𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌮𑌸𑍍𑌸𑌰𑍍𑌗𑌃 ।
𑌤𑌤𑌃 𑌸 𑌮𑌧𑍍𑌯𑌂𑌗𑌤𑌮𑌂𑌶𑍁𑌮𑌂𑌤𑌂 𑌜𑍍𑌯𑍋𑌤𑍍𑌸𑍍𑌨𑌾𑌵𑌿𑌤𑌾𑌨𑌂 𑌮𑌹𑌦𑍁𑌦𑍍𑌵𑌮𑌂𑌤𑌮𑍍 ।
𑌦𑌦𑌰𑍍𑌶 𑌧𑍀𑌮𑌾𑌨𑍍 𑌦𑌿𑌵𑌿 𑌭𑌾𑌨𑍁𑌮𑌂𑌤𑌂 𑌗𑍋𑌷𑍍𑌠𑍇 𑌵𑍃𑌷𑌂 𑌮𑌤𑍍𑌤𑌮𑌿𑌵 𑌭𑍍𑌰𑌮𑌂𑌤𑌮𑍍 ॥ 1 ॥
𑌲𑍋𑌕𑌸𑍍𑌯 𑌪𑌾𑌪𑌾𑌨𑌿 𑌵𑌿𑌨𑌾𑌶𑌯𑌂𑌤𑌂 𑌮𑌹𑍋𑌦𑌧𑌿𑌂 𑌚𑌾𑌪𑌿 𑌸𑌮𑍇𑌧𑌯𑌂𑌤𑌮𑍍 ।
𑌭𑍂𑌤𑌾𑌨𑌿 𑌸𑌰𑍍𑌵𑌾𑌣𑌿 𑌵𑌿𑌰𑌾𑌜𑌯𑌂𑌤𑌂 𑌦𑌦𑌰𑍍𑌶 𑌶𑍀𑌤𑌾𑌂𑌶𑍁𑌮𑌥𑌾𑌭𑌿𑌯𑌾𑌂𑌤𑌮𑍍 ॥ 2 ॥
𑌯𑌾 𑌭𑌾𑌤𑌿 𑌲𑌕𑍍𑌷𑍍𑌮𑍀𑌰𑍍𑌭𑍁𑌵𑌿 𑌮𑌂𑌦𑌰𑌸𑍍𑌥𑌾 𑌤𑌥𑌾 𑌪𑍍𑌰𑌦𑍋𑌷𑍇𑌷𑍁 𑌚 𑌸𑌾𑌗𑌰𑌸𑍍𑌥𑌾 ।
𑌤𑌥𑍈𑌵 𑌤𑍋𑌯𑍇𑌷𑍁 𑌚 𑌪𑍁𑌷𑍍𑌕𑌰𑌸𑍍𑌥𑌾 𑌰𑌰𑌾𑌜 𑌸𑌾 𑌚𑌾𑌰𑍁𑌨𑌿𑌶𑌾𑌕𑌰𑌸𑍍𑌥𑌾 ॥ 3 ॥
𑌹𑌂𑌸𑍋 𑌯𑌥𑌾 𑌰𑌾𑌜𑌤𑌪𑌂𑌜𑌰𑌸𑍍𑌥𑌃 𑌸𑌿𑌂𑌹𑍋 𑌯𑌥𑌾 𑌮𑌂𑌦𑌰𑌕𑌂𑌦𑌰𑌸𑍍𑌥𑌃 ।
