𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।
𑌤𑌪𑍍𑌯𑌮𑌾𑌨𑌂 𑌤𑌥𑌾 𑌰𑌾𑌮𑌂 𑌸𑍀𑌤𑌾𑌹𑌰𑌣𑌕𑌰𑍍𑌶𑌿𑌤𑌮𑍍 ।
𑌲𑍋𑌕𑌾𑌨𑌾𑌮𑌭𑌵𑍇 𑌯𑍁𑌕𑍍𑌤𑌂 𑌸𑌾𑌂𑌵𑌰𑍍𑌤𑌕𑌮𑌿𑌵𑌾𑌨𑌲𑌮𑍍 ॥ 1 ॥
𑌵𑍀𑌕𑍍𑌷𑌮𑌾𑌣𑌂 𑌧𑌨𑍁𑌸𑍍𑌸𑌜𑍍𑌯𑌂 𑌨𑌿𑌶𑍍𑌶𑍍𑌵𑌸𑌂𑌤𑌂 𑌪𑍁𑌨𑌃 𑌪𑍁𑌨𑌃 ।
𑌦𑌗𑍍𑌧𑍁𑌕𑌾𑌮𑌂 𑌜𑌗𑌤𑍍𑌸𑌰𑍍𑌵𑌂 𑌯𑍁𑌗𑌾𑌂𑌤𑍇 𑌚 𑌯𑌥𑌾 𑌹𑌰𑌮𑍍 ॥ 2 ॥
𑌅𑌦𑍃𑌷𑍍𑌟𑌪𑍂𑌰𑍍𑌵𑌂 𑌸𑌂𑌕𑍍𑌰𑍁𑌦𑍍𑌧𑌂 𑌦𑍃𑌷𑍍𑌟𑍍𑌵𑌾 𑌰𑌾𑌮𑌂 𑌤𑍁 𑌲𑌕𑍍𑌷𑍍𑌮𑌣𑌃 ।
𑌅𑌬𑍍𑌰𑌵𑍀𑌤𑍍𑌪𑍍𑌰𑌾𑌂𑌜𑌲𑌿𑌰𑍍𑌵𑌾𑌕𑍍𑌯𑌂 𑌮𑍁𑌖𑍇𑌨 𑌪𑌰𑌿𑌶𑍁𑌷𑍍𑌯𑌤𑌾 ॥ 3 ॥
𑌪𑍁𑌰𑌾 𑌭𑍂𑌤𑍍𑌵𑌾 𑌮𑍃𑌦𑍁𑌰𑍍𑌦𑌾𑌂𑌤𑌸𑍍𑌸𑌰𑍍𑌵𑌭𑍂𑌤𑌹𑌿𑌤𑍇 𑌰𑌤𑌃 ।
𑌨 𑌕𑍍𑌰𑍋𑌧𑌵𑌶𑌮𑌾𑌪𑌨𑍍𑌨𑌃 𑌪𑍍𑌰𑌕𑍃𑌤𑌿𑌂 𑌹𑌾𑌤𑍁𑌮𑌰𑍍𑌹𑌸𑌿 ॥ 4 ॥
𑌚𑌂𑌦𑍍𑌰𑍇 𑌲𑌕𑍍𑌷𑍍𑌮𑍀𑌃 𑌪𑍍𑌰𑌭𑌾 𑌸𑍂𑌰𑍍𑌯𑍇 𑌗𑌤𑌿𑌰𑍍𑌵𑌾𑌯𑍌 𑌭𑍁𑌵𑌿 𑌕𑍍𑌷𑌮𑌾 ।
𑌏𑌤𑌤𑍍𑌤𑍁 𑌨𑌿𑌯𑌤𑌂 𑌸𑌰𑍍𑌵𑌂 𑌤𑍍𑌵𑌯𑌿 𑌚𑌾𑌨𑍁𑌤𑍍𑌤𑌮𑌂 𑌯𑌶𑌃 ॥ 5 ॥
𑌏𑌕𑌸𑍍𑌯 𑌨𑌾𑌪𑌰𑌾𑌧𑍇𑌨 𑌲𑍋𑌕𑌾𑌨𑍍 𑌹𑌂𑌤𑍁𑌂 𑌤𑍍𑌵𑌮𑌰𑍍𑌹𑌸𑌿 ।
𑌨 𑌤𑍁 𑌜𑌾𑌨𑌾𑌮𑌿 𑌕𑌸𑍍𑌯𑌾𑌯𑌂 𑌭𑌗𑍍𑌨𑌸𑍍𑌸𑌾𑌂𑌗𑍍𑌰𑌾𑌮𑌿𑌕𑍋 𑌰𑌥𑌃 ॥ 6 ॥
𑌕𑍇𑌨 𑌵𑌾 𑌕𑌸𑍍𑌯 𑌵𑌾 𑌹𑍇𑌤𑍋𑌸𑍍𑌸𑌾𑌯𑍁𑌧𑌸𑍍𑌸𑌪𑌰𑌿𑌚𑍍𑌛𑌦𑌃 ।
𑌖𑍁𑌰𑌨𑍇𑌮𑌿𑌕𑍍𑌷𑌤𑌶𑍍𑌚𑌾𑌯𑌂 𑌸𑌿𑌕𑍍𑌤𑍋 𑌰𑍁𑌧𑌿𑌰𑌬𑌿𑌂𑌧𑍁𑌭𑌿𑌃 ॥ ॥
𑌦𑍇𑌶𑍋 𑌨𑌿𑌰𑍍𑌵𑍃𑌤𑍍𑌤𑌸𑌂𑌗𑍍𑌰𑌾𑌮𑌸𑍍𑌸𑍁𑌘𑍋𑌰𑌃 𑌪𑌾𑌰𑍍𑌥𑌿𑌵𑌾𑌤𑍍𑌮𑌜 ।
𑌏𑌕𑌸𑍍𑌯 𑌤𑍁 𑌵𑌿𑌮𑌰𑍍𑌧𑍋𑌽𑌯𑌂 𑌨 𑌦𑍍𑌵𑌯𑍋𑌰𑍍𑌵𑌦𑌤𑌾𑌂𑌵𑌰 ॥ ॥
𑌨 𑌹𑌿 𑌵𑍃𑌤𑍍𑌤𑌂 𑌹𑌿 𑌪𑌶𑍍𑌯𑌾𑌮𑌿 𑌬𑌲𑌸𑍍𑌯 𑌮𑌹𑌤𑌃 𑌪𑌦𑌮𑍍 ।
𑌨𑍈𑌕𑌸𑍍𑌯 𑌤𑍁 𑌕𑍃𑌤𑍇 𑌲𑍋𑌕𑌾𑌨𑍍𑌵𑌿𑌨𑌾𑌶𑌯𑌿𑌤𑍁𑌮𑌰𑍍𑌹𑌸𑌿 ॥ ॥
𑌯𑍁𑌕𑍍𑌤𑌦𑌂𑌡𑌾 𑌹𑌿 𑌮𑍃𑌦𑌵𑌃 𑌪𑍍𑌰𑌶𑌾𑌂𑌤𑌾 𑌵𑌸𑍁𑌧𑌾𑌧𑌿𑌪𑌾𑌃 ।
𑌸𑌦𑌾 𑌤𑍍𑌵𑌂 𑌸𑌰𑍍𑌵𑌭𑍂𑌤𑌾𑌨𑌾𑌂 𑌶𑌰𑌣𑍍𑌯𑌃 𑌪𑌰𑌮𑌾 𑌗𑌤𑌿𑌃 ॥ 10 ॥
𑌕𑍋 𑌨𑍁 𑌦𑌾𑌰𑌪𑍍𑌰𑌣𑌾𑌶𑌂 𑌤𑍇 𑌸𑌾𑌧𑍁 𑌮𑌨𑍍𑌯𑍇𑌤 𑌰𑌾𑌘𑌵 ।
𑌸𑌰𑌿𑌤𑌸𑍍𑌸𑌾𑌗𑌰𑌾𑌶𑍍𑌶𑍈𑌲𑌾 𑌦𑍇𑌵𑌗𑌂𑌧𑌰𑍍𑌵𑌦𑌾𑌨𑌵𑌾𑌃 ॥ 11 ॥
𑌨𑌾𑌲𑌂 𑌤𑍇 𑌵𑌿𑌪𑍍𑌰𑌿𑌯𑌂 𑌕𑌰𑍍𑌤𑍁𑌂 𑌦𑍀𑌕𑍍𑌷𑌿𑌤𑌸𑍍𑌯𑍇𑌵 𑌸𑌾𑌧𑌵𑌃 ।
𑌯𑍇𑌨 𑌰𑌾𑌜𑌨𑍍𑌹𑍃𑌤𑌾 𑌸𑍀𑌤𑌾 𑌤𑌮𑌨𑍍𑌵𑍇𑌷𑌿𑌤𑍁𑌮𑌰𑍍𑌹𑌸𑌿 ॥ 12 ॥
𑌮𑌦𑍍𑌵𑌿𑌤𑍀𑌯𑍋 𑌧𑌨𑍁𑌷𑍍𑌪𑌾𑌣𑌿𑌸𑍍𑌸𑌹𑌾𑌯𑍈𑌃 𑌪𑌰𑌮𑌰𑍍𑌷𑌿𑌭𑌿𑌃 ।
𑌸𑌮𑍁𑌦𑍍𑌰𑌂 𑌚 𑌵𑌿𑌚𑍇𑌷𑍍𑌯𑌾𑌮𑌃 𑌪𑌰𑍍𑌵𑌤𑌾𑌂𑌶𑍍𑌚 𑌵𑌨𑌾𑌨𑌿 𑌚 ॥ 13 ॥
𑌗𑍁𑌹𑌾𑌶𑍍𑌚 𑌵𑌿𑌵𑌿𑌧𑌾 𑌘𑍋𑌰𑌾 𑌨𑌦𑍀 𑌪𑌦𑍍𑌮𑌵𑌨𑌾𑌨𑌿 𑌚 ।
𑌦𑍇𑌵𑌗𑌂𑌧𑌰𑍍𑌵𑌲𑍋𑌕𑌾𑌂𑌶𑍍𑌚 𑌵𑌿𑌚𑍇𑌷𑍍𑌯𑌾𑌮𑌸𑍍𑌸𑌮𑌾𑌹𑌿𑌤𑌾𑌃 ॥ 14 ॥
𑌯𑌾𑌵𑌨𑍍𑌨𑌾𑌧𑌿𑌗𑌮𑌿𑌷𑍍𑌯𑌾𑌮𑌸𑍍𑌤𑌵 𑌭𑌾𑌰𑍍𑌯𑌾𑌪𑌹𑌾𑌰𑌿𑌣𑌮𑍍 ।
𑌨 𑌚𑍇𑌤𑍍𑌸𑌾𑌮𑍍𑌨𑌾 𑌪𑍍𑌰𑌦𑌾𑌸𑍍𑌯𑌂𑌤𑌿 𑌪𑌤𑍍𑌨𑍀𑌂 𑌤𑍇 𑌤𑍍𑌰𑌿𑌦𑌶𑍇𑌶𑍍𑌵𑌰𑌾𑌃 ॥ 15 ॥
𑌕𑍋𑌸𑌲𑍇𑌂𑌦𑍍𑌰 𑌤𑌤𑌃 𑌪𑌶𑍍𑌚𑌾𑌤𑍍𑌪𑍍𑌰𑌾𑌪𑍍𑌤𑌕𑌾𑌲𑌂 𑌕𑌰𑌿𑌷𑍍𑌯𑌸𑌿 ।
𑌶𑍀𑌲𑍇𑌨 𑌸𑌾𑌮𑍍𑌨𑌾 𑌵𑌿𑌨𑌯𑍇𑌨 𑌸𑍀𑌤𑌾𑌂 𑌨𑌯𑍇𑌨 𑌨 𑌪𑍍𑌰𑌾𑌪𑍍𑌸𑍍𑌯𑌸𑌿 𑌚𑍇𑌨𑍍𑌨𑌰𑍇𑌂𑌦𑍍𑌰 ।
𑌤𑌤𑌸𑍍𑌸𑌮𑍁𑌤𑍍𑌸𑌾𑌦𑌯 𑌹𑍇𑌮𑌪𑍁𑌂𑌖𑍈 𑌰𑍍𑌮𑌹𑍇𑌂𑌦𑍍𑌰𑌵𑌜𑍍𑌰𑌪𑍍𑌰𑌤𑌿𑌮𑍈𑌶𑍍𑌶𑌰𑍌𑌘𑍈𑌃 ॥ 16 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌪𑌂𑌚𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥
