Meaning, Multimedia
View this in:
| English | Devanagari | Telugu | Tamil | Kannada | Malayalam | Gujarati | Odia | Bengali  |
| Marathi | Assamese | Punjabi | Hindi | Samskritam | Konkani | Nepali | Sinhala | Grantha  |

3.55 𑌅𑌰𑌣𑍍𑌯𑌕𑌾𑌂𑌡 - 𑌪𑌂𑌚𑌪𑌂𑌚𑌾𑌶 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।

𑌸𑌂𑌦𑌿𑌶𑍍𑌯 𑌰𑌾𑌕𑍍𑌷𑌸𑌾𑌨𑍍𑌘𑍋𑌰𑌾𑌨𑍍 𑌰𑌾𑌵𑌣𑍋𑌽𑌷𑍍𑌟𑍌 𑌮𑌹𑌾𑌬𑌲𑌾𑌨𑍍 ।
𑌆𑌤𑍍𑌮𑌾𑌨𑌂 𑌬𑍁𑌦𑍍𑌧𑌿𑌵𑍈𑌕𑍍𑌲𑌬𑍍𑌯𑌾𑌤𑍍𑌕𑍃𑌤𑌕𑍃𑌤𑍍𑌯𑌮𑌮𑌨𑍍𑌯𑌤 ॥ 1 ॥

𑌸 𑌚𑌿𑌂𑌤𑌯𑌾𑌨𑍋 𑌵𑍈𑌦𑍇𑌹𑍀𑌂 𑌕𑌾𑌮𑌬𑌾𑌣𑌸𑌮𑌰𑍍𑌪𑌿𑌤𑌃 ।
𑌪𑍍𑌰𑌵𑌿𑌵𑍇𑌶 𑌗𑍃𑌹𑌂 𑌰𑌮𑍍𑌯𑌂 𑌸𑍀𑌤𑌾𑌂 𑌦𑍍𑌰𑌷𑍍𑌟𑍁𑌮𑌭𑌿𑌤𑍍𑌵𑌰𑌨𑍍 ॥ 2 ॥

𑌸 𑌪𑍍𑌰𑌵𑌿𑌶𑍍𑌯 𑌤𑍁 𑌤𑌦𑍍𑌵𑍇𑌶𑍍𑌮 𑌰𑌾𑌵𑌣𑍋 𑌰𑌾𑌕𑍍𑌷𑌸𑌾𑌧𑌿𑌪𑌃 ।
𑌅𑌪𑌶𑍍𑌯𑌦𑍍𑌰𑌾𑌕𑍍𑌷𑌸𑍀𑌮𑌧𑍍𑌯𑍇 𑌸𑍀𑌤𑌾𑌂 𑌶𑍋𑌕𑌪𑌰𑌾𑌯𑌣𑌾𑌮𑍍 ॥ 3 ॥

𑌅𑌶𑍍𑌰𑍁𑌪𑍂𑌰𑍍𑌣𑌮𑍁𑌖𑍀𑌂 𑌦𑍀𑌨𑌾𑌂 𑌶𑍋𑌕𑌭𑌾𑌰𑌾𑌭𑌿𑌪𑍀𑌡𑌿𑌤𑌾𑌮𑍍 ।
𑌵𑌾𑌯𑍁𑌵𑍇𑌗𑍈𑌰𑌿𑌵𑌾𑌕𑍍𑌰𑌾𑌂𑌤𑌾𑌂 𑌮𑌜𑍍𑌜𑌂𑌤𑍀𑌂 𑌨𑌾𑌵𑌮𑌰𑍍𑌣𑌵𑍇 ॥ 4 ॥

𑌮𑍃𑌗𑌯𑍂𑌥𑌪𑌰𑌿𑌭𑍍𑌰𑌷𑍍𑌟𑌾𑌂 𑌮𑍃𑌗𑍀𑌂 𑌶𑍍𑌵𑌭𑌿𑌰𑌿𑌵𑌾𑌵𑍃𑌤𑌾𑌮𑍍 ।
𑌅𑌧𑍋𑌮𑍁𑌖𑌮𑍁𑌖𑍀𑌂 𑌸𑍀𑌤𑌾𑌮𑌭𑍍𑌯𑍇𑌤𑍍𑌯 𑌚 𑌨𑌿𑌶𑌾𑌚𑌰𑌃 ॥ 5 ॥

𑌤𑌾𑌂 𑌤𑍁 𑌶𑍋𑌕𑌪𑌰𑌾𑌂 𑌦𑍀𑌨𑌾𑌮𑌵𑌶𑌾𑌂 𑌰𑌾𑌕𑍍𑌷𑌸𑌾𑌧𑌿𑌪𑌃 ।
𑌸 𑌬𑌲𑌾𑌦𑍍𑌦𑌰𑍍𑌶𑌯𑌾𑌮𑌾𑌸 𑌗𑍃𑌹𑌂 𑌦𑍇𑌵𑌗𑍃𑌹𑍋𑌪𑌮𑌮𑍍 ॥ 6 ॥

𑌹𑌰𑍍𑌮𑍍𑌯𑌪𑍍𑌰𑌾𑌸𑌾𑌦𑌸𑌂𑌬𑌾𑌧𑌂 𑌸𑍍𑌤𑍍𑌰𑍀𑌸𑌹𑌸𑍍𑌰𑌨𑌿𑌷𑍇𑌵𑌿𑌤𑌮𑍍 ।
𑌨𑌾𑌨𑌾𑌪𑌕𑍍𑌷𑌿𑌗𑌣𑍈𑌰𑍍𑌜𑍁𑌷𑍍𑌟𑌂 𑌨𑌾𑌨𑌾𑌰𑌤𑍍𑌨𑌸𑌮𑌨𑍍𑌵𑌿𑌤𑌮𑍍 ॥ 𑍭 ॥

𑌦𑌾𑌂𑌤𑌕𑍈𑌸𑍍𑌤𑌾𑌪𑌨𑍀𑌯𑍈𑌶𑍍𑌚 𑌸𑍍𑌫𑌾𑌟𑌿𑌕𑍈 𑌰𑌾𑌜𑌤𑍈𑌰𑌪𑌿 ।
𑌵𑌜𑍍𑌰𑌵𑍈𑌡𑍂𑌰𑍍𑌯𑌚𑌿𑌤𑍍𑌰𑍈𑌶𑍍𑌚 𑌸𑍍𑌤𑌂𑌭𑍈𑌰𑍍𑌦𑍃𑌷𑍍𑌟𑌿𑌮𑌨𑍋𑌹𑌰𑍈𑌃 ॥ 𑍮 ॥

𑌦𑌿𑌵𑍍𑌯𑌦𑍁𑌂𑌦𑍁𑌭𑌿𑌨𑌿𑌰𑍍𑌹𑍍𑌰𑌾𑌦𑌂 𑌤𑌪𑍍𑌤𑌕𑌾𑌂𑌚𑌨𑌤𑍋𑌰𑌣𑌮𑍍 ।
𑌸𑍋𑌪𑌾𑌨𑌂 𑌕𑌾𑌂𑌚𑌨𑌂 𑌚𑌿𑌤𑍍𑌰𑌮𑌾𑌰𑍁𑌰𑍋𑌹 𑌤𑌯𑌾 𑌸𑌹 ॥ 𑍯 ॥

𑌦𑌾𑌂𑌤𑌕𑌾 𑌰𑌾𑌜𑌤𑌾𑌶𑍍𑌚𑍈𑌵 𑌗𑌵𑌾𑌕𑍍𑌷𑌾𑌃 𑌪𑍍𑌰𑌿𑌯𑌦𑌰𑍍𑌶𑌨𑌾𑌃 ।
𑌹𑍇𑌮𑌜𑌾𑌲𑌾𑌵𑌤𑌾𑌶𑍍𑌚𑌾𑌸𑌨𑍍𑌸𑍍𑌤𑌤𑍍𑌰 𑌪𑍍𑌰𑌾𑌸𑌾𑌦𑌪𑌂𑌕𑍍𑌤𑌯𑌃 ॥ 10 ॥

𑌸𑍁𑌧𑌾𑌮𑌣𑌿𑌵𑌿𑌚𑌿𑌤𑍍𑌰𑌾𑌣𑌿 𑌭𑍂𑌮𑌿𑌭𑌾𑌗𑌾𑌨𑌿 𑌸𑌰𑍍𑌵𑌶𑌃 ।
𑌦𑌶𑌗𑍍𑌰𑍀𑌵𑌸𑍍𑌸𑍍𑌵𑌭𑌵𑌨𑍇 𑌪𑍍𑌰𑌾𑌦𑌰𑍍𑌶𑌯𑌤 𑌮𑍈𑌥𑌿𑌲𑍀𑌮𑍍 ॥ 11 ॥

𑌦𑍀𑌰𑍍𑌘𑌿𑌕𑌾𑌃 𑌪𑍁𑌷𑍍𑌕𑌰𑌿𑌣𑍍𑌯𑌶𑍍𑌚 𑌨𑌾𑌨𑌾𑌵𑍃𑌕𑍍𑌷𑌸𑌮𑌨𑍍𑌵𑌿𑌤𑌾𑌃 ।
𑌰𑌾𑌵𑌣𑍋 𑌦𑌰𑍍𑌶𑌯𑌾𑌮𑌾𑌸 𑌸𑍀𑌤𑌾𑌂 𑌶𑍋𑌕𑌪𑌰𑌾𑌯𑌣𑌾𑌮𑍍 ॥ 12 ॥

𑌦𑌰𑍍𑌶𑌯𑌿𑌤𑍍𑌵𑌾 𑌤𑍁 𑌵𑍈𑌦𑍇𑌹𑍍𑌯𑌾𑌃 𑌕𑍃𑌤𑍍𑌸𑍍𑌨𑌂 𑌤𑌦𑍍𑌭𑌵𑌨𑍋𑌤𑍍𑌤𑌮𑌮𑍍 ।
𑌉𑌵𑌾𑌚 𑌵𑌾𑌕𑍍𑌯𑌂 𑌪𑌾𑌪𑌾𑌤𑍍𑌮𑌾 𑌸𑍀𑌤𑌾𑌂 𑌲𑍋𑌭𑌿𑌤𑍁𑌮𑌿𑌚𑍍𑌛𑌯𑌾 ॥ 13 ॥

𑌦𑌶 𑌰𑌾𑌕𑍍𑌷𑌸𑌕𑍋𑌟𑍍𑌯𑌶𑍍𑌚 𑌦𑍍𑌵𑌾𑌵𑌿𑌂𑌶𑌤𑌿𑌰𑌥𑌾𑌪𑌰𑌾𑌃 ।
𑌤𑍇𑌷𑌾𑌂 𑌪𑍍𑌰𑌭𑍁𑌰𑌹𑌂 𑌸𑍀𑌤𑍇 𑌸𑌰𑍍𑌵𑍇𑌷𑌾𑌂 𑌭𑍀𑌮𑌕𑌰𑍍𑌮𑌣𑌾𑌮𑍍 ॥ 14 ॥

𑌵𑌰𑍍𑌜𑌯𑌿𑌤𑍍𑌵𑌾 𑌜𑌰𑌾𑌵𑍃𑌦𑍍𑌧𑌾𑌨𑍍𑌬𑌾𑌲𑌾𑌂𑌶𑍍𑌚 𑌰𑌜𑌨𑍀𑌚𑌰𑌾𑌨𑍍 ।
𑌸𑌹𑌸𑍍𑌰𑌮𑍇𑌕𑌮𑍇𑌕𑌸𑍍𑌯 𑌮𑌮 𑌕𑌾𑌰𑍍𑌯𑌪𑍁𑌰𑌸𑍍𑌸𑌰𑌮𑍍 ॥ 15 ॥

𑌯𑌦𑌿𑌦𑌂 𑌰𑌾𑌜𑌤𑌂𑌤𑍍𑌰𑌂 𑌮𑍇 𑌤𑍍𑌵𑌯𑌿 𑌸𑌰𑍍𑌵𑌂 𑌪𑍍𑌰𑌤𑌿𑌷𑍍𑌠𑌿𑌤𑌮𑍍 ।
𑌜𑍀𑌵𑌿𑌤𑌂 𑌚 𑌵𑌿𑌶𑌾𑌲𑌾𑌕𑍍𑌷𑌿 𑌤𑍍𑌵𑌂 𑌮𑍇 𑌪𑍍𑌰𑌾𑌣𑍈𑌰𑍍𑌗𑌰𑍀𑌯𑌸𑍀 ॥ 16 ॥

𑌬𑌹𑍂𑌨𑌾𑌂𑌸𑍍𑌤𑍍𑌰𑍀𑌸𑌹𑌸𑍍𑌰𑌾𑌣𑌾𑌂 𑌮𑌮 𑌯𑍋𑌽𑌸𑍌 𑌪𑌰𑌿𑌗𑍍𑌰𑌹𑌃 ।
𑌤𑌾𑌸𑌾𑌂 𑌤𑍍𑌵𑌮𑍀𑌶𑍍𑌵𑌰𑌾 𑌸𑍀𑌤𑍇 𑌮𑌮 𑌭𑌾𑌰𑍍𑌯𑌾 𑌭𑌵 𑌪𑍍𑌰𑌿𑌯𑍇 ॥ 1𑍭 ॥

𑌸𑌾𑌧𑍁 𑌕𑌿𑌂 𑌤𑍇𑌽𑌨𑍍𑌯𑌯𑌾 𑌬𑍁𑌦𑍍𑌧𑍍𑌯𑌾 𑌰𑍋𑌚𑌯𑌸𑍍𑌵 𑌵𑌚𑍋 𑌮𑌮 ।
𑌭𑌜𑌸𑍍𑌵𑌮𑌾𑌭𑌿𑌤𑌪𑍍𑌤𑌸𑍍𑌯 𑌪𑍍𑌰𑌸𑌾𑌦𑌂 𑌕𑌰𑍍𑌤𑍁𑌮𑌰𑍍𑌹𑌸𑌿 ॥ 1𑍮 ॥

𑌪𑌰𑌿𑌕𑍍𑌷𑌿𑌪𑍍𑌤𑌾 𑌸𑌮𑍁𑌦𑍍𑌰𑍇𑌣 𑌲𑌂𑌕𑍇𑌯𑌂 𑌶𑌤𑌯𑍋𑌜𑌨𑌾 ।
𑌨𑍇𑌯𑌂 𑌧𑌰𑍍𑌷𑌯𑌿𑌤𑍁𑌂 𑌶𑌕𑍍𑌯𑌾 𑌸𑍇𑌂𑌦𑍍𑌰𑍈𑌰𑌪𑌿 𑌸𑍁𑌰𑌾𑌸𑍁𑌰𑍈𑌃 ॥ 1𑍯 ॥

𑌨 𑌦𑍇𑌵𑍇𑌷𑍁 𑌨 𑌯𑌕𑍍𑌷𑍇𑌷𑍁 𑌨 𑌗𑌂𑌧𑌰𑍍𑌵𑍇𑌷𑍁 𑌪𑌕𑍍𑌷𑌿𑌷𑍁 ।
𑌅𑌹𑌂 𑌪𑌶𑍍𑌯𑌾𑌮𑌿 𑌲𑍋𑌕𑍇𑌷𑍁 𑌯𑍋 𑌮𑍇 𑌵𑍀𑌰𑍍𑌯𑌸𑌮𑍋 𑌭𑌵𑍇𑌤𑍍 ॥ 20 ॥

𑌰𑌾𑌜𑍍𑌯𑌭𑍍𑌰𑌷𑍍𑌟𑍇𑌨 𑌦𑍀𑌨𑍇𑌨 𑌤𑌾𑌪𑌸𑍇𑌨 𑌗𑌤𑌾𑌯𑍁𑌷𑌾 ।
𑌕𑌿𑌂 𑌕𑌰𑌿𑌷𑍍𑌯𑌸𑌿 𑌰𑌾𑌮𑍇𑌣 𑌮𑌾𑌨𑍁𑌷𑍇𑌣𑌾𑌲𑍍𑌪𑌤𑍇𑌜𑌸𑌾 ॥ 21 ॥

𑌭𑌜𑌸𑍍𑌵 𑌸𑍀𑌤𑍇 𑌮𑌾𑌮𑍇𑌵 𑌭𑌰𑍍𑌤𑌾𑌹𑌂 𑌸𑌦𑍃𑌶𑌸𑍍𑌤𑌵 ।
𑌯𑍌𑌵𑌨𑌂 𑌹𑍍𑌯𑌧𑍍𑌰𑍁𑌵𑌂 𑌭𑍀𑌰𑍁 𑌰𑌮𑌸𑍍𑌵𑍇𑌹 𑌮𑌯𑌾 𑌸𑌹 ॥ 22 ॥

𑌦𑌰𑍍𑌶𑌨𑍇 𑌮𑌾𑌕𑍃𑌥𑌾 𑌬𑍁𑌦𑍍𑌧𑌿𑌂 𑌰𑌾𑌘𑌵𑌸𑍍𑌯 𑌵𑌰𑌾𑌨𑌨𑍇 ।
𑌕𑌾𑌸𑍍𑌯 𑌶𑌕𑍍𑌤𑌿𑌰𑌿𑌹𑌾𑌗𑌂𑌤𑍁𑌮𑌪𑌿 𑌸𑍀𑌤𑍇 𑌮𑌨𑍋𑌰𑌥𑍈𑌃 ॥ 23 ॥

𑌨 𑌶𑌕𑍍𑌯𑍋 𑌵𑌾𑌯𑍁𑌰𑌾𑌕𑌾𑌶𑍇 𑌪𑌾𑌶𑍈𑌰𑍍𑌬𑌦𑍍𑌧𑍁𑌂 𑌮𑌹𑌾𑌜𑌵𑌃 ।
𑌦𑍀𑌪𑍍𑌯𑌮𑌾𑌨𑌸𑍍𑌯 𑌵𑌾𑌪𑍍𑌯𑌗𑍍𑌨𑍇𑌰𑍍𑌗𑍃𑌹𑍀𑌤𑍁𑌂 𑌵𑌿𑌮𑌲𑌾𑌂 𑌶𑌿𑌖𑌾𑌮𑍍 ॥ 24 ॥

𑌤𑍍𑌰𑌯𑌾𑌣𑌾𑌮𑌪𑌿 𑌲𑍋𑌕𑌾𑌨𑌾𑌂 𑌨 𑌤𑌂 𑌪𑌶𑍍𑌯𑌾𑌮𑌿 𑌶𑍋𑌭𑌨𑍇 ।
𑌵𑌿𑌕𑍍𑌰𑌮𑍇𑌣 𑌨𑌯𑍇𑌦𑍍𑌯𑌸𑍍𑌤𑍍𑌵𑌾𑌂 𑌮𑌦𑍍𑌬𑌾𑌹𑍁𑌪𑌰𑌿𑌪𑌾𑌲𑌿𑌤𑌾𑌮𑍍 ॥ 25 ॥

𑌲𑌂𑌕𑌾𑌯𑌾𑌂 𑌸𑍁𑌮𑌹𑌦𑍍𑌰𑌾𑌜𑍍𑌯𑌮𑌿𑌦𑌂 𑌤𑍍𑌵𑌮𑌨𑍁𑌪𑌾𑌲𑌯 ।
𑌤𑍍𑌵𑌤𑍍𑌪𑍍𑌰𑍇𑌷𑍍𑌯𑌾 𑌮𑌦𑍍𑌵𑌿𑌧𑌾𑌶𑍍𑌚𑍈𑌵 𑌦𑍇𑌵𑌾𑌶𑍍𑌚𑌾𑌪𑌿 𑌚𑌰𑌾𑌚𑌰𑌾𑌃 ॥ 26 ॥

𑌅𑌭𑌿𑌷𑍇𑌕𑍋𑌦𑌕𑌕𑍍𑌲𑌿𑌨𑍍𑌨𑌾 𑌤𑍁𑌷𑍍𑌟𑌾 𑌚 𑌰𑌮𑌯𑌸𑍍𑌵 𑌮𑌾𑌮𑍍 ।
𑌦𑍁𑌷𑍍𑌕𑍃𑌤𑌂 𑌯𑌤𑍍𑌪𑌰𑌾 𑌕𑌰𑍍𑌮 𑌵𑌨𑌵𑌾𑌸𑍇𑌨 𑌤𑌦𑍍𑌗𑌤𑌮𑍍 ॥ 2𑍭 ॥

𑌯𑌶𑍍𑌚 𑌤𑍇 𑌸𑍁𑌕𑍃𑌤𑍋 𑌧𑌰𑍍𑌮𑌸𑍍𑌤𑌸𑍍𑌯𑍇𑌹 𑌫𑌲𑌮𑌾𑌪𑍍𑌨𑍁𑌹𑌿 ।
𑌇𑌹 𑌮𑌾𑌲𑍍𑌯𑌾𑌨𑌿 𑌸𑌰𑍍𑌵𑌾𑌣𑌿 𑌦𑌿𑌵𑍍𑌯𑌗𑌂𑌧𑌾𑌨𑌿 𑌮𑍈𑌥𑌿𑌲𑌿 ॥ 2𑍮 ॥

𑌭𑍂𑌷𑌣𑌾𑌨𑌿 𑌚 𑌮𑍁𑌖𑍍𑌯𑌾𑌨𑌿 𑌸𑍇𑌵𑌸𑍍𑌵 𑌚 𑌮𑌯𑌾 𑌸𑌹 ।
𑌪𑍁𑌷𑍍𑌪𑌕𑌂 𑌨𑌾𑌮 𑌸𑍁𑌶𑍍𑌰𑍋𑌣𑌿 𑌭𑍍𑌰𑌾𑌤𑍁𑌰𑍍𑌵𑍈𑌶𑍍𑌰𑌵𑌣𑌸𑍍𑌯 𑌮𑍇 ॥ 2𑍯 ॥

𑌵𑌿𑌮𑌾𑌨𑌂 𑌸𑍂𑌰𑍍𑌯𑌸𑌂𑌕𑌾𑌶𑌂 𑌤𑌰𑌸𑌾 𑌨𑌿𑌰𑍍𑌜𑌿𑌤𑌂 𑌮𑌯𑌾 ।
𑌵𑌿𑌶𑌾𑌲𑌂 𑌰𑌮𑌣𑍀𑌯𑌂 𑌚 𑌤𑌦𑍍𑌵𑌿𑌮𑌾𑌨𑌮𑌨𑍁𑌤𑍍𑌤𑌮𑍍 ॥ 30 ॥

𑌤𑌤𑍍𑌰 𑌸𑍀𑌤𑍇 𑌮𑌯𑌾 𑌸𑌾𑌰𑍍𑌧𑌂 𑌵𑌿𑌹𑌰𑌸𑍍𑌵 𑌯𑌥𑌾𑌸𑍁𑌖𑌮𑍍 ।
𑌵𑌦𑌨𑌂 𑌪𑌦𑍍𑌮𑌸𑌂𑌕𑌾𑌶𑌮𑌮𑌲𑌂 𑌚𑌾𑌰𑍁𑌦𑌰𑍍𑌶𑌨𑌮𑍍 ।
𑌶𑍋𑌕𑌾𑌰𑍍𑌤𑌂𑌤𑍁 𑌵𑌰𑌾𑌰𑍋𑌹𑍇 𑌨 𑌭𑍍𑌰𑌾𑌜𑌤𑌿 𑌵𑌰𑌾𑌨𑌨𑍇 ॥ 31 ॥

𑌏𑌵𑌂 𑌵𑌦𑌤𑌿 𑌤𑌸𑍍𑌮𑌿𑌤𑍍𑌸𑌾 𑌵𑌸𑍍𑌤𑍍𑌰𑌾𑌂𑌤𑍇𑌨 𑌵𑌰𑌾𑌂𑌗𑌨𑌾 ।
𑌪𑌿𑌧𑌾𑌯𑍇𑌂𑌦𑍁𑌨𑌿𑌭𑌂 𑌸𑍀𑌤𑌾 𑌮𑍁𑌖𑌮𑌶𑍍𑌰𑍂𑌣𑍍𑌯𑌵𑌰𑍍𑌤𑌯𑌤𑍍 ॥ 32 ॥

𑌧𑍍𑌯𑌾𑌯𑌂𑌤𑍀𑌂 𑌤𑌾𑌮𑌿𑌵𑌾𑌸𑍍𑌵𑌸𑍍𑌥𑌾𑌂 𑌦𑍀𑌨𑌾𑌂 𑌚𑌿𑌂𑌤𑌾𑌹𑌤𑌪𑍍𑌰𑌭𑌾𑌮𑍍 ।
𑌉𑌵𑌾𑌚 𑌵𑌚𑌨𑌂 𑌪𑌾𑌪𑍋 𑌰𑌾𑌵𑌣𑍋 𑌰𑌾𑌕𑍍𑌷𑌸𑍇𑌶𑍍𑌵𑌰𑌃 ॥ 33 ॥

𑌅𑌲𑌂 𑌵𑍍𑌰𑍀𑌡𑍇𑌨 𑌵𑍈𑌦𑍇𑌹𑌿 𑌧𑌰𑍍𑌮𑌲𑍋𑌪𑌕𑍃𑌤𑍇𑌨 𑌚 ॥ 34 ॥

𑌆𑌰𑍍𑌷𑍋𑌽𑌯𑌂 𑌦𑍈𑌵𑌨𑌿𑌷𑍍𑌯𑌂𑌦𑍋 𑌯𑌸𑍍𑌤𑍍𑌵𑌾𑌮𑌭𑌿𑌗𑌮𑌿𑌷𑍍𑌯𑌤𑌿 ।
𑌏𑌤𑍌 𑌪𑌾𑌦𑍌 𑌮𑌯𑌾 𑌸𑍍𑌨𑌿𑌗𑍍𑌧𑍌 𑌶𑌿𑌰𑍋𑌭𑌿𑌃 𑌪𑌰𑌿𑌪𑍀𑌡𑌿𑌤𑍌 ॥ 35 ॥

𑌪𑍍𑌰𑌸𑌾𑌦𑌂 𑌕𑍁𑌰𑍁 𑌮𑍇 𑌕𑍍𑌷𑌿𑌪𑍍𑌰𑌂 𑌵𑌶𑍍𑌯𑍋 𑌦𑌾𑌸𑍋𑌽𑌹𑌮𑌸𑍍𑌮𑌿𑌤𑍇 ।
𑌇𑌮𑌾𑌶𑍍𑌶𑍂𑌨𑍍𑌯 𑌮𑌯𑌾 𑌵𑌾𑌚𑌶𑍍𑌶𑍁𑌷𑍍𑌯𑌮𑌾𑌣𑍇𑌨 𑌭𑌾𑌷𑌿𑌤𑌾𑌃 ॥ 36 ॥

𑌨 𑌚𑌾𑌪𑌿 𑌰𑌾𑌵𑌣𑌃 𑌕𑌾𑌂𑌚𑌿𑌨𑍍𑌮𑍂𑌰𑍍𑌧𑍍𑌨𑌾 𑌸𑍍𑌤𑍍𑌰𑍀𑌂 𑌪𑍍𑌰𑌣𑌮𑍇𑌤 𑌹 ।
𑌏𑌵𑌮𑍁𑌕𑍍𑌤𑍍𑌵𑌾 𑌦𑌶𑌗𑍍𑌰𑍀𑌵𑍋 𑌮𑍈𑌥𑌿𑌲𑍀𑌂 𑌜𑌨𑌕𑌾𑌤𑍍𑌮𑌜𑌾𑌮𑍍 ॥ 3𑍭 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌪𑌂𑌚𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥


Browse Related Categories: