𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌿𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌤𑌸𑍍𑌸𑌂𑌦𑌿𑌶𑍍𑌯 𑌸𑍁𑌗𑍍𑌰𑍀𑌵𑌶𑍍𑌶𑍍𑌵𑌶𑍁𑌰𑌂 𑌪𑌶𑍍𑌚𑌿𑌮𑌾𑌂 𑌦𑌿𑌶𑌮𑍍 ।
𑌵𑍀𑌰𑌂 𑌶𑌤𑌵𑌲𑌿𑌂 𑌨𑌾𑌮 𑌵𑌾𑌨𑌰𑌂 𑌵𑌾𑌨𑌰𑌰𑍍𑌷𑌭𑌃 ॥ 1 ॥
𑌉𑌵𑌾𑌚 𑌰𑌾𑌜𑌾 𑌧𑌰𑍍𑌮𑌜𑍍𑌞𑌸𑍍𑌸𑌰𑍍𑌵𑌵𑌾𑌨𑌰𑌸𑌤𑍍𑌤𑌮𑌮𑍍 ।
𑌵𑌾𑌕𑍍𑌯𑌮𑌾𑌤𑍍𑌮 𑌹𑌿𑌤𑌂 𑌚𑍈𑌵 𑌰𑌾𑌮𑌸𑍍𑌯 𑌚 𑌹𑌿𑌤𑌂 𑌤𑌥𑌾 ॥ 2 ॥
𑌵𑍃𑌤𑌶𑍍𑌶𑌤𑌸𑌹𑌸𑍍𑌰𑍇𑌣 𑌤𑍍𑌵𑌦𑍍𑌵𑌿𑌧𑌾𑌨𑌾𑌂 𑌵𑌨𑍌𑌕𑌸𑌾𑌮𑍍 ।
𑌵𑍈𑌵𑌸𑍍𑌵𑌤𑌸𑍁𑌤𑍈𑌸𑍍𑌸𑌾𑌰𑍍𑌧𑌂 𑌪𑍍𑌰𑌤𑌿𑌷𑍍𑌠𑌸𑍍𑌵 𑌸𑍍𑌵𑌮𑌂𑌤𑍍𑌰𑌿𑌭𑌿𑌃 ॥ 3 ॥
𑌦𑌿𑌶𑌂 𑌹𑍍𑌯𑍁𑌦𑍀𑌚𑍀𑌂 𑌵𑌿𑌕𑍍𑌰𑌾𑌂𑌤𑌾𑌂 𑌹𑌿𑌮𑌶𑍈𑌲𑌾𑌵𑌤𑌂𑌸𑌕𑌾𑌮𑍍 ।
𑌸𑌰𑍍𑌵𑌤𑌃 𑌪𑌰𑌿𑌮𑌾𑌰𑍍𑌗𑌧𑍍𑌵𑌂 𑌰𑌾𑌮𑌪𑌤𑍍𑌨𑍀𑌮𑌨𑌿𑌂𑌦𑌿𑌤𑌾𑌮𑍍 ॥ 4 ॥
𑌅𑌸𑍍𑌮𑌿𑌨𑍍𑌕𑌾𑌰𑍍𑌯𑍇𑌵𑌿𑌨𑌿𑌰𑍍𑌵𑍃𑌤𑍍𑌤𑍇 𑌕𑍃𑌤𑍇 𑌦𑌾𑌶𑌰𑌥𑍇𑌃 𑌪𑍍𑌰𑌿𑌯𑍇 ।
𑌋𑌣𑌾𑌨𑍍𑌮𑍁𑌕𑍍𑌤𑌾 𑌭𑌵𑌿𑌷𑍍𑌯𑌾𑌮𑌃 𑌕𑍃𑌤𑌾𑌰𑍍𑌥𑌾𑌰𑍍𑌥𑌵𑌿𑌦𑌾𑌂 𑌵𑌰𑌾𑌃 ॥ 5 ॥
𑌕𑍃𑌤𑌂 𑌹𑌿 𑌪𑍍𑌰𑌿𑌯𑌮𑌸𑍍𑌮𑌾𑌕𑌂 𑌰𑌾𑌘𑌵𑍇𑌣 𑌮𑌹𑌾𑌤𑍍𑌮𑌨𑌾 ।
𑌤𑌸𑍍𑌯 𑌚𑍇𑌤𑍍𑌪𑍍𑌰𑌤𑌿𑌕𑌾𑌰𑍋𑌽𑌸𑍍𑌤𑌿 𑌸𑌫𑌲𑌂 𑌜𑍀𑌵𑌿𑌤𑌂 𑌭𑌵𑍇𑌤𑍍 ॥ 6 ॥
𑌅𑌰𑍍𑌥𑌿𑌨𑌃 𑌕𑌾𑌰𑍍𑌯𑌨𑌿𑌰𑍍𑌵𑍃𑌤𑍍𑌤𑌿𑌮𑌕𑌰𑍍𑌤𑍁𑌰𑌪𑌿 𑌯𑌶𑍍𑌚𑌰𑍇𑌤𑍍 ।
𑌤𑌸𑍍𑌯 𑌸𑍍𑌯𑌾𑌤𑍍𑌸𑌫𑌲𑌂 𑌜𑌨𑍍𑌮 𑌕𑌿𑌂 𑌪𑍁𑌨𑌃 𑌪𑍂𑌰𑍍𑌵𑌕𑌾𑌰𑌿𑌣𑌃 ॥ ॥
𑌏𑌤𑌾𑌂 𑌬𑍁𑌦𑍍𑌧𑌿𑌮𑌵𑌸𑍍𑌥𑌾𑌯 𑌦𑍃𑌶𑍍𑌯𑌤𑍇 𑌜𑌾𑌨𑌕𑍀 𑌯𑌥𑌾 ।
𑌤𑌥𑌾 𑌭𑌵𑌦𑍍𑌭𑌿𑌃 𑌕𑌰𑍍𑌤𑌵𑍍𑌯𑌮𑌸𑍍𑌮𑌤𑍍𑌪𑍍𑌰𑌿𑌯𑌹𑌿𑌤𑍈𑌷𑌿𑌭𑌿𑌃 ॥ ॥
𑌅𑌯𑌂 𑌹𑌿 𑌸𑌰𑍍𑌵𑌭𑍂𑌤𑌾𑌨𑌾𑌂 𑌮𑌾𑌨𑍍𑌯𑌸𑍍𑌤𑍁 𑌨𑌰𑌸𑌤𑍍𑌤𑌮𑌃 ।
𑌅𑌸𑍍𑌮𑌾𑌸𑍁 𑌚𑌾𑌗𑌤𑌃 𑌪𑍍𑌰𑍀𑌤𑍀 𑌰𑌾𑌮𑌃 𑌪𑌰𑌪𑍁𑌰𑌂𑌜𑌯𑌃 ॥ ॥
𑌇𑌮𑌾𑌨𑌿 𑌵𑌨𑌦𑍁𑌰𑍍𑌗𑌾𑌣𑌿 𑌨𑌦𑍍𑌯𑌶𑍍𑌶𑍈𑌲𑌾𑌂𑌤𑌰𑌾𑌣𑌿 𑌚 ।
𑌭𑌵𑌂𑌤𑌃 𑌪𑌰𑌿𑌮𑌾𑌰𑍍𑌗𑌂𑌤𑍁 𑌬𑍁𑌦𑍍𑌧𑌿𑌵𑌿𑌕𑍍𑌰𑌮𑌸𑌂𑌪𑌦𑌾 ॥ 10 ॥
𑌤𑌤𑍍𑌰 𑌮𑍍𑌲𑍇𑌚𑍍𑌛𑌾𑌨𑍍𑌪𑍁𑌲𑌿𑌂𑌦𑌾𑌂𑌶𑍍𑌚 𑌶𑍂𑌰𑌸𑍇𑌨𑌾𑌂𑌸𑍍𑌤𑌥𑍈𑌵 𑌚 ।
𑌪𑍍𑌰𑌸𑍍𑌥𑌲𑌾𑌨𑍍𑌭𑌰𑌤𑌾𑌂𑌶𑍍𑌚𑍈𑌵 𑌕𑍁𑌰𑍂𑌂𑌶𑍍𑌚 𑌸𑌹 𑌮𑌦𑍍𑌰𑌕𑍈𑌃 ॥ 11 ॥
𑌕𑌾𑌂𑌬𑍋𑌜𑌾𑌨𑍍𑌯𑌵𑌨𑌾𑌂 𑌶𑍍𑌚𑍈𑌵 𑌶𑌕𑌾𑌨𑌾𑌰𑌟𑍍𑌟𑌕𑌾𑌨𑌪𑌿 ।
𑌬𑌾𑌹𑍍𑌲𑍀𑌕𑌾𑌨𑍃𑌷𑌿𑌕𑌾𑌂 𑌶𑍍𑌚𑍈𑌵 𑌪𑍌𑌰𑌵𑌾𑌨𑌥 𑌟𑌂𑌕𑌣𑌾𑌨𑍍 ॥ 12 ॥
𑌚𑍀𑌨𑌾𑌨𑍍𑌪𑌰𑌮𑌚𑍀𑌨𑌾𑌂𑌶𑍍𑌚 𑌨𑍀𑌹𑌾𑌰𑌾𑌂𑌶𑍍𑌚 𑌪𑍁𑌨𑌃 𑌪𑍁𑌨𑌃 ।
𑌅𑌨𑍍𑌵𑌿𑌷𑍍𑌯𑌦𑌰𑌦𑌾𑌂𑌶𑍍𑌚𑍈𑌵 𑌹𑌿𑌮𑌵𑌂𑌤𑌂 𑌤𑌥𑍈𑌵 𑌚 ॥ 13 ॥
𑌲𑍋𑌧𑍍𑌰𑌪𑌦𑍍𑌮𑌕𑌷𑌂𑌡𑍇𑌷𑍁 𑌦𑍇𑌵𑌦𑌾𑌰𑍁𑌵𑌨𑍇𑌷𑍁 𑌚 ।
𑌰𑌾𑌵𑌣𑌸𑍍𑌸𑌹 𑌵𑍈𑌦𑍇𑌹𑍍𑌯𑌾 𑌮𑌾𑌰𑍍𑌗𑌿𑌤𑌵𑍍𑌯𑌸𑍍𑌤𑌤𑌸𑍍𑌤𑌤𑌃 ॥ 14 ॥
𑌤𑌤𑌸𑍍𑌸𑍋𑌮𑌾𑌶𑍍𑌰𑌮𑌂 𑌗𑌤𑍍𑌵𑌾 𑌦𑍇𑌵𑌗𑌂𑌧𑌰𑍍𑌵𑌸𑍇𑌵𑌿𑌤𑌮𑍍 ।
𑌕𑌾𑌲𑌂 𑌨𑌾𑌮 𑌮𑌹𑌾𑌸𑌾𑌨𑍁𑌂 𑌪𑌰𑍍𑌵𑌤𑌂 𑌤𑍁 𑌗𑌮𑌿𑌷𑍍𑌯𑌥 ॥ 15 ॥
𑌮𑌹𑌤𑍍𑌸𑍁 𑌤𑌸𑍍𑌯 𑌶𑍈𑌲𑌸𑍍𑌯 𑌨𑌿𑌰𑍍𑌦𑌰𑍇𑌷𑍁 𑌗𑍁𑌹𑌾𑌸𑍁 𑌚 ।
𑌵𑌿𑌚𑌿𑌨𑍁𑌧𑍍𑌵𑌂 𑌮𑌹𑌾𑌭𑌾𑌗𑌾𑌂 𑌰𑌾𑌮𑌪𑌤𑍍𑌨𑍀𑌂𑌤𑌤𑌸𑍍𑌤𑌤𑌃 ॥ 16 ॥
𑌤𑌮𑌤𑌿𑌕𑍍𑌰𑌮𑍍𑌯 𑌶𑍈𑌲𑍇𑌂𑌦𑍍𑌰𑌂 𑌹𑍇𑌮𑌗𑌰𑍍𑌭𑌂 𑌮𑌹𑌾𑌗𑌿𑌰𑌿𑌮𑍍 ।
𑌤𑌤𑌸𑍍𑌸𑍁𑌦𑌰𑍍𑌶𑌨𑌂 𑌨𑌾𑌮 𑌗𑌂𑌤𑍁𑌮𑌰𑍍𑌹𑌥 𑌪𑌰𑍍𑌵𑌤𑌮𑍍 ॥ 1 ॥
𑌤𑌤𑍋 𑌦𑍇𑌵𑌸𑌖𑍋 𑌨𑌾𑌮 𑌪𑌰𑍍𑌵𑌤𑌃 𑌪𑌤𑌗𑌾𑌲𑌯𑌃 ।
𑌨𑌾𑌨𑌾𑌪𑌕𑍍𑌷𑌿𑌗𑌣𑌾𑌕𑍀𑌰𑍍𑌣𑍋 𑌵𑌿𑌵𑌿𑌧𑌦𑍍𑌰𑍁𑌮𑌭𑍂𑌷𑌿𑌤𑌃 ॥ 1 ॥
𑌤𑌸𑍍𑌯 𑌕𑌾𑌨𑌨𑌷𑌂𑌡𑍇𑌷𑍁 𑌨𑌿𑌰𑍍𑌘𑌰𑍇𑌷𑍁 𑌗𑍁𑌹𑌾𑌸𑍁 𑌚 ।
𑌰𑌾𑌵𑌣𑌸𑍍𑌸𑌹 𑌵𑍈𑌦𑍇𑌹𑍍𑌯𑌾 𑌮𑌾𑌰𑍍𑌗𑌿𑌤𑌵𑍍𑌯𑌸𑍍𑌤𑌤𑌸𑍍𑌤𑌤𑌃 ॥ 1 ॥
𑌤𑌮𑌤𑌿𑌕𑍍𑌰𑌮𑍍𑌯 𑌚𑌾𑌕𑌾𑌶𑌂 𑌸𑌰𑍍𑌵𑌤𑌶𑍍𑌶𑌤𑌯𑍋𑌜𑌨𑌮𑍍 ।
𑌅𑌪𑌰𑍍𑌵𑌤𑌨𑌦𑍀𑌵𑍃𑌕𑍍𑌷𑌂 𑌸𑌰𑍍𑌵𑌸𑌤𑍍𑌤𑍍𑌵𑌵𑌿𑌵𑌰𑍍𑌜𑌿𑌤𑌮𑍍 ॥ 20 ॥
𑌤𑌂 𑌤𑍁 𑌶𑍀𑌘𑍍𑌰𑌮𑌤𑌿𑌕𑍍𑌰𑌮𑍍𑌯 𑌕𑌾𑌂𑌤𑌾𑌰𑌂 𑌰𑍋𑌮𑌹𑌰𑍍𑌷𑌣𑌮𑍍 ।
𑌕𑍈𑌲𑌾𑌸𑌂 𑌪𑌾𑌂𑌡𑍁𑌰𑌂 𑌶𑍈𑌲𑌂 𑌪𑍍𑌰𑌾𑌪𑍍𑌯 𑌹𑍃𑌷𑍍𑌟𑌾 𑌭𑌵𑌿𑌷𑍍𑌯𑌥 ॥ 21 ॥
𑌤𑌤𑍍𑌰 𑌪𑌾𑌂𑌡𑍁𑌰𑌮𑍇𑌘𑌾𑌭𑌂 𑌜𑌾𑌂𑌬𑍂𑌨𑌦𑌪𑌰𑌿𑌷𑍍𑌕𑍃𑌤𑌮𑍍 ।
𑌕𑍁𑌬𑍇𑌰𑌭𑌵𑌨𑌂 𑌰𑌮𑍍𑌯𑌂 𑌨𑌿𑌰𑍍𑌮𑌿𑌤𑌂 𑌵𑌿𑌶𑍍𑌵𑌕𑌰𑍍𑌮𑌣𑌾 ॥ 22 ॥
𑌵𑌿𑌶𑌾𑌲𑌾 𑌨𑌲𑌿𑌨𑍀 𑌯𑌤𑍍𑌰 𑌪𑍍𑌰𑌭𑍂𑌤𑌕𑌮𑌲𑍋𑌤𑍍𑌪𑌲𑌾 ।
𑌹𑌂𑌸𑌕𑌾𑌰𑌂𑌡𑌵𑌾𑌕𑍀𑌰𑍍𑌣𑌾𑌪𑍍𑌸𑌰𑍋𑌗𑌣𑌸𑍇𑌵𑌿𑌤𑌾 ॥ 23 ॥
𑌤𑌤𑍍𑌰 𑌵𑍈𑌶𑍍𑌰𑌵𑌣𑍋 𑌰𑌾𑌜𑌾 𑌸𑌰𑍍𑌵𑌭𑍂𑌤𑌨𑌮𑌸𑍍𑌕𑍃𑌤𑌃 ।
𑌧𑌨𑌦𑍋 𑌰𑌮𑌤𑍇 𑌶𑍍𑌰𑍀𑌮𑌾𑌨𑍍𑌗𑍁𑌹𑍍𑌯𑌕𑍈𑌸𑍍𑌸𑌹 𑌯𑌕𑍍𑌷𑌰𑌾𑌟𑍍 ॥ 24 ॥
𑌤𑌸𑍍𑌯 𑌚𑌂𑌦𑍍𑌰𑌨𑌿𑌕𑌾𑌶𑍇𑌷𑍁 𑌪𑌰𑍍𑌵𑌤𑍇𑌷𑍁 𑌗𑍁𑌹𑌾𑌸𑍁 𑌚 ।
𑌰𑌾𑌵𑌣𑌃 𑌸𑌹 𑌵𑍈𑌦𑍇𑌹𑍍𑌯𑌾 𑌮𑌾𑌰𑍍𑌗𑌿𑌤𑌵𑍍𑌯𑌸𑍍𑌤𑌤𑌸𑍍𑌤𑌤𑌃 ॥ 25 ॥
𑌕𑍍𑌰𑍌𑌂𑌚𑌂 𑌤𑍁 𑌗𑌿𑌰𑌿𑌮𑌾𑌸𑌾𑌦𑍍𑌯 𑌬𑌿𑌲𑌂 𑌤𑌸𑍍𑌯 𑌸𑍁𑌦𑍁𑌰𑍍𑌗𑌮𑌮𑍍 ।
𑌅𑌪𑍍𑌰𑌮𑌤𑍍𑌤𑍈𑌃 𑌪𑍍𑌰𑌵𑍇𑌷𑍍𑌟𑌵𑍍𑌯𑌂 𑌦𑍁𑌷𑍍𑌪𑍍𑌰𑌵𑍇𑌶𑌂 𑌹𑌿 𑌤𑌤𑍍𑌸𑍍𑌮𑍃𑌤𑌮𑍍 ॥ 26 ॥
𑌵𑌸𑌂𑌤𑌿 𑌹𑌿 𑌮𑌹𑌾𑌤𑍍𑌮𑌾𑌨𑌸𑍍𑌤𑌤𑍍𑌰 𑌸𑍂𑌰𑍍𑌯𑌸𑌮𑌪𑍍𑌰𑌭𑌾𑌃 ।
𑌦𑍇𑌵𑍈𑌰𑌪𑍍𑌯𑌰𑍍𑌚𑌿𑌤𑌾 𑌸𑍍𑌸𑌮𑍍𑌯𑌗𑍍𑌦𑍇𑌵𑌰𑍂𑌪𑌾 𑌮𑌹𑌰𑍍𑌷𑌯𑌃 ॥ 2 ॥
𑌕𑍍𑌰𑍌𑌂𑌚𑌸𑍍𑌯 𑌤𑍁 𑌗𑍁𑌹𑌾𑌶𑍍𑌚𑌾𑌨𑍍𑌯𑌾 𑌸𑍍𑌸𑌾𑌨𑍂𑌨𑌿𑌶𑌿𑌖𑌰𑌾𑌣𑌿 𑌚 ।
𑌨𑌿𑌰𑍍𑌦𑌰𑌾𑌶𑍍𑌚 𑌨𑌿𑌤𑌂𑌬𑌾𑌶𑍍𑌚 𑌵𑌿𑌚𑍇𑌤𑌵𑍍𑌯𑌾 𑌸𑍍𑌤𑌤𑌸𑍍𑌤𑌤𑌃 ॥ 2 ॥
𑌕𑍌𑌂𑌚𑌸𑍍𑌯 𑌶𑌿𑌖𑌰𑌂 𑌚𑌾𑌪𑌿 𑌨𑌿𑌰𑍀𑌕𑍍𑌷𑍍𑌯 𑌚 𑌤𑌤𑌸𑍍𑌤𑌤𑌃 ।
𑌅𑌵𑍃𑌕𑍍𑌷𑌂 𑌕𑌾𑌮𑌶𑍈𑌲𑌂 𑌚 𑌮𑌾𑌨𑌸𑌂 𑌵𑌿𑌹𑌗𑌾𑌲𑌯𑌮𑍍 ।
𑌨 𑌗𑌤𑌿𑌸𑍍𑌤𑌤𑍍𑌰 𑌭𑍂𑌤𑌾𑌨𑌾𑌂 𑌦𑍇𑌵𑌦𑌾𑌨𑌵 𑌰𑌕𑍍𑌷𑌸𑌾𑌮𑍍 ॥ 2 ॥
𑌸 𑌚 𑌸𑌰𑍍𑌵𑍈𑌰𑍍𑌵𑌿𑌚𑍇𑌤𑌵𑍍𑌯𑌸𑍍𑌸𑌸𑌾𑌨𑍁𑌪𑍍𑌰𑌸𑍍𑌥𑌭𑍂𑌧𑌰𑌃 ।
𑌕𑍍𑌰𑍌𑌂𑌚𑌂 𑌗𑌿𑌰𑌿𑌮𑌤𑌿𑌕𑍍𑌰𑌮𑍍𑌯 𑌮𑍈𑌨𑌾𑌕𑍋 𑌨𑌾𑌮 𑌪𑌰𑍍𑌵𑌤𑌃 ॥ 30 ॥
𑌮𑌯𑌸𑍍𑌯 𑌭𑌵𑌨𑌂 𑌯𑌤𑍍𑌰 𑌦𑌾𑌨𑌵𑌸𑍍𑌯 𑌸𑍍𑌵𑌯𑌂 𑌕𑍃𑌤𑌮𑍍 ॥ 31 ॥
𑌮𑍈𑌨𑌾𑌕𑌸𑍍𑌤𑍁 𑌵𑌿𑌚𑍇𑌤𑌵𑍍𑌯 𑌸𑍍𑌸𑌸𑌾𑌨𑍁𑌪𑍍𑌰𑌸𑍍𑌥𑌕𑌂𑌦𑌰𑌃 ।
𑌸𑍍𑌤𑍍𑌰𑍀𑌣𑌾𑌮𑌶𑍍𑌵𑌮𑍁𑌖𑍀𑌨𑌾𑌂 𑌤𑍁 𑌨𑌿𑌕𑍇𑌤𑌾𑌸𑍍𑌤𑌤𑍍𑌰 𑌤𑌤𑍍𑌰 𑌤𑍁 ॥ 32 ॥
𑌤𑌂 𑌦𑍇𑌶𑌂 𑌸𑌮𑌤𑌿𑌕𑍍𑌰𑌮𑍍𑌯 𑌆𑌶𑍍𑌰𑌮𑌂 𑌸𑌿𑌦𑍍𑌧𑌸𑍇𑌵𑌿𑌤𑌮𑍍 ।
𑌸𑌿𑌦𑍍𑌧𑌾 𑌵𑍈𑌖𑌾𑌨𑌸𑌾𑌸𑍍𑌤𑌤𑍍𑌰 𑌵𑌾𑌲𑌖𑌿𑌲𑍍𑌯𑌾𑌶𑍍𑌚 𑌤𑌾𑌪𑌸𑌾𑌃 ॥ 33 ॥
𑌵𑌂𑌦𑍍𑌯𑌾𑌸𑍍𑌤𑍇 𑌤𑍁 𑌤𑌪𑌸𑍍𑌸𑌿𑌦𑍍𑌧𑌾𑌸𑍍𑌤𑌪𑌸𑌾 𑌵𑍀𑌤𑌕𑌲𑍍𑌮𑌷𑌾𑌃 ।
𑌪𑍍𑌰𑌷𑍍𑌟𑌵𑍍𑌯𑌾 𑌚𑌾𑌪𑌿 𑌸𑍀𑌤𑌾𑌯𑌾𑌃 𑌪𑍍𑌰𑌵𑍃𑌤𑍍𑌤𑌿𑌰𑍍𑌵𑌿𑌨𑌯𑌾𑌨𑍍𑌵𑌿𑌤𑍈𑌃 ॥ 34 ॥
𑌹𑍇𑌮𑌪𑍁𑌷𑍍𑌕𑌰𑌸𑌂𑌛𑌨𑍍𑌨𑌂 𑌤𑌸𑍍𑌮𑌿𑌨𑍍 𑌵𑍈𑌖𑌾𑌨𑌸𑌂 𑌸𑌰𑌃 ।
𑌤𑌰𑍁𑌣𑌾𑌦𑌿𑌤𑍍𑌯𑌸𑌂𑌕𑌾𑌶𑍈𑌰𑍍𑌹𑌂𑌸𑍈𑌰𑍍𑌵𑌿𑌚𑌰𑌿𑌤𑌂 𑌶𑍁𑌭𑍈𑌃 ॥ 35 ॥
𑌔𑌪𑌵𑌾𑌹𑍍𑌯𑌃 𑌕𑍁𑌬𑍇𑌰𑌸𑍍𑌯 𑌸𑌾𑌰𑍍𑌵𑌭𑍌𑌮 𑌇𑌤𑌿 𑌸𑍍𑌮𑍃𑌤𑌃 ।
𑌗𑌜𑌃 𑌪𑌰𑍍𑌯𑍇𑌤𑌿 𑌤𑌂 𑌦𑍇𑌶𑌂 𑌸𑌦𑌾 𑌸𑌹 𑌕𑌰𑍇𑌣𑍁𑌭𑌿𑌃 ॥ 36 ॥
𑌤𑌤𑍍𑌸𑌰𑌸𑍍𑌸𑌮𑌤𑌿𑌕𑍍𑌰𑌮𑍍𑌯 𑌨𑌷𑍍𑌟𑌚𑌂𑌦𑍍𑌰𑌦𑌿𑌵𑌾𑌕𑌰𑌮𑍍 ।
𑌅𑌨𑌕𑍍𑌷𑌤𑍍𑌰𑌗𑌣𑌂 𑌵𑍍𑌯𑍋𑌮 𑌨𑌿𑌷𑍍𑌪𑌯𑍋𑌦𑌮𑌨𑌾𑌦𑌿𑌤𑌮𑍍 ॥ 3 ॥
𑌗𑌭𑌸𑍍𑌤𑌿𑌭𑌿𑌰𑌿𑌵𑌾𑌰𑍍𑌕𑌸𑍍𑌯 𑌸 𑌤𑍁 𑌦𑍇𑌶𑌃 𑌪𑍍𑌰𑌕𑌾𑌶𑌤𑍇 ।
𑌵𑌿𑌶𑍍𑌰𑌾𑌮𑍍𑌯𑌦𑍍𑌭𑌿𑌸𑍍𑌤𑌪𑌸𑍍𑌸𑌿𑌦𑍍𑌧𑍈𑌰𑍍𑌦𑍇𑌵𑌕𑌲𑍍𑌪𑍈𑌃 𑌸𑍍𑌵𑌯𑌂𑌪𑍍𑌰𑌭𑍈𑌃 ॥ 3 ॥
𑌤𑌂 𑌤𑍁 𑌦𑍇𑌶𑌮𑌤𑌿𑌕𑍍𑌰𑌮𑍍𑌯 𑌶𑍈𑌲𑍋𑌦𑌾 𑌨𑌾𑌮 𑌨𑌿𑌮𑍍𑌨𑌗𑌾 ।
𑌉𑌭𑌯𑍋𑌸𑍍𑌤𑍀𑌰𑌯𑍋𑌸𑍍𑌤𑌸𑍍𑌯𑌾𑌃 𑌕𑍀𑌚𑌕𑌾 𑌨𑌾𑌮 𑌵𑍇𑌣𑌵𑌃 ॥ 3 ॥
𑌤𑍇 𑌨𑌯𑌂𑌤𑌿 𑌪𑌰𑌂 𑌤𑍀𑌰𑌂 𑌸𑌿𑌦𑍍𑌧𑌾𑌨𑍍𑌪𑍍𑌰𑌤𑍍𑌯𑌾𑌨𑌯𑌂𑌤𑌿 𑌚 ।
𑌉𑌤𑍍𑌤𑌰𑌾𑌃 𑌕𑍁𑌰𑌵𑌸𑍍𑌤𑌤𑍍𑌰 𑌕𑍃𑌤𑌪𑍁𑌣𑍍𑌯𑌪𑍍𑌰𑌤𑌿𑌶𑍍𑌰𑌯𑌾𑌃 ॥ 40 ॥
𑌤𑌤𑌃 𑌕𑌾𑌂𑌚𑌨𑌪𑌦𑍍𑌮𑌾𑌭𑌿𑌃 𑌪𑌦𑍍𑌭𑌿𑌨𑍀𑌭𑌿𑌃 𑌕𑍃𑌤𑍋𑌦𑌕𑌾𑌃 ।
𑌨𑍀𑌲𑌵𑍈𑌡𑍂𑌰𑍍𑌯𑌪𑌤𑍍𑌰𑌾𑌭𑌿𑌰𑍍𑌨𑌦𑍍𑌯𑌸𑍍𑌤𑌤𑍍𑌰 𑌸𑌹𑌸𑍍𑌰𑌶𑌃 ॥ 41 ॥
𑌰𑌕𑍍𑌤𑍋𑌤𑍍𑌪𑌲𑌵𑌨𑍈𑌶𑍍𑌚𑌾𑌤𑍍𑌰 𑌮𑌂𑌡𑌿𑌤𑌾𑌶𑍍𑌚 𑌹𑌿𑌰𑌣𑍍𑌮𑌯𑍈𑌃 ।
𑌤𑌰𑍁𑌣𑌾𑌦𑌿𑌤𑍍𑌯𑌸𑌂𑌕𑌾𑌶𑍈𑌰𑍍𑌭𑌾𑌂𑌤𑌿 𑌤𑌤𑍍𑌰 𑌜𑌲𑌾𑌶𑌯𑌾𑌃 ॥ 42 ॥
𑌮𑌹𑌾𑌰𑍍𑌹𑌮𑌣𑌿𑌰𑌤𑍍𑌨𑍈𑌶𑍍𑌚 𑌕𑌾𑌂𑌚𑌨𑌪𑍍𑌰𑌭𑌕𑍇𑌸𑌰𑍈𑌃 ।
𑌨𑌿𑌲𑍋𑌤𑍍𑌪𑌲𑌵𑌨𑍈𑌶𑍍𑌚𑌿𑌤𑍍𑌰𑍈 𑌸𑍍𑌸 𑌦𑍇𑌶 𑌸𑍍𑌸𑌰𑍍𑌵𑌤𑍋 𑌵𑍃𑌤𑌃 ॥ 43 ॥
𑌨𑌿𑌸𑍍𑌤𑍁𑌲𑌾𑌭𑌿𑌶𑍍𑌚 𑌮𑍁𑌕𑍍𑌤𑌾𑌭𑌿𑌰𑍍𑌮𑌣𑌿𑌭𑌿𑌶𑍍𑌚 𑌮𑌹𑌾𑌧𑌨𑍈𑌃 ।
𑌉𑌦𑍍𑌭𑍂𑌤𑌪𑍁𑌲𑌿𑌨𑌾𑌸𑍍𑌤𑌤𑍍𑌰 𑌜𑌾𑌤𑌰𑍂𑌪𑍈𑌶𑍍𑌚 𑌨𑌿𑌮𑍍𑌨𑌗𑌾𑌃 ।
𑌸𑌰𑍍𑌵𑌰𑌤𑍍𑌨𑌮𑌯𑍈𑌶𑍍𑌚𑌿𑌤𑍍𑌰𑍈𑌰𑌵𑌗𑌾𑌢𑌾 𑌨𑌗𑍋𑌤𑍍𑌤𑌮𑍈𑌃 ॥ 44 ॥
𑌜𑌾𑌤𑌰𑍂𑌪𑌮𑌯𑍈𑌶𑍍𑌚𑌾𑌪𑌿 𑌹𑍁𑌤𑌾𑌶𑌨𑌸𑌮𑌪𑍍𑌰𑌭𑍈𑌃 ।
𑌨𑌿𑌤𑍍𑌯𑌪𑍁𑌷𑍍𑌪𑌫𑌲𑌾𑌸𑍍𑌤𑌤𑍍𑌰 𑌨𑌗𑌾𑌃 𑌪𑌤𑍍𑌤𑍍𑌰𑌰𑌥𑌾𑌕𑍁𑌲𑌾𑌃 ॥ 45 ॥
𑌦𑌿𑌵𑍍𑌯𑌗𑌂𑌧𑌰𑌸𑌸𑍍𑌪𑌰𑍍𑌶𑌾𑌃 𑌸𑌰𑍍𑌵𑌾𑌨𑍍𑌕𑌾𑌮𑌾𑌨𑍍 𑌸𑍍𑌰𑌵𑌂𑌤𑌿 𑌚 ।
𑌨𑌾𑌨𑌾𑌕𑌾𑌰𑌾𑌣𑌿 𑌵𑌾𑌸𑌾𑌂𑌸𑌿 𑌫𑌲𑌂𑌤𑍍𑌯𑌨𑍍𑌯𑍇 𑌨𑌗𑍋𑌤𑍍𑌤𑌮𑌾𑌃 ॥ 46 ॥
𑌮𑍁𑌕𑍍𑌤𑌾 𑌵𑍈𑌢𑍂𑌰𑍍𑌯𑌚𑌿𑌤𑍍𑌰𑌾𑌣𑌿 𑌭𑍂𑌷𑌣𑌾𑌨𑌿 𑌤𑌥𑍈𑌵 𑌚 ।
𑌸𑍍𑌤𑍍𑌰𑍀𑌣𑌾𑌂 𑌚𑌾𑌪𑍍𑌯𑌨𑍁𑌰𑍂𑌪𑌾𑌣𑌿 𑌪𑍁𑌰𑍁𑌷𑌾𑌣𑌾𑌂 𑌤𑌥𑍈𑌵 𑌚 ॥ 4 ॥
𑌸𑌰𑍍𑌵𑌰𑍍𑌤𑍁𑌸𑍁𑌖 𑌸𑍇𑌵𑍍𑌯𑌾𑌨𑌿 𑌫𑌲𑌂𑌤𑍍𑌯𑌨𑍍𑌯𑍇 𑌨𑌗𑍋𑌤𑍍𑌤𑌮𑌾𑌃 ।
𑌮𑌹𑌾𑌰𑍍𑌹𑌾𑌣𑌿 𑌵𑌿𑌚𑌿𑌤𑍍𑌰𑌾𑌣𑌿 𑌹𑍈𑌮𑌾𑌨𑍍𑌯𑌨𑍍𑌯𑍇 𑌨𑌗𑍋𑌤𑍍𑌤𑌮𑌾𑌃 ॥ 4 ॥
𑌶𑌯𑌨𑌾𑌨𑌿 𑌪𑍍𑌰𑌸𑍂𑌯𑌂𑌤𑍇 𑌚𑌿𑌤𑍍𑌰𑌾𑌸𑍍𑌤𑌰𑌣𑌵𑌂𑌤𑌿 𑌚 ।
𑌮𑌨𑌃𑌕𑌾𑌂𑌤𑌾𑌨𑌿 𑌮𑌾𑌲𑍍𑌯𑌾𑌨𑌿 𑌫𑌲𑌂𑌤𑍍𑌯𑌤𑍍𑌰𑌾𑌪𑌰𑍇 𑌦𑍍𑌰𑍁𑌮𑌾𑌃 ॥ 4 ॥
𑌪𑌾𑌨𑌾𑌨𑌿 𑌚 𑌮𑌹𑌾𑌰𑍍𑌹𑌾𑌣𑌿 𑌭𑌕𑍍𑌷𑍍𑌯𑌾𑌣𑌿 𑌵𑌿𑌵𑌿𑌧𑌾𑌨𑌿 𑌚 ।
𑌸𑍍𑌤𑍍𑌰𑌿𑌯𑌶𑍍𑌚 𑌗𑍁𑌣𑌸𑌂𑌪𑌨𑍍𑌨𑌾 𑌰𑍂𑌪𑌯𑍌𑌵𑌨𑌲𑌕𑍍𑌷𑌿𑌤𑌾𑌃 ॥ 50 ॥
𑌗𑌂𑌧𑌰𑍍𑌵𑌾𑌃 𑌕𑌿𑌨𑍍𑌨𑌰𑌾𑌸𑍍𑌸𑌿𑌦𑍍𑌧𑌾 𑌨𑌾𑌗𑌾 𑌵𑌿𑌦𑍍𑌯𑌾𑌧𑌰𑌾𑌸𑍍𑌤𑌥𑌾 ।
𑌰𑌮𑌂𑌤𑍇 𑌸𑌤𑌤𑌂 𑌸𑍍𑌤𑌤𑍍𑌰 𑌨𑌾𑌰𑍀𑌭𑌿𑌰𑍍𑌭𑌾𑌸𑍍𑌕𑌰𑌪𑍍𑌰𑌭𑌾𑌃 ॥ 51 ॥
𑌸𑌰𑍍𑌵𑍇 𑌸𑍁𑌕𑍃𑌤𑌕𑌰𑍍𑌮𑌾𑌣 𑌸𑍍𑌸𑌰𑍍𑌵𑍇 𑌰𑌤𑌿𑌪𑌰𑌾𑌯𑌣𑌾𑌃 ।
𑌸𑌰𑍍𑌵𑍇 𑌕𑌾𑌮𑌾𑌰𑍍𑌥𑌸𑌹𑌿𑌤𑌾 𑌵𑌸𑌂𑌤𑌿 𑌸𑌹𑌯𑍋𑌷𑌿𑌤𑌃 ॥ 52 ॥
𑌗𑍀𑌤𑌵𑌾𑌦𑌿𑌤𑍍𑌰𑌨𑌿𑌰𑍍𑌘𑍋𑌷 𑌸𑍍𑌸𑍋𑌤𑍍𑌕𑍃𑌷𑍍𑌟𑌹𑌸𑌿𑌤𑌸𑍍𑌵𑌨𑌃 ।
𑌶𑍍𑌰𑍂𑌯𑌤𑍇 𑌸𑌤𑌤𑌂 𑌤𑌤𑍍𑌰 𑌸𑌰𑍍𑌵𑌭𑍂𑌤𑌮𑌨𑍋𑌹𑌰𑌃 ॥ 53 ॥
𑌤𑌤𑍍𑌰 𑌨𑌾𑌮𑍁𑌦𑌿𑌤𑌃 𑌕𑌶𑍍𑌚𑌿𑌨𑍍𑌨𑌾𑌸𑍍𑌤𑌿 𑌕𑌶𑍍𑌚𑌿𑌦𑌸𑌤𑍍𑌪𑍍𑌰𑌿𑌯𑌃 ।
𑌅𑌹𑌨𑍍𑌯𑌹𑌨𑌿 𑌵𑌰𑍍𑌧𑌂𑌤𑍇 𑌗𑍁𑌣𑌾𑌸𑍍𑌤𑌤𑍍𑌰 𑌮𑌨𑍋𑌰𑌮𑌾𑌃 ॥ 54 ॥
𑌸𑌮𑌤𑌿𑌕𑍍𑌰𑌮𑍍𑌯 𑌤𑌂 𑌦𑍇𑌶𑌮𑍁𑌤𑍍𑌤𑌰𑌃 𑌪𑌯𑌸𑌾𑌂 𑌨𑌿𑌧𑌿𑌃 ।
𑌤𑌤𑍍𑌰 𑌸𑍋𑌮𑌗𑌿𑌰𑌿𑌰𑍍𑌨𑌾𑌮 𑌮𑌧𑍍𑌯𑍇 𑌹𑍇𑌮𑌮𑌯𑍋 𑌮𑌹𑌾𑌨𑍍 ॥ 55 ॥
𑌇𑌂𑌦𑍍𑌰𑌲𑍋𑌕𑌗𑌤𑌾 𑌯𑍇 𑌚 𑌬𑍍𑌰𑌹𑍍𑌮𑌲𑍋𑌕𑌗𑌤𑌾𑌶𑍍𑌚 𑌯𑍇 ।
𑌦𑍇𑌵𑌾𑌸𑍍𑌤𑌂 𑌸𑌮𑌵𑍇𑌕𑍍𑌷𑌂𑌤𑍇 𑌗𑌿𑌰𑌿𑌰𑌾𑌜𑌂 𑌦𑌿𑌵𑌂 𑌗𑌤𑌾𑌃 ॥ 56 ॥
𑌸 𑌤𑍁 𑌦𑍇𑌶𑍋 𑌵𑌿𑌸𑍂𑌰𑍍𑌯𑍋𑌽𑌪𑌿 𑌤𑌸𑍍𑌯 𑌭𑌾𑌸𑌾 𑌪𑍍𑌰𑌕𑌾𑌶𑌤𑍇 ।
𑌸𑍂𑌰𑍍𑌯𑌲𑌕𑍍𑌷𑍍𑌮𑍍𑌯𑌾𑌽𑌭𑌿𑌵𑌿𑌜𑍍𑌞𑍇𑌯𑌸𑍍𑌤𑌪𑌤𑍇𑌵 𑌵𑌿𑌵𑌸𑍍𑌵𑌤𑌾 ॥ 5 ॥
𑌭𑌗𑌵𑌾𑌨𑌪𑌿 𑌵𑌿𑌶𑍍𑌵𑌾𑌤𑍍𑌮𑌾 𑌶𑌂𑌭𑍁𑌰𑍇𑌕𑌾𑌦𑌶𑌾𑌤𑍍𑌮𑌕𑌃 ।
𑌬𑍍𑌰𑌹𑍍𑌮𑌾 𑌵𑌸𑌤𑌿 𑌦𑍇𑌵𑍇𑌶𑍋 𑌬𑍍𑌰𑌹𑍍𑌮𑌰𑍍𑌷𑌿𑌪𑌰𑌿𑌵𑌾𑌰𑌿𑌤𑌃 ॥ 5 ॥
𑌨 𑌕𑌥𑌂𑌚𑌨 𑌗𑌂𑌤𑌵𑍍𑌯𑌂 𑌕𑍁𑌰𑍂𑌣𑌾𑌮𑍁𑌤𑍍𑌤𑌰𑍇𑌣 𑌵𑌃 ।
𑌅𑌨𑍍𑌯𑍇𑌷𑌾𑌮𑌪𑌿 𑌭𑍂𑌤𑌾𑌨𑌾𑌂 𑌨𑌾𑌤𑌿𑌕𑍍𑌰𑌾𑌮𑌤𑌿 𑌵𑍈 𑌗𑌤𑌿𑌃 ॥ 5 ॥
𑌸 𑌹𑌿 𑌸𑍋𑌮𑌗𑌿𑌰𑌿𑌰𑍍𑌨𑌾𑌮 𑌦𑍇𑌵𑌾𑌨𑌾𑌮𑌪𑌿 𑌦𑍁𑌰𑍍𑌗𑌮𑌃 ।
𑌤𑌮𑌾𑌲𑍋𑌕𑍍𑌯 𑌤𑌤𑌃 𑌕𑍍𑌷𑌿𑌪𑍍𑌰𑌮𑍁𑌪𑌾𑌵𑌰𑍍𑌤𑌿𑌤𑍁𑌮𑌰𑍍𑌹𑌥 ॥ 60 ॥
𑌏𑌤𑌾𑌵𑌦𑍍𑌵𑌾𑌨𑌰𑍈𑌶𑍍𑌶𑌕𑍍𑌯𑌂 𑌗𑌂𑌤𑍁𑌂 𑌵𑌾𑌨𑌰𑌪𑍁𑌂𑌗𑌵𑌾𑌃 ।
𑌅𑌭𑌾𑌸𑍍𑌕𑌰𑌮𑌮𑌰𑍍𑌯𑌾𑌦𑌂 𑌨 𑌜𑌾𑌨𑍀𑌮𑌸𑍍𑌤𑌤𑌃 𑌪𑌰𑌮𑍍 ॥ 61 ॥
𑌸𑌰𑍍𑌵𑌮𑍇𑌤𑌦𑍍𑌵𑌿𑌚𑍇𑌤𑌵𑍍𑌯𑌂 𑌯𑌨𑍍𑌮𑌯𑌾 𑌪𑌰𑌿𑌕𑍀𑌰𑍍𑌤𑌿𑌤𑌮𑍍 ।
𑌯𑌦𑌨𑍍𑌯𑌦𑌪𑌿 𑌨𑍋𑌕𑍍𑌤𑌂 𑌚 𑌤𑌤𑍍𑌰𑌾𑌪𑌿 𑌕𑍍𑌰𑌿𑌯𑌤𑌾𑌂 𑌮𑌤𑌿𑌃 ॥ 62 ॥
𑌤𑌤𑌃 𑌕𑍃𑌤𑌂 𑌦𑌾𑌶𑌰𑌥𑍇𑌰𑍍𑌮𑌹𑌤𑍍𑌪𑍍𑌰𑌿𑌯𑌂 𑌮𑌹𑌤𑍍𑌤𑌰𑌂 𑌚𑌾𑌪𑌿 𑌤𑌤𑍋 𑌮𑌮 𑌪𑍍𑌰𑌿𑌯𑌮𑍍 ।
𑌕𑍃𑌤𑌂 𑌭𑌵𑌿𑌷𑍍𑌯𑌤𑍍𑌯𑌨𑌿𑌲𑌾𑌨𑌲𑍋𑌪𑌮𑌾 𑌵𑌿𑌦𑍇𑌹𑌜𑌾𑌦𑌰𑍍𑌶𑌨𑌜𑍇𑌨 𑌕𑌰𑍍𑌮𑌣𑌾 ॥ 63 ॥
𑌤𑌤𑌃 𑌕𑍃𑌤𑌾𑌰𑍍𑌥𑌾𑌃 𑌸𑌹𑌿𑌤𑌾𑌸𑍍𑌸𑌬𑌾𑌂𑌧𑌵𑌾𑌃 𑌮𑌯𑌾𑌽𑌰𑍍𑌚𑌿𑌤𑌾𑌸𑍍𑌸𑌰𑍍𑌵𑌗𑍁𑌣𑍈𑌰𑍍𑌮𑌨𑍋𑌰𑌮𑍈𑌃 ।
𑌚𑌰𑌿𑌷𑍍𑌯𑌥𑍋𑌰𑍍𑌵𑍀𑌂 𑌪𑍍𑌰𑌤𑌿 𑌶𑌾𑌂𑌤𑌶𑌤𑍍𑌰𑌵 𑌸𑍍𑌸𑌹𑌪𑍍𑌰𑌿𑌯𑌾 𑌭𑍂𑌤𑌧𑌰𑌾𑌃 𑌪𑍍𑌲𑌵𑌂𑌗𑌮𑌾𑌃 ॥ 64 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌤𑍍𑌰𑌿𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
