VR 2.79 Ayodhya Kanda - Sarga 79 - Grantha

Collection of Spiritual and Devotional Literature in Various Indian Languages

View this in:

2.𑍭𑍯 𑌅𑌯𑍋𑌧𑍍𑌯𑌾𑌕𑌾𑌂𑌡 - 𑌏𑌕𑍋𑌨𑌾𑌶𑍀𑌤𑌿𑌤𑌮 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌾𑌶𑍀𑌤𑌿𑌤𑌮𑌸𑍍𑌸𑌰𑍍𑌗𑌃 ।

𑌤𑌤𑌃 𑌪𑍍𑌰𑌭𑌾𑌤𑌸𑌮𑌯𑍇 𑌦𑌿𑌵𑌸𑍇𑌽𑌥 𑌚𑌤𑍁𑌰𑍍𑌦𑌶𑍇 ।
𑌸𑌮𑍇𑌤𑍍𑌯 𑌰𑌾𑌜𑌕𑌰𑍍𑌤𑌾𑌰𑍋 𑌭𑌰𑌤𑌂 𑌵𑌾𑌕𑍍𑌯𑌮𑌬𑍍𑌰𑍁𑌵𑌨𑍍 ॥ 1 ॥

𑌗𑌤𑍋 𑌦𑌶𑌰𑌥𑌸𑍍𑌸𑍍𑌵𑌰𑍍𑌗𑌂 𑌯𑍋 𑌨𑍋 𑌗𑍁𑌰𑍁𑌤𑌰𑍋 𑌗𑍁𑌰𑍁𑌃 ।
𑌰𑌾𑌮𑌂 𑌪𑍍𑌰𑌵𑍍𑌰𑌾𑌜𑍍𑌯 𑌵𑍈 𑌜𑍍𑌯𑍇𑌷𑍍𑌠𑌂 𑌲𑌕𑍍𑌷𑍍𑌮𑌣𑌂 𑌚 𑌮𑌹𑌾𑌬𑌲𑌮𑍍 ॥ 2 ॥

𑌤𑍍𑌵𑌮𑌦𑍍𑌯 𑌭𑌵 𑌨𑍋 𑌰𑌾𑌜𑌾 𑌰𑌾𑌜𑌪𑍁𑌤𑍍𑌰 𑌮𑌹𑌾𑌯𑌶𑌃 ।
𑌸𑌂𑌗𑌤𑍍𑌯𑌾 𑌨𑌾𑌪𑌰𑌾𑌧𑍍𑌨𑍋𑌤𑌿 𑌰𑌾𑌜𑍍𑌯𑌮𑍇𑌤𑌦𑌨𑌾𑌯𑌕𑌮𑍍 ॥ 3 ॥

𑌅𑌭𑌿𑌷𑍇𑌚𑌨𑌿𑌕𑌂 𑌸𑌰𑍍𑌵𑌮𑌿𑌦𑌮𑌾𑌦𑌾𑌯 𑌰𑌾𑌘𑌵 ।
𑌪𑍍𑌰𑌤𑍀𑌕𑍍𑌷𑌤𑍇 𑌤𑍍𑌵𑌾𑌂 𑌸𑍍𑌵𑌜𑌨𑌶𑍍𑌶𑍍𑌰𑍇𑌣𑌯𑌶𑍍𑌚 𑌨𑍃𑌪𑌾𑌤𑍍𑌮𑌜 ॥ 4 ॥

𑌰𑌾𑌜𑍍𑌯𑌂 𑌗𑍃𑌹𑌾𑌣 𑌭𑌰𑌤 𑌪𑌿𑌤𑍃𑌪𑍈𑌤𑌾𑌮𑌹𑌂 𑌧𑍍𑌰𑍁𑌵𑌮𑍍 ।
𑌅𑌭𑌿𑌷𑍇𑌚𑌯 𑌚𑌾𑌤𑍍𑌮𑌾𑌨𑌂 𑌪𑌾𑌹𑌿 𑌚𑌾𑌸𑍍𑌮𑌾𑌨𑍍𑌨𑌰𑌰𑍍𑌷𑌭 ॥ 5 ॥

𑌅𑌭𑌿𑌷𑍇𑌚𑌨𑌿𑌕𑌂 𑌭𑌾𑌂𑌡𑌂 𑌕𑍃𑌤𑍍𑌵𑌾 𑌸𑌰𑍍𑌵𑌂 𑌪𑍍𑌰𑌦𑌕𑍍𑌷𑌿𑌣𑌮𑍍 ।
𑌭𑌰𑌤𑌸𑍍𑌤𑌂 𑌜𑌨𑌂 𑌸𑌰𑍍𑌵𑌂 𑌪𑍍𑌰𑌤𑍍𑌯𑍁𑌵𑌾𑌚 𑌧𑍃𑌤𑌵𑍍𑌰𑌤𑌃 ॥ 6 ॥

𑌜𑍍𑌯𑍇𑌷𑍍𑌠𑌸𑍍𑌯 𑌰𑌾𑌜𑌤𑌾 𑌨𑌿𑌤𑍍𑌯𑌮𑍁𑌚𑌿𑌤𑌾 𑌹𑌿 𑌕𑍁𑌲𑌸𑍍𑌯 𑌨𑌃 ।
𑌨𑍈𑌵𑌂 𑌭𑌵𑌂𑌤𑍋 𑌮𑌾𑌂 𑌵𑌕𑍍𑌤𑍁𑌮𑌰𑍍𑌹𑌂𑌤𑌿 𑌕𑍁𑌶𑌲𑌾 𑌜𑌨𑌾𑌃 ॥ 𑍭 ॥

𑌰𑌾𑌮𑌃 𑌪𑍂𑌰𑍍𑌵𑍋 𑌹𑌿 𑌨𑍋 𑌭𑍍𑌰𑌾𑌤𑌾 𑌭𑌵𑌿𑌷𑍍𑌯𑌤𑌿 𑌮𑌹𑍀𑌪𑌤𑌿𑌃 ।
𑌅𑌹𑌂 𑌤𑍍𑌵𑌰𑌣𑍍𑌯𑍇 𑌵𑌤𑍍𑌸𑍍𑌯𑌾𑌮𑌿 𑌵𑌰𑍍𑌷𑌾𑌣𑌿 𑌨𑌵 𑌪𑌂𑌚 𑌚 ॥ 𑍮 ॥

𑌯𑍁𑌜𑍍𑌯𑌤𑌾𑌂 𑌮𑌹𑌤𑍀 𑌸𑍇𑌨𑌾 𑌚𑌤𑍁𑌰𑌂𑌗𑌮𑌹𑌾𑌬𑌲𑌾 ।
𑌆𑌨𑌯𑌿𑌷𑍍𑌯𑌾𑌮𑍍𑌯𑌹𑌂 𑌜𑍍𑌯𑍇𑌷𑍍𑌠𑌂 𑌭𑍍𑌰𑌾𑌤𑌰𑌂 𑌰𑌾𑌘𑌵𑌂 𑌵𑌨𑌾𑌤𑍍 ॥ 𑍯 ॥

𑌅𑌭𑌿𑌷𑍇𑌚𑌨𑌿𑌕𑌂 𑌚𑍈𑌵 𑌸𑌰𑍍𑌵𑌮𑍇𑌤𑌦𑍁𑌪𑌸𑍍𑌕𑍃𑌤𑌮𑍍 ।
𑌪𑍁𑌰𑌸𑍍𑌕𑍃𑌤𑍍𑌯 𑌗𑌮𑌿𑌷𑍍𑌯𑌾𑌮𑌿 𑌰𑌾𑌮𑌹𑍇𑌤𑍋𑌰𑍍𑌵𑌨𑌂 𑌪𑍍𑌰𑌤𑌿 ॥ 10 ॥

𑌤𑌤𑍍𑌰𑍈𑌵𑌂 𑌤𑌂 𑌨𑌰𑌵𑍍𑌯𑌾𑌘𑍍𑌰𑌮𑌭𑌿𑌷𑌿𑌚𑍍𑌯 𑌪𑍁𑌰𑌸𑍍𑌕𑍃𑌤𑌮𑍍 ।
𑌆𑌨𑍇𑌷𑍍𑌯𑌾𑌮𑌿 𑌤𑍁 𑌵𑍈 𑌰𑌾𑌮𑌂 𑌹𑌵𑍍𑌯𑌵𑌾𑌹𑌮𑌿𑌵𑌾𑌧𑍍𑌵𑌰𑌾𑌤𑍍 ॥ 11 ॥

𑌨 𑌸𑌕𑌾𑌮𑌾𑌂 𑌕𑌰𑌿𑌷𑍍𑌯𑌾𑌮𑌿 𑌸𑍍𑌵𑌾𑌮𑌿𑌮𑌾𑌂 𑌮𑌾𑌤𑍃𑌗𑌂𑌧𑌿𑌨𑍀𑌮𑍍 ।
𑌵𑌨𑍇 𑌵𑌤𑍍𑌸𑍍𑌯𑌾𑌮𑍍𑌯𑌹𑌂 𑌦𑍁𑌰𑍍𑌗𑍇 𑌰𑌾𑌮𑍋 𑌰𑌾𑌜𑌾 𑌭𑌵𑌿𑌷𑍍𑌯𑌤𑌿 ॥ 12 ॥

𑌕𑍍𑌰𑌿𑌯𑌤𑌾𑌂 𑌶𑌿𑌲𑍍𑌪𑌿𑌭𑌿𑌃 𑌪𑌂𑌥𑌾 𑌸𑍍𑌸𑌮𑌾𑌨𑌿 𑌵𑌿𑌷𑌮𑌾𑌣𑌿 𑌚 ।
𑌰𑌕𑍍𑌷𑌿𑌣𑌶𑍍𑌚𑌾𑌨𑍁𑌸𑌮𑍍𑌯𑌾𑌂𑌤𑍁 𑌪𑌥𑌿 𑌦𑍁𑌰𑍍𑌗𑌵𑌿𑌚𑌾𑌰𑌕𑌾𑌃 ॥ 13 ॥

𑌏𑌵𑌂 𑌸𑌂𑌭𑌾𑌷𑌮𑌾𑌣𑌂 𑌤𑌂 𑌰𑌾𑌮𑌹𑍇𑌤𑍋𑌰𑍍𑌨𑍃𑌪𑌾𑌤𑍍𑌮𑌜𑌮𑍍 ।
𑌪𑍍𑌰𑌤𑍍𑌯𑍁𑌵𑌾𑌚 𑌜𑌨𑌸𑍍𑌸𑌰𑍍𑌵 𑌶𑍍𑌶𑍍𑌰𑍀𑌮𑌦𑍍𑌵𑌾𑌕𑍍𑌯𑌮𑌨𑍁𑌤𑍍𑌤𑌮𑌮𑍍 ॥ 14 ॥

𑌏𑌵𑌂 𑌤𑍇 𑌭𑌾𑌷𑌮𑌾𑌣𑌸𑍍𑌯 𑌪𑌦𑍍𑌮𑌾 𑌶𑍍𑌰𑍀𑌰𑍁𑌪𑌤𑌿𑌷𑍍𑌠𑌤𑌾𑌤𑍍 ।
𑌯𑌸𑍍𑌤𑍍𑌵𑌂 𑌜𑍍𑌯𑍇𑌷𑍍𑌠𑍇 𑌨𑍃𑌪𑌸𑍁𑌤𑍇 𑌪𑍃𑌥𑌿𑌵𑍀𑌂 𑌦𑌾𑌤𑍁𑌮𑌿𑌚𑍍𑌛𑌸𑌿 ॥ 15 ॥

𑌅𑌨𑍁𑌤𑍍𑌤𑌮𑌂 𑌤𑌦𑍍𑌵𑌚𑌨𑌂 𑌨𑍃𑌪𑌾𑌤𑍍𑌮𑌜𑌪𑍍𑌰𑌭𑌾𑌷𑌿𑌤𑌂 𑌸𑌂𑌶𑍍𑌰𑌵𑌣𑍇 𑌨𑌿𑌶𑌮𑍍𑌯 𑌚 ।
𑌪𑍍𑌰𑌹𑌰𑍍𑌷𑌜𑌾𑌸𑍍𑌤𑌂 𑌪𑍍𑌰𑌤𑌿 𑌬𑌾𑌷𑍍𑌪𑌬𑌿𑌂𑌦𑌵𑍋 𑌨𑌿𑌪𑍇𑌤𑍁𑌰𑌾𑌰𑍍𑌯𑌾𑌨𑌨𑌨𑍇𑌤𑍍𑌰𑌸𑌂𑌭𑌵𑌾𑌃 ॥ 16 ॥

𑌊𑌚𑍁𑌸𑍍𑌤𑍇 𑌵𑌚𑌨𑌮𑌿𑌦𑌂 𑌨𑌿𑌶𑌮𑍍𑌯 𑌹𑍃𑌷𑍍𑌟𑌾 𑌸𑍍𑌸𑌾𑌮𑌾𑌤𑍍𑌯𑌾 𑌸𑍍𑌸𑌪𑌰𑌿𑌷𑌦𑍋 𑌵𑌿𑌯𑌾𑌤𑌶𑍋𑌕𑌾𑌃 ।
𑌪𑌂𑌥𑌾𑌨𑌂 𑌨𑌰𑌵𑌰 𑌭𑌕𑍍𑌤𑌿𑌮𑌾𑌨𑍍 𑌜𑌨𑌶𑍍𑌚 𑌵𑍍𑌯𑌾𑌦𑌿𑌷𑍍𑌟𑌸𑍍𑌤𑌵 𑌵𑌚𑌨𑌾𑌚𑍍𑌚 𑌶𑌿𑌲𑍍𑌪𑌿𑌵𑌰𑍍𑌗𑌃 ॥ 1𑍭 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌏𑌕𑍋𑌨𑌾𑌶𑍀𑌤𑌿𑌤𑌮𑌸𑍍𑌸𑌰𑍍𑌗𑌃 ॥

Browse Related Categories: