𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌤𑌤𑍋 𑌰𑌾𑌤𑍍𑌰𑍍𑌯𑌾𑌂 𑌵𑍍𑌯𑌤𑍀𑌤𑌾𑌯𑌾𑌂 𑌸𑍋𑌪𑌾𑌧𑍍𑌯𑌾𑌯𑌃 𑌸𑌬𑌾𑌂𑌧𑌵𑌃 ।
𑌰𑌾𑌜𑌾 𑌦𑌶𑌰𑌥𑍋 𑌹𑍃𑌷𑍍𑌟 𑌸𑍍𑌸𑍁𑌮𑌂𑌤𑍍𑌰𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 1 ॥
𑌅𑌦𑍍𑌯 𑌸𑌰𑍍𑌵𑍇 𑌧𑌨𑌾𑌧𑍍𑌯𑌕𑍍𑌷𑌾 𑌧𑌨𑌮𑌾𑌦𑌾𑌯 𑌪𑍁𑌷𑍍𑌕𑌲𑌮𑍍 ।
𑌵𑍍𑌰𑌜𑌂𑌤𑍍𑌵𑌗𑍍𑌰𑍇 𑌸𑍁𑌵𑌿𑌹𑌿𑌤𑌾 𑌨𑌾𑌨𑌾𑌰𑌤𑍍𑌨𑌸𑌮𑌨𑍍𑌵𑌿𑌤𑌾𑌃 ॥ 2 ॥
𑌚𑌤𑍁𑌰𑌂𑌗𑌬𑌲𑌂 𑌚𑌾𑌪𑌿 𑌶𑍀𑌘𑍍𑌰𑌂 𑌨𑌿𑌰𑍍𑌯𑌾𑌤𑍁 𑌸𑌰𑍍𑌵𑌶𑌃 ।
𑌮𑌮𑌜𑍍𑌞𑌾𑌸𑌮𑌕𑌾𑌲𑌂 𑌚 𑌯𑌾𑌨𑌯𑍁𑌗𑍍𑌯𑌮𑌨𑍁𑌤𑍍𑌤𑌮𑌮𑍍 ॥ 3 ॥
𑌵𑌸𑌿𑌷𑍍𑌠𑍋 𑌵𑌾𑌮𑌦𑍇𑌵𑌶𑍍𑌚 𑌜𑌾𑌬𑌾𑌲𑌿𑌰𑌥 𑌕𑌾𑌶𑍍𑌯𑌪𑌃 ।
𑌮𑌾𑌰𑍍𑌕𑌂𑌡𑍇𑌯𑌶𑍍𑌚 𑌦𑍀𑌰𑍍𑌘𑌾𑌯𑍁𑌃𑌋𑌷𑌿𑌃 𑌕𑌾𑌤𑍍𑌯𑌾𑌯𑌨𑌸𑍍𑌤𑌥𑌾 ॥ 4 ॥
𑌏𑌤𑍇 𑌦𑍍𑌵𑌿𑌜𑌾𑌃 𑌪𑍍𑌰𑌯𑌾𑌂𑌤𑍍𑌵𑌗𑍍𑌰𑍇 𑌸𑍍𑌯𑌂𑌦𑌨𑌂 𑌯𑍋𑌜𑌯𑌸𑍍𑌵 𑌮𑍇 ।
𑌯𑌥𑌾 𑌕𑌾𑌲𑌾𑌤𑍍𑌯𑌯𑍋 𑌨 𑌸𑍍𑌯𑌾 𑌦𑍍𑌦𑍂𑌤𑌾 𑌹𑌿 𑌤𑍍𑌵𑌰𑌯𑌂𑌤𑌿 𑌮𑌾𑌮𑍍 ॥ 5 ॥
𑌵𑌚𑌨𑌾𑌤𑍍𑌤𑍁 𑌨𑌰𑍇𑌂𑌦𑍍𑌰𑌸𑍍𑌯 𑌸𑌾 𑌸𑍇𑌨𑌾 𑌚𑌤𑍁𑌰𑌂𑌗𑌿𑌣𑍀 ।
𑌰𑌾𑌜𑌾𑌨𑌮𑍃𑌷𑌿𑌭𑌿 𑌸𑍍𑌸𑌾𑌰𑍍𑌧𑌂 𑌵𑍍𑌰𑌜𑌂𑌤𑌂 𑌪𑍃𑌷𑍍𑌠𑌤𑍋𑌽𑌨𑍍𑌵𑌗𑌾𑌤𑍍 ॥ 6 ॥
𑌗𑌤𑍍𑌵𑌾 𑌚𑌤𑍁𑌰𑌹𑌂 𑌮𑌾𑌰𑍍𑌗𑌂 𑌵𑌿𑌦𑍇𑌹𑌾𑌨𑌭𑍍𑌯𑍁𑌪𑍇𑌯𑌿𑌵𑌾𑌨𑍍 ।
𑌰𑌾𑌜𑌾 𑌤𑍁 𑌜𑌨𑌕 𑌶𑍍𑌶𑍍𑌰𑍀𑌮𑌾𑌨𑍍 𑌶𑍍𑌶𑍍𑌰𑍁𑌤𑍍𑌵𑌾 𑌪𑍂𑌜𑌾𑌮𑌕𑌲𑍍𑌪𑌯𑌤𑍍 ॥ ॥
𑌤𑌤𑍋 𑌰𑌾𑌜𑌾𑌨𑌮𑌾𑌸𑌾𑌦𑍍𑌯 𑌵𑍃𑌦𑍍𑌧𑌂 𑌦𑌶𑌰𑌥𑌂 𑌨𑍃𑌪𑌮𑍍 ।
𑌜𑌨𑌕𑍋 𑌮𑍁𑌦𑌿𑌤𑍋 𑌰𑌾𑌜𑌾 𑌹𑌰𑍍𑌷𑌂 𑌚 𑌪𑌰𑌮𑌂 𑌯𑌯𑍌 ॥ ॥
𑌉𑌵𑌾𑌚 𑌚 𑌨𑌰𑌶𑍍𑌰𑍇𑌷𑍍𑌠𑍋 𑌨𑌰𑌶𑍍𑌰𑍇𑌷𑍍𑌠𑌂 𑌮𑍁𑌦𑌾𑌽𑌨𑍍𑌵𑌿𑌤𑌃 ।
𑌸𑍍𑌵𑌾𑌗𑌤𑌂 𑌤𑍇 𑌮𑌹𑌾𑌰𑌾𑌜 𑌦𑌿𑌷𑍍𑌟𑍍𑌯𑌾 𑌪𑍍𑌰𑌾𑌪𑍍𑌤𑍋𑌽𑌸𑌿 𑌰𑌾𑌘𑌵 ॥ ॥
𑌪𑍁𑌤𑍍𑌰𑌯𑍋𑌰𑍁𑌭𑌯𑍋𑌃 𑌪𑍍𑌰𑍀𑌤𑌿𑌂 𑌲𑌪𑍍𑌸𑍍𑌯𑌸𑍇 𑌵𑍀𑌰𑍍𑌯𑌨𑌿𑌰𑍍𑌜𑌿𑌤𑌾𑌮𑍍 ।
𑌦𑌿𑌷𑍍𑌟𑍍𑌯𑌾 𑌪𑍍𑌰𑌾𑌪𑍍𑌤𑍋 𑌮𑌹𑌾𑌤𑍇𑌜𑌾 𑌵𑌸𑌿𑌷𑍍𑌠𑍋 𑌭𑌗𑌵𑌾𑌨𑍃𑌷𑌿𑌃 ॥ 10 ॥
𑌸𑌹 𑌸𑌰𑍍𑌵𑍈𑌰𑍍𑌦𑍍𑌵𑌿𑌜𑌶𑍍𑌰𑍇𑌷𑍍𑌠𑍈𑌰𑍍𑌦𑍇𑌵𑍈𑌰𑌿𑌵 𑌶𑌤𑌕𑍍𑌰𑌤𑍁𑌃 ।
𑌦𑌿𑌷𑍍𑌟𑍍𑌯𑌾 𑌮𑍇 𑌨𑌿𑌰𑍍𑌜𑌿𑌤𑌾 𑌵𑌿𑌘𑍍𑌨𑌾 𑌦𑌿𑌷𑍍𑌟𑍍𑌯𑌾 𑌮𑍇 𑌪𑍂𑌜𑌿𑌤𑌂 𑌕𑍁𑌲𑌮𑍍 ॥ 11 ॥
𑌰𑌾𑌘𑌵𑍈 𑌸𑍍𑌸𑌹 𑌸𑌂𑌬𑌂𑌧𑌾𑌦𑍍𑌵𑍀𑌰𑍍𑌯𑌶𑍍𑌰𑍇𑌷𑍍𑌠𑍈𑌰𑍍𑌮𑌹𑌾𑌤𑍍𑌮𑌭𑌿𑌃 ।
𑌶𑍍𑌵𑌃 𑌪𑍍𑌰𑌭𑌾𑌤𑍇 𑌨𑌰𑍇𑌂𑌦𑍍𑌰𑍇𑌂𑌦𑍍𑌰 𑌨𑌿𑌰𑍍𑌵𑌰𑍍𑌤𑌯𑌿𑌤𑍁𑌮𑌰𑍍𑌹𑌸𑌿 ॥ 12 ॥
𑌯𑌜𑍍𑌞𑌸𑍍𑌯𑌾𑌂𑌤𑍇 𑌨𑌰𑌶𑍍𑌰𑍇𑌷𑍍𑌠 𑌵𑌿𑌵𑌾𑌹𑌮𑍃𑌷𑌿𑌸𑌮𑍍𑌮𑌤𑌮𑍍 ।
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌋𑌷𑌿𑌮𑌧𑍍𑌯𑍇 𑌨𑌰𑌾𑌧𑌿𑌪𑌃 ॥ 13 ॥
𑌵𑌾𑌕𑍍𑌯𑌂 𑌵𑌾𑌕𑍍𑌯𑌵𑌿𑌦𑌾𑌂 𑌶𑍍𑌰𑍇𑌷𑍍𑌠𑌃 𑌪𑍍𑌰𑌤𑍍𑌯𑍁𑌵𑌾𑌚 𑌮𑌹𑍀𑌪𑌤𑌿𑌮𑍍 ।
𑌪𑍍𑌰𑌤𑌿𑌗𑍍𑌰𑌹𑍋 𑌦𑌾𑌤𑍃𑌵𑌶 𑌶𑍍𑌶𑍍𑌰𑍃𑌤𑌮𑍇𑌤𑌨𑍍𑌮𑌯𑌾 𑌪𑍁𑌰𑌾 ॥ 14 ॥
𑌯𑌥𑌾 𑌵𑌕𑍍𑌷𑍍𑌯𑌸𑌿 𑌧𑌰𑍍𑌮𑌜𑍍𑌞 𑌤𑌤𑍍𑌕𑌰𑌿𑌷𑍍𑌯𑌾𑌮𑌹𑍇 𑌵𑌯𑌮𑍍 ।
𑌧𑌰𑍍𑌮𑌿𑌷𑍍𑌠𑌂 𑌚 𑌯𑌶𑌸𑍍𑌯𑌂 𑌚 𑌵𑌚𑌨𑌂 𑌸𑌤𑍍𑌯𑌵𑌾𑌦𑌿𑌨𑌃 ॥ 15 ॥
𑌶𑍍𑌰𑍁𑌤𑍍𑌵𑌾 𑌵𑌿𑌦𑍇𑌹𑌾𑌧𑌿𑌪𑌤𑌿𑌃 𑌪𑌰𑌂 𑌵𑌿𑌸𑍍𑌮𑌯𑌮𑌾𑌗𑌤𑌃 ।
𑌤𑌤 𑌸𑍍𑌸𑌰𑍍𑌵𑍇 𑌮𑍁𑌨𑌿𑌗𑌣𑌾𑌃 𑌪𑌰𑌸𑍍𑌪𑌰𑌸𑌮𑌾𑌗𑌮𑍇 ॥ 16 ॥
𑌹𑌰𑍍𑌷𑍇𑌣 𑌮𑌹𑌤𑌾 𑌯𑍁𑌕𑍍𑌤𑌾𑌸𑍍𑌤𑌾𑌂 𑌨𑌿𑌶𑌾𑌮𑌵𑌸𑌨𑍍 𑌸𑍁𑌖𑌮𑍍 ।
𑌰𑌾𑌜𑌾 𑌚 𑌰𑌾𑌘𑌵𑍌 𑌪𑍁𑌤𑍍𑌰𑍌 𑌨𑌿𑌶𑌾𑌮𑍍𑌯 𑌪𑌰𑌿𑌹𑌰𑍍𑌷𑌿𑌤𑌃 ॥ 1 ॥
𑌉𑌵𑌾𑌸 𑌪𑌰𑌮𑌪𑍍𑌰𑍀𑌤𑍋 𑌜𑌨𑌕𑍇𑌨 𑌸𑍁𑌪𑍂𑌜𑌿𑌤𑌃 ।
𑌜𑌨𑌕𑍋𑌽𑌪𑌿 𑌮𑌹𑌾𑌤𑍇𑌜𑌾𑌃 𑌕𑍍𑌰𑌿𑌯𑌾𑌂 𑌧𑌰𑍍𑌮𑍇𑌣 𑌤𑌤𑍍𑌤𑍍𑌵𑌵𑌿𑌤𑍍 ॥ 1 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌏𑌕𑍋𑌨𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ॥
