𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌅𑌥 𑌤𑌸𑍍𑌯𑌾𑌪𑍍𑌰𑌮𑍇𑌯𑌸𑍍𑌯 𑌤𑌦𑍍𑌵𑌨𑌂 𑌪𑌰𑌿𑌪𑍃𑌚𑍍𑌛𑌤𑌃 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌤𑍇𑌜𑌾 𑌵𑍍𑌯𑌾𑌖𑍍𑌯𑌾𑌤𑍁𑌮𑍁𑌪𑌚𑌕𑍍𑌰𑌮𑍇 ॥ 1 ॥
𑌇𑌹 𑌰𑌾𑌮 𑌮𑌹𑌾𑌬𑌾𑌹𑍋 𑌵𑌿𑌷𑍍𑌣𑍁𑌰𑍍𑌦𑍇𑌵𑌵𑌰𑌃 𑌪𑍍𑌰𑌭𑍁𑌃 ।
𑌵𑌰𑍍𑌷𑌾𑌣𑌿 𑌸𑍁𑌬𑌹𑍂𑌨𑍀𑌹 𑌤𑌥𑌾 𑌯𑍁𑌗𑌶𑌤𑌾𑌨𑌿 𑌚 ॥ 2 ॥
𑌤𑌪𑌶𑍍𑌚𑌰𑌣𑌯𑍋𑌗𑌾𑌰𑍍𑌥𑌮𑍁𑌵𑌾𑌸 𑌸𑍁𑌮𑌹𑌾𑌤𑌪𑌾𑌃 ।
𑌏𑌷 𑌪𑍂𑌰𑍍𑌵𑌾𑌶𑍍𑌰𑌮𑍋 𑌰𑌾𑌮 𑌵𑌾𑌮𑌨𑌸𑍍𑌯 𑌮𑌹𑌾𑌤𑍍𑌮𑌨𑌃 ॥ 3 ॥
𑌸𑌿𑌦𑍍𑌧𑌾𑌶𑍍𑌰𑌮 𑌇𑌤𑌿 𑌖𑍍𑌯𑌾𑌤𑌸𑍍𑌸𑌿𑌦𑍍𑌧𑍋 𑌹𑍍𑌯𑌤𑍍𑌰 𑌮𑌹𑌾𑌤𑌪𑌾𑌃 ।
𑌏𑌤𑌸𑍍𑌮𑌿𑌨𑍍𑌨𑍇𑌵 𑌕𑌾𑌲𑍇 𑌤𑍁 𑌰𑌾𑌜𑌾 𑌵𑍈𑌰𑍋𑌚𑌨𑌿𑌰𑍍𑌬𑌲𑌿𑌃 ॥ 4 ॥
𑌨𑌿𑌰𑍍𑌜𑌿𑌤𑍍𑌯 𑌦𑍈𑌵𑌤𑌗𑌣𑌾𑌨𑍍 𑌸𑍇𑌂𑌦𑍍𑌰𑌾𑌂𑌶𑍍𑌚 𑌸𑌮𑌰𑍁𑌦𑍍𑌗𑌣𑌾𑌨𑍍 ।
𑌕𑌾𑌰𑌯𑌾𑌮𑌾𑌸 𑌤𑌦𑍍𑌰𑌾𑌜𑍍𑌯𑌂 𑌤𑍍𑌰𑌿𑌷𑍁 𑌲𑍋𑌕𑍇𑌷𑍁 𑌵𑌿𑌶𑍍𑌰𑍁𑌤𑌃 ॥ 5 ॥
𑌬𑌲𑍇𑌸𑍍𑌤𑍁 𑌯𑌜𑌮𑌾𑌨𑌸𑍍𑌯 𑌦𑍇𑌵𑌾𑌸𑍍𑌸𑌾𑌗𑍍𑌨𑌿𑌪𑍁𑌰𑍋𑌗𑌮𑌾𑌃 ।
𑌸𑌮𑌾𑌗𑌮𑍍𑌯 𑌸𑍍𑌵𑌯𑌂 𑌚𑍈𑌵 𑌵𑌿𑌷𑍍𑌣𑍁𑌮𑍂𑌚𑍁𑌰𑌿𑌹𑌾𑌶𑍍𑌰𑌮𑍇 ॥ 6 ॥
𑌬𑌲𑌿𑌰𑍍𑌵𑍈𑌰𑍋𑌚𑌨𑌿𑌰𑍍𑌵𑌿𑌷𑍍𑌣𑍋 𑌯𑌜𑌤𑍇 𑌯𑌜𑍍𑌞𑌮𑍁𑌤𑍍𑌤𑌮𑌮𑍍 ।
𑌅𑌸𑌮𑌾𑌪𑍍𑌤𑍇 𑌕𑍍𑌰𑌤𑍌 𑌤𑌸𑍍𑌮𑌿𑌨𑍍 𑌸𑍍𑌵𑌕𑌾𑌰𑍍𑌯𑌮𑌭𑌿𑌪𑌦𑍍𑌯𑌤𑌾𑌮𑍍 ॥ ॥
𑌯𑍇 𑌚𑍈𑌨𑌮𑌭𑌿𑌵𑌰𑍍𑌤𑌂𑌤𑍇 𑌯𑌾𑌚𑌿𑌤𑌾𑌰 𑌇𑌤𑌸𑍍𑌤𑌤𑌃 ।
𑌯𑌚𑍍𑌚 𑌯𑌤𑍍𑌰 𑌯𑌥𑌾𑌵𑌚𑍍𑌚 𑌸𑌰𑍍𑌵𑌂 𑌤𑍇𑌭𑍍𑌯𑌃 𑌪𑍍𑌰𑌯𑌚𑍍𑌛𑌤𑌿 ॥ ॥
𑌸 𑌤𑍍𑌵𑌂 𑌸𑍁𑌰𑌹𑌿𑌤𑌾𑌰𑍍𑌥𑌾𑌯 𑌮𑌾𑌯𑌾𑌯𑍋𑌗𑌮𑍁𑌪𑌾𑌗𑌤𑌃 ।
𑌵𑌾𑌮𑌨𑌤𑍍𑌵𑌂 𑌗𑌤𑍋 𑌵𑌿𑌷𑍍𑌣𑍋 𑌕𑍁𑌰𑍁 𑌕𑌲𑍍𑌯𑌾𑌣𑌮𑍁𑌤𑍍𑌤𑌮𑌮𑍍 ॥ ॥
𑌏𑌤𑌸𑍍𑌮𑌿𑌨𑍍𑌨𑌂𑌤𑌰𑍇 𑌰𑌾𑌮 𑌕𑌶𑍍𑌯𑌪𑍋𑌽𑌗𑍍𑌨𑌿𑌸𑌮𑌪𑍍𑌰𑌭𑌃 ।
𑌅𑌦𑌿𑌤𑍍𑌯𑌾 𑌸𑌹𑌿𑌤𑍋 𑌰𑌾𑌮 𑌦𑍀𑌪𑍍𑌯𑌮𑌾𑌨 𑌇𑌵𑍌𑌜𑌸𑌾 ॥ 10 ॥
𑌦𑍇𑌵𑍀𑌸𑌹𑌾𑌯𑍋 𑌭𑌗𑌵𑌾𑌨𑍍 𑌦𑌿𑌵𑍍𑌯𑌂 𑌵𑌰𑍍𑌷𑌸𑌹𑌸𑍍𑌰𑌕𑌮𑍍 ।
𑌵𑍍𑌰𑌤𑌂 𑌸𑌮𑌾𑌪𑍍𑌯 𑌵𑌰𑌦𑌂 𑌤𑍁𑌷𑍍𑌟𑌾𑌵 𑌮𑌧𑍁𑌸𑍂𑌦𑌨𑌮𑍍 ॥ 11 ॥
𑌤𑌪𑍋𑌮𑌯𑌂 𑌤𑌪𑍋𑌰𑌾𑌶𑌿𑌂 𑌤𑌪𑍋𑌮𑍂𑌰𑍍𑌤𑌿𑌂 𑌤𑌪𑌾𑌤𑍍𑌮𑌕𑌮𑍍 ।
𑌤𑌪𑌸𑌾 𑌤𑍍𑌵𑌾𑌂 𑌸𑍁𑌤𑌪𑍍𑌤𑍇𑌨 𑌪𑌶𑍍𑌯𑌾𑌮𑌿 𑌪𑍁𑌰𑍁𑌷𑍋𑌤𑍍𑌤𑌮𑌮𑍍 ॥ 12 ॥
𑌶𑌰𑍀𑌰𑍇 𑌤𑌵 𑌪𑌶𑍍𑌯𑌾𑌮𑌿 𑌜𑌗𑌤𑍍𑌸𑌰𑍍𑌵𑌮𑌿𑌦𑌂 𑌪𑍍𑌰𑌭𑍋 ।
𑌤𑍍𑌵𑌮𑌨𑌾𑌦𑌿𑌰𑌨𑌿𑌰𑍍𑌦𑍇𑌶𑍍𑌯𑌸𑍍𑌤𑍍𑌵𑌾𑌮𑌹𑌂 𑌶𑌰𑌣𑌂 𑌗𑌤𑌃 ॥ 13 ॥
𑌤𑌮𑍁𑌵𑌾𑌚 𑌹𑌰𑌿𑌃 𑌪𑍍𑌰𑍀𑌤𑌃 𑌕𑌶𑍍𑌯𑌪𑌂 𑌧𑍂𑌤𑌕𑌲𑍍𑌮𑌷𑌮𑍍 ।
𑌵𑌰𑌂 𑌵𑌰𑌯 𑌭𑌦𑍍𑌰𑌂 𑌤𑍇 𑌵𑌰𑌾𑌰𑍍𑌹𑍋𑌽𑌸𑌿 𑌮𑌤𑍋 𑌮𑌮 ॥ 14 ॥
𑌤𑌚𑍍𑌛𑍍𑌰𑍁𑌤𑍍𑌵𑌾 𑌵𑌚𑌨𑌂 𑌤𑌸𑍍𑌯 𑌮𑌾𑌰𑍀𑌚𑌃 𑌕𑌶𑍍𑌯𑌪𑍋𑌽𑌬𑍍𑌰𑌵𑍀𑌤𑍍 ।
𑌅𑌦𑌿𑌤𑍍𑌯𑌾 𑌦𑍇𑌵𑌤𑌾𑌨𑌾𑌂 𑌚 𑌮𑌮 𑌚𑍈𑌵𑌾𑌨𑍁𑌯𑌾𑌚𑌤𑌃 ॥ 15 ॥
𑌵𑌰𑌂 𑌵𑌰𑌦 𑌸𑍁𑌪𑍍𑌰𑍀𑌤𑍋 𑌦𑌾𑌤𑍁𑌮𑌰𑍍𑌹𑌸𑌿 𑌸𑍁𑌵𑍍𑌰𑌤 ।
𑌪𑍁𑌤𑍍𑌰𑌤𑍍𑌵𑌂 𑌗𑌚𑍍𑌛 𑌭𑌗𑌵𑌨𑍍𑌨𑌦𑌿𑌤𑍍𑌯𑌾 𑌮𑌮 𑌚𑌾𑌨𑌘 ॥ 16 ॥
𑌭𑍍𑌰𑌾𑌤𑌾 𑌭𑌵 𑌯𑌵𑍀𑌯𑌾𑌂𑌸𑍍𑌤𑍍𑌵𑌂 𑌶𑌕𑍍𑌰𑌸𑍍𑌯𑌾𑌸𑍁𑌰𑌸𑍂𑌦𑌨 ।
𑌶𑍋𑌕𑌾𑌰𑍍𑌤𑌾𑌨𑌾𑌂 𑌤𑍁 𑌦𑍇𑌵𑌾𑌨𑌾𑌂 𑌸𑌾𑌹𑌾𑌯𑍍𑌯𑌂 𑌕𑌰𑍍𑌤𑍁𑌮𑌰𑍍𑌹𑌸𑌿 ॥ 1 ॥
𑌅𑌯𑌂 𑌸𑌿𑌦𑍍𑌧𑌾𑌶𑍍𑌰𑌮𑍋 𑌨𑌾𑌮 𑌪𑍍𑌰𑌸𑌾𑌦𑌾 𑌤𑍍𑌤𑍇 𑌭𑌵𑌿𑌷𑍍𑌯𑌤𑌿 ।
𑌸𑌿𑌦𑍍𑌧𑍇 𑌕𑌰𑍍𑌮𑌣𑌿 𑌦𑍇𑌵𑍇𑌶 𑌉𑌤𑍍𑌤𑌿𑌷𑍍𑌠 𑌭𑌗𑌵𑌨𑍍𑌨𑌿𑌤𑌃 ॥ 1 ॥
𑌅𑌥 𑌵𑌿𑌷𑍍𑌣𑍁𑌰𑍍𑌮𑌹𑌾𑌤𑍇𑌜𑌾 𑌅𑌦𑌿𑌤𑍍𑌯𑌾𑌂 𑌸𑌮𑌜𑌾𑌯𑌤 ।
𑌵𑌾𑌮𑌨𑌂 𑌰𑍂𑌪𑌮𑌾𑌸𑍍𑌥𑌾𑌯 𑌵𑍈𑌰𑍋𑌚𑌨𑌿𑌮𑍁𑌪𑌾𑌗𑌮𑌤𑍍 ॥ 1 ॥
𑌤𑍍𑌰𑍀𑌨𑍍 𑌕𑍍𑌰𑌮𑌾𑌨𑌥 𑌭𑌿𑌕𑍍𑌷𑌿𑌤𑍍𑌵𑌾 𑌪𑍍𑌰𑌤𑌿𑌗𑍃𑌹𑍍𑌯 𑌚 𑌮𑌾𑌨𑌦𑌃 ।
𑌆𑌕𑍍𑌰𑌮𑍍𑌯 𑌲𑍋𑌕𑌾𑌨𑍍 𑌲𑍋𑌕𑌾𑌤𑍍𑌮𑌾 𑌸𑌰𑍍𑌵𑌭𑍂𑌤𑌹𑌿𑌤𑍇 𑌰𑌤𑌃 ॥ 20 ॥
𑌮𑌹𑍇𑌂𑌦𑍍𑌰𑌾𑌯 𑌪𑍁𑌨𑌃 𑌪𑍍𑌰𑌾𑌦𑌾𑌨𑍍𑌨𑌿𑌯𑌮𑍍𑌯 𑌬𑌲𑌿𑌮𑍋𑌜𑌸𑌾 ।
𑌤𑍍𑌰𑍈𑌲𑍋𑌕𑍍𑌯𑌂 𑌸 𑌮𑌹𑌾𑌤𑍇𑌜𑌾𑌶𑍍𑌚𑌕𑍍𑌰𑍇 𑌶𑌕𑍍𑌰𑌵𑌶𑌂 𑌪𑍁𑌨𑌃 ॥ 21 ॥
𑌤𑍇𑌨𑍈𑌷 𑌪𑍂𑌰𑍍𑌵𑌮𑌾𑌕𑍍𑌰𑌾𑌂𑌤 𑌆𑌶𑍍𑌰𑌮𑌶𑍍𑌶𑍍𑌰𑌮𑌨𑌾𑌶𑌨𑌃 ।
𑌮𑌯𑌾𑌪𑌿 𑌭𑌕𑍍𑌤𑌯 𑌤𑌸𑍍𑌯𑍈𑌷 𑌵𑌾𑌮𑌨𑌸𑍍𑌯𑍋𑌪𑌭𑍁𑌜𑍍𑌯𑌤𑍇 ॥ 22 ॥
𑌏𑌤𑌮𑌾𑌶𑍍𑌰𑌮𑌮𑌾𑌯𑌾𑌂𑌤𑌿 𑌰𑌾𑌕𑍍𑌷𑌸𑌾 𑌵𑌿𑌘𑍍𑌨𑌕𑌾𑌰𑌿𑌣𑌃 ।
𑌅𑌤𑍍𑌰𑍈𑌵 𑌪𑍁𑌰𑍁𑌷𑌵𑍍𑌯𑌾𑌘𑍍𑌰 𑌹𑌂𑌤𑌵𑍍𑌯𑌾 𑌦𑍁𑌷𑍍𑌟𑌚𑌾𑌰𑌿𑌣𑌃 ॥ 23 ॥
𑌅𑌦𑍍𑌯 𑌗𑌚𑍍𑌛𑌾𑌮𑌹𑍇 𑌰𑌾𑌮 𑌸𑌿𑌦𑍍𑌧𑌾𑌶𑍍𑌰𑌮𑌮𑌨𑍁𑌤𑍍𑌤𑌮𑌮𑍍 ।
𑌤𑌦𑌾𑌶𑍍𑌰𑌮𑌪𑌦𑌂 𑌤𑌾𑌤 𑌤𑌵𑌾𑌪𑍍𑌯𑍇𑌤𑌦𑍍𑌯𑌥𑌾 𑌮𑌮 ॥ 24 ॥
𑌪𑍍𑌰𑌵𑌿𑌶𑌨𑍍𑌨𑌾𑌶𑍍𑌰𑌮𑌪𑌦𑌂 𑌵𑍍𑌯𑌰𑍋𑌚𑌤 𑌮𑌹𑌾𑌮𑍁𑌨𑌿𑌃 ।
𑌶𑌶𑍀𑌵 𑌗𑌤𑌨𑍀𑌹𑌾𑌰𑌃 𑌪𑍁𑌨𑌰𑍍𑌵𑌸𑍁𑌸𑌮𑌨𑍍𑌵𑌿𑌤𑌃 ॥ 25 ॥
𑌤𑌂 𑌦𑍃𑌷𑍍𑌟𑍍𑌵𑌾 𑌮𑍁𑌨𑌯𑌸𑍍𑌸𑌰𑍍𑌵𑍇 𑌸𑌿𑌦𑍍𑌧𑌾𑌶𑍍𑌰𑌮𑌨𑌿𑌵𑌾𑌸𑌿𑌨𑌃 ।
𑌉𑌤𑍍𑌪𑌤𑍍𑌤𑍍𑌯𑍋𑌤𑍍𑌪𑌤𑍍𑌤𑍍𑌯 𑌸𑌹𑌸𑌾 𑌵𑌿𑌶𑍍𑌵𑌾𑌮𑌿𑌤𑍍𑌰𑌮𑌪𑍂𑌜𑌯𑌨𑍍 ॥ 26 ॥
𑌯𑌥𑌾𑌰𑍍𑌹𑌂 𑌚𑌕𑍍𑌰𑌿𑌰𑍇 𑌪𑍂𑌜𑌾𑌂 𑌵𑌿𑌶𑍍𑌵𑌾𑌮𑌿𑌤𑍍𑌰𑌾𑌯 𑌧𑍀𑌮𑌤𑍇 ।
𑌤𑌥𑍈𑌵 𑌰𑌾𑌜𑌪𑍁𑌤𑍍𑌰𑌾𑌭𑍍𑌯𑌾𑌮𑌕𑍁𑌰𑍍𑌵𑌨𑍍𑌨𑌤𑌿𑌥𑌿𑌕𑍍𑌰𑌿𑌯𑌾𑌮𑍍 ॥ 2 ॥
𑌮𑍁𑌹𑍂𑌰𑍍𑌤𑌮𑌥 𑌵𑌿𑌶𑍍𑌰𑌾𑌂𑌤𑍌 𑌰𑌾𑌜𑌪𑍁𑌤𑍍𑌰𑌾𑌵𑌰𑌿𑌂𑌦𑌮𑍌 ।
𑌪𑍍𑌰𑌾𑌂𑌜𑌲𑍀 𑌮𑍁𑌨𑌿𑌶𑌾𑌰𑍍𑌦𑍂𑌲𑌮𑍂𑌚𑌤𑍂 𑌰𑌘𑍁𑌨𑌂𑌦𑌨𑍌 ॥ 2 ॥
𑌅𑌦𑍍𑌯𑍈𑌵 𑌦𑍀𑌕𑍍𑌷𑌾𑌂 𑌪𑍍𑌰𑌵𑌿𑌶 𑌭𑌦𑍍𑌰𑌂 𑌤𑍇 𑌮𑍁𑌨𑌿𑌪𑍁𑌂𑌗𑌵 ।
𑌸𑌿𑌦𑍍𑌧𑌾𑌶𑍍𑌰𑌮𑍋𑌽𑌯𑌂 𑌸𑌿𑌦𑍍𑌧𑌸𑍍𑌸𑍍𑌯𑌾𑌤𑍍 𑌸𑌤𑍍𑌯𑌮𑌸𑍍𑌤𑍁 𑌵𑌚𑌸𑍍𑌤𑌵 ॥ 2 ॥
𑌏𑌵𑌮𑍁𑌕𑍍𑌤𑍋 𑌮𑌹𑌾𑌤𑍇𑌜𑌾 𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌨𑍍 𑌋𑌷𑌿𑌃 ।
𑌪𑍍𑌰𑌵𑌿𑌵𑍇𑌶 𑌤𑌦𑌾 𑌦𑍀𑌕𑍍𑌷𑌾𑌂 𑌨𑌿𑌯𑌤𑍋 𑌨𑌿𑌯𑌤𑍇𑌂𑌦𑍍𑌰𑌿𑌯𑌃 ॥ 30 ॥
𑌕𑍁𑌮𑌾𑌰𑌾𑌵𑌪𑌿 𑌤𑌾𑌂 𑌰𑌾𑌤𑍍𑌰𑌿𑌮𑍁𑌷𑌿𑌤𑍍𑌵𑌾 𑌸𑍁𑌸𑌮𑌾𑌹𑌿𑌤𑍌 ।
𑌪𑍍𑌰𑌭𑌾𑌤𑌕𑌾𑌲𑍇 𑌚𑍋𑌤𑍍𑌥𑌾𑌯 𑌪𑍂𑌰𑍍𑌵𑌾𑌂 𑌸𑌂𑌧𑍍𑌯𑌾𑌮𑍁𑌪𑌾𑌸𑍍𑌯 𑌚 ॥ 31 ॥
𑌸𑍍𑌪𑍃𑌷𑍍𑌟𑍋𑌦𑌕𑍌 𑌶𑍁𑌚𑍀 𑌜𑌪𑍍𑌯𑌂 𑌸𑌮𑌾𑌪𑍍𑌯 𑌨𑌿𑌯𑌮𑍇𑌨 𑌚 ।
𑌹𑍁𑌤𑌾𑌗𑍍𑌨𑌿𑌹𑍋𑌤𑍍𑌰𑌮𑌾𑌸𑍀𑌨𑌂 𑌵𑌿𑌶𑍍𑌵𑌾𑌮𑌿𑌤𑍍𑌰𑌮𑌵𑌂𑌦𑌤𑌾𑌮𑍍 ॥ 32 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌏𑌕𑍋𑌨𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
