𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌦𑌪𑍍𑌰𑌿𑌯𑌮𑌮𑌿𑌤𑍍𑌰𑌘𑍍𑌨𑍋 𑌵𑌚𑌨𑌂 𑌮𑌰𑌣𑍋𑌪𑌮𑌮𑍍 ।
𑌶𑍍𑌰𑍁𑌤𑍍𑌵𑌾 𑌨 𑌵𑌿𑌵𑍍𑌯𑌥𑍇 𑌰𑌾𑌮𑌃 𑌕𑍈𑌕𑍇𑌯𑍀𑌂 𑌚𑍇𑌦𑌮𑌬𑍍𑌰𑌵𑍀𑌤𑍍 ॥ 1 ॥
𑌏𑌵𑌮𑌸𑍍𑌤𑍁 𑌗𑌮𑌿𑌷𑍍𑌯𑌾𑌮𑌿 𑌵𑌨𑌂 𑌵𑌸𑍍𑌤𑍁𑌮𑌹𑌂 𑌤𑍍𑌵𑌿𑌤𑌃 ।
𑌜𑌟𑌾𑌜𑌿𑌨𑌧𑌰𑍋 𑌰𑌾𑌜𑍍𑌞𑌃 𑌪𑍍𑌰𑌤𑌿𑌜𑍍𑌞𑌾𑌮𑌨𑍁𑌪𑌾𑌲𑌯𑌨𑍍 ॥ 2 ॥
𑌇𑌦𑌂 𑌤𑍁 𑌜𑍍𑌞𑌾𑌤𑍁𑌮𑌿𑌚𑍍𑌛𑌾𑌮𑌿 𑌕𑌿𑌮𑌰𑍍𑌥𑌂 𑌮𑌾𑌂 𑌮𑌹𑍀𑌪𑌤𑌿𑌃 ।
𑌨𑌾𑌭𑌿𑌨𑌂𑌦𑌤𑌿 𑌦𑍁𑌰𑍍𑌧𑌰𑍍𑌷𑍋 𑌯𑌥𑌾𑌪𑍂𑌰𑍍𑌵𑌮𑌰𑌿𑌂𑌦𑌮𑌃 ॥ 3 ॥
𑌮𑌨𑍍𑌯𑍁𑌰𑍍𑌨 𑌚 𑌤𑍍𑌵𑌯𑌾 𑌕𑌾𑌰𑍍𑌯𑍋 𑌦𑍇𑌵𑌿 𑌬𑍍𑌰𑍂𑌮𑌿 𑌤𑌵𑌾𑌗𑍍𑌰𑌤𑌃 ।
𑌯𑌾𑌸𑍍𑌯𑌾𑌮𑌿 𑌭𑌵 𑌸𑍁𑌪𑍍𑌰𑍀𑌤𑌾 𑌵𑌨𑌂 𑌚𑍀𑌰𑌜𑌟𑌾𑌧𑌰𑌃 ॥ 4 ॥
𑌹𑌿𑌤𑍇𑌨 𑌗𑍁𑌰𑍁𑌣𑌾 𑌪𑌿𑌤𑍍𑌰𑌾 𑌕𑍃𑌤𑌜𑍍𑌞𑍇𑌨 𑌨𑍃𑌪𑍇𑌣 𑌚 ।
𑌨𑌿𑌯𑍁𑌜𑍍𑌯𑌮𑌾𑌨𑍋 𑌵𑌿𑌸𑍍𑌰𑌬𑍍𑌧𑌃 𑌕𑌿𑌂 𑌨 𑌕𑍁𑌰𑍍𑌯𑌾𑌮𑌹𑌂 𑌪𑍍𑌰𑌿𑌯𑌮𑍍 ॥ 5 ॥
𑌅𑌲𑍀𑌕𑌂 𑌮𑌾𑌨𑌸𑌂 𑌤𑍍𑌵𑍇𑌕𑌂 𑌹𑍃𑌦𑌯𑌂 𑌦𑌹𑌤𑍀𑌵 𑌮𑍇 ।
𑌸𑍍𑌵𑌯𑌂 𑌯𑌨𑍍𑌨𑌾𑌹 𑌮𑌾𑌂 𑌰𑌾𑌜𑌾 𑌭𑌰𑌤𑌸𑍍𑌯𑌾𑌭𑌿𑌷𑍇𑌚𑌨𑌮𑍍 ॥ 6 ॥
𑌅𑌹𑌂 𑌹𑌿 𑌸𑍀𑌤𑌾𑌂 𑌰𑌾𑌜𑍍𑌯𑌂 𑌚 𑌪𑍍𑌰𑌾𑌣𑌾𑌨𑌿𑌷𑍍𑌟𑌾𑌂𑌧𑌨𑌾𑌨𑌿 𑌚 ।
𑌹𑍃𑌷𑍍𑌟𑍋 𑌭𑍍𑌰𑌾𑌤𑍍𑌰𑍇 𑌸𑍍𑌵𑌯𑌂 𑌦𑌦𑍍𑌯𑌾𑌂 𑌭𑌰𑌤𑌾𑌯𑌾𑌪𑍍𑌰𑌚𑍋𑌦𑌿𑌤𑌃 ॥ ॥
𑌕𑌿𑌂 𑌪𑍁𑌨𑌰𑍍𑌮𑌨𑍁𑌜𑍇𑌂𑌦𑍍𑌰𑍇𑌣 𑌸𑍍𑌵𑌯𑌂 𑌪𑌿𑌤𑍍𑌰𑌾 𑌪𑍍𑌰𑌚𑍋𑌦𑌿𑌤𑌃 ।
𑌤𑌵 𑌚 𑌪𑍍𑌰𑌿𑌯𑌕𑌾𑌮𑌾𑌰𑍍𑌥𑌂 𑌪𑍍𑌰𑌤𑌿𑌜𑍍𑌞𑌾𑌮𑌨𑍁𑌪𑌾𑌲𑌯𑌨𑍍 ॥ ॥
𑌤𑌦𑌾𑌶𑍍𑌵𑌾𑌸𑌯 𑌹𑍀𑌮𑌂 𑌤𑍍𑌵𑌂 𑌕𑌿𑌨𑍍𑌵𑌿𑌦𑌂 𑌯𑌨𑍍𑌮𑌹𑍀𑌪𑌤𑌿𑌃 ।
𑌵𑌸𑍁𑌧𑌾𑌸𑌕𑍍𑌤𑌨𑌯𑌨𑍋 𑌮𑌂𑌦𑌮𑌶𑍍𑌰𑍂𑌣𑌿 𑌮𑍁𑌂𑌚𑌤𑌿 ॥ ॥
𑌗𑌚𑍍𑌛𑌂𑌤𑍁 𑌚𑍈𑌵𑌾𑌨𑌯𑌿𑌤𑍁𑌂 𑌦𑍂𑌤𑌾𑌶𑍍𑌶𑍍𑌰𑍀𑌘𑍍𑌰𑌜𑌵𑍈𑌰𑍍𑌹𑌯𑍈𑌃 ।
𑌭𑌰𑌤𑌂 𑌮𑌾𑌤𑍁𑌲𑌕𑍁𑌲𑌾𑌦𑌦𑍍𑌯𑍈𑌵 𑌨𑍃𑌪𑌶𑌾𑌸𑌨𑌾𑌤𑍍 ॥ 10 ॥
𑌦𑌂𑌡𑌕𑌾𑌰𑌣𑍍𑌯𑌮𑍇𑌷𑍋𑌽𑌹𑌮𑌿𑌤𑍋 𑌗𑌚𑍍𑌛𑌾𑌮𑌿 𑌸𑌤𑍍𑌵𑌰𑌃 ।
𑌅𑌵𑌿𑌚𑌾𑌰𑍍𑌯 𑌪𑌿𑌤𑍁𑌰𑍍𑌵𑌾𑌕𑍍𑌯𑌂 𑌸𑌮𑌾 𑌵𑌸𑍍𑌤𑍁𑌂 𑌚𑌤𑍁𑌰𑍍𑌦𑌶 ॥ 11 ॥
𑌸𑌾 𑌹𑍃𑌷𑍍𑌟𑌾 𑌤𑌸𑍍𑌯 𑌤𑌦𑍍𑌵𑌾𑌕𑍍𑌯𑌂 𑌶𑍍𑌰𑍁𑌤𑍍𑌵𑌾 𑌰𑌾𑌮𑌸𑍍𑌯 𑌕𑍈𑌕𑌯𑍀 ।
𑌪𑍍𑌰𑌸𑍍𑌥𑌾𑌨𑌂 𑌶𑍍𑌰𑌦𑍍𑌧𑌧𑌾𑌨𑌾 𑌹𑌿 𑌤𑍍𑌵𑌰𑌯𑌾𑌮𑌾𑌸 𑌰𑌾𑌘𑌵𑌮𑍍 ॥ 12 ॥
𑌏𑌵𑌂 𑌭𑌵𑌤𑍁 𑌯𑌾𑌸𑍍𑌯𑌂𑌤𑌿 𑌦𑍂𑌤𑌾 𑌶𑍍𑌶𑍀𑌘𑍍𑌰𑌜𑌵𑍈𑌰𑍍𑌹𑌯𑍈𑌃 ।
𑌭𑌰𑌤𑌂 𑌮𑌾𑌤𑍁𑌲𑌕𑍁𑌲𑌾𑌦𑍁𑌪𑌾𑌵𑌰𑍍𑌤𑌯𑌿𑌤𑍁𑌂 𑌨𑌰𑌾𑌃 ॥ 13 ॥
𑌤𑌵 𑌤𑍍𑌵𑌹𑌂 𑌕𑍍𑌷𑌮𑌂 𑌮𑌨𑍍𑌯𑍇 𑌨𑍋𑌤𑍍𑌸𑍁𑌕𑌸𑍍𑌯 𑌵𑌿𑌲𑌂𑌬𑌨𑌮𑍍 ।
𑌰𑌾𑌮 𑌤𑌸𑍍𑌮𑌾𑌦𑌿𑌤 𑌶𑍍𑌶𑍀𑌘𑍍𑌰𑌂 𑌵𑌨𑌂 𑌤𑍍𑌵𑌂 𑌗𑌂𑌤𑍁𑌮𑌰𑍍𑌹𑌸𑌿 ॥ 14 ॥
𑌵𑍍𑌰𑍀𑌡𑌾𑌨𑍍𑌵𑌿𑌤 𑌸𑍍𑌸𑍍𑌵𑌯𑌂 𑌯𑌚𑍍𑌚 𑌨𑍃𑌪𑌸𑍍𑌤𑍍𑌵𑌾𑌂 𑌨𑌾𑌭𑌿𑌭𑌾𑌷𑌤𑍇 ।
𑌨𑍈𑌤𑌤𑍍𑌕𑌿𑌂𑌚𑌿𑌨𑍍𑌨𑌰𑌶𑍍𑌰𑍇𑌷𑍍𑌠 𑌮𑌨𑍍𑌯𑍁𑌰𑍇𑌷𑍋𑌽𑌪𑌨𑍀𑌯𑌤𑌾𑌮𑍍 ॥ 15 ॥
𑌯𑌾𑌵𑌤𑍍𑌤𑍍𑌵𑌂 𑌨 𑌵𑌨𑌂 𑌯𑌾𑌤𑌃 𑌪𑍁𑌰𑌾𑌦𑌸𑍍𑌮𑌾𑌦𑌭𑌿𑌤𑍍𑌵𑌰𑌨𑍍 ।
𑌪𑌿𑌤𑌾 𑌤𑌾𑌵𑌨𑍍𑌨 𑌤𑍇 𑌰𑌾𑌮 𑌸𑍍𑌨𑌾𑌸𑍍𑌯𑌤𑍇 𑌭𑍋𑌕𑍍𑌷𑍍𑌯𑌤𑍇𑌽𑌪𑌿 𑌵𑌾 ॥ 16 ॥
𑌧𑌿𑌕𑍍𑌕𑌷𑍍𑌟𑌮𑌿𑌤𑌿 𑌨𑌿𑌃𑌶𑍍𑌵𑌸𑍍𑌯 𑌰𑌾𑌜𑌾 𑌶𑍋𑌕𑌪𑌰𑌿𑌪𑍍𑌲𑍁𑌤𑌃 ।
𑌮𑍂𑌰𑍍𑌛𑌿𑌤𑍋 𑌨𑍍𑌯𑌪𑌤𑌤𑍍𑌤𑌸𑍍𑌮𑌿𑌨𑍍𑌪𑌰𑍍𑌯𑌂𑌕𑍇 𑌹𑍇𑌮𑌭𑍂𑌷𑌿𑌤𑍇 ॥ 1 ॥
𑌰𑌾𑌮𑍋𑌽𑌪𑍍𑌯𑍁𑌤𑍍𑌥𑌾𑌪𑍍𑌯 𑌰𑌾𑌜𑌾𑌨𑌂 𑌕𑍈𑌕𑍇𑌯𑍍𑌯𑌾𑌭𑌿𑌪𑍍𑌰𑌚𑍋𑌦𑌿𑌤𑌃 ।
𑌕𑌶𑌯𑍇𑌵𑌾𑌹𑌤𑍋 𑌵𑌾𑌜𑍀 𑌵𑌨𑌂 𑌗𑌂𑌤𑍁𑌂 𑌕𑍃𑌤𑌤𑍍𑌵𑌰𑌃 ॥ 1 ॥
𑌤𑌦𑌪𑍍𑌰𑌿𑌯𑌮𑌨𑌾𑌰𑍍𑌯𑌾𑌯𑌾 𑌵𑌚𑌨𑌂 𑌦𑌾𑌰𑍁𑌣𑍋𑌦𑌯𑌮𑍍 ।
𑌶𑍍𑌰𑍁𑌤𑍍𑌵𑌾 𑌗𑌤𑌵𑍍𑌯𑌥𑍋 𑌰𑌾𑌮𑌃 𑌕𑍈𑌕𑍇𑌯𑍀𑌂 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 1 ॥
𑌨𑌾𑌹𑌮𑌰𑍍𑌥𑌪𑌰𑍋 𑌦𑍇𑌵𑌿 𑌲𑍋𑌕𑌮𑌾𑌵𑌸𑍍𑌤𑍁𑌮𑍁𑌤𑍍𑌸𑌹𑍇 ।
𑌵𑌿𑌦𑍍𑌧𑌿𑌮𑌾𑌮𑍃𑌷𑌿𑌭𑌿𑌸𑍍𑌤𑍁𑌲𑍍𑌯𑌂 𑌕𑍇𑌵𑌲𑌂 𑌧𑌰𑍍𑌮𑌮𑌾𑌸𑍍𑌥𑌿𑌤𑌮𑍍 ॥ 20 ॥
𑌯𑌦𑌤𑍍𑌰 𑌭𑌵𑌤𑌃 𑌕𑌿𑌂𑌚𑌿𑌚𑍍𑌛𑌕𑍍𑌯𑌂 𑌕𑌰𑍍𑌤𑍁𑌂 𑌪𑍍𑌰𑌿𑌯𑌂 𑌮𑌯𑌾 ।
𑌪𑍍𑌰𑌾𑌣𑌾𑌨𑌪𑌿 𑌪𑌰𑌿𑌤𑍍𑌯𑌜𑍍𑌯 𑌸𑌰𑍍𑌵𑌥𑌾 𑌕𑍃𑌤𑌮𑍇𑌵 𑌤𑌤𑍍 ॥ 21 ॥
𑌨 𑌹𑍍𑌯𑌤𑍋 𑌧𑌰𑍍𑌮𑌚𑌰𑌣𑌂 𑌕𑌿𑌂𑌚𑌿𑌦𑌸𑍍𑌤𑌿 𑌮𑌹𑌤𑍍𑌤𑌰𑌮𑍍 ।
𑌯𑌥𑌾 𑌪𑌿𑌤𑌰𑌿𑌶𑍁𑌶𑍍𑌰𑍂𑌷𑌾 𑌤𑌸𑍍𑌯 𑌵𑌾 𑌵𑌚𑌨𑌕𑍍𑌰𑌿𑌯𑌾 ॥ 22 ॥
𑌅𑌨𑍁𑌕𑍍𑌤𑍋𑌽𑌪𑍍𑌯𑌤𑍍𑌰𑌭𑌵𑌤𑌾 𑌭𑌵𑌤𑍍𑌯𑌾 𑌵𑌚𑌨𑌾𑌦𑌹𑌮𑍍 ।
𑌵𑌨𑍇 𑌵𑌤𑍍𑌸𑍍𑌯𑌾𑌮𑌿 𑌵𑌿𑌜𑌨𑍇 𑌵𑌰𑍍𑌷𑌾𑌣𑍀𑌹 𑌚𑌤𑍁𑌰𑍍𑌦𑌶 ॥ 23 ॥
𑌨 𑌨𑍂𑌨𑌂 𑌮𑌯𑌿 𑌕𑍈𑌕𑌯𑌿 𑌕𑌿𑌂𑌚𑌿𑌦𑌾𑌶𑌂𑌸𑌸𑍇 𑌗𑍁𑌣𑌮𑍍 ।
𑌯𑌦𑍍𑌰𑌾𑌜𑌾𑌨𑌮𑌵𑍋𑌚𑌸𑍍𑌤𑍍𑌵𑌂 𑌮𑌮𑍇𑌶𑍍𑌵𑌰𑌤𑌰𑌾 𑌸𑌤𑍀 ॥ 24 ॥
𑌯𑌾𑌵𑌨𑍍𑌮𑌾𑌤𑌰𑌮𑌾𑌪𑍍𑌨𑌚𑍍𑌛𑍇 𑌸𑍀𑌤𑌾𑌂 𑌚𑌾𑌨𑍁𑌨𑌯𑌾𑌮𑍍𑌯𑌹𑌮𑍍 ।
𑌤𑌤𑍋𑌽𑌦𑍍𑌯𑍈𑌵 𑌗𑌮𑌿𑌷𑍍𑌯𑌾𑌮𑌿 𑌦𑌂𑌡𑌕𑌾𑌨𑌾𑌂 𑌮𑌹𑌦𑍍𑌵𑌨𑌮𑍍 ॥ 25 ॥
𑌭𑌰𑌤𑌃 𑌪𑌾𑌲𑌯𑍇𑌦𑍍𑌰𑌾𑌜𑍍𑌯𑌂 𑌶𑍁𑌶𑍍𑌰𑍂𑌷𑍇𑌚𑍍𑌚 𑌪𑌿𑌤𑍁𑌰𑍍𑌯𑌥𑌾 ।
𑌤𑌥𑌾 𑌭𑌵𑌤𑍍𑌯𑌾 𑌕𑌰𑍍𑌤𑌵𑍍𑌯𑌂 𑌸 𑌹𑌿 𑌧𑌰𑍍𑌮 𑌸𑍍𑌸𑌨𑌾𑌤𑌨𑌃 ॥ 26 ॥
𑌸 𑌰𑌾𑌮𑌸𑍍𑌯 𑌵𑌚𑌶𑍍𑌶𑍍𑌰𑍃𑌤𑍍𑌵𑌾 𑌭𑍃𑌶𑌂 𑌦𑍁𑌃𑌖𑌹𑌤𑌃 𑌪𑌿𑌤𑌾 ।
𑌶𑍋𑌕𑌾𑌦𑌶𑌕𑍍𑌨𑍁𑌵𑌨𑍍𑌵𑌕𑌤𑍁𑌂 𑌪𑍍𑌰𑌰𑍁𑌰𑍋𑌦 𑌮𑌹𑌾𑌸𑍍𑌵𑌨𑌮𑍍 ॥ 2 ॥
𑌵𑌂𑌦𑌿𑌤𑍍𑌵𑌾 𑌚𑌰𑌣𑍌 𑌰𑌾𑌮𑍋 𑌵𑌿𑌸𑌂𑌜𑍍𑌞𑌸𑍍𑌯 𑌪𑌿𑌤𑍁𑌸𑍍𑌤𑌥𑌾 ।
𑌕𑍈𑌕𑍇𑌯𑍍𑌯𑌾𑌶𑍍𑌚𑌾𑌪𑍍𑌯𑌨𑌾𑌰𑍍𑌯𑌾𑌯𑌾𑌃 𑌨𑌿𑌷𑍍𑌪𑌪𑌾𑌤 𑌮𑌹𑌾𑌦𑍍𑌯𑍁𑌤𑌿𑌃 ॥ 2 ॥
𑌸 𑌰𑌾𑌮𑌃 𑌪𑌿𑌤𑌰𑌂 𑌕𑍃𑌤𑍍𑌵𑌾 𑌕𑍈𑌕𑍇𑌯𑍀𑌂 𑌚 𑌪𑍍𑌰𑌦𑌕𑍍𑌷𑌿𑌣𑌮𑍍 ।
𑌨𑌿𑌷𑍍𑌕𑍍𑌰𑌮𑍍𑌯𑌾𑌂𑌤𑌃𑌪𑍁𑌰𑌾𑌤𑍍𑌤𑌸𑍍𑌮𑌾𑌤𑍍𑌸𑍍𑌵𑌂 𑌦𑌦𑌰𑍍𑌶 𑌸𑍁𑌹𑍃𑌜𑍍𑌜𑌨𑌮𑍍 ॥ 2 ॥
𑌤𑌂 𑌬𑌾𑌷𑍍𑌪𑌪𑌰𑌿𑌪𑍂𑌰𑍍𑌣𑌾𑌕𑍍𑌷𑌃 𑌪𑍃𑌷𑍍𑌠𑌤𑍋𑌽𑌨𑍁𑌜𑌗𑌾𑌮 𑌹 ।
𑌲𑌕𑍍𑌷𑍍𑌮𑌣𑌃 𑌪𑌰𑌮𑌕𑍍𑌕𑍃𑌧𑍍𑌦𑌃 𑌸𑍍𑌸𑍁𑌮𑌿𑌤𑍍𑌰𑌾𑌨𑌂𑌦𑌵𑌰𑍍𑌧𑌨𑌃 ॥ 30 ॥
𑌅𑌭𑌿𑌷𑍇𑌚𑌨𑌿𑌕𑌂 𑌭𑌾𑌂𑌡𑌂 𑌕𑍃𑌤𑍍𑌵𑌾 𑌰𑌾𑌮𑌃 𑌪𑍍𑌰𑌦𑌕𑍍𑌷𑌿𑌣𑌮𑍍 ।
𑌶𑌨𑍈𑌰𑍍𑌜𑌗𑌾𑌮 𑌸𑌾𑌪𑍇𑌕𑍍𑌷𑍋 𑌦𑍃𑌷𑍍𑌟𑌿𑌂 𑌤𑌤𑍍𑌰𑌾𑌵𑌿𑌚𑌾𑌲𑌯𑌨𑍍 ॥ 31 ॥
𑌨 𑌚𑌾𑌸𑍍𑌯 𑌮𑌹𑌤𑍀𑌂 𑌲𑌕𑍍𑌷𑍍𑌮𑍀𑌂 𑌰𑌾𑌜𑍍𑌯𑌨𑌾𑌶𑍋𑌽𑌪𑌕𑌰𑍍𑌷𑌤𑌿 ।
𑌲𑍋𑌕𑌕𑌾𑌂𑌤𑌸𑍍𑌯 𑌕𑌾𑌂𑌤𑌤𑍍𑌵𑌾𑌚𑍍𑌛𑍀𑌤𑌰𑌶𑍍𑌮𑍇𑌰𑌿𑌵 𑌕𑍍𑌷𑌪𑌾 ॥ 32 ॥
𑌨 𑌵𑌨𑌂 𑌗𑌂𑌤𑍁𑌕𑌾𑌮𑌸𑍍𑌯 𑌤𑍍𑌯𑌜𑌤𑌶𑍍𑌚 𑌵𑌸𑍁𑌂𑌧𑌰𑌾𑌮𑍍 ।
𑌸𑌰𑍍𑌵𑌲𑍋𑌕𑌾𑌤𑌿𑌗𑌸𑍍𑌯𑍇𑌵 𑌲𑌕𑍍𑌷𑍍𑌯𑌤𑍇 𑌚𑌿𑌤𑍍𑌤𑌵𑌿𑌕𑍍𑌰𑌿𑌯𑌾 ॥ 33 ॥
𑌪𑍍𑌰𑌤𑌿𑌷𑌿𑌧𑍍𑌯 𑌶𑍁𑌭𑌂 𑌛𑌤𑍍𑌰𑌂 𑌵𑍍𑌯𑌜𑌨𑍇 𑌚 𑌸𑍍𑌵𑌲𑌂𑌕𑍃𑌤𑍇 ।
𑌵𑌿𑌸𑌰𑍍𑌜𑌯𑌿𑌤𑍍𑌵𑌾 𑌸𑍍𑌵𑌜𑌨𑌂 𑌰𑌥𑌂 𑌪𑍌𑌰𑌾𑌂𑌸𑍍𑌤𑌥𑌾 𑌜𑌨𑌾𑌨𑍍 ॥ 34 ॥
𑌧𑌾𑌰𑌯𑌨𑍍 𑌮𑌨𑌸𑌾 𑌦𑍁𑌃𑌖𑌮𑌿𑌂𑌦𑍍𑌰𑌿𑌯𑌾𑌣𑌿 𑌨𑌿𑌗𑍃𑌹𑍍𑌯 𑌚 ।
𑌪𑍍𑌰𑌵𑌿𑌵𑍇𑌶𑌾𑌤𑍍𑌮𑌵𑌾𑌨𑍍𑌵𑍇𑌶𑍍𑌮 𑌮𑌾𑌤𑍁𑌰𑌪𑍍𑌰𑌿𑌯𑌶𑌂𑌸𑌿𑌵𑌾𑌨𑍍 ॥ 35 ॥
𑌸𑌰𑍍𑌵𑍋𑌹𑍍𑌯𑌭𑌿𑌜𑌨𑌶𑍍𑌶𑍍𑌰𑍀𑌮𑌾𑌨𑍍 𑌶𑍍𑌰𑍀𑌮𑌤𑌸𑍍𑌸𑌤𑍍𑌯𑌵𑌾𑌦𑌿𑌨𑌃 ।
𑌨𑌾𑌲𑌕𑍍𑌷𑌯𑌤 𑌰𑌾𑌮𑌸𑍍𑌯 𑌕𑌿𑌂𑌚𑌿𑌦𑌾𑌕𑌾𑌰𑌮𑌾𑌨𑌨𑍇 ॥ 36 ॥
𑌉𑌚𑌿𑌤𑌂 𑌚 𑌮𑌹𑌾𑌬𑌾𑌹𑍁𑌰𑍍𑌨𑌜𑌹𑍌𑌹𑌰𑍍𑌷𑌮𑌾𑌤𑍍𑌮𑌨𑌃 ।
𑌶𑌾𑌰𑌦 𑌸𑍍𑌸𑌮𑍁𑌦𑍀𑌰𑍍𑌣𑌾𑌂𑌶𑍁𑌶𑍍𑌚𑌂𑌦𑍍𑌰𑌸𑍍𑌤𑍇𑌜 𑌇𑌵𑌾𑌤𑍍𑌮𑌜𑌮𑍍 ॥ 3 ॥
𑌵𑌾𑌚𑌾 𑌮𑌧𑍁𑌰𑌯𑌾 𑌰𑌾𑌮𑌸𑍍𑌸𑌰𑍍𑌵𑌂 𑌸𑌮𑍍𑌮𑌾𑌨𑌯𑌂𑌜𑌨𑌮𑍍 ।
𑌮𑌾𑌤𑍁𑌸𑍍𑌸𑌮𑍀𑌪𑌂 𑌧𑍀𑌰𑌾𑌤𑍍𑌮𑌾 𑌪𑍍𑌰𑌵𑌿𑌵𑍇𑌶 𑌮𑌹𑌾𑌯𑌶𑌾𑌃 ॥ 3 ॥
𑌤𑌂 𑌗𑍁𑌣𑍈𑌸𑍍𑌸𑌮𑌤𑌾𑌂 𑌪𑍍𑌰𑌾𑌪𑍍𑌤𑍋 𑌭𑍍𑌰𑌾𑌤𑌾 𑌵𑌿𑌪𑍁𑌲𑌵𑌿𑌕𑍍𑌰𑌮𑌃 ।
𑌸𑍌𑌮𑌿𑌤𑍍𑌰𑌿𑌰𑌨𑍁𑌵𑌵𑍍𑌰𑌾𑌜 𑌧𑌾𑌰𑌯𑌂𑌦𑍁𑌃𑌖𑌮𑌾𑌤𑍍𑌮𑌜𑌮𑍍 ॥ 3 ॥
𑌪𑍍𑌰𑌵𑌿𑌶𑍍𑌯 𑌵𑍇𑌶𑍍𑌮𑌾𑌤𑌿𑌭𑍃𑌶𑌂 𑌮𑍁𑌦𑌾𑌽𑌨𑍍𑌵𑌿𑌤𑌂 𑌸𑌮𑍀𑌕𑍍𑌷𑍍𑌯 𑌤𑌾𑌂 𑌚𑌾𑌰𑍍𑌥𑌵𑌿𑌪𑌤𑍍𑌤𑌿𑌮𑌾𑌗𑌤𑌾𑌮𑍍 ।
𑌨 𑌚𑍈𑌵 𑌰𑌾𑌮𑍋𑌽𑌤𑍍𑌰𑌜𑌗𑌾𑌮𑌵𑌿𑌕𑍍𑌰𑌿𑌯𑌾𑌂 𑌸𑍁𑌹𑍃𑌜𑍍𑌜𑌨𑌸𑍍𑌯𑌾𑌤𑍍𑌮𑌵𑌿𑌪𑌤𑍍𑌤𑌿𑌶𑌂𑌕𑌯𑌾 ॥ 40 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌏𑌕𑍋𑌨𑌵𑌿𑌂𑌶𑌸𑍍𑌸𑌰𑍍𑌗𑌃 ॥
