𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌰𑍍𑌥𑌸𑍍𑌸𑌰𑍍𑌗𑌃 ।
𑌸 𑌨𑌿𑌰𑍍𑌜𑌿𑌤𑍍𑌯 𑌪𑍁𑌰𑍀𑌂 𑌶𑍍𑌰𑍇𑌷𑍍𑌠𑌾𑌂 𑌲𑌂𑌕𑌾𑌂 𑌤𑌾𑌂 𑌕𑌾𑌮𑌰𑍂𑌪𑌿𑌣𑍀𑌮𑍍 ।
𑌵𑌿𑌕𑍍𑌰𑌮𑍇𑌣 𑌮𑌹𑌾𑌤𑍇𑌜𑌾 𑌹𑌨𑍁𑌮𑌾𑌨𑍍 𑌕𑌪𑌿𑌸𑌤𑍍𑌤𑌮𑌃 ॥ 1 ॥
𑌅𑌦𑍍𑌵𑌾𑌰𑍇𑌣 𑌚 𑌮𑌹𑌾𑌬𑌾𑌹𑍁𑌃 𑌪𑍍𑌰𑌾𑌕𑌾𑌰𑌮𑌭𑌿𑌪𑍁𑌪𑍍𑌲𑍁𑌵𑍇 ।
𑌪𑍍𑌰𑌵𑌿𑌶𑍍𑌯 𑌨𑌗𑌰𑍀𑌂 𑌲𑌂𑌕𑌾𑌂 𑌕𑌪𑌿𑌰𑌾𑌜𑌹𑌿𑌤𑌂𑌕𑌰𑌃 ॥ 2 ॥
𑌚𑌕𑍍𑌰𑍇𑌽𑌥 𑌪𑌾𑌦𑌂 𑌸𑌵𑍍𑌯𑌂 𑌚 𑌶𑌤𑍍𑌰𑍂𑌣𑌾𑌂 𑌸 𑌤𑍁 𑌮𑍂𑌰𑍍𑌧𑌨𑌿 ।
𑌪𑍍𑌰𑌵𑌿𑌷𑍍𑌟𑌃 𑌸𑌤𑍍𑌤𑍍𑌵𑌸𑌂𑌪𑌨𑍍𑌨𑍋 𑌨𑌿𑌶𑌾𑌯𑌾𑌂 𑌮𑌾𑌰𑍁𑌤𑌾𑌤𑍍𑌮𑌜𑌃 ॥ 3 ॥
𑌸 𑌮𑌹𑌾𑌪𑌥𑌮𑌾𑌸𑍍𑌥𑌾𑌯 𑌮𑍁𑌕𑍍𑌤𑌾𑌪𑍁𑌷𑍍𑌪𑌵𑌿𑌰𑌾𑌜𑌿𑌤𑌮𑍍 ।
𑌤𑌤𑌸𑍍𑌤𑍁 𑌤𑌾𑌂 𑌪𑍁𑌰𑍀𑌂 𑌲𑌂𑌕𑌾𑌂 𑌰𑌮𑍍𑌯𑌾𑌮𑌭𑌿𑌯𑌯𑍌 𑌕𑌪𑌿𑌃 ॥ 4 ॥
𑌹𑌸𑌿𑌤𑍋𑌤𑍍𑌕𑍃𑌷𑍍𑌟𑌨𑌿𑌨𑌦𑍈𑌸𑍍𑌤𑍂𑌰𑍍𑌯𑌘𑍋𑌷𑌪𑍁𑌰𑌸𑍍𑌸𑌰𑍈𑌃 ।
𑌵𑌜𑍍𑌰𑌾𑌂𑌕𑍁𑌶𑌨𑌿𑌕𑌾𑌶𑍈𑌶𑍍𑌚 𑌵𑌜𑍍𑌰𑌜𑌾𑌲𑌵𑌿𑌭𑍂𑌷𑌿𑌤𑍈𑌃 ॥ 5 ॥
𑌗𑍃𑌹𑌮𑍇𑌘𑍈𑌃 𑌪𑍁𑌰𑍀 𑌰𑌮𑍍𑌯𑌾 𑌬𑌭𑌾𑌸𑍇 𑌦𑍍𑌯𑍌𑌰𑌿𑌵𑌾𑌂𑌬𑍁𑌦𑍈𑌃 ।
