𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌦𑌶𑌸𑍍𑌸𑌰𑍍𑌗𑌃 ।
𑌤𑍇 𑌤𑍁 𑌤𑌾𑌂 𑌰𑌜𑌨𑍀𑌮𑍁𑌷𑍍𑌯 𑌬𑍍𑌰𑌾𑌹𑍍𑌮𑌣𑌾 𑌵𑍇𑌦𑌪𑌾𑌰𑌗𑌾𑌃 ।
𑌉𑌪𑌤𑌸𑍍𑌥𑍁𑌰𑍁𑌪𑌸𑍍𑌥𑌾𑌨𑌂 𑌸𑌹 𑌰𑌾𑌜𑌪𑍁𑌰𑍋𑌹𑌿𑌤𑌾𑌃 ॥ 1 ॥
𑌅𑌮𑌾𑌤𑍍𑌯𑌾 𑌬𑌲𑌮𑍁𑌖𑍍𑌯𑌾𑌶𑍍𑌚 𑌮𑍁𑌖𑍍𑌯𑌾 𑌯𑍇 𑌨𑌿𑌗𑌮𑌸𑍍𑌯 𑌚 ।
𑌰𑌾𑌘𑌵𑌸𑍍𑌯𑌾𑌭𑌿𑌷𑍇𑌕𑌾𑌰𑍍𑌥𑍇 𑌪𑍍𑌰𑌿𑌯𑌮𑌾𑌣𑌾𑌸𑍍𑌤𑍁 𑌸𑌂𑌗𑌤𑌾𑌃 ॥ 2 ॥
𑌉𑌦𑌿𑌤𑍇 𑌵𑌿𑌮𑌲𑍇 𑌸𑍂𑌰𑍍𑌯𑍇 𑌪𑍁𑌷𑍍𑌯𑍇 𑌚𑌾𑌭𑍍𑌯𑌾𑌗𑌤𑍇𑌽𑌹𑌨𑌿 ।
𑌲𑌗𑍍𑌨𑍇 𑌕𑌰𑍍𑌕𑌟𑌕𑍇 𑌪𑍍𑌰𑌾𑌪𑍍𑌤𑍇 𑌜𑌨𑍍𑌮 𑌰𑌾𑌮𑌸𑍍𑌯 𑌚 𑌸𑍍𑌥𑌿𑌤𑍇 ॥ 3 ॥
𑌅𑌭𑌿𑌷𑍇𑌕𑌾𑌯 𑌰𑌾𑌮𑌸𑍍𑌯 𑌦𑍍𑌵𑌿𑌜𑍇𑌂𑌦𑍍𑌰𑍈𑌰𑍁𑌪𑌕𑌲𑍍𑌪𑌿𑌤𑌮𑍍 ।
𑌕𑌾𑌂𑌚𑌨𑌾 𑌜𑌲𑌕𑍁𑌂𑌭𑌾𑌶𑍍𑌚 𑌭𑌦𑍍𑌰𑌪𑍀𑌠𑌂 𑌸𑍍𑌵𑌲𑌂𑌕𑍃𑌤𑌮𑍍 ।
2.15,4 ।
𑌰𑌥𑌃 𑌚 𑌸𑌮𑍍𑌯𑌗𑌾𑌸𑍍𑌤𑍀𑌰𑍍𑌣𑍋 𑌭𑌾𑌸𑍍𑌵𑌤𑌾 𑌵𑍍𑌯𑌾𑌘𑍍𑌰𑌚𑌰𑍍𑌮𑌣𑌾 ।
𑌗𑌂𑌗𑌾𑌯𑌮𑍁𑌨𑌯𑍋𑌃𑌪𑍁𑌣𑍍𑌯𑌾𑌤𑍍𑌸𑌂𑌗𑌮𑌾𑌦𑌾𑌹𑍃𑌤𑌂 𑌜𑌲𑌮𑍍 ॥ 4 ॥
𑌯𑌾𑌶𑍍𑌚𑌾𑌨𑍍𑌯𑌾 𑌸𑍍𑌸𑌰𑌿𑌤𑌃 𑌪𑍁𑌣𑍍𑌯𑌾 𑌹𑍍𑌰𑌦𑌾𑌃 𑌕𑍂𑌪𑌾 𑌸𑍍𑌸𑌰𑌾𑌂𑌸𑌿 𑌚 ।
𑌪𑍍𑌰𑌾𑌗𑍍𑌵𑌾𑌹𑌾𑌶𑍍𑌚𑍋𑌰𑍍𑌧𑍍𑌵𑌵𑌾𑌹𑌾𑌶𑍍𑌚 𑌤𑌿𑌰𑍍𑌯𑌗𑍍𑌵𑌾𑌹𑌾 𑌸𑍍𑌸𑌮𑌾𑌹𑌿𑌤𑌾𑌃 ॥ 5 ॥
𑌤𑌾𑌭𑍍𑌯𑌶𑍍𑌚𑍈𑌵𑌾𑌹𑍃𑌤𑌂 𑌤𑍋𑌯𑌂 𑌸𑌮𑍁𑌦𑍍𑌰𑍇𑌭𑍍𑌯𑌶𑍍𑌚 𑌸𑌰𑍍𑌵𑌶𑌃 ।
𑌸𑌲𑌾𑌜𑌾𑌃 𑌕𑍍𑌷𑍀𑌰𑌿𑌭𑌿𑌶𑍍𑌛𑌨𑍍𑌨𑌾 𑌘𑌟𑌾𑌃 𑌕𑌾𑌂𑌚𑌨𑌰𑌾𑌜𑌤𑌾𑌃 ॥ 6 ॥
𑌪𑌦𑍍𑌮𑍋𑌤𑍍𑌪𑌲𑌯𑍁𑌤𑌾 𑌭𑌾𑌂𑌤𑌿 𑌪𑍂𑌰𑍍𑌣𑌾𑌃 𑌪𑌰𑌮𑌵𑌾𑌰𑌿𑌣𑌾 ।
𑌕𑍍𑌷𑍌𑌦𑍍𑌰𑌂 𑌦𑌧𑌿 𑌘𑍃𑌤𑌂 𑌲𑌾𑌜𑌾 𑌦𑌰𑍍𑌭𑌾 𑌸𑍍𑌸𑍁𑌮𑌨𑌸𑌃 𑌪𑌯𑌃 ॥ ॥
𑌵𑍇𑌶𑍍𑌯𑌾𑌶𑍍𑌚𑍈𑌵 𑌶𑍁𑌭𑌾𑌚𑌾𑌰𑌾 𑌸𑍍𑌸𑌰𑍍𑌵𑌾𑌭𑌰𑌣𑌭𑍂𑌷𑌿𑌤𑌾𑌃 ।
𑌚𑌂𑌦𑍍𑌰𑌾𑌂𑌶𑍁𑌵𑌿𑌕𑌚𑌪𑍍𑌰𑌖𑍍𑌯𑌂 𑌕𑌾𑌂𑌚𑌨𑌂 𑌰𑌤𑍍𑌨𑌭𑍂𑌷𑌿𑌤𑌮𑍍 ॥ ॥
𑌸𑌜𑍍𑌜𑌂 𑌤𑌿𑌷𑍍𑌠𑌤𑌿 𑌰𑌾𑌮𑌸𑍍𑌯 𑌵𑌾𑌲𑌵𑍍𑌯𑌜𑌨𑌮𑍁𑌤𑍍𑌤𑌮𑌮𑍍 ।
𑌚𑌂𑌦𑍍𑌰𑌮𑌂𑌡𑌲𑌸𑌂𑌕𑌾𑌶𑌮𑌾𑌤𑌪𑌤𑍍𑌰𑌂 𑌚 𑌪𑌾𑌂𑌡𑍁𑌰𑌮𑍍 ॥ ॥
𑌸𑌜𑍍𑌜𑌂 𑌦𑍍𑌯𑍁𑌤𑌿𑌕𑌰𑌂 𑌶𑍍𑌰𑍀𑌮𑌦𑌭𑌿𑌷𑍇𑌕𑌪𑍁𑌰𑌸𑍍𑌕𑍃𑌤𑌮𑍍 ।
𑌪𑌾𑌂𑌡𑍁𑌰𑌶𑍍𑌚 𑌵𑍃𑌷𑌸𑍍𑌸𑌜𑍍𑌜𑌃 𑌪𑌾𑌂𑌡𑍁𑌰𑍋𑌽𑌶𑍍𑌵𑌶𑍍𑌚 𑌸𑍁𑌸𑍍𑌥𑌿𑌤𑌃 ॥ 10 ॥
𑌪𑍍𑌰𑌸𑍃𑌤𑌶𑍍𑌚 𑌗𑌜𑌃𑌶𑍍𑌰𑍀𑌮𑌾𑌨𑍌𑌪𑌵𑌾𑌹𑍍𑌯𑌃 𑌪𑍍𑌰𑌤𑍀𑌕𑍍𑌷𑌤𑍇 ।
𑌅𑌷𑍍𑌟𑍌 𑌚 𑌕𑌨𑍍𑌯𑌾 𑌮𑌾𑌂𑌗𑌲𑍍𑌯𑌾 𑌸𑍍𑌸𑌰𑍍𑌵𑌾𑌭𑌰𑌣𑌭𑍂𑌷𑌿𑌤𑌾𑌃 ॥ 11 ॥
𑌵𑌾𑌦𑌿𑌤𑍍𑌰𑌾𑌣𑌿 𑌚 𑌸𑌰𑍍𑌵𑌾𑌣𑌿 𑌵𑌂𑌦𑌿𑌨𑌶𑍍𑌚 𑌤𑌥𑌾𑌽𑌪𑌰𑍇 ।
𑌇𑌕𑍍𑌷𑍍𑌵𑌾𑌕𑍂𑌣𑌾𑌂 𑌯𑌥𑌾 𑌰𑌾𑌜𑍍𑌯𑍇 𑌸𑌂𑌭𑍍𑌰𑌿𑌯𑍇𑌤𑌾𑌭𑌿𑌷𑍇𑌚𑌨𑌮𑍍 ॥ 12 ॥
𑌤𑌥𑌾𑌜𑌾𑌤𑍀𑌯𑌮𑌾𑌦𑌾𑌯 𑌰𑌾𑌜𑌪𑍁𑌤𑍍𑌰𑌾𑌭𑌿𑌷𑍇𑌚𑌨𑌮𑍍 ।
𑌤𑍇 𑌰𑌾𑌜𑌵𑌚𑌨𑌾𑌤𑍍𑌤𑌤𑍍𑌰 𑌸𑌮𑌵𑍇𑌤𑌾𑌮𑌹𑍀𑌪𑌤𑌿𑌮𑍍 ॥ 13 ॥
𑌅𑌪𑌶𑍍𑌯𑌂𑌤𑍋𑌽𑌬𑍍𑌰𑍁𑌵𑌨𑍍 𑌕𑍋 𑌨𑍁 𑌰𑌾𑌜𑍍𑌞𑍋 𑌨𑌃 𑌪𑍍𑌰𑌤𑌿𑌵𑍇𑌦𑌯𑍇𑌤𑍍 ।
𑌨 𑌪𑌶𑍍𑌯𑌾𑌮𑌶𑍍𑌚 𑌰𑌾𑌜𑌾𑌨𑌮𑍁𑌦𑌿𑌤𑌶𑍍𑌚 𑌦𑌿𑌵𑌾𑌕𑌰𑌃 ॥ 14 ॥
𑌯𑍌𑌵𑌰𑌾𑌜𑍍𑌯𑌾𑌭𑌿𑌷𑍇𑌕𑌶𑍍𑌚 𑌸𑌜𑍍𑌜𑍋 𑌰𑌾𑌮𑌸𑍍𑌯 𑌧𑍀𑌮𑌤𑌃 ।
𑌇𑌤𑌿 𑌤𑍇𑌷𑍁 𑌬𑍍𑌰𑍁𑌵𑌾𑌣𑍇𑌷𑍁 𑌸𑌾𑌰𑍍𑌵𑌭𑍌𑌮𑌾𑌨𑍍 𑌮𑌹𑍀𑌪𑌤𑍀𑌨𑍍 ॥ 15 ॥
𑌅𑌬𑍍𑌰𑌵𑍀𑌤𑍍𑌤𑌾𑌨𑌿𑌦𑌂 𑌸𑌰𑍍𑌵𑌾𑌨𑍍𑌸𑍁𑌮𑌂𑌤𑍍𑌰𑍋 𑌰𑌾𑌜𑌸𑌤𑍍𑌕𑍃𑌤𑌃 ।
𑌰𑌾𑌮𑌂 𑌰𑌾𑌜𑍍𑌞𑍋 𑌨𑌿𑌯𑍋𑌗𑍇𑌨 𑌤𑍍𑌵𑌰𑌯𑌾 𑌪𑍍𑌰𑌸𑍍𑌥𑌿𑌤𑍋𑌽𑌸𑍍𑌮𑍍𑌯𑌹𑌮𑍍 ॥ 16 ॥
𑌪𑍂𑌜𑍍𑌯𑌾 𑌰𑌾𑌜𑍍𑌞𑍋 𑌭𑌵𑌂𑌤𑌸𑍍𑌤𑍁 𑌰𑌾𑌮𑌸𑍍𑌯 𑌚 𑌵𑌿𑌶𑍇𑌷𑌤𑌃 ।
𑌅𑌯𑌂 𑌪𑍃𑌚𑍍𑌛𑌾𑌮𑌿 𑌵𑌚𑌨𑌾𑌤𑍍𑌸𑍁𑌖𑌮𑌾𑌯𑍁𑌷𑍍𑌮𑌤𑌾𑌮𑌹𑌮𑍍 ॥ 1 ॥
𑌰𑌾𑌜𑍍𑌞𑌃 𑌸𑌂𑌪𑍍𑌰𑌤𑌿 𑌬𑍁𑌦𑍍𑌧𑌸𑍍𑌯 𑌯𑌚𑍍𑌚𑌾𑌗𑌮𑌨𑌕𑌾𑌰𑌣𑌮𑍍 ।
𑌇𑌤𑍍𑌯𑍁𑌕𑍍𑌤𑍍𑌵𑌾𑌽𑌂𑌤𑌃 𑌪𑍁𑌰𑌦𑍍𑌵𑌾𑌰𑌮𑌾𑌜𑌗𑌾𑌮 𑌪𑍁𑌰𑌾𑌣𑌵𑌿𑌤𑍍 ॥ 1 ॥
𑌸𑌦𑌾𑌽𑌸𑌕𑍍𑌤𑌂 𑌚 𑌤𑌦𑍍𑌵𑍇𑌶𑍍𑌮 𑌸𑍁𑌮𑌂𑌤𑍍𑌰𑌃 𑌪𑍍𑌰𑌵𑌿𑌵𑍇𑌶 𑌹 ।
𑌤𑍁𑌷𑍍𑌟𑌾𑌵𑌾𑌸𑍍𑌯 𑌤𑌦𑌾 𑌵𑌂𑌶𑌂 𑌪𑍍𑌰𑌵𑌿𑌶𑍍𑌯 𑌸 𑌵𑌿𑌶𑌾𑌂𑌪𑌤𑍇𑌃 ॥ 1 ॥
𑌶𑌯𑌨𑍀𑌯𑌂 𑌨𑌰𑍇𑌂𑌦𑍍𑌰𑌸𑍍𑌯 𑌤𑌦𑌾𑌽𑌽𑌸𑌾𑌦𑍍𑌯 𑌵𑍍𑌯𑌤𑌿𑌷𑍍𑌠𑌤 ।
𑌸𑍋𑌽𑌤𑍍𑌯𑌾𑌸𑌾𑌦𑍍𑌯 𑌤𑍁 𑌤𑌦𑍍𑌵𑍇𑌶𑍍𑌮 𑌤𑌿𑌰𑌸𑍍𑌕𑌰𑌣𑌿𑌮𑌂𑌤𑌰𑌾 ॥ 20 ॥
𑌆𑌶𑍀𑌰𑍍𑌭𑌿𑌰𑍍𑌗𑍁𑌣𑌯𑍁𑌕𑍍𑌤𑌾𑌭𑌿 𑌰𑌭𑌿𑌤𑍁𑌷𑍍𑌟𑌾𑌵 𑌰𑌾𑌘𑌵𑌮𑍍 ।
𑌸𑍋𑌮𑌸𑍂𑌰𑍍𑌯𑍌 𑌚 𑌕𑌾𑌕𑍁𑌤𑍍𑌸𑍍𑌥 𑌶𑌿𑌵𑌵𑍈𑌶𑍍𑌰𑌵𑌣𑌾𑌵𑌪𑌿 ॥ 21 ॥
𑌵𑌰𑍁𑌣𑌶𑍍𑌚𑌾𑌗𑍍𑌨𑌿𑌰𑌿𑌂𑌦𑍍𑌰𑌶𑍍𑌚 𑌵𑌿𑌜𑌯𑌂 𑌪𑍍𑌰𑌦𑌿𑌶𑌂𑌤𑍁 𑌤𑍇 ।
𑌗𑌤𑌾 𑌭𑌗𑌵𑌤𑍀 𑌰𑌾𑌤𑍍𑌰𑌿𑌰𑌹𑌃 𑌶𑌿𑌵𑌮𑍁𑌪𑌸𑍍𑌥𑌿𑌤𑌮𑍍 ॥ 22 ॥
𑌬𑍁𑌦𑍍𑌧𑍍𑌯𑌸𑍍𑌵 𑌨𑍃𑌪𑌶𑌾𑌰𑍍𑌦𑍂𑌲 𑌕𑍁𑌰𑍁 𑌕𑌾𑌰𑍍𑌯𑌮𑌨𑌂𑌤𑌰𑌮𑍍 ।
𑌬𑍍𑌰𑌾𑌹𑍍𑌮𑌣𑌾 𑌬𑌲𑌮𑍁𑌖𑍍𑌯𑌾𑌶𑍍𑌚 𑌨𑍈𑌗𑌮𑌾𑌶𑍍𑌚𑌾𑌗𑌤𑌾 𑌨𑍃𑌪 ॥ 23 ॥
𑌦𑌰𑍍𑌶𑌨𑌂 𑌤𑍇𑌽𑌭𑌿𑌕𑌾𑌂𑌕𑍍𑌷𑌂𑌤𑍇 𑌪𑍍𑌰𑌤𑌿𑌬𑍁𑌧𑍍𑌯𑌸𑍍𑌵 𑌰𑌾𑌘𑌵 ।
𑌸𑍍𑌤𑍁𑌵𑌂𑌤𑌂 𑌤𑌂 𑌤𑌦𑌾 𑌸𑍂𑌤𑌂 𑌸𑍁𑌮𑌂𑌤𑍍𑌰𑌂 𑌮𑌂𑌤𑍍𑌰𑌕𑍋𑌵𑌿𑌦𑌮𑍍 ॥ 24 ॥
𑌪𑍍𑌰𑌤𑌿𑌬𑍁𑌧𑍍𑌯 𑌤𑌤𑍋 𑌰𑌾𑌜𑌾 𑌇𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ।
𑌰𑌾𑌮𑌮𑌾𑌨𑌯 𑌸𑍂𑌤𑍇𑌤𑌿 𑌯𑌦𑌸𑍍𑌯𑌭𑌿𑌹𑌿𑌤𑍋𑌽𑌨𑌯𑌾 ॥ 25 ॥
𑌕𑌿𑌮𑌿𑌦𑌂 𑌕𑌾𑌰𑌣𑌂 𑌯𑍇𑌨 𑌮𑌮𑌾𑌜𑍍𑌞𑌾 𑌪𑍍𑌰𑌤𑌿𑌹𑌨𑍍𑌯𑌤𑍇 ।
𑌨 𑌚𑍈𑌵 𑌸𑌂𑌪𑍍𑌰𑌸𑍁𑌪𑍍𑌤𑍋𑌽𑌹𑌮𑌾𑌨𑌯𑍇𑌹𑌾𑌶𑍁 𑌰𑌾𑌘𑌵𑌮𑍍 ॥ 26 ॥
𑌇𑌤𑌿 𑌰𑌾𑌜𑌾 𑌦𑌶𑌰𑌥 𑌸𑍍𑌸𑍂𑌤𑌂 𑌤𑌤𑍍𑌰𑌾𑌨𑍍𑌵𑌶𑌾𑌤𑍍𑌪𑍁𑌨𑌃 ।
𑌸 𑌰𑌾𑌜𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌶𑌿𑌰𑌸𑌾 𑌪𑍍𑌰𑌤𑌿𑌪𑍂𑌜𑍍𑌯 𑌤𑌮𑍍 ॥ 2 ॥
𑌨𑌿𑌰𑍍𑌜𑌗𑌾𑌮 𑌨𑍃𑌪𑌾𑌵𑌾𑌸𑌾𑌨𑍍𑌮𑌨𑍍𑌯𑌮𑌾𑌨𑌃 𑌪𑍍𑌰𑌿𑌯𑌂 𑌮𑌹𑌤𑍍 ।
𑌪𑍍𑌰𑌸𑌨𑍍𑌨𑍋 𑌰𑌾𑌜𑌮𑌾𑌰𑍍𑌗𑌂 𑌚 𑌪𑌤𑌾𑌕𑌾𑌧𑍍𑌵𑌜𑌶𑍋𑌭𑌿𑌤𑌮𑍍 ॥ 2 ॥
𑌹𑍃𑌷𑍍𑌟𑌃 𑌪𑍍𑌰𑌮𑍁𑌦𑌿𑌤 𑌸𑍍𑌸𑍂𑌤𑍋 𑌜𑌗𑌾𑌮𑌾𑌶𑍁 𑌵𑌿𑌲𑍋𑌕𑌯𑌨𑍍 ।
𑌸 𑌸𑍂𑌤𑌸𑍍𑌤𑌤𑍍𑌰 𑌶𑍁𑌶𑍍𑌰𑌾𑌵 𑌰𑌾𑌮𑌾𑌧𑌿𑌕𑌰𑌣𑌾𑌃 𑌕𑌥𑌾𑌃 ॥ 2 ॥
𑌅𑌭𑌿𑌷𑍇𑌚𑌨𑌸𑌂𑌯𑍁𑌕𑍍𑌤𑌾𑌸𑍍𑌸𑌰𑍍𑌵𑌲𑍋𑌕𑌸𑍍𑌯 𑌹𑍃𑌷𑍍𑌟𑌵𑌤𑍍 ।
𑌤𑌤𑍋 𑌦𑌦𑌰𑍍𑌶 𑌰𑍁𑌚𑌿𑌰𑌂 𑌕𑍈𑌲𑌾𑌸𑌶𑌿𑌖𑌰𑌪𑍍𑌰𑌭𑌮𑍍 ॥ 30 ॥
𑌰𑌾𑌮𑌵𑍇𑌶𑍍𑌮 𑌸𑍁𑌮𑌂𑌤𑍍𑌰𑌸𑍍𑌤𑍁 𑌶𑌕𑍍𑌰𑌵𑍇𑌶𑍍𑌮𑌸𑌮𑌪𑍍𑌰𑌭𑌮𑍍 ।
𑌮𑌹𑌾𑌕𑌵𑌾𑌟𑌵𑌿𑌹𑌿𑌤𑌂 𑌵𑌿𑌤𑌰𑍍𑌦𑌿𑌶𑌤𑌶𑍋𑌭𑌿𑌤𑌮𑍍 ॥ 31 ॥
𑌕𑌾𑌂𑌚𑌨𑌪𑍍𑌰𑌤𑌿𑌮𑍈𑌕𑌾𑌗𑍍𑌰𑌂 𑌮𑌣𑌿𑌵𑌿𑌦𑍍𑌰𑍁𑌮𑌤𑍋𑌰𑌣𑌮𑍍 ।
𑌶𑌾𑌰𑌦𑌾𑌭𑍍𑌰𑌘𑌨𑌪𑍍𑌰𑌖𑍍𑌯𑌂 𑌦𑍀𑌪𑍍𑌤𑌂 𑌮𑍇𑌰𑍁𑌗𑍁𑌹𑍋𑌪𑌮𑌮𑍍 ॥ 32 ॥
𑌮𑌣𑌿𑌭𑌿𑌰𑍍𑌵𑌰𑌮𑌾𑌲𑍍𑌯𑌾𑌨𑌾𑌂 𑌸𑌮𑍁𑌹𑌦𑍍𑌭𑌿𑌰𑌲𑌂𑌕𑍃𑌤𑌮𑍍 ।
𑌮𑍁𑌕𑍍𑌤𑌾𑌮𑌣𑌿𑌭𑌿𑌰𑌾𑌕𑍀𑌰𑍍𑌣𑌂 𑌚𑌂𑌦𑌨𑌾𑌗𑌰𑍂𑌧𑍂𑌪𑌿𑌤𑌮𑍍 ॥ 33 ॥
𑌗𑌂𑌧𑌾𑌨𑍍𑌮𑌨𑍋𑌜𑍍𑌞𑌾𑌨𑍍 𑌵𑌿𑌸𑍃𑌜𑌦𑍍𑌦𑌾𑌰𑍍𑌦𑍁𑌰𑌂 𑌶𑌿𑌖𑌰𑌂 𑌯𑌥𑌾 ।
𑌸𑌾𑌰𑌸𑍈𑌶𑍍𑌚 𑌮𑌯𑍂𑌰𑍈𑌶𑍍𑌚 𑌵𑌿𑌨𑌦𑌦𑍍𑌭𑌿𑌰𑍍𑌵𑌿𑌰𑌾𑌜𑌿𑌤𑌮𑍍 ॥ 34 ॥
𑌸𑍁𑌕𑍃𑌤𑍇𑌹𑌾𑌮𑍃𑌗𑌾𑌕𑍀𑌰𑍍𑌣𑌂 𑌸𑍁𑌕𑍀𑌰𑍍𑌣𑌂 𑌭𑌕𑍍𑌤𑌿𑌭𑌿𑌸𑍍𑌤𑌥𑌾 ।
𑌮𑌨𑌶𑍍𑌚𑌕𑍍𑌷𑍁𑌶𑍍𑌚 𑌭𑍂𑌤𑌾𑌨𑌾𑌮𑌾𑌦𑌦𑌤𑍍𑌤𑌿𑌗𑍍𑌮𑌤𑍇𑌜𑌸𑌾 ॥ 35 ॥
𑌚𑌂𑌦𑍍𑌰𑌭𑌾𑌸𑍍𑌕𑌰𑌸𑌂𑌕𑌾𑌶𑌂 𑌕𑍁𑌬𑍇𑌰𑌭𑌵𑌨𑍋𑌪𑌮𑌮𑍍 ।
𑌮𑌹𑍇𑌂𑌦𑍍𑌰𑌧𑌾𑌮𑌪𑍍𑌰𑌤𑌿𑌮𑌂 𑌨𑌾𑌨𑌾𑌪𑌕𑍍𑌷𑌿𑌸𑌮𑌾𑌕𑍁𑌲𑌮𑍍 ॥ 36 ॥
𑌮𑍇𑌰𑍁𑌶𑍃𑌂𑌗𑌸𑌮𑌂 𑌸𑍂𑌤𑍋 𑌰𑌾𑌮𑌵𑍇𑌶𑍍𑌮 𑌦𑌦𑌰𑍍𑌶 𑌹 ।
𑌉𑌪𑌸𑍍𑌥𑌿𑌤𑍈𑌃𑌸𑌮𑌾𑌕𑍀𑌰𑍍𑌣𑌂 𑌜𑌨𑍈𑌰𑌂𑌜𑌲𑌿𑌕𑌾𑌰𑌿𑌭𑌿𑌃 ॥ 3 ॥
𑌉𑌪𑌾𑌦𑌾𑌯 𑌸𑌮𑌾𑌕𑍍𑌰𑌾𑌂𑌤𑍈𑌸𑍍𑌤𑌥𑌾 𑌜𑌾𑌨𑌪𑌦𑍈𑌰𑍍𑌜𑌨𑍈𑌃 ।
𑌰𑌾𑌮𑌾𑌭𑌿𑌷𑍇𑌕𑌸𑍁𑌮𑍁𑌖𑍈𑌰𑍁𑌨𑍍𑌮𑍁𑌖𑍈𑌸𑍍𑌸𑌮𑌲𑌂𑌕𑍃𑌤𑌮𑍍 ॥ 3 ॥
𑌮𑌹𑌾𑌮𑍇𑌘𑌸𑌮𑌪𑍍𑌰𑌖𑍍𑌯𑌮𑍁𑌦𑌗𑍍𑌰𑌂 𑌸𑍁𑌵𑌿𑌭𑍂𑌷𑌿𑌤𑌮𑍍 ।
𑌨𑌾𑌨𑌾𑌰𑌤𑍍𑌨𑌸𑌮𑌾𑌕𑍀𑌰𑍍𑌣𑌂 𑌕𑍁𑌬𑍍𑌜𑌕𑍈𑌰𑌾𑌤𑌕𑌾𑌵𑍃𑌤𑌮𑍍 ॥ 3 ॥
𑌸 𑌵𑌾𑌜𑌿𑌯𑍁𑌕𑍍𑌤𑍇𑌨 𑌰𑌥𑍇𑌨 𑌸𑌾𑌰𑌥𑌿𑌃 𑌨𑌰𑌾𑌕𑍁𑌲𑌂 𑌰𑌾𑌜𑌕𑍁𑌲𑌂 𑌵𑌿𑌰𑌾𑌜𑌯𑌨𑍍 ।
𑌵𑌰𑍂𑌥𑌿𑌨𑌾 𑌰𑌾𑌮𑌗𑍃𑌹𑌾𑌭𑌿𑌪𑌾𑌤𑌿𑌨𑌾 𑌪𑍁𑌰𑌸𑍍𑌯 𑌸𑌰𑍍𑌵𑌸𑍍𑌯 𑌮𑌨𑌾𑌂𑌸𑌿 𑌹𑌰𑍍𑌷𑌯𑌨𑍍 ॥ 40 ॥
𑌤𑌤𑌸𑍍𑌸𑌮𑌾𑌸𑌾𑌦𑍍𑌯 𑌮𑌹𑌾𑌧𑌨𑌂 𑌮𑌹𑌤𑍍 𑌪𑍍𑌰𑌹𑍃𑌷𑍍𑌟𑌰𑍋𑌮𑌾 𑌸 𑌬𑌭𑍂𑌬 𑌸𑌾𑌰𑌥𑌿𑌃 ।
𑌮𑍃𑌰𑍍𑌗𑍈𑌰𑍍𑌮𑌯𑍂𑌰𑍈𑌶𑍍𑌚 𑌸𑌮𑌾𑌕𑍁𑌲𑍋𑌲𑍍𑌬𑌣𑌂 𑌗𑍃𑌹𑌂 𑌵𑌰𑌾𑌰𑍍𑌹𑌸𑍍𑌯 𑌶𑌚𑍀𑌪𑌤𑍇𑌰𑌿𑌵 ॥ 41 ॥
𑌸 𑌤𑌤𑍍𑌰 𑌕𑍈𑌲𑌾𑌸𑌨𑌿𑌭𑌾𑌸𑍍𑌸𑍍𑌵𑌲𑌂𑌕𑍃𑌤𑌾𑌃 𑌪𑍍𑌰𑌵𑌿𑌶𑍍𑌯 𑌕𑌕𑍍𑌷𑍍𑌯𑌾𑌸𑍍𑌤𑍍𑌰𑌿𑌦𑌶𑌾𑌲𑌯𑍋𑌪𑌮𑌾𑌃 ।
𑌪𑍍𑌰𑌿𑌯𑌾𑌨𑍍𑌵𑌰𑌾𑌨𑍍 𑌰𑌾𑌮𑌮𑌤𑍇 𑌸𑍍𑌥𑌿𑌤𑌾𑌨𑍍 𑌬𑌹𑍂𑌨𑍍 𑌵𑍍𑌯𑌪𑍋𑌹𑍍𑌯 𑌶𑍁𑌦𑍍𑌧𑌾𑌂𑌤𑌮𑍁𑌪𑌸𑍍𑌥𑌿𑌤𑍋 𑌰𑌥𑍀 ॥ 42 ॥
𑌸 𑌤𑌤𑍍𑌰 𑌶𑍁𑌶𑍍𑌰𑌾𑌵 𑌚 𑌹𑌰𑍍𑌷𑌯𑍁𑌕𑍍𑌤𑌾𑌃 𑌰𑌾𑌮𑌾𑌭𑌿𑌷𑍇𑌕𑌾𑌰𑍍𑌥𑌕𑍃𑌤𑌾 𑌜𑌨𑌾𑌨𑌾𑌮𑍍 ।
𑌨𑌰𑍇𑌂𑌦𑍍𑌰𑌸𑍂𑌨𑍋𑌰𑌭𑌿𑌮𑌂𑌗𑌲𑌾𑌰𑍍𑌥𑌾𑌃 𑌸𑌰𑍍𑌵𑌸𑍍𑌯 𑌲𑍋𑌕𑌸𑍍𑌯 𑌗𑌿𑌰𑌃 𑌪𑍍𑌰𑌹𑍃𑌷𑍍𑌟𑌃 ॥ 43 ॥
𑌮𑌹𑍇𑌂𑌦𑍍𑌰𑌸𑌦𑍍𑌮𑌪𑍍𑌰𑌤𑌿𑌮𑌂 𑌤𑍁 𑌵𑍇𑌶𑍍𑌮 𑌰𑌾𑌮𑌸𑍍𑌯 𑌰𑌮𑍍𑌯𑌂 𑌮𑍃𑌗𑌪𑌕𑍍𑌷𑌿 𑌜𑍁𑌷𑍍𑌟𑌮𑍍 ।
𑌦𑌦𑌰𑍍𑌶 𑌮𑍇𑌰𑍋𑌰𑌿𑌵 𑌶𑍍𑌰𑍁𑌂𑌗𑌮𑍁𑌚𑍍𑌚𑌂 𑌵𑌿𑌭𑍍𑌰𑌾𑌜𑌮𑌾𑌨𑌂 𑌪𑍍𑌰𑌭𑌯𑌾 𑌸𑍁𑌮𑌂𑌤𑍍𑌰𑌃 ॥ 44 ॥
𑌉𑌪𑌸𑍍𑌥𑌿𑌤𑍈𑌰𑌂𑌜𑌲𑌿𑌕𑌾𑌰𑌕𑍈𑌶𑍍𑌚 𑌸𑍋𑌪𑌾𑌯𑌨𑍈𑌰𑍍𑌜𑌾𑌨𑌪𑌦𑍈𑌰𑍍𑌜𑌨𑍈𑌶𑍍𑌚 ।
𑌕𑍋𑌟𑍍𑌯𑌾 𑌪𑌰𑌾𑌰𑍍𑌧𑍈𑌶𑍍𑌚 𑌵𑌿𑌮𑍁𑌕𑍍𑌤𑌯𑌾𑌨𑍈𑌃 𑌸𑌮𑌾𑌕𑍁𑌲𑌂 𑌦𑍍𑌵𑌾𑌰𑌪𑌥𑌂 𑌦𑌦𑌰𑍍𑌶 ॥ 45 ॥
𑌤𑌤𑍋 𑌮𑌹𑌾𑌮𑍇𑌘𑌮𑌹𑍀𑌧𑌰𑌾𑌭𑌂 𑌪𑍍𑌰𑌭𑌿𑌨𑍍𑌨𑌮𑌤𑍍𑌯𑌂𑌕𑍁𑌶𑌮𑌤𑍍𑌯𑌸𑌹𑍍𑌯𑌮𑍍 ।
𑌰𑌾𑌮𑍌𑌪𑌵𑌾𑌹𑍍𑌯𑌂 𑌰𑍁𑌚𑌿𑌰𑌂 𑌦𑌦𑌰𑍍𑌶 𑌶𑌤𑍍𑌰𑍁𑌂𑌜𑌯𑌂 𑌨𑌾𑌗𑌮𑍁𑌦𑌗𑍍𑌰𑌕𑌾𑌯𑌮𑍍 ॥ 46 ॥
𑌸𑍍𑌵𑌲𑌂𑌕𑍃𑌤𑌾𑌨𑍍 𑌸𑌾𑌶𑍍𑌵𑌰𑌥𑌾𑌨𑍍 𑌸𑌕𑍁𑌂𑌜𑌰𑌾 𑌨𑌮𑌾𑌤𑍍𑌯 𑌮𑍁𑌖𑍍𑌯𑌾𑌂𑌶𑍍𑌚 𑌦𑌦𑌰𑍍𑌶 𑌵𑌲𑍍𑌲𑌭𑌾𑌨𑍍 ।
𑌵𑍍𑌯𑌪𑍋𑌹𑍍𑌯 𑌸𑍂𑌤𑌸𑍍𑌸𑌹𑌿𑌤𑌾𑌨𑍍 𑌸𑌮𑌂𑌤𑌤𑌃 𑌸𑌮𑍃𑌦𑍍𑌧𑌮𑌂𑌤𑌃𑌪𑍁𑌰𑌮𑌾𑌵𑌿𑌵𑍇𑌶 𑌹 ॥ 4 ॥
𑌤𑌦𑌂𑌦𑍍𑌰𑌿𑌕𑍂𑌟𑌾𑌚𑌲𑌮𑍇𑌘𑌸𑌨𑍍𑌨𑌿𑌭𑌂 𑌮𑌹𑌾𑌵𑌿𑌮𑌾𑌨𑍋𑌪𑌮𑌵𑍇𑌶𑍍𑌮𑌸𑌂𑌯𑍁𑌤𑌮𑍍 ।
𑌅𑌵𑌾𑌰𑍍𑌯𑌮𑌾𑌣𑌃 𑌪𑍍𑌰𑌵𑌿𑌵𑍇𑌶 𑌸𑌾𑌰𑌥𑌿𑌃 𑌪𑍍𑌰𑌭𑍂𑌤𑌰𑌤𑍍𑌨𑌂 𑌮𑌕𑌰𑍋 𑌯𑌥𑌾𑌰𑍍𑌣𑌵𑌮𑍍 ॥ 4 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌪𑌂𑌚𑌦𑌶𑌸𑍍𑌸𑌰𑍍𑌗𑌃 ॥
