𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌿𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।
𑌶𑍁𑌨𑌶𑍍𑌶𑍇𑌫𑌂 𑌨𑌰𑌶𑍍𑌰𑍇𑌷𑍍𑌠 𑌗𑍃𑌹𑍀𑌤𑍍𑌵𑌾 𑌤𑍁 𑌮𑌹𑌾𑌯𑌶𑌾𑌃 ।
𑌵𑍍𑌯𑌶𑍍𑌰𑌾𑌮𑍍𑌯𑌤𑍍 𑌪𑍁𑌷𑍍𑌕𑌰𑍇 𑌰𑌾𑌜𑌾 𑌮𑌧𑍍𑌯𑌾𑌹𑍍𑌨𑍇 𑌰𑌘𑍁𑌨𑌂𑌦𑌨 ॥ 1 ॥
𑌤𑌸𑍍𑌯 𑌵𑌿𑌶𑍍𑌰𑌮𑌮𑌾𑌣𑌸𑍍𑌯 𑌶𑍁𑌨𑌶𑍍𑌶𑍇𑌫𑍋 𑌮𑌹𑌾𑌯𑌶𑌾𑌃 ।
𑌪𑍁𑌷𑍍𑌕𑌰𑌕𑍍𑌷𑍇𑌤𑍍𑌰𑌮𑌾𑌗𑌮𑍍𑌯 𑌵𑌿𑌶𑍍𑌵𑌾𑌮𑌿𑌤𑍍𑌰𑌂 𑌦𑌦𑌰𑍍𑌶 𑌹 ॥ 2 ॥
𑌤𑌪𑍍𑌯𑌂𑌤𑌮𑍃𑌷𑌿𑌭𑌿𑌸𑍍𑌸𑌾𑌰𑍍𑌧𑌂 𑌮𑌾𑌤𑍁𑌲𑌂 𑌪𑌰𑌮𑌾𑌤𑍁𑌰𑌃 ।
𑌵𑌿𑌵𑌰𑍍𑌣𑌵𑌦𑌨𑍋 𑌦𑍀𑌨𑌸𑍍𑌤𑍃𑌷𑍍𑌣𑌯𑌾 𑌚 𑌶𑍍𑌰𑌮𑍇𑌣 𑌚 ॥ 3 ॥
𑌪𑌪𑌾𑌤𑌾𑌂𑌕𑍇 𑌮𑍁𑌨𑍇𑌰𑌾𑌶𑍁 𑌵𑌾𑌕𑍍𑌯𑌂 𑌚𑍇𑌦𑌮𑍁𑌵𑌾𑌚 𑌹 ।
𑌨 𑌮𑍇𑌽𑌸𑍍𑌤𑌿 𑌮𑌾𑌤𑌾 𑌨 𑌪𑌿𑌤𑌾 𑌜𑍍𑌞𑌾𑌤𑌯𑍋 𑌬𑌾𑌂𑌧𑌵𑌾𑌃 𑌕𑍁𑌤𑌃 ॥ 4 ॥
𑌤𑍍𑌰𑌾𑌤𑍁𑌮𑌰𑍍𑌹𑌸𑌿 𑌮𑌾𑌂 𑌸𑍌𑌮𑍍𑌯 𑌧𑌰𑍍𑌮𑍇𑌣 𑌮𑍁𑌨𑌿𑌪𑍁𑌂𑌗𑌵 ।
𑌤𑍍𑌰𑌾𑌤𑌾 𑌤𑍍𑌵𑌂 𑌹𑌿 𑌮𑍁𑌨𑌿𑌶𑍍𑌰𑍇𑌷𑍍𑌠 𑌸𑌰𑍍𑌵𑍇𑌷𑌾𑌂 𑌤𑍍𑌵𑌂 𑌹𑌿 𑌭𑌾𑌵𑌨𑌃 ॥ 5 ॥
𑌰𑌾𑌜𑌾 𑌚 𑌕𑍃𑌤𑌕𑌾𑌰𑍍𑌯𑌸𑍍𑌸𑍍𑌯𑌾𑌦𑌹𑌂 𑌦𑍀𑌰𑍍𑌘𑌾𑌯𑍁𑌰𑌵𑍍𑌯𑌯𑌃 ।
𑌸𑍍𑌵𑌰𑍍𑌗𑌲𑍋𑌕𑌮𑍁𑌪𑌾𑌶𑍍𑌨𑍀𑌯𑌾𑌂 𑌤𑌪𑌸𑍍𑌤𑌪𑍍𑌤𑍍𑌵𑌾𑌹𑍍𑌯𑌨𑍁𑌤𑍍𑌤𑌮𑌮𑍍 ॥ 6 ॥
𑌤𑍍𑌵𑌂 𑌮𑍇 𑌨𑌾𑌥𑍋 𑌹𑍍𑌯𑌨𑌾𑌥𑌸𑍍𑌯 𑌭𑌵 𑌭𑌵𑍍𑌯𑍇𑌨 𑌚𑍇𑌤𑌸𑌾 ।
𑌪𑌿𑌤𑍇𑌵 𑌪𑍁𑌤𑍍𑌰𑌂 𑌧𑌰𑍍𑌮𑌾𑌤𑍍𑌮𑌂 𑌸𑍍𑌤𑍍𑌰𑌾𑌤𑍁𑌮𑌰𑍍𑌹𑌸𑌿 𑌕𑌿𑌲𑍍𑌬𑌿𑌷𑌾𑌤𑍍 ॥ ॥
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌤𑌪𑌾𑌃 ।
𑌸𑌾𑌂𑌤𑍍𑌵𑌯𑌿𑌤𑍍𑌵𑌾 𑌬𑌹𑍁𑌵𑌿𑌧𑌂 𑌪𑍁𑌤𑍍𑌰𑌾𑌨𑌿𑌦𑌮𑍁𑌵𑌾𑌚 𑌹 ॥ ॥
𑌯𑌤𑍍𑌕𑍃𑌤𑍇 𑌪𑌿𑌤𑌰𑌃 𑌪𑍁𑌤𑍍𑌰𑌾𑌨𑍍 𑌜𑌨𑌯𑌂𑌤𑌿 𑌶𑍁𑌭𑌾𑌰𑍍𑌥𑌿𑌨𑌃 ।
𑌪𑌰𑌲𑍋𑌕𑌹𑌿𑌤𑌾𑌰𑍍𑌥𑌾𑌯 𑌤𑌸𑍍𑌯 𑌕𑌾𑌲𑍋𑌽𑌯𑌮𑌾𑌗𑌤𑌃 ॥ ॥
𑌅𑌯𑌂 𑌮𑍁𑌨𑌿𑌸𑍁𑌤𑍋 𑌬𑌾𑌲𑍋 𑌮𑌤𑍍𑌤𑌶𑍍𑌶𑌰𑌣𑌮𑌿𑌚𑍍𑌛𑌤𑌿 ।
𑌅𑌸𑍍𑌯 𑌜𑍀𑌵𑌿𑌤𑌮𑌾𑌤𑍍𑌰𑍇𑌣 𑌪𑍍𑌰𑌿𑌯𑌂 𑌕𑍁𑌰𑍁𑌤 𑌪𑍁𑌤𑍍𑌰𑌕𑌾𑌃 ॥ 10 ॥
𑌸𑌰𑍍𑌵𑍇 𑌸𑍁𑌕𑍃𑌤𑌕𑌰𑍍𑌮𑌾𑌣𑌸𑍍𑌸𑌰𑍍𑌵𑍇 𑌧𑌰𑍍𑌮𑌪𑌰𑌾𑌯𑌣𑌾𑌃 ।
𑌪𑌶𑍁𑌭𑍂𑌤𑌾 𑌨𑌰𑍇𑌂𑌦𑍍𑌰𑌸𑍍𑌯 𑌤𑍃𑌪𑍍𑌤𑌿𑌮𑌗𑍍𑌨𑍇𑌃 𑌪𑍍𑌰𑌯𑌚𑍍𑌛𑌤 ॥ 11 ॥
𑌨𑌾𑌥𑌵𑌾𑌂𑌶𑍍𑌚 𑌶𑍁𑌨𑌶𑍍𑌶𑍇𑌫𑍋 𑌯𑌜𑍍𑌞𑌶𑍍𑌚𑌾𑌵𑌿𑌘𑍍𑌨𑌿𑌤𑍋 𑌭𑌵𑍇𑌤𑍍 ।
𑌦𑍇𑌵𑌤𑌾𑌸𑍍𑌤𑌰𑍍𑌪𑌿𑌤𑌾𑌶𑍍𑌚𑌸𑍍𑌯𑍁𑌰𑍍𑌮𑌮 𑌚𑌾𑌪𑌿 𑌕𑍃𑌤𑌂 𑌵𑌚𑌃 ॥ 12 ॥
𑌮𑍁𑌨𑍇𑌸𑍍𑌤𑍁 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌮𑌧𑍁𑌚𑍍𑌛𑌂𑌦𑌾𑌦𑌯 𑌸𑍍𑌸𑍁𑌤𑌾𑌃 ।
𑌸𑌾𑌭𑌿𑌮𑌾𑌨𑌂 𑌨𑌰𑌶𑍍𑌰𑍇𑌷𑍍𑌠 𑌸𑌲𑍀𑌲𑌮𑌿𑌦𑌮𑌬𑍍𑌰𑍁𑌵𑌨𑍍 ॥ 13 ॥
𑌕𑌥𑌮𑌾𑌤𑍍𑌮𑌸𑍁𑌤𑌾𑌨𑍍 𑌹𑌿𑌤𑍍𑌵𑌾 𑌤𑍍𑌰𑌾𑌯𑌸𑍇𑌽𑌨𑍍𑌯𑌸𑍁𑌤𑌂 𑌵𑌿𑌭𑍋 ।
𑌅𑌕𑌾𑌰𑍍𑌯𑌮𑌿𑌵 𑌪𑌶𑍍𑌯𑌾𑌮 𑌶𑍍𑌶𑍍𑌵𑌮𑌾𑌂𑌸 𑌇𑌵 𑌭𑍋𑌜𑌨𑍇 ॥ 14 ॥
𑌤𑍇𑌷𑌾𑌂 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌪𑍁𑌤𑍍𑌰𑌾𑌣𑌾𑌂 𑌮𑍁𑌨𑌿𑌪𑍁𑌂𑌗𑌵𑌃 ।
𑌕𑍍𑌰𑍋𑌧𑌸𑌂𑌰𑌕𑍍𑌤𑌨𑌯𑌨𑍋 𑌵𑍍𑌯𑌾𑌹𑌰𑍍𑌤𑍁𑌮𑍁𑌪𑌚𑌕𑍍𑌰𑌮𑍇 ॥ 15 ॥
𑌨𑌿𑌸𑍍𑌸𑌾𑌧𑍍𑌵𑌸𑌮𑌿𑌦𑌂 𑌪𑍍𑌰𑍋𑌕𑍍𑌤𑌂 𑌧𑌰𑍍𑌮𑌾𑌦𑌪𑌿 𑌵𑌿𑌗𑌰𑍍𑌹𑌿𑌤𑌮𑍍 ।
𑌅𑌤𑌿𑌕𑍍𑌰𑌮𑍍𑌯 𑌤𑍁 𑌮𑌦𑍍𑌵𑌾𑌕𑍍𑌯𑌂 𑌦𑌾𑌰𑍁𑌣𑌂 𑌰𑍋𑌮𑌹𑌰𑍍𑌷𑌣𑌮𑍍 ॥ 16 ॥
𑌶𑍍𑌵𑌮𑌾𑌂𑌸𑌭𑍋𑌜𑌿𑌨𑌸𑍍𑌸𑌰𑍍𑌵𑍇 𑌵𑌾𑌸𑌿𑌷𑍍𑌠𑌾 𑌇𑌵 𑌜𑌾𑌤𑌿𑌷𑍁 ।
𑌪𑍂𑌰𑍍𑌣𑌂 𑌵𑌰𑍍𑌷𑌸𑌹𑌸𑍍𑌰𑌂 𑌤𑍁 𑌪𑍃𑌥𑌿𑌵𑍍𑌯𑌾𑌮𑌨𑍁𑌵𑌤𑍍𑌸𑍍𑌯𑌥 ॥ 1 ॥
𑌕𑍃𑌤𑍍𑌵𑌾 𑌶𑌾𑌪𑌸𑌮𑌾𑌯𑍁𑌕𑍍𑌤𑌾𑌨𑍍 𑌪𑍁𑌤𑍍𑌰𑌾𑌨𑍍 𑌮𑍁𑌨𑌿𑌵𑌰𑌸𑍍𑌤𑌥𑌾 ।
𑌶𑍁𑌨𑌶𑍍𑌶𑍇𑌫𑌮𑍁𑌵𑌾𑌚𑌾𑌰𑍍𑌤𑌂 𑌕𑍃𑌤𑍍𑌵𑌾 𑌰𑌕𑍍𑌷𑌾𑌂 𑌨𑌿𑌰𑌾𑌮𑌯𑌮𑍍 ॥ 1 ॥
𑌪𑌵𑌿𑌤𑍍𑌰𑌪𑌾𑌶𑍈𑌰𑌾𑌸𑌕𑍍𑌤𑍋 𑌰𑌕𑍍𑌤𑌮𑌾𑌲𑍍𑌯𑌾𑌨𑍁𑌲𑍇𑌪𑌨𑌃 ।
𑌵𑍈𑌷𑍍𑌣𑌵𑌂 𑌯𑍂𑌪𑌮𑌾𑌸𑌾𑌦𑍍𑌯 𑌵𑌾𑌗𑍍𑌭𑌿𑌰𑌗𑍍𑌨𑌿𑌮𑍁𑌦𑌾𑌹𑌰 ॥ 1 ॥
𑌇𑌮𑍇 𑌤𑍁 𑌗𑌾𑌥𑍇 𑌦𑍍𑌵𑍇 𑌦𑌿𑌵𑍍𑌯𑍇 𑌗𑌾𑌯𑍇𑌥𑌾 𑌮𑍁𑌨𑌿𑌪𑍁𑌤𑍍𑌰𑌕 ।
𑌅𑌂𑌬𑌰𑍀𑌷𑌸𑍍𑌯 𑌯𑌜𑍍𑌞𑍇𑌽𑌸𑍍𑌮𑌿𑌂𑌸𑍍𑌤𑌤 𑌸𑍍𑌸𑌿𑌦𑍍𑌧𑌿𑌮𑌵𑌾𑌪𑍍𑌸𑍍𑌯𑌸𑌿 ॥ 20 ॥
𑌶𑍁𑌨𑌶𑍍𑌶𑍇𑌫𑍋 𑌗𑍃𑌹𑍀𑌤𑍍𑌵𑌾 𑌤𑍇 𑌦𑍍𑌵𑍇 𑌗𑌾𑌥𑍇 𑌸𑍁𑌸𑌮𑌾𑌹𑌿𑌤𑌃 ।
𑌤𑍍𑌵𑌰𑌯𑌾 𑌰𑌾𑌜𑌸𑌿𑌂𑌹𑌂 𑌤𑌮𑌂𑌬𑌰𑍀𑌷𑌮𑍁𑌵𑌾𑌚 𑌹 ॥ 21 ॥
𑌰𑌾𑌜𑌸𑌿𑌂𑌹 𑌮𑌹𑌾𑌸𑌤𑍍𑌤𑍍𑌵 𑌶𑍀𑌘𑍍𑌰𑌂 𑌗𑌚𑍍𑌛𑌾𑌵𑌹𑍇 𑌸𑌦𑌃 ।
𑌨𑌿𑌰𑍍𑌵𑌰𑍍𑌤𑌯𑌸𑍍𑌵 𑌰𑌾𑌜𑍇𑌂𑌦𑍍𑌰 𑌦𑍀𑌕𑍍𑌷𑌾𑌂 𑌚 𑌸𑌮𑍁𑌪𑌾𑌵𑌿𑌶 ॥ 22 ॥
𑌤𑌦𑍍𑌵𑌾𑌕𑍍𑌯𑌮𑍃𑌷𑌿𑌪𑍁𑌤𑍍𑌰𑌸𑍍𑌯 𑌶𑍍𑌰𑍁𑌤𑍍𑌵𑌾 𑌹𑌰𑍍𑌷𑌸𑌮𑍁𑌤𑍍𑌸𑍁𑌕𑌃 ।
𑌜𑌗𑌾𑌮 𑌨𑍃𑌪𑌤𑌿 𑌶𑍍𑌶𑍀𑌘𑍍𑌰𑌂 𑌯𑌜𑍍𑌞𑌵𑌾𑌟𑌮𑌤𑌂𑌦𑍍𑌰𑌿𑌤𑌃 ॥ 23 ॥
𑌸𑌦𑌸𑍍𑌯𑌾𑌨𑍁𑌮𑌤𑍇 𑌰𑌾𑌜𑌾 𑌪𑌵𑌿𑌤𑍍𑌰𑌕𑍃𑌤𑌲𑌕𑍍𑌷𑌣𑌮𑍍 ।
𑌪𑌶𑍁𑌂 𑌰𑌕𑍍𑌤𑌾𑌂𑌬𑌰𑌂 𑌕𑍃𑌤𑍍𑌵𑌾 𑌯𑍂𑌪𑍇 𑌤𑌂 𑌸𑌮𑌬𑌂𑌧𑌯𑌤𑍍 ॥ 24 ॥
𑌸𑌬𑌦𑍍𑌧𑍋 𑌵𑌾𑌗𑍍𑌭𑌿𑌰𑌗𑍍𑌯𑍍𑌰𑌾𑌭𑌿𑌰𑌭𑌿𑌤𑍁𑌷𑍍𑌟𑌾𑌵 𑌵𑍈 𑌸𑍁𑌰𑍌 ।
𑌇𑌂𑌦𑍍𑌰𑌮𑌿𑌂𑌦𑍍𑌰𑌾𑌨𑍁𑌜𑌂 𑌚𑍈𑌵 𑌯𑌥𑌾𑌵𑌨𑍍𑌮𑍁𑌨𑌿𑌪𑍁𑌤𑍍𑌰𑌕𑌃 ॥ 25 ॥
𑌤𑌤𑌃 𑌪𑍍𑌰𑍀𑌤 𑌸𑍍𑌸𑌹𑌸𑍍𑌰𑌾𑌕𑍍𑌷𑍋 𑌰𑌹𑌸𑍍𑌯𑌸𑍍𑌤𑍁𑌤𑌿𑌤𑌰𑍍𑌪𑌿𑌤𑌃 ।
𑌦𑍀𑌰𑍍𑌘𑌮𑌾𑌯𑍁𑌸𑍍𑌤𑌦𑌾 𑌪𑍍𑌰𑌾𑌦𑌾𑌚𑍍𑌛𑍁𑌨𑌶𑍍𑌶𑍇𑌫𑌾𑌯 𑌰𑌾𑌘𑌵 ॥ 26 ॥
𑌸 𑌚 𑌰𑌾𑌜𑌾 𑌨𑌰𑌶𑍍𑌰𑍇𑌷𑍍𑌠 𑌯𑌜𑍍𑌞𑌸𑍍𑌯 𑌚 𑌸𑌮𑌾𑌪𑍍𑌤𑌵𑌾𑌨𑍍 ।
𑌫𑌲𑌂 𑌬𑌹𑍁𑌗𑍁𑌣𑌂 𑌰𑌾𑌮 𑌸𑌹𑌸𑍍𑌰𑌾𑌕𑍍𑌷𑌪𑍍𑌰𑌸𑌾𑌦𑌜𑌮𑍍 ॥ 2 ॥
𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌽𑌪𑌿 𑌧𑌰𑍍𑌮𑌾𑌤𑍍𑌮𑌾 𑌭𑍂𑌯𑌸𑍍𑌤𑍇𑌪𑍇 𑌮𑌹𑌾𑌤𑌪𑌾𑌃 ।
𑌪𑍁𑌷𑍍𑌕𑌰𑍇𑌷𑍁 𑌨𑌰𑌶𑍍𑌰𑍇𑌷𑍍𑌠 𑌦𑌶𑌵𑌰𑍍𑌷𑌶𑌤𑌾𑌨𑌿 𑌚 ॥ 2 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌦𑍍𑌵𑌿𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥
