VR 2.95 Ayodhya Kanda - Sarga 95 - Grantha

Collection of Spiritual and Devotional Literature in Various Indian Languages

View this in:

2.𑍯5 𑌅𑌯𑍋𑌧𑍍𑌯𑌾𑌕𑌾𑌂𑌡 - 𑌪𑌂𑌚𑌨𑌵𑌤𑌿𑌤𑌮 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌨𑌵𑌤𑌿𑌤𑌮𑌸𑍍𑌸𑌰𑍍𑌗𑌃 ।

𑌅𑌥 𑌶𑍈𑌲𑌾𑌦𑍍𑌵𑌿𑌨𑌿𑌷𑍍𑌕𑍍𑌰𑌮𑍍𑌯 𑌮𑍈𑌥𑌿𑌲𑍀𑌂 𑌕𑍋𑌸𑌲𑍇𑌶𑍍𑌵𑌰𑌃 ।
𑌅𑌦𑌰𑍍𑌶𑌯𑌚𑍍𑌛𑍁𑌭𑌜𑌲𑌾𑌂 𑌰𑌮𑍍𑌯𑌾𑌂 𑌮𑌂𑌦𑌾𑌕𑌿𑌨𑍀𑌂 𑌨𑌦𑍀𑌮𑍍 ॥ 1 ॥

𑌅𑌬𑍍𑌰𑌵𑍀𑌚𑍍𑌚 𑌵𑌰𑌾𑌰𑍋𑌹𑌾𑌂 𑌚𑌾𑌰𑍁𑌚𑌂𑌦𑍍𑌰𑌨𑌿𑌭𑌾𑌨𑌨𑌾𑌮𑍍 ।
𑌵𑌿𑌦𑍇𑌹𑌰𑌾𑌜𑌸𑍍𑌯 𑌸𑍁𑌤𑌾𑌂 𑌰𑌾𑌮𑍋 𑌰𑌾𑌜𑍀𑌵𑌲𑍋𑌚𑌨𑌃 ॥ 2 ॥

𑌵𑌿𑌚𑌿𑌤𑍍𑌰𑌪𑍁𑌲𑌿𑌨𑌾𑌂 𑌰𑌮𑍍𑌯𑌾𑌂 𑌹𑌂𑌸𑌸𑌾𑌰𑌸𑌸𑍇𑌵𑌿𑌤𑌾𑌮𑍍 ।
𑌕𑌮𑌲𑍈𑌰𑍁𑌪𑌸𑌂𑌪𑌨𑍍𑌨𑌾𑌂 𑌪𑌶𑍍𑌯 𑌮𑌂𑌦𑌾𑌕𑌿𑌨𑍀𑌂 𑌨𑌦𑍀𑌮𑍍 ॥ 3 ॥

𑌨𑌾𑌨𑌾𑌵𑌿𑌧𑍈𑌸𑍍𑌤𑍀𑌰𑌰𑍁𑌹𑍈 𑌰𑍍𑌵𑍃𑌤𑌾𑌂 𑌪𑍁𑌷𑍍𑌪𑌫𑌲𑌦𑍍𑌰𑍁𑌮𑍈𑌃 ।
𑌰𑌾𑌜𑌂𑌤𑍀𑌂 𑌰𑌾𑌜𑌰𑌾𑌜𑌸𑍍𑌯 𑌨𑌲𑌿𑌨𑍀𑌮𑌿𑌵 𑌸𑌰𑍍𑌵𑌤𑌃 ॥ 4 ॥

𑌮𑍃𑌗𑌯𑍂𑌥𑌨𑌿𑌪𑍀𑌤𑌾𑌨𑌿 𑌕𑌲𑍁𑌷𑌾𑌂𑌭𑌾𑌂𑌸𑌿 𑌸𑌾𑌂𑌪𑍍𑌰𑌤𑌮𑍍 ।
𑌤𑍀𑌰𑍍𑌥𑌾𑌨𑌿 𑌰𑌮𑌣𑍀𑌯𑌾𑌨𑌿 𑌰𑌤𑌿𑌂 𑌸𑌂𑌜𑌨𑌯𑌂𑌤𑌿 𑌮𑍇 ॥ 5 ॥

𑌜𑌟𑌾𑌜𑌿𑌨𑌧𑌰𑌾𑌃 𑌕𑌾𑌲𑍇 𑌵𑌲𑍍𑌕𑌲𑍋𑌤𑍍𑌤𑌰𑌵𑌾𑌸𑌸𑌃 ।
𑌋𑌷𑌯 𑌸𑍍𑌤𑍍𑌵𑌵𑌗𑌾𑌹𑌂𑌤𑍇 𑌨𑌦𑍀𑌂 𑌮𑌂𑌦𑌾𑌕𑌿𑌨𑍀𑌂 𑌪𑍍𑌰𑌿𑌯𑍇 ॥ 6 ॥

𑌆𑌦𑌿𑌤𑍍𑌯𑌮𑍁𑌪𑌤𑌿𑌷𑍍𑌠𑌂𑌤𑍇 𑌨𑌿𑌯𑌮𑌾𑌦𑍂𑌰𑍍𑌧𑍍𑌵𑌬𑌾𑌹𑌵𑌃 ।
𑌏𑌤𑍇 𑌪𑌰𑍇 𑌵𑌿𑌶𑌾𑌲𑌾𑌕𑍍𑌷𑌿 𑌮𑍁𑌨𑌯 𑌸𑍍𑌸𑌂𑌶𑌿𑌤𑌵𑍍𑌰𑌤𑌾𑌃 ॥ 𑍭 ॥

𑌮𑌾𑌰𑍁𑌤𑍋𑌦𑍍𑌧𑍂𑌤𑌶𑌿𑌖𑌰𑍈𑌃 𑌪𑍍𑌰𑌨𑍃𑌤𑍍𑌤 𑌇𑌵 𑌪𑌰𑍍𑌵𑌤𑌃 ।
𑌪𑌾𑌦𑌪𑍈𑌃 𑌪𑌤𑍍𑌰𑌪𑍁𑌷𑍍𑌪𑌾𑌣𑌿 𑌸𑍃𑌜𑌦𑍍𑌭𑌿𑌰𑌭𑌿𑌤𑍋 𑌨𑌦𑍀𑌮𑍍 ॥ 𑍮 ॥

𑌚𑌿𑌨𑍍𑌮𑌣𑌿𑌨𑌿𑌕𑌾𑌶𑍋𑌦𑌾𑌂 𑌕𑍍𑌵𑌚𑌿𑌤𑍍𑌪𑍁𑌲𑌿𑌨𑌶𑌾𑌲𑌿𑌨𑍀𑌮𑍍 ।
𑌕𑍍𑌵𑌚𑌿𑌤𑍍𑌸𑌿𑌦𑍍𑌧𑌜𑌨𑌾𑌕𑍀𑌰𑍍𑌣𑌾𑌂 𑌪𑌶𑍍𑌯 𑌮𑌂𑌦𑌾𑌕𑌿𑌨𑍀𑌂 𑌨𑌦𑍀𑌮𑍍 ॥ 𑍯 ॥

𑌨𑌿𑌰𑍍𑌧𑍂𑌤𑌾𑌨𑍍𑌵𑌾𑌯𑍁𑌨𑌾 𑌪𑌶𑍍𑌯 𑌵𑌿𑌤𑌤𑌾𑌨𑍍𑌪𑍁𑌷𑍍𑌪𑌸𑌂𑌚𑌯𑌾𑌨𑍍 ।
𑌪𑍋𑌪𑍍𑌲𑍂𑌯𑌮𑌾𑌨𑌾𑌨𑌪𑌰𑌾𑌨𑍍𑌪𑌶𑍍𑌯 𑌤𑍍𑌵𑌂 𑌜𑌲𑌮𑌧𑍍𑌯𑌗𑌾𑌨𑍍 ॥ 10 ॥

