𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌸𑌪𑍍𑌤𑌾𑌶𑍀𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌗𑍁𑌹𑌸𑍍𑌯 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌭𑌰𑌤𑍋 𑌭𑍃𑌶𑌮𑌪𑍍𑌰𑌿𑌯𑌮𑍍 ।
𑌧𑍍𑌯𑌾𑌨𑌂 𑌜𑌗𑌾𑌮 𑌤𑌤𑍍𑌰𑍈𑌵 𑌯𑌤𑍍𑌰 𑌤𑌚𑍍𑌛𑍍𑌰𑍁𑌤𑌮𑌪𑍍𑌰𑌿𑌯𑌮𑍍 ॥ 1 ॥
𑌸𑍁𑌕𑍁𑌮𑌾𑌰𑍋 𑌮𑌹𑌾𑌸𑌤𑍍𑌤𑍍𑌵𑌸𑍍𑌸𑌿𑌂𑌹𑌸𑍍𑌕𑌂𑌧𑍋 𑌮𑌹𑌾𑌭𑍁𑌜𑌃 ।
𑌪𑍁𑌂𑌡𑌰𑍀𑌕𑌵𑌿𑌶𑌾𑌲𑌾𑌕𑍍𑌷 𑌸𑍍𑌤𑌰𑍁𑌣𑌃 𑌪𑍍𑌰𑌿𑌯𑌦𑌰𑍍𑌶𑌨𑌃 ॥ 2 ॥
𑌪𑍍𑌰𑌤𑍍𑌯𑌾𑌶𑍍𑌵𑌸𑍍𑌯 𑌮𑍁𑌹𑍂𑌰𑍍𑌤𑌂 𑌤𑍁 𑌕𑌾𑌲𑌂 𑌪𑌰𑌮𑌦𑍁𑌰𑍍𑌮𑌨𑌾𑌃 ।
𑌪𑌪𑌾𑌤 𑌸𑌹𑌸𑌾 𑌤𑍋𑌤𑍍𑌰𑍈𑌰𑍍𑌹𑍍𑌯𑌤𑌿𑌵𑌿𑌦𑍍𑌧 𑌇𑌵 𑌦𑍍𑌵𑌿𑌪𑌃 ॥ 3 ॥
𑌤𑌦𑌵𑌸𑍍𑌥𑌂 𑌤𑍁 𑌭𑌰𑌤𑌂 𑌶𑌤𑍍𑌰𑍁𑌘𑍍𑌨𑍋𑌽𑌨𑌂𑌤𑌰𑌸𑍍𑌥𑌿𑌤𑌃 ।
𑌪𑌰𑌿𑌷𑍍𑌵𑌜𑍍𑌯 𑌰𑍁𑌰𑍋𑌦𑍋𑌚𑍍𑌚𑍈𑌰𑍍𑌵𑌿𑌸𑌂𑌜𑍍𑌞𑌶𑍍𑌶𑍋𑌕𑌕𑌰𑍍𑌶𑌿𑌤𑌃 ॥ 4 ॥
𑌤𑌤𑌸𑍍𑌸𑌰𑍍𑌵𑌾𑌸𑍍𑌸𑌮𑌾𑌪𑍇𑌤𑍁𑌰𑍍𑌮𑌾𑌤𑌰𑍋 𑌭𑌰𑌤𑌸𑍍𑌯 𑌤𑌾𑌃 ।
𑌉𑌪𑌵𑌾𑌸𑌕𑍃𑌶𑌾 𑌦𑍀𑌨𑌾 𑌭𑌰𑍍𑌤𑍃𑌵𑍍𑌯𑌸𑌨𑌕𑌰𑍍𑌶𑌿𑌤𑌾𑌃 ॥ 5 ॥
𑌤𑌾𑌶𑍍𑌚 𑌤𑌂 𑌪𑌤𑌿𑌤𑌂 𑌭𑍂𑌮𑍌 𑌰𑍁𑌦𑌂𑌤𑍍𑌯𑌃 𑌪𑌰𑍍𑌯𑌵𑌾𑌰𑌯𑌨𑍍 ।
𑌕𑍌𑌸𑌲𑍍𑌯𑌾 𑌤𑍍𑌵𑌨𑍁𑌸𑍃𑌤𑍍𑌯𑍈𑌨𑌂 𑌦𑍁𑌰𑍍𑌮𑌨𑌾𑌃 𑌪𑌰𑌿𑌷𑌸𑍍𑌵𑌜𑍇 ॥ 6 ॥
𑌵𑌤𑍍𑌸𑌲𑌾 𑌸𑍍𑌵𑌂 𑌯𑌥𑌾 𑌵𑌤𑍍𑌸𑌮𑍁𑌪𑌗𑍂𑌹𑍍𑌯 𑌤𑌪𑌸𑍍𑌵𑌿𑌨𑍀 ।
𑌪𑌰𑌿𑌪𑌪𑍍𑌰𑌚𑍍𑌛 𑌭𑌰𑌤𑌂 𑌰𑍁𑌦𑌂𑌤𑍀 𑌶𑍋𑌕𑌲𑌾𑌲𑌸𑌾 ॥ ॥
𑌪𑍁𑌤𑍍𑌰 𑌵𑍍𑌯𑌾𑌧𑌿𑌰𑍍𑌨 𑌤𑍇 𑌕𑌚𑍍𑌚𑌿𑌚𑍍𑌛𑌰𑍀𑌰𑌂 𑌪𑌰𑌿𑌬𑌾𑌧𑌤𑍇 ।
𑌅𑌦𑍍𑌯 𑌰𑌾𑌜𑌕𑍁𑌲𑌸𑍍𑌯𑌾𑌸𑍍𑌯 𑌤𑍍𑌵𑌦𑌧𑍀𑌨𑌂 𑌹𑌿 𑌜𑍀𑌵𑌿𑌤𑌮𑍍 ॥ ॥
𑌤𑍍𑌵𑌾𑌂 𑌦𑍃𑌷𑍍𑌟𑍍𑌵𑌾 𑌪𑍁𑌤𑍍𑌰 𑌜𑍀𑌵𑌾𑌮𑌿 𑌰𑌾𑌮𑍇 𑌸𑌭𑍍𑌰𑌾𑌤𑍃𑌕𑍇𑌗𑌤𑍇 ।
𑌵𑍃𑌤𑍍𑌤𑍇 𑌦𑌶𑌰𑌥𑍇 𑌰𑌾𑌜𑍍𑌞𑌿 𑌨𑌾𑌥 𑌏𑌕𑌸𑍍𑌤𑍍𑌵𑌮𑌦𑍍𑌯 𑌨𑌃 ॥ ॥
𑌕𑌚𑍍𑌚𑌿𑌨𑍍𑌨 𑌲𑌕𑍍𑌷𑍍𑌮𑌣𑍇 𑌪𑍁𑌤𑍍𑌰 𑌶𑍍𑌰𑍁𑌤𑌂 𑌤𑍇 𑌕𑌿𑌂𑌚𑌦𑌪𑍍𑌰𑌿𑌯𑌮𑍍 ।
𑌪𑍁𑌤𑍍𑌰𑍇 𑌵𑌾𑌽𑌪𑍍𑌯𑍇𑌕𑌪𑍁𑌤𑍍𑌰𑌾𑌯𑌾 𑌸𑍍𑌸𑌹𑌭𑌾𑌰𑍍𑌯𑍇 𑌵𑌨𑌂 𑌗𑌤𑍇 ॥ 10 ॥
𑌸 𑌮𑍁𑌹𑍂𑌰𑍍𑌤𑌂 𑌸𑌮𑌾𑌶𑍍𑌵𑌸𑍍𑌯 𑌰𑍁𑌦𑌨𑍍𑌨𑍇𑌵 𑌮𑌹𑌾𑌯𑌶𑌾𑌃 ।
𑌕𑍌𑌸𑌲𑍍𑌯𑌾𑌂 𑌪𑌰𑌿𑌸𑌾𑌂𑌤𑍍𑌵𑍇𑌦𑍍𑌯𑌂 𑌗𑍁𑌹𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 11 ॥
𑌭𑍍𑌰𑌾𑌤𑌾 𑌮𑍇 𑌕𑍍𑌵𑌾𑌵𑌸𑌦𑍍𑌰𑌾𑌤𑍍𑌰𑍌 𑌕𑍍𑌵 𑌸𑍀𑌤𑌾 𑌕𑍍𑌵 𑌚 𑌲𑌕𑍍𑌷𑍍𑌮𑌣𑌃 ।
𑌅𑌸𑍍𑌵𑌪𑌚𑍍𑌛𑌯𑌨𑍇 𑌕𑌸𑍍𑌮𑌿𑌨𑍍 𑌕𑌿𑌂 𑌭𑍁𑌕𑍍𑌤𑍍𑌵𑌾 𑌗𑍁𑌹 𑌶𑌂𑌸 𑌮𑍇 ॥ 12 ॥
𑌸𑍋𑌽𑌬𑍍𑌰𑌵𑍀𑌦𑍍𑌭𑌰𑌤𑌂 𑌹𑍃𑌷𑍍𑌟𑍋 𑌨𑌿𑌷𑌾𑌦𑌾𑌧𑌿𑌪𑌤𑌿𑌰𑍍𑌗𑍁𑌹𑌃 ।
𑌯𑌦𑍍𑌵𑌿𑌧𑌂 𑌪𑍍𑌰𑌤𑌿𑌪𑍇𑌦𑍇 𑌚 𑌰𑌾𑌮𑍇 𑌪𑍍𑌰𑌿𑌯𑌹𑌿𑌤𑍇𑌽𑌤𑌿𑌥𑍌 ॥ 13 ॥
𑌅𑌨𑍍𑌨𑌮𑍁𑌚𑍍𑌚𑌾𑌵𑌚𑌂 𑌭𑌕𑍍𑌷𑌾𑌃 𑌫𑌲𑌾𑌨𑌿 𑌵𑌿𑌵𑌿𑌧𑌾𑌨𑌿 𑌚 ।
𑌰𑌾𑌮𑌾𑌯𑌾𑌭𑍍𑌯𑌵𑌹𑌾𑌰𑌾𑌰𑍍𑌥𑌂 𑌬𑌹𑍁𑌚𑍋𑌪𑌹𑍃𑌤𑌂 𑌮𑌯𑌾 ॥ 14 ॥
𑌤𑌤𑍍𑌸𑌰𑍍𑌵𑌂 𑌪𑍍𑌰𑌤𑍍𑌯𑌨𑍁𑌜𑍍𑌞𑌾𑌸𑍀𑌦𑍍𑌰𑌾𑌮 𑌸𑍍𑌸𑌤𑍍𑌯𑌪𑌰𑌾𑌕𑍍𑌰𑌮𑌃 ।
𑌨 𑌤𑍁 𑌤𑌤𑍍𑌪𑍍𑌰𑌤𑍍𑌯𑌗𑍃𑌹𑍍𑌣𑌾𑌤𑍍𑌸 𑌕𑍍𑌷𑌤𑍍𑌰𑌧𑌰𑍍𑌮𑌮𑌨𑍁𑌸𑍍𑌮𑌰𑌨𑍍 ॥ 15 ॥
𑌨 𑌹𑍍𑌯𑌸𑍍𑌮𑌾𑌭𑌿𑌃 𑌪𑍍𑌰𑌤𑌿𑌗𑍍𑌰𑌾𑌹𑍍𑌯𑌂 𑌸𑌖𑍇 𑌦𑍇𑌯𑌂 𑌤𑍁 𑌸𑌰𑍍𑌵𑌦𑌾 ।
𑌇𑌤𑌿 𑌤𑍇𑌨 𑌵𑌯𑌂 𑌰𑌾𑌜𑌨𑍍𑌨𑌨𑍁𑌨𑍀𑌤𑌾 𑌮𑌹𑌾𑌤𑍍𑌮𑌨𑌾 ॥ 16 ॥
𑌲𑌕𑍍𑌷𑍍𑌮𑌣𑍇𑌨 𑌸𑌮𑌾𑌨𑍀𑌤𑌂 𑌪𑍀𑌤𑍍𑌵𑌾 𑌵𑌾𑌰𑌿 𑌮𑌹𑌾𑌯𑌶𑌾𑌃 ।
𑌔𑌪𑌵𑌾𑌸𑍍𑌯𑌂 𑌤𑌦𑌾𑌽𑌕𑌾𑌰𑍍𑌷𑍀𑌦𑍍𑌰𑌾𑌘𑌵𑌸𑍍𑌸𑌹 𑌸𑍀𑌤𑌯𑌾 ॥ 1 ॥
𑌤𑌤𑌸𑍍𑌤𑍁 𑌜𑌲𑌶𑍇𑌷𑍇𑌣 𑌲𑌕𑍍𑌷𑍍𑌮𑌣𑍋𑌽𑌪𑍍𑌯𑌕𑌰𑍋𑌤𑍍𑌤𑌦𑌾 ।
𑌵𑌾𑌗𑍍𑌯𑌤𑌾𑌸𑍍𑌤𑍇 𑌤𑍍𑌰𑌯 𑌸𑍍𑌸𑌂𑌧𑍍𑌯𑌾𑌂 𑌸𑌮𑍁𑌪𑌾𑌸𑌤 𑌸𑌂𑌹𑌿𑌤𑌾𑌃 ॥ 1 ॥
𑌸𑍌𑌮𑌿𑌤𑍍𑌰𑌿𑌸𑍍𑌤𑍁 𑌤𑌤𑌃 𑌪𑌶𑍍𑌚𑌾𑌦𑌕𑌰𑍋𑌤𑍍𑌸𑍍𑌵𑌾𑌸𑍍𑌤𑌰𑌂 𑌶𑍁𑌭𑌮𑍍 ।
𑌸𑍍𑌵𑌯𑌮𑌾𑌨𑍀𑌯 𑌬𑌰𑍍𑌹𑍀𑌂𑌷𑌿 𑌕𑍍𑌷𑌿𑌪𑍍𑌰𑌂 𑌰𑌾𑌘𑌵𑌕𑌾𑌰𑌣𑌾𑌤𑍍 ॥ 1 ॥
𑌤𑌸𑍍𑌮𑌿𑌨𑍍𑌸𑌮𑌾𑌵𑌿𑌶𑌦𑍍𑌰𑌾𑌮 𑌸𑍍𑌸𑍍𑌵𑌾𑌸𑍍𑌤𑌰𑍇 𑌸𑌹 𑌸𑍀𑌤𑌯𑌾 ।
𑌪𑍍𑌰𑌕𑍍𑌷𑌾𑌲𑍍𑌯 𑌚 𑌤𑌯𑍋𑌃 𑌪𑌾𑌦𑌾𑌵𑌪𑌚𑌕𑍍𑌰𑌾𑌮 𑌲𑌕𑍍𑌷𑍍𑌮𑌣𑌃 ॥ 20 ॥
𑌏𑌤𑌤𑍍𑌤𑌦𑌿𑌂𑌗𑍁𑌦𑍀𑌮𑍂𑌲𑌮𑌿𑌦𑌮𑍇𑌵 𑌚 𑌤𑌤𑍍𑌤𑍃𑌣𑌮𑍍 ।
𑌯𑌸𑍍𑌮𑌿𑌨𑍍𑌰𑌾𑌮𑌶𑍍𑌚 𑌸𑍀𑌤𑌾 𑌚 𑌰𑌾𑌤𑍍𑌰𑌿𑌂 𑌤𑌾𑌂 𑌶𑌯𑌿𑌤𑌾𑌵𑍁𑌭𑍌 ॥ 21 ॥
𑌨𑌿𑌯𑌮𑍍𑌯 𑌪𑍃𑌷𑍍𑌠𑍇 𑌤𑍁 𑌤𑌲𑌾𑌂𑌗𑍁𑌲𑌿𑌤𑍍𑌰𑌵𑌾𑌨𑍍 𑌶𑌰𑍈𑌸𑍍𑌸𑍁𑌪𑍂𑌰𑍍𑌣𑌾𑌵𑌿𑌷𑍁𑌧𑍀 𑌪𑌰𑌂𑌤𑌪𑌃 ।
𑌮𑌹𑌾𑌦𑍍𑌧𑌨𑍁 𑌸𑍍𑌸𑌜𑍍𑌯𑌮𑍁𑌪𑍋𑌹𑍍𑌯 𑌲𑌕𑍍𑌷𑍍𑌮𑌣𑍋 𑌨𑌿𑌶𑌾𑌮𑌤𑌿𑌷𑍍𑌠𑌤𑍍𑌪𑌰𑌿𑌤𑍋𑌽𑌸𑍍𑌯 𑌕𑍇𑌵𑌲𑌮𑍍 ॥ 22 ॥
𑌤𑌤 𑌸𑍍𑌤𑍍𑌵𑌹𑌂𑌚𑍋𑌤𑍍𑌤𑌮𑌬𑌾𑌣𑌚𑌾𑌪𑌧𑍃𑌤𑍍 𑌸𑍍𑌥𑌿𑌤𑍋𑌽𑌭𑌵𑌂 𑌤𑌤𑍍𑌰 𑌸 𑌯𑌤𑍍𑌰 𑌲𑌕𑍍𑌷𑍍𑌮𑌣𑌃 ।
𑌅𑌤𑌂𑌦𑍍𑌰𑌿𑌤𑍈𑌰𑍍𑌜𑍍𑌞𑌾𑌤𑌿𑌭𑌿𑌰𑌾𑌤𑍍𑌤𑌕𑌾𑌰𑍍𑌮𑍁𑌕𑍈𑌰𑍍𑌮𑌹𑍇𑌂𑌦𑍍𑌰𑌕𑌲𑍍𑌪𑌂 𑌪𑌰𑌿𑌪𑌾𑌲𑌯𑌂𑌸𑍍𑌤𑌦𑌾 ॥ 23 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌸𑌪𑍍𑌤𑌾𑌶𑍀𑌤𑌿𑌤𑌮𑌸𑍍𑌸𑌰𑍍𑌗𑌃 ॥
