𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌪𑍍𑌰𑌤𑌿𑌗𑍃𑌹𑍍𑌯 𑌚 𑌤𑌤𑍍𑌸𑌰𑍍𑌵𑌮𑍁𑌪𑌾𑌯𑌨𑌮𑍁𑌪𑌾𑌹𑍃𑌤𑌮𑍍 ।
𑌵𑌾𑌨𑌰𑌾𑌨𑍍𑌸𑌾𑌂𑌤𑍍𑌵𑌯𑌿𑌤𑍍𑌵𑌾 𑌚 𑌸𑌰𑍍𑌵𑌾𑌨𑍇𑌵 𑌵𑍍𑌯𑌸𑌰𑍍𑌜𑌯𑌤𑍍 ॥ 1 ॥
𑌵𑌿𑌸𑌰𑍍𑌜𑌯𑌿𑌤𑍍𑌵𑌾 𑌸 𑌹𑌰𑍀𑌨𑍍 𑌶𑍂𑌰𑌾𑌂𑌸𑍍𑌤𑌾𑌨𑍍𑌕𑍃𑌤𑌕𑌰𑍍𑌮𑌣𑌃 ।
𑌮𑍇𑌨𑍇 𑌕𑍃𑌤𑌾𑌰𑍍𑌥𑌮𑌾𑌤𑍍𑌮𑌾𑌨𑌂 𑌰𑌾𑌘𑌵𑌂 𑌚 𑌮𑌹𑌾𑌬𑌲𑌮𑍍 ॥ 2 ॥
𑌸 𑌲𑌕𑍍𑌷𑍍𑌮𑌣𑍋 𑌭𑍀𑌮𑌬𑌲𑌂 𑌸𑌰𑍍𑌵𑌵𑌾𑌨𑌰𑌸𑌤𑍍𑌤𑌮𑌮𑍍 ।
𑌅𑌬𑍍𑌰𑌵𑍀𑌤𑍍𑌪𑍍𑌰𑌶𑍍𑌰𑌿𑌤𑌂 𑌵𑌾𑌕𑍍𑌯𑌂 𑌸𑍁𑌗𑍍𑌰𑍀𑌵𑌂 𑌸𑌂𑌪𑍍𑌰𑌹𑌰𑍍𑌷𑌯𑌨𑍍 ॥ 3 ॥
𑌕𑌿𑌷𑍍𑌕𑌿𑌂𑌧𑌾𑌯𑌾 𑌵𑌿𑌨𑌿𑌷𑍍𑌕𑍍𑌰𑌾𑌮 𑌯𑌦𑌿 𑌤𑍇 𑌸𑍌𑌮𑍍𑌯 𑌰𑍋𑌚𑌤𑍇 ।
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌲𑌕𑍍𑌷𑍍𑌮𑌣𑌸𑍍𑌯 𑌸𑍁𑌭𑌾𑌷𑌿𑌤𑌮𑍍 ॥ 4 ॥
𑌸𑍁𑌗𑍍𑌰𑍀𑌵𑌃 𑌪𑌰𑌮𑌪𑍍𑌰𑍀𑌤𑍋 𑌵𑌾𑌕𑍍𑌯𑌮𑍇𑌤𑌦𑍁𑌵𑌾𑌚 𑌹 ।
𑌏𑌵𑌂 𑌭𑌵𑌤𑍁 𑌗𑌚𑍍𑌛𑌾𑌵𑌃 𑌸𑍍𑌥𑍇𑌯𑌂 𑌤𑍍𑌵𑌚𑍍𑌛𑌾𑌸𑌨𑍇 𑌮𑌯𑌾 ॥ 5 ॥
𑌤𑌮𑍇𑌵𑌮𑍁𑌕𑍍𑌤𑍍𑌵𑌾 𑌸𑍁𑌗𑍍𑌰𑍀𑌵𑍋 𑌲𑌕𑍍𑌷𑍍𑌮𑌣𑌂 𑌶𑍁𑌭𑌲𑌕𑍍𑌷𑌣𑌮𑍍 ।
𑌵𑌿𑌸𑌰𑍍𑌜𑌯𑌾𑌮𑌾𑌸 𑌤𑌦𑌾 𑌤𑌾𑌰𑌾𑌮𑌨𑍍𑌯𑌾𑌶𑍍𑌚 𑌯𑍋𑌷𑌿𑌤𑌃 ॥ 6 ॥
𑌏𑌤𑍇𑌤𑍍𑌯𑍁𑌚𑍍𑌚𑍈𑌰𑍍𑌹𑌰𑌿𑌵𑌰𑌾𑌨𑍍𑌸𑍁𑌗𑍍𑌰𑍀𑌵𑌸𑍍𑌸𑌮𑍁𑌦𑌾𑌹𑌰𑌤𑍍 ।
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌹𑌰𑌯𑌶𑍍𑌶𑍀𑌘𑍍𑌰𑌮𑌾𑌯𑌯𑍁𑌃 ॥ ॥
𑌬𑌦𑍍𑌧𑌾𑌂𑌜𑌲𑌿𑌪𑍁𑌟𑌾𑌸𑍍𑌸𑌰𑍍𑌵𑍇 𑌯𑍇 𑌸𑍍𑌯𑍁𑌃 𑌸𑍍𑌤𑍍𑌰𑍀𑌦𑌰𑍍𑌶𑌨𑌕𑍍𑌷𑌮𑌾𑌃 ।
𑌤𑌾𑌨𑍁𑌵𑌾𑌚 𑌤𑌤𑌃 𑌪𑍍𑌰𑌾𑌪𑍍𑌤𑌾𑌨𑍍𑌰𑌾𑌜𑌾𑌽𑌰𑍍𑌕𑌸𑌦𑍃𑌶𑌪𑍍𑌰𑌭𑌃 ॥ ॥
𑌉𑌪𑌸𑍍𑌥𑌾𑌪𑌯𑌤 𑌕𑍍𑌷𑌿𑌪𑍍𑌰𑌂 𑌶𑌿𑌬𑌿𑌕𑌾𑌂 𑌮𑌮 𑌵𑌾𑌨𑌰𑌾𑌃 ।
𑌶𑍍𑌰𑍁𑌤𑍍𑌵𑌾 𑌤𑍁 𑌵𑌚𑌨𑌂 𑌤𑌸𑍍𑌯 𑌹𑌰𑌯𑌶𑍍𑌶𑍀𑌘𑍍𑌰𑌵𑌿𑌕𑍍𑌰𑌮𑌾𑌃 ॥ ॥
𑌸𑌮𑍁𑌪𑌸𑍍𑌥𑌾𑌪𑌯𑌾𑌮𑌾𑌸𑍁𑌶𑍍𑌶𑌿𑌬𑌿𑌕𑌾𑌂 𑌪𑍍𑌰𑌿𑌯𑌦𑌰𑍍𑌶𑌨𑌾𑌮𑍍 ।
𑌤𑌾𑌮𑍁𑌪𑌸𑍍𑌥𑌾𑌪𑌿𑌤𑌾𑌂 𑌦𑍃𑌷𑍍𑌟𑍍𑌵𑌾 𑌶𑌿𑌬𑌿𑌕𑌾𑌂 𑌵𑌾𑌨𑌰𑌾𑌧𑌿𑌪𑌃 ॥ 10 ॥
𑌲𑌕𑍍𑌷𑍍𑌮𑌣𑌾𑌽𑌰𑍁𑌹𑍍𑌯𑌤𑌾𑌂 𑌶𑍀𑌘𑍍𑌰𑌮𑌿𑌤𑌿 𑌸𑍌𑌮𑌿𑌤𑍍𑌰𑌿𑌮𑌬𑍍𑌰𑌵𑍀𑌤𑍍 ।
𑌇𑌤𑍍𑌯𑍁𑌕𑍍𑌤𑍍𑌵𑌾 𑌕𑌾𑌂𑌚𑌨𑌂 𑌯𑌾𑌨𑌂 𑌸𑍁𑌗𑍍𑌰𑍀𑌵𑌸𑍍𑌸𑍂𑌰𑍍𑌯𑌸𑌨𑍍𑌨𑌿𑌭𑌮𑍍 ॥ 11 ॥
𑌬𑍃𑌹𑌦𑍍𑌭𑌿𑌰𑍍𑌹𑌰𑌿𑌭𑌿𑌰𑍍𑌯𑍁𑌕𑍍𑌤𑌮𑌾𑌰𑍁𑌰𑍋𑌹 𑌸𑌲𑌕𑍍𑌷𑍍𑌮𑌣𑌃 ।
𑌪𑌾𑌂𑌡𑍁𑌰𑍇𑌣𑌾𑌤𑌪𑌤𑍍𑌰𑍇𑌣 𑌮𑍍𑌰𑌿𑌯𑌮𑌾𑌣𑍇𑌨 𑌮𑍂𑌰𑍍𑌧𑌨𑌿 ॥ 12 ॥
𑌶𑍁𑌕𑍍𑌲𑍈𑌶𑍍𑌚 𑌵𑌾𑌲𑌵𑍍𑌯𑌜𑌨𑍈𑌰𑍍𑌧𑍂𑌯𑌮𑌾𑌨𑍈𑌸𑍍𑌸𑌮𑌂𑌤𑌤𑌃 ।
𑌶𑌂𑌖𑌭𑍇𑌰𑍀𑌨𑌿𑌨𑌾𑌦𑍈𑌶𑍍𑌚 𑌹𑌰𑌿𑌭𑌿𑌶𑍍𑌚𑌾𑌭𑌿𑌵𑌂𑌦𑌿𑌤𑌃 ॥ 13 ॥
𑌨𑌿𑌰𑍍𑌯𑌯𑍌 𑌪𑍍𑌰𑌾𑌪𑍍𑌯 𑌸𑍁𑌗𑍍𑌰𑍀𑌵𑍋 𑌰𑌾𑌜𑍍𑌯𑌶𑍍𑌰𑌿𑌯𑌮𑌨𑍁𑌤𑍍𑌤𑌮𑌾𑌮𑍍 ।
𑌸 𑌵𑌾𑌨𑌰𑌶𑌤𑍈𑌸𑍍𑌤𑍀𑌕𑍍𑌷𑍍𑌣𑍈𑌰𑍍𑌬𑌹𑍁𑌭𑌿 𑌶𑍍𑌶𑌸𑍍𑌤𑍍𑌰𑌪𑌾𑌣𑌿𑌭𑌿𑌃 ॥ 14 ॥
𑌪𑌰𑌿𑌕𑍀𑌰𑍍𑌣𑍋 𑌯𑌯𑍌 𑌤𑌤𑍍𑌰 𑌯𑌤𑍍𑌰 𑌰𑌾𑌮𑍋 𑌵𑍍𑌯𑌵𑌸𑍍𑌥𑌿𑌤𑌃 ।
𑌸 𑌤𑌂 𑌦𑍇𑌶𑌮𑌨𑍁𑌪𑍍𑌰𑌾𑌪𑍍𑌯 𑌶𑍍𑌰𑍇𑌷𑍍𑌠𑌂 𑌰𑌾𑌮𑌨𑌿𑌷𑍇𑌵𑌿𑌤𑌮𑍍 ॥ 15 ॥
𑌅𑌵𑌾𑌤𑌰𑌨𑍍𑌮𑌹𑌾𑌤𑍇𑌜𑌾 𑌶𑍍𑌶𑌿𑌬𑌿𑌕𑌾𑌯𑌾𑌸𑍍𑌸𑌲𑌕𑍍𑌷𑍍𑌮𑌣𑌃 ।
𑌆𑌸𑌾𑌦𑍍𑌯 𑌚 𑌤𑌤𑍋 𑌰𑌾𑌮𑌂 𑌕𑍃𑌤𑌾𑌂𑌜𑌲𑌿𑌪𑍁𑌟𑍋𑌽𑌭𑌵𑌤𑍍 ॥ 16 ॥
𑌕𑍃𑌤𑌾𑌂𑌜𑌲𑍌 𑌸𑍍𑌥𑌿𑌤𑍇 𑌤𑌸𑍍𑌮𑌿𑌨𑍍𑌵𑌾𑌨𑌰𑌾𑌶𑍍𑌚𑌾𑌭𑌵𑌂𑌸𑍍𑌤𑌥𑌾 ।
𑌤𑌟𑌾𑌕𑌮𑌿𑌵 𑌤𑌂 𑌦𑍃𑌷𑍍𑌟𑍍𑌵𑌾 𑌰𑌾𑌮𑌃 𑌕𑍁𑌡𑍍𑌮𑌲𑌪𑌂𑌕𑌜𑌮𑍍 ॥ 1 ॥
𑌵𑌾𑌨𑌰𑌾𑌣𑌾𑌂 𑌮𑌹𑌤𑍍𑌸𑍈𑌨𑍍𑌯𑌂 𑌸𑍁𑌗𑍍𑌰𑍀𑌵𑍇 𑌪𑍍𑌰𑍀𑌤𑌿𑌮𑌾𑌨𑌭𑍂𑌤𑍍 ।
𑌪𑌾𑌦𑌯𑍋𑌃 𑌪𑌤𑌿𑌤𑌂 𑌮𑍂𑌰𑍍𑌧𑍍𑌨𑌾 𑌤𑌮𑍁𑌤𑍍𑌥𑌾𑌪𑍍𑌯 𑌹𑌰𑍀𑌶𑍍𑌵𑌰𑌮𑍍 ॥ 1 ॥
𑌪𑍍𑌰𑍇𑌮𑍍𑌣𑌾 𑌚 𑌬𑌹𑍁𑌮𑌾𑌨𑌾𑌚𑍍𑌚 𑌰𑌾𑌘𑌵𑌃 𑌪𑌰𑌿𑌷𑌸𑍍𑌵𑌜𑍇 ।
𑌪𑌰𑌿𑌷𑍍𑌵𑌜𑍍𑌯 𑌚 𑌧𑌰𑍍𑌮𑌾𑌤𑍍𑌮𑌾 𑌨𑌿𑌷𑍀𑌦𑍇𑌤𑌿 𑌤𑌤𑍋𑌽𑌬𑍍𑌰𑌵𑍀𑌤𑍍 ॥ 1 ॥
𑌨𑌿𑌷𑌣𑍍𑌣𑌂 𑌤𑌂 𑌤𑌤𑍋 𑌦𑍃𑌷𑍍𑌟𑍍𑌵𑌾 𑌕𑍍𑌷𑌿𑌤𑍌 𑌰𑌾𑌮𑍋𑌽𑌬𑍍𑌰𑌵𑍀𑌦𑍍𑌵𑌚𑌃 ।
𑌧𑌰𑍍𑌮𑌮𑌰𑍍𑌥𑌂 𑌚 𑌕𑌾𑌮𑌂 𑌚 𑌯𑌸𑍍𑌤𑍁 𑌕𑌾𑌲𑍇 𑌨𑌿𑌷𑍇𑌵𑌤𑍇 ॥ 20 ॥
𑌵𑌿𑌭𑌜𑍍𑌯 𑌸𑌤𑌤𑌂 𑌵𑍀𑌰 𑌸𑍍𑌸 𑌰𑌾𑌜𑌾 𑌹𑌰𑌿𑌸𑌤𑍍𑌤𑌮 ।
𑌹𑌿𑌤𑍍𑌵𑌾 𑌧𑌰𑍍𑌮𑌂 𑌤𑌥𑌾𑌽𑌰𑍍𑌥𑌂 𑌚 𑌕𑌾𑌮𑌂 𑌯𑌸𑍍𑌤𑍁 𑌨𑌿𑌷𑍇𑌵𑌤𑍇 ॥ 21 ॥
𑌸 𑌵𑍃𑌕𑍍𑌷𑌾𑌗𑍍𑌰𑍇 𑌯𑌥𑌾 𑌸𑍁𑌪𑍍𑌤𑌃 𑌪𑌤𑌿𑌤𑌃 𑌪𑍍𑌰𑌤𑌿𑌬𑍁𑌧𑍍𑌯𑌤𑍇 ।
𑌅𑌮𑌿𑌤𑍍𑌰𑌾𑌣𑌾𑌂 𑌵𑌧𑍇 𑌯𑍁𑌕𑍍𑌤𑍋 𑌮𑌿𑌤𑍍𑌰𑌾𑌣𑌾𑌂 𑌸𑌂𑌗𑍍𑌰𑌹𑍇 𑌰𑌤𑌃 ॥ 22 ॥
𑌤𑍍𑌰𑌿𑌵𑌰𑍍𑌗𑌫𑌲𑌭𑍋𑌕𑍍𑌤𑌾 𑌤𑍁 𑌰𑌾𑌜𑌾 𑌧𑌰𑍍𑌮𑍇𑌣 𑌯𑍁𑌜𑍍𑌯𑌤𑍇 ।
𑌉𑌦𑍍𑌯𑍋𑌗𑌸𑌮𑌯𑌸𑍍𑌤𑍍𑌵𑍇𑌷𑌪𑍍𑌰𑌾𑌪𑍍𑌤𑌶𑍍𑌶𑌤𑍍𑌰𑍁𑌵𑌿𑌨𑌾𑌶𑌨 ॥ 23 ॥
𑌸𑌂𑌚𑌿𑌂𑌤𑍍𑌯𑌤𑌾𑌂 𑌹𑌿 𑌪𑌿𑌂𑌗𑍇𑌶 𑌹𑌰𑌿𑌭𑌿𑌸𑍍𑌸𑌹 𑌮𑌂𑌤𑍍𑌰𑌿𑌭𑌿𑌃 ।
𑌏𑌵𑌮𑍁𑌕𑍍𑌤𑌸𑍍𑌤𑍁 𑌸𑍁𑌗𑍍𑌰𑍀𑌵𑍋 𑌰𑌾𑌮𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 24 ॥
𑌪𑍍𑌰𑌣𑌷𑍍𑌟𑌾 𑌶𑍍𑌰𑍀𑌶𑍍𑌚 𑌕𑍀𑌰𑍍𑌤𑌿𑌶𑍍𑌚 𑌕𑌪𑌿𑌰𑌾𑌜𑍍𑌯𑌂 𑌚 𑌶𑌾𑌶𑍍𑌵𑌤𑌮𑍍 ।
𑌤𑍍𑌵𑌤𑍍𑌪𑍍𑌰𑌸𑌾𑌦𑌾𑌨𑍍𑌮𑌹𑌾𑌬𑌾𑌹𑍋 𑌪𑍁𑌨𑌃𑌪𑍍𑌰𑌾𑌪𑍍𑌤𑌮𑌿𑌦𑌂 𑌮𑌯𑌾 ॥ 25 ॥
𑌤𑌵 𑌦𑍇𑌵 𑌪𑍍𑌰𑌸𑌾𑌦𑌾𑌚𑍍𑌚 𑌭𑍍𑌰𑌾𑌤𑍁𑌶𑍍𑌚 𑌜𑌯𑌤𑌾𑌂 𑌵𑌰 ।
𑌕𑍃𑌤𑌂 𑌨 𑌪𑍍𑌰𑌤𑌿𑌕𑍁𑌰𑍍𑌯𑌾𑌦𑍍𑌯𑌃 𑌪𑍁𑌰𑍁𑌷𑌾𑌣𑌾𑌂 𑌸 𑌦𑍂𑌷𑌕𑌃 ॥ 26 ॥
𑌏𑌤𑍇 𑌵𑌾𑌨𑌰𑌮𑍂𑌖𑍍𑌯𑌾𑌶𑍍𑌚 𑌶𑌤𑌶𑌶𑍍𑌶𑌤𑍍𑌰𑍁𑌸𑍂𑌦𑌨 ।
𑌪𑍍𑌰𑌾𑌪𑍍𑌤𑌾𑌶𑍍𑌚𑌾𑌦𑌾𑌯 𑌬𑌲𑌿𑌨𑌃 𑌪𑍃𑌥𑌿𑌵𑍍𑌯𑌾𑌂 𑌸𑌰𑍍𑌵𑌵𑌾𑌨𑌰𑌾𑌨𑍍 ॥ 2 ॥
𑌋𑌕𑍍𑌷𑌾𑌶𑍍𑌚𑌾𑌵𑌹𑌿𑌤𑌾𑌶𑍍𑌶𑍂𑌰𑌾 𑌗𑍋𑌲𑌾𑌂𑌗𑍂𑌲𑌾𑌶𑍍𑌚 𑌰𑌾𑌘𑌵 ।
𑌕𑌾𑌂𑌤𑌾𑌰𑌵𑌨𑌦𑍁𑌰𑍍𑌗𑌾𑌣𑌾𑌮𑌭𑌿𑌜𑍍𑌞𑌾 𑌘𑍋𑌰𑌦𑌰𑍍𑌶𑌨𑌾𑌃 ॥ 2 ॥
𑌦𑍇𑌵𑌗𑌂𑌧𑌰𑍍𑌵𑌪𑍁𑌤𑍍𑌰𑌾𑌶𑍍𑌚 𑌵𑌾𑌨𑌰𑌾𑌃 𑌕𑌾𑌮𑌰𑍂𑌪𑌿𑌣𑌃 ।
𑌸𑍍𑌵𑍈𑌸𑍍𑌸𑍍𑌵𑍈𑌃 𑌪𑌰𑌿𑌵𑍃𑌤𑌾𑌸𑍍𑌸𑍈𑌨𑍍𑌯𑍈𑌰𑍍𑌵𑌰𑍍𑌤𑌂𑌤𑍇 𑌪𑌥𑌿 𑌰𑌾𑌘𑌵 ॥ 2 ॥
𑌶𑌤𑍈𑌶𑍍𑌶𑌤𑌸𑌹𑌸𑍍𑌰𑍈𑌶𑍍𑌚 𑌵𑌰𑍍𑌤𑌂𑌤𑍇 𑌕𑍋𑌟𑌿𑌭𑌿𑌶𑍍𑌚 𑌪𑍍𑌲𑌵𑌂𑌗𑌮𑌾𑌃 ।
𑌅𑌯𑍁𑌤𑍈𑌶𑍍𑌚𑌾𑌵𑍃𑌤𑌾 𑌵𑍀𑌰𑌾𑌶𑍍𑌶𑌂𑌕𑍁𑌭𑌿𑌶𑍍𑌚 𑌪𑌰𑌂𑌤𑌪 ॥ 30 ॥
𑌅𑌰𑍍𑌬𑍁𑌦𑍈𑌰𑌰𑍍𑌬𑍁𑌦𑌶𑌤𑍈𑌰𑍍𑌮𑌧𑍍𑌯𑍈𑌶𑍍𑌚𑌾𑌂𑌤𑍍𑌯𑍈𑌶𑍍𑌚 𑌵𑌾𑌨𑌰𑌾𑌃 ।
𑌸𑌮𑍁𑌦𑍍𑌰𑍈𑌶𑍍𑌚 𑌪𑌰𑌾𑌰𑍍𑌧𑍈𑌶𑍍𑌚 𑌹𑌰𑌯𑍋 𑌹𑌰𑌿𑌯𑍂𑌥𑌪𑌾𑌃 ॥ 31 ॥
𑌆𑌗𑌮𑌿𑌷𑍍𑌯𑌂𑌤𑌿 𑌤𑍇 𑌰𑌾𑌜𑌨𑍍𑌮𑌹𑍇𑌂𑌦𑍍𑌰𑌸𑌮𑌵𑌿𑌕𑍍𑌰𑌮𑌾𑌃 ।
𑌮𑍇𑌰𑍁𑌮𑌂𑌦𑌰𑌸𑌂𑌕𑌾𑌶𑌾 𑌵𑌿𑌂𑌧𑍍𑌯 𑌮𑍇𑌰𑍁𑌕𑍃𑌤𑌾𑌲𑌯𑌾𑌃 ॥ 32 ॥
𑌤𑍇 𑌤𑍍𑌵𑌾𑌮𑌭𑌿𑌗𑌮𑌿𑌷𑍍𑌯𑌂𑌤𑌿 𑌰𑌾𑌕𑍍𑌷𑌸𑌂 𑌯𑍇 𑌸𑌬𑌾𑌂𑌧𑌵𑌮𑍍 ।
𑌨𑌿𑌹𑌤𑍍𑌯 𑌰𑌾𑌵𑌣𑌂 𑌸𑌖𑍍𑌯𑍇 𑌹𑍍𑌯𑌾𑌨𑌯𑌿𑌷𑍍𑌯𑌂𑌤𑌿 𑌮𑍈𑌥𑌿𑌲𑍀𑌮𑍍 ॥ 33 ॥
𑌤𑌤𑌸𑍍𑌤𑌮𑍁𑌦𑍍𑌯𑍋𑌗𑌮𑌵𑍇𑌕𑍍𑌷𑍍𑌯 𑌬𑍁𑌦𑍍𑌧𑌿𑌮𑌾 𑌨𑍍𑌹𑌰𑌿𑌪𑍍𑌰𑌵𑍀𑌰𑌸𑍍𑌯 𑌨𑌿𑌦𑍇𑌶𑌵𑌰𑍍𑌤𑌿𑌨𑌃 ।
𑌬𑌭𑍂𑌵 𑌹𑌰𑍍𑌷𑌾𑌦𑍍𑌵𑌸𑍁𑌧𑌾𑌧𑌿𑌪𑌾𑌤𑍍𑌮𑌜𑌃 𑌪𑍍𑌰𑌬𑍁𑌦𑍍𑌧𑌨𑍀𑌲𑍋𑌤𑍍𑌪𑌲𑌤𑍁𑌲𑍍𑌯𑌦𑌰𑍍𑌶𑌨𑌃 ॥ 34 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌅𑌷𑍍𑌟𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