𑌤𑌾𑌂𑌶𑍍𑌚𑌾𑌤𑌿𑌵𑌲𑍍𑌗𑍁𑌵𑌚𑌸𑍋 𑌰𑌥𑌾𑌂𑌗𑌾𑌹𑍍𑌵𑌯𑌨𑌾 𑌦𑍍𑌵𑌿𑌜𑌾𑌃 ।
𑌅𑌧𑌿𑌰𑍋𑌹𑌂𑌤𑌿 𑌕𑌲𑍍𑌯𑌾𑌣𑌿 𑌨𑌿𑌷𑍍𑌕𑍂𑌜𑌂𑌤 𑌶𑍍𑌶𑍁𑌭𑌾 𑌗𑌿𑌰𑌃 ॥ 11 ॥

𑌦𑌰𑍍𑌶𑌨𑌂 𑌚𑌿𑌤𑍍𑌰𑌕𑍂𑌟𑌸𑍍𑌯 𑌮𑌂𑌦𑌾𑌕𑌿𑌨𑍍𑌯𑌾𑌶𑍍𑌚 𑌶𑍋𑌭𑌨𑍇 ।
𑌅𑌧𑌿𑌕𑌂 𑌪𑍁𑌰𑌵𑌾𑌸𑌾𑌚𑍍𑌚 𑌮𑌨𑍍𑌯𑍇 𑌤𑌵 𑌚 𑌦𑌰𑍍𑌶𑌨𑌾𑌤𑍍 ॥ 12 ॥

𑌵𑌿𑌧𑍂𑌤𑌕𑌲𑍁𑌷𑍈 𑌸𑍍𑌸𑌿𑌦𑍍𑌧𑍈𑌸𑍍𑌤𑌪𑍋𑌦𑌮𑌶𑌮𑌾𑌨𑍍𑌵𑌿𑌤𑍈𑌃 ।
𑌨𑌿𑌤𑍍𑌯𑌵𑌿𑌕𑍍𑌷𑍋𑌭𑌿𑌤𑌜𑌲𑌾𑌂 𑌵𑌿𑌗𑌾𑌹𑌸𑍍𑌵 𑌮𑌯𑌾 𑌸𑌹 ॥ 13 ॥

𑌸𑌖𑍀𑌵𑌚𑍍𑌚 𑌵𑌿𑌗𑌾𑌹𑌸𑍍𑌵 𑌸𑍀𑌤𑍇 𑌮𑌂𑌦𑌾𑌕𑌿𑌨𑍀𑌂 𑌨𑌦𑍀𑌮𑍍 ।
𑌕𑌮𑌲𑌾𑌨𑍍𑌯𑌵𑌮𑌜𑍍𑌜𑌂𑌤𑍀 𑌪𑍁𑌷𑍍𑌕𑌰𑌾𑌣𑌿 𑌚 𑌭𑌾𑌮𑌿𑌨𑌿 ॥ 14 ॥

𑌤𑍍𑌵𑌂 𑌪𑍌𑌰𑌜𑌨𑌵𑌦𑍍𑌵𑍍𑌯𑌾𑌲𑌾𑌨𑌯𑍋𑌧𑍍𑌯𑌾𑌮𑌿𑌵 𑌪𑌰𑍍𑌵𑌤𑌮𑍍 ।
𑌮𑌨𑍍𑌯𑌸𑍍𑌵 𑌵𑌨𑌿𑌤𑍇 𑌨𑌿𑌤𑍍𑌯𑌂 𑌸𑌰𑌯𑍂𑌵𑌦𑌿𑌮𑌾𑌂 𑌨𑌦𑍀𑌮𑍍 ॥ 15 ॥

𑌲𑌕𑍍𑌷𑍍𑌮𑌣𑌶𑍍𑌚𑌾𑌪𑌿 𑌧𑌰𑍍𑌮𑌾𑌤𑍍𑌮𑌾 𑌮𑌨𑍍𑌨𑌿𑌦𑍇𑌶𑍇 𑌵𑍍𑌯𑌵𑌸𑍍𑌥𑌿𑌤𑌃 ।
𑌤𑍍𑌵𑌂 𑌚𑌾𑌨𑍁𑌕𑍂𑌲𑌾 𑌵𑍈𑌦𑍇𑌹𑌿 𑌪𑍍𑌰𑍀𑌤𑌿𑌂 𑌜𑌨𑌯𑌥𑍋 𑌮𑌮 ॥ 16 ॥

𑌉𑌪𑌸𑍍𑌪𑍃𑌶𑌂𑌸𑍍𑌤𑍍𑌰𑌿𑌷𑌵𑌣𑌂 𑌮𑌧𑍁𑌮𑍂𑌲𑌫𑌲𑌾𑌶𑌨𑌃 ।
𑌨𑌾𑌯𑍋𑌧𑍍𑌯𑌾𑌯𑍈𑌨 𑌰𑌾𑌜𑍍𑌯𑌾𑌯 𑌸𑍍𑌪𑍃𑌹𑌯𑍇𑌽𑌦𑍍𑌯 𑌤𑍍𑌵𑌯𑌾 𑌸𑌹 ॥ 1𑍭 ॥

𑌇𑌮𑌾𑌂𑌹𑌿 𑌰𑌮𑍍𑌯𑌾𑌂 𑌮𑍃𑌗𑌯𑍂𑌥𑌶𑌾𑌲𑌿𑌨𑍀𑌂 𑌨𑌿𑌪𑍀𑌤𑌤𑍋𑌯𑌾𑌂 𑌗𑌜𑌸𑌿𑌂𑌹𑌵𑌾𑌨𑌰𑍈𑌃 ।
𑌸𑍁𑌪𑍁𑌷𑍍𑌪𑌿𑌤𑌾𑌂 𑌪𑍁𑌷𑍍𑌪𑌭𑌰𑍈𑌰𑌲𑌂𑌕𑍃𑌤𑌾𑌂 𑌨𑌸𑍋𑌽𑌸𑍍𑌤𑌿 𑌯 𑌸𑍍𑌸𑍍𑌯𑌾𑌨𑍍𑌨 𑌗𑌤𑌕𑍍𑌲𑌮 𑌸𑍍𑌸𑍁𑌖𑍀 ॥ 1𑍮 ॥

𑌇𑌤𑍀𑌵 𑌰𑌾𑌮𑍋 𑌬𑌹𑍁𑌸𑌂𑌗𑌤𑌂 𑌵𑌚𑌃 𑌪𑍍𑌰𑌿𑌯𑌾𑌸𑌹𑌾𑌯 𑌸𑍍𑌸𑌰𑌿𑌤𑌂 𑌪𑍍𑌰𑌤𑌿 𑌬𑍍𑌰𑍁𑌵𑌨𑍍 ।
𑌚𑌚𑌾𑌰 𑌰𑌮𑍍𑌯𑌂 𑌨𑌯𑌨𑌾𑌂𑌜𑌨𑌪𑍍𑌰𑌭𑌂 𑌸 𑌚𑌿𑌤𑍍𑌰𑌕𑍂𑌟𑌂 𑌰𑌘𑍁𑌵𑌂𑌶𑌵𑌰𑍍𑌧𑌨𑌃 ॥ 1𑍯 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌪𑌂𑌚𑌨𑌵𑌤𑌿𑌤𑌮𑌸𑍍𑌸𑌰𑍍𑌗𑌃 ॥

Browse Related Categories: