𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌷𑌡𑍍𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌮𑍁𑌨𑍇𑌰𑍍𑌵𑌚𑌨𑌮𑌕𑍍𑌲𑍀𑌬𑌂 𑌶𑍍𑌰𑍁𑌤𑍍𑌵𑌾 𑌨𑌰𑌵𑌰𑌾𑌤𑍍𑌮𑌜𑌃 ।
𑌰𑌾𑌘𑌵𑌃 𑌪𑍍𑌰𑌾𑌂𑌜𑌲𑌿𑌰𑍍𑌭𑍂𑌤𑍍𑌵𑌾 𑌪𑍍𑌰𑌤𑍍𑌯𑍁𑌵𑌾𑌚 𑌦𑍃𑌢𑌵𑍍𑌰𑌤𑌃 ॥ 1 ॥
𑌪𑌿𑌤𑍁𑌰𑍍𑌵𑌚𑌨𑌨𑌿𑌰𑍍𑌦𑍇𑌶𑌾𑌤𑍍𑌪𑌿𑌤𑍁𑌰𑍍𑌵𑌚𑌨𑌗𑍌𑌰𑌵𑌾𑌤𑍍 ।
𑌵𑌚𑌨𑌂 𑌕𑍌𑌶𑌿𑌕𑌸𑍍𑌯𑍇𑌤𑌿 𑌕𑌰𑍍𑌤𑌵𑍍𑌯𑌮𑌵𑌿𑌶𑌂𑌕𑌯𑌾 ॥ 2 ॥
𑌅𑌨𑍁𑌶𑌿𑌷𑍍𑌟𑍋𑌽𑌸𑍍𑌮𑍍𑌯𑌯𑍋𑌧𑍍𑌯𑌾𑌯𑌾𑌂 𑌗𑍁𑌰𑍁𑌮𑌧𑍍𑌯𑍇 𑌮𑌹𑌾𑌤𑍍𑌮𑌨𑌾 ।
𑌪𑌿𑌤𑍍𑌰𑌾 𑌦𑌶𑌰𑌥𑍇𑌨𑌾𑌹𑌂 𑌨𑌾𑌵𑌜𑍍𑌞𑍇𑌯𑌂 𑌹𑌿 𑌤𑌦𑍍𑌵𑌚𑌃 ॥ 3 ॥
𑌸𑍋𑌽𑌹𑌂 𑌪𑌿𑌤𑍁𑌰𑍍𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌶𑌾𑌸𑌨𑌾𑌦𑍍𑌬𑍍𑌰𑌹𑍍𑌮𑌵𑌾𑌦𑌿𑌨𑌃 ।
𑌕𑌰𑌿𑌷𑍍𑌯𑌾𑌮𑌿 𑌨 𑌸𑌂𑌦𑍇𑌹𑌸𑍍𑌤𑌾𑌟𑌕𑌾𑌵𑌧𑌮𑍁𑌤𑍍𑌤𑌮𑌮𑍍 ॥ 4 ॥