𑌪𑍍𑌰𑌜𑌜𑍍𑌵𑌾𑌲 𑌤𑌤𑍋 𑌲𑌂𑌕𑌾 𑌰𑌕𑍍𑌷𑍋𑌗𑌣𑌗𑍃𑌹𑍈𑌃 𑌶𑍁𑌭𑍈𑌃 ॥ 6 ॥
𑌸𑌿𑌤𑌾𑌭𑍍𑌰𑌸𑌦𑍃𑌶𑍈𑌶𑍍𑌚𑌿𑌤𑍍𑌰𑍈𑌃 𑌪𑌦𑍍𑌮𑌸𑍍𑌵𑌸𑍍𑌤𑌿𑌕𑌸𑌂𑌸𑍍𑌥𑌿𑌤𑍈𑌃 ।
𑌵𑌰𑍍𑌧𑌮𑌾𑌨𑌗𑍃𑌹𑍈𑌶𑍍𑌚𑌾𑌪𑌿 𑌸𑌰𑍍𑌵𑌤𑌃 𑌸𑍁𑌵𑌿𑌭𑍂𑌷𑌿𑌤𑌾 ॥ ॥
𑌤𑌾𑌂 𑌚𑌿𑌤𑍍𑌰𑌮𑌾𑌲𑍍𑌯𑌾𑌭𑌰𑌣𑌾𑌂 𑌕𑌪𑌿𑌰𑌾𑌜𑌹𑌿𑌤𑌂𑌕𑌰𑌃 ।
𑌰𑌾𑌘𑌵𑌾𑌰𑍍𑌥𑌂 𑌚𑌰𑌨𑍍 𑌶𑍍𑌰𑍀𑌮𑌾𑌨𑍍 𑌦𑌦𑌰𑍍𑌶 𑌚 𑌨𑌨𑌂𑌦 𑌚 ॥ ॥
𑌭𑌵𑌨𑌾𑌦𑍍𑌭𑌵𑌨𑌂 𑌗𑌚𑍍𑌛𑌨𑍍 𑌦𑌦𑌰𑍍𑌶 𑌪𑌵𑌨𑌾𑌤𑍍𑌮𑌜𑌃 ।
𑌵𑌿𑌵𑌿𑌧𑌾𑌕𑍃𑌤𑌿𑌰𑍂𑌪𑌾𑌣𑌿 𑌭𑌵𑌨𑌾𑌨𑌿 𑌤𑌤𑌸𑍍𑌤𑌤𑌃 ॥ ॥
𑌶𑍁𑌶𑍍𑌰𑌾𑌵 𑌮𑌧𑍁𑌰𑌂 𑌗𑍀𑌤𑌂 𑌤𑍍𑌰𑌿𑌸𑍍𑌥𑌾𑌨𑌸𑍍𑌵𑌰𑌭𑍂𑌷𑌿𑌤𑌮𑍍 ।
𑌸𑍍𑌤𑍍𑌰𑍀𑌣𑌾𑌂 𑌮𑌦𑌸𑌮𑍃𑌦𑍍𑌧𑌾𑌨𑌾𑌂 𑌦𑌿𑌵𑌿 𑌚𑌾𑌪𑍍𑌸𑌰𑌸𑌾𑌮𑌿𑌵 ॥ 10 ॥
𑌶𑍁𑌶𑍍𑌰𑌾𑌵 𑌕𑌾𑌂𑌚𑍀𑌨𑌿𑌨𑌦𑌂 𑌨𑍂𑌪𑍁𑌰𑌾𑌣𑌾𑌂 𑌚, 𑌨𑌿𑌃𑌸𑍍𑌵𑌨𑌮𑍍 ।
𑌸𑍋𑌪𑌾𑌨𑌨𑌿𑌨𑌦𑌾𑌂𑌶𑍍𑌚𑍈𑌵 𑌭𑌵𑌨𑍇𑌷𑍁 𑌮𑌹𑌾𑌤𑍍𑌮𑌨𑌾𑌮𑍍 ॥ 11 ॥
𑌅𑌸𑍍𑌫𑍋𑌟𑌿𑌤𑌨𑌿𑌨𑌾𑌦𑌾𑌂𑌶𑍍𑌚 𑌕𑍍𑌷𑍍𑌵𑍇𑌲𑌿𑌤𑌾𑌂𑌶𑍍𑌚 𑌤𑌤𑌸𑍍𑌤𑌤𑌃 ।
𑌶𑍁𑌶𑍍𑌰𑌾𑌵 𑌜𑌪𑌤𑌾𑌂 𑌤𑌤𑍍𑌰 𑌮𑌂𑌤𑍍𑌰𑌾𑌨𑍍 𑌰𑌕𑍍𑌷𑍋𑌗𑍃𑌹𑍇𑌷𑍁 𑌵𑍈 ॥ 12 ॥
𑌸𑍍𑌵𑌾𑌧𑍍𑌯𑌾𑌯𑌨𑌿𑌰𑌤𑌾𑌂𑌶𑍍𑌚𑍈𑌵 𑌯𑌾𑌤𑍁𑌧𑌾𑌨𑌾𑌨𑍍 𑌦𑌦𑌰𑍍𑌶 𑌸𑌃 ।
𑌰𑌾𑌵𑌣𑌸𑍍𑌤𑌵𑌸𑌂𑌯𑍁𑌕𑍍𑌤𑌾𑌨𑍍 𑌗𑌰𑍍𑌜𑌤𑍋 𑌰𑌾𑌕𑍍𑌷𑌸𑌾𑌨𑌪𑌿 ॥ 13 ॥
𑌰𑌾𑌜𑌮𑌾𑌰𑍍𑌗𑌂 𑌸𑌮𑌾𑌵𑍃𑌤𑍍𑌯 𑌸𑍍𑌥𑌿𑌤𑌂 𑌰𑌕𑍍𑌷𑍋𑌬𑌲𑌂 𑌮𑌹𑌤𑍍 ।
𑌦𑌦𑌰𑍍𑌶 𑌮𑌧𑍍𑌯𑌮𑍇 𑌗𑍁𑌲𑍍𑌮𑍇 𑌰𑌾𑌵𑌣𑌸𑍍𑌯 𑌚𑌰𑌾𑌨𑍍 𑌬𑌹𑍂𑌨𑍍 ॥ 14 ॥
𑌦𑍀𑌕𑍍𑌷𑌿𑌤𑌾𑌨𑍍 𑌜𑌟𑌿𑌲𑌾𑌨𑍍 𑌮𑍁𑌂𑌡𑌾𑌨𑍍 𑌗𑍋𑌜𑌿𑌨𑌾𑌂𑌬𑌰𑌵𑌾𑌸𑌸𑌃 ।
𑌦𑌰𑍍𑌭𑌮𑍁𑌷𑍍𑌟𑌿𑌪𑍍𑌰𑌹𑌰𑌣𑌾𑌨𑌗𑍍𑌨𑌿𑌕𑍁𑌂𑌡𑌾𑌯𑍁𑌘𑌾𑌂𑌸𑍍𑌤𑌥𑌾 ॥ 15 ॥
𑌕𑍂𑌟𑌮𑍁𑌦𑍍𑌗𑌰𑌪𑌾𑌣𑍀𑌂𑌶𑍍𑌚 𑌦𑌂𑌡𑌾𑌯𑍁𑌧𑌧𑌰𑌾𑌨𑌪𑌿 ।
𑌏𑌕𑌾𑌕𑍍𑌷𑌾𑌨𑍇𑌕𑌕𑌰𑍍𑌣𑌾𑌂𑌶𑍍𑌚 𑌲𑌂𑌬𑍋𑌦𑌰𑌪𑌯𑍋𑌧𑌰𑌾𑌨𑍍 ॥ 16 ॥
𑌕𑌰𑌾𑌲𑌾𑌨𑍍 𑌭𑍁𑌗𑍍𑌨𑌵𑌕𑍍𑌤𑍍𑌰𑌾𑌂𑌶𑍍𑌚 𑌵𑌿𑌕𑌟𑌾𑌨𑍍 𑌵𑌾𑌮𑌨𑌾𑌂𑌸𑍍𑌤𑌥𑌾 ।
𑌧𑌨𑍍𑌵𑌿𑌨𑌃 𑌖𑌂𑌗𑌿𑌨𑌶𑍍𑌚𑍈𑌵 𑌶𑌤𑌘𑍍𑌨𑍀𑌮𑍁𑌸𑌲𑌾𑌯𑍁𑌧𑌾𑌨𑍍 ॥ 1 ॥
𑌪𑌰𑌿𑌘𑍋𑌤𑍍𑌤𑌮𑌹𑌸𑍍𑌤𑌾𑌂𑌶𑍍𑌚 𑌵𑌿𑌚𑌿𑌤𑍍𑌰𑌕𑌵𑌚𑍋𑌜𑍍𑌜𑍍𑌵𑌲𑌾𑌨𑍍 ।
𑌨𑌾𑌤𑌿𑌸𑍍𑌥𑍂𑌲𑌾𑌨𑍍𑌨𑌾𑌤𑌿𑌕𑍃𑌶𑌾𑌨𑍍𑌨𑌾𑌤𑌿𑌦𑍀𑌰𑍍𑌘𑌾𑌤𑌿𑌹𑍍𑌰𑌸𑍍𑌵𑌕𑌾𑌨𑍍 ॥ 1 ॥
𑌨𑌾𑌤𑌿𑌗𑍌𑌰𑌾𑌨𑍍𑌨𑌾𑌤𑌿𑌕𑍃𑌷𑍍𑌣𑌾𑌨𑍍𑌨𑌾𑌤𑌿𑌕𑍁𑌬𑍍𑌜𑌾𑌨𑍍𑌨 𑌵𑌾𑌮𑌨𑌾𑌨𑍍 ।
𑌵𑌿𑌰𑍂𑌪𑌾𑌨𑍍 𑌬𑌹𑍁𑌰𑍂𑌪𑌾𑌂𑌶𑍍𑌚 𑌸𑍁𑌰𑍂𑌪𑌾𑌂𑌶𑍍𑌚 𑌸𑍁𑌵𑌰𑍍𑌚𑌸𑌃 ॥ 1 ॥
𑌧𑍍𑌵𑌜𑍀𑌨𑍍 𑌪𑌤𑌾𑌕𑌿𑌨𑌶𑍍𑌚𑍈𑌵 𑌦𑌦𑌰𑍍𑌶 𑌵𑌿𑌵𑌿𑌧𑌾𑌯𑍁𑌧𑌾𑌨𑍍 ।
𑌶𑌕𑍍𑌤𑌿𑌵𑍃𑌕𑍍𑌷𑌾𑌯𑍁𑌧𑌾𑌂𑌶𑍍𑌚𑍈𑌵 𑌪𑌟𑍍𑌟𑌿𑌸𑌾𑌶𑌨𑌿𑌧𑌾𑌰𑌿𑌣𑌃 ॥ 20 ॥
𑌕𑍍𑌷𑍇𑌪𑌣𑍀𑌪𑌾𑌶𑌹𑌸𑍍𑌤𑌾𑌂𑌶𑍍𑌚 𑌦𑌦𑌰𑍍𑌶 𑌸 𑌮𑌹𑌾𑌕𑌪𑌿𑌃 ।
𑌸𑍍𑌰𑌗𑍍𑌵𑌿𑌣𑌸𑍍𑌤𑍍𑌵𑌨𑍁𑌲𑌿𑌪𑍍𑌤𑌾𑌂𑌶𑍍𑌚 𑌵𑌰𑌾𑌭𑌰𑌣𑌭𑍂𑌷𑌿𑌤𑌾𑌨𑍍 ॥ 21 ॥
𑌨𑌾𑌨𑌾𑌵𑍇𑌷𑌸𑌮𑌾𑌯𑍁𑌕𑍍𑌤𑌾𑌨𑍍 𑌯𑌥𑌾𑌸𑍍𑌸𑍍𑌵𑍈𑌰𑌗𑌤𑌾𑌨𑍍 𑌬𑌹𑍂𑌨𑍍 ।
𑌤𑍀𑌕𑍍𑌷𑍍𑌣𑌶𑍂𑌲𑌧𑌰𑌾𑌂𑌶𑍍𑌚𑍈𑌵 𑌵𑌜𑍍𑌰𑌿𑌣𑌶𑍍𑌚 𑌮𑌹𑌾𑌬𑌲𑌾𑌨𑍍 ॥ 22 ॥
𑌶𑌤𑌸𑌾𑌹𑌸𑍍𑌰𑌮𑌵𑍍𑌯𑌗𑍍𑌰𑌮𑌾𑌰𑌕𑍍𑌷𑌂 𑌮𑌧𑍍𑌯𑌮𑌂 𑌕𑌪𑌿𑌃 ।
𑌰𑌕𑍍𑌷𑍋𑌧𑌿𑌪𑌤𑌿𑌨𑌿𑌰𑍍𑌦𑌿𑌷𑍍𑌟𑌂 𑌦𑌦𑌰𑍍𑌶𑌾𑌂𑌤𑌃𑌪𑍁𑌰𑌾𑌗𑍍𑌰𑌤𑌃 ॥ 23 ॥
𑌸 𑌤𑌦𑌾 𑌤𑌦𑍍𑌗𑍃𑌹𑌂 𑌦𑍃𑌷𑍍𑌟𑍍𑌵𑌾 𑌮𑌹𑌾𑌹𑌾𑌟𑌕𑌤𑍋𑌰𑌣𑌮𑍍 ।
𑌰𑌾𑌕𑍍𑌷𑌸𑍇𑌂𑌦𑍍𑌰𑌸𑍍𑌯 𑌵𑌿𑌖𑍍𑌯𑌾𑌤𑌮𑌦𑍍𑌰𑌿𑌮𑍂𑌰𑍍𑌧𑍍𑌨𑌿 𑌪𑍍𑌰𑌤𑌿𑌷𑍍𑌠𑌿𑌤𑌮𑍍 ॥ 24 ॥
𑌪𑍁𑌂𑌡𑌰𑍀𑌕𑌾𑌵𑌤𑌂𑌸𑌾𑌭𑌿𑌃 𑌪𑌰𑌿𑌖𑌾𑌭𑌿𑌰𑌲𑌂𑌕𑍃𑌤𑌮𑍍 ।
𑌪𑍍𑌰𑌾𑌕𑌾𑌰𑌾𑌵𑍃𑌤𑌮𑌤𑍍𑌯𑌂𑌤𑌂 𑌦𑌦𑌰𑍍𑌶 𑌸 𑌮𑌹𑌾𑌕𑌪𑌿𑌃 ॥ 25 ॥
𑌤𑍍𑌰𑌿𑌵𑌿𑌷𑍍𑌟𑌪𑌨𑌿𑌭𑌂 𑌦𑌿𑌵𑍍𑌯𑌂 𑌦𑌿𑌵𑍍𑌯𑌨𑌾𑌦𑌨𑌿𑌨𑌾𑌦𑌿𑌤𑌮𑍍 ।
𑌵𑌾𑌜𑌿𑌹𑍇𑌷𑌿𑌤𑌸𑌂𑌘𑍁𑌷𑍍𑌟𑌂 𑌨𑌾𑌦𑌿𑌤𑌂 𑌭𑍂𑌷𑌣𑍈𑌸𑍍𑌤𑌥𑌾 ॥ 26 ॥
𑌰𑌥𑍈𑌰𑍍𑌯𑌾𑌨𑍈𑌰𑍍𑌵𑌿𑌮𑌾𑌨𑍈𑌶𑍍𑌚 𑌤𑌥𑌾 𑌹𑌯𑌗𑌜𑍈𑌃 𑌶𑍁𑌭𑍈𑌃 ।
𑌵𑌾𑌰𑌣𑍈𑌶𑍍𑌚 𑌚𑌤𑍁𑌰𑍍𑌥𑌂𑌤𑍈𑌃 𑌶𑍍𑌵𑍇𑌤𑌾𑌭𑍍𑌰𑌨𑌿𑌚𑌯𑍋𑌪𑌮𑍈𑌃 ॥ 2 ॥
𑌭𑍂𑌷𑌿𑌤𑌂 𑌰𑍁𑌚𑌿𑌰𑌦𑍍𑌵𑌾𑌰𑌂 𑌮𑌤𑍍𑌤𑍈𑌶𑍍𑌚 𑌮𑍃𑌗𑌪𑌕𑍍𑌷𑌿𑌭𑌿𑌃 ।
𑌰𑌕𑍍𑌷𑌿𑌤𑌂 𑌸𑍁𑌮𑌹𑌾𑌵𑍀𑌰𑍍𑌯𑍈𑌰𑍍𑌯𑌾𑌤𑍁𑌧𑌾𑌨𑍈𑌃 𑌸𑌹𑌸𑍍𑌰𑌶𑌃 ।
𑌰𑌾𑌕𑍍𑌷𑌸𑌾𑌧𑌿𑌪𑌤𑍇𑌰𑍍𑌗𑍁𑌪𑍍𑌤𑌮𑌾𑌵𑌿𑌵𑍇𑌶 𑌮𑌹𑌾𑌕𑌪𑌿𑌃 ॥ 2 ॥
𑌸𑌹𑍇𑌮𑌜𑌾𑌂𑌬𑍂𑌨𑌦𑌚𑌕𑍍𑌰𑌵𑌾𑌲𑌂 𑌮𑌹𑌾𑌰𑍍𑌹𑌮𑍁𑌕𑍍𑌤𑌾𑌮𑌣𑌿𑌭𑍂𑌷𑌿𑌤𑌾𑌂𑌤𑌮𑍍 ।
𑌪𑌰𑌾𑌰𑍍𑌥𑍍𑌯𑌕𑌾𑌲𑌾𑌗𑍁𑌰𑍁𑌚𑌂𑌦𑌨𑌾𑌕𑍍𑌤𑌂 𑌸 𑌰𑌾𑌵𑌣𑌾𑌂𑌤𑌃𑌪𑍁𑌰𑌮𑌾𑌵𑌿𑌵𑍇𑌶 ॥ 2 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌚𑌤𑍁𑌰𑍍𑌥𑌸𑍍𑌸𑌰𑍍𑌗𑌃 ॥
