𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌿𑌨𑌵𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌤𑌯𑌾 𑌮𑌹𑌤𑍍𑌯𑌾 𑌯𑌾𑌯𑌿𑌨𑍍𑌯𑌾 𑌧𑍍𑌵𑌜𑌿𑌨𑍍𑌯𑌾 𑌵𑌨𑌵𑌾𑌸𑌿𑌨𑌃 ।
𑌅𑌰𑍍𑌦𑌿𑌤𑌾 𑌯𑍂𑌥𑌪𑌾 𑌮𑌤𑍍𑌤𑌾𑌃 𑌸𑌯𑍂𑌥𑌾𑌸𑍍𑌸𑌂𑌪𑍍𑌰𑌦𑍁𑌦𑍍𑌰𑍁𑌵𑍁𑌃 ॥ 1 ॥
𑌋𑌕𑍍𑌷𑌾𑌃 𑌪𑍃𑌷𑌤𑌸𑌂𑌘𑌾𑌶𑍍𑌚 𑌰𑍁𑌰𑌵𑌶𑍍𑌚 𑌸𑌮𑌂𑌤𑌤𑌃 ।
𑌦𑍃𑌶𑍍𑌯𑌂𑌤𑍇 𑌵𑌨𑌰𑌾𑌜𑍀𑌷𑍁 𑌗𑌿𑌰𑌿𑌷𑍍𑌵𑌪𑌿 𑌨𑌦𑍀𑌷𑍁 𑌚 ॥ 2 ॥
𑌸 𑌸𑌂𑌪𑍍𑌰𑌤𑌸𑍍𑌥𑍇 𑌧𑌰𑍍𑌮𑌾𑌤𑍍𑌮𑌾 𑌪𑍍𑌰𑍀𑌤𑍋 𑌦𑌶𑌰𑌥𑌾𑌤𑍍𑌮𑌜𑌃 ।
𑌵𑍃𑌤𑍋 𑌮𑌹𑌤𑍍𑌯𑌾 𑌨𑌾𑌦𑌿𑌨𑍍𑌯𑌾 𑌸𑍇𑌨𑌯𑌾 𑌚𑌤𑍁𑌰𑌂𑌗𑌯𑌾 ॥ 3 ॥
𑌸𑌾𑌗𑌰𑍌𑌘𑌨𑌿𑌭𑌾 𑌸𑍇𑌨𑌾 𑌭𑌰𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌮𑌹𑍀𑌂 𑌸𑌂𑌛𑌾𑌦𑌯𑌾𑌮𑌾𑌸 𑌪𑍍𑌰𑌾𑌵𑍃𑌷𑌿 𑌦𑍍𑌯𑌾𑌮𑌿𑌵𑌾𑌂𑌬𑍁𑌦𑌃 ॥ 4 ॥
𑌤𑍁𑌰𑌂𑌗𑍌𑌘𑍈𑌰𑌵𑌤𑌤𑌾 𑌵𑌾𑌰𑌣𑍈𑌶𑍍𑌚 𑌮𑌹𑌾𑌜𑌵𑍈𑌃 ।
𑌅𑌨𑌾𑌲𑌕𑍍𑌷𑍍𑌯𑌾 𑌚𑌿𑌰𑌂 𑌕𑌾𑌲𑌂 𑌤𑌸𑍍𑌮𑌿𑌨𑍍𑌕𑌾𑌲𑍇 𑌬𑌭𑍂𑌵 𑌭𑍂𑌃 ॥ 5 ॥
𑌸 𑌯𑌾𑌤𑍍𑌵𑌾 𑌦𑍂𑌰𑌮𑌧𑍍𑌵𑌾𑌨𑌂 𑌸𑍁𑌪𑌰𑌿𑌶𑍍𑌰𑌾𑌂𑌤𑌵𑌾𑌹𑌨𑌃 ।
𑌉𑌵𑌾𑌚 𑌭𑌰𑌤 𑌶𑍍𑌶𑍍𑌰𑍀𑌮𑌾𑌨𑍍 𑌵𑌸𑌿𑌷𑍍𑌠𑌂 𑌮𑌂𑌤𑍍𑌰𑌿𑌣𑌾𑌂 𑌵𑌰𑌮𑍍 ॥ 6 ॥
𑌯𑌾𑌦𑍃𑌶𑌂 𑌲𑌕𑍍𑌷𑍍𑌯𑌤𑍇 𑌰𑍂𑌪𑌂 𑌯𑌥𑌾 𑌚𑍈𑌵 𑌶𑍍𑌰𑍁𑌤𑌂 𑌮𑌯𑌾 ।
𑌵𑍍𑌯𑌕𑍍𑌤𑌂 𑌪𑍍𑌰𑌾𑌪𑍍𑌤𑌾𑌃 𑌸𑍍𑌮 𑌤𑌂 𑌦𑍇𑌶𑌂 𑌭𑌰𑌦𑍍𑌵𑌾𑌜𑍋 𑌯𑌮𑌬𑍍𑌰𑌵𑍀𑌤𑍍 ॥ ॥
𑌅𑌯𑌂 𑌗𑌿𑌰𑌿𑌶𑍍𑌚𑌿𑌤𑍍𑌰𑌕𑍂𑌟 𑌇𑌯𑌂 𑌮𑌂𑌦𑌾𑌕𑌿𑌨𑍀 𑌨𑌦𑍀 ।
𑌏𑌤𑌤𑍍𑌪𑍍𑌰𑌕𑌾𑌶𑌤𑍇 𑌦𑍂𑌰𑌾𑌨𑍍𑌨𑍀𑌲𑌮𑍇𑌘𑌨𑌿𑌭𑌂 𑌵𑌨𑌮𑍍 ॥ ॥
𑌗𑌿𑌰𑍇 𑌸𑍍𑌸𑌾𑌨𑍂𑌨𑌿 𑌰𑌮𑍍𑌯𑌾𑌣𑌿 𑌚𑌿𑌤𑍍𑌰𑌕𑍂𑌟𑌸𑍍𑌯 𑌸𑌂𑌪𑍍𑌰𑌤𑌿 ।
𑌵𑌾𑌰𑌣𑍈𑌰𑌵𑌮𑍃𑌦𑍍𑌯𑌂𑌤𑍇 𑌮𑌾𑌮𑌕𑍈 𑌪𑌰𑍍𑌵𑌤𑍋𑌪𑌮𑍈𑌃 ॥ ॥
𑌮𑍁𑌂𑌚𑌂𑌤𑌿 𑌕𑍁𑌸𑍁𑌮𑌾𑌨𑍍𑌯𑍇𑌤𑍇 𑌨𑌗𑌾𑌃 𑌪𑌰𑍍𑌵𑌤𑌸𑌾𑌨𑍁𑌷𑍁 ।
𑌨𑍀𑌲𑌾 𑌇𑌵𑌾𑌤𑌪𑌾𑌪𑌾𑌯𑍇 𑌤𑍋𑌯𑌂 𑌤𑍋𑌯𑌧𑌰𑌾 𑌘𑌨𑌾𑌃 ॥ 10 ॥
𑌕𑌿𑌨𑍍𑌨𑌰𑌾𑌚𑌰𑌿𑌤𑌂 𑌦𑍇𑌶𑌂 𑌪𑌶𑍍𑌯 𑌶𑌤𑍍𑌰𑍁𑌘𑍍𑌨 𑌪𑌰𑍍𑌵𑌤𑌮𑍍 ।
𑌮𑍃𑌗𑍈𑌸𑍍𑌸𑌮𑌂𑌤𑌾𑌦𑌾𑌕𑍀𑌰𑍍𑌣𑌂 𑌮𑌕𑌰𑍈𑌰𑌿𑌵 𑌸𑌾𑌗𑌰𑌮𑍍 ॥ 11 ॥
𑌏𑌤𑍇 𑌮𑍃𑌗𑌗𑌣𑌾 𑌭𑌾𑌂𑌤𑌿 𑌶𑍀𑌘𑍍𑌰𑌵𑍇𑌗𑌾𑌃 𑌪𑍍𑌰𑌚𑍋𑌦𑌿𑌤𑌾𑌃 ।
𑌵𑌾𑌯𑍁𑌪𑍍𑌰𑌵𑌿𑌦𑍍𑌧𑌾 𑌶𑍍𑌶𑌰𑌦𑌿 𑌮𑍇𑌘𑌰𑌾𑌜𑌿𑌰𑌿𑌵𑌾𑌂𑌬𑌰𑍇 ॥ 12 ॥
𑌕𑍁𑌰𑍍𑌵𑌂𑌤𑌿 𑌕𑍁𑌸𑍁𑌮𑌾𑌪𑍀𑌡𑌾𑌨𑍍 𑌶𑌿𑌰𑌸𑍍𑌸𑍁 𑌸𑍁𑌰𑌭𑍀𑌨𑌮𑍀 ।
𑌮𑍇𑌘𑌪𑍍𑌰𑌕𑌾𑌶𑍈𑌃 𑌫𑌲𑌕𑍈𑌰𑍍𑌦𑌾𑌕𑍍𑌷𑌿𑌣𑌾𑌤𑍍𑌯𑌾 𑌯𑌥𑌾 𑌨𑌰𑌾𑌃 ॥ 13 ॥
𑌨𑌿𑌷𑍍𑌕𑍂𑌜𑌮𑌿𑌵 𑌭𑍂𑌤𑍍𑌵𑍇𑌦𑌂 𑌵𑌨𑌂 𑌘𑍋𑌰𑌪𑍍𑌰𑌦𑌰𑍍𑌶𑌨𑌮𑍍 ।
𑌅𑌯𑍋𑌧𑍍𑌯𑍇𑌵 𑌜𑌨𑌾𑌕𑍀𑌰𑍍𑌣𑌾 𑌸𑌂𑌪𑍍𑌰𑌤𑌿 𑌪𑍍𑌰𑌤𑌿𑌭𑌾𑌤𑌿 𑌮𑌾 ॥ 14 ॥
𑌖𑍁𑌰𑍈𑌰𑍁𑌦𑍀𑌰𑌿𑌤𑍋 𑌰𑍇𑌣𑍁𑌰𑍍𑌦𑌾𑌵𑌂 𑌪𑍍𑌰𑌚𑍍𑌛𑌾𑌦𑍍𑌯 𑌤𑌿𑌷𑍍𑌠𑌤𑌿 ।
𑌤𑌂 𑌵𑌹𑌤𑍍𑌯𑌨𑌿𑌲 𑌶𑍍𑌶𑍍𑌰𑍀𑌘𑍍𑌰𑌂 𑌕𑍁𑌰𑍍𑌵𑌨𑍍𑌨𑌿𑌵 𑌮𑌮 𑌪𑍍𑌰𑌿𑌯𑌮𑍍 ॥ 15 ॥
𑌸𑍍𑌯𑌂𑌦𑌨𑌾𑌂𑌸𑍍𑌤𑍁𑌰𑌗𑍋𑌪𑍇𑌤𑌾𑌨𑍍𑌸𑍂𑌤𑌮𑍁𑌖𑍍𑌯𑍈 𑌰𑌧𑌿𑌷𑍍𑌠𑌿𑌤𑌾𑌨𑍍 ।
𑌏𑌤𑌾𑌨𑍍𑌸𑌂𑌪𑌤𑌤𑌶𑍍𑌶𑍍𑌰𑍀𑌘𑍍𑌰𑌂 𑌪𑌶𑍍𑌯 𑌶𑌤𑍍𑌰𑍁𑌘𑍍𑌨 𑌕𑌾𑌨𑌨𑍇 ॥ 16 ॥
𑌏𑌤𑌾𑌨𑍍𑌵𑌿𑌤𑍍𑌰𑌾𑌸𑌿𑌤𑌾𑌨𑍍𑌪𑌶𑍍𑌯𑌬𑌰𑍍𑌹𑌿𑌣𑌃 𑌪𑍍𑌰𑌿𑌯𑌦𑌰𑍍𑌶𑌨𑌾𑌨𑍍 ।
𑌏𑌤𑌮𑌾𑌵𑌿𑌶𑌤 𑌶𑍍𑌶𑍍𑌰𑍀𑌘𑍍𑌰𑌮𑌧𑌿𑌵𑌾𑌸𑌂 𑌪𑌤𑌤𑍍𑌰𑌿𑌣𑌃 ॥ 1 ॥
𑌅𑌤𑌿𑌮𑌾𑌤𑍍𑌰𑌮𑌯𑌂 𑌦𑍇𑌶𑍋 𑌮𑌨𑍋𑌜𑍍𑌞𑌃 𑌪𑍍𑌰𑌤𑌿𑌭𑌾𑌤𑌿 𑌮𑍇 ।
𑌤𑌾𑌪𑌸𑌾𑌨𑌾𑌂 𑌨𑌿𑌵𑌾𑌸𑍋𑌽𑌯𑌂 𑌵𑍍𑌯𑌕𑍍𑌤𑌂 𑌸𑍍𑌵𑌰𑍍𑌗𑌪𑌥𑍋 𑌯𑌥𑌾 ॥ 1 ॥
𑌮𑍃𑌗𑌾 𑌮𑍃𑌗𑍀𑌭𑌿𑌃 𑌸𑌹𑌿𑌤𑌾 𑌬𑌹𑌵𑌃 𑌪𑍃𑌷𑌤𑌾 𑌵𑌨𑍇 ।
𑌮𑌨𑍋𑌜𑍍𑌞𑌰𑍂𑌪𑌾 𑌦𑍃𑌶𑍍𑌯𑌂𑌤𑍇 𑌕𑍁𑌸𑍁𑌮𑍈𑌰𑌿𑌵 𑌚𑌿𑌤𑍍𑌰𑌿𑌤𑌾𑌃 ॥ 1 ॥
𑌸𑌾𑌧𑍁 𑌸𑍈𑌨𑍍𑌯𑌾𑌃 𑌪𑍍𑌰𑌤𑌿𑌷𑍍𑌠𑌂𑌤𑌾𑌂 𑌵𑌿𑌚𑌿𑌨𑍍𑌵𑌂𑌤𑍁 𑌚 𑌕𑌾𑌨𑌨𑍇 ।
𑌯𑌥𑌾 𑌤𑍌 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑍌 𑌦𑍃𑌶𑍍𑌯𑍇𑌤𑍇 𑌰𑌾𑌮𑌲𑌕𑍍𑌷𑍍𑌮𑌣𑍌 ॥ 20 ॥
𑌭𑌰𑌤𑌸𑍍𑌯 𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌪𑍁𑌰𑍁𑌷𑌾𑌶𑍍𑌶𑌸𑍍𑌤𑍍𑌰𑌪𑌾𑌣𑌯𑌃 ।
𑌵𑌿𑌵𑌿𑌶𑍁 𑌸𑍍𑌤𑌦𑍍𑌵𑌨𑌂 𑌶𑍂𑌰𑌾 𑌧𑍂𑌮𑌂 𑌚 𑌦𑌦𑍃𑌶𑍁 𑌸𑍍𑌤𑌤𑌃 ॥ 21 ॥
𑌤𑍇 𑌸𑌮𑌾𑌲𑍋𑌕𑍍𑌯 𑌧𑍂𑌮𑌾𑌗𑍍𑌰𑌮𑍂𑌚𑍁𑌰𑍍𑌭𑌰𑌤𑌮𑌾𑌗𑌤𑌾𑌃 ।
𑌨𑌾𑌮𑌨𑍁𑌷𑍍𑌯𑍇 𑌭𑌵𑌤𑍍𑌯𑌗𑍍𑌨𑌿 𑌰𑍍𑌵𑍍𑌯𑌕𑍍𑌤𑌮𑌤𑍍𑌰𑍈𑌵 𑌰𑌾𑌘𑌵𑍌 ॥ 22 ॥
𑌅𑌥 𑌨𑌾𑌽𑌤𑍍𑌰 𑌨𑌰𑌵𑍍𑌯𑌾𑌘𑍍𑌰𑍌 𑌰𑌾𑌜𑌪𑍁𑌤𑍍𑌰𑍌 𑌪𑌰𑌂𑌤𑌪𑍌 ।
𑌅𑌨𑍍𑌯𑍇 𑌰𑌾𑌮𑍋𑌪𑌮𑌾 𑌸𑍍𑌸𑌂𑌤𑌿 𑌵𑍍𑌯𑌕𑍍𑌤𑌮𑌤𑍍𑌰 𑌤𑌪𑌸𑍍𑌵𑌿𑌨𑌃 ॥ 23 ॥
𑌤𑌚𑍍𑌛𑍍𑌰𑍁𑌤𑍍𑌵𑌾 𑌭𑌰𑌤𑌸𑍍𑌤𑍇𑌷𑌾𑌂 𑌵𑌚𑌨𑌂 𑌸𑌾𑌧𑍁𑌸𑌮𑍍𑌮𑌤𑌮𑍍 ।
𑌸𑍈𑌨𑍍𑌯𑌾𑌨𑍁𑌵𑌾𑌚 𑌸𑌰𑍍𑌵𑌾𑌂𑌸𑍍𑌤𑌾𑌨𑌮𑌿𑌤𑍍𑌰𑌬𑌲𑌮𑌰𑍍𑌦𑌨𑌃 ॥ 24 ॥
𑌯𑌤𑍍𑌤𑌾 𑌭𑌵𑌂𑌤𑌸𑍍𑌤𑌿𑌷𑍍𑌠𑌂𑌤𑍁 𑌨𑍇𑌤𑍋 𑌗𑌂𑌤𑌵𑍍𑌯𑌮𑌗𑍍𑌰𑌤𑌃 ।
𑌅𑌹𑌮𑍇𑌵 𑌗𑌮𑌿𑌷𑍍𑌯𑌾𑌮𑌿 𑌸𑍁𑌮𑌂𑌤𑍍𑌰𑍋 𑌗𑍁𑌰𑍁𑌰𑍇𑌵 𑌚 ॥ 25 ॥
𑌏𑌵𑌮𑍁𑌕𑍍𑌤𑌾 𑌸𑍍𑌤𑌤𑌸𑍍𑌸𑌰𑍍𑌵𑍇 𑌤𑌤𑍍𑌰 𑌤𑌸𑍍𑌥𑍁𑌃 𑌸𑌮𑌂𑌤𑌃 ।
𑌭𑌰𑌤𑍋 𑌯𑌤𑍍𑌰 𑌧𑍂𑌮𑌾𑌗𑍍𑌰𑌂 𑌤𑌤𑍍𑌰 𑌦𑍃𑌷𑍍𑌟𑌿𑌂 𑌸𑌮𑌾𑌦𑌧𑌾𑌤𑍍 ॥ 26 ॥
𑌵𑍍𑌯𑌵𑌸𑍍𑌥𑌿𑌤𑌾 𑌯𑌾 𑌭𑌰𑌤𑍇𑌨 𑌸𑌾 𑌚𑌮𑍂𑌰𑍍𑌨𑌿𑌰𑍀𑌕𑍍𑌷𑌮𑌾𑌣𑌾𑌽𑌪𑌿 𑌚 𑌭𑍂𑌮𑌿𑌮𑌗𑍍𑌰𑌤𑌃 ।
𑌬𑌭𑍂𑌵 𑌹𑍃𑌷𑍍𑌟𑌾 𑌨 𑌚𑌿𑌰𑍇𑌣 𑌜𑌾𑌨𑌤𑍀 𑌪𑍍𑌰𑌿𑌯𑌸𑍍𑌯 𑌰𑌾𑌮𑌸𑍍𑌯 𑌸𑌮𑌾𑌗𑌮𑌂 𑌤𑌦𑌾 ॥ 2 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌤𑍍𑌰𑌿𑌨𑌵𑌤𑌿𑌤𑌮𑌸𑍍𑌸𑌰𑍍𑌗𑌃 ॥