𑌗𑍋𑌬𑍍𑌰𑌾𑌹𑍍𑌮𑌣𑌹𑌿𑌤𑌾𑌰𑍍𑌥𑌾𑌯 𑌦𑍇𑌶𑌸𑍍𑌯𑌾𑌸𑍍𑌯 𑌸𑍁𑌖𑌾𑌯 𑌚 ।
𑌤𑌵 𑌚𑍈𑌵𑌾𑌪𑍍𑌰𑌮𑍇𑌯𑌸𑍍𑌯 𑌵𑌚𑌨𑌂 𑌕𑌰𑍍𑌤𑍁𑌮𑍁𑌦𑍍𑌯𑌤𑌃 ॥ 5 ॥
𑌏𑌵𑌮𑍁𑌕𑍍𑌤𑍍𑌵𑌾 𑌧𑌨𑍁𑌰𑍍𑌮𑌧𑍍𑌯𑍇 𑌬𑌧𑍍𑌵𑌾 𑌮𑍁𑌷𑍍𑌟𑌿𑌮𑌰𑌿𑌂𑌦𑌮𑌃 ।
𑌜𑍍𑌯𑌾𑌶𑌬𑍍𑌦𑌮𑌕𑌰𑍋𑌤𑍍𑌤𑍀𑌵𑍍𑌰𑌂 𑌦𑌿𑌶𑌶𑍍𑌶𑌬𑍍𑌦𑍇𑌨 𑌨𑌾𑌦𑌯𑌨𑍍 ॥ 6 ॥
𑌤𑍇𑌨 𑌶𑌬𑍍𑌦𑍇𑌨 𑌵𑌿𑌤𑍍𑌰𑌸𑍍𑌤𑌾𑌸𑍍𑌤𑌾𑌟𑌕𑌾𑌵𑌨𑌵𑌾𑌸𑌿𑌨𑌃 ।
𑌤𑌾𑌟𑌕𑌾 𑌚 𑌸𑍁𑌸𑌂𑌕𑍍𑌰𑍁𑌦𑍍𑌧𑌾 𑌤𑍇𑌨 𑌶𑌬𑍍𑌦𑍇𑌨 𑌮𑍋𑌹𑌿𑌤𑌾 ॥ ॥
𑌤𑌂 𑌶𑌬𑍍𑌦𑌮𑌭𑌿𑌨𑌿𑌧𑍍𑌯𑌾𑌯 𑌰𑌾𑌕𑍍𑌷𑌸𑍀 𑌕𑍍𑌰𑍋𑌧𑌮𑍂𑌰𑍍𑌛𑌿𑌤𑌾 ।
𑌶𑍍𑌰𑍁𑌤𑍍𑌵𑌾 𑌚𑌾𑌭𑍍𑌯𑌦𑍍𑌰𑌵𑌦𑍍𑌵𑍇𑌗𑌾𑌦𑍍𑌯𑌤𑌶𑍍𑌶𑌬𑍍𑌦𑍋 𑌵𑌿𑌨𑌿𑌸𑍍𑌸𑍃𑌤𑌃 ॥ ॥
𑌤𑌾𑌂 𑌦𑍃𑌷𑍍𑌟𑍍𑌵𑌾 𑌰𑌾𑌘𑌵𑌃 𑌕𑍍𑌰𑍁𑌦𑍍𑌧𑌾𑌂 𑌵𑌿𑌕𑍃𑌤𑌾𑌂 𑌵𑌿𑌕𑍃𑌤𑌾𑌨𑌨𑌾𑌮𑍍 ।
𑌪𑍍𑌰𑌮𑌾𑌣𑍇𑌨𑌾𑌤𑌿𑌵𑍃𑌦𑍍𑌧𑌾𑌂 𑌚 𑌲𑌕𑍍𑌷𑍍𑌮𑌣𑌂 𑌸𑍋𑌽𑌭𑍍𑌯𑌭𑌾𑌷𑌤 ॥ ॥
𑌪𑌶𑍍𑌯 𑌲𑌕𑍍𑌷𑍍𑌮𑌣 𑌯𑌕𑍍𑌷𑌿𑌣𑍍𑌯𑌾 𑌭𑍈𑌰𑌵𑌂 𑌦𑌾𑌰𑍁𑌣𑌂 𑌵𑌪𑍁𑌃 ।
𑌭𑌿𑌦𑍍𑌯𑍇𑌰𑌨𑍍 𑌦𑌰𑍍𑌶𑌨𑌾𑌦𑌸𑍍𑌯𑌾 𑌭𑍀𑌰𑍂𑌣𑌾𑌂 𑌹𑍃𑌦𑌯𑌾𑌨𑌿 𑌚 ॥ 10 ॥
𑌏𑌨𑌾𑌂 𑌪𑌶𑍍𑌯 𑌦𑍁𑌰𑌾𑌧𑌰𑍍𑌷𑌾𑌂 𑌮𑌾𑌯𑌾𑌬𑌲𑌸𑌮𑌨𑍍𑌵𑌿𑌤𑌾𑌮𑍍 ।
𑌵𑌿𑌨𑌿𑌵𑍃𑌤𑍍𑌤𑌾𑌂 𑌕𑌰𑍋𑌮𑍍𑌯𑌦𑍍𑌯 𑌹𑍃𑌤𑌕𑌰𑍍𑌣𑌾𑌗𑍍𑌰𑌨𑌾𑌸𑌿𑌕𑌾𑌮𑍍 ॥ 11 ॥
𑌨 𑌹𑍍𑌯𑍇𑌨𑌾𑌮𑍁𑌤𑍍𑌸𑌹𑍇 𑌹𑌂𑌤𑍁𑌂 𑌸𑍍𑌤𑍍𑌰𑍀𑌸𑍍𑌵𑌭𑌾𑌵𑍇𑌨 𑌰𑌕𑍍𑌷𑌿𑌤𑌾𑌮𑍍 ।
𑌵𑍀𑌰𑍍𑌯𑌂 𑌚𑌾𑌸𑍍𑌯𑌾𑌂 𑌗𑌤𑌿𑌂 𑌚𑌾𑌪𑌿 𑌹𑌨𑌿𑌷𑍍𑌯𑌾𑌮𑍀𑌤𑌿 𑌮𑍇 𑌮𑌤𑌿𑌃 ॥ 12 ॥
𑌏𑌵𑌂 𑌬𑍍𑌰𑍁𑌵𑌾𑌣𑍇 𑌰𑌾𑌮𑍇 𑌤𑍁 𑌤𑌾𑌟𑌕𑌾 𑌕𑍍𑌰𑍋𑌧𑌮𑍂𑌰𑍍𑌛𑌿𑌤𑌾 ।
𑌉𑌦𑍍𑌯𑌮𑍍𑌯 𑌬𑌾𑌹𑍂 𑌗𑌰𑍍𑌜𑌂𑌤𑍀 𑌰𑌾𑌮𑌮𑍇𑌵𑌾𑌭𑍍𑌯𑌧𑌾𑌵𑌤 ॥ 13 ॥
𑌵𑌿𑌶𑍍𑌵𑌾𑌮𑌿𑌤𑍍𑌰𑌸𑍍𑌤𑍁 𑌬𑍍𑌰𑌹𑍍𑌮𑌰𑍍𑌷𑌿𑌰𑍍𑌹𑍁𑌂𑌕𑌾𑌰𑍇𑌣𑌾𑌭𑌿𑌭𑌰𑍍𑌤𑍍𑌸𑍍𑌯𑌤𑌾𑌮𑍍 ।
𑌸𑍍𑌵𑌸𑍍𑌤𑌿 𑌰𑌾𑌘𑌵𑌯𑍋𑌰𑌸𑍍𑌤𑍁 𑌜𑌯𑌂 𑌚𑍈𑌵𑌾𑌭𑍍𑌯𑌭𑌾𑌷𑌤 ॥ 14 ॥
𑌉𑌦𑍍𑌧𑍂𑌨𑍍𑌵𑌾𑌨𑌾 𑌰𑌜𑍋 𑌘𑍋𑌰𑌂 𑌤𑌾𑌟𑌕𑌾 𑌰𑌾𑌘𑌵𑌾𑌵𑍁𑌭𑍌 ।
𑌰𑌜𑍋𑌮𑍋𑌹𑍇𑌨 𑌮𑌹𑌤𑌾 𑌮𑍁𑌹𑍂𑌰𑍍𑌤𑌂 𑌸𑌾 𑌵𑍍𑌯𑌮𑍋𑌹𑌯𑌤𑍍 ॥ 15 ॥
𑌤𑌤𑍋 𑌮𑌾𑌯𑌾𑌂 𑌸𑌮𑌾𑌸𑍍𑌥𑌾𑌯 𑌶𑌿𑌲𑌾𑌵𑌰𑍍𑌷𑍇𑌣 𑌰𑌾𑌘𑌵𑍌 ।
𑌅𑌵𑌾𑌕𑌿𑌰𑌤𑍍𑌸𑍁𑌮𑌹𑌤𑌾 𑌤𑌤𑌶𑍍𑌚𑍁𑌕𑍍𑌰𑍋𑌧 𑌰𑌾𑌘𑌵𑌃 ॥ 16 ॥
𑌶𑌿𑌲𑌾𑌵𑌰𑍍𑌷𑌂 𑌮𑌹𑌤𑍍𑌤𑌸𑍍𑌯𑌾𑌶𑍍𑌶𑌰𑌵𑌰𑍍𑌷𑍇𑌣 𑌰𑌾𑌘𑌵𑌃 ।
𑌪𑍍𑌰𑌤𑌿𑌹𑌤𑍍𑌯𑍋𑌪𑌧𑌾𑌵𑌂𑌤𑍍𑌯𑌾𑌃 𑌕𑌰𑍌 𑌚𑌿𑌚𑍍𑌛𑍇𑌦 𑌪𑌤𑍍𑌰𑌿𑌭𑌿𑌃 ॥ 1 ॥
𑌤𑌤𑌶𑍍𑌛𑌿𑌨𑍍𑌨𑌭𑍁𑌜𑌾𑌂 𑌶𑍍𑌰𑌾𑌂𑌤𑌾𑌮𑌭𑍍𑌯𑌾𑌶𑍇 𑌪𑌰𑌿𑌗𑌰𑍍𑌜𑌤𑍀𑌮𑍍 ।
𑌸𑍌𑌮𑌿𑌤𑍍𑌰𑌿𑌰𑌕𑌰𑍋𑌤𑍍𑌕𑍍𑌰𑍋𑌧𑌾𑌦𑍍𑌧𑍃𑌤𑌕𑌰𑍍𑌣𑌾𑌗𑍍𑌰𑌨𑌾𑌸𑌿𑌕𑌾𑌮𑍍 ॥ 1 ॥
𑌕𑌾𑌮𑌰𑍂𑌪𑌧𑌰𑌾 𑌸𑌦𑍍𑌯𑌃 𑌕𑍃𑌤𑍍𑌵𑌾 𑌰𑍂𑌪𑌾𑌣𑍍𑌯𑌨𑍇𑌕𑌶𑌃 ।
𑌅𑌂𑌤𑌰𑍍𑌧𑌾𑌨𑌂 𑌗𑌤𑌾 𑌯𑌕𑍍𑌷𑍀 𑌮𑍋𑌹𑌯𑌂𑌤𑍀𑌵 𑌮𑌾𑌯𑌯𑌾 ॥ 1 ॥
𑌅𑌶𑍍𑌮𑌵𑌰𑍍𑌷𑌂 𑌵𑌿𑌮𑍁𑌂𑌚𑌂𑌤𑍀 𑌭𑍈𑌰𑌵𑌂 𑌵𑌿𑌚𑌚𑌾𑌰 𑌹 ।
𑌤𑌤𑌸𑍍𑌤𑌾𑌵𑌶𑍍𑌮𑌵𑌰𑍍𑌷𑍇𑌣 𑌕𑍀𑌰𑍍𑌯𑌮𑌾𑌣𑍌 𑌸𑌮𑌂𑌤𑌤𑌃 ॥ 20 ॥
𑌦𑍃𑌷𑍍𑌟𑍍𑌵𑌾 𑌗𑌾𑌧𑌿𑌸𑍁𑌤𑌶𑍍𑌶𑍍𑌰𑍀𑌮𑌾𑌨𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ।
𑌅𑌲𑌂 𑌤𑍇 𑌘𑍃𑌣𑌯𑌾 𑌰𑌾𑌮 𑌪𑌾𑌪𑍈𑌷𑌾 𑌦𑍁𑌷𑍍𑌟𑌚𑌾𑌰𑌿𑌣𑍀 ॥ 21 ॥
𑌯𑌜𑍍𑌞𑌵𑌿𑌘𑍍𑌨𑌕𑌰𑍀 𑌯𑌕𑍍𑌷𑍀 𑌪𑍁𑌰𑌾𑌵𑌰𑍍𑌧𑌤𑌿 𑌮𑌾𑌯𑌯𑌾 ।
𑌵𑌧𑍍𑌯𑌤𑌾𑌂 𑌤𑌾𑌵𑌦𑍇𑌵𑍈𑌷𑌾 𑌪𑍁𑌰𑌾 𑌸𑌂𑌧𑍍𑌯𑌾 𑌪𑍍𑌰𑌵𑌰𑍍𑌤𑌤𑍇 ॥ 22 ॥
𑌰𑌕𑍍𑌷𑌾𑌂𑌸𑌿 𑌸𑌂𑌧𑍍𑌯𑌾𑌕𑌾𑌲𑍇𑌷𑍁 𑌦𑍁𑌰𑍍𑌧𑌰𑍍𑌷𑌾𑌣𑌿 𑌭𑌵𑌂𑌤𑌿 𑌵𑍈 ।
𑌇𑌤𑍍𑌯𑍁𑌕𑍍𑌤𑌸𑍍𑌤𑍁 𑌤𑌦𑌾 𑌯𑌕𑍍𑌷𑍀 𑌅𑌶𑍍𑌮𑌵𑍃𑌷𑍍𑌟𑍍𑌯𑌾𑌭𑌿𑌵𑌰𑍍𑌷𑌤𑍀𑌮𑍍 ॥ 23 ॥
𑌦𑌰𑍍𑌶𑌯𑌨𑍍 𑌶𑌬𑍍𑌦𑌵𑍇𑌧𑌿𑌤𑍍𑌵𑌂 𑌤𑌾𑌂 𑌰𑍁𑌰𑍋𑌧 𑌸 𑌸𑌾𑌯𑌕𑍈𑌃 ।
𑌸𑌾 𑌰𑍁𑌦𑍍𑌧𑌾 𑌶𑌰𑌜𑌾𑌲𑍇𑌨 𑌮𑌾𑌯𑌾𑌬𑌲𑌸𑌮𑌨𑍍𑌵𑌿𑌤𑌾 ॥ 24 ॥
𑌅𑌭𑌿𑌦𑍁𑌦𑍍𑌰𑌾𑌵 𑌕𑌾𑌕𑍁𑌤𑍍𑌸𑍍𑌥𑌂 𑌲𑌕𑍍𑌷𑍍𑌮𑌣𑌂 𑌚 𑌵𑌿𑌨𑍇𑌦𑍁𑌷𑍀 ।
𑌤𑌾𑌮𑌾𑌪𑌤𑌂𑌤𑍀𑌂 𑌵𑍇𑌗𑍇𑌨 𑌵𑌿𑌕𑍍𑌰𑌾𑌂𑌤𑌾𑌮𑌶𑌨𑍀𑌮𑌿𑌵 ॥ 25 ॥
𑌶𑌰𑍇𑌣𑍋𑌰𑌸𑌿 𑌵𑌿𑌵𑍍𑌯𑌾𑌥 𑌸𑌾 𑌪𑌪𑌾𑌤 𑌮𑌮𑌾𑌰 𑌚 ।
𑌤𑌾𑌂 𑌹𑌤𑌾𑌂 𑌭𑍀𑌮𑌸𑌂𑌕𑌾𑌶𑌾𑌂 𑌦𑍃𑌷𑍍𑌟𑍍𑌵𑌾 𑌸𑍁𑌰𑌪𑌤𑌿𑌸𑍍𑌤𑌦𑌾 ॥ 26 ॥
𑌸𑌾𑌧𑍁 𑌸𑌾𑌧𑍍𑌵𑌿𑌤𑌿 𑌕𑌾𑌕𑍁𑌤𑍍𑌸𑍍𑌥𑌂 𑌸𑍁𑌰𑌾𑌶𑍍𑌚 𑌸𑌮𑌪𑍂𑌜𑌯𑌨𑍍 ।
𑌉𑌵𑌾𑌚 𑌪𑌰𑌮𑌪𑍍𑌰𑍀𑌤 𑌸𑍍𑌸𑌹𑌸𑍍𑌰𑌾𑌕𑍍𑌷𑌃 𑌪𑍁𑌰𑌂𑌦𑌰𑌃 ॥ 2 ॥
𑌸𑍁𑌰𑌾𑌶𑍍𑌚 𑌸𑌰𑍍𑌵𑍇 𑌸𑌂𑌹𑍃𑌷𑍍𑌟𑌾 𑌵𑌿𑌶𑍍𑌵𑌾𑌮𑌿𑌤𑍍𑌰𑌮𑌥𑌾𑌬𑍍𑌰𑍁𑌵𑌨𑍍 ।
𑌮𑍁𑌨𑍇 𑌕𑍌𑌶𑌿𑌕 𑌭𑌦𑍍𑌰𑌂 𑌤𑍇 𑌸𑍇𑌂𑌦𑍍𑌰𑌾𑌸𑍍𑌸𑌰𑍍𑌵𑍇 𑌮𑌰𑍁𑌦𑍍𑌗𑌣𑌾𑌃 ॥ 2 ॥
𑌤𑍋𑌷𑌿𑌤𑌾𑌃 𑌕𑌰𑍍𑌮𑌣𑌾𑌽𑌨𑍇𑌨 𑌸𑍍𑌨𑍇𑌹𑌂 𑌦𑌰𑍍𑌶𑌯 𑌰𑌾𑌘𑌵𑍇 ।
𑌪𑍍𑌰𑌜𑌾𑌪𑌤𑍇𑌰𑍍𑌭𑍃𑌶𑌾𑌶𑍍𑌵𑌸𑍍𑌯 𑌪𑍁𑌤𑍍𑌰𑌾𑌨𑍍 𑌸𑌤𑍍𑌯𑌪𑌰𑌾𑌕𑍍𑌰𑌮𑌾𑌨𑍍 ॥ 2 ॥
𑌤𑌪𑍋𑌬𑌲𑌭𑍃𑌤𑍋 𑌬𑍍𑌰𑌹𑍍𑌮𑌨𑍍 𑌰𑌾𑌘𑌵𑌾𑌯 𑌨𑌿𑌵𑍇𑌦𑌯 ।
𑌪𑌾𑌤𑍍𑌰𑌭𑍂𑌤𑌶𑍍𑌚 𑌤𑍇 𑌬𑍍𑌰𑌹𑍍𑌮𑌂𑌸𑍍𑌤𑌵𑌾𑌨𑍁𑌗𑌮𑌨𑍇 𑌧𑍃𑌤𑌃 ॥ 30 ॥
𑌕𑌰𑍍𑌤𑌵𑍍𑌯𑌂 𑌚 𑌮𑌹𑌤𑍍𑌕𑌰𑍍𑌮 𑌸𑍁𑌰𑌾𑌣𑌾𑌂 𑌰𑌾𑌜𑌸𑍂𑌨𑍁𑌨𑌾 ।
𑌏𑌵𑌮𑍁𑌕𑍍𑌤𑍍𑌵𑌾 𑌸𑍁𑌰𑌾𑌸𑍍𑌸𑌰𑍍𑌵𑍇 𑌹𑍃𑌷𑍍𑌟𑌾 𑌜𑌗𑍍𑌮𑍁𑌰𑍍𑌯𑌥𑌾𑌗𑌤𑌮𑍍 ॥ 31 ॥
𑌵𑌿𑌶𑍍𑌵𑌾𑌮𑌿𑌤𑍍𑌰𑌂 𑌪𑍁𑌰𑌸𑍍𑌕𑍃𑌤𑍍𑌯 𑌤𑌤𑌸𑍍𑌸𑌂𑌧𑍍𑌯𑌾 𑌪𑍍𑌰𑌵𑌰𑍍𑌤𑌤𑍇 ।
𑌤𑌤𑍋 𑌮𑍁𑌨𑌿𑌵𑌰𑌃 𑌪𑍍𑌰𑍀𑌤𑌸𑍍𑌤𑌾𑌟𑌕𑌾𑌵𑌧𑌤𑍋𑌷𑌿𑌤𑌃 ॥ 32 ॥
𑌮𑍂𑌰𑍍𑌧𑍍𑌨𑌿 𑌰𑌾𑌮𑌮𑍁𑌪𑌾𑌘𑍍𑌰𑌾𑌯 𑌇𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ।
𑌇𑌹𑌾𑌦𑍍𑌯 𑌰𑌜𑌨𑍀𑌂 𑌰𑌾𑌮 𑌵𑌸𑍇𑌮 𑌶𑍁𑌭𑌦𑌰𑍍𑌶𑌨 ॥ 33 ॥
𑌶𑍍𑌵𑌃 𑌪𑍍𑌰𑌭𑌾𑌤𑍇 𑌗𑌮𑌿𑌷𑍍𑌯𑌾𑌮𑌸𑍍𑌤𑌦𑌾𑌶𑍍𑌰𑌮𑌪𑌦𑌂 𑌮𑌮 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑌵𑌚𑌃 𑌶𑍍𑌰𑍁𑌤𑍍𑌵𑌾 𑌹𑍃𑌷𑍍𑌟𑍋 𑌦𑌶𑌰𑌥𑌾𑌤𑍍𑌮𑌜𑌃 ॥ 34 ॥
𑌉𑌵𑌾𑌸 𑌰𑌜𑌨𑍀𑌂 𑌤𑌤𑍍𑌰 𑌤𑌾𑌟𑌕𑌾𑌯𑌾 𑌵𑌨𑍇 𑌸𑍁𑌖𑌮𑍍 ।
𑌮𑍁𑌕𑍍𑌤𑌶𑌾𑌪𑌂 𑌵𑌨𑌂 𑌤𑌚𑍍𑌚 𑌤𑌸𑍍𑌮𑌿𑌨𑍍𑌨𑍇𑌵 𑌤𑌦𑌾𑌹𑌨𑌿 ॥ 35 ॥
𑌰𑌮𑌣𑍀𑌯𑌂 𑌵𑌿𑌬𑌭𑍍𑌰𑌾𑌜 𑌯𑌥𑌾 𑌚𑍈𑌤𑍍𑌰𑌰𑌥𑌂 𑌵𑌨𑌮𑍍 ।
𑌨𑌿𑌹𑌤𑍍𑌯 𑌤𑌾𑌂 𑌯𑌕𑍍𑌷𑌸𑍁𑌤𑌾𑌂 𑌸 𑌰𑌾𑌮𑌃 𑌪𑍍𑌰𑌶𑌸𑍍𑌯𑌮𑌾𑌨𑌸𑍍𑌸𑍁𑌰𑌸𑌿𑌦𑍍𑌧𑌸𑌂𑌘𑍈𑌃 ।
𑌉𑌵𑌾𑌸 𑌤𑌸𑍍𑌮𑌿𑌨𑍍𑌮𑍁𑌨𑌿𑌨𑌾 𑌸𑌹𑍈𑌵 𑌪𑍍𑌰𑌭𑌾𑌤𑌵𑍇𑌲𑌾𑌂 𑌪𑍍𑌰𑌤𑌿𑌬𑍋𑌧𑍍𑌯𑌮𑌾𑌨𑌃 ॥ 36 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌷𑌡𑍍𑌵𑌿𑌂𑌶𑌸𑍍𑌸𑌰𑍍𑌗𑌃 ॥
