𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌕𑌥𑌾𑌽𑌂𑌤𑍇 𑌰𑌘𑍁𑌨𑌂𑌦𑌨𑌃 ।
𑌉𑌵𑌾𑌚 𑌪𑌰𑌮𑌪𑍍𑌰𑍀𑌤𑍋 𑌮𑍁𑌨𑌿𑌂 𑌦𑍀𑌪𑍍𑌤𑌮𑌿𑌵𑌾𑌨𑌲𑌮𑍍 ॥ 1 ॥
𑌶𑍍𑌰𑍋𑌤𑍁𑌮𑌿𑌚𑍍𑌛𑌾𑌮𑌿 𑌭𑌦𑍍𑌰𑌂 𑌤𑍇 𑌵𑌿𑌸𑍍𑌤𑌰𑍇𑌣 𑌕𑌥𑌾𑌮𑌿𑌮𑌾𑌮𑍍 ।
𑌪𑍂𑌰𑍍𑌵𑌕𑍋 𑌮𑍇 𑌕𑌥𑌂 𑌬𑍍𑌰𑌹𑍍𑌮𑌨𑍍 𑌯𑌜𑍍𑌞𑌂 𑌵𑍈 𑌸𑌮𑍁𑌪𑌾𑌹𑌰𑌤𑍍 ॥ 2 ॥
𑌵𑌿𑌶𑍍𑌵𑌾𑌮𑌿𑌤𑍍𑌰𑌸𑍍𑌤𑍁 𑌕𑌾𑌕𑍁𑌤𑍍𑌸𑍍𑌥𑌮𑍁𑌵𑌾𑌚 𑌪𑍍𑌰𑌹𑌸𑌨𑍍𑌨𑌿𑌵 ।
𑌶𑍍𑌰𑍂𑌯𑌤𑌾𑌂 𑌵𑌿𑌸𑍍𑌤𑌰𑍋 𑌰𑌾𑌮 𑌸𑌗𑌰𑌸𑍍𑌯 𑌮𑌹𑌾𑌤𑍍𑌮𑌨𑌃 ॥ 3 ॥
𑌶𑌂𑌕𑌰𑌶𑍍𑌵𑌶𑍁𑌰𑍋 𑌨𑌾𑌮 𑌹𑌿𑌮𑌵𑌾𑌨𑌚𑌲𑍋𑌤𑍍𑌤𑌮𑌃 ।
𑌵𑌿𑌂𑌧𑍍𑌯𑌪𑌰𑍍𑌵𑌤𑌮𑌾𑌸𑌾𑌦𑍍𑌯 𑌨𑌿𑌰𑍀𑌕𑍍𑌷𑍇𑌤𑍇 𑌪𑌰𑌸𑍍𑌪𑌰𑌮𑍍 ॥ 4 ॥
𑌤𑌯𑍋𑌰𑍍𑌮𑌧𑍍𑌯𑍇 𑌪𑍍𑌰𑌵𑍃𑌤𑍍𑌤𑍋𑌽𑌭𑍂𑌦𑍍𑌯𑌜𑍍𑌞 𑌸𑍍𑌸𑌪𑍁𑌰𑍁𑌷𑍋𑌤𑍍𑌤𑌮 ।
𑌸 𑌹𑌿 𑌦𑍇𑌶𑍋 𑌨𑌰𑌵𑍍𑌯𑌾𑌘𑍍𑌰 𑌪𑍍𑌰𑌶𑌸𑍍𑌤𑍋 𑌯𑌜𑍍𑌞𑌕𑌰𑍍𑌮𑌣𑌿 ॥ 5 ॥
𑌤𑌸𑍍𑌯𑌾𑌶𑍍𑌵𑌚𑌰𑍍𑌯𑌾𑌂 𑌕𑌾𑌕𑍁𑌤𑍍𑌸𑍍𑌥 𑌦𑍃𑌢𑌧𑌨𑍍𑌵𑌾 𑌮𑌹𑌾𑌰𑌥𑌃 ।
𑌅𑌂𑌶𑍁𑌮𑌾𑌨𑌕𑌰𑍋𑌤𑍍𑌤𑌾𑌤 𑌸𑌗𑌰𑌸𑍍𑌯 𑌮𑌤𑍇 𑌸𑍍𑌥𑌿𑌤𑌃 ॥ 6 ॥
𑌤𑌸𑍍𑌯 𑌪𑌰𑍍𑌵𑌣𑌿 𑌤𑌂 𑌯𑌜𑍍𑌞𑌂 𑌯𑌜𑌮𑌾𑌨𑌸𑍍𑌯 𑌵𑌾𑌸𑌵𑌃 ।
𑌰𑌾𑌕𑍍𑌷𑌸𑍀𑌂 𑌤𑌨𑍁𑌮𑌾𑌸𑍍𑌥𑌾𑌯 𑌯𑌜𑍍𑌞𑍀𑌯𑌾𑌶𑍍𑌵𑌮𑌪𑌾𑌹𑌰𑌤𑍍 ॥ ॥
𑌹𑍍𑌰𑌿𑌯𑌮𑌾𑌣𑍇 𑌤𑍁 𑌕𑌾𑌕𑍁𑌤𑍍𑌸𑍍𑌥 𑌤𑌸𑍍𑌮𑌿𑌨𑍍𑌨𑌶𑍍𑌵𑍇 𑌮𑌹𑌾𑌤𑍍𑌮𑌨𑌃 ।
𑌉𑌪𑌾𑌧𑍍𑌯𑌾𑌯𑌗𑌣𑌾𑌸𑍍𑌸𑌰𑍍𑌵𑍇 𑌯𑌜𑌮𑌾𑌨𑌮𑌥𑌾𑌬𑍍𑌰𑍁𑌵𑌨𑍍 ॥ ॥
𑌅𑌯𑌂 𑌪𑌰𑍍𑌵𑌣𑌿 𑌵𑍇𑌗𑍇𑌨 𑌯𑌜𑍍𑌞𑌿𑌯𑌾𑌶𑍍𑌵𑍋𑌽𑌪𑌨𑍀𑌯𑌤𑍇 ।
𑌹𑌰𑍍𑌤𑌾𑌰𑌂 𑌜𑌹𑌿 𑌕𑌾𑌕𑍁𑌤𑍍𑌸𑍍𑌥 𑌹𑌯𑌶𑍍𑌚𑍈𑌵𑍋𑌪𑌨𑍀𑌯𑌤𑌾𑌮𑍍 ॥ ॥
𑌯𑌜𑍍𑌞𑌚𑍍𑌛𑌿𑌦𑍍𑌰𑌂 𑌭𑌵𑌤𑍍𑌯𑍇𑌤𑌤𑍍𑌸𑌰𑍍𑌵𑍇𑌷𑌾𑌮𑌶𑌿𑌵𑌾𑌯 𑌨𑌃 ।
𑌤𑌤𑍍𑌤𑌥𑌾 𑌕𑍍𑌰𑌿𑌯𑌤𑌾𑌂 𑌰𑌾𑌜𑌨𑍍 𑌯𑌥𑌾𑌽𑌚𑍍𑌛𑌿𑌦𑍍𑌰𑌃 𑌕𑍍𑌰𑌤𑍁𑌰𑍍𑌭𑌵𑍇𑌤𑍍 ॥ 10 ॥
𑌉𑌪𑌾𑌧𑍍𑌯𑌾𑌯𑌵𑌚 𑌶𑍍𑌶𑍍𑌰𑍁𑌤𑍍𑌵𑌾 𑌤𑌸𑍍𑌮𑌿𑌨𑍍 𑌸𑌦𑌸𑌿 𑌪𑌾𑌰𑍍𑌥𑌿𑌵𑌃 ।
𑌷𑌷𑍍𑌟𑌿𑌂 𑌪𑍁𑌤𑍍𑌰𑌸𑌹𑌸𑍍𑌰𑌾𑌣𑌿 𑌵𑌾𑌕𑍍𑌯𑌮𑍇𑌤𑌦𑍁𑌵𑌾𑌚 𑌹 ॥ 11 ॥
𑌗𑌤𑌿𑌂 𑌪𑍁𑌤𑍍𑌰𑌾𑌃 𑌨 𑌪𑌶𑍍𑌯𑌾𑌮𑌿 𑌰𑌕𑍍𑌷𑌸𑌾𑌂 𑌪𑌰𑍁𑌷𑌰𑍍𑌷𑌭𑌾𑌃 ।
𑌮𑌂𑌤𑍍𑌰𑌪𑍂𑌤𑍈𑌰𑍍𑌮𑌹𑌾𑌭𑌾𑌗𑍈𑌰𑌾𑌸𑍍𑌥𑌿𑌤𑍋 𑌹𑌿 𑌮𑌹𑌾𑌕𑍍𑌰𑌤𑍁𑌃 ॥ 12 ॥
𑌤𑌦𑍍𑌗𑌚𑍍𑌛𑌤 𑌵𑌿𑌚𑌿𑌨𑍍𑌵𑌧𑍍𑌵𑌂 𑌪𑍁𑌤𑍍𑌰𑌕𑌾𑌃 𑌭𑌦𑍍𑌰𑌮𑌸𑍍𑌤𑍁 𑌵𑌃 ।
𑌸𑌮𑍁𑌦𑍍𑌰𑌮𑌾𑌲𑌿𑌨𑍀𑌂 𑌸𑌰𑍍𑌵𑌾𑌂 𑌪𑍃𑌥𑌿𑌵𑍀𑌮𑌨𑍁𑌗𑌚𑍍𑌛𑌤 ॥ 13 ॥
𑌏𑌕𑍈𑌕𑌯𑍋𑌜𑌨𑌂 𑌪𑍁𑌤𑍍𑌰𑌾 𑌵𑌿𑌸𑍍𑌤𑌾𑌰𑌮𑌧𑌿𑌗𑌚𑍍𑌛𑌤 ।
𑌯𑌾𑌵𑌤𑍍𑌤𑍁𑌰𑌗𑌸𑌂𑌦𑌰𑍍𑌶𑌃 𑌤𑌾𑌵𑌤𑍍 𑌖𑌨𑌤 𑌮𑍇𑌦𑌿𑌨𑍀𑌮𑍍 ।
𑌤𑌂 𑌚𑍈𑌵 𑌹𑌯𑌹𑌰𑍍𑌤𑌾𑌰𑌂 𑌮𑌾𑌰𑍍𑌗𑌮𑌾𑌣𑌾 𑌮𑌮𑌾𑌜𑍍𑌞𑌯𑌾 ॥ 14 ॥
𑌦𑍀𑌕𑍍𑌷𑌿𑌤𑌃 𑌪𑍌𑌤𑍍𑌰𑌸𑌹𑌿𑌤𑌸𑍍𑌸𑍋𑌪𑌾𑌧𑍍𑌯𑌾𑌯𑌗𑌣𑍋 𑌹𑍍𑌯𑌹𑌮𑍍 ।
𑌇𑌹 𑌸𑍍𑌥𑌾𑌸𑍍𑌯𑌾𑌮𑌿 𑌭𑌦𑍍𑌰𑌂 𑌵𑍋 𑌯𑌾𑌵𑌤𑍍𑌤𑍁𑌰𑌗𑌦𑌰𑍍𑌶𑌨𑌮𑍍 ॥ 15 ॥
𑌇𑌤𑍍𑌯𑍁𑌕𑍍𑌤𑌾 𑌹𑍃𑌷𑍍𑌟𑌮𑌨𑌸𑍋 𑌰𑌾𑌜𑌪𑍁𑌤𑍍𑌰𑌾 𑌮𑌹𑌾𑌬𑌲𑌾𑌃 ।
𑌜𑌗𑍍𑌮𑍁𑌰𑍍𑌮𑌹𑍀𑌤𑌲𑌂 𑌰𑌾𑌮 𑌪𑌿𑌤𑍁𑌰𑍍𑌵𑌚𑌨𑌯𑌂𑌤𑍍𑌰𑌿𑌤𑌾𑌃 ॥ 16 ॥
𑌯𑍋𑌜𑌨𑌾𑌯𑌾𑌮𑌵𑌿𑌸𑍍𑌤𑌾𑌰𑌮𑍇𑌕𑍈𑌕𑍋 𑌧𑌰𑌣𑍀𑌤𑌲𑌮𑍍 ।
𑌬𑌿𑌭𑌿𑌦𑍁𑌃 𑌪𑌰𑍁𑌷𑌵𑍍𑌯𑌾𑌘𑍍𑌰 𑌵𑌜𑍍𑌰𑌸𑍍𑌪𑌰𑍍𑌶𑌸𑌮𑍈𑌰𑍍𑌨𑌖𑍈𑌃 ॥ 1 ॥
𑌶𑍂𑌲𑍈𑌰𑌶𑌨𑌿𑌕𑌲𑍍𑌪𑍈𑌶𑍍𑌚 𑌹𑌲𑍈𑌶𑍍𑌚𑌾𑌪𑌿 𑌸𑍁𑌦𑌾𑌰𑍁𑌣𑍈𑌃 ।
𑌭𑌿𑌦𑍍𑌯𑌮𑌾𑌨𑌾 𑌵𑌸𑍁𑌮𑌤𑍀 𑌨𑌨𑌾𑌦 𑌰𑌘𑍁𑌨𑌂𑌦𑌨 ॥ 1 ॥
𑌨𑌾𑌗𑌾𑌨𑌾𑌂 𑌮𑌥𑍍𑌯𑌮𑌾𑌨𑌾𑌨𑌾𑌮𑌸𑍁𑌰𑌾𑌣𑌾𑌂 𑌚 𑌰𑌾𑌘𑌵 ।
𑌰𑌾𑌕𑍍𑌷𑌸𑌾𑌨𑌾𑌂 𑌚 𑌦𑍁𑌰𑍍𑌧𑌰𑍍𑌷𑌸𑍍𑌸𑌤𑍍𑌤𑍍𑌵𑌾𑌨𑌾𑌂 𑌨𑌿𑌨𑌦𑍋𑌽𑌭𑌵𑌤𑍍 ॥ 1 ॥
𑌯𑍋𑌜𑌨𑌾𑌨𑌾𑌂 𑌸𑌹𑌸𑍍𑌰𑌾𑌣𑌿 𑌷𑌷𑍍𑌟𑌿𑌂 𑌤𑍁 𑌰𑌘𑍁𑌨𑌂𑌦𑌨 ।
𑌬𑌿𑌭𑌿𑌦𑍁𑌰𑍍𑌧𑌰𑌣𑍀𑌂 𑌵𑍀𑌰𑌾𑌃 𑌰𑌸𑌾𑌤𑌲𑌮𑌨𑍁𑌤𑍍𑌤𑌮𑌮𑍍 ॥ 20 ॥
𑌏𑌵𑌂 𑌪𑌰𑍍𑌵𑌤𑌸𑌂𑌬𑌾𑌧𑌂 𑌜𑌂𑌬𑍂𑌦𑍍𑌵𑍀𑌪𑌂 𑌨𑍃𑌪𑌾𑌤𑍍𑌮𑌜𑌾𑌃 ।
𑌖𑌨𑌂𑌤𑍋 𑌨𑌰𑌶𑌾𑌰𑍍𑌦𑍂𑌲 𑌸𑌰𑍍𑌵𑌤𑌃 𑌪𑌰𑌿𑌚𑌕𑍍𑌰𑌮𑍁𑌃 ॥ 21 ॥
𑌤𑌤𑍋 𑌦𑍇𑌵𑌾𑌸𑍍𑌸𑌗𑌂𑌧𑌰𑍍𑌵𑌾𑌸𑍍𑌸𑌾𑌸𑍁𑌰𑌾𑌸𑍍𑌸𑌹𑌪𑌨𑍍𑌨𑌗𑌾𑌃 ।
𑌸𑌂𑌭𑍍𑌰𑌾𑌂𑌤𑌮𑌨𑌸𑌸𑍍𑌸𑌰𑍍𑌵𑍇 𑌪𑌿𑌤𑌾𑌮𑌹𑌮𑍁𑌪𑌾𑌗𑌮𑌨𑍍 ॥ 22 ॥
𑌤𑍇 𑌪𑍍𑌰𑌸𑌾𑌦𑍍𑌯 𑌮𑌹𑌾𑌤𑍍𑌮𑌾𑌨𑌂 𑌵𑌿𑌷𑌣𑍍𑌣𑌵𑌦𑌨𑌾𑌸𑍍𑌤𑌦𑌾 ।
𑌊𑌚𑍁𑌃 𑌪𑌰𑌮𑌸𑌂𑌤𑍍𑌰𑌸𑍍𑌤𑌾 𑌪𑌿𑌤𑌾𑌮𑌹𑌮𑌿𑌦𑌂 𑌵𑌚𑌃 ॥ 23 ॥
𑌭𑌗𑌵𑌨𑍍 𑌪𑍃𑌥𑌿𑌵𑍀 𑌸𑌰𑍍𑌵𑌾 𑌖𑌨𑍍𑌯𑌤𑍇 𑌸𑌗𑌰𑌾𑌤𑍍𑌮𑌜𑍈𑌃 ।
𑌬𑌹𑌵𑌶𑍍𑌚 𑌮𑌹𑌾𑌤𑍍𑌮𑌾𑌨𑍋 𑌹𑌨𑍍𑌯𑌂𑌤𑍇 𑌤𑌲𑌵𑌾𑌸𑌿𑌨𑌃 ॥ 24 ॥
𑌅𑌯𑌂 𑌯𑌜𑍍𑌞𑌹𑌰𑍋𑌽𑌸𑍍𑌮𑌾𑌕𑌮𑌨𑍇𑌨𑌾𑌶𑍍𑌵𑍋𑌽𑌪𑌨𑍀𑌯𑌤𑍇 ।
𑌇𑌤𑌿 𑌤𑍇 𑌸𑌰𑍍𑌵𑌭𑍂𑌤𑌾𑌨𑌿 𑌨𑌿𑌘𑍍𑌨𑌂𑌤𑌿 𑌸𑌗𑌰𑌾𑌤𑍍𑌮𑌜𑌾𑌃 ॥ 25 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌏𑌕𑍋𑌨𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
