𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌾𑌦𑌶𑌸𑍍𑌸𑌰𑍍𑌗𑌃 ।
𑌇𑌤𑍍𑌯𑍁𑌕𑍍𑌤𑌃 𑌪𑍍𑌰𑌶𑍍𑌰𑌿𑌤𑌂 𑌵𑌾𑌕𑍍𑌯𑌂 𑌧𑌰𑍍𑌮𑌾𑌰𑍍𑌥𑌸𑌹𑌿𑌤𑌂 𑌹𑌿𑌤𑌮𑍍 ।
𑌪𑌰𑍁𑌷𑌂 𑌵𑌾𑌲𑌿𑌨𑌾 𑌰𑌾𑌮𑍋 𑌨𑌿𑌹𑌤𑍇𑌨 𑌵𑌿𑌚𑍇𑌤𑌸𑌾 ॥ 1 ॥
𑌤𑌂 𑌨𑌿𑌷𑍍𑌪𑍍𑌰𑌭𑌮𑌿𑌵𑌾𑌦𑌿𑌤𑍍𑌯𑌂 𑌮𑍁𑌕𑍍𑌤𑌤𑍋𑌯𑌮𑌿𑌵𑌾𑌂𑌬𑍁𑌦𑌮𑍍 ।
𑌉𑌕𑍍𑌤𑌵𑌾𑌕𑍍𑌯𑌂 𑌹𑌰𑌿𑌶𑍍𑌰𑍇𑌷𑍍𑌠𑌮𑍁𑌪𑌶𑌾𑌂𑌤𑌮𑌿𑌵𑌾𑌨𑌲𑌮𑍍 ॥ 2 ॥
𑌧𑌰𑍍𑌮𑌾𑌰𑍍𑌥𑌗𑍁𑌣𑌸𑌂𑌪𑌨𑍍𑌨𑌂 𑌹𑌰𑍀𑌶𑍍𑌵𑌰𑌮𑌨𑍁𑌤𑍍𑌤𑌮𑌮𑍍 ।
𑌅𑌧𑌿𑌕𑍍𑌷𑌿𑌪𑍍𑌤𑌸𑍍𑌤𑌦𑌾 𑌰𑌾𑌮𑌃 𑌪𑌶𑍍𑌚𑌾𑌦𑍍𑌵𑌾𑌲𑌿𑌨𑌮𑌬𑍍𑌰𑌵𑍀𑌤𑍍 ॥ 3 ॥
𑌧𑌰𑍍𑌮𑌮𑌰𑍍𑌥𑌂 𑌚 𑌕𑌾𑌮𑌂 𑌚 𑌸𑌮𑌯𑌂 𑌚𑌾𑌪𑌿 𑌲𑍌𑌕𑌿𑌕𑌮𑍍 ।
𑌅𑌵𑌿𑌜𑍍𑌞𑌾𑌯 𑌕𑌥𑌂 𑌬𑌾𑌲𑍍𑌯𑌾𑌨𑍍𑌮𑌾𑌮𑌿𑌹𑌾𑌦𑍍𑌯 𑌵𑌿𑌗𑌰𑍍𑌹𑌸𑍇 ॥ 4 ॥
𑌅𑌪𑍃𑌷𑍍𑌟𑍍𑌵𑌾 𑌬𑍁𑌦𑍍𑌧𑌿𑌸𑌂𑌪𑌨𑍍𑌨𑌾𑌨𑍍𑌵𑍃𑌦𑍍𑌧𑌾𑌨𑌾𑌚𑌾𑌰𑍍𑌯𑌸𑌮𑍍𑌮𑌤𑌾𑌨𑍍 ।
𑌸𑍌𑌮𑍍𑌯 𑌵𑌾𑌨𑌰𑌚𑌾𑌪𑌲𑍍𑌯𑌾𑌤𑍍𑌕𑌿𑌂 𑌮𑌾𑌵𑌕𑍍𑌤𑍁𑌮𑌿𑌹𑍇𑌚𑍍𑌛𑌸𑌿 ॥ 5 ॥
𑌇𑌕𑍍𑌷𑍍𑌵𑌾𑌕𑍂𑌣𑌾𑌮𑌿𑌯𑌂 𑌭𑍂𑌮𑌿𑌸𑍍𑌸𑌶𑍈𑌲𑌵𑌨𑌕𑌾𑌨𑌨𑌾 ।
𑌮𑍃𑌗𑌪𑌕𑍍𑌷𑌿𑌮𑌨𑍁𑌷𑍍𑌯𑌾𑌣𑌾𑌂 𑌨𑌿𑌗𑍍𑌰𑌹𑌪𑍍𑌰𑌗𑍍𑌰𑌹𑌾𑌵𑌪𑌿 ॥ 6 ॥
𑌤𑌾𑌂 𑌪𑌾𑌲𑌯𑌤𑌿 𑌧𑌰𑍍𑌮𑌾𑌤𑍍𑌮𑌾 𑌭𑌰𑌤𑌸𑍍𑌸𑌤𑍍𑌯𑌵𑌾𑌗𑍃𑌜𑍁𑌃 ।
𑌧𑌰𑍍𑌮𑌕𑌾𑌮𑌾𑌰𑍍𑌥𑌤𑌤𑍍𑌤𑍍𑌵𑌜𑍍𑌞𑍋 𑌨𑌿𑌗𑍍𑌰𑌹𑌾𑌨𑍁𑌗𑍍𑌰𑌹𑍇 𑌰𑌤𑌃 ॥ ॥
𑌨𑌯𑌶𑍍𑌚 𑌵𑌿𑌨𑌯𑌶𑍍𑌚𑍋𑌭𑍌 𑌯𑌸𑍍𑌮𑌿𑌨𑍍𑌸𑌤𑍍𑌯𑌂 𑌚 𑌸𑍁𑌸𑍍𑌥𑌿𑌤𑌮𑍍 ।
𑌵𑌿𑌕𑍍𑌰𑌮𑌶𑍍𑌚 𑌯𑌥𑌾 𑌦𑍃𑌷𑍍𑌟𑌸𑍍𑌸 𑌰𑌾𑌜𑌾 𑌦𑍇𑌶𑌕𑌾𑌲𑌵𑌿𑌤𑍍 ॥ ॥
𑌤𑌸𑍍𑌯 𑌧𑌰𑍍𑌮𑌕𑍃𑌤𑌾𑌦𑍇𑌶𑌾 𑌵𑌯𑌮𑌨𑍍𑌯𑍇 𑌚 𑌪𑌾𑌰𑍍𑌥𑌿𑌵𑌾𑌃 ।
𑌚𑌰𑌾𑌮𑍋 𑌵𑌸𑍁𑌧𑌾𑌂 𑌕𑍃𑌤𑍍𑌸𑍍𑌨𑌾𑌂 𑌧𑌰𑍍𑌮𑌸𑌂𑌤𑌾𑌨𑌮𑌿𑌚𑍍𑌛𑌵𑌃 ॥ ॥
𑌤𑌸𑍍𑌮𑌿𑌨𑍍𑌨𑍃𑌪𑌤𑌿𑌶𑌾𑌰𑍍𑌦𑍂𑌲𑍇 𑌭𑌰𑌤𑍇 𑌧𑌰𑍍𑌮𑌵𑌤𑍍𑌸𑌲𑍇 ।
𑌪𑌾𑌲𑌯𑌤𑍍𑌯𑌖𑌿𑌲𑌾𑌂 𑌭𑍂𑌮𑌿𑌂 𑌕𑌶𑍍𑌚𑌰𑍇𑌦𑍍𑌧𑌰𑍍𑌮𑌨𑌿𑌗𑍍𑌰𑌹𑌮𑍍 ॥ 10 ॥
𑌤𑍇 𑌵𑌯𑌂 𑌧𑌰𑍍𑌮𑌵𑌿𑌭𑍍𑌰𑌷𑍍𑌟𑌂 𑌸𑍍𑌵𑌧𑌰𑍍𑌮𑍇 𑌪𑌰𑌮𑍇 𑌸𑍍𑌥𑌿𑌤𑌾𑌃 ।
𑌭𑌰𑌤𑌾𑌜𑍍𑌞𑌾𑌂 𑌪𑍁𑌰𑌸𑍍𑌕𑍃𑌤𑍍𑌯 𑌨𑌿𑌗𑍃𑌹𑍍𑌣𑍀𑌮𑍋 𑌯𑌥𑌾𑌵𑌿𑌧𑌿 ॥ 11 ॥
𑌤𑍍𑌵𑌂 𑌤𑍁 𑌸𑌂𑌕𑍍𑌲𑌿𑌷𑍍𑌟𑌧𑌰𑍍𑌮𑌾 𑌚 𑌕𑌰𑍍𑌮𑌣𑌾 𑌚 𑌵𑌿𑌗𑌰𑍍𑌹𑌿𑌤𑌃 ।
𑌕𑌾𑌮𑌤𑌂𑌤𑍍𑌰𑌪𑍍𑌰𑌧𑌾𑌨𑌶𑍍𑌚 𑌨 𑌸𑍍𑌥𑌿𑌤𑍋 𑌰𑌾𑌜𑌵𑌰𑍍𑌤𑍍𑌮𑌨𑌿 ॥ 12 ॥
𑌜𑍍𑌯𑍇𑌷𑍍𑌠𑍋 𑌭𑍍𑌰𑌾𑌤𑌾 𑌪𑌿𑌤𑌾 𑌚𑍈𑌵 𑌯𑌶𑍍𑌚 𑌵𑌿𑌦𑍍𑌯𑌾𑌂 𑌪𑍍𑌰𑌯𑌚𑍍𑌛𑌤𑌿 ।
𑌤𑍍𑌰𑌯𑌸𑍍𑌤𑍇 𑌪𑌿𑌤𑌰𑍋 𑌜𑍍𑌞𑍇𑌯𑌾 𑌧𑌰𑍍𑌮𑍍𑌯𑍇 𑌚 𑌪𑌥𑌿 𑌵𑌰𑍍𑌤𑌿𑌨𑌃 ॥ 13 ॥
𑌯𑌵𑍀𑌯𑌾𑌨𑌾𑌤𑍍𑌮𑌨𑌃 𑌪𑍁𑌤𑍍𑌰𑌶𑌶𑌿𑌷𑍍𑌯𑌶𑍍𑌚𑌾𑌪𑌿 𑌗𑍁𑌣𑍋𑌦𑌿𑌤𑌃 ।
𑌪𑍁𑌤𑍍𑌰𑌵𑌤𑍍𑌤𑍇 𑌤𑍍𑌰𑌯𑌶𑍍𑌚𑌿𑌂𑌤𑍍𑌯𑌾 𑌧𑌰𑍍𑌮𑌶𑍍𑌚𑍇𑌦𑌤𑍍𑌰𑌕𑌾𑌰𑌣𑌮𑍍 ॥ 14 ॥
𑌸𑍂𑌕𑍍𑌷𑍍𑌮𑌃 𑌪𑌰𑌮𑌦𑍁𑌰𑌜𑍇𑌯𑌸𑍍𑌸𑌤𑌾𑌂 𑌧𑌰𑍍𑌮𑌃 𑌪𑍍𑌲𑌵𑌂𑌗𑌮 ।
𑌹𑍃𑌦𑌿𑌸𑍍𑌥𑌸𑍍𑌸𑌰𑍍𑌵𑌭𑍂𑌤𑌾𑌨𑌾𑌮𑌾𑌤𑍍𑌮𑌾 𑌵𑍇𑌦 𑌶𑍁𑌭𑌾𑌶𑍁𑌭𑌮𑍍 ॥ 15 ॥
𑌚𑌪𑌲𑌶𑍍𑌚𑌪𑌲𑍈𑌸𑍍𑌸𑌾𑌰𑍍𑌧𑌂 𑌵𑌾𑌨𑌰𑍈𑌰𑌕𑍃𑌤𑌾𑌤𑍍𑌮𑌭𑌿𑌃 ।
𑌜𑌾𑌤𑍍𑌯𑌂𑌧 𑌇𑌵 𑌜𑌾𑌤𑍍𑌯𑌂𑌧𑍈𑌰𑍍𑌮𑌂𑌤𑍍𑌰𑌯𑌨𑍍 𑌪𑍍𑌰𑍇𑌕𑍍𑌷𑌸𑍇 𑌨𑍁 𑌕𑌿𑌮𑍍 ॥ 16 ॥
𑌅𑌹𑌂 𑌤𑍁 𑌵𑍍𑌯𑌕𑍍𑌤𑌤𑌾𑌮𑌸𑍍𑌯 𑌵𑌚𑌨𑌸𑍍𑌯 𑌬𑍍𑌰𑌵𑍀𑌮𑌿 𑌤𑍇 ।
𑌨 𑌹𑌿 𑌮𑌾𑌂 𑌕𑍇𑌵𑌲𑌂 𑌰𑍋𑌷𑌾𑌤𑍍𑌤𑍍𑌵𑌂 𑌵𑌿𑌗𑌰𑍍𑌹𑌿𑌤𑍁𑌮𑌰𑍍𑌹𑌸𑌿 ॥ 1 ॥
𑌤𑌦𑍇𑌤𑌤𑍍𑌕𑌾𑌰𑌣𑌂 𑌪𑌶𑍍𑌯 𑌯𑌦𑌰𑍍𑌥𑌂 𑌤𑍍𑌵𑌂 𑌮𑌯𑌾 𑌹𑌤𑌃 ।
𑌭𑍍𑌰𑌾𑌤𑍁𑌰𑍍𑌵𑌰𑍍𑌤𑌸𑌿 𑌭𑌾𑌰𑍍𑌯𑌾𑌯𑌾𑌂 𑌤𑍍𑌯𑌕𑍍𑌤𑍍𑌵𑌾 𑌧𑌰𑍍𑌮𑌂 𑌸𑌨𑌾𑌤𑌨𑌮𑍍 ॥ 1 ॥
𑌅𑌸𑍍𑌯 𑌤𑍍𑌵𑌂 𑌧𑌰𑌮𑌾𑌣𑌸𑍍𑌯 𑌸𑍁𑌗𑍍𑌰𑍀𑌵𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌰𑍁𑌮𑌾𑌯𑌾𑌂 𑌵𑌰𑍍𑌤𑌸𑍇 𑌕𑌾𑌮𑌾𑌤𑍍𑌸𑍍𑌨𑍁𑌷𑌾𑌯𑌾𑌂 𑌪𑌾𑌪𑌕𑌰𑍍𑌮𑌕𑍃𑌤𑍍 ॥ 1 ॥
𑌤𑌦𑍍𑌵𑍍𑌯𑌤𑍀𑌤𑌸𑍍𑌯 𑌤𑍇 𑌧𑌰𑍍𑌮𑌾𑌤𑍍𑌕𑌾𑌮𑌵𑍃𑌤𑍍𑌤𑌸𑍍𑌯 𑌵𑌾𑌨𑌰 ।
𑌭𑍍𑌰𑌾𑌤𑍃𑌭𑌾𑌰𑍍𑌯𑌾𑌵𑌮𑌰𑍍𑌶𑍇𑌽𑌸𑍍𑌮𑌿𑌂𑌦𑌂𑌡𑍋𑌽𑌯𑌂 𑌪𑍍𑌰𑌤𑌿𑌪𑌾𑌦𑌿𑌤𑌃 ॥ 20 ॥
𑌨 𑌹𑌿 𑌧𑌰𑍍𑌮𑌵𑌿𑌰𑍁𑌦𑍍𑌧𑌸𑍍𑌯 𑌲𑍋𑌕𑌵𑍃𑌤𑍍𑌤𑌾𑌦𑌪𑍇𑌯𑍁𑌷𑌃 ।
𑌦𑌂𑌡𑌾𑌦𑌨𑍍𑌯𑌤𑍍𑌰 𑌪𑌶𑍍𑌯𑌾𑌮𑌿 𑌨𑌿𑌗𑍍𑌰𑌹𑌂 𑌹𑌰𑌿𑌯𑍂𑌥𑌪 ॥ 21 ॥
𑌨 𑌹𑌿 𑌤𑍇 𑌮𑌰𑍍𑌷𑌯𑍇 𑌪𑌾𑌪𑌂 𑌕𑍍𑌷𑌤𑍍𑌰𑌿𑌯𑍋𑌽𑌹𑌂 𑌕𑍁𑌲𑍋𑌦𑍍𑌭𑌵𑌃 ।
𑌔𑌰𑌸𑍀𑌂 𑌭𑌗𑌿𑌨𑍀𑌂 𑌵𑌾𑌪𑌿 𑌭𑌾𑌰𑍍𑌯𑌾𑌂 𑌵𑌾𑌪𑍍𑌯𑌨𑍁𑌜𑌸𑍍𑌯 𑌯𑌃 ॥ 22 ॥
𑌪𑍍𑌰𑌚𑌰𑍇𑌤 𑌨𑌰𑌃 𑌕𑌾𑌮𑌾𑌤𑍍𑌤𑌸𑍍𑌯 𑌦𑌂𑌡𑍋 𑌵𑌧𑌃 𑌸𑍍𑌮𑍃𑌤𑌃 ।
𑌭𑌰𑌤𑌸𑍍𑌤𑍁 𑌮𑌹𑍀𑌪𑌾𑌲𑍋 𑌵𑌯𑌂 𑌤𑍍𑌵𑌾𑌦𑍇𑌶𑌵𑌰𑍍𑌤𑌿𑌨𑌃 ॥ 23 ॥
𑌤𑍍𑌵𑌂 𑌤𑍁 𑌧𑌰𑍍𑌮𑌾𑌦𑌤𑌿𑌕𑍍𑌰𑌾𑌂𑌤𑌃 𑌕𑌥𑌂 𑌶𑌕𑍍𑌯𑌂 𑌉𑌪𑍇𑌕𑍍𑌷𑌿𑌤𑍁𑌮𑍍 ।
𑌗𑍁𑌰𑍂𑌰𑍍𑌧𑌰𑍍𑌮𑌵𑍍𑌯𑌤𑌿𑌕𑍍𑌰𑌾𑌂𑌤𑌂 𑌪𑍍𑌰𑌾𑌜𑍍𑌞𑍋 𑌧𑌰𑍍𑌮𑍇𑌣 𑌪𑌾𑌲𑌯𑌨𑍍 ॥ 24 ॥
𑌭𑌰𑌤𑌃 𑌕𑌾𑌮𑌵𑍃𑌤𑍍𑌤𑌾𑌨𑌾𑌂 𑌨𑌿𑌗𑍍𑌰𑌹𑍇 𑌪𑌰𑍍𑌯𑌵𑌸𑍍𑌥𑌿𑌤𑌃 ।
𑌵𑌯𑌂 𑌤𑍁 𑌭𑌰𑌤𑌾𑌦𑍇𑌶 𑌵𑌿𑌧𑌿𑌂 𑌕𑍃𑌤𑍍𑌵𑌾 𑌹𑌰𑍀𑌶𑍍𑌵𑌰 ।
𑌤𑍍𑌵𑌦𑍍𑌵𑌿𑌧𑌾𑌨𑍍𑌭𑌿𑌨𑍍𑌨𑌮𑌰𑍍𑌯𑌾𑌦𑌾𑌨𑍍𑌨𑌿𑌯𑌂𑌤𑍁𑌪𑌰𑍍𑌯𑌵𑌸𑍍𑌥𑌿𑌤𑌾𑌃 ॥ 25 ॥
𑌸𑍁𑌗𑍍𑌰𑍀𑌵𑍇𑌣 𑌚 𑌮𑍇 𑌸𑌖𑍍𑌯𑌂 𑌲𑌕𑍍𑌷𑍍𑌮𑌣𑍇𑌨 𑌯𑌥𑌾 𑌤𑌥𑌾 ।
𑌦𑌾𑌰𑌰𑌾𑌜𑍍𑌯𑌨𑌿𑌮𑌿𑌤𑍍𑌤𑌂 𑌚 𑌨𑌿𑌃𑌶𑍍𑌰𑍇𑌯𑌸𑌿 𑌰𑌤 𑌸𑍍𑌸 𑌮𑍇 ॥ 26 ॥
𑌪𑍍𑌰𑌤𑌿𑌜𑍍𑌞𑌾 𑌚 𑌮𑌯𑌾 𑌦𑌤𑍍𑌤𑌾 𑌤𑌦𑌾 𑌵𑌾𑌨𑌰𑌸𑌨𑍍𑌨𑌿𑌧𑍌 ।
𑌪𑍍𑌰𑌤𑌿𑌜𑍍𑌞𑌾 𑌚 𑌕𑌥𑌂 𑌶𑌕𑍍𑌯𑌾 𑌮𑌦𑍍𑌵𑌿𑌧𑍇𑌨𑌾𑌨𑌵𑍇𑌕𑍍𑌷𑌿𑌤𑍁𑌮𑍍 ॥ 2 ॥
𑌤𑌦𑍇𑌭𑌿𑌃 𑌕𑌾𑌰𑌣𑍈𑌸𑍍𑌸𑌰𑍍𑌵𑍈𑌰𑍍𑌮𑌹𑌦𑍍𑌭𑌿𑌰𑍍𑌧𑌰𑍍𑌮𑌸𑌂𑌹𑌿𑌤𑍈𑌃 ॥ 2 ॥
𑌶𑌾𑌸𑌨𑌂 𑌤𑌪 𑌯𑌦𑍍𑌯𑍁𑌕𑍍𑌤𑌂 𑌤𑌦𑍍𑌭𑌵𑌾𑌨𑌨𑍁𑌮𑌨𑍍𑌯𑌤𑌾𑌮𑍍 ।
𑌸𑌰𑍍𑌵𑌥𑌾 𑌧𑌰𑍍𑌮 𑌇𑌤𑍍𑌯𑍇𑌵 𑌦𑍍𑌰𑌷𑍍𑌟𑌵𑍍𑌯𑌸𑍍𑌤𑌵 𑌨𑌿𑌗𑍍𑌰𑌹𑌃 ॥ 2 ॥
𑌵𑌯𑌸𑍍𑌯𑌸𑍍𑌯𑍋𑌪𑌕𑌰𑍍𑌤𑌵𑍍𑌯𑌂 𑌧𑌰𑍍𑌮𑌮𑍇𑌵𑌾𑌨𑍁𑌪𑌶𑍍𑌯𑌤𑌃 ।
𑌶𑌕𑍍𑌯𑌂 𑌤𑍍𑌵𑌯𑌾𑌽𑌪𑌿 𑌤𑌤𑍍𑌕𑌾𑌰𑍍𑌯𑌂 𑌧𑌰𑍍𑌮𑌮𑍇𑌵𑌾𑌨𑍁𑌪𑌶𑍍𑌯𑌤𑌾 ॥ 30 ॥
𑌶𑍍𑌰𑍂𑌯𑌤𑍇 𑌮𑌨𑍁𑌨𑌾 𑌗𑍀𑌤𑍌 𑌶𑍍𑌲𑍋𑌕𑍌 𑌚𑌾𑌰𑌿𑌤𑍍𑌰𑌵𑌤𑍍𑌸𑌲𑍌 ।
𑌗𑍃𑌹𑍀𑌤𑍌 𑌧𑌰𑍍𑌮𑌕𑍁𑌶𑌲𑍈𑌸𑍍𑌤𑌤𑍍𑌤𑌥𑌾 𑌚𑌰𑌿𑌤𑌂 𑌹𑌰𑍇 ॥ 31 ॥
𑌰𑌾𑌜𑌭𑌿𑌰𑍍𑌧𑍃𑌤𑌦𑌂𑌡𑌾𑌸𑍍𑌤𑍁 𑌕𑍃𑌤𑍍𑌵𑌾 𑌪𑌾𑌪𑌾𑌨𑌿 𑌮𑌾𑌨𑌵𑌾𑌃 ।
𑌨𑌿𑌰𑍍𑌮𑌲𑌾𑌸𑍍𑌸𑍍𑌵𑌰𑍍𑌗𑌮𑌾𑌯𑌾𑌂𑌤𑌿 𑌸𑌂𑌤𑌸𑍍𑌸𑍁𑌕𑍃𑌤𑌿𑌨𑍋 𑌯𑌥𑌾 ॥ 32 ॥
𑌶𑌾𑌸𑌨𑌾𑌦𑍍𑌵𑌾𑌽𑌪𑌿𑌮𑍋𑌕𑍍𑌷𑌾𑌦𑍍𑌵𑌾 𑌸𑍍𑌤𑍇𑌨𑌃 𑌸𑍍𑌤𑍇𑌯𑌾𑌦𑍍𑌵𑌿𑌮𑍁𑌚𑍍𑌯𑌤𑍇 ।
𑌰𑌾𑌜𑌾𑌤𑍍𑌵𑌶𑌾𑌸𑌨𑍍𑌪𑌾𑌪𑌸𑍍𑌯 𑌤𑌦𑌵𑌾𑌪𑍍𑌨𑍋𑌤𑌿 𑌕𑌿𑌲𑍍𑌬𑌿𑌷𑌮𑍍 ॥ 33 ॥
𑌆𑌰𑍍𑌯𑍇𑌣 𑌮𑌮 𑌮𑌾𑌂𑌧𑌾𑌤𑍍𑌰𑌾 𑌵𑍍𑌯𑌸𑌨𑌂 𑌘𑍋𑌰𑌮𑍀𑌪𑍍𑌸𑌿𑌤𑌮𑍍 ।
𑌶𑍍𑌰𑌮𑌣𑍇𑌨 𑌕𑍃𑌤𑍇 𑌪𑌾𑌪𑍇 𑌯𑌥𑌾 𑌪𑌾𑌪𑌂 𑌕𑍃𑌤𑌂 𑌤𑍍𑌵𑌯𑌾 ॥ 34 ॥
𑌅𑌨𑍍𑌯𑍈𑌰𑌪𑌿 𑌕𑍃𑌤𑌂 𑌪𑌾𑌪𑌂 𑌪𑍍𑌰𑌮𑌤𑍍𑌤𑍈𑌰𑍍𑌵𑌸𑍁𑌧𑌾𑌧𑌿𑌪𑍈𑌃 ।
𑌪𑍍𑌰𑌾𑌯𑌶𑍍𑌚𑌿𑌤𑍍𑌤𑌂 𑌚 𑌕𑍁𑌰𑍍𑌵𑌂𑌤𑌿 𑌤𑍇𑌨 𑌤𑌚𑍍𑌛𑌾𑌮𑍍𑌯𑌤𑍇 𑌰𑌜𑌃 ॥ 35 ॥
𑌤𑌦𑌲𑌂 𑌪𑌰𑌿𑌤𑌾𑌪𑍇𑌨 𑌧𑌰𑍍𑌮𑌤𑌃 𑌪𑌰𑌿𑌕𑌲𑍍𑌪𑌿𑌤𑌃 ।
𑌵𑌧𑍋 𑌵𑌾𑌨𑌰𑌶𑌾𑌰𑍍𑌦𑍂𑌲 𑌨 𑌵𑌯𑌂 𑌸𑍍𑌵𑌵𑌶𑍇 𑌸𑍍𑌥𑌿𑌤𑌾𑌃 ॥ 36 ॥
𑌶𑍃𑌣𑍁 𑌚𑌾𑌪𑍍𑌯𑌪𑌰𑌂 𑌭𑍂𑌯𑌃 𑌕𑌾𑌰𑌣𑌂 𑌹𑌰𑌿𑌪𑍁𑌂𑌗𑌵 ।
𑌯𑌚𑍍𑌛𑍍𑌰𑍁𑌤𑍍𑌵𑌾 𑌹𑍇𑌤𑍁𑌮𑌦𑍍𑌵𑍀𑌰 𑌨 𑌮𑌨𑍍𑌯𑍁𑌂 𑌕𑌰𑍍𑌤𑍁𑌮𑌰𑍍𑌹𑌸𑌿 ॥ 3 ॥
𑌨 𑌮𑍇 𑌤𑌤𑍍𑌰 𑌮𑌨𑌸𑍍𑌤𑌾𑌪𑍋 𑌨 𑌮𑌨𑍍𑌯𑍁𑌰𑍍𑌹𑌰𑌿𑌪𑍁𑌂𑌗𑌵 ।
𑌵𑌾𑌗𑍁𑌰𑌾𑌭𑌿𑌶𑍍𑌚 𑌪𑌾𑌶𑍈𑌶𑍍𑌚 𑌕𑍂𑌟𑍈𑌶𑍍𑌚 𑌵𑌿𑌵𑌿𑌧𑍈𑌰𑍍𑌨𑌰𑌾𑌃 ॥ 3 ॥
𑌪𑍍𑌰𑌤𑌿𑌚𑍍𑌛𑌨𑍍𑌨𑌾𑌶𑍍𑌚 𑌦𑍃𑌶𑍍𑌯𑌾𑌶𑍍𑌚 𑌗𑍃𑌹𑍍𑌣𑌂𑌤𑌿 𑌸𑍁𑌬𑌹𑍂𑌨𑍍𑌮𑍃𑌗𑌾𑌨𑍍 ।
𑌪𑍍𑌰𑌧𑌾𑌵𑌿𑌤𑌾𑌨𑍍𑌵𑌾 𑌵𑌿𑌤𑍍𑌰𑌸𑍍𑌤𑌾𑌨𑍍𑌵𑌿𑌸𑍍𑌰𑌬𑍍𑌧𑌾𑌂𑌶𑍍𑌚𑌾𑌪𑌿 𑌨𑌿𑌷𑍍𑌠𑌿𑌤𑌾𑌨𑍍 ॥ 3 ॥
𑌪𑍍𑌰𑌮𑌤𑍍𑌤𑌾𑌨𑌪𑍍𑌰𑌮𑌤𑍍𑌤𑌾𑌨𑍍𑌵𑌾 𑌨𑌰𑌾 𑌮𑌾𑌂𑌸𑌾𑌰𑍍𑌥𑌿𑌨𑍋 𑌭𑍃𑌶𑌮𑍍 ।
𑌵𑌿𑌧𑍍𑌯𑌂𑌤𑌿 𑌵𑌿𑌮𑍁𑌖𑌾𑌂𑌶𑍍𑌚𑌾𑌪𑌿 𑌨 𑌚 𑌦𑍋𑌷𑍋𑌽𑌤𑍍𑌰 𑌵𑌿𑌦𑍍𑌯𑌤𑍇 ॥ 40 ॥
𑌯𑌾𑌂𑌤𑌿 𑌰𑌾𑌜𑌰𑍍𑌷𑌯𑌶𑍍𑌚𑌾𑌤𑍍𑌰 𑌮𑍃𑌗𑌯𑌾𑌂 𑌧𑌰𑍍𑌮𑌕𑍋𑌵𑌿𑌦𑌾𑌃 ।
𑌤𑌸𑍍𑌮𑌾𑌤𑍍𑌤𑍍𑌵𑌂 𑌨𑌿𑌹𑌤𑍋 𑌯𑍁𑌦𑍍𑌧𑍇 𑌮𑌯𑌾 𑌬𑌾𑌣𑍇𑌨 𑌵𑌾𑌨𑌰 ॥ 41 ॥
𑌅𑌯𑍁𑌧𑍍𑌯𑌨𑍍𑌪𑍍𑌰𑌤𑌿𑌯𑍁𑌧𑍍𑌯𑌨𑍍𑌵𑌾 𑌯𑌸𑍍𑌮𑌾𑌚𑍍𑌛𑌾𑌖𑌾𑌮𑍃𑌗𑍋 𑌹𑍍𑌯𑌸𑌿 ।
𑌦𑍁𑌰𑍍𑌲𑌭𑌸𑍍𑌯 𑌚 𑌧𑌰𑍍𑌮𑌸𑍍𑌯 𑌜𑍀𑌵𑌿𑌤𑌸𑍍𑌯 𑌶𑍁𑌭𑌸𑍍𑌯 𑌚 ॥ 42 ॥
𑌰𑌾𑌜𑌾𑌨𑍋 𑌵𑌾𑌨𑌰𑌶𑍍𑌰𑍇𑌷𑍍𑌠 𑌪𑍍𑌰𑌦𑌾𑌤𑌾𑌰𑍋 𑌨 𑌸𑌂𑌶𑌯𑌃 ।
𑌤𑌾𑌨𑍍𑌨 𑌹𑌿𑌂𑌸𑍍𑌯𑌾𑌨𑍍𑌨 𑌚𑌾𑌕𑍍𑌰𑍋𑌶𑍇𑌨𑍍𑌨𑌾𑌕𑍍𑌷𑌿𑌪𑍇𑌨𑍍𑌨𑌾𑌪𑍍𑌰𑌿𑌯𑌂 𑌵𑌦𑍇𑌤𑍍 ॥ 43 ॥
𑌦𑍇𑌵𑌾 𑌮𑌾𑌨𑍁𑌷𑌰𑍂𑌪𑍇𑌣 𑌚𑌰𑌂𑌤𑍍𑌯𑍇𑌤𑍇 𑌮𑌹𑍀𑌤𑌲𑍇 ।
𑌤𑍍𑌵𑌂 𑌤𑍁 𑌧𑌰𑍍𑌮𑌮𑌵𑌿𑌜𑍍𑌞𑌾𑌯 𑌕𑍇𑌵𑌲𑌂 𑌰𑍋𑌷𑌮𑌾𑌸𑍍𑌥𑌿𑌤𑌃 ॥ 44 ॥
𑌪𑍍𑌰𑌦𑍂𑌷𑌯𑌸𑌿 𑌮𑌾𑌂 𑌧𑌰𑍍𑌮𑍇 𑌪𑌿𑌤𑍃𑌪𑍈𑌤𑌾𑌮𑌹𑍇 𑌸𑍍𑌥𑌿𑌤𑌮𑍍 ।
𑌏𑌵𑌮𑍁𑌕𑍍𑌤𑌸𑍍𑌤𑍁 𑌰𑌾𑌮𑍇𑌣 𑌵𑌾𑌲𑍀 𑌪𑍍𑌰𑌵𑍍𑌯𑌥𑌿𑌤𑍋 𑌭𑍃𑌶𑌮𑍍 ॥ 45 ॥
𑌨 𑌦𑍋𑌷𑌂 𑌰𑌾𑌘𑌵𑍇 𑌦𑌧𑍍𑌯𑍌 𑌧𑌰𑍍𑌮𑍇𑌽𑌧𑌿𑌗𑌤𑌨𑌿𑌶𑍍𑌚𑌯𑌃 ।
𑌪𑍍𑌰𑌤𑍍𑌯𑍁𑌵𑌾𑌚 𑌤𑌤𑍋 𑌰𑌾𑌮𑌂 𑌪𑍍𑌰𑌾𑌂𑌜𑌲𑌿𑌰𑍍𑌵𑌾𑌨𑌰𑍇𑌶𑍍𑌵𑌰𑌃 ॥ 46 ॥
𑌯𑌤𑍍𑌤𑍍𑌵𑌮𑌾𑌤𑍍𑌥 𑌨𑌰𑌶𑍍𑌰𑍇𑌷𑍍𑌠 𑌤𑌦𑍇𑌵𑌂 𑌨𑌾𑌤𑍍𑌰 𑌸𑌂𑌶𑌯𑌃 ।
𑌪𑍍𑌰𑌤𑌿𑌵𑌕𑍍𑌤𑍁𑌂 𑌪𑍍𑌰𑌕𑍃𑌷𑍍𑌟𑍇 𑌹𑌿 𑌨𑌾𑌪𑌕𑍃𑌷𑍍𑌟𑌸𑍍𑌤𑍁 𑌶𑌕𑍍𑌨𑍁𑌯𑌾𑌤𑍍 ॥ 4 ॥
𑌯𑌦𑌯𑍁𑌕𑍍𑌤𑌂 𑌮𑌯𑌾 𑌪𑍂𑌰𑍍𑌵𑌂 𑌪𑍍𑌰𑌮𑌾𑌦𑌾𑌦𑍍𑌵𑌾𑌕𑍍𑌯𑌮𑌪𑍍𑌰𑌿𑌯𑌮𑍍 ।
𑌤𑌤𑍍𑌰𑌾𑌪𑌿 𑌖𑌲𑍁 𑌮𑍇 𑌦𑍋𑌷𑌂 𑌕𑌰𑍍𑌤𑍁𑌂 𑌨𑌾𑌰𑍍𑌹𑌸𑌿 𑌰𑌾𑌘𑌵 ।
𑌤𑌦𑌯𑍁𑌕𑍍𑌤𑌂 𑌮𑌯𑌾 𑌪𑍂𑌰𑍍𑌵𑌂 𑌪𑍍𑌰𑌮𑌾𑌦𑌾𑌦𑍁𑌕𑍍𑌤𑌮𑌪𑍍𑌰𑌿𑌯𑌮𑍍 ।
𑌤𑌤𑍍𑌰𑌾𑌪𑌿 𑌖𑌲𑍁 𑌮𑍇 𑌦𑍋𑌷𑌂 𑌕𑌰𑍍𑌤𑍁𑌂 𑌨𑌾𑌰𑍍𑌹𑌸𑌿 𑌰𑌾𑌘𑌵 ॥ 4 ॥
𑌤𑍍𑌵𑌂 𑌹𑌿 𑌦𑍃𑌷𑍍𑌟𑌾𑌰𑍍𑌥𑌤𑌤𑍍𑌤𑍍𑌵𑌜𑍍𑌞𑌃 𑌪𑍍𑌰𑌜𑌾𑌨𑌾𑌂 𑌚 𑌹𑌿𑌤𑍇 𑌰𑌤𑌃 ।
𑌕𑌾𑌰𑍍𑌯𑌕𑌾𑌰𑌣𑌸𑌿𑌦𑍍𑌧𑍌 𑌚 𑌪𑍍𑌰𑌸𑌨𑍍𑌨𑌾 𑌬𑍁𑌦𑍍𑌧𑌿𑌰𑌵𑍍𑌯𑌯𑌾 ॥ 4 ॥
𑌮𑌾𑌮𑌪𑍍𑌯𑌗𑌤𑌧𑌰𑍍𑌮𑌾𑌣𑌂 𑌵𑍍𑌯𑌤𑌿𑌕𑍍𑌰𑌾𑌂𑌤𑌪𑍁𑌰𑌸𑍍𑌕𑍃𑌤𑌮𑍍 ।
𑌧𑌰𑍍𑌮𑌸𑌂𑌹𑌿𑌤𑌯𑌾 𑌵𑌾𑌚𑌾 𑌧𑌰𑍍𑌮𑌜𑍍𑌞 𑌪𑌰𑌿𑌪𑌾𑌲𑌯 ॥ 50 ॥
𑌨 𑌤𑍍𑌵𑌾𑌤𑍍𑌮𑌾𑌨𑌮𑌹𑌂 𑌶𑍋𑌚𑍇 𑌨 𑌤𑌾𑌰𑌾𑌂 𑌨 𑌚 𑌬𑌾𑌂𑌧𑌵𑌾𑌨𑍍 ।
𑌯𑌥𑌾 𑌪𑍁𑌤𑍍𑌰𑌂 𑌗𑍁𑌣𑌜𑍍𑌯𑍇𑌷𑍍𑌠𑌮𑌂𑌗𑌦𑌂 𑌕𑌨𑌕𑌾𑌂𑌗𑌦𑌮𑍍 ॥ 51 ॥
𑌸 𑌮𑌮𑌾𑌦𑌰𑍍𑌶𑌨𑌾𑌦𑍍𑌦𑍀𑌨𑍋 𑌬𑌾𑌲𑍍𑌯𑌾𑌤𑍍𑌪𑍍𑌰𑌭𑍃𑌤𑌿 𑌲𑌾𑌲𑌿𑌤𑌃 ।
𑌤𑌟𑌾𑌕 𑌇𑌵 𑌪𑍀𑌤𑌾𑌂𑌬𑍁𑌰𑍁𑌪𑌶𑍋𑌷𑌂 𑌗𑌮𑌿𑌷𑍍𑌯𑌤𑌿 ॥ 52 ॥
𑌬𑌾𑌲𑌶𑍍𑌚𑌾𑌕𑍃𑌤𑌬𑍁𑌦𑍍𑌧𑌿𑌶𑍍𑌚 𑌏𑌕𑌪𑍁𑌤𑍍𑌰𑌶𑍍𑌚 𑌮𑍇 𑌪𑍍𑌰𑌿𑌯𑌃 ।
𑌤𑌾𑌰𑍇𑌯𑍋 𑌰𑌾𑌮 𑌭𑌵𑌤𑌾 𑌰𑌕𑍍𑌷𑌣𑍀𑌯𑍋 𑌮𑌹𑌾𑌬𑌲𑌃 ॥ 53 ॥
𑌸𑍁𑌗𑍍𑌰𑍀𑌵𑍇 𑌚𑌾𑌂𑌗𑌦𑍇 𑌚𑍈𑌵 𑌵𑌿𑌧𑌤𑍍𑌸𑍍𑌵 𑌮𑌤𑌿𑌮𑍁𑌤𑍍𑌤𑌮𑌾𑌮𑍍 ।
𑌤𑍍𑌵𑌂 𑌹𑌿 𑌶𑌾𑌸𑍍𑌤𑌾 𑌚 𑌗𑍋𑌪𑍍𑌤𑌾 𑌚 𑌕𑌾𑌰𑍍𑌯𑌾𑌕𑌾𑌰𑍍𑌯𑌵𑌿𑌧𑍌 𑌸𑍍𑌥𑌿𑌤𑌃 ॥ 54 ॥
𑌯𑌾 𑌤𑍇 𑌨𑌰𑌪𑌤𑍇 𑌵𑍃𑌤𑍍𑌤𑌿𑌰𑍍𑌭𑌰𑌤𑍇 𑌲𑌕𑍍𑌷𑍍𑌮𑌣𑍇 𑌚 𑌯𑌾 ।
𑌸𑍁𑌗𑍍𑌰𑍀𑌵𑍇 𑌚𑌾𑌂𑌗𑌦𑍇 𑌰𑌾𑌜𑌂𑌸𑍍𑌤𑌾𑌂 𑌤𑍍𑌵𑌮𑌾𑌧𑌾𑌤𑍁𑌮𑌿𑌹𑌾𑌸𑌿 ॥ 55 ॥
𑌮𑌦𑍍𑌦𑍋𑌷𑌕𑍃𑌤𑌦𑍋𑌷𑌾𑌂 𑌤𑌾𑌂 𑌯𑌥𑌾 𑌤𑌾𑌰𑌾𑌂 𑌤𑌪𑌸𑍍𑌵𑌿𑌨𑍀𑌮𑍍 ।
𑌸𑍁𑌗𑍍𑌰𑍀𑌵𑍋 𑌨𑌾𑌵𑌮𑌨𑍍𑌯𑍇𑌤 𑌤𑌥𑌾𑌽𑌵𑌸𑍍𑌥𑌾𑌤𑍁𑌮𑌰𑍍𑌹𑌸𑌿 ॥ 56 ॥
𑌤𑍍𑌵𑌯𑌾 𑌹𑍍𑌯𑌨𑍁𑌗𑍃𑌹𑍀𑌤𑍇𑌨 𑌰𑌾𑌜𑍍𑌯𑌂 𑌶𑌕𑍍𑌯𑌮𑍁𑌪𑌾𑌸𑌿𑌤𑍁𑌮𑍍 ॥ 5 ॥
𑌤𑍍𑌵𑌦𑍍𑌵𑌶𑍇 𑌵𑌰𑍍𑌤𑌮𑌾𑌨𑍇𑌨 𑌤𑌵 𑌚𑌿𑌤𑍍𑌤𑌾𑌨𑍁𑌵𑌰𑍍𑌤𑌿𑌨𑌾 ।
𑌶𑌕𑍍𑌯𑌂 𑌦𑌿𑌵𑌂 𑌚𑌾𑌰𑍍𑌜𑌯𑌿𑌤𑍁𑌂 𑌵𑌸𑍁𑌧𑌾𑌂 𑌚𑌾𑌪𑌿 𑌶𑌾𑌸𑌿𑌤𑍁𑌮𑍍 ॥ 5 ॥
𑌤𑍍𑌵𑌤𑍍𑌤𑍋𑌽𑌹𑌂 𑌵𑌧𑌮𑌾𑌕𑌾𑌂𑌕𑍍𑌷𑌨𑍍𑌵𑌾𑌰𑍍𑌯𑌮𑌾𑌣𑍋𑌽𑌪𑌿 𑌤𑌾𑌰𑌯𑌾 ।
𑌸𑍁𑌗𑍍𑌰𑍀𑌵𑍇𑌣 𑌸𑌹 𑌭𑍍𑌰𑌾𑌤𑍍𑌰𑌾 𑌦𑍍𑌵𑌂𑌦𑍍𑌵𑌯𑍁𑌦𑍍𑌧𑌮𑍁𑌪𑌾𑌗𑌤𑌃 ॥ 5 ॥
𑌇𑌤𑍍𑌯𑍁𑌕𑍍𑌤𑍍𑌵𑌾 𑌸𑌨𑍍𑌨𑌤𑍋 𑌰𑌾𑌮𑌂 𑌵𑌿𑌰𑌰𑌾𑌮 𑌹𑌰𑍀𑌶𑍍𑌵𑌰𑌃 ।
𑌸 𑌤𑌮𑌾𑌶𑍍𑌵𑌾𑌸𑌯𑌦𑍍𑌰𑌾𑌮𑍋 𑌵𑌾𑌲𑌿𑌨𑌂 𑌵𑍍𑌯𑌕𑍍𑌤𑌦𑌰𑍍𑌶𑌨𑌮𑍍 ॥ 60 ॥
𑌸𑌾𑌮𑌸𑌂𑌪𑌨𑍍𑌨𑌯𑌾 𑌵𑌾𑌚𑌾 𑌧𑌰𑍍𑌮𑌤𑌤𑍍𑌤𑍍𑌵𑌾𑌰𑍍𑌥𑌯𑍁𑌕𑍍𑌤𑌯𑌾 ।
𑌨 𑌸𑌂𑌤𑌾𑌪𑌸𑍍𑌤𑍍𑌵𑌯𑌾 𑌕𑌾𑌰𑍍𑌯 𑌏𑌤𑌦𑌰𑍍𑌥𑌂 𑌪𑍍𑌲𑌵𑌂𑌗𑌮 ॥ 61 ॥
𑌨 𑌵𑌯𑌂 𑌭𑌵𑌤𑌾 𑌚𑌿𑌂𑌤𑍍𑌯𑌾 𑌨𑌾𑌪𑍍𑌯𑌾𑌤𑍍𑌮𑌾 𑌹𑌰𑌿𑌸𑌤𑍍𑌤𑌮 ।
𑌵𑌯𑌂 𑌭𑌵𑌦𑍍𑌵𑌿𑌶𑍇𑌷𑍇𑌣 𑌧𑌰𑍍𑌮𑌤𑌃 𑌕𑍃𑌤𑌨𑌿𑌶𑍍𑌚𑌯𑌾𑌃 ॥ 62 ॥
𑌦𑌂𑌡𑍍𑌯𑍇 𑌯𑌃 𑌪𑌾𑌤𑌯𑍇𑌦𑍍𑌦𑌂𑌡𑌂 𑌦𑌂𑌡𑍍𑌯𑍋 𑌯𑌶𑍍𑌚𑌾𑌪𑌿 𑌦𑌂𑌡𑍍𑌯𑌤𑍇 ।
𑌕𑌾𑌰𑍍𑌯𑌕𑌾𑌰𑌣𑌸𑌿𑌦𑍍𑌧𑌾𑌰𑍍𑌥𑌾 𑌵𑍁𑌭𑍌 𑌤𑍌 𑌨𑌾𑌵𑌸𑍀𑌦𑌤𑌃 ॥ 63 ॥
𑌤𑌦𑍍𑌭𑌵𑌾𑌂𑌦𑌂𑌡𑌸𑌂𑌯𑍋𑌗𑌾𑌦𑌸𑍍𑌮𑌾𑌦𑍍𑌵𑌿𑌗𑌤𑌕𑌲𑍍𑌮𑌷𑌃 ।
𑌗𑌤𑌸𑍍𑌸𑍍𑌵𑌾𑌂 𑌪𑍍𑌰𑌕𑍃𑌤𑌿𑌂 𑌧𑌰𑍍𑌮𑍍𑌯𑌂 𑌧𑌰𑍍𑌮𑌦𑍃𑌷𑍍𑌟𑍇𑌨 𑌵𑌰𑍍𑌤𑍍𑌮𑌨𑌾 ॥ 64 ॥
𑌤𑍍𑌯𑌜 𑌶𑍋𑌕𑌂 𑌚 𑌮𑍋𑌹𑌂 𑌚 𑌭𑌯𑌂 𑌚 𑌹𑍃𑌦𑌯𑍇 𑌸𑍍𑌥𑌿𑌤𑌮𑍍 ।
𑌤𑍍𑌵𑌯𑌾 𑌵𑌿𑌧𑌾𑌨𑌂 𑌹𑌰𑍍𑌯𑌗𑍍𑌰𑍍𑌯 𑌨 𑌶𑌕𑍍𑌯𑌮𑌤𑌿𑌵𑌰𑍍𑌤𑌿𑌤𑍁𑌮𑍍 ॥ 65 ॥
𑌯𑌥𑌾 𑌤𑍍𑌵𑌯𑍍𑌯𑌂𑌗𑌦𑍋 𑌨𑌿𑌤𑍍𑌯𑌂 𑌵𑌰𑍍𑌤𑌤𑍇 𑌵𑌾𑌨𑌰𑍇𑌶𑍍𑌵𑌰 ।
𑌤𑌥𑌾 𑌵𑌰𑍍𑌤𑍇𑌤 𑌸𑍁𑌗𑍍𑌰𑍀𑌵𑍇 𑌮𑌯𑌿 𑌚𑌾𑌪𑌿 𑌨 𑌸𑌂𑌶𑌯𑌃 ॥ 66 ॥
𑌸 𑌤𑌸𑍍𑌯 𑌵𑌾𑌕𑍍𑌯𑌂 𑌮𑌧𑍁𑌰𑌂 𑌮𑌹𑌾𑌤𑍍𑌮𑌨 𑌸𑍍𑌸𑌮𑌾𑌹𑌿𑌤𑌂 𑌧𑌰𑍍𑌮𑌪𑌥𑌾𑌨𑍁𑌵𑌰𑍍𑌤𑌿𑌨𑌃 ।
𑌨𑌿𑌶𑌮𑍍𑌯 𑌰𑌾𑌮𑌸𑍍𑌯 𑌰𑌣𑌾𑌵𑌮𑌰𑍍𑌦𑌿𑌨𑍋 𑌵𑌚𑌸𑍍𑌸𑍁𑌯𑍁𑌕𑍍𑌤𑌂 𑌨𑌿𑌜𑌗𑌾𑌦 𑌵𑌾𑌨𑌰𑌃 ॥ 6 ॥
𑌶𑌰𑌾𑌭𑌿𑌤𑌪𑍍𑌤𑍇𑌨 𑌵𑌿𑌚𑍇𑌤𑌸𑌾 𑌮𑌯𑌾 𑌪𑍍𑌰𑌦𑍂𑌷𑌿𑌤𑌸𑍍𑌤𑍍𑌵𑌂 𑌯𑌦𑌜𑌾𑌨𑌤𑌾 𑌪𑍍𑌰𑌭𑍋 ।
𑌇𑌦𑌂 𑌮𑌹𑍇𑌂𑌦𑍍𑌰𑍋𑌪𑌮 𑌭𑍀𑌮𑌵𑌿𑌕𑍍𑌰𑌮 𑌪𑍍𑌰𑌸𑌾𑌦𑌿𑌤𑌸𑍍𑌤𑍍𑌵𑌂 𑌕𑍍𑌷𑌮 𑌮𑍇 𑌨𑌰𑍇𑌶𑍍𑌵𑌰 ॥ 6 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌅𑌷𑍍𑌟𑌾𑌦𑌶𑌸𑍍𑌸𑌰𑍍𑌗𑌃 ॥