𑌵𑍀𑌰𑍋 𑌯𑌥𑌾 𑌗𑌰𑍍𑌵𑌿𑌤𑌕𑍁𑌂𑌜𑌰𑌸𑍍𑌥 𑌚𑌂𑌦𑍍𑌰𑍋𑌽𑌪𑌿 𑌬𑌭𑍍𑌰𑌾𑌜 𑌤𑌥𑌾𑌂𑌬𑌰𑌸𑍍𑌥𑌃 ॥ 4 ॥
𑌸𑍍𑌥𑌿𑌤𑌃 𑌕𑌕𑍁𑌦𑍍𑌮𑌾𑌨𑌿𑌵 𑌤𑍀𑌕𑍍𑌷𑍍𑌣𑌶𑍃𑌂𑌗𑍋 𑌮𑌹𑌾𑌚𑌲𑌃 𑌶𑍍𑌵𑍇𑌤 𑌇𑌵𑍋𑌚𑍍𑌚𑌶𑍃𑌂𑌗𑌃 ।
𑌹𑌸𑍍𑌤𑍀𑌵 𑌜𑌾𑌂𑌬𑍂𑌨𑌦𑌬𑌦𑍍𑌧𑌶𑍃𑌂𑌗𑍋 𑌰𑌰𑌾𑌜 𑌚𑌂𑌦𑍍𑌰𑌃 𑌪𑌰𑌿𑌪𑍂𑌰𑍍𑌣𑌶𑍃𑌂𑌗𑌃 ॥ 5 ॥
𑌵𑌿𑌨𑌷𑍍𑌟𑌶𑍀𑌤𑌾𑌂𑌬𑍁𑌤𑍁𑌷𑌾𑌰𑌪𑌂𑌕𑍋 𑌮𑌹𑌾𑌗𑍍𑌰𑌹𑌗𑍍𑌰𑌾𑌹𑌵𑌿𑌨𑌷𑍍𑌟𑌪𑌂𑌕𑌃 ।
𑌪𑍍𑌰𑌕𑌾𑌶𑌲𑌕𑍍𑌷𑍍𑌮𑍍𑌯𑌾𑌶𑍍𑌰𑌯𑌨𑌿𑌰𑍍𑌮𑌲𑌾𑌂𑌕𑌃 𑌰𑌰𑌾𑌜 𑌚𑌂𑌦𑍍𑌰𑍋 𑌭𑌗𑌵𑌾𑌨𑍍 𑌶𑌶𑌾𑌂𑌕𑌃 ॥ 6 ॥
𑌶𑌿𑌲𑌾𑌤𑌲𑌂 𑌪𑍍𑌰𑌾𑌪𑍍𑌯 𑌯𑌥𑌾 𑌮𑍃𑌗𑍇𑌂𑌦𑍍𑌰𑍋 𑌮𑌹𑌾𑌰𑌣𑌂 𑌪𑍍𑌰𑌾𑌪𑍍𑌯 𑌯𑌥𑌾 𑌗𑌜𑍇𑌂𑌦𑍍𑌰𑌃 ।
𑌰𑌾𑌜𑍍𑌯𑌂 𑌸𑌮𑌾𑌸𑌾𑌦𑍍𑌯 𑌯𑌥𑌾 𑌨𑌰𑍇𑌂𑌦𑍍𑌰 𑌸𑍍𑌤𑌥𑌾𑌪𑍍𑌰𑌕𑌾𑌶𑍋 𑌵𑌿𑌰𑌰𑌾𑌜 𑌚𑌂𑌦𑍍𑌰𑌃 ॥ ॥
𑌪𑍍𑌰𑌕𑌾𑌶𑌚𑌂𑌦𑍍𑌰𑍋𑌦𑌯𑌨𑌷𑍍𑌟𑌦𑍋𑌷𑌃 𑌪𑍍𑌰𑌵𑍃𑌤𑍍𑌤𑌰𑌕𑍍𑌷𑌃 𑌪𑌿𑌶𑌿𑌤𑌾𑌶𑌦𑍋𑌷𑌃 ।
𑌰𑌾𑌮𑌾𑌭𑌿𑌰𑌾𑌮𑍇𑌰𑌿𑌤𑌚𑌿𑌤𑍍𑌤𑌦𑍋𑌷𑌃 𑌸𑍍𑌵𑌰𑍍𑌗𑌪𑍍𑌰𑌕𑌾𑌶𑍋 𑌭𑌗𑌵𑌾𑌨𑍍 𑌪𑍍𑌰𑌦𑍋𑌷𑌃 ॥ ॥
𑌤𑌂𑌤𑍍𑌰𑍀𑌸𑍍𑌵𑌨𑌾𑌃 𑌕𑌰𑍍𑌣𑌸𑍁𑌖𑌾𑌃 𑌪𑍍𑌰𑌵𑍃𑌤𑍍𑌤𑌾𑌃 𑌸𑍍𑌵𑌪𑌂𑌤𑌿 𑌨𑌾𑌰𑍍𑌯𑌃 𑌪𑌤𑌿𑌭𑌿𑌃 𑌸𑍁𑌵𑍃𑌤𑍍𑌤𑌾𑌃 ।
𑌨𑌕𑍍𑌤𑌂𑌚𑌰𑌾𑌶𑍍𑌚𑌾𑌪𑌿 𑌤𑌥𑌾 𑌪𑍍𑌰𑌵𑍃𑌤𑍍𑌤𑌾𑌃 𑌵𑌿𑌹𑌰𑍍𑌤𑍁𑌮𑌤𑍍𑌯𑌦𑍍𑌭𑍁𑌤𑌰𑍌𑌦𑍍𑌰𑌵𑍃𑌤𑍍𑌤𑌾𑌃 ॥ ॥
𑌮𑌤𑍍𑌤𑌪𑍍𑌰𑌮𑌤𑍍𑌤𑌾𑌨𑌿 𑌸𑌮𑌾𑌕𑍁𑌲𑌾𑌨𑌿 𑌰𑌥𑌾𑌶𑍍𑌵𑌭𑌦𑍍𑌰𑌾𑌸𑌨𑌸𑌂𑌕𑍁𑌲𑌾𑌨𑌿 ।
𑌵𑍀𑌰𑌶𑍍𑌰𑌿𑌯𑌾 𑌚𑌾𑌪𑌿 𑌸𑌮𑌾𑌕𑍁𑌲𑌾𑌨𑌿 𑌦𑌦𑌰𑍍𑌶 𑌧𑍀𑌮𑌾𑌨𑍍 𑌸 𑌕𑌪𑌿𑌃 𑌕𑍁𑌲𑌾𑌨𑌿 ॥ 10 ॥
𑌪𑌰𑌸𑍍𑌪𑌰𑌂 𑌚𑌾𑌧𑌿𑌕𑌮𑌾𑌕𑍍𑌷𑌿𑌪𑌂𑌤𑌿 𑌭𑍁𑌜𑌾𑌂𑌶𑍍𑌚 𑌪𑍀𑌨𑌾𑌨𑌧𑌿𑌕𑌂 𑌕𑍍𑌷𑌿𑌪𑌂𑌤𑌿 ।
𑌮𑌤𑍍𑌤𑌪𑍍𑌰𑌲𑌾𑌪𑌾𑌨𑌧𑌿𑌕𑌂 𑌕𑍍𑌷𑌿𑌪𑌂𑌤𑌿 𑌮𑌤𑍍𑌤𑌾𑌨𑌿 𑌚𑌾𑌨𑍍𑌯𑍋𑌨𑍍𑌯𑌮𑌧𑌿𑌕𑍍𑌷𑌿𑌪𑌂𑌤𑌿 ॥ 11 ॥
𑌰𑌕𑍍𑌷𑌾𑌂𑌸𑌿 𑌵𑌕𑍍𑌷𑌾𑌂𑌸𑌿 𑌚 𑌵𑌿𑌕𑍍𑌷𑌿𑌪𑌂𑌤𑌿 𑌗𑌾𑌤𑍍𑌰𑌾𑌣𑌿 𑌕𑌾𑌂𑌤𑌾𑌸𑍁 𑌚 𑌵𑌿𑌕𑍍𑌷𑌿𑌪𑌂𑌤𑌿 ।
𑌰𑍂𑌪𑌾𑌣𑌿 𑌚𑌿𑌤𑍍𑌰𑌾𑌣𑌿 𑌚 𑌵𑌿𑌕𑍍𑌷𑌿𑌪𑌂𑌤𑌿 𑌦𑍃𑌢𑌾𑌨𑌿 𑌚𑌾𑌪𑌾𑌨𑌿 𑌚 𑌵𑌿𑌕𑍍𑌷𑌿𑌪𑌂𑌤𑌿 ॥ 12 ॥
𑌦𑌦𑌰𑍍𑌶 𑌕𑌾𑌂𑌤𑌾𑌶𑍍𑌚 𑌸𑌮𑌾𑌲𑌭𑌂𑌤𑍍𑌯 𑌸𑍍𑌤𑌥𑌾 𑌪𑌰𑌾𑌸𑍍𑌤𑌤𑍍𑌰 𑌪𑍁𑌨𑌃 𑌸𑍍𑌵𑌪𑌂𑌤𑍍𑌯𑌃 ।
𑌸𑍁𑌰𑍂𑌪𑌵𑌕𑍍𑌤𑍍𑌰𑌾𑌶𑍍𑌚 𑌤𑌥𑌾 𑌹𑌸𑌂𑌤𑍍𑌯𑌃 𑌕𑍍𑌰𑍁𑌦𑍍𑌧𑌾𑌃 𑌪𑌰𑌾𑌶𑍍𑌚𑌾𑌪𑌿 𑌵𑌿𑌨𑌿𑌃𑌶𑍍𑌵𑌸𑌂𑌤𑍍𑌯 ॥ 13 ॥
𑌮𑌹𑌾𑌗𑌜𑍈𑌶𑍍𑌚𑌾𑌪𑌿 𑌤𑌥𑌾 𑌨𑌦𑌦𑍍𑌭𑌿𑌃 𑌸𑍁𑌪𑍂𑌜𑌿𑌤𑍈𑌶𑍍𑌚𑌾𑌪𑌿 𑌤𑌥𑌾 𑌸𑍁𑌸𑌦𑍍𑌭𑌿𑌃 ।
𑌰𑌰𑌾𑌜 𑌵𑍀𑌰𑍈𑌶𑍍𑌚 𑌵𑌿𑌨𑌿𑌃𑌶𑍍𑌵𑌸𑌦𑍍𑌭𑌿𑌃 𑌹𑍍𑌰𑌦𑍋 𑌭𑍁𑌜𑌂𑌗𑍈𑌰𑌿𑌵 𑌨𑌿𑌃𑌶𑍍𑌵𑌸𑌦𑍍𑌭𑌿𑌃 ॥ 14 ॥
𑌬𑍁𑌦𑍍𑌧𑌿𑌪𑍍𑌰𑌧𑌾𑌨𑌾𑌨𑍍 𑌰𑍁𑌚𑌿𑌰𑌾𑌭𑌿𑌧𑌾𑌨𑌾𑌨𑍍 𑌸𑌂𑌶𑍍𑌰𑌦𑍍𑌧𑌧𑌾𑌨𑌾𑌨𑍍 𑌜𑌗𑌤𑌃 𑌪𑍍𑌰𑌧𑌾𑌨𑌾𑌨𑍍 ।
𑌨𑌾𑌨𑌾𑌵𑌿𑌧𑌾𑌨𑌾𑌨𑍍 𑌰𑍁𑌚𑌿𑌰𑌾𑌭𑌿𑌧𑌾𑌨𑌾𑌨𑍍 𑌦𑌦𑌰𑍍𑌶 𑌤𑌸𑍍𑌯𑌾𑌂 𑌪𑍁𑌰𑌿 𑌯𑌾𑌤𑍁𑌧𑌾𑌨𑌾𑌨𑍍 ॥ 15 ॥
𑌨𑌨𑌂𑌦 𑌦𑍃𑌷𑍍𑌟𑍍𑌵𑌾 𑌸 𑌚 𑌤𑌾𑌨𑍍 𑌸𑍁𑌰𑍂𑌪𑌾𑌨𑍍𑌨𑌾𑌨𑌾𑌗𑍁𑌣𑌾𑌨𑌾𑌤𑍍𑌮𑌗𑍁𑌣𑌾𑌨𑍁𑌰𑍂𑌪𑌾𑌨𑍍 ।
𑌵𑌿𑌦𑍍𑌯𑍋𑌤𑌮𑌾𑌨𑌾𑌨𑍍𑌸 𑌤𑌦𑌾𑌨𑍁𑌰𑍂𑌪𑌾𑌨𑍍 𑌦𑌦𑌰𑍍𑌶 𑌕𑌾𑌂𑌶𑍍𑌚𑌿𑌚𑍍𑌚 𑌪𑍁𑌨𑌰𑍍𑌵𑌿𑌰𑍂𑌪𑌾𑌨𑍍 ॥ 16 ॥
𑌤𑌤𑍋 𑌵𑌰𑌾𑌰𑍍𑌹𑌾𑌃 𑌸𑍁𑌵𑌿𑌶𑍁𑌦𑍍𑌧𑌭𑌾𑌵𑌾 𑌸𑍍𑌤𑍇𑌷𑌾𑌂 𑌸𑍍𑌤𑍍𑌰𑌿𑌯𑌸𑍍𑌤𑌤𑍍𑌰 𑌮𑌹𑌾𑌨𑍁𑌭𑌾𑌵𑌾𑌃 ।
𑌪𑍍𑌰𑌿𑌯𑍇𑌷𑍁 𑌪𑌾𑌨𑍇𑌷𑍁 𑌚 𑌸𑌕𑍍𑌤𑌭𑌾𑌵𑌾 𑌦𑌦𑌰𑍍𑌶 𑌤𑌾𑌰𑌾 𑌇𑌵 𑌸𑍁𑌪𑍍𑌰𑌭𑌾𑌵𑌾𑌃 ॥ 1 ॥
𑌶𑍍𑌰𑌿𑌯𑌾 𑌜𑍍𑌵𑌲𑌂𑌤𑍀𑌸𑍍𑌤𑍍𑌰𑌪𑌯𑍋𑌪𑌗𑍂𑌢𑌾 𑌨𑌿𑌶𑍀𑌥𑌕𑌾𑌲𑍇 𑌰𑌮𑌣𑍋𑌪𑌗𑍂𑌢𑌾𑌃 ।
𑌦𑌦𑌰𑍍𑌶 𑌕𑌾𑌶𑍍𑌚𑌿𑌤𑍍𑌪𑍍𑌰𑌮𑌦𑍋𑌪𑌗𑍂𑌢𑌾 𑌯𑌥𑌾 𑌵𑌿𑌹𑌂𑌗𑌾𑌃 𑌕𑍁𑌸𑍁𑌮𑍋𑌪𑌗𑍂𑌢𑌾𑌃 ॥ 1 ॥
𑌅𑌨𑍍𑌯𑌾𑌃 𑌪𑍁𑌨𑌰𑍍𑌹𑌰𑍍𑌮𑍍𑌯𑌤𑌲𑍋𑌪𑌵𑌿𑌷𑍍𑌟𑌾 𑌸𑍍𑌤𑌤𑍍𑌰 𑌪𑍍𑌰𑌿𑌯𑌾𑌂𑌕𑍇𑌷𑍁 𑌸𑍁𑌖𑍋𑌪𑌵𑌿𑌷𑍍𑌟𑌾𑌃 ।
𑌭𑌰𑍍𑌤𑍁𑌃 𑌪𑍍𑌰𑌿𑌯𑌾 𑌧𑌰𑍍𑌮𑌪𑌰𑌾 𑌨𑌿𑌵𑌿𑌷𑍍𑌟𑌾 𑌦𑌦𑌰𑍍𑌶 𑌧𑍀𑌮𑌾𑌨𑍍 𑌮𑌦𑌨𑌾𑌭𑌿𑌵𑌿𑌷𑍍𑌟𑌾𑌃 ॥ 1 ॥
𑌅𑌪𑍍𑌰𑌾𑌵𑍃𑌤𑌾𑌃 𑌕𑌾𑌂𑌚𑌨𑌰𑌾𑌜𑌿𑌵𑌰𑍍𑌣𑌾𑌃 𑌕𑌾𑌶𑍍𑌚𑌿𑌤𑍍𑌪𑌰𑌾𑌰𑍍𑌥𑍍𑌯𑌾𑌸𑍍𑌤𑌪𑌨𑍀𑌯𑌵𑌰𑍍𑌣𑌾𑌃 ।
𑌪𑍁𑌨𑌶𑍍𑌚 𑌕𑌾𑌶𑍍𑌚𑌿𑌚𑍍𑌛𑌶𑌲𑌕𑍍𑌷𑍍𑌮𑌵𑌰𑍍𑌣𑌾𑌃 𑌕𑌾𑌂𑌤𑌪𑍍𑌰𑌹𑍀𑌣𑌾 𑌰𑍁𑌚𑌿𑌰𑌾𑌂𑌗𑌵𑌰𑍍𑌣𑌾𑌃 ॥ 20 ॥
𑌤𑌤𑌃 𑌪𑍍𑌰𑌿𑌯𑌾𑌨𑍍 𑌪𑍍𑌰𑌾𑌪𑍍𑌯 𑌮𑌨𑍋𑌭𑌿𑌰𑌾𑌮𑌾𑌃 𑌸𑍁𑌪𑍍𑌰𑍀𑌤𑌿𑌯𑍁𑌕𑍍𑌤𑌾𑌃 𑌪𑍍𑌰𑌸𑌮𑍀𑌕𑍍𑌷𑍍𑌯𑌰𑌾𑌮𑌾𑌃 ।
𑌗𑍃𑌹𑍇𑌷𑍁 𑌹𑍃𑌷𑍍𑌟𑌾𑌃 𑌪𑌰𑌮𑌾𑌭𑌿𑌰𑌾𑌮𑌾𑌃 𑌹𑌰𑌿𑌪𑍍𑌰𑌵𑍀𑌰𑌃 𑌸 𑌦𑌦𑌰𑍍𑌶 𑌰𑌾𑌮𑌾𑌃 ॥ 21 ॥
𑌚𑌂𑌦𑍍𑌰𑌪𑍍𑌰𑌕𑌾𑌶𑌾𑌶𑍍𑌚 𑌹𑌿 𑌵𑌕𑍍𑌤𑍍𑌰𑌮𑌾𑌲𑌾𑌃 𑌵𑌕𑍍𑌰𑌾𑌕𑍍𑌷𑌿𑌪𑌕𑍍𑌷𑍍𑌮𑌾𑌶𑍍𑌚 𑌸𑍁𑌨𑍇𑌤𑍍𑌰𑌮𑌾𑌲𑌾𑌃 ।
𑌵𑌿𑌭𑍂𑌷𑌣𑌾𑌨𑌾𑌂 𑌚 𑌦𑌦𑌰𑍍𑌶 𑌮𑌾𑌲𑌾𑌃 𑌶𑌤𑌹𑍍𑌰𑌦𑌾𑌨𑌾𑌮𑌿𑌵 𑌚𑌾𑌰𑍁𑌮𑌾𑌲𑌾𑌃 ॥ 22 ॥
𑌨 𑌤𑍍𑌵𑍇𑌵 𑌸𑍀𑌤𑌾𑌂 𑌪𑌰𑌮𑌾𑌭𑌿𑌜𑌾𑌤𑌾𑌂 𑌪𑌥𑌿 𑌸𑍍𑌥𑌿𑌤𑍇 𑌰𑌾𑌜𑌕𑍁𑌲𑍇 𑌪𑍍𑌰𑌜𑌾𑌤𑌾𑌮𑍍 ।
𑌲𑌤𑌾𑌂 𑌪𑍍𑌰𑌪𑍁𑌲𑍍𑌲𑌾𑌮𑌿𑌵 𑌸𑌾𑌧𑍁 𑌜𑌾𑌤𑌾𑌂 𑌦𑌦𑌰𑍍𑌶 𑌤𑌨𑍍𑌵𑍀𑌂 𑌮𑌨𑌸𑌾𑌭𑌿𑌜𑌾𑌤𑌾𑌮𑍍 ॥ 23 ॥
𑌸𑌨𑌾𑌤𑌨𑍇 𑌵𑌰𑍍𑌤𑍍𑌮𑌨𑌿 𑌸𑌨𑍍𑌨𑌿𑌵𑌿𑌷𑍍𑌟𑌾𑌂 𑌰𑌾𑌮𑍇𑌕𑍍𑌷𑌣𑌾𑌂 𑌤𑌾𑌂 𑌮𑌦𑌨𑌾𑌭𑌿𑌵𑌿𑌷𑍍𑌟𑌾𑌮𑍍 ।
𑌭𑌰𑍍𑌤𑍁𑌰𑍍𑌮𑌨𑌃 𑌶𑍍𑌰𑍀𑌮𑌦𑌨𑍁𑌪𑍍𑌰𑌵𑌿𑌷𑍍𑌟𑌾𑌂 𑌸𑍍𑌤𑍍𑌰𑍀𑌭𑍍𑌯𑍋 𑌵𑌰𑌾𑌭𑍍𑌯𑌶𑍍𑌚 𑌸𑌦𑌾 𑌵𑌿𑌶𑌿𑌷𑍍𑌟𑌾𑌮𑍍 ॥ 24 ॥
𑌉𑌷𑍍𑌣𑌾𑌰𑍍𑌦𑌿𑌤𑌾𑌂 𑌸𑌾𑌨𑍁𑌸𑍃𑌤𑌾𑌸𑍍𑌰𑌕𑌂𑌠𑍀𑌂 𑌪𑍁𑌰𑌾 𑌵𑌰𑌾𑌰𑍍𑌹𑍋𑌤𑍍𑌤𑌮𑌨𑌿𑌷𑍍𑌕𑌕𑌂𑌠𑍀𑌮𑍍 ।
𑌸𑍁𑌜𑌾𑌤𑌪𑌕𑍍𑌷𑍍𑌮𑌾𑌮𑌭𑌿𑌰𑌕𑍍𑌤𑌕𑌂𑌠𑍀𑌂 𑌵𑌨𑍇𑌽𑌪𑍍𑌰𑌵𑍃𑌤𑍍𑌤𑌾𑌮𑌿𑌵 𑌨𑍀𑌲𑌕𑌂𑌠𑍀𑌮𑍍 ॥ 25 ॥
𑌅𑌵𑍍𑌯𑌕𑍍𑌤𑌰𑍇𑌖𑌾𑌮𑌿𑌵 𑌚𑌂𑌦𑍍𑌰𑌰𑍇𑌖𑌾𑌂 𑌪𑌾𑌂𑌸𑍁𑌪𑍍𑌰𑌦𑌿𑌗𑍍𑌧𑌾𑌮𑌿𑌵 𑌹𑍇𑌮𑌰𑍇𑌖𑌾𑌮𑍍 ।
𑌕𑍍𑌷𑌤𑌪𑍍𑌰𑌰𑍂𑌢𑌾𑌮𑌿𑌵 𑌬𑌾𑌣𑌰𑍇𑌖𑌾𑌂 𑌵𑌾𑌯𑍁𑌪𑍍𑌰𑌭𑌿𑌨𑍍𑌨𑌾𑌮𑌿𑌵 𑌮𑍇𑌘𑌰𑍇𑌖𑌾𑌮𑍍 ॥ 26 ॥
𑌸𑍀𑌤𑌾𑌮𑌪𑌶𑍍𑌯𑌨𑍍 𑌮𑌨𑍁𑌜𑍇𑌶𑍍𑌵𑌰𑌸𑍍𑌯 𑌰𑌾𑌮𑌸𑍍𑌯 𑌪𑌤𑍍𑌨𑍀𑌂 𑌵𑌦𑌤𑌾𑌂 𑌵𑌰𑌸𑍍𑌯 ।
𑌬𑌭𑍂𑌵 𑌦𑍁𑌃𑌖𑌾𑌭𑌿𑌹𑌤𑌶𑍍𑌚𑌿𑌰𑌸𑍍𑌯 𑌪𑍍𑌲𑌵𑌂𑌗𑌮𑍋 𑌮𑌂𑌦 𑌇𑌵𑌾𑌚𑌿𑌰𑌸𑍍𑌯 ॥ 2 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌪𑌂𑌚𑌮𑌸𑍍𑌸𑌰𑍍𑌗𑌃 ॥
