇𑌨 𑌸𑌮𑌾𑌹𑌿𑌤𑌃 ॥ 1𑍯 ॥

𑌸𑌹 𑌸𑍌𑌮𑌿𑌤𑍍𑌰𑌿𑌣𑌾 𑌰𑌾𑌮𑍋 𑌵𑌿𑌚𑍇𑌤𑍁𑌮𑍁𑌪𑌚𑌕𑍍𑌰𑌮𑍇 ।
𑌤𑍌 𑌵𑌨𑌾𑌨𑌿 𑌗𑌿𑌰𑍀𑌂𑌶𑍍𑌚𑍈𑌵 𑌸𑌰𑌿𑌤𑌶𑍍𑌚 𑌸𑌰𑌾𑌂𑌸𑌿 𑌚 ॥ 20 ॥

𑌨𑌿𑌖𑌿𑌲𑍇𑌨 𑌵𑌿𑌚𑌿𑌨𑍍𑌵𑌾𑌨𑍌 𑌸𑍀𑌤𑌾𑌂 𑌦𑌶𑌰𑌥𑌾𑌤𑍍𑌮𑌜𑍌 ।
𑌤𑌸𑍍𑌯 𑌶𑍈𑌲𑌸𑍍𑌯 𑌸𑌾𑌨𑍂𑌨𑌿 𑌗𑍁𑌹𑌾𑌶𑍍𑌚 𑌶𑌿𑌖𑌰𑌾𑌣𑌿 𑌚 ॥ 21 ॥

𑌨𑌿𑌖𑌿𑌲𑍇𑌨 𑌵𑌿𑌚𑌿𑌨𑍍𑌵𑌾𑌨𑍌 𑌨𑍈𑌵 𑌤𑌾𑌮𑌭𑌿𑌜𑌗𑍍𑌮𑌤𑍁𑌃 ।
𑌵𑌿𑌚𑌿𑌤𑍍𑌯 𑌸𑌰𑍍𑌵𑌤𑌶𑍍𑌶𑍈𑌲𑌂 𑌰𑌾𑌮𑍋 𑌲𑌕𑍍𑌷𑍍𑌮𑌣𑌮𑌬𑍍𑌰𑌵𑌿𑌤𑍍 ॥ 22 ॥

𑌨𑍇𑌹 𑌪𑌶𑍍𑌯𑌾𑌮𑌿 𑌸𑍌𑌮𑌿𑌤𑍍𑌰𑍇 𑌵𑍈𑌦𑍇𑌹𑍀𑌂 𑌪𑌰𑍍𑌵𑌤𑍇 𑌶𑍁𑌭𑌾𑌮𑍍 ।
𑌤𑌤𑍋 𑌦𑍁𑌃𑌖𑌾𑌭𑌿𑌸𑌂𑌤𑌪𑍍𑌤𑍋 𑌲𑌕𑍍𑌷𑍍𑌮𑌣𑍋 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 23 ॥

𑌵𑌿𑌚𑌰𑌂𑌦𑌂𑌡𑌕𑌾𑌰𑌣𑍍𑌯𑌂 𑌭𑍍𑌰𑌾𑌤𑌰𑌂 𑌦𑍀𑌪𑍍𑌤𑌤𑍇𑌜𑌸𑌮𑍍 ।
𑌪𑍍𑌰𑌾𑌪𑍍𑌸𑍍𑌯𑌸𑌿 𑌤𑍍𑌵𑌂 𑌮𑌹𑌾𑌪𑍍𑌰𑌾𑌜𑍍𑌞 𑌮𑍈𑌥𑌿𑌲𑍀𑌂 𑌜𑌨𑌕𑌾𑌤𑍍𑌮𑌜𑌾𑌮𑍍 ॥ 24 ॥

𑌯𑌥𑌾 𑌵𑌿𑌷𑍍𑌣𑍁𑌰𑍍𑌮𑌹𑌾𑌬𑌾𑌹𑍁𑌰𑍍𑌬𑌲𑌿𑌂 𑌬𑌦𑍍𑌧𑍍𑌵𑌾 𑌮𑌹𑍀𑌮𑌿𑌮𑌾𑌮𑍍 ।
𑌏𑌵𑌮𑍁𑌕𑍍𑌤𑌸𑍍𑌤𑍁 𑌸𑍌𑌹𑌾𑌰𑍍𑌦𑌾𑌲𑍍𑌲𑌕𑍍𑌷𑍍𑌮𑌣𑍇𑌨 𑌸 𑌰𑌾𑌘𑌵𑌃 ॥ 25 ॥

𑌉𑌵𑌾𑌚 𑌦𑍀𑌨𑌯𑌾 𑌵𑌾𑌚𑌾 𑌦𑍁𑌃𑌖𑌾𑌭𑌿𑌹𑌤𑌚𑍇𑌤𑌨𑌃 ।
𑌵𑌨𑌂 𑌸𑌰𑍍𑌵𑌂 𑌸𑍁𑌵𑌿𑌚𑌿𑌤𑌂 𑌪𑌦𑍍𑌮𑌿𑌨𑍍𑌯𑌃 𑌫𑍁𑌲𑍍𑌲𑌪𑌂𑌕𑌜𑌾𑌃 ॥ 26 ॥

𑌗𑌿𑌰𑌿𑌶𑍍𑌚𑌾𑌯𑌂 𑌮𑌹𑌾𑌪𑍍𑌰𑌾𑌜𑍍𑌞 𑌬𑌹𑍁𑌕𑌂𑌦𑌰𑌨𑌿𑌰𑍍𑌝𑌰𑌃 ।
𑌨 𑌹𑌿 𑌪𑌶𑍍𑌯𑌾𑌮𑌿 𑌵𑍈𑌦𑍇𑌹𑍀𑌂 𑌪𑍍𑌰𑌾𑌣𑍇𑌭𑍍𑌯𑍋𑌽𑌪𑌿 𑌗𑌰𑍀𑌯𑌸𑍀𑌮𑍍 ॥ 2𑍭 ॥

𑌏𑌵𑌂 𑌸 𑌵𑌿𑌲𑌪𑌨𑍍𑌰𑌾𑌮𑌸𑍍𑌸𑍀𑌤𑌾𑌹𑌰𑌣𑌕𑌰𑍍𑌶𑌿𑌤𑌃 ।
𑌦𑍀𑌨𑌶𑍍𑌶𑍋𑌕𑌸𑌮𑌾𑌵𑌿𑌷𑍍𑌟𑍋 𑌮𑍁𑌹𑍂𑌰𑍍𑌤𑌂 𑌵𑌿𑌹𑍍𑌵𑌲𑍋𑌽𑌭𑌵𑌤𑍍 ॥ 2𑍮 ॥

𑌸𑌂𑌤𑌪𑍍𑌤𑍋 𑌹𑍍𑌯𑌵𑌸𑌨𑍍𑌨𑌾𑌂𑌗𑍋 𑌗𑌤𑌬𑍁𑌦𑍍𑌧𑌿𑌰𑍍𑌵𑌿𑌚𑍇𑌤𑌨𑌃 ।
𑌨𑌿𑌷𑌸𑌾𑌦𑌾𑌤𑍁𑌰𑍋 𑌦𑍀𑌨𑍋 𑌨𑌿𑌶𑍍𑌶𑍍𑌵𑌸𑍍𑌯𑌾𑌶𑍀𑌤𑌮𑌾𑌯𑌤𑌮𑍍 ॥ 2𑍯 ॥

𑌬𑌹𑍁𑌲𑌂 𑌸 𑌤𑍁 𑌨𑌿𑌶𑍍𑌶𑍍𑌵𑌸𑍍𑌯 𑌰𑌾𑌮𑍋 𑌰𑌾𑌜𑍀𑌵𑌲𑍋𑌚𑌨𑌃 ।
𑌹𑌾 𑌪𑍍𑌰𑌿𑌯𑍇𑌤𑌿 𑌵𑌿𑌚𑍁𑌕𑍍𑌰𑍋𑌶 𑌬𑌹𑍁𑌶𑍋 𑌬𑌾𑌷𑍍𑌪𑌗𑌦𑍍𑌗𑌦𑌃 ॥ 30 ॥

𑌤𑌂 𑌤𑌤𑌸𑍍𑌸𑌾𑌂𑌤𑍍𑌵𑌯𑌾𑌮𑌾𑌸 𑌲𑌕𑍍𑌷𑍍𑌮𑌣𑌃 𑌪𑍍𑌰𑌿𑌯𑌬𑌾𑌂𑌧𑌵𑌃 ।
𑌬𑌹𑍁𑌪𑍍𑌰𑌕𑌾𑌰𑌂 𑌧𑌰𑍍𑌮𑌜𑍍𑌞𑌃 𑌪𑍍𑌰𑌶𑍍𑌰𑌿𑌤𑌂 𑌪𑍍𑌰𑌶𑍍𑌰𑌿𑌤𑌾𑌂𑌜𑌲𑌿𑌃 ॥ 31 ॥

𑌅𑌨𑌾𑌦𑍃𑌤𑍍𑌯 𑌤𑍁 𑌤𑌦𑍍𑌵𑌾𑌕𑍍𑌯𑌂 𑌲𑌕𑍍𑌷𑍍𑌮𑌣𑍋𑌷𑍍𑌠𑌪𑍁𑌟𑌾𑌚𑍍𑌚𑍍𑌯𑍁𑌤𑌮𑍍 ।
𑌅𑌪𑌶𑍍𑌯𑌂𑌸𑍍𑌤𑌾𑌂 𑌪𑍍𑌰𑌿𑌯𑌾𑌂 𑌸𑍀𑌤𑌾𑌂 𑌪𑍍𑌰𑌾𑌕𑍍𑌰𑍋𑌶𑌤𑍍𑌸 𑌪𑍁𑌨𑌃 𑌪𑍁𑌨𑌃 ॥ 32 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌏𑌕𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥


Browse Related Categories: