𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।
𑌏𑌤𑌦𑌾𑌖𑍍𑌯𑌾𑌯 𑌤𑌤𑍍𑌸𑌰𑍍𑌵𑌂 𑌹𑌨𑍁𑌮𑌾𑌨𑍍𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌭𑍂𑌯𑌸𑍍𑌸𑌮𑍁𑌪𑌚𑌕𑍍𑌰𑌾𑌮 𑌵𑌚𑌨𑌂 𑌵𑌕𑍍𑌤𑍁𑌮𑍁𑌤𑍍𑌤𑌰𑌮𑍍 ॥ 1 ॥
𑌸𑌫𑌲𑍋 𑌰𑌾𑌘𑌵𑍋𑌦𑍍𑌯𑍋𑌗 𑌸𑍍𑌸𑍁𑌗𑍍𑌰𑍀𑌵𑌸𑍍𑌯 𑌚 𑌸𑌂𑌭𑍍𑌰𑌮𑌃 ।
𑌶𑍀𑌲𑌮𑌾𑌸𑌾𑌦𑍍𑌯 𑌸𑍀𑌤𑌾𑌯𑌾 𑌮𑌮 𑌚 𑌪𑍍𑌰𑌵𑌣𑌂 𑌮𑌨𑌃 ॥ 2 ॥
𑌤𑌪𑌸𑌾 𑌨𑌿𑌰𑍍𑌦𑌹𑍇𑌲𑍍𑌲𑍋𑌕𑌾𑌨𑍍𑌕𑍍𑌰𑍁𑌦𑍍𑌧𑍋 𑌵𑌾 𑌨𑌿𑌰𑍍𑌦𑌹𑍇𑌦𑌪𑌿 ।
𑌸𑌰𑍍𑌵𑌧𑌾𑌤𑌿𑌪𑍍𑌰𑌵𑍃𑌦𑍍𑌧𑍋𑌽𑌸𑍌 𑌰𑌾𑌵𑌣𑍋 𑌰𑌾𑌕𑍍𑌷𑌸𑌾𑌧𑌿𑌪𑌃 ॥ 3 ॥
𑌤𑌸𑍍𑌯 𑌤𑌾𑌂 𑌸𑍍𑌪𑍃𑌶𑌤𑍋 𑌗𑌾𑌤𑍍𑌰𑌂 𑌤𑌪𑌸𑌾 𑌨 𑌵𑌿𑌨𑌾𑌶𑌿𑌤𑌮𑍍 ।
𑌨 𑌤𑌦𑌗𑍍𑌨𑌿𑌶𑌿𑌖𑌾 𑌕𑍁𑌰𑍍𑌯𑌾𑌤𑍍𑌸𑌂𑌸𑍍𑌪𑍃𑌷𑍍𑌟𑌾 𑌪𑌾𑌣𑌿𑌨𑌾 𑌸𑌤𑍀 ॥ 4 ॥
𑌜𑌨𑌕𑌸𑍍𑌯𑌾𑌤𑍍𑌮𑌜𑌾 𑌕𑍁𑌰𑍍𑌯𑌾𑌦𑍍𑌯𑌤𑍍𑌕𑍍𑌰𑍋𑌧𑌕𑌲𑍁𑌷𑍀𑌕𑍃𑌤𑌾 ।
𑌜𑌾𑌂𑌬𑌵𑌤𑍍𑌪𑍍𑌰𑌮𑍁𑌖𑌾𑌨𑍍 𑌸𑌰𑍍𑌵𑌾𑌨𑌨𑍁𑌜𑍍𑌞𑌾𑌪𑍍𑌯 𑌮𑌹𑌾𑌹𑌰𑍀𑌨𑍍 ॥ 5 ॥
𑌅𑌸𑍍𑌮𑌿𑌨𑍍𑌨𑍇𑌵𑌂 𑌗𑌤𑍇 𑌕𑌾𑌰𑍍𑌯𑍇 𑌭𑌵𑌤𑌾𑌂 𑌚 𑌨𑌿𑌵𑍇𑌦𑌿𑌤𑍇 ।
𑌨𑍍𑌯𑌾𑌯𑍍𑌯𑌂 𑌸𑍍𑌮 𑌸𑌹 𑌵𑍈𑌦𑍇𑌹𑍍𑌯𑌾 𑌦𑍍𑌰𑌷𑍍𑌟𑍁𑌂 𑌤𑍌 𑌪𑌾𑌰𑍍𑌥𑌿𑌵𑌾𑌤𑍍𑌮𑌜𑍌 ॥ 6 ॥
𑌅𑌹𑌮𑍇𑌕𑍋𑌽𑌪𑌿 𑌪𑌰𑍍𑌯𑌾𑌪𑍍𑌤𑌸𑍍𑌸𑌰𑌾𑌕𑍍𑌷𑌸𑌗𑌣𑌾𑌂 𑌪𑍁𑌰𑍀𑌮𑍍 ।
𑌤𑌾𑌂 𑌲𑌂𑌕𑌾𑌂 𑌤𑌰𑌸𑌾 𑌹𑌂𑌤𑍁𑌂 𑌰𑌾𑌵𑌣𑌂 𑌚 𑌮𑌹𑌾𑌬𑌲𑌮𑍍 ॥ ॥
𑌕𑌿𑌂 𑌪𑍁𑌨 𑌸𑍍𑌸𑌹𑌿𑌤𑍋 𑌵𑍀𑌰𑍈𑌰𑍍𑌬𑌲𑌵𑌦𑍍𑌭𑌿𑌃 𑌕𑍃𑌤𑌾𑌤𑍍𑌮𑌭𑌿𑌃 ।
𑌕𑍃𑌤𑌾𑌸𑍍𑌤𑍍𑌰𑍈𑌃 𑌪𑍍𑌲𑌵𑌗𑍈𑌶𑍍𑌶𑍂𑌰𑍈𑌰𑍍𑌭𑌵𑌦𑍍𑌭𑌿𑌵𑌿𑌜𑌯𑍈𑌷𑌿𑌭𑌿𑌃 ॥ ॥
𑌅𑌹𑌂 𑌤𑍁 𑌰𑌾𑌵𑌣𑌂 𑌯𑍁𑌦𑍍𑌧𑍇 𑌸𑌸𑍈𑌨𑍍𑌯𑌂 𑌸𑌪𑍁𑌰𑌸𑍍𑌸𑌰𑌮𑍍 ।
𑌸𑌹𑌪𑍁𑌤𑍍𑌤𑍍𑌰𑌂 𑌵𑌧𑌿𑌷𑍍𑌯𑌾𑌮𑌿 𑌸𑌹𑍋𑌦𑌰𑌯𑍁𑌤𑌂 𑌯𑍁𑌧𑌿 ॥ ॥
𑌬𑍍𑌰𑌾𑌹𑍍𑌮𑌮𑍈𑌂𑌦𑍍𑌰𑌂 𑌚 𑌰𑍌𑌦𑍍𑌰𑌂 𑌚 𑌵𑌾𑌯𑌵𑍍𑌯𑌂 𑌵𑌾𑌰𑌣𑌂 𑌤𑌥𑌾 ।
𑌯𑌦𑌿 𑌶𑌕𑍍𑌰𑌜𑌿𑌤𑍋𑌽𑌸𑍍𑌤𑍍𑌰𑌾𑌣𑌿 𑌦𑍁𑌰𑍍𑌨𑌿𑌰𑍀𑌕𑍍𑌷𑌾𑌣𑌿 𑌸𑌂𑌯𑍁𑌗𑍇 ॥ 10 ॥
𑌤𑌾𑌨𑍍𑌯𑌹𑌂 𑌵𑌧𑌿𑌷𑍍𑌯𑌾𑌮𑌿 𑌹𑌨𑌿𑌷𑍍𑌯𑌾𑌮𑌿 𑌚 𑌰𑌾𑌕𑍍𑌷𑌸𑌾𑌨𑍍 ।
𑌭𑌵𑌤𑌾𑌮𑌭𑍍𑌯𑌨𑍁𑌜𑍍𑌞𑌾𑌤𑍋 𑌵𑌿𑌕𑍍𑌰𑌮𑍋 𑌮𑍇 𑌰𑍁𑌣𑌦𑍍𑌧𑌿 𑌤𑌮𑍍 ॥ 11 ॥
𑌮𑌯𑌾𑌤𑍁𑌲𑌾 𑌵𑌿𑌸𑍃𑌷𑍍𑌟𑌾 𑌹𑌿 𑌶𑍈𑌲𑌵𑍃𑌷𑍍𑌟𑌿𑌰𑍍𑌨𑌿𑌰𑌂𑌤𑌰𑌾 ।
𑌦𑍇𑌵𑌾𑌨𑌪𑌿 𑌰𑌣𑍇 𑌹𑌨𑍍𑌯𑌾𑌤𑍍𑌕𑌿𑌂 𑌪𑍁𑌨𑌸𑍍𑌤𑌾𑌨𑍍𑌨𑌿𑌶𑌾𑌚𑌰𑌾𑌨𑍍 ॥ 12 ॥
𑌸𑌾𑌗𑌰𑍋𑌽𑌪𑍍𑌯𑌤𑌿𑌯𑌾𑌦𑍍𑌵𑍇𑌲𑌾𑌂 𑌮𑌂𑌦𑌰𑌃 𑌪𑍍𑌰𑌚𑌲𑍇𑌦𑌪𑌿 ।
𑌨 𑌜𑌾𑌂𑌬𑌵𑌂𑌤𑌂 𑌸𑌮𑌰𑍇 𑌕𑌂𑌪𑌯𑍇𑌦𑌰𑌿𑌵𑌾𑌹𑌿𑌨𑍀 ॥ 13 ॥
𑌸𑌰𑍍𑌵𑌰𑌾𑌕𑍍𑌷𑌸𑌸𑌂𑌘𑌾𑌨𑌾𑌂 𑌰𑌾𑌕𑍍𑌷𑌸𑌾 𑌯𑍇 𑌚 𑌪𑍂𑌰𑍍𑌵𑌕𑌾𑌃 ।
𑌅𑌲𑌮𑍇𑌕𑍋 𑌵𑌿𑌨𑌾𑌶𑌾𑌯 𑌵𑍀𑌰𑍋 𑌵𑌾𑌲𑌿𑌸𑍁𑌤𑌃 𑌕𑌪𑌿𑌃 ॥ 14 ॥
𑌪𑌨𑌸𑌸𑍍𑌯𑍋𑌰𑍁𑌵𑍇𑌗𑍇𑌨 𑌨𑍀𑌲𑌸𑍍𑌯 𑌚 𑌮𑌹𑌾𑌤𑍍𑌮𑌨𑌃 ।
𑌮𑌂𑌦𑌰𑍋𑌽𑌪𑍍𑌯𑌵𑌶𑍀𑌰𑍍𑌯𑍇𑌤 𑌕𑌿𑌂𑌪𑍁𑌨𑌰𑍍𑌯𑍁𑌧𑌿 𑌰𑌾𑌕𑍍𑌷𑌸𑌾𑌃 ॥ 15 ॥
𑌸𑌦𑍇𑌵𑌾𑌸𑍁𑌰𑌯𑌕𑍍𑌷𑍇𑌷𑍁 𑌗𑌂𑌧𑌰𑍍𑌵𑍋𑌰𑌗𑌪𑌕𑍍𑌷𑌿𑌷𑍁 ।
𑌮𑍈𑌂𑌦𑌸𑍍𑌯 𑌪𑍍𑌰𑌤𑌿𑌯𑍋𑌦𑍍𑌧𑌾𑌰𑌂 𑌶𑌂𑌸𑌤 𑌦𑍍𑌵𑌿𑌵𑌿𑌦𑌸𑍍𑌯 𑌵𑌾 ॥ 16 ॥
𑌅𑌶𑍍𑌵𑌿𑌪𑍁𑌤𑍍𑌰𑍌 𑌮𑌹𑌾𑌭𑌾𑌗𑌾𑌵𑍇𑌤𑍌 𑌪𑍍𑌲𑌵𑌗𑌸𑌤𑍍𑌤𑌮𑍌 ।
𑌏𑌤𑌯𑍋𑌃 𑌪𑍍𑌰𑌤𑌿𑌯𑍋𑌦𑍍𑌦𑌾𑌰𑌂 𑌨 𑌪𑌶𑍍𑌯𑌾𑌮𑌿 𑌰𑌣𑌾𑌜𑌿𑌰𑍇 ॥ 1 ॥
𑌪𑌿𑌤𑌾𑌮𑌹𑌵𑌰𑍋𑌤𑍍𑌸𑍇𑌕𑌾𑌤𑍍𑌪𑌰𑌮𑌂 𑌦𑌰𑍍𑌪𑌮𑌾𑌸𑍍𑌥𑌿𑌤𑍌 ।
𑌅𑌮𑍃𑌤𑌪𑍍𑌰𑌾𑌶𑌿𑌨𑌾𑌵𑍇𑌤𑍌 𑌸𑌰𑍍𑌵𑌵𑌾𑌨𑌰𑌸𑌤𑍍𑌤𑌮𑍌 ॥ 1 ॥
𑌅𑌶𑍍𑌵𑌿𑌨𑍋𑌰𑍍𑌮𑌾𑌨𑌨𑌾𑌰𑍍𑌥𑌂 𑌹𑌿 𑌸𑌰𑍍𑌵𑌲𑍋𑌕𑌪𑌿𑌤𑌾𑌮𑌹𑌃 ।
𑌸𑌰𑍍𑌵𑌾𑌵𑌧𑍍𑌯𑌤𑍍𑌵𑌮𑌤𑍁𑌲𑌮𑌨𑌯𑍋𑌰𑍍𑌦𑌤𑍍𑌤𑌵𑌾𑌨𑍍𑌪𑍁𑌰𑌾 ॥ 1 ॥
𑌵𑌰𑍋𑌤𑍍𑌸𑍇𑌕𑍇𑌨 𑌮𑌤𑍍𑌤𑍌 𑌚 𑌪𑍍𑌰𑌮𑌥𑍍𑌯 𑌮𑌹𑌤𑍀𑌂 𑌚𑌮𑍂𑌮𑍍 ।
𑌸𑍁𑌰𑌾𑌣𑌾𑌮𑌮𑍃𑌤𑌂 𑌵𑍀𑌰𑍌 𑌪𑍀𑌤𑌵𑌂𑌤𑍌 𑌪𑍍𑌲𑌵𑌂𑌗𑌮𑍌 ॥ 20 ॥
𑌏𑌤𑌾𑌵𑍇𑌵 𑌹𑌿 𑌸𑌂𑌕𑍃𑌦𑍍𑌧𑍌 𑌸𑌵𑌾𑌜𑌿𑌰𑌥𑌕𑍁𑌂𑌜𑌰𑌾𑌮𑍍 ।
𑌲𑌂𑌕𑌾𑌂 𑌨𑌾𑌶𑌯𑌿𑌤𑍁𑌂 𑌶𑌕𑍍𑌤𑍌 𑌸𑌰𑍍𑌵𑍇 𑌤𑌿𑌷𑍍𑌠𑌂𑌤𑍁 𑌵𑌾𑌨𑌰𑌾𑌃 ॥ 21 ॥
𑌮𑌯𑍈𑌵 𑌨𑌿𑌹𑌤𑌾 𑌲𑌂𑌕𑌾 𑌦𑌗𑍍𑌧𑌾 𑌭𑌸𑍍𑌮𑍀𑌕𑍃𑌤𑌾 𑌪𑍁𑌨𑌃 ।
𑌰𑌾𑌜𑌮𑌾𑌰𑍍𑌗𑍇𑌷𑍁 𑌸𑌰𑍍𑌵𑌤𑍍𑌰 𑌨𑌾𑌮 𑌵𑌿𑌶𑍍𑌰𑌾𑌵𑌿𑌤𑌂 𑌮𑌯𑌾 ॥ 22 ॥
𑌜𑌯𑌤𑍍𑌯𑌤𑌿𑌬𑌲𑍋 𑌰𑌾𑌮𑍋 𑌲𑌕𑍍𑌷𑍍𑌮𑌣𑌶𑍍𑌚 𑌮𑌹𑌾𑌬𑌲𑌃 ।
𑌰𑌾𑌜𑌾 𑌜𑌯𑌤𑌿 𑌸𑍁𑌗𑍍𑌰𑍀𑌵𑍋 𑌰𑌾𑌘𑌵𑍇𑌣𑌾𑌭𑌿𑌪𑌾𑌲𑌿𑌤𑌃 ॥ 23 ॥
𑌅𑌹𑌂 𑌕𑍋𑌸𑌲𑌰𑌾𑌜𑌸𑍍𑌯 𑌦𑌾𑌸𑌃 𑌪𑌵𑌨𑌸𑌂𑌭𑌵𑌃 ।
𑌹𑌨𑍁𑌮𑌾𑌨𑌿𑌤𑌿 𑌸𑌰𑍍𑌵𑌤𑍍𑌰 𑌨𑌾𑌮 𑌵𑌿𑌶𑍍𑌰𑌾𑌵𑌿𑌤𑌂 𑌮𑌯𑌾 ॥ 24 ॥
𑌅𑌶𑍋𑌕𑌵𑌨𑌿𑌕𑌾𑌮𑌧𑍍𑌯𑍇 𑌰𑌾𑌵𑌣𑌸𑍍𑌯 𑌦𑍁𑌰𑌾𑌤𑍍𑌮𑌨𑌃 ।
𑌅𑌧 𑌸𑍍𑌤𑌾𑌚𑍍𑌛𑌿𑌂𑌶𑍁𑌪𑌾𑌵𑍃𑌕𑍍𑌷𑍇 𑌸𑌾𑌧𑍍𑌵𑍀 𑌕𑌰𑍁𑌣𑌮𑌾𑌸𑍍𑌥𑌿𑌤𑌾 ॥ 25 ॥
𑌰𑌾𑌕𑍍𑌷𑌸𑍀𑌭𑌿𑌃 𑌪𑌰𑌿𑌵𑍃𑌤𑌾 𑌶𑍋𑌕𑌸𑌂𑌤𑌾𑌪𑌕𑌰𑍍𑌶𑌿𑌤𑌾 ।
𑌮𑍇𑌘𑌲𑍇𑌖𑌾𑌪𑌰𑌿𑌵𑍃𑌤𑌾 𑌚𑌂𑌦𑍍𑌰𑌲𑍇𑌖𑍇𑌵 𑌨𑌿𑌷𑍍𑌪𑍍𑌰𑌭𑌾 ॥ 26 ॥
𑌅𑌚𑌿𑌂𑌤𑌯𑌂𑌤𑍀 𑌵𑍈𑌦𑍇𑌹𑍀 𑌰𑌾𑌵𑌣𑌂 𑌬𑌲𑌦𑌰𑍍𑌪𑌿𑌤𑌮𑍍 ।
𑌪𑌤𑌿𑌵𑍍𑌰𑌤𑌾 𑌚 𑌸𑍁𑌶𑍍𑌰𑍋𑌣𑍀 𑌅𑌵𑌷𑍍𑌟𑌬𑍍𑌧𑌾 𑌚 𑌜𑌾𑌨𑌕𑍀 ॥ 2 ॥
𑌅𑌨𑍁𑌰𑌕𑍍𑌤𑌾 𑌹𑌿 𑌵𑍈𑌦𑍇𑌹𑍀 𑌰𑌾𑌮𑌂 𑌸𑌰𑍍𑌵𑌾𑌤𑍍𑌮𑌨𑌾 𑌶𑍁𑌭𑌾 ।
𑌅𑌨𑌨𑍍𑌯𑌚𑌿𑌤𑍍𑌤𑌾 𑌰𑌾𑌮𑍇 𑌚 𑌪𑍌𑌲𑍋𑌮𑍀𑌵 𑌪𑍁𑌰𑌂𑌦𑌰𑍇 ॥ 2 ॥
𑌤𑌦𑍇𑌕𑌵𑌾𑌸𑌸𑍍𑌸𑌂𑌵𑍀𑌤𑌾 𑌰𑌜𑍋𑌧𑍍𑌵𑌸𑍍𑌤𑌾 𑌤𑌥𑍈𑌵 𑌚 ।
𑌶𑍋𑌕𑌸𑌂𑌤𑌾𑌪𑌦𑍀𑌨𑌾𑌂𑌗𑍀 𑌸𑍀𑌤𑌾 𑌭𑌰𑍍𑌤𑍃𑌹𑌿𑌤𑍇 𑌰𑌤𑌾 ॥ 2 ॥
𑌸𑌾 𑌮𑌯𑌾 𑌰𑌾𑌕𑍍𑌷𑌸𑍀𑌮𑌧𑍍𑌯𑍇 𑌤𑌰𑍍𑌜𑍍𑌯𑌮𑌾𑌨𑌾 𑌮𑍁𑌹𑍁𑌰𑍍𑌮𑍁𑌹𑍁𑌃 ।
𑌰𑌾𑌕𑍍𑌷𑌸𑍀𑌭𑌿𑌰𑍍𑌵𑌿𑌰𑍂𑌪𑌾𑌭𑌿𑌰𑍍𑌦𑍃𑌷𑍍𑌟𑌾 𑌹𑌿 𑌪𑍍𑌰𑌮𑌦𑌾𑌵𑌨𑍇 ॥ 30 ॥
𑌏𑌕𑌵𑍇𑌣𑍀𑌧𑌰𑌾 𑌦𑍀𑌨𑌾 𑌭𑌰𑍍𑌤𑍃𑌚𑌿𑌂𑌤𑌾𑌪𑌰𑌾𑌯𑌣𑌾 ।
𑌅𑌧𑌶𑍍𑌶𑌯𑍍𑌯𑌾 𑌵𑌿𑌵𑌰𑍍𑌣𑌾𑌂𑌗𑍀 𑌪𑌦𑍍𑌮𑌿𑌨𑍀𑌵 𑌹𑌿𑌮𑌾𑌗𑌮𑍇 ॥ 31 ॥
𑌰𑌾𑌵𑌣𑌾𑌦𑍍𑌵𑌿𑌨𑌿𑌵𑍃𑌤𑍍𑌤𑌾𑌰𑍍𑌥𑌾 𑌮𑌰𑍍𑌤𑌵𑍍𑌯𑌕𑍃𑌤𑌨𑌿𑌶𑍍𑌚𑌯𑌾 ।
𑌕𑌥𑌂𑌚𑌿𑌨𑍍𑌮𑍃𑌗𑌶𑌾𑌬𑌾𑌕𑍍𑌷𑍀 𑌵𑌿𑌶𑍍𑌵𑌾𑌸𑌮𑍁𑌪𑌪𑌾𑌦𑌿𑌤𑌾 ॥ 32 ॥
𑌤𑌤𑌃 𑌸𑌂𑌭𑌾𑌷𑌿𑌤𑌾 𑌚𑍈𑌵 𑌸𑌰𑍍𑌵𑌮𑌰𑍍𑌥𑌂 𑌚 𑌦𑌰𑍍𑌶𑌿𑌤𑌾 ।
𑌰𑌾𑌮𑌸𑍁𑌗𑍍𑌰𑍀𑌵𑌸𑌖𑍍𑌯𑌂 𑌚 𑌶𑍍𑌰𑍁𑌤𑍍𑌵𑌾 𑌪𑍍𑌰𑍀𑌤𑌿𑌮𑍁𑌪𑌾𑌗𑌤𑌾 ॥ 33 ॥
𑌨𑌿𑌯𑌤𑌸𑍍𑌸𑌮𑍁𑌦𑌾𑌚𑌾𑌰𑍋 𑌭𑌕𑍍𑌤𑌿𑌰𑍍𑌭𑌰𑍍𑌤𑌰𑌿 𑌚𑍋𑌤𑍍𑌤𑌮𑌾 ।
𑌯𑌨𑍍𑌨 𑌹𑌂𑌤𑌿 𑌦𑌶𑌗𑍍𑌰𑍀𑌵𑌂 𑌸𑌾 𑌮𑌹𑌾𑌤𑍍𑌮𑌾 𑌕𑍃𑌤𑌾𑌗𑌸𑌮𑍍 ॥ 34 ॥
𑌨𑌿𑌮𑌿𑌤𑍍𑌤𑌮𑌾𑌤𑍍𑌰𑌂 𑌰𑌾𑌮𑌸𑍍𑌤𑍁 𑌵𑌧𑍇 𑌤𑌸𑍍𑌯 𑌭𑌵𑌿𑌷𑍍𑌯𑌤𑌿 ।
𑌸𑌾 𑌪𑍍𑌰𑌕𑍃𑌤𑍍𑌯𑍈𑌵 𑌤𑌨𑍍𑌵𑌂𑌗𑍀 𑌤𑌦𑍍𑌵𑌿𑌯𑍋𑌗𑌾𑌚𑍍𑌚 𑌕𑌰𑍍𑌶𑌿𑌤𑌾 ॥ 35 ॥
𑌪𑍍𑌰𑌤𑌿𑌪𑌤𑍍𑌪𑌾𑌠𑌶𑍀𑌲𑌸𑍍𑌯 𑌵𑌿𑌦𑍍𑌯𑍇𑌵 𑌤𑌨𑍁𑌮𑌤𑌾𑌂 𑌗𑌤𑌾 ।
𑌏𑌵𑌮𑌾𑌸𑍍𑌤𑍇 𑌮𑌹𑌾𑌭𑌾𑌗𑌾 𑌸𑍀𑌤𑌾 𑌶𑍋𑌕𑌪𑌰𑌾𑌯𑌣𑌾 ॥ 36 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌏𑌕𑍋𑌨𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥
