𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌤𑍌 𑌤𑍁 𑌤𑌤𑍍𑌰 𑌸𑍍𑌥𑌿𑌤𑍌 𑌦𑍃𑌷𑍍𑌟𑍍𑌵𑌾 𑌭𑍍𑌰𑌾𑌤𑌰𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ।
𑌬𑌾𑌹𑍁𑌪𑌾𑌶𑌪𑌰𑌿𑌕𑍍𑌷𑌿𑌪𑍍𑌤𑍌 𑌕𑌬𑌂𑌧𑍋 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 1 ॥
𑌤𑌿𑌷𑍍𑌠𑌤𑌃 𑌕𑌿𑌂 𑌨𑍁 𑌮𑌾𑌂 𑌦𑍃𑌷𑍍𑌟𑍍𑌵𑌾 𑌕𑍍𑌷𑍁𑌧𑌾𑌰𑍍𑌤𑌂 𑌕𑍍𑌷𑌤𑍍𑌰𑌿𑌯𑌰𑍍𑌷𑌭𑍌 ।
𑌆𑌹𑌾𑌰𑌾𑌰𑍍𑌥𑌂 𑌤𑍁 𑌸𑌂𑌦𑌿𑌷𑍍𑌟𑍌 𑌦𑍈𑌵𑍇𑌨 𑌗𑌤𑌚𑍇𑌤𑌸𑍌 ॥ 2 ॥
𑌤𑌚𑍍𑌛𑍍𑌰𑍁𑌤𑍍𑌵𑌾 𑌲𑌕𑍍𑌷𑍍𑌮𑌣𑍋 𑌵𑌾𑌕𑍍𑌯𑌂 𑌪𑍍𑌰𑌾𑌪𑍍𑌤𑌕𑌾𑌲𑌂 𑌹𑌿𑌤𑌂 𑌤𑌦𑌾 ।
𑌉𑌵𑌾𑌚𑌾𑌽𑌰𑍍𑌤𑌿𑌂 𑌸𑌮𑌾𑌪𑌨𑍍𑌨𑍋 𑌵𑌿𑌕𑍍𑌰𑌮𑍇 𑌕𑍃𑌤𑌲𑌕𑍍𑌷𑌣𑌃 ॥ 3 ॥
𑌤𑍍𑌵𑌾𑌂 𑌚 𑌮𑌾𑌂 𑌚 𑌪𑍁𑌰𑌾 𑌤𑍂𑌰𑍍𑌣𑌮𑌾𑌦𑌤𑍍𑌤𑍇 𑌰𑌾𑌕𑍍𑌷𑌸𑌾𑌧𑌮𑌃 ।
𑌤𑌸𑍍𑌮𑌾𑌦𑌸𑌿𑌭𑍍𑌯𑌾𑌮𑌸𑍍𑌯𑌾𑌶𑍁 𑌬𑌾𑌹𑍂 𑌛𑌿𑌂𑌦𑌾𑌵𑌹𑍈 𑌗𑍁𑌰𑍂 ॥ 4 ॥
𑌭𑍀𑌷𑌣𑍋𑌽𑌯𑌂 𑌮𑌹𑌾𑌕𑌾𑌯𑍋 𑌰𑌾𑌕𑍍𑌷𑌸𑍋 𑌭𑍁𑌜𑌵𑌿𑌕𑍍𑌰𑌮𑌃 ।
𑌲𑍋𑌕𑌂 𑌹𑍍𑌯𑌤𑌿𑌜𑌿𑌤𑌂 𑌕𑍃𑌤𑍍𑌵𑌾 𑌹𑍍𑌯𑌾𑌵𑌾𑌂 𑌹𑌂𑌤𑍁𑌮𑌿𑌹𑍇𑌚𑍍𑌛𑌤𑌿 ॥ 5 ॥
𑌨𑌿𑌶𑍍𑌚𑍇𑌷𑍍𑌟𑌾𑌨𑌾𑌂 𑌵𑌧𑍋 𑌰𑌾𑌜𑌨𑍍𑌕𑍁𑌤𑍍𑌸𑌿𑌤𑍋 𑌜𑌗𑌤𑍀𑌪𑌤𑍇𑌃 ।
𑌕𑍍𑌰𑌤𑍁𑌮𑌧𑍍𑌯𑍋𑌪𑌨𑍀𑌤𑌾𑌨𑌾𑌂 𑌪𑌶𑍂𑌨𑌾𑌮𑌿𑌵 𑌰𑌾𑌘𑌵 ॥ 6 ॥
𑌏𑌤𑌤𑍍𑌸𑌂𑌜𑌲𑍍𑌪𑌿𑌤𑌂 𑌶𑍍𑌰𑍁𑌤𑍍𑌵𑌾 𑌤𑌯𑍋𑌃 𑌕𑍍𑌰𑍁𑌦𑍍𑌧𑌸𑍍𑌤𑍁 𑌰𑌾𑌕𑍍𑌷𑌸𑌃 ।
𑌵𑌿𑌦𑌾𑌰𑍍𑌯𑌾𑌽𑌸𑍍𑌯𑌂 𑌤𑌦𑌾 𑌰𑍌𑌦𑍍𑌰𑌸𑍍𑌤𑍌 𑌭𑌕𑍍𑌷𑌯𑌿𑌤𑍁𑌮𑌾𑌰𑌭𑌤𑍍 ॥ ॥
𑌤𑌤𑌸𑍍𑌤𑍌 𑌦𑍇𑌶𑌕𑌾𑌲𑌜𑍍𑌞𑍌 𑌖𑌡𑍍𑌗𑌾𑌭𑍍𑌯𑌾𑌮𑍇𑌵 𑌰𑌾𑌘𑌵𑍌 ।
𑌅𑌚𑍍𑌛𑌿𑌂𑌦𑌤𑌾𑌂 𑌸𑍁𑌸𑌂𑌵𑌿𑌗𑍍𑌨𑍌 𑌬𑌾𑌹𑍂 𑌤𑌸𑍍𑌯𑌾𑌂𑌸𑌦𑍇𑌶𑌤𑌃 ॥ ॥
𑌦𑌕𑍍𑌷𑌿𑌣𑍋 𑌦𑌕𑍍𑌷𑌿𑌣𑌂 𑌬𑌾𑌹𑍁𑌮𑌸𑌕𑍍𑌤𑌮𑌸𑌿𑌨𑌾 𑌤𑌤𑌃 ।
𑌚𑌿𑌚𑍍𑌛𑍇𑌦 𑌰𑌾𑌮𑍋 𑌵𑍇𑌗𑍇𑌨 𑌸𑌵𑍍𑌯𑌂 𑌵𑍀𑌰𑌸𑍍𑌤𑍁 𑌲𑌕𑍍𑌷𑍍𑌮𑌣𑌃 ॥ ॥
𑌸 𑌪𑌪𑌾𑌤 𑌮𑌹𑌾𑌬𑌾𑌹𑍁𑌶𑍍𑌛𑌿𑌨𑍍𑌨𑌬𑌾𑌹𑍁𑌰𑍍𑌮𑌹𑌾𑌸𑍍𑌵𑌨𑌃 ।
𑌖𑌂 𑌚 𑌗𑌾𑌂 𑌚 𑌦𑌿𑌶𑌶𑍍𑌚𑍈𑌵 𑌨𑌾𑌦𑌯𑌂𑌜𑌲𑌦𑍋 𑌯𑌥𑌾 ॥ 10 ॥
𑌸 𑌨𑌿𑌕𑍃𑌤𑍍𑌤𑍌 𑌭𑍁𑌜𑍌 𑌦𑍃𑌷𑍍𑌟𑍍𑌵𑌾 𑌶𑍋𑌣𑌿𑌤𑍌𑌘𑌪𑌰𑌿𑌪𑍍𑌲𑍁𑌤𑌃 ।
𑌦𑍀𑌨𑌃 𑌪𑌪𑍍𑌰𑌚𑍍𑌛 𑌤𑍌 𑌵𑍀𑌰𑍌 𑌕𑍌 𑌯𑍁𑌵𑌾𑌮𑌿𑌤𑌿 𑌦𑌾𑌨𑌵𑌃 ॥ 11 ॥
𑌇𑌤𑌿 𑌤𑌸𑍍𑌯 𑌬𑍍𑌰𑍁𑌵𑌾𑌣𑌸𑍍𑌯 𑌲𑌕𑍍𑌷𑍍𑌮𑌣𑌶𑍍𑌶𑍁𑌭𑌲𑌕𑍍𑌷𑌣𑌃 ।
𑌶𑌶𑌂𑌸 𑌰𑌾𑌘𑌵𑌂 𑌤𑌸𑍍𑌯 𑌕𑌬𑌂𑌧𑌸𑍍𑌯 𑌮𑌹𑌾𑌤𑍍𑌮𑌨𑌃 ॥ 12 ॥
𑌅𑌯𑌮𑌿𑌕𑍍𑌷𑍍𑌵𑌾𑌕𑍁𑌦𑌾𑌯𑌾𑌦𑍋 𑌰𑌾𑌮𑍋 𑌨𑌾𑌮 𑌜𑌨𑍈𑌶𑍍𑌶𑍍𑌰𑍁𑌤𑌃 ।
𑌅𑌸𑍍𑌯𑍈𑌵𑌾𑌵𑌰𑌜𑌂 𑌵𑌿𑌦𑍍𑌦𑌿 𑌭𑍍𑌰𑌾𑌤𑌰𑌂 𑌮𑌾𑌂 𑌚 𑌲𑌕𑍍𑌷𑍍𑌮𑌣𑌮𑍍 ॥ 13 ॥
𑌅𑌸𑍍𑌯 𑌦𑍇𑌵𑌪𑍍𑌰𑌭𑌾𑌵𑌸𑍍𑌯 𑌵𑌸𑌤𑍋 𑌵𑌿𑌜𑌨𑍇 𑌵𑌨𑍇 ।
𑌰𑌕𑍍𑌷𑌸𑌾𑌽𑌪𑌹𑍃𑌤𑌾 𑌪𑌤𑍍𑌨𑍀 𑌯𑌾𑌮𑌿𑌚𑍍𑌛𑌂𑌤𑌾𑌵𑌿𑌹𑌾𑌗𑌤𑍌 ॥ 14 ॥
𑌤𑍍𑌵𑌂 𑌤𑍁 𑌕𑍋 𑌵𑌾 𑌕𑌿𑌮𑌰𑍍𑌥𑌂 𑌵𑌾 𑌕𑌬𑌂𑌧𑌸𑌦𑍃𑌶𑍋 𑌵𑌨𑍇 ।
𑌆𑌸𑍍𑌯𑍇𑌨𑍋𑌰𑌸𑌿 𑌦𑍀𑌪𑍍𑌤𑍇𑌨 𑌭𑌗𑍍𑌨𑌜𑌂𑌘𑍋 𑌵𑌿𑌚𑍇𑌷𑍍𑌟𑌸𑍇 ॥ 15 ॥
𑌏𑌵𑌮𑍁𑌕𑍍𑌤𑌃 𑌕𑌬𑌂𑌧𑌸𑍍𑌤𑍁 𑌲𑌕𑍍𑌷𑍍𑌮𑌣𑍇𑌨𑍋𑌤𑍍𑌤𑌰𑌂 𑌵𑌚𑌃 ।
𑌉𑌵𑌾𑌚 𑌪𑌰𑌮𑌪𑍍𑌰𑍀𑌤 𑌸𑍍𑌤𑌦𑌿𑌂𑌦𑍍𑌰𑌵𑌚𑌨𑌂 𑌸𑍍𑌮𑌰𑌨𑍍 ॥ 16 ॥
𑌸𑍍𑌵𑌾𑌗𑌤𑌂 𑌵𑌾𑌂 𑌨𑌰𑌵𑍍𑌯𑌾𑌘𑍍𑌰𑍌 𑌦𑌿𑌷𑍍𑌟𑍍𑌯𑌾 𑌪𑌶𑍍𑌯𑌾𑌮𑌿 𑌚𑌾𑌪𑍍𑌯𑌹𑌮𑍍 ।
𑌦𑌿𑌷𑍍𑌟𑍍𑌯𑌾 𑌚𑍇𑌮𑍌 𑌨𑌿𑌕𑍃𑌤𑍍𑌤𑍌 𑌮𑍇 𑌯𑍁𑌵𑌾𑌭𑍍𑌯𑌾𑌂 𑌬𑌾𑌹𑍁𑌬𑌂𑌧𑌨𑍌 ॥ 1 ॥
𑌵𑌿𑌰𑍂𑌪𑌂 𑌯𑌚𑍍𑌚 𑌮𑍇 𑌰𑍂𑌪𑌂 𑌪𑍍𑌰𑌾𑌪𑍍𑌤𑌂 𑌹𑍍𑌯𑌵𑌿𑌨𑌯𑌾𑌦𑍍𑌯𑌥𑌾 ।
𑌤𑌨𑍍𑌮𑍇 𑌶𑍃𑌣𑍁 𑌨𑌰𑌵𑍍𑌯𑌾𑌘𑍍𑌰 𑌤𑌤𑍍𑌤𑍍𑌵𑌤𑌶𑍍𑌶𑌂𑌸𑌤𑌸𑍍𑌤𑌵 ॥ 1 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ॥
