𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌾𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌬𑍍𑌰𑌹𑍍𑌮𑌯𑍋𑌨𑌿𑌰𑍍𑌮𑌹𑌾𑌨𑌾𑌸𑍀𑌤𑍍 𑌕𑍁𑌶𑍋 𑌨𑌾𑌮 𑌮𑌹𑌾𑌤𑌪𑌾𑌃 ।
𑌅𑌕𑍍𑌲𑌿𑌷𑍍𑌟𑌵𑍍𑌰𑌤𑌧𑌰𑍍𑌮𑌜𑍍𑌞𑌃 𑌸𑌜𑍍𑌜𑌨𑌪𑍍𑌰𑌤𑌿𑌪𑍂𑌜𑌕𑌃 ॥ 1 ॥
𑌸 𑌮𑌹𑌾𑌤𑍍𑌮𑌾 𑌕𑍁𑌲𑍀𑌨𑌾𑌯𑌾𑌂 𑌯𑍁𑌕𑍍𑌤𑌾𑌯𑌾𑌂 𑌸𑍁𑌗𑍁𑌣𑍋𑌲𑍍𑌬𑌣𑌾𑌨𑍍 ।
𑌵𑍈𑌦𑌰𑍍𑌭𑍍𑌯𑌾𑌂 𑌜𑌨𑌯𑌾𑌮𑌾𑌸 𑌚𑌤𑍁𑌰𑌸𑍍𑌸𑌦𑍃𑌶𑌾𑌨𑍍 𑌸𑍁𑌤𑌾𑌨𑍍 ॥ 2 ॥
𑌕𑍁𑌶𑌾𑌂𑌬𑌂 𑌕𑍁𑌶𑌨𑌾𑌭𑌂 𑌚 𑌅𑌧𑍂𑌰𑍍𑌤𑌰𑌜𑌸𑌂 𑌵𑌸𑍁𑌮𑍍 ।
𑌦𑍀𑌪𑍍𑌤𑌿𑌯𑍁𑌕𑍍𑌤𑌾𑌨𑍍 𑌮𑌹𑍋𑌤𑍍𑌸𑌾𑌹𑌾𑌨𑍍 𑌕𑍍𑌷𑌤𑍍𑌰𑌧𑌰𑍍𑌮𑌚𑌿𑌕𑍀𑌰𑍍𑌷𑌯𑌾 ॥ 3 ॥
𑌤𑌾𑌨𑍁𑌵𑌾𑌚 𑌕𑍁𑌶𑌃 𑌪𑍁𑌤𑍍𑌰𑌾𑌨𑍍 𑌧𑌰𑍍𑌮𑌿𑌷𑍍𑌠𑌾𑌨𑍍 𑌸𑌤𑍍𑌯𑌵𑌾𑌦𑌿𑌨𑌃 ।
𑌕𑍍𑌰𑌿𑌯𑌤𑌾𑌂 𑌪𑌾𑌲𑌨𑌂 𑌪𑍁𑌤𑍍𑌰𑌾𑌃 𑌧𑌰𑍍𑌮𑌂 𑌪𑍍𑌰𑌾𑌪𑍍𑌸𑍍𑌯𑌥 𑌪𑍁𑌷𑍍𑌕𑌲𑌮𑍍 ॥ 4 ॥
𑌋𑌷𑍇𑌸𑍍𑌤𑍁 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌚𑌤𑍍𑌵𑌾𑌰𑍋 𑌲𑍋𑌕𑌸𑌮𑍍𑌮𑌤𑌾𑌃 ।
𑌨𑌿𑌵𑍇𑌶𑌂 𑌚𑌕𑍍𑌰𑌿𑌰𑍇 𑌸𑌰𑍍𑌵𑍇 𑌪𑍁𑌰𑌾𑌣𑌾𑌂 𑌨𑍃𑌵𑌰𑌾𑌸𑍍𑌤𑌦𑌾 ॥ 5 ॥
𑌕𑍁𑌶𑌾𑌂𑌬𑌸𑍍𑌤𑍁 𑌮𑌹𑌾𑌤𑍇𑌜𑌾𑌃 𑌕𑍌𑌶𑌾𑌂𑌬𑍀𑌮𑌕𑌰𑍋𑌤𑍍𑌪𑍁𑌰𑍀𑌮𑍍 ।
𑌕𑍁𑌶𑌨𑌾𑌭𑌸𑍍𑌤𑍁 𑌧𑌰𑍍𑌮𑌾𑌤𑍍𑌮𑌾 𑌪𑍁𑌰𑌂 𑌚𑌕𑍍𑌰𑍇 𑌮𑌹𑍋𑌦𑌯𑌮𑍍 ॥ 6 ॥
𑌅𑌧𑍂𑌰𑍍𑌤𑌰𑌜𑌸𑍋 𑌰𑌾𑌮 𑌧𑌰𑍍𑌮𑌾𑌰𑌣𑍍𑌯𑌂 𑌮𑌹𑍀𑌪𑌤𑌿𑌃 ।
𑌚𑌕𑍍𑌰𑍇 𑌪𑍁𑌰𑌵𑌰𑌂 𑌰𑌾𑌜𑌾 𑌵𑌸𑍁𑌶𑍍𑌚𑌕𑍍𑌰𑍇 𑌗𑌿𑌰𑌿𑌵𑍍𑌰𑌜𑌮𑍍 ॥ ॥
𑌏𑌷𑌾 𑌵𑌸𑍁𑌮𑌤𑍀 𑌰𑌾𑌮 𑌵𑌸𑍋𑌸𑍍𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌏𑌤𑍇 𑌶𑍈𑌲𑌵𑌰𑌾𑌃 𑌪𑌂𑌚 𑌪𑍍𑌰𑌕𑌾𑌶𑌂𑌤𑍇 𑌸𑌮𑌂𑌤𑌤𑌃 ॥ ॥
𑌸𑍁𑌮𑌾𑌗𑌧𑍀 𑌨𑌦𑍀 𑌰𑌮𑍍𑌯𑌾 𑌮𑌗𑌧𑌾𑌨𑍍 𑌵𑌿𑌶𑍍𑌰𑍁𑌤𑌾𑌯𑌯𑍌 ।
𑌪𑌂𑌚𑌾𑌨𑌾𑌂 𑌶𑍈𑌲𑌮𑍁𑌖𑍍𑌯𑌾𑌨𑌾𑌂 𑌮𑌧𑍍𑌯𑍇 𑌮𑌾𑌲𑍇𑌵 𑌶𑍋𑌭𑌤𑍇 ॥ ॥
𑌸𑍈𑌷𑌾 𑌹𑌿 𑌮𑌾𑌗𑌧𑍀 𑌰𑌾𑌮 𑌵𑌸𑍋𑌸𑍍𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌪𑍂𑌰𑍍𑌵𑌾𑌭𑌿𑌚𑌰𑌿𑌤𑌾 𑌰𑌾𑌮 𑌸𑍁𑌕𑍍𑌷𑍇𑌤𑍍𑌰𑌾 𑌸𑌸𑍍𑌯𑌮𑌾𑌲𑌿𑌨𑍀 ॥ 10 ॥
𑌕𑍁𑌶𑌨𑌾𑌭𑌸𑍍𑌤𑍁 𑌰𑌾𑌜𑌰𑍍𑌷𑌿𑌃 𑌕𑌨𑍍𑌯𑌾𑌶𑌤𑌮𑌨𑍁𑌤𑍍𑌤𑌮𑌮𑍍 ।
𑌜𑌨𑌯𑌾𑌮𑌾𑌸 𑌧𑌰𑍍𑌮𑌾𑌤𑍍𑌮𑌾 𑌘𑍃𑌤𑌾𑌚𑍍𑌯𑌾𑌂 𑌰𑌘𑍁𑌨𑌂𑌦𑌨 ॥ 11 ॥
𑌤𑌾𑌸𑍍𑌤𑍁 𑌯𑍌𑌵𑌨𑌶𑌾𑌲𑌿𑌨𑍍𑌯𑍋 𑌰𑍂𑌪𑌵𑌤𑍍𑌯 𑌸𑍍𑌸𑍍𑌵𑌲𑌂𑌕𑍃𑌤𑌾𑌃 ।
𑌉𑌦𑍍𑌯𑌾𑌨𑌭𑍂𑌮𑌿𑌮𑌾𑌗𑌮𑍍𑌯 𑌪𑍍𑌰𑌾𑌵𑍃𑌷𑍀𑌵 𑌶𑌤𑌹𑍍𑌰𑌦𑌾𑌃 ॥ 12 ॥
𑌗𑌾𑌯𑌂𑌤𑍍𑌯𑍋 𑌨𑍃𑌤𑍍𑌯𑌮𑌾𑌨𑌾𑌶𑍍𑌚 𑌵𑌾𑌦𑌯𑌂𑌤𑍍𑌯𑌶𑍍𑌚 𑌸𑌰𑍍𑌵𑌶𑌃 ।
𑌆𑌮𑍋𑌦𑌂 𑌪𑌰𑌮𑌂 𑌜𑌗𑍍𑌮𑍁𑌰𑍍𑌵𑌰𑌾𑌭𑌰𑌣𑌭𑍂𑌷𑌿𑌤𑌾𑌃 ॥ 13 ॥
𑌅𑌥 𑌤𑌾𑌶𑍍𑌚𑌾𑌰𑍁𑌸𑌰𑍍𑌵𑌾𑌂𑌗𑍍𑌯𑍋 𑌰𑍂𑌪𑍇𑌣𑌾𑌪𑍍𑌰𑌤𑌿𑌮𑌾 𑌭𑍁𑌵𑌿 ।
𑌉𑌦𑍍𑌯𑌾𑌨𑌭𑍂𑌮𑌿𑌮𑌾𑌗𑌮𑍍𑌯 𑌤𑌾𑌰𑌾 𑌇𑌵 𑌘𑌨𑌾𑌂𑌤𑌰𑍇 ॥ 14 ॥
𑌤𑌾𑌸𑍍𑌸𑌰𑍍𑌵𑌗𑍁𑌣𑌸𑌂𑌪𑌨𑍍𑌨𑌾 𑌰𑍂𑌪𑌯𑍌𑌵𑌨𑌸𑌂𑌯𑍁𑌤𑌾𑌃 ।
𑌦𑍃𑌷𑍍𑌟𑍍𑌵𑌾 𑌸𑌰𑍍𑌵𑌾𑌤𑍍𑌮𑌕𑍋 𑌵𑌾𑌯𑍁𑌰𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 15 ॥
𑌅𑌹𑌂 𑌵𑌃 𑌕𑌾𑌮𑌯𑍇 𑌸𑌰𑍍𑌵𑌾 𑌭𑌾𑌰𑍍𑌯𑌾 𑌮𑌮 𑌭𑌵𑌿𑌷𑍍𑌯𑌥 ।
𑌮𑌾𑌨𑍁𑌷𑌸𑍍𑌤𑍍𑌯𑌜𑍍𑌯𑌤𑌾𑌂 𑌭𑌾𑌵𑌃 𑌦𑍀𑌰𑍍𑌘𑌮𑌾𑌯𑍁𑌰𑌵𑌾𑌪𑍍𑌸𑍍𑌯𑌥 ॥ 16 ॥
𑌚𑌲𑌂 𑌹𑌿 𑌯𑍌𑌵𑌨𑌂 𑌨𑌿𑌤𑍍𑌯𑌂 𑌮𑌾𑌨𑍁𑌷𑍇𑌷𑍁 𑌵𑌿𑌶𑍇𑌷𑌤𑌃 ।
𑌅𑌕𑍍𑌷𑌯𑍍𑌯𑌂 𑌯𑍌𑌵𑌨𑌂 𑌪𑍍𑌰𑌾𑌪𑍍𑌤𑌾𑌃 𑌅𑌮𑌰𑍍𑌯𑌶𑍍𑌚 𑌭𑌵𑌿𑌷𑍍𑌯𑌥 ॥ 1 ॥
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌵𑌾𑌯𑍋𑌰𑌕𑍍𑌲𑌿𑌷𑍍𑌟𑌕𑌰𑍍𑌮𑌣𑌃 ।
𑌅𑌪𑌹𑌾𑌸𑍍𑌯 𑌤𑌤𑍋 𑌵𑌾𑌕𑍍𑌯𑌂 𑌕𑌨𑍍𑌯𑌾𑌶𑌤𑌮𑌥𑌾𑌬𑍍𑌰𑌵𑍀𑌤𑍍 ॥ 1 ॥
𑌅𑌂𑌤𑌶𑍍𑌚𑌰𑌸𑌿 𑌭𑍂𑌤𑌾𑌨𑌾𑌂 𑌸𑌰𑍍𑌵𑍇𑌷𑌾𑌂 𑌤𑍍𑌵𑌂 𑌸𑍁𑌰𑍋𑌤𑍍𑌤𑌮 ।
𑌪𑍍𑌰𑌭𑌾𑌵𑌜𑍍𑌞𑌾𑌃 𑌸𑍍𑌮 𑌤𑍇 𑌸𑌰𑍍𑌵𑌾𑌃 𑌕𑌿𑌮𑌸𑍍𑌮𑌾𑌨𑌵𑌮𑌨𑍍𑌯𑌸𑍇 ॥ 1 ॥
𑌕𑍁𑌶𑌨𑌾𑌭𑌸𑍁𑌤𑌾𑌸𑍍𑌸𑌰𑍍𑌵𑌾𑌃 𑌸𑌮𑌰𑍍𑌥𑌾𑌸𑍍𑌤𑍍𑌵𑌾𑌂 𑌸𑍁𑌰𑍋𑌤𑍍𑌤𑌮 ।
𑌸𑍍𑌥𑌾𑌨𑌾𑌚𑍍𑌚𑍍𑌯𑌾𑌵𑌯𑌿𑌤𑍁𑌂 𑌦𑍇𑌵𑌂 𑌰𑌕𑍍𑌷𑌾𑌮𑌸𑍍𑌤𑍁 𑌤𑌪𑍋 𑌵𑌯𑌮𑍍 ॥ 20 ॥
𑌮𑌾𑌭𑍂𑌤𑍍𑌸 𑌕𑌾𑌲𑍋 𑌦𑍁𑌰𑍍𑌮𑍇𑌧𑌃 𑌪𑌿𑌤𑌰𑌂 𑌸𑌤𑍍𑌯𑌵𑌾𑌦𑌿𑌨𑌮𑍍 ।
𑌨𑌾𑌵𑌮𑌨𑍍𑌯𑌸𑍍𑌵 𑌧𑌰𑍍𑌮𑍇𑌣 𑌸𑍍𑌵𑌯𑌂 𑌵𑌰𑌮𑍁𑌪𑌾𑌸𑍍𑌮𑌹𑍇 ॥ 21 ॥
𑌪𑌿𑌤𑌾 𑌹𑌿 𑌪𑍍𑌰𑌭𑍁𑌰𑌸𑍍𑌮𑌾𑌕𑌂 𑌦𑍈𑌵𑌤𑌂 𑌪𑌰𑌮𑌂 𑌹𑌿 𑌨𑌃 ।
𑌯𑌸𑍍𑌯 𑌨𑍋 𑌦𑌾𑌸𑍍𑌯𑌤𑌿 𑌪𑌿𑌤𑌾 𑌸 𑌨𑍋 𑌭𑌰𑍍𑌤𑌾 𑌭𑌵𑌿𑌷𑍍𑌯𑌤𑌿 ॥ 22 ॥
𑌤𑌾𑌸𑌾𑌂 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌵𑌾𑌯𑍁𑌃 𑌪𑌰𑌮𑌕𑍋𑌪𑌨𑌃 ।
𑌪𑍍𑌰𑌵𑌿𑌶𑍍𑌯 𑌸𑌰𑍍𑌵𑌗𑌾𑌤𑍍𑌰𑌾𑌣𑌿 𑌬𑌭𑌂𑌜 𑌭𑌗𑌵𑌾𑌨𑍍 𑌪𑍍𑌰𑌭𑍁𑌃 ॥ 23 ॥
𑌤𑌾𑌃 𑌕𑌨𑍍𑌯𑌾 𑌵𑌾𑌯𑍁𑌨𑌾 𑌭𑌗𑍍𑌨𑌾 𑌵𑌿𑌵𑌿𑌶𑍁𑌰𑍍𑌨𑍃𑌪𑌤𑍇𑌰𑍍𑌗𑍃𑌹𑌮𑍍 ।
𑌪𑍍𑌰𑌾𑌪𑌤𑌨𑍍 𑌭𑍁𑌵𑌿 𑌸𑌂𑌭𑍍𑌰𑌾𑌂𑌤𑌾𑌸𑍍𑌸𑌲𑌜𑍍𑌜𑌾 𑌸𑍍𑌸𑌾𑌸𑍍𑌰𑌲𑍋𑌚𑌨𑌾𑌃 ॥ 24 ॥
𑌸 𑌚 𑌤𑌾 𑌦𑌯𑌿𑌤𑌾 𑌦𑍀𑌨𑌾𑌃 𑌕𑌨𑍍𑌯𑌾𑌃 𑌪𑌰𑌮𑌶𑍋𑌭𑌨𑌾𑌃 ।
𑌦𑍃𑌷𑍍𑌟𑍍𑌵𑌾 𑌭𑌗𑍍𑌨𑌾𑌸𑍍𑌤𑌦𑌾 𑌰𑌾𑌜𑌾 𑌸𑌂𑌭𑍍𑌰𑌾𑌂𑌤 𑌇𑌦𑌮𑌬𑍍𑌰𑌵𑍀𑌤𑍍 ॥ 25 ॥
𑌕𑌿𑌮𑌿𑌦𑌂 𑌕𑌥𑍍𑌯𑌤𑌾𑌂 𑌪𑍁𑌤𑍍𑌰𑍍𑌯𑌃 𑌕𑍋 𑌧𑌰𑍍𑌮𑌮𑌵𑌮𑌨𑍍𑌯𑌤𑍇 ।
𑌕𑍁𑌬𑍍𑌜𑌾𑌃 𑌕𑍇𑌨 𑌕𑍃𑌤𑌾𑌃 𑌸𑌰𑍍𑌵𑌾 𑌵𑍇𑌷𑍍𑌟𑌂𑌤𑍍𑌯𑍋 𑌨𑌾𑌭𑌿𑌭𑌾𑌷𑌥 ।
𑌏𑌵𑌂 𑌰𑌾𑌜𑌾 𑌵𑌿𑌨𑌿𑌶𑍍𑌶𑍍𑌵𑌸𑍍𑌯 𑌸𑌮𑌾𑌧𑌿𑌂 𑌸𑌂𑌦𑌧𑍇 𑌤𑌤𑌃 ॥ 26 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌦𑍍𑌵𑌾𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
