𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌖𑌰𑌂 𑌤𑍁 𑌵𑌿𑌰𑌥𑌂 𑌰𑌾𑌮𑍋 𑌗𑌦𑌾𑌪𑌾𑌣𑌿𑌮𑌵𑌸𑍍𑌥𑌿𑌤𑌮𑍍 ।
𑌮𑍃𑌦𑍁𑌪𑍂𑌰𑍍𑌵𑌂 𑌮𑌹𑌾𑌤𑍇𑌜𑌾𑌃 𑌪𑌰𑍁𑌷𑌂 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 1 ॥
𑌗𑌜𑌾𑌶𑍍𑌵𑌰𑌥𑌸𑌂𑌬𑌾𑌧𑍇 𑌬𑌲𑍇 𑌮𑌹𑌤𑌿 𑌤𑌿𑌷𑍍𑌠𑌤𑌾 ।
𑌕𑍃𑌤𑌂 𑌸𑍁𑌦𑌾𑌰𑍁𑌣𑌂 𑌕𑌰𑍍𑌮 𑌸𑌰𑍍𑌵𑌲𑍋𑌕𑌜𑍁𑌗𑍁𑌪𑍍𑌸𑌿𑌤𑌮𑍍 ॥ 2 ॥
𑌉𑌦𑍍𑌵𑍇𑌜𑌨𑍀𑌯𑍋 𑌭𑍂𑌤𑌾𑌨𑌾𑌂 𑌨𑍃𑌶𑌂𑌸𑌃 𑌪𑌾𑌪𑌕𑌰𑍍𑌮𑌕𑍃𑌤𑍍 ।
𑌤𑍍𑌰𑌯𑌾𑌣𑌾𑌮𑌪𑌿 𑌲𑍋𑌕𑌾𑌨𑌾𑌮𑍀𑌶𑍍𑌵𑌰𑍋𑌽𑌪𑌿 𑌨 𑌤𑌿𑌷𑍍𑌠𑌤𑌿 ॥ 3 ॥
𑌕𑌰𑍍𑌮 𑌲𑍋𑌕𑌵𑌿𑌰𑍁𑌦𑍍𑌧𑌂 𑌤𑍁 𑌕𑍁𑌰𑍍𑌵𑌾𑌣𑌂 𑌕𑍍𑌷𑌣𑌦𑌾𑌚𑌰 ।
𑌤𑍀𑌕𑍍𑌷𑍍𑌣𑌂 𑌸𑌰𑍍𑌵𑌜𑌨𑍋 𑌹𑌂𑌤𑌿 𑌸𑌰𑍍𑌪𑌂 𑌦𑍁𑌷𑍍𑌟𑌮𑌿𑌵𑌾𑌗𑌤𑌮𑍍 ॥ 4 ॥
𑌲𑍋𑌭𑌾𑌤𑍍𑌪𑌾𑌪𑌾𑌨𑌿 𑌕𑍁𑌰𑍍𑌵𑌾𑌣𑌃 𑌕𑌾𑌮𑌾𑌦𑍍𑌵𑌾 𑌯𑍋 𑌨 𑌬𑍁𑌧𑍍𑌯𑌤𑍇 ।
𑌭𑍍𑌰𑌷𑍍𑌟𑌃 𑌪𑌶𑍍𑌯𑌤𑌿 𑌤𑌸𑍍𑌯𑌾𑌂𑌤𑌂 𑌬𑍍𑌰𑌾𑌹𑍍𑌮𑌣𑍀 𑌕𑌰𑌕𑌾𑌦𑌿𑌵 ॥ 5 ॥
𑌵𑌸𑌤𑍋 𑌦𑌂𑌡𑌕𑌾𑌰𑌣𑍍𑌯𑍇 𑌤𑌾𑌪𑌸𑌾𑌂𑌧𑌰𑍍𑌮𑌚𑌾𑌰𑌿𑌣𑌃 ।
𑌕𑌿𑌨𑍍𑌨𑍁 𑌹𑌤𑍍𑌵𑌾 𑌮𑌹𑌾𑌭𑌾𑌗𑌾𑌨𑍍𑌫𑌲𑌂 𑌪𑍍𑌰𑌾𑌪𑍍𑌸𑍍𑌯𑌸𑌿 𑌰𑌾𑌕𑍍𑌷𑌸 ॥ 6 ॥
𑌨 𑌚𑌿𑌰𑌂 𑌪𑌾𑌪𑌕𑌰𑍍𑌮𑌾𑌣𑌃 𑌕𑍍𑌰𑍂𑌰𑌾 𑌲𑍋𑌕𑌜𑍁𑌗𑍁𑌪𑍍𑌸𑌿𑌤𑌾𑌃 ।
𑌐𑌶𑍍𑌵𑌰𑍍𑌯𑌂 𑌪𑍍𑌰𑌾𑌪𑍍𑌯 𑌤𑌿𑌷𑍍𑌠𑌂𑌤𑌿 𑌶𑍀𑌰𑍍𑌣𑌮𑍂𑌲𑌾 𑌇𑌵 𑌦𑍍𑌰𑍁𑌮𑌾𑌃 ॥ ॥
𑌅𑌵𑌶𑍍𑌯𑌂 𑌲𑌭𑌤𑍇 𑌜𑌂𑌤𑍁𑌃 𑌫𑌲𑌂 𑌪𑌾𑌪𑌸𑍍𑌯 𑌕𑌰𑍍𑌮𑌣𑌃 ।
𑌘𑍋𑌰𑌂 𑌪𑌰𑍍𑌯𑌾𑌗𑌤𑍇 𑌕𑌾𑌲𑍇 𑌦𑍍𑌰𑍁𑌮𑌾𑌃 𑌪𑍁𑌷𑍍𑌪𑌮𑌿𑌵𑌾𑌰𑍍𑌤𑌵𑌮𑍍 ॥ ॥
𑌨𑌚𑌿𑌰𑌾𑌤𑍍𑌪𑍍𑌰𑌾𑌪𑍍𑌯𑌤𑍇 𑌲𑍋𑌕𑍇 𑌪𑌾𑌪𑌾𑌨𑌾𑌂 𑌕𑌰𑍍𑌮𑌣𑌾𑌂 𑌫𑌲𑌮𑍍 ।
𑌸𑌵𑌿𑌷𑌾𑌣𑌾𑌮𑌿𑌵𑌾𑌨𑍍𑌨𑌾𑌨𑌾𑌂 𑌭𑍁𑌕𑍍𑌤𑌾𑌨𑌾𑌂 𑌕𑍍𑌷𑌣𑌦𑌾𑌚𑌰 ॥ ॥
𑌪𑌾𑌪𑌮𑌾𑌚𑌰𑌤𑌾𑌂 𑌘𑍋𑌰𑌂 𑌲𑍋𑌕𑌸𑍍𑌯𑌾𑌪𑍍𑌰𑌿𑌯𑌮𑌿𑌚𑍍𑌛𑌤𑌾𑌮𑍍 ।
𑌅𑌹𑌮𑌾𑌸𑌾𑌦𑌿𑌤𑍋 𑌰𑌾𑌜𑌾 𑌪𑍍𑌰𑌾𑌣𑌾𑌨𑍍𑌹𑌂𑌤𑍁𑌂 𑌨𑌿𑌶𑌾𑌚𑌰 ॥ 10 ॥
𑌅𑌦𑍍𑌯 𑌹𑌿 𑌤𑍍𑌵𑌾𑌂 𑌮𑌯𑌾 𑌮𑍁𑌕𑍍𑌤𑌾𑌶𑍍𑌶𑌰𑌾𑌃 𑌕𑌾𑌂𑌚𑌨𑌭𑍂𑌷𑌣𑌾𑌃 ।
𑌵𑌿𑌦𑌾𑌰𑍍𑌯𑌾𑌤𑌿𑌪𑌤𑌿𑌷𑍍𑌯𑌂𑌤𑌿 𑌵𑌲𑍍𑌮𑍀𑌕𑌮𑌿𑌵 𑌪𑌨𑍍𑌨𑌗𑌾𑌃 ॥ 11 ॥
𑌯𑍇 𑌤𑍍𑌵𑌯𑌾 𑌦𑌂𑌡𑌕𑌾𑌰𑌣𑍍𑌯𑍇 𑌭𑌕𑍍𑌷𑌿𑌤𑌾 𑌧𑌰𑍍𑌮𑌚𑌾𑌰𑌿𑌣𑌃 ।
𑌤𑌾𑌨𑌦𑍍𑌯 𑌨𑌿𑌹𑌤𑌸𑍍𑌸𑌂𑌖𑍍𑌯𑍇 𑌸𑌸𑍈𑌨𑍍𑌯𑍋𑌽𑌨𑍁𑌗𑌮𑌿𑌷𑍍𑌯𑌸𑌿 ॥ 12 ॥
𑌅𑌦𑍍𑌯 𑌤𑍍𑌵𑌾𑌂 𑌨𑌿𑌹𑌤𑌂 𑌬𑌾𑌣𑍈𑌃 𑌪𑌶𑍍𑌯𑌂𑌤𑍁 𑌪𑌰𑌮𑌰𑍍𑌷𑌯𑌃 ।
𑌨𑌿𑌰𑌯𑌸𑍍𑌥𑌂 𑌵𑌿𑌮𑌾𑌨𑌸𑍍𑌥𑌾 𑌯𑍇 𑌤𑍍𑌵𑌯𑌾 𑌹𑌿𑌂𑌸𑌿𑌤𑌾𑌃 𑌪𑍁𑌰𑌾 ॥ 13 ॥
𑌪𑍍𑌰𑌹𑌰 𑌤𑍍𑌵𑌂 𑌯𑌥𑌾𑌕𑌾𑌮𑌂 𑌕𑍁𑌰𑍁 𑌯𑌤𑍍𑌨𑌂 𑌕𑍁𑌲𑌾𑌧𑌮 ।
𑌅𑌦𑍍𑌯 𑌤𑍇 𑌪𑌾𑌤𑌯𑌿𑌷𑍍𑌯𑌾𑌮𑌿 𑌶𑌿𑌰𑌸𑍍𑌤𑌾𑌲𑌫𑌲𑌂 𑌯𑌥𑌾 ॥ 14 ॥
𑌏𑌵𑌮𑍁𑌕𑍍𑌤𑌸𑍍𑌤𑍁 𑌰𑌾𑌮𑍇𑌣 𑌕𑍃𑌦𑍍𑌧𑌸𑍍𑌸𑌂𑌰𑌕𑍍𑌤𑌲𑍋𑌚𑌨𑌃 ।
𑌪𑍍𑌰𑌤𑍍𑌯𑍁𑌵𑌾𑌚 𑌖𑌰𑍋 𑌰𑌾𑌮𑌂 𑌪𑍍𑌰𑌹𑌸𑌨𑍍𑌕𑍍𑌰𑍋𑌧𑌮𑍂𑌰𑍍𑌛𑌿𑌤𑌃 ॥ 15 ॥
𑌪𑍍𑌰𑌾𑌕𑍃𑌤𑌾𑌨𑍍𑌰𑌾𑌕𑍍𑌷𑌸𑌾𑌨𑍍𑌹𑌤𑍍𑌵𑌾 𑌯𑍁𑌦𑍍𑌧𑍇 𑌦𑌶𑌰𑌥𑌾𑌤𑍍𑌮𑌜 ।
𑌆𑌤𑍍𑌮𑌨𑌾 𑌕𑌥𑌮𑌾𑌤𑍍𑌮𑌾𑌨𑌮𑌪𑍍𑌰𑌶𑌸𑍍𑌯𑌂 𑌪𑍍𑌰𑌶𑌂𑌸𑌸𑌿 ॥ 16 ॥
𑌵𑌿𑌕𑍍𑌰𑌾𑌂𑌤𑌾 𑌬𑌲𑌵𑌂𑌤𑍋 𑌵𑌾 𑌯𑍇 𑌭𑌵𑌂𑌤𑌿 𑌨𑌰𑌰𑍍𑌷𑌭𑌾𑌃 ।
𑌕𑌥𑌯𑌂𑌤𑌿 𑌨 𑌤𑍇 𑌕𑌿𑌂𑌚𑌿𑌤𑍍𑌤𑍇𑌜𑌸𑌾 𑌸𑍍𑌵𑍇𑌨 𑌗𑌰𑍍𑌵𑌿𑌤𑌾𑌃 ॥ 1 ॥
𑌪𑍍𑌰𑌾𑌕𑍃𑌤𑌾𑌸𑍍𑌤𑍍𑌵𑌕𑍃𑌤𑌾𑌤𑍍𑌮𑌾𑌨𑍋 𑌲𑍋𑌕𑍇 𑌕𑍍𑌷𑌤𑍍𑌰𑌿𑌯𑌪𑌾𑌂𑌸𑌨𑌾𑌃 ।
𑌨𑌿𑌰𑌰𑍍𑌥𑌕𑌂 𑌵𑌿𑌕𑌤𑍍𑌥𑌂𑌤𑍇 𑌯𑌥𑌾 𑌰𑌾𑌮 𑌵𑌿𑌕𑌤𑍍𑌥𑌸𑍇 ॥ 1 ॥
𑌕𑍁𑌲𑌂 𑌵𑍍𑌯𑌪𑌦𑌿𑌶𑌨𑍍𑌵𑍀𑌰𑌸𑍍𑌸𑌮𑌰𑍇 𑌕𑍋𑌽𑌭𑌿𑌧𑌾𑌸𑍍𑌯𑌤𑌿 ।
𑌮𑍃𑌤𑍍𑌯𑍁𑌕𑌾𑌲𑍇 𑌹𑌿 𑌸𑌂𑌪𑍍𑌰𑌾𑌪𑍍𑌤𑍇 𑌸𑍍𑌵𑌯𑌮𑌪𑍍𑌰𑌸𑍍𑌤𑌵𑍇 𑌸𑍍𑌤𑌵𑌮𑍍 ॥ 1 ॥
𑌸𑌰𑍍𑌵𑌥𑍈𑌵 𑌲𑌘𑍁𑌤𑍍𑌵𑌂 𑌤𑍇 𑌕𑌤𑍍𑌥𑌨𑍇𑌨 𑌵𑌿𑌦𑌰𑍍𑌶𑌿𑌤𑌮𑍍 ।
𑌸𑍁𑌵𑌰𑍍𑌣𑌪𑍍𑌰𑌤𑌿𑌰𑍂𑌪𑍇𑌣 𑌤𑌪𑍍𑌤𑍇𑌨𑍇𑌵 𑌕𑍁𑌶𑌾𑌗𑍍𑌨𑌿𑌨𑌾 ॥ 20 ॥
𑌨 𑌤𑍁 𑌮𑌾𑌮𑌿𑌹 𑌤𑌿𑌷𑍍𑌠𑌂𑌤𑌂 𑌪𑌶𑍍𑌯𑌸𑌿 𑌤𑍍𑌵𑌂 𑌗𑌦𑌾𑌧𑌰𑌮𑍍 ।
𑌧𑌰𑌾𑌧𑌰𑌮𑌿𑌵𑌾𑌕𑌂𑌪𑍍𑌯𑌂 𑌪𑌰𑍍𑌵𑌤𑌂 𑌧𑌾𑌤𑍁𑌭𑌿𑌶𑍍𑌚𑌿𑌤𑌮𑍍 ॥ 21 ॥
𑌪𑌰𑍍𑌯𑌾𑌪𑍍𑌤𑍋𑌽𑌹𑌂 𑌗𑌦𑌾𑌪𑌾𑌣𑌿𑌰𑍍𑌹𑌂𑌤𑍁𑌂 𑌪𑍍𑌰𑌾𑌣𑌾𑌨𑍍𑌰𑌣𑍇 𑌤𑌵 ।
𑌤𑍍𑌰𑌯𑌾𑌣𑌾𑌮𑌪𑌿 𑌲𑍋𑌕𑌾𑌨𑌾𑌂 𑌪𑌾𑌶𑌹𑌸𑍍𑌤 𑌇𑌵𑌾𑌂𑌤𑌕𑌃 ॥ 22 ॥
𑌕𑌾𑌮𑌂 𑌬𑌹𑍍𑌵𑌪𑌿 𑌵𑌕𑍍𑌤𑌵𑍍𑌯𑌂 𑌤𑍍𑌵𑌯𑌿 𑌵𑌕𑍍𑌷𑍍𑌯𑌾𑌮𑌿 𑌨 𑌤𑍍𑌵𑌹𑌮𑍍 ।
𑌅𑌸𑍍𑌤𑌂 𑌗𑌚𑍍𑌛𑍇𑌦𑍍𑌧𑌿 𑌸𑌵𑌿𑌤𑌾 𑌯𑍁𑌦𑍍𑌧𑌵𑌿𑌘𑍍𑌨𑌸𑍍𑌤𑌤𑍋 𑌭𑌵𑍇𑌤𑍍 ॥ 23 ॥
𑌚𑌤𑍁𑌰𑍍𑌦𑌶 𑌸𑌹𑌸𑍍𑌰𑌾𑌣𑌿 𑌰𑌾𑌕𑍍𑌷𑌸𑌾𑌨𑌾𑌂 𑌹𑌤𑌾𑌨𑌿 𑌤𑍇 ।
𑌤𑍍𑌵𑌦𑍍𑌵𑌿𑌨𑌾𑌶𑌾𑌤𑍍𑌕𑌰𑍋𑌮𑍍𑌯𑍇𑌷𑌾𑌂 𑌤𑍇𑌷𑌾𑌮𑌶𑍍𑌰𑍁𑌪𑍍𑌰𑌮𑌾𑌰𑍍𑌜𑌨𑌮𑍍 ॥ 24 ॥
𑌇𑌤𑍍𑌯𑍁𑌕𑍍𑌤𑍍𑌵𑌾 𑌪𑌰𑌮𑌕𑍍𑌰𑍁𑌦𑍍𑌧𑌸𑍍𑌤𑌾𑌂 𑌗𑌦𑌾𑌂 𑌪𑌰𑌮𑌾𑌂𑌗𑌦𑌃 ।
𑌖𑌰𑌶𑍍𑌚𑌿𑌕𑍍𑌷𑍇𑌪 𑌰𑌾𑌮𑌾𑌯 𑌪𑍍𑌰𑌦𑍀𑌪𑍍𑌤𑌾𑌮𑌶𑌨𑌿𑌂 𑌯𑌥𑌾 ॥ 25 ॥
𑌖𑌰𑌬𑌾𑌹𑍁𑌪𑍍𑌰𑌯𑍁𑌕𑍍𑌤𑌾 𑌸𑌾 𑌪𑍍𑌰𑌦𑍀𑌪𑍍𑌤𑌾 𑌮𑌹𑌤𑍀 𑌗𑌦𑌾 ।
𑌭𑌸𑍍𑌮𑌵𑍃𑌕𑍍𑌷𑌾𑌂𑌶𑍍𑌚 𑌗𑍁𑌲𑍍𑌮𑌾𑌂𑌶𑍍𑌚 𑌕𑍃𑌤𑍍𑌵𑌾𑌗𑌾𑌤𑍍𑌤𑌤𑍍𑌸𑌮𑍀𑌪𑌤𑌃 ॥ 26 ॥
𑌤𑌾𑌮𑌾𑌪𑌤𑌂𑌤𑍀𑌂 𑌜𑍍𑌵𑌲𑌤𑌾𑌂 𑌮𑍃𑌤𑍍𑌯𑍁𑌪𑌾𑌶𑍋𑌪𑌮𑌾𑌂 𑌗𑌦𑌾𑌮𑍍 ।
𑌅𑌂𑌤𑌰𑌿𑌕𑍍𑌷𑌗𑌤𑌾𑌂 𑌰𑌾𑌮𑌚𑌶𑌿𑌚𑍍𑌛𑍇𑌦 𑌬𑌹𑍁𑌧𑌾 𑌶𑌰𑍈𑌃 ॥ 2 ॥
𑌸𑌾 𑌵𑌿𑌕𑍀𑌰𑍍𑌣𑌾 𑌶𑌰𑍈𑌰𑍍𑌭𑌗𑍍𑌨𑌾 𑌪𑌪𑌾𑌤 𑌧𑌰𑌣𑍀𑌤𑌲𑍇 ।
𑌗𑌦𑌾 𑌮𑌂𑌤𑍍𑌰𑍌𑌷𑌧𑌬𑌲𑍈𑌰𑍍𑌵𑍍𑌯𑌾𑌲𑍀𑌵 𑌵𑌿𑌨𑌿𑌪𑌾𑌤𑌿𑌤𑌾 ॥ 2 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌏𑌕𑍋𑌨𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
